لا بيتباع ... ولا بيتشرى

الحنان

كنت من فتره فى زياره صديقه لى كانت راجعه من العمره

وكان عندها قريبه شابه فى عيونها دموع محبوسه وحبيت تنزل لكن صحبتى مسكت فيها .عرفت انها معيده فى احدى الجامعات وحاصله على ماجستير وبتحضر للدكتوراه
وسنها حوالى 34 سنه وسبب حزنها هو انه بوفاه والدها وهى فى اعدادى افتقدت مصدر الحنان الوحيد فى حياتها
لها اخ تزوج وانجب وتعيش مع والدتها التى هى مصدر عذابها!!! هذه الشابه المتفوقه المحبه للعلم تجد سعاده غامره
فى القرأه وخصوصا فى مجال تخصصها وتسكن مع والدتها فى شقه صغيره . اوده نوم وسفره وصاله
وللعيله ورث من والدها المتوفى عباره عن اطيان تدر عليهم دخل وفير
والام هى المتحكم اشترت للأبن شقه فاخره وتصر على ضيافته 3 او 4 مرات فى الاسبوع تطبخ فيهم اشهى المأكولات
ويحضر الاخ وزوجته واولاده للغذاء مما يضيع بعض من وقتها والام متضرره جدا من الكتب ومن ابنتها وعلى طول تنتقدها رغم ان الام كانت مديره وحاليا بالمعاش
ولما قلت لها اكيد اخوكى حنين على مامتك قالت هو غرقان فى خيرها لكنه لايرضى عن تصرفاتها معى . ومستفيد
قلت لها طب طالما الحال ميسور خدوا شقه اوسع يكون لك فيها حجره مستقله
وحاتدفعوا فرق بين شقتكم الحاليه والجديده ومن ورث والدك قالت ان مامتها رافضه حتى تجديد البيت وانه محتاج
جدا تغيير الا ان الام تقول مستحيل وعلى جثتى
وهى مرتبهاعلى قد لبسها وكتبها كما ان والدتها بتطلب منها شراء حاجات للبيت
فى الحقيقه حزنت جدا لوضع البنت دى وفضل الموضوع يشغل بالى
وبعدين قرأت فى المصرى اليوم عن الطفل اللى تاه من سنين طويله حتى ظنت اسرته انه توفى خصوصا ان عنده اعاقه ذهنيه وتوليت تربيته اسره احسنت معاملته واحبته رغم ظروفه واصبح ابن لهم
وظهرت العيله القديمه وتمسكت بابنها فاذا بامه التى توليت تربيته تبكى بحرقه وتتمنى ان لا يفارقها ضناها
سبحان الله الام مش هى التى تلد الام هى التى تحب ابنها ايا كان شكله او ذكائه هى اللى عندها استعداد تضحى بعينها لاولادها القصه فى المصرى اليوم تاريخ اليوم لما قرأتها افتكرت الشابه الحزينه اللى بتتمنى شويه حنان من والدتها
المتيسره خصوصا انها صاحبه حق فى ميراث والدها وبدلا من ان تكون امها سندها وتغمرها بحناها منغصه عليها حياتها
فعلا الحنان لا بيتشرى ولا بيتباع سبحان الله

سيدتى الجميله

ساعات اصادف ناس يكونوا مصدر للسعاده من يومين شفت واحده منهم .كنت فى طريقى الى عملى ووقفت انتظر تاكسى

ولقيت عربيه ملاكى فيات صغيره وقفت امامى وكانت بتقودها سيده منقبه

قالت لى بذوق اتفضلى اوصلك انتى عايزه تاكسى قلت لها ميرسى جدا ربنا يخليكى دلوقتى يجىتاكسى اعتقدت انها تعرض خدماتها خصوصا انى وقفت شويه

قالت لى انا تاكسى ركبت بجانبها وانا معجبه بها جدا

ودار بينا الحديث التالى

انا سعيده جدا انك فكرتى تستغلى العربيه تاكسى

قالت اعمل ايه انا عندى بنتين واحده ثانويه عامه والتانيه اعداديه السنه دى . وانتى عارفه قد ايه الدنيا غاليه والدروس الخصوصيه ومهما تقتصدى البيت بياخذ فلوس كتير

قلت لها ربنا يعينك انتى نموذج مشرف وبيفكر صح

قالت اسعى ياعبد وانا اسعى معاك مش احسن ما استلف او استنى حد يعطف عليا وقالت لى.

انا كمان لو حد بنت او ست عايزه تتعلم السواقه بعلمها بس بخاف على العربيه من البهدله

انا برافو عليكى

سألتها وياترى بتوصلى رجال

قالت لأ مالوش داعى طالما فى ستات لكن لو اسره ممكن

عبرت لها عن فخرى بها اعطتنى رقم الموبايل وقالت لى لو احتاجتينى كلمينى

فرحت بها جدا ودعوت لها فى سيرى وسجلت رقمها

نموذج مشرف للمرأه المصريه التى لاتضع يدها على خدها وتندب حظها.

سيدتى لك كل تقديرى واحترامى مع اخلص الدعوات لكل من يجتهد ان يرزقه الله رزق وفير وربنا يبارك فيه

ذهبت الى عملى وانا فى غايه السعاده والنشاط الحمد لله

الناس عجائن

فى احدى حلقات القاهره اليوم الاخيره اتصل ولى امر طالبه فى اولى ثانوى فى احدى المدارس الشهيره فى الأسكندريه
وقال ان بنته عندها ملحق فى الرياضيات وفوجىء بها بتقوله شوفلى واسطه تنجحنى . انا صحبتى "ن" وقالوا اسمها بالكامل
حاتنجح من غير ماتدخل امتحان الملحق وقالت ان عندها واسطه كبيره فى حكومتنا الذكيه. الاب قالها ماتصدقيش الكلام ده وذاكرى . المهم يوم امتحان الملحق لم تحضر الطالبه المذكوره وكانت
النتيجه نجاحها مما اثار استياء الطالبات واولياء الامور بعد كده اتصل موجه الرياضيات فى المدرسه واقر بصحه الواقعه
وانه قد طلب منه بضم الطاء اعاده تصحيح ورقه الطالبه وحصل لكنه وجدها لا تستحق النجاح او الرأفه وكتب كده على ورقه التصحيح لاخلاء مسئوليته وراحه ضميره
بعد كده وصلت المدرسه لجنه ولا لجان الأمم المتحده مكونه من 9 افراد فى ماده الرياضيات وتم نجاحها !!!!!!
للأسف مش عارفه تم ايه بعد كده
شوفوا بقى البنت قريبه المسئول عندها حوالى 16 سنه تنجح وهى لاتستحق النجاح وبدل ما اهلها يحثوها على المذاكره
لأ ماتزعليش يا حبيبه بابا حاتنجحى طب يعنى غش بمساعده الاهل لأ ونجاح من غير امتحان طب غشوا بذكاء شويه
كان ممكن البنت تحضر الملحق وتنجح وماحدش يحس وده طبعا مصيبه لكن حتى يراعواعدم القيل والقال ده بيورى مدى الأستهتار و كمان الفشخره بمعرفه المسئولين
طب لو البنت استمرت تنجح بنفس الطريقه وتتخرج شوفوا بقه حاتعمل ايه بجهلها لما تشتغل حتى لو ما اشتغلتش
دى لما تبقى ام حاتربى اولادها ازاى

النشأه الطيبه فى السنين الاولى من العمر من الرضاعه وحتى 10 سنوات هى الاساس وممكن فى سن اقل التوقع
بنوعيه شخصيه الطفل .من السنه الاولى بيكون الطفل زى العجينه التى يتم تشكيلها لكن لو اختلطت العجينه بتراب او

مواد ضاره صعب اوى استخراجها بعد كده

فى مواقف فى طفولتى محفوره فى ذهنى مش بقدر انساها

كنت فى ابتدائى وكان فى بنتين ماشاء الله غايه فى الذكاء والشطاره واحده اسمها سناء والتانيه ايات كانوا بيقعدوا جنب بعض فى اخر تخته فى الفصل علشان اطول مننا كان بينهم تفاهم وحب ومنافسه مين حاتكون الاولى وفى احد امتحانات الشهر دخل المدرس وكتب الامتحان على السبوره وبعد شويه قال سنا ء ماتبصسش فى ورقه ايات بس لقينا سناء ماشيه بين الصفوف بحماس شديد ومعاها ورقه الامتحان وقالت للمدرس ادينى صفر انا مش غشاشه بتقولها بمنتهى الثقه هى واثقه انها صاحبه حق

والمدرس ارتبك قالها خلاص جايز انا عينى بربشت طفله مش طايقه احد يتهمها بالغش

لم تخاف او تحلف كما فى اغلب الاحوال فضلت تاخد زيرو ولا يتهمها احد بالغش اتربيت على كده على فكره هى الآن فى مركز مرموق جدا عن جداره طبعا اتربيت صح كان عمرنا حوالى 7 سنين

قبل كده وفى نفس المرحله كان معانا بنت بليده جدا كل يوم تيجى تاخد كرسه منى

وتنقل الواجب المهم كان فى مساله 2+3= 0000

على مايبدو كان نظرها ضعيف نقلت المسأله خطأ كانت كاتبه المسأله 3+3=5

المدرس قالها انتى غاشه الواجب حلفت 100 يمين وعظيم ابدا اصل انا ومنى بنذاكر سوا طبعا كلنا ضحكنا.اكيد اتربيت على الكذب والكسل

طريقه التربيه بتشكل البنى ادم فى سن سبعه تقدر تتوقع الطفل حا يكون كاذب ولاصادق
حايقود ولا ينقاد هادى ولاشقى يعنى لوطفل نشأ على بيت فى تقوى الله ووالده والدته بيأدوا الفرائض
مش بيكذبوا على بعض اسرار بيتهم مش مشاع اذنه اتعودت على سماع الكلام الطيب واخر فى اسره الام بتحكى خصوصيتها للجيران والاصحاب والاب بيشتم بالفاظ مش تمام اكيد الطفل حايقلدهم
موضوع حب القرأه وسماع الموسيقى بيكون له تأثير كبير فى التذوق الحاجات دى ببتشكل البنى ادم من بدرى اوى
افتكرت كل ده بعد حلقه القاهره اليوم واللى يعرف حصل ايه ياريت يقولنا

صلاح جاهين بيقول

علمى ان كل الخلق من اصل طين وكلهم بينزلوا مغمضين

بعد الدقائق والشهور والسنين تلاقى ناس اشرار وناس طيبين

كوكى عبده

اصحى ياكريمه يالا يا بنت علشان تجيبى الجرايد وتحطيها للسكان

وتلحقى تروحى المدرسه

قامت كريمه اف يخرب بيت السكان والجرايد والمدرسه انا زهقت من العيشه دى نفسى اعيش

زى بقيت الناس

طب يالا يالا قومى هاتى الجرايد وبعدين برطمى زى ماانتى عايزه

قامت كريمه واشتريت الجرايد وهى داخله البيت شمت رائحه بارفان تفوح فى المكان اعجبتها ولقيت امامها رجل طول بعرض وانيق وواضح انه من الأثرياء

وبه بعض الشيب برأسه وسألها هو اللواء خيرى فى الدور الكام

قالت فى العاشر

تحب اطلع معاك

لأ انا حا استنى فى العربيه انا معايا ميعاد معاه الساعه 8 الصبح امام العماره

وحبيت اتأكد ان هو ساكن هنا

طب بالأذن طلعت بسرعه ووزعت الجرائد ولما نزلت

وجدته يجلس فى العربيه

وبعد عشر دقائق خرجت بلبس المدرسه

قال لها لسه نص ساعه على ميعاد الباشا تعالى اوصلك

المدرسه ردت بجد كانت امنيتها تركب عربيه واهى جت الفرصه

ركبت معاه وقالها على فكره انتى جميله اوى ياكريمه

تشكر يابيه

ايه رأيك تسيبك من المدرسه والجرايد والهم ده وتشتغلى معايا

وحاخليكى حاجه تانيه خالص

موافقه

طب خدى الكارت بتاعى واتصلى بيا علشان الحق ميعاد اللواء خيرى

لااحظ مدحت بيه ان كريمه استاجبت بسرعه للركوب معاه ولم تترد ولم تسأل عن طبيعه العمل

والبنت حلوه وقال لنفسه البيت عندها استعداد كويس اوى وشكلها يجى منه هى صحيح بلدى شويه بس دى سهله

ورجع لمقابله اللواء خيرى

اللى كان عايزه فى تسهيل الأجراءات الجمركيهالخاصه باستيراد المعدات للفندق الذى يمتلكه

وفى المقابل كان اللواء خيرى يتمتع هو وعائلته بالأقامه فى الفندق العائم الذى يمتلكه مدحت بيه

نظام شيلنى واشيلك والكل مستفيد

كانت كريمه ذكيه وجميله ولكنها ساخطه على حياتها وشايفه انها تستاهل احسن من كده بكتير ووجودها فى العماره الشيك

ورؤيتها للبنات اللى فى سنها وطريقه لبسهم زاد من هذا الشعور

ولما راحت المدرسه قابلت صديقتها نورا اللى كانت ظروفها مشابهه الى حد كبير لظروف كريمه وكل

منهما بيلعن الفقر وسنينه ويتمنى ان يكون عنده عربيه

وشقه فاخره ويحكم ويتأمر ومعاه فلوس كتيرهى دى السعاده

الفلوس والشقه والعربيه وعيشه مستريحه

وحكيت كريمه لنورا اللى حصل من مدحت بيه

شجعتها نورا على الأتصال بيه وقالت لها ياريت توصيه عليا

وفعلا اتصلت به وقابلها ولم يضيع وقت عرفها

على مستر فريد مين مستر فريد ده . ده ياستى بتاع كله حايديكى كورس فى طريقه الكلام والاكل والاتيكيت

وبعدين انتى مش نفسك تكونى غنيه ومعاكى فلوس

فريد حايعلمك كل حاجه حايخليكى هانم بصحيح

وعرفت بعد كده ان طبيعه العمل هى الرقص فى الملهى اللى فى الفندق

يعنى حاجه فرفشه ونعنشه وحاتاخد مرتب كبير ولو حبيت كمان تقيم فى غرفه من غرف الفندق مافيش مانع

كان ابو كريمه عم عزت كما يناديه السكان رجل كبير فى السن لاحول ولاقوه له وامراته هى

الكل فى الكل وكانت فى شبابها امرأه لعوب وتزوجت عزت وهى فى فوق الاربعين طبقا للمثل ظل رجل ولا ظل حيطه وبعد 5 سنين انجبت منه كريمه .

قالت كريمه لامها اللى حصل والأم على خيره الله ملعون الفقراما عم عزت فلا يملك غير انه يوافق على كل اللى تقوله ام كريمه

سابت كريمه المدرسه واتعلمت الرقص واصبح لها اسم وبقيت تتطلب فى افراح المشاهير

وشويه بشويه رقصت فى مشهد فى احد الافلام

وفيلم ورا فيلم بقيت نجمه شهيره

تظهر فى البرامج التليفزيونيه على انها فنانه وحاصله على ليسانس اداب ماهو طبيعله عملها لها علاقه بردوا بالاداب

وهى الأن كوكى عبده وعندها اكتر من عربيه وتحققت احلامها

ولكنها لم تشعر بأى سعاده ولا تعرف سبب لهذه التعاسه

كانت بتتمنى الفلوس والمركز وحصل

دخلت حجرتها ولقيت نفسها بتعيط بحرقه مش عارفه ليه كل العز والفلوس لكن مش مبسوطه

وقالت لنفسها يمكن علشان بفتقد الحب الحقيقى

ابوها وامها كل همهم فلوسها بس فى حمدى بيه اللى بيجى كل يوم علشان يشوفها

وبسمعها كلام معسول وعينيه بتأكد انه ولهان لكن طبعا مش ممكن يتجوزها كانت بتقول كده لنفسها

حمدى بيه اللى كان محامى مغمور ولكن قدر يتزوج

من احدى الارامل بعد ان ورثت من زوجها وعرف يغدر بها وياخد فلوسها. وكان يتردد على الملاهى الليليه ولكن بعد

ظهور كوكى اصبح مواظب على الملهى اللى بترقص فيه كوكى هى بالنسبه له كوكتيل من النساءلا تكتمل سعادته ولا يهنأ له بال الا برؤيتها . كان بينهم حاجه مشتركه ربما تكون الظروف والأهداف ده غير الارتياح والاتنين فاهمين

بعض كانت بتمر بينهم لحظات صمت ولكن نظرات عيونهم بتتكلم بكل اللغات وعرفت كوكى قيمتها عند حمدى وعرفت

توصله لطلبها للجواز وتم الزواج وانتقلت الى شقه اخرى كان معظم تكاليفها هى اللى دافعها علشان تكتمل الصوره

فنانه مشهوره زوجه لمحامى وقالت لنفسها كده حققت هدفى الزوج والشهره ملابس فاخره عربيه اخر موديل والكل يعرف انها ليسانس اداب ولو حبيت تقول دكتوره فى ايدها بردواكل حاجه ممكن تشتريها بفلوسها .

وفى السكن الجديد حست قد ايه الزوجات فى العماره بيخافوا على ازواجهم منها كانت بتقول لنفسها غيره بس

كانت من جواها حاسه ان الستات بتبص لها على انها خاطفه رجاله

بس الاحساس ده ساعد على ظهور حاله الحزن والبكاء تانى خصوصا بعد استغلال حمدى لها ماديا

وزادت نوبات البكاء التى تنتابها نفسها تحس بالسعاده

الفلوس والشقه والزوج والشهره كلها موجوده

بس ايه اللى ناقصها مش عارفه

الأولاد مشروع مؤجل وقابل للألغاء ماهو مش معقول الجسم الجميل ده يضيع فى حمل وولاده
كما انها تعودت على نظره الاعجاب بقوامها ماهو ده رأس مالها كما ان
العاطفه دى مالهاش حيز على الاقل فى الوقت الحالى وبينما هى تبكى افتكرت
ان فى حديث لها حايتذاع فى برنامج اهل الفن
قامت وفتحت التليفزيون كان فاضل نص ساعه على حديثها وكان فى برنامج فى قناه اخرى عن السعاده
مع طبيب نفسى شهير واتصل احد المشاهدين وحكى مشكلته انه لديه
كل ما يسعد اى بنى ادم ولكنه يشعر بغم وحزن عميق لايجد له سبب مع ان عنده مال وفير وزوجه جميله واولادولكنه
يتعذب ويبكى ولايستطيع الشكوى لأن ليس لديه ما يشكومنه
ركزت كوكى وحسيت ان المشكله بتاعتها هى . وقالت اشوف يمكن الاقى حل لتعاستى
وبدأ الدكتور يسأل المتحدث انت بتشتغل ايه ولكن كان الاتصال اتقطع
قالت المذيعه طب يادكتور نتكلم بصفه عامه فى ناس كتير بنسمع انها مش مبسوطه رغم توفر
متطلبات الحياه الكريمه وناس تانيه ظروفها الحياتيه فيها معاناه فى مستوى المعيشه ويمكن يدوبك بيعيشوا بالضرورى
وفى منهم يمكن عنده امراض والعياذ بالله ورغم كده اسعد ايه التفسير
رد الدكتور فى الحقيقه الموضوع ده كبير وعايز حلقات كتيره وفى مؤلفات ودراسات عن السعاده فى ناس
عندها رضا وحاله طمأنينه داخليه وتلاقى اقل حاجه تسعدهم الموضوع له شق علمى وكيمائى وشق تانى سلوكى
الشق الكيميائى ده ربانى فى ماده فى المخ بتفرز حاجه زى الحشيش دى مسئوله عن مزاج الفرد تلاقى واحد ماعندوش فلوس
ويقول قول ياباسط حاتفرج من هنا ولا من هنا ويسهلها عن نفسه
وتانى فى نفس الظروف او احسن يخبط ويرقع ويتنرفز
بيصعب الأمور على نفسه دى حاجه مش بأيد الواحد لها علاقه بالوراثه والجينات بس فى ادويه بتقوم بعمل الماده اللى بيفرزها المخ
طب والشق التانى السلوكى
ده بيبقى ان الواحد بيعمل حاجات هو عارف انها غلط لكن بتسبب له سعاده وقتيه وبعدها يشعر بالندم ويعيد الكره ويفضل
يعذب نفسه زى التاجر اللى بيغش بضاعته وعايش دور التاجر الأمين اللى بيخاف ربنا فى الوقت نفسه هو عارف انه بيرتكب ذنب
وكل ما بيزيد ذكاء المذنب يتفنن فى اسلوب الغش والتغطيه عليه ويعيش فى صراع
بين الصوره اللى بيتمناها ادام الناس واحساسه بالذنب وعدم احترامه لذاته يسبب له
الم نفسى

سرمن اسرار السعاده هو انسجام الظاهر والباطن حاله الصلح بين الانسان ونفسه بينه وبين الآخرين والأهم بينه

وبين الله سبحانه وتعالى الأيمان بالله وانه قاضى عادل وانه بيعمل مايرضاه الله ولايغضبه بيمنحه قوه وسعاده

كمان اعمال الخيرمساعده الفقراء اعانه مريض و العمل الشريف
واذا بكوكى تجهش بالبكاء بصوت عالى اه ياقلبى هوده انا نفسى اكون محترمه نفسى الناس تحبنى وتحترمنى كانسانه
ومش قادره ابطل رقص واشوف الكل وهو بيحسدنى على جمالى
طب اعتزل واتحجب لأمش حااقدر طب ماانا كمان ببسط الناس واسعدهم وده عمل شريف اما انت صحيح دكتورمش تمام اهىء اهىء
طيب بقى احول اشوف البرنامج بتاعى

تمت

ارحموا من فى الأرض يرحمكم من فى السماء

بخصوص الطلبه المختطفين

انا سيده مصريه عاديه بتحب بلدها اوى وافديها بروحى وبحب ا ولاد بلدى وبحب العدل وبكره الظلم والقهر
سمعت عن الطلاب الذين تم اختطافهم .. ولا اعرف السبب وبفرض انهم مذنبين المفروض اهاليهم يعرفوا مكانهم ويوكلوا محامى ويطمئنوا عليهم
ربنا يكون فى عون اهاليهم خصوصا كل يوم بنسمع عن وسائل التعذيب الغير ادميه الشاب اللى كبوا عليه سبرتو وحرقوه ليجبروه على الأعتراف وغيره كتير
الناس برا بتنادى بالرفق بالحيوان احنا بنقول الرفق بالأنسان
دول طلبه يعنى فى سن صغيره لو المختطفين تخيلوهم اخوانهم و او اولادهم ارحموا من فى الأرض يرحمكم من فى السماء
مش طالبين غير العدل

الموضوع اصبح معلن والكل علم به . نأمل ان نطمئن جميعا لسير العدل
ياربى مش حاقول همى كبير حاقول ليا رب كبير حايفرج همى وهم المظلومين
حاليا النائب العام امر بالتحقيق ربنا يسمعنا خير ويطمن اهاليهم يارب

انا كل يوم اسمع فلان عذبوه
اسرح فى بغداد والجزاير واتوه
ماعجبش م اللى يطيق بجسمه العذاب
واعجب من اللى يطيق يعذب اخوه ده كلام صلاح جاهين

ناس محترمه

ناس محترمه

كنت راكبه تاكسى من يومين وكان الجو شديد الحراره وكنا فى عز الظهروقف التاكسى مده طويله فى الاشاره بتاعت سيدى جابر
كان الجو خانق والكل بيصب منه العرق وبدأ صوت الكلاكسات يعلا مما زاد من الشعور بالضيق

اناكنت بقول يارب الاشاره تفتح حاسه ان الهواء سخن ومش قادره اتنفس
فى الوقت ده كان فيه شاب عمره حوالى 18 سنه يرتدى كاب على راسه
وملابسه بسيطه ولكن نظيفه وعلى وجهه ابتسامه رغم الجو الخانق

وكان رايح جاى بنشاط فى وسط العربيات معاه مناديل

كلينكس وكيس كبير مليان اكسسوارات للعربيات زى الفرش اللى بيتحط على تابلوه العربيه

وفوط صفراء وحاجات من النوع ده ورايح جاى بنشاط صعب عليا اوى

فى شباب فى سنه فى فى المصايف وشكله طالب وبيحاول يكسب بعرق جبينه

بمجرد ما قرب امام الشبك بتاعى طلعت 10 جنيه قاللى عايزه ايه قلت دى علشانك

البسمه راحت من على وشه وقاللى انا بشتغل

وفص ملح وداب

انا قصدى اساعده بس على ما يبدو انى جرحته لم اتمالك دموعى وطلبت من السواق

ان يشترى منه وانا اللى حادفع السواق قاللى وانا كمان حاشترى

بس للأسف الاشاره فتحت

السواق قاللى هو بيشتغل مش بيشحت قلت عارفه واللهى انا قلت

زى ابنى واساعده وانفجرت فى البكاءلانى بدل مااساعده

سببت له الم . السواق كان ابن حلال لما حس قد ايه انا قهرانه

قاللى واللهى لو كلنا حانحس ببعض الامور حاتتحسن وقاللى كلام جميل خفف عنى

بس انا كنت زعلانه جدا وقعدت احمد ربنا بقه انا قعده فى تاكسى مش ببذل مجهود وحرانه

ومتضايقه وهذا الشاب الجميل فى عز الحر شايل وعمال يلف

كل اللى اقدرت اعمله ان دعيت له من قلبى ان ربنا يوسع فى رزقه ويبارك فيه

واعجبت به وبحبه لكرامته وبشاشته مع ان الوجوم والغضب كان منتشر حتى اللى قاعدين فى عربيات مكيفه مش مستحملين الاشاره

بينما هو بيتصبب عرق وشايل وعلى رجليه وبيبتسم

احيانا فى ناس بتاخد الموضوع كتسول لكن فى ناس عايزه

مورد رزق وعدم وجود فرص بديله بيضطرها تعمل كده

موقف تانى مشابه وبعد الأول بحوالى 10 ايام

كنت فى سموحه وكان فى عربه فاكهه عليها كريز قلت اشترى

وكان فى اتنين عساكر مرور الظاهر بيسلموا ورديه المهم لقيت

واحد منهم بيقول للفكهانى ادينى بنص جنيه رد الفاكهانى مافيش حاجه بنص جنيه

رد العسكرى ليه هو العنب ده بكم كان فيه زبونه واقفه قالت للفكهانى اوزن له نص كيلو وانا اللى حادفع

العسكرى حلف ميت يمين انه بيحسبه عنب وشكرها ولسه حايمشى

الست قالت له والنبى ما تكسفنى اعتبرنى امك وحياه امك لا انت واخده

الفكهانى اتكسف والعسكرى كان محرج والست تحلف الفكهانى والنبى اديله احسن حاجه

العسكرى مشى والست جرت وراه واللهى ده اللى حصل

حسيت ان الدنيا لسه بخير وفى ناس على قد حالها بس عندها كرامه وعزه نفس

مشيت وانا بدعى للعسكرى وللست وزعلانه على الوضع بتاع الناس

وسعيده ان فى ناس بتحس بشقا وتعب الناس الغلابه

بس حزنى على الناس الشقيانه كان اكتر

ياريت كل اللى ربنا مقدره على مساعده الناس يساعدها من غير ما يجرحها وربنا يرحمنا جميعا يارب