مش بأيدى

من الحاجات المنكده عليا عشتى انى شايفه الشباب الجميل المثقف والواعى مكتئب او مع التفاؤل حزين
وبصراحه معاه حق كل حاجه محبطه واسوأ شعور فى الدنيا هو الحزن واليأس
الشباب عايز يشتغل فى مجاله ويحقق ذاته ويشوف بلده نظيفه والانسان فيها عنده كرامه والنظام سمه من سماتها فى كل الأمور بدءأ باالمرور . وياكل اكل مغذى آمن على صحته
وفى عداله فى البلد مافيش حاجه اسمها ابن فلان وعلان
الكفء واخد حقه والبلد بتحتضن اولادها والعلم والايمان شعارها
الشباب نفسه يجوز ويجيب شقه وعنده الأستعداد لبذل الجهد بس يلاقى نتيجه
كلنا عارفين السبب بس المشكله ان الحل مش بأيدينا وعن نفسى اشعر انى عاجزه والكلمات فقدت معناها
نفسى يحصل حدث كبير يعمل ديليت لكل اسباب الحزن واليأس عندى وعندنا كلنا
بس ارجع وأقول فى امل بأذن الله لمايكون عندنا هشام البسطاويسى و ونهى الزينى
وشباب المدونات الواعى والمثقف وضابط الشرطه اللى ضحى بحياته علشان ينقذ شابه من الذئاب يبقى فى امل وغيرهم كثيريين بس المطلوب مننا قدر الأمكان نحاول البعد عن اسباب اليأس وندور على من يمنحنا الأمل
من فتره كنت بشوف برنامج العاشره مساء وانا بحترمه جدا وبتعجبنى اوى منى الشاذلى كان ضيف الحلقه محمد صبحى الحديث كله ممتع ويوضح قد ايه محمد صبحى مهتم ببلده وبيحاول فى مجاله حلقات ونيس وفارس بلا جواد بيبين فكرهه.

المهم انه علق على ان ماينفعيش نقول منقوليش ايه اديتنا مصر ونقول حاندى ايه لمصر

رأيه ان الام بتدى حب وحنان واهتمام ورعايه فيشب ابنائها على حبها ورعايتها هى اللى قدمت الأول

لازم مصر تدى اولادها تعليم كويس وصحه جيده وفرص متكافئه وعداله بالتالى يحصل انتماء وفداء لها

حاليا الكل عايز يسيب مصر انى ادعو ربنا من قلبى يارب ولى امرنا من يتقى الله فينا

لااملك الاالدعاء يا رب افرجها من عندك يارب

من شعر نزار

يسرنى جدا بأن ترعبكم قصائدى

وعندكم من يقطع الأعناق

يسعدنى جدا بأن ترتعشوا من قطره الحبر

ومن خشخشه الأوراق

يل دوله تخيفها أغنيه

وكلمه من شاعر خلاق

ياسلطه تخشى على سلطتهامن عبق الورد ومن رائحه الدراق

يادوله تطلب من قواتها المسلحه

ان تلقى القبض على الأشواق

يطربنى ان تقفلوا ابوابكم وتطلقوا كلابكم

خوفا على نسائكم من ملك العشاق

ان تجعلوا من كتبى مذبحه وتنحروا قصائدى كأنها النياق

فسوف يغدو جسدى تكيه يزورها العشاق

يقرؤنى رقيبكم وهو يسن شفره الحلاقه

كأنما رقيبكم فى اصله حلاق

ليس هناك سلطه يمكنها ان تمنع الخيول من صهيلها

وتمنع العصفور ان يكتشف الأفاق

فالكلمات وحدها

ستربح السباق

ستقتلون كاتبا لكنكم لن تقتلوا الكتابه

وتذبحون ربما مغنيا لكنكم لن تذبحوا الربابه

جزء من قصيده القصيده تطرح اسئلتها

نزار ما اروعك الله يرحمك

عيون المحبه

فى اغنيه جميله بيغنيها لطفى بشناق بيقول فيها

لا مونى اللى غاروا منى قالوا لى اش عاجبك فيها قلت للى غارو منى خدوا عينى شوفو بها

كلمات الأغنيه توضح انه شايف جمال لايراه الا المحب انها عيون المحبه

العين فعلا مرايه لمشاعر الأنسان مافيش اجمل من عيون المحبه دى بتشوف كل حاجه جميله فى المحبوب لأنها مش بتهتم بس بالشكل الخارجى لأ كمان بالروح والشخصيه والطبع. ودى بتشوفها فى نظره ام فرحانه بجمال بنتها او وسامه وذكاء ابنها .أو اتنين بيحبوا بعض ومن غير كلام من النظرات بتقدر تقرا قد ايه بيحبوا بعض .بدون ماتقول الأم بحبك يابنتى او قد ايه انتى جميله بتشوفها فى نظره عين المحب لمحبوبه فالعين بترجم المشاعر ايا كانت وبتبين

حاله الواحد النفسيه فرحان زعلان قلقان

.افضل عيون عندى العيون السعيده لما تشوف واحد سعيد بيظهر بريق فى عيونه

. وكأنها تبتسم لك ابتسامه جميله مافيش اجمل من العيون الباسمه تشعرك بالسعاده وكأنها عدوى يارب اشوف كل عيون احبائى ومن يقرألى باسمه

وعيون المحبه ترى فى من تحب كل شئ جميل فالأم التى تحب بنتها تراها جميله جدا وممكن تكون الحقيقه غير كده خالص . هى بتحب فيها حته منها وامتداد لها وحب ربانى مالوش حل

افتكر حكت لى صديقه اخوها بيحب فتاه بدينه جدا ورفضت امه ازاى يابنى اذا كانت كده قبل الجواز. انت مش شايف تخينه قد ايه كان يرد بس دمها خفيف

ترد امه يابنى دى شوحه يرد واللهى شواحنها ده اكتر حاجه عجبانى فيها .هو شايف فيها الجمال الداخلى ممكن . او هى حاجه روحيه زى ما بيقولوا كيمياء الحب . مافيش معايير معينه اللى تحبه انت غيرك لأ ومع المعامله وطول العشره قد تزداد هذه المحبه نتيجه للتفاهم والتعود وقرب الطباع..

لما يكون فى واحد بيحب واحده حب حقيقى ويعرضوا عليه بدلا منها ملكه جمال بيرفضها لأ هو عايز حبيبته اللى بيحبها لأنه يراها بعيون المحبه اجمل من ملكه جمال العالم

ياريت كلنا نشوف بعض بعيون المحبه.

القلوب القاسيه

أقسى شيء على النفس ان تكون قريب ممن لديهم قلوب قاسيه . اصحاب هذه القلوب متبلدين فى المشاعرمهما حاولت ان ترقرق قلوبهم تجد العكس يزدادوا فى العناد والقسوه . وشاء حظى ان اصادف فى حياتى هذه النوعيه من الناس
شاهدت عن قرب زوج صديقه لى هى تمتاز بالعطف والحنان والايثار وسعادتها فى العطاء وهو سعادته فى الأخذ وبدون شكر او كلمه طيبه كما انه بخيل استغربت من صبر صديقتى هذه فهو رغم عطائها وتعاونها يتعمد احراجها والتركيز على عيوبهابل وأحيانا السخريه .لما قلت لها ده بيقسو عليكى لأنك مستسلمه قالت ابدا انا لامستسلمه ولا حاجه انا فكرت بعقل فى كل الحلول ولقيت انه دى عجينته كده حاولت بكل الطرق لكن مافيش فايده ولقيت ان سلوكه ده مع اهله ايضا يعنى العيب مش في .ايه الداعى لكتر المشاكل وعمل جلسات عائليه لن تفيد شوفى دايما اصحاب القلوب القاسيه يكونوا من البخلاء ولا يتسامحوا ابدا ولايغفروا فى حق من حقوقهم او لأى حد يغلط ولو بحسن نيه لكن هم من حقهم ان يجرحوا ويبرروا ولديهم قدره غير عاديه للأقناع لدرجه يشكوكى فى نفسك والأذكياء منهم لديهم قدره على لبس قناع الطيبه والكرم وهو من النوع ده .تأثرت جدا لهذه الصديقه ولكنى استغربت لأنى ارى عليها علامات السعاده مع انها حساسه
لما قلت لها كده قالت لى انا سعيده فعلا لأنى رضيت بنصيبى وعلشان مصلحه أولادى ولم شمل الأسره كنت حا ابقى حزينه لوكان فى تقصير منى كل اللى بعمله انى مش بنتظر منه اى حاجه حلوه بالعكس عارفه انه جاحد وبمنع حدوث مشاكل علشان الأولاد ينجحوا .قلت لها طب وانتى قالت مافيش حاجه تسعدنى قد انى الاقى كل من حواليا سعيد حتى هو
وسرحت فى كلام صديقتى وأفتكرت صديقه اخرى كنت الاحظ دائما انها دائمه الشكر فى والدها بينما لاتذكر امها ابدا ومرت بصديقتى هذه وعكه صحيه حيث مرت بازمه صحيه فوجدت امها تعد لها الطعام وتعطيها الدواء فى ميعاده ولكن لاتبدو عليها علامات القلق وجه جامد وكان التليفزيون مفتوح علىحاله انسانيه زى الحالات اللى كان بيقدمها طارق علام فوجدت كل الموجودين عليهم علامات التأثر بينما والده صديقتى تقزز اللب ولايبدو عليها اى تأثر وجه جامد الملامح وعرفت سبب عدم ذكر صديقتى لوالدتها فهى زى ما بيقولوا قلبها جامد حتى حينما مرض زوجها بمرض خطير كانت لاتتأثر بآلامه لذا فهى تحتفظ بصحتها وحيويتها ولايبدو عليها انها مسنه مع انها فوق الثمانين . للأسف الشديد ان بلاده المشاعر وقسوتها تمنح هؤلاء البشر قوه بدنيه فهم محصنين ضد الأمراض الناتجه عن الأنفعالات كالقلب والضغط

لكنهم فى نفس الوقت لايشعرون بالسعاده لأن السعاده الحقيقيه فى انك تحب وتتحب وصعب قوى تجد من يحبهم حب حقيقى سوى من انسان مخدوع لفتره مؤقته لأنهم مهما امتازوا بالذكاء سرعان ماتكتشف حقيقتهم وأن كان يجدوا سعادتهم الحسيه فى الأسمتماع بالطعام وما شابه.
ماأجمل القلوب الحانيه الرقيقه ان ما يميز الأنسان عن الكائنات الآخرى هى المشاعر . ووجدت فعلا ان الأمثال الشعبيه مش جايه من فراغ صحيح على رأى المثل
المسامح كريم فعلا لاتجد بخيل يتسامح ابدا

بينى وبين نفسى

من الحاجات اللى بتسعد اى انسان فى الدنيا ان يكون له صديق بمعنى الكلمه يشعر بسعاده فى وجوده جنبه ويشعر بالصدق فى مشاعره

ولما بفضفض معاه يحس انه فاهمه وحاسس به

وتكون السعاده متبادله ساعات بروح اماكن جميله مع صحبه عاديه زميله حبت تغير جو فروحنا مع بعض النادى مثلا لكن تفرق لما تكون مع الصديقه اللى فاهماك حتى لوكنت فى اى مكان طعم الحياه بيختلف . كان لى صديقه من النوع ده هى ماشا الله ذكيه ومثقفه ومطلعه على امور الدنيا ودمها خفيف جدا وكانت كمان على درجه عاليه جدا من الرقى ومتعمقه فى الدين هذه الصديقه تزوجت منذ سنين وسافرت امريكا وحالت المسافات ومشغولياتها وامور اخرى حالت بينى وبينها.صعب اوى حاليا تجد الصديق بالمفهوم ده .علشان كده انا صاحبت نفسى

اللى عايزه اقوله لصحبتى بكتبه هنا وطبعا مافيش حد يقرأه بس انا بحس بسعاده وكأن حد معايا

ولقيت انها وسيله لقرأه نفسى ومراجعه اخطائى لما بقرا اللى كتبته بعد كده .صديقتى نفسى صريحه وواضحه الحمد لله ان فى ود بينى وبين نفسى

لو كنت المسئول

لو كنت المسئول
ده اسم برنامج كانت بتقدمه السيده / سهير الأتربى
استأذنكم سأقوم بتقديم البرنامج وحا اكون انا المذيعه والضيف مقاوله يعنى
اهلا بكم ضيفه النهارده مواطنه اسكندرانيه وزعلانه من اللى بيحصل فى اسكندريه طيب لوكنت مكان السيبد عادل لبيب
كنتى حا تعملى ايه
فى الواكع "الواقع " زميلى السابق اللواء عبد السلام المحجوب انجازاته رائعه وده ضغط عصبى عليا وحا احاول ارضى اهل محافظتى الحبيبه اول حاجه
بالنسبه للمساجد المأذنين بيزعقوا واغلبهم اصواتهم مش تمام
حااعمل مسابقه للراغبين وألمؤهلين لهذه المهمه ويتم اختيار الأفضل على ان يراعى ان يكون الصوت مسموع للمنطقه المحيطه بالجامع ولايعلو عن ذلك .يكون صوت جميل به خشوع .اذا كنا يامسلمين متضرريين من هذه الأصوات مابالك بألأخوه المسيحيين والأجانب

حا امنع الباعه الجائلين من المناده على بضائعهم باالميكرفونات ونفس الشىء باالنسبه لأنابيب البوتاجاز وأستخدام الات التنبيه فى اضيق الحدود طبعا حايكون فى غرامات لضمان التطبيق
فى الحقيقه انا نفسى اعمل نوادى اسعارها فى متناول الأٍسر المتوسطه وتكون لها مواصلات سهله سيتم دراسه هذا الموضوع بجديه .

الأهتمام بقصور الثقافه والأعلان عن عقد ندوات لمناقشه احدث الأصدارات والأفلام وجميع احوال البلاد على ان يكون الضيوف يتمتعوا بشهره وجاذبيه لدفع حركه التنوير والتثقيف وعمل مسابقات فى الأنشطه الثقافيه وتغذيه المكتبه بأحدث الكتب وتشجيع الأستعاره.

ثانيا سأقوم بفتح النفق اللى موجود فى ميدان محطه الرمل هذا النفق تم صرف عليه مبالغ هائله ولايستفادمنه مع انه حايخفف ويسهل حركه المرور
وفى نفس الوقت يتم نقل البائعه الجائلين فيه بدلا من زحمه الرصيف وضوضاء تعالى بص بسبعه ونص
زياده عدد خطوط المواصلات التى بها زحام غير عادى وبنفس طريقه زميلى السابق زى ما أهل الأسكندريه تعاونوا معاه فى دهان جميع مبانى الكورنيش ومعظم الشوارع يتم التعاون فى شراء الأـوبيسات
يتم دراسه عمل كوبرى فى شارع ابى قير لتخفيف حده الزحام على ان يتولى هذا الأقتراح وأمكانيه تنفيذه لكليه الهندسه والخبراء فى هذا المجال ده طبعا حا ياخد وقت شويه
وايه كمان .
العمل على ايواء اطفال الشوارع المنتشرين على محطات الترام ومحاوله علاجهم نفسيا وجعلهم مواطنين صالحين
طيب حضرتك حا تبتدى امتى .
زى ما حضرتك شايفه فى حاجات غير مكلفه زى العمل على الهدوء " الأذان الكلاكسات .. وفى حاجات تعتمد على تعاون رجال الأعمال والأهالى سابدأ بها وبأذن الله فورا
وأيه تانى
فى الحقيقه انا شايفه فى اى سوبر ماركت بادخله بلاقى علب سردين مملح وتونه ورنجه مستورده .ازاى يبقى عندنا شواطىء ونستورد اسماك
حا اشوف مع الجهات المعنيه امكانيه عمل مصنع لتمليح وحفظ الأسماك حا يساعد فى حل مشكله البطاله وأمنع استيراد الأسماك.من غير المقبول ان يكون لدينا البحر الأبيض ,والأحمر والنيل ونستورد سمك
وياريت كل محافظه تشوف ايه المصنع اللى ممكن بناؤه يناسب هذه المحافظه مثلا قرأت العام الماضى ان محصول الفراوله فى الأسماعليه كان به فائض كبير وكانت بتحمض ممكن بناء مصنع لعمل العصائر والكمبوت والمربات بدلا من استيرادها وأفر عمله وأحد من البطاله.
فى الحقيقه نتمنى نشوف المشاريع دى تتنفذ وبنشكر ضيفه البرنامج والى اللقاء

الشمس بانت من بعيد

الشمس بانت من بعيد جايه ومعها يوم جديد يجعل نهارنا نهار سعيد

ده مطلع اغنيه جميله للفنانه الجميله شاديه سمعتها من يومين وانا رايحه شغلى شعرت بتفاؤل . صوت شاديه مع لحن رائع ومعانى جميله

وافتكرت ايام الدراسه .لى صديقه بتحب الأغنيه دى اوى و الأغنيه فيها حوار

صاحتى بدرى يا ستى ليه

هو اللى زييى تنام عنيه فى الميعاد ده من كل عام اسهر طول الليل ما انام افتح كتاب واقفل كتاب من هندسه لجبر لحساب آن الأوان والأمتحان ما يقعش فيه غير البليد

بكره النتيجه حا تبقى عا ل ويرزقك بأبن الحلال

الله بقه وبعدين بقه

عمر هذه الأغنيه اكتر من 30 سنه وأفتكرت اغانى النجاح مين ينسى اغنيه الناجح يرفع ايده لحليم دى من حوالى 40 سنه والتلبانى غنى افرحوا ياحبايب لفرحنا النمر اهى بانت ونجحنا عقبالو يا رب نقولها له كل اللى حا يقعد مطرحنا.

ليه مافيش اغانى فيها المعانى الجميله والألحان الرائعه

لو كنت مكان المغنين كنت حا اختار اغنيه كلام جميل وتخص المناسبات مثلا رمضان من 50 سنه غنى عبد المطلب رمضان جانا

ومحمد فوزى هاتو الفوانيس يا اولاد.

دول ناس عملوا اغانى تفكرنا بيهم وضمنوا غنائها ولو مره فى السنه

غنى عبد الوهاب للأم ست الحبايب وشاديه ماما ياحلوه وسعاد حسنى ياما ما يا آمه يامتى .كلها من معالم عيد الأم

و غنت فايزه للأخ يا حبيى ياخويا . اما الآن اغنيه الأم هى امى مسافره وحا اعمل حفله

من يومين بفتح التلفزيون ولقيت خالد ابو النجا مستضيف ابن شعبان عبد الرحيم وسألوا انت بتغنى ايه قال:

انا لقيت سعد الصغير غنى للعنب ونجح اوى قلت حا اغنى للأكل شوفوا غنى ايه

فسخانى وبحب الرنجه والبصل البصل البصل

اغانى يوك اوى . انا شايفه ان شعبولا وابنه ناس شعبيين وطيبيين وسمعت لهم اكتر من حديث فى التلفزيون شعرت ان عندهم انتماء لاسرتهم وبلدهم بس دول يغنوا فى افراح ماشى لكن فى التلفزيون بصراحه عيب. فى مواهب فى فرقه الموسيقى العربيه وفرقه ام كلثوم ومواهب عايزه حد ياخد بأيدها

لكن فسيخ ورنجه . عيب اوى بس خلاص اييييييييييييييه

يرزق من يشاء بغير حساب . .

مطلوب برامج

أغلب المصريين يعتمد على مشاهده التليفزيون كوسيله للترفيه والثقافه والأغلبيه لديها الوصله فأصبح الجميع يشاهد الفضائيات ورغم هذا نجد ان البرامج مكرره والأفلام معاده وبعض البرامج الناجحه تقليد لبرامج اجنبيه مثل برنامج من سيربح المليون ولابأس

ولكن ليه مافيش برامج مبتكره تكون ظريفه ومفيده وصناعه مصريه قلت لنفسى يعنى احنا قاعدين ننقد وبس طب

ما افكر فى برنامج جديد

الأن حان موعدكم مع برنامج المنوعات الجديد

فرصه على الهواء

فكره البرنامج تقوم على اكتشاف المواهب فى جميع مجالات الحياه ولاتقتصر على الفن فقط

جميع انواع الفنون تمثيل غناء اخراج رسم

وكذلك فى كل مجالات العلم بفروعه المختلفه

مده البرنامج 90 دقيقه

يتم فيها اعطاء فرصه لعدد 10 من الموطنين بأسبقيه التقديم حتى تسود العداله وكل واحد حا ياخد 9 دقائق يقدم فيها ما لديه من موهبه الجديد ان المقابله ستكون بدون سابق اعداد كله على الهواء وصنع بلدنا وما بيكسرش .على طريقه الكامير الخلفيه يكون تلقائى

ولو تفتكروا فيلم سعاد حسنى صغيره على الحب فى المشهد الذى يختار فيه رشدى اباظه الفنانه المطلوبه وقد ايه ممكن حدوث مواقف مضحكه ولا الكاميرا الخفيه . فى نفس الوقت قد يتم اكتشاف موهبه حقيقيه وده مكسب

سمعت مره من مهندس شاب حكى لى انه كانت لديه موهبه التمثيل وقام بتمثيل بعض الأدوار اثناء دراسته الثانويه فى كليه فيكتوريا ثم فى كليه الهندسه ثم عمل فى مجال تخرجه ولم يستأنف موهبته لأنه لا يجد الفرصه المتاحه.

هذا الشاب لديه صديق آخر يعتقد انه موهوب وهو ليست لديه اى موهبه ويضيع وقته وجهده فى محاوله الوصول لو اشترك فى برنامج زى ده حا يختصر الطريق اما يبرز وينجح واما يشق طريق آخر

ولضمان نجاح البرنامج يشترط ان يكون المذيع على درجه عاليه من القبول والثقافه

وانا ارشح جورج قرداحى او عمرو اديب او مودى الأمام او الثلاثه مجتمعين او منفردين او بالتناوب

ازيكم بجا.

فلسفه السفاله

للأستاذ رجاء النقاش مقاله رائعه تحت عنوان فلسفه السفاله كتبها فى 9 يونيو 1997
اختارت بعد فقراتها وأن كانت كلها رائعه يقول
من الغريب حقا أن يكون للأشرار فلسفه يبررون بها تصرفاتهم ويدافعون عنها بل انهم يصلون الى درجه من الصفاقه والبجاحه فيرون ان تصرفاتهم هى الصواب القائم على فهم صحيح للحياه وهذا هو الموقف الذى يقول عنه القرآن الكريم ان اصحابه تأخذهم " العزه بالأثم "

ومأكثر الذين يدافعون عن سفالتهم ويجعلون منها فلسفه فى الحياه والسفاله فى حد ذاتها امر كريه ومرفوض ولكن فلسفه السفاله هى من الأمور التى التى تسبب الحيره والدهشه

وقدم الأستاذ رجاء بعض النماذج ومنها نابليون حيث قال نابليون لعدد من المحيطين به " كنت الاحظ ان الشرفاء لا يصلحون لشى" وعباره نابليون هى مفتاح مهم لفهم كل المجتمعات المضطربه ففى هذه المجتمعات يفشل الشرفاء .. وذلك لأنهم فى المجتمعات المضطربه يصلون دائما الى طريق مسدود فهم يعتمدون على الأخلاص والأستقامه فى اوضاع لا ينفع فيها الا المكر والدهاء واللف والدوران وبناء العلاقات التى تتيح الفرص الواسعه للنجاح والتقدم

وأشار الأستاذ رجاء فى هذه المقاله الرائعه بكتاب نماذج بشريه للناقد الجليل الدكتور محمد مندور تقول احدى شخصيات روايه الأب جوريو فى التحريض على البرود وأخفاء المشاعر والأراء وقتل اى تعاطف مع الآخرين

كلما ازدادت برودا فى تقديراتك للناس والأشياء أزدادت نجاحا وتقدما للأمام اضرب بغير شفقه يشعر الناس بالخوف والخشيه منك انظر الى الرجال والنساء كما تنظر الى الخيل اللتى نتركها تموت أو نقتلها بأيدينا بعد نهايه الشوط وبذلك تصل الى اسمى ماترتفع اليه رغباتك

وفى نفس روايه الأب جوريو لبلزاك نقرأ على لسان سافل آخر كيف يشق الناس سبيلهم فى هذه الدنيا لكى يكون لهم مركز كبير.. انهم يشقونه بأحد امرين بريق العبقريه او المهاره والخسه والخسه مثل العبقريه ..قوه وهذه الخسه هى سلاح الضعفاء الذين يملأون الأرض .. يجب ان تلوث يديك اذا اردت أن تكون من الأثرياء ولكن يجب ان تعرف كيف تغسلها . وهذه هى خلاصه الأخلاق فى عصرنا

مختارات من المقالات

علمتنى الحياه

تعودت منذ فتره طويله عندما اقرأ مقاله وتعجبنى أن اقوم بقصها وحفظها لما لها من تأثير على وما فيها من فوائد

من هذه المقالات مقاله تحت عنوان علمتنى الحياه للدكتور يحي الجمل أخترت بعض فقراته يقول

علمتنى الحياه أن ألا انتظر كثيرامن أحد ولاحتى من أقرب الأقرباء .فانك عندما تنتظر ولا يتحقق ماتنتظره تصاب بصدمه على حين انك عندما لاتنتظر شيئا ويحدث غير ما توقعته فأن أثر ذلك يكون طيبا.

علمتنى الحياه أن التوازن هو خير كبير وهو ما عبر عنه الأقدمون بالوسط الفاضل . ومع ذلك فالأنسان مهما يكن متوازنا فهو معرض فى حالات كثيره الى مايقال له النزوات أو الأنفعالات .. وهى نوع من فقد التوازن. والعاقل هو من يحاول يستعيد توازنه والا يترك حبل النزوات أو الأنفعالات يذهب بعيدا

وعلمتنى الحياه أن الندم على ما فات غير مجد وان كان لايخلو من درس وعبرهان مافات فات ولن يغير منه الندم ولكن الندم اذا كان مصحوبا بنوع من الدرس والتحليل والوعى قد يفيد الانسان ويجعله فى المستقبل لا يعيد فعل ماندم عليه

تعلمت ان الآمال الكبيره والأحلام العريضه تبدو كذلك وهى لم تتحقف فاذا تحققت عادت الى حجمها الطبيعى

علمتنى الحياه ان تكون كما انت ولاتحاول ان تظهر بغير حقيقتك فأن ذلك سرعان ماينكشف

علمتنى الحياه ان كثيرا من الحكم التى التى يرددهامن نعتبرهم عامه الناس أو تلك التىكانت تقولها امهاتنامن غير علم هى خلاصه "تجارب الدنيا " امشى عدل يحتار عدوك فيك

علمتنى الحياه ان التمسك بالقيم وأحترام النفس والبعد عن المغانم الرخيصه تعلى من قدرك عند نفسك وعند الآخرين حتى وأن لم يصرحوا بذلك

وعلمتنى الحياه أن وقت الراحه لازم لحسن أداء العمل وأن النظام يضاعف الحصيله اضعاف مضاعفه

وعلمتنى الحياه ان الكلمه الصادقه والمخلصه تجد طريقها الى القلوب بيسر وسهوله وقد يخاف كثير من الناس ان يعبروا لك عن تأييدهم او مواقفهم على ماتقول ولكنهم فى فى داخل انفسهم ينطون لك على احترام وتقدير .بل ويدعون الله ان يكثر من امثالك

علمتنى الحياه اننى استقظ فاحس كأنى لم اتعلم شيئا قط وعلى ان ابدأ التعلم من جديد