Sunday, November 2, 2008

منى الشاذلى مع د / مصطفى السيد

عالم ووزيـر وبينهما فرق كبير
سعدت جدا وشعرت بفخر لما عرفت من الجرائد ان العالم المصرى د/ مصطفى السيد تم تكريمه من بوش تقديرا لأبحاثه فى معالجه المرض اللعين وحسيت ان المصرى عظيم بس لو وفروا له الفرصه .
فى الحقيقه اول مره اقرأ عن هذا العالم ولما استضافته الرائعه منى الشاذلى فى العاشره مساء اكتشفت انه بدا ابحاثه فى هذا المجال لمعاناه زوجته التى شاركته حياته 25 عاما بهذا المرض ووفاتها وكان شديد التأثر وهو بيتحدث عنها بوفاء وحب وعلم وخلق ماشاء الله
كان الرجل شديد الحياء والتواضع وتحدث عن انجازه ببساطه وشرح سهل ليوصل المعلومه للمشاهد العادى و
كانت منى الشاذلى مغتاظه من تجاهل رموز الدوله والتراخى فى تقدير الرجل وقالت انها اتصلت صباحا بمكتب رئيس الوزارء د / نظيف لتسأله لماذا لم يذهب بنفسه لأستقبال العالم الجليل فلم تتحدث اليه ولكن تحدثت الى احد المسئولين فى مكتبه وكلمتهم بحرقه وعنف زى ماقالت مستنكره عدم الاهتمام فى نفس اليوم وبعد مكالمتها عصرا اتصل د/ نظيف بالعالم وهنأه يعنى حاجه كده سد خانه . كان د /مصطفى شاعر بالخجل والمراره فى نفس الوقت ومش عايز يضيع وقت فى لوم او عتاب
ولما طلبت منى الشاذلى التعليق قالها
انتى لك فضل فى انك لفتى نظرهم وكان يبرر اكيد رئيس الوزارء مشغول وكان محرج مش عارف يقول ايه
طب لما بنعمل انجاز فى الكره بيذهب كبار المسئولين لاستفبال اللعيبه وده شىء جميل طب وانجاز علمى رائع وعالم مصرى يكرمه ويحترمه الدول الكبرى وبلده ولا هنا لأ والأدهى

قالت انها حاولت الأتصال بالدكتور هلال وزير التعليم العالى لكن كان غير متواجد وسألت منى د / مصطفى الم يتصل بك د / هلال قالها ان مكتبه اتصل به للتهنئه واخذ يبرر فى خجل اصل د/ هلال لسه راجع من اليابان وكان عنده برد وكان ينوى مقابلته ده اللى قالوا له مدير مكتب د / هلال ماشى راحت منى الشاذلى قالت نشوف التقرير ده ونرجع تانى التقرير مقابله بين د هلال ومندوب العاشره مساء
لماذا لم تتقابل مع د/ مصطفى السيد
الوزير : احنا كعلماء متابعينه وعارفين انجازته من قبل ماتنشر وعارفين خطواته وبنباركها وبنقابله (ماشاء الله عارف كل حاجه بس مدكن )
منى الشاذلى ده كان كلام د/ هلال تعليقك ايه ي يا د / مصطفى ابتسم فى خجل هو قال انه كعالم متابع لكن فى الحقيقه
لم تتم المقابله وانا مسافر بكره ان شاءالله
اكتفت المذيعه اللامعه بالتقرير . العالم لم يصف نفسه بانه عالم رغم ان هو كده فعلا ولم يكذب فى حديثه وكان فى غايه التواضع وبيحاول يبسط المعلومات بينما الوزير ....
هى دى افضل طريقه لتوضيح مدى جداره وصدق كل واحد فى موقعه العالم .. الوزير .. البرنامج الهادف

مذيعه حياديه صدق فى التقديم وحس و طنى ويقظه حقيقى برنامج محترم وكل القائمبن عليه يستحقوا التحيه
الف مبروك لدكتور مصطفى وربنا يوفقه ويصل لعلاج من اجل كل المرضى شافهم الله وعافنا

29 comments:

Empress appy said...

منى حلوة وبحبها والوزراء ما هم الا شويه مغرورين وبس

دكتور كسلان said...

السلام عليكم ورحمة الله وبركاته

اخبارك ايه يا مدام اميرة
انا سعيد جدا انك نزلتى بوست جديد
على فكرة البوست اللى فات اكتر من رائع

بانسبة للبوست الجديد

انا للاسف ما قريتش عن د/مصطفى كتير
غير مرة واحدة بس فى المصرى اليوم
وللاسف ما شفتش الحلقة

انا مش مستغرب من تصرف رئيس الوزرا او الوزير
لان ده الطبيعى عندهم
اولوياتهم مش تكريم العلماء او الاهتمام بيهم
خصوصا اذا كان عالم فى حجم د/مصطفى
دول اولوياتهم الحفظ على كراسيهم
وزيادة ثرواتهم وتوريث المناصب لاولادهم
وبعدين هما مش فاضيين للحاجات التافهة دى
اهم حاجة مؤتمر الحزب والفكر الجديد اللى خنقونا بيه
ايه يعنى لما عالم يكتشف علاج جديد لمعالجة السرطان
طب ما احنا علما احنا كمان
مش ده كلام الوزير برده


اهم حاجة تقديرنا احنا ليه
لان التقدير الحقيقى هو تقدير الشعب
والحقيقة منى الشاذلى مشكورة ساهمت فى كده
لما قدمته فى برنامجها الجميل
عشان الناس تتعرف غليه اكتروعلى انجازاته
ده غير اهتمامها بتكريمه من جانب الدولة

واحنا الواجب علينا اننا نعرف الناس اكتر بيه
ونكلم كل اللى نعرفهم عنه

ربنا يوفقه ان شاء الله ويرفع اسمه واسم مصر
وان شاء الله الظروف تكون احسن ويتكرم تكريم رسمى وشعبى
لانه اكيد هو حزين جدا عشان ما اتكرمش من بلده

ربنا يكرمك ع الموضوع المهم ده

سلاااااااااااااااااااااااااااااااااااااااااام

Abo 7anf said...

السلام عليكم
الوزير يستقبل فريق كوره
منتخب كسب بطوله
حاجه عليها القيمه
انما دا دكتور
خلاص بقينا بلد بتفرح لما ابنها ينجح فى الالعاب
ومش مهم بقيت المواد

mohamed ibrahim said...

المفروض انه رئيس الجمهورية بنفسه يروح يهنيه
مش رئيس الوزراء يعمله تليفون
و الله انا لو مكان الدكتور
ما كنت رديت علي الوزير
قولوله مشغول
المشكلة انه مسئولين البلد مش فالحين الا في الهلس و بس
انما مصلحة البلد تولع
تحياتي
محمد

قطوف said...

السلام عليكم
أستاذة أميره

انا فعلا إتأثرت لتاحلقه وعلى فكره فيه ناس كتير شافت الحلقه
وكلهم علقوا على ان هو لو هلس
ولعب ونط كان هتنقلب الدنيا ومش هتسكت
ليه لان هى الحاجه الوحيده الى بتلهى الناس
وميفكروش فى اى حاجه تانيه
عرض اكثر من رائع
للحلقه
زى ما انت عوديتينا ديما

a7mad Nabeel said...

السلام عليكم
يعطيك العافية اختي على هذا البوست
الرائع

و الله عيب اللي يصير في بلداننا

فعلا الدكتور مصطفى الشاذلي انسان كبير كبير ،قصة حياته فيها الكثير من المعاني و العبر

من الألم نكون أقوياء و بالصبر نصل الى القمم

تحياتي :)

دنيتى الجميله said...

اميرة حبيبتى
وحشانى جدا
انا لما شوفت الدكتور مصطفى دعيت ربنا اشوف ولادى زيه مش بس فى علمه ولكن ايضا فى تواضعه واخلاقه
وعجبنى تبسيطه لتوضيح اكتشافه واسلوبه الجميل فى التفسير للشخص العادى البسيط
جعله الله فى ميزان حسناته

بس خلاص ... said...

اختى الحبيبة اميرة الامرة
والله انتى ست اميرة فعلا... علماء ايه ياحبيبتى اللى المسئولين يهتموا بيهم لو كانت الحكايه ان عالمه هى اللى خدت جايزة فى مهرجان درجة تالته كان الكل اتلم حواليها من مسئولين واصحاب السطوة والمال فى بلدنا ...
ولكن زى ماقال دكتور كسلان ممكن تكون غيرة من وزير البحث العلمى مثلا ....
وبعدين اذا كان بوش بنفسه هو اللى كرمه وعرف قيمته ... يبقى مش اقل من ان رئيس الجمهورية ورؤساء كل الدول الاسلاميه والعربية يكرموا الراجل الطيب المتواضع ده ولا هى الملايين والتكريمات لعصام الحضرى وليلى علوى و...... الخ بس
لكن اقولك
العالم الجميل المتواضع ده مش محتاج تكريم من الشرزمة الشريرة دول ... عمله هيفضل خالد وباقى وهيتكلم عنه ... غير اها هتعتبر صدقة جارية لان كل مريض ربنا هيعافيه هيكون له فيها صدقة
لان رسولنا الكريم قال فيما معناه ان اللى يخفف عن معثر فى الدنيا ربنا يخفف عثراته فى الاخرة ) صلوات ربى وسلامه عليه
وشكرا على اللفته الكريمة دى بس ياريت احنا نكلم ولادنا عنه لان فعلا قل المثل الاعلى فى الزمن ده امام اولادنا
والله المستعان

Anonymous said...

Mawdo3k gamd w rbna ysl7 el 7al.

Sherif

سمراء said...

وسافر واحنا ووزرائنا قاعدين
وشعارنا بعد ما كان
ادخلوها بسلام امنين
بقي
اخرجوا منها هربانين
مرة من الظلم ومرة من التجاهل ومرة من الفقر


سمراء

د/ رامي شهاب الدين said...

الفرق بين العالم والوزير فرق شاسع

لأنه ببساطة الوزير بيتم إختياره وتعيينة ، أما العالم فدى مش وظيفة بالإختيار أو التعيين ، ده بيكون وفق إنجازاته وأبحاثه

د. مصطفى السيد ماشاء الله عالم بمعنى الكلمة ، حتى تواضع وأدب العلماء موجود عنده

صدقينى مصر مليانة نوابغ بس للأسف فى مكان مش مكانها ، وزمان مش زمانها

دمتى بكل الود .. تحياتى

Beram ElMasry said...

هذا ردى على المدعو امل فنحى المضلل
سيدتى او سيدى امل
الاسلام دين سماوى ، وكتابه محفوظ بعناية الله من التحريف عكس ما حدث للكتابين من قبله ، وليس دينا وضعيا كالبوذية والمجوسية والبهائية ، كى تطرح قضاياه للنقاش فى المدونات ، اوالدفاع عنه ضد مرضى عميت قلوبهم ، لسنا اهل تخصص ولا فقهاء وللفقهاء احترامهم ولهم حق الاجتهاد والامر ليس متروكا لكل من هب ودب ، ولماذا نشكك فى فقهاء الاسلام بينما لايجرؤ يهودى او مسيحى فى مجادلة حاخام اوقس رغم ما طرا على الكتابين من تحريف وما حوياه من تضارب واختلاف ، وما حوياه من مجون وسوء ادب مع الانبياء ، كنشيد الانشاد للنبى سليمان عليه السلام
السيد او السيدة امل ، ادرئي عن نفسك الشبهات فهذه دعوة باطلة يراد بها باطل

.:.-=- ELGaZaLy-=-.:. said...

عجبتنى اوى منى فى الحلقة دى بجد كانت جميلة بجد.. انا مكنتش اعرف كتير عن مصطفى السيد قبل الحلقة دى..بقاللى كتير مجتش هنا..يارب تكونى بخير

Anonymous said...

العزيزة كلمات
=============
هذه دولة لاتحترم العلم .. بالتالى هذا هو حالها .. فى آخر الصف

klmat said...

appy
اهلا بك معاكى حق . وحشانى اوى
ربنا يوفقك ويكرمك

klmat said...

الأبن العزيز د/ كسلان
وعليكم السلام ورحمه الله وبركاته
انا بخير الحمد لله . ويارب انت تكون فى احسن حال. متفقه معاك فى كل كلمه كتبتها
المصرى اليوم جريده محترمه وحياديه واللى بيكتبوافيها وطنين وبيجبوا البلد وينشروا كل الأحداث مع اراء نيره ياريت يكون فى مذيعات على مستوى منى الشاذلى الرائعه . وجميل اننا نقول لبعض عن الشخصيات المضيئه فى حياتنا
انا سعيده اوى بتعليقك وتشجيعك ليا
ربنا يخليك ويكرمك ونفرح بك ياااارب
خالص تحياتى وتقديرى

klmat said...

abo 7anf
اهلا بك فعلا عاملين زى والد التلميذ اللى ابنه جاب الدرجه النهائيه فى الألعاب
فعمله حفله اصله مش واخذ باله انه جاب صفر فى باقى المواد بلد لعب بصحيح
شرفتنى خالص تحياتى وتقديرى

klmat said...

محمد ابراهيم
اهلا بك . الكل بيقول فى سره فعلا كان المفروض الريئس استقبله وبكده يبقى غمليا بيهتم نمش بس كلام وتصريحات عن اهميه العلم لكن تقول ايه زويل عرض مشروع لبناء جامعه فى مصر والموضوع فى الأدراج بينما قطر بتلهث ورائه للسف الشديد
ربنا يصلح حالنا
سعدت جدا برأيك وتعليقك
خالص تحياتى وتقديرى

klmat said...

سى السيد
اهلا بك . واشكرك جدا .بس هو مش فيلم نشوف الجمهور عايز ايه وحتى الناس البسطاء بيتفرجوا على البرامج دى لانهم مش بيعرفوا يقرو وبتكون وسيله لرفع الوعى
اما المسئولين دول مشغولين بمصالحهم علشان كده احنا بنتقدم بهم
الرائع هو تشريفك بزيارتى
خالص تحياتى وتقديرى

klmat said...

a7med nabil
اهلا بك . يعطيك العافيه منور مدونتى
ربنا يصلح حالنا وحال كل ابلاد العربيه
خالص تحياتى وتقديرى

klmat said...

دنيتى الجميله
اهلا بك . وان شاء الله تشوفى ولادك فى اعلى المراتب وقمه فى الخلق .طالما عندهم ام زيك ان شاء الله حايكونوا مشرفين وتفرحى بهم يارب
خالص حبى وتقديرى

klmat said...

بس خلاص
اهلا بك ياقمر . احيانا بحس انى ساذجه فعلا
دول مسئولين عن الفرفشه والنعنشه لهم طبعا . ود / مصطفى ان شاء الله علمه حاينفعه لأن هدفه تخفيف آلام الناس والتارخ اكيد حايكرمه ويذكره اما المسئولين فدول منهم لله
سعيده اوى بتعليقك ربنا يخليكى ويكرمك
خالص حبى وتقديرى

klmat said...

sherif
اهلا بك واشكرك على المجامله الرقيقه
وربنا يسمع منك ويصلح الأحوال
ربنا يكرمك ويوفقك
خالص تحياتى وتقديرى

klmat said...

سمراء
اهلا بك يا احلى سمراء.معاكى حق الناس دلوقتى لو عندها فرصه تسيب البلد
حاتيبها هربا من الظلم والقهر والتلوث واخير العيش اللى بالعلف
ربنا يصلح الحال يارب
بحبك اوى
خالص تحياتى وتقديرى

klmat said...

م / الحسينى
سعدت بمرورك
مع تحياتى

klmat said...

د/ رامى شهاب الدين
اهلا بك . وانا متفقه معاك مصر مليانه بمواهب كتيره وعلماء لكن محتاجين يكونوا فى الموقع اللى يليق بهم احنا اغلب القيادات الغير مناسبه واللى ضميرها نائم هى اللى واخده وضعها
سعدت تجدا بملرورك ورأيك
ربنا يوفقك
خالص تحياتى وتقديرى

klmat said...

bearm el masry
اهلا بحضرتك . جميل لنك تمر عليا ولو انى مش عارفه مين امل فتحى
ربنا يوفقك

klmat said...

algazaly
اهلا بك فينك . منى فى الحقيقه دايما متألقه
بخاول دايما اشوف البرنامج وسعيده انك شفته وربنا يبارك فى د / مصطفى ويزيده علم ويصلح حالنا
سعدت جدا بمروروك وتعليقك
خالص تحياتى وتقديرى

klmat said...

sherif
اهلا بك انت قلت المختصر المفيد
بحب اوى اعرف رأيك
خالص تحياتى وتقديرى