نحو الأميه

ذكريات الخدمه العامه
"وما الخدمه العامه الاخدعه كبيره "
لماتخرجت كان عندى حماس للشغل وطبعا كان فى سنه خدمه عامه فقررت انى اسعى ان اخدها فى مجال محو الاميه علشان يبقى فى فرصه اشتغل الصبح المهم انى سعيت لكده والحمد لله حصل كنت بدرس محو الاميه فى مدرسه مش بعيد عن بيتى والصبح اشتغلت بعقد فى شركه كبيره حصل فيها مواقف عجيبه .
مش مهم مش مهم فى بوست تانى
المهم كان عدد التلميذات فى محو الاميه اقل من عشره اعمارهن من 9 سنوات حتى 75 آه واللهى كده زى قراء مجله ميكى كان ايامى يكتبوا عليها من سن 8 لــ 88
ما علينا قلت فى عقل بالى ربنا اكرمنى ولقيت شغل احاول اعلم الناس دى واكسب ثواب كان فيهم بنتين او تلاته
صغيرات من سن 9 و12 سنه وحوالى خمسه او سته من 25 الى 35 سنه وواحده فوق السبعين .
كوكتيل غريب كلهم ناس حالتهم الماديه ضعيفه جدا البنات الصغيرات كانوا بيبعوا فى السوق
ليمون و جبنه قريش بيقفوا مع والدتهم ربنا يعنيهم اللى من 25 الى 35 متجوزات وعايزين يذاكروا لأولادهم .
ده اللى قالوه لي .
ا اما الست الكبيره 75 سنه دى كانت لطيفه جدا صابغه شعرها بالحنه فلونه احمر لانه اساسا ابيض وعلى راسها طرحه شفافه سودا مش بتربطها بتسيبها تهفهف على رقبتها وتمسك كراسه فى ايدها وتجرى عليا اول ماتشوفنى وتمسى عليا وتقوللى ازيك يا ابله انا كنت بقول فى سيرى ده انتى اللى تيتا .
وكانت بتتصرف وكأنها طفله عندها 5 سنوات كنت بحبها اوى
كان نفسى فعلا اعلمهم واخليهم يواظبوا على الحضور لانى عرفت من واحده درست فى محو الاميه قبلى
قالت لى دول مش غاويين علم ولا حاجه دى وسيله بيخرجوا بها من البيت وكأنهم رايحين النادى
المهم لقيت فعلا كل يوم فى حد يغيب
قلت لازم اعمل حاجه تشدهم وتخليهم ييجوا يتعلموا كلهم بنات يبقى موضوع الطبيخ والحلويات يهمهم انا اختار اصناف سهله جديده بشرط تكون اقتصاديه وكمان ابقى ادى بين يوم وتانى دروس مبسطه فى الدين عن سيره الرسول عليه الصلاه والسلام المهم بدأت بنبذه عن حياه الرسول و فى حصه كنت بشرح فيها ماحدث بعد وفاه سيدنا محمد
وبمجرد ماقلت لما سيدنا محمد ص. ع مات لقيت واحده من الستات وشها احمر وخبطت على صدرها بقوه وصرخت فى وشى سيدنا محمد مات !!! لا اله الا الله لا اله الا الله .. واللهى مااعرف ولا حد قاللى ياابله ..ولا عندى خبر لا حول ولا قوه الا بالله . واخدتها الجلاله وكان بادى عليها التأثر
كنت عايزه انفجر من الضحك بس كنت خايفه على شعورها ومش عايزه باقى الستات يقلسوا عليها المهم استأذنت علشان اشرب طلعت اضحك ودخلت تانى لابسه وش الجديه وتماسكت وفهمتها ان الكلام ده من زمان هى كانت فاهمه ان سيدنا محمد نبى ومش ممكن يموت بس احنا مش شايفينو !!!
الموقف يضحك بس يصعب عليك الناس دى شقيانه بين شغل فى البيوت او بيع سلع بسيطه ومن كتر التعب ياكلوا ويناموا وابيض ياورد
اما الست الكبيره دى كانت حكايه الظاهر انها عندها طفوله متأخره او ما عشتش الطفوله بمعناها
كنت بديهم 1 و 2 لحد 5 يكتبوها واجب جابت الواجب وادينى صح يا ابله وبتهز راسها فى دلال
عملت لها علامه صح تدبدب فى الأرض لأ بقى انا خطى حلو ادينى نجمه حرام كده !!!
وحاجات من كده وتمشى وهى حاضنه الكراسه ولا سعاد حسنى
المهم فى يوم اديتهم اسهل واسرع كيكه وشرحت لهم الطريقه تانى يوم الست جت وجايبه معاها هريسه غير كيكتى خالص شكلا وموضوعا وقالت لى عملتها زى ماقلتى بالظبط يالا خليهم يصقفوا لى .
كانت فتره ظريفه بس فعلا ماكنوش عايزين يتعلموا للأسف كانوا جايين يتسلوا باستثناء بنت واحده او اتنين
فكانت نحو الاميه مش محو الاميه بس اخدت الشهاده واللهى كان نفسى اعلمهم الكتابه والقرأه هما استفادوا بس مش زى ماانا كنت عايزه الموضوع عايز حماس ورغبه من اللى بيتعلم واللى بيعلم
اغلب الدارسين مرهقين وعايزين يتعلموا من غير تركيز او يتسلوا ونسبه كبيره من اللى بيدرسوا رايحين متضررين زى فتره الجيش عايزين ياخدوا اتمام الخدمه وبس مافيش دافع او حب للعمل الاجتماعى ده كان ما شعرت به فى وقتها
بس اعتقد دلوقتى ممكن فى اميين قرأه وكتابه لكن ظنى ان الوعى ارتفع الفضائيات والكابل موجوده حتى فى البيوت الفقيره
واحنا من 100 سنه ولسه نحو الاميه مثمره وبناءه ماشيه بالتوازى مع البنيه التحتيه عقبال مانوصل للفوقيه على قكره الست
الكبيره كان اسمها فوقيه الحاجه فوقيه . ...والله ماحاتفرق معانا الاسامى

جمهوريه الك لك

جمهوريه الك لك هى احدى جمهوريات الحنك وتتميز بموقع استراتيجى ممتاز كما انها تزرع الخيار الأستراتيجى المميز بطعمه المر
اما المملح منه فهو سبايسى خالص مالص . يرأس هذه الدوله العريقه رئيس يدعى دومتى موزال وهو يتمتع بحكمه وطوله بال يشار لها بالبنان
وكان لدومتى 3 صديقات فى غايه.الخسه والدهاء هن اصلاح ورياده وشفافيه وجدوا ان شعب الك لك بدأ يلك كثيرا كما انه شعب نمرود لايشبع من الفتات فاخذت كل من رياده وشفافيه وراس الحرباء اصلاح تفكر وتفكر ثم عادت تفكر وتفكر وسكتت قليلا لتفكر وتفكر وقطع تفكيرهم دومتى وقالهم ايه الحكايه حانسيب الناس تلك كده على الفاضى والمليان لحد امتى موقفى بقى محرج حنب اخوانا فى الجوار الاشقا ء دول الحنك الشقيقه فقالت اصلاح سيبك انت ده مافيش غيرى افكارى جهنميه وعندى حلول فهلويه
قالت اصلاح شوفوا هو حقيقى شعب الك لك بيتكلم كتير بس على الفاضى وعلى كل الحل بسيط احنا حانشغله فى بناء نفق وبعد مايتهد حيله نقوله ان النفق ده حايسبب كارثه ولازم نهد النفق ونعمل كوبرى وبعد مانعمل كوبرى نكتشف اذ فجأه انه معوج فنهد وتستمر عمليه الهد والبناء والاجتماعات وتشكيل اللجان لحد مايتهد حيل هذا الشعب النمرود .
ضحكت رياده وشفافيه من الفكره العبقريه لكن كل منهما كان عنده غيره دلوقتى دومتى حايحب اصلاح اكتر وينعم عليها اكتر
فاخذت كل منهما يفكر ويفكر ثم قامت رياله قصدى رياده مختاله بقوامها الممشوق وفستانها الشفاف وبوذ جزمتها اللى بينم عن انوثه طاغيه وقالت لدومتى بخفه ودلع سيبك انت ده مافيش غيرى ده انا رياده هانم والأجل على الله
وضع دومتى ايده ورا اذنه مصطنع انه لم يسمع وقالها قولى تانى ياريري حاتعملى ايه
قالت له انا اكبر رياده فى المنتيكه انا بقوامى الممشوق وملابسى الشفافه حاغرى كل الرجال ما انا ملكه اخراء وحاخليهم يفكروا فيا حا اكتر من الافلام الهايفه والفن الهابط وحانراعى طلباتهم هما بيحبوا هيفاء ودى صحبتى والهيافه لعبتى وشويه هلس على شويه اشاعات وخناقات تعمل شو حلو وتاخد وقت وعلشان الناس المتدينين ما يمنعش نطلع شويه فتاوى نعمل حاجات كده منوعه لمنع الملل وتضييع الوقت وتهييف التفكيريا وبكده مش حايلكوا الا فى الفاضى
اغتاظت شفافيه وقالت يعنى انا اللى حاسكت ابدا
قعدت تفكر وتفكر ثم تفكر وتفكر وقالت اسمع يادمتى الشعب ده صحته بتهضم الزلط وده مهم لمود البناء احنا ندخل شويه
امراض فشل كلوى على التهاب كبدى على شويه امراض خطيره وبكده نقلل من عدد السكان لكن دومتى استاء من الفكره حرام الناس مش ناقصه حكم انه حنين فا ادركت شفافيه الموقف وقالت لأ ماهو احنا حانبنى مستشفيات للعلاج وده يبقى فى ملف الأنجازات وعلشان اخوانا بتوع الحديد والأسمنت يلاقوا لقمه عيش وممكن حد من الأسره يكون راعى لهذا المشروع الضخم والأنسانى
خصوصا ياحرام الأطفال ونلم تبرعات للعلاج يعنى مش حاندفع ونعين شويه من اصدقائنا المخلصين اللى بيعرفوا يتكلموا
ويلبسوا الحق ثوب الباطل والعكس دول يقعدوا يهللوا لانجازتنا العظيمه
ضحك دومتى بفخر فلديه 3 صديقات فى منتهى التيكلم تيكلم وناشد ابنه ان يستفيد من هذه الخبرات الثمينه لتنفعه عند توليه الحكم بعد عمرطوووووووويل وقالهم على بركه الله نقرا الفاتحه علشان البركه تحل
وكسبت جمهوريه الك لك الرياله بكل فخر وعن جداره

كلام من القلب

من القلب للقلب

نظر الجد الى حفيده وبادله حفيده النظر وكأن كلاهما يقول للآخر بحبك اوى

وقاله ايه رأيك فى الشياكه دى ورد الجد تفسى احضنك وخايف اكرمش القنيص

ارتمى فى حضنه قميص ايه ياحبيبى مافيش اجمل من حضنك وجلس بجانبه قوللى ياجدى انا شايف

عينك فيها كلام كتير وحاسس انك عايز تقوللى حاجه تحرك الجد ببطأ واخرج من محفظته صورته

وهو فى العشرينات شاب وسيم ملامحه تشبه الحفيد تماما

شايف انت شبهى قد ايه على فكره مش بس فى شكلك كمان فى تفكيرك حتى الالوان اللى بتحبها

واصناف الاكل تمام زيى علشان كده انا بحبك قوى

انا دلوقتى عندى 80 سنه والحمد لله بتمتع بصحه وعافيه . عارف انا اغلب دفعتى اتخرجت من الدنيا

وزى ما انت شايف عايش لوحدى بعد وفاه جدتك وانت عارف كانت غاليه عليا قد ايه حزنت واتقهرت

وشعرت بالوحده لفتره من هول الفراق رغم توقعه فى سننا شويه ولقيت انى لو تعبت حااتعب كل من حولى وده شعور مش بحبه فقررت اخد بالى من صحتى وحزنى اعوضه بتذكر الذكريات الجميله بعمق زى الممثل اللى بيتقمص الشخصيه وينسى نفسه ويعيش فيها وشغلت نفسى بمشاكل اولادى واحفادى ونفسى اعطيك خلاصه تجاربى وقرأتى بس ...

بس ايه ياجدى انا عارف ان الناس مش بتحب النصائح ومهما تنصحهم بيعملوا اللى فى دماغهم الى ان يكتشفوا

اخطائهم بعد فوات الأوان لكن ظنى انك مختلف وتحب من ينصحك .... تمام ياجدى

عارف انت ماشاءالله عليك سنك كبير بس بجد انا حاسس انك صاحبى وفاهمنى اوى

الجد كده بقى تبقى انت اللى عجوز .... .. .... .شوف ياحبيبى

ياه ياجدى كلمه حبيبى دى بتمس قلبى وروحى

دى اول نصيحه لما تحب قول وعرف اللى بتحبه حاتفرح قلبه بالكلمه الجميله بس قولها لما تحسها وتكون عايز تصرح بها لأن تكرارها عمال على بطال يفقد روعتها وتكون عاديه

تمام ياجدى . تانى حاجه اهتم دايما بالتخلص من الحزن والهم او على الاقل تقاومه ومش حااقولك ازاى انت اللى لازم تعرف كل واحد فينا فيه حاجات بتساعده وتقويه لنزع احزانه اللى يسمع موسيقى تطلعه من همه اللى يخرج

اللى بيرسم .يزور شخصيه بيحبها اللى يتأمل فى جمال الطبيعه واللى حتى يقعد فى بلكونته

فى ناس بتنمى احزانها وتفضل تعيش فيها دول بيتعبوا والناس بتبعد عنهم لعبوسهم فتزيد معانتهم لو فكرت حاتلاقى فى احلك الظروف الدنيا بتمشى فلا داعى ان تهد قوتك وصحتك دور دايما عما يبهجك

واذكر ربنا كثيرا فى سرك وتأمل بديع مخلو قاته وانت ماشى سبح بحمده واشكره حاتلاقيه معاك فى شدتك بيقويك وينصرك

دايما اسعى وراء العلم والمعرفه فهو مفتاح نجاحك وتقدمك حاول ان تتعلم من تجارب الآخرين خذ بالك ان اغلب الناس بتتعلم من تجاربهم وممن يكتشفوا بانفسهم لا مانع ان تضيف رصيد من خبرات من حولك

لا تستجدى الحب ولاتطلبه دى مشاعر مش بايدنا و لا تهدر وقتك وكرامتك اللى يبيعك ابعد عنه ولا تجرح احد . حتى وان كنت لا تحبه يكفى انك لا تبادله شعوره لا تخسره فان تخسر انسان بيحبك بعيد عن الذكاء

واعلم ان كل شىء محتمل وكل شىء نسبى وما يعجبك ويجذبك قد ينفر منه غيرك

اذا اردت ان تنجح فى شىء ما فاجعل عينيك مفتوحه وركز تفكيرك فى هدفك فلا احد يصيب هدفه وهو مغمض عينيه .

الانتصارات والهزائم جزء من حياه كل انسان اما الذين لا ينتصرون ولا ينهزمون فهم الجبناء

الخوف من العقاب هو الذى يلزم الجميع

لااحد يستطيع اضافه حرفا على ماهو مكتوب . قدر كل انسان مكتوب سلفا . ولا تضيع وقتك فيما قد يحدث غدا

انه غيب لا يعلمه الا الله .

افعل ما تحب وتقتنع به طالما لا يتعارض مع دينك ومبادئك

لقد قابلت صعاب وعثرات كثيره فى حياتى لم ااسف عليها لانها زادتنى علم وخبره انظر لها من هذه الزاويه

الحياه الزوجيه شركه من اثنان . عندما يتوقف احدهما يجبر الآخر على القيام بالمثل

اعمل دائما الخير مهما حدث ومهما قوبلت بنكران للجميل استمر فى فعل الخير ستشعر انك فى منتهى القوه والسعاده

اشعر ان الموت يقترب منى ياحبيبى لا اريدك ان تحزن عليا انها سنه الحياه واعلم انى عشت حياه سعيده وعميقه

قد تبدو تعيسه لمن يراها من بعيد لكنى كنت راضى وسعيد بقسمتى ورغم تقدم سنى اعلم انىاعيش احلى الاوقات

فانا اصلى بروحى وامتع عينى بشروق الشمس وغروبها وجمال البحر وتسعدنى اشياء بسيطه جدا اكثر بكثير من الممتلكات والاموال الفانيه واشعر برضا ربى ودى كل السعاده

هذى بلادى لم تعد كبلادى فاروق جويده

لم استطع ان امنع دموعى من ان تنساب وانا اقرأ هذه الأبيات المؤثره والموجعه ابيات بتعبر بصدق عن الآلام اللى واجهها اخواننا اللى ضاقت بهم الحياه فى بلدهم فاضطروا للسفر والموت غرقا الله يرحمهم ويصبر اهاليهم وينتقم من اللى وصلهم لكده ويحرق قلبه زى ما اتحرق قلب اهاليهم دول غير من يقاسى من امراض فتاكه بسبب المياه والدم واللبن والهواء الملوث والغذاء المسرطن والغلاء الفاحش والظلم والقهر و اكثر الله من امثال فاروق جويده ومتعه بالصحه والعافيه لو فى مسئولين عندهم نفس المشاعر والضمير ما وصلنا لهذه الحاله المترديه ربنا ينتقم منهم ويحرق قلبهم زى ماتحرق قلب امهاتهم وحسبى الله ونعم الوكيل

كم عشتُ أسألُ: أين وجــــــــهُ بــــلادي

أين النخيلُ وأيـن دفءُ الــوادي

لاشيء يبدو في السَّمـَــاءِ أمـامنــــــــــا

غيرُ الظـلام ِوصــورةِ الجــلاد

هو لا يغيبُ عن العيــــــــون ِكأنــــــــه

قدرٌٌ .. كيوم ِ البعــثِ والميــــلادِ

قـَدْ عِشْتُ أصْــــرُخُ بَينـَكـُمْ وأنـَـــــادي

أبْنِي قـُصُورًا مِنْ تِـلال ِ رَمَـــادِ

أهْفـُـو لأرْض ٍلا تـُسـَـــاومُ فـَرْحَتـِــــي

لا تـَسْتِبيحُ كـَرَامَتِي .. وَعِنَــادِي

أشْتـَـاقُ أطـْفـَـــــالا ً كـَحَبــَّاتِ النـَّــــدَي

يتـَرَاقصُونَ مَـعَ الصَّبَاح ِالنـَّادِي

أهْـــفـُــــو لأيـَّـام ٍتـَـوَارَي سِحْــرُهَـــــا

صَخَبِ الجـِيادِ.. وَفرْحَةِ الأعْيادِ

اشْتـَقـْــــتُ يوْمـًا أنْ تـَعـُــودَ بــِــــلادِي

غابَتْ وَغِبْنـَا .. وَانـْتهَتْ ببعَادِي

فِي كـُلِّ نَجْــم ٍ ضَــلَّ حُلـْـــٌم ضَائـِـــــع ٌ

وَسَحَابَــة ٌ لـَبسـَـتْ ثيــَـابَ حِدَادِ

وَعَلـَي الـْمَدَي أسْـرَابُ طـَيــر ٍرَاحِــــل ٍ

نـَسِي الغِنَاءَ فصَارَ سِـْربَ جَرَادِ

هَذِي بِلادٌ تـَاجَـــرَتْ فــِـي عِرْضِهـــَــا

وَتـَفـَـرَّقـَتْ شِيعًا بـِكـُـــلِّ مَـــزَادِ

لـَمْ يبْقَ مِنْ صَخَبِ الـِجيادِ سِوَي الأسَي

تـَاريخُ هَذِي الأرْضِ بَعْضُ جِيادِ

فِي كـُلِّ رُكـْن ٍمِنْ رُبــُــوع بـِـــــلادِي

تـَبْدُو أمَامِي صـُورَة ُالجــَــــلادِ

لـَمَحُوهُ مِنْ زَمَن ٍ يضَاجـِــعُ أرْضَهَـــا

حَمَلـَتْ سِفـَاحًا فـَاسْتبَاحَ الـوَادِي

لـَمْ يبْقَ غَيرُ صـُـرَاخ ِ أمـْــس ٍ رَاحـِـل ٍ

وَمَقـَابـِر ٍ سَئِمَتْ مـِــنَ الأجْـــدَادِ

وَعِصَابَةٍ سَرَقـَتْ نـَزيــفَ عُيـُـونِنـَــــا

بـِالقـَهْر ِ والتـَّدْليـِس ِ.. والأحْقـَادِ

مَا عَادَ فِيهَا ضَوْءُ نـَجْــــم ٍ شـَــــــاردٍ

مَا عَادَ فِيها صَوْتُ طـَير ٍشـَـــادِ

تـَمْضِي بـِنـَا الأحْزَانُ سَاخِــــرَة ًبـِنـَــا

وَتـَزُورُنـَا دَوْمــًا بـِـلا مِيعــَـــادِ

شَيءُ تـَكـَسَّرَ فِي عُيونـِــــي بَعْدَمَـــــا

ضَاقَ الزَّمَانُ بـِثـَوْرَتِي وَعِنَادِي

أحْبَبْتـُهَا حَتـَّي الثـُّمَالـَـــــة َ بَينـَمـَــــــا

بَاعَتْ صِبَاهَا الغـَضَّ للأوْغـَــادِ

لـَمْ يبْقَ فِيها غَيـرُ صُبْــح ٍكـَـــــــاذِبٍ

وَصُرَاخ ِأرْض ٍفي لـَظي اسْتِعْبَادِ

لا تـَسْألوُنـِي عَنْ دُمُـوع بــِــــــلادِي

عَنْ حُزْنِهَا فِي لحْظةِ اسْتِشْهَادِي

فِي كـُلِّ شِبْر ٍ مِنْ ثـَرَاهـَا صَــرْخَـــة ٌ

كـَانـَتْ تـُهَرْولُ خـَلـْفـَنـَا وتـُنَادِي

الأفـْقُ يصْغُرُ .. والسَّمَــاءُ كـَئِيبـَـة ٌ

خـَلـْفَ الغُيوم ِأرَي جـِبَالَ سَـوَادِ

تـَتـَلاطـَمُ الأمْوَاجُ فـَــوْقَ رُؤُوسِنـَــــــا

والرَّيحُ تـُلـْقِي للصُّخُور ِعَتـَادِي

نَامَتْ عَلـَي الأفـُق البَعِيـــدِ مَلامــــــحٌ

وَتـَجَمَّدَتْ بَينَ الصَّقِيـِع أيـــَـــادِ

وَرَفـَعْتُ كـَفـِّي قـَدْ يرَانـِي عَاِبـــــــــرٌ

فرَأيتُ أمِّي فِي ثِيـَــابِ حـِـــــدَادِ

أجْسَادُنـَا كـَانـَتْ تـُعَانـِـــقُ بَعْضَهـَــــا

كـَوَدَاع ِ أحْبَــابٍ بــِــلا مِيعـَــادِ

البَحْرُ لـَمْ يرْحَمْ بَـرَاءَة َعُمْرنـَـــــــــا

تـَتـَزاحَمُ الأجْسَادُ .. فِي الأجْسَادِ

حَتـَّي الشَّهَادَة ُرَاوَغـَتـْنــِي لـَحْظـَــة ً

وَاستيقـَظـَتْ فجْرًا أضَاءَ فـُؤَادي

هَذا قـَمِيـصـِـــي فِيهِ وَجْــــهُ بُنـَيتــِي

وَدُعَاءُ أمي .."كِيسُ"مِلـْح ٍزَادِي

رُدُّوا إلي أمِّي القـَمِيـــصَ فـَقـَـدْ رَأتْ

مَالا أرَي منْ غـُرْبَتِي وَمُـرَادِي

وَطـَنٌ بَخِيلٌ بَاعَنــي فـــــي غفلـــــةٍ

حِينَ اشْترتـْهُ عِصَابَة ُالإفـْسَـــادِ

شَاهَدْتُ مِنْ خـَلـْفِ الحُدُودِ مَوَاكِبــًـا

للجُوع ِتصْرُخُ فِي حِمَي الأسْيادِ

كـَانـَتْ حُشُودُ المَوْتِ تـَمْرَحُ حَوْلـَنـَا

وَالـْعُمْرُ يبْكِي .. وَالـْحَنِينُ ينَادِي

مَا بَينَ عُمْـــــر ٍ فـَرَّ مِنـِّي هَاربـــــًـا

وَحِكايةٍ يزْهـُــو بـِهـَـــا أوْلادِي

عَنْ عَاشِق ٍهَجَرَ البـِلادَ وأهْلـَهـــــــَـــا

وَمَضي وَرَاءَ المَال ِوالأمْجـَـــادِ

كـُلُّ الحِكـَايةِ أنَّهـــَـــا ضَاقـَتْ بـِنـَـــــا

وَاسْتـَسْلـَمَتَ لِلــِّـصِّ والقـَـــوَّادِ!

في لـَحْظـَةٍ سَكـَنَ الوُجُودُ تـَنـَاثـَـــرَتْ

حَوْلِي مَرَايا المَوْتِ والمِيـَـــلادِ

قـَدْ كـَانَ آخِرَ مَا لـَمَحْتُ عـَلـَي الـْمَـدَي

وَالنبْضُ يخْبوُ .. صُورَة ُالجـَلادِ

قـَدْ كـَانَ يضْحَـكُ وَالعِصَابَة ُحَوْلـَــــــهُ

وَعَلي امْتِدَادِ النَّهْر يبْكِي الوَادِي

وَصَرَخْتُ ..وَالـْكـَلِمَاتُ تهْرَبُ مِنْ فـَمِي:

هَذِي بـِلادٌ .. لمْ تـَعُـــدْ كـَبـِلادِي

انواع من الرجال

هناك نوع من الرجال يجد سعاده كبرى فى معرفه العديد من النساء ويجد سعاده فى القرب منهن وعمل علاقات عديده والغريب ان كثير
منهم متزوج من سيدات فاضلات وجميلات وبالطبع الميسور ماديا بتكون فرصته اكبر ويبرر لنفسه بمبررات هو يعلم قبل غيره بانها واهيه
اللى يقولك اصل مراتى نكديه او مهمله .. قاسيه بفرض ان ده صحيح وحالته الماديه تمكنه من الزواج لأ تلاقيه بينسج شباكه
حول البنات او الستات وهناك نوع اخر يحب عمليه ايقاع النساء فى حبه مش حبه للنساء هو اللى بيحركه لأ عمليه الأيقاع نفسها
زى اللى غاوى صيد هو لايصطاد حبا فى السمك لأ عمليه الصيد نفسها هى المتعه فى حد ذاتها
وهذا النوع هو الأخطر لأنه كلما كانت البنت على خلق زادت العمليه صعوبه واصبحت عمليه الصيد غير رتيبه بل اكثر متعه
كيف يختار هذا الصياد فريسته
قد يكون مدير او صاحب شركه او جار اوحتى قريب وبحكم هذه العلاقه سواء كان مدير او قريب بيستغل معرفته للفريسه ويضع قناع الأهتمام بها ويعجب بكل ارائها ويفهمها انه يفهمها جيدا وياحبذا لو عندها ظروف خاصه تعانى من وحده او قسوه فى الأسره
هو يبدأ بالأستماع لها اولاحتى يدرس نقاط ضعفها وقوتها ويعرف المدخل اللى حايدخل منه وتبدأ العمليه بالسماع لها باهتمام وانصات
واعجاب ولامانع من اظهار بعض الدهشه معقوله انتى متحمله كل ده وتستعذب الفتاه هذا الأهتمام الذى تفتقده وهو فى هذه المرحله لا يطلب منها شيئا هو منصت اليها بعد كده يبدأ يحكى عن نفسه احداث حقيقيه يعنى انه متزوج فدى حقيقه شويه عن طبعه وشويه عن عيوب مراته
ويبقى الاتنين عندهم حاجات مشتركه اهمال من البيت او قسوه وتبدأ البنت فى الأرتياح والتعود على هذه الجلسات وبخبرته بيعرف امتى يخليها تتمنى ان يعلن حبه وقد يكون اكبر منها بكتير ممكن فى سن ابوها والبنت صغيره قد ترفض من يتقدم لها لأنها تتخيل انها وجدت من يحبها وتحبه وقد تكتشف هذه الفناه ان له علاقات اخرى فتصدم وتواجهه هو بتمرسه عنده من المبررات ووسائل الخداع ما يستطيع اقناعها به وتكون هى قد تعودت على ان تعيش حاله الحب وترفض ان تتخلى عن السعاده التى تشعر بها كما انه يغرقها فى الكلام المعسول وان كل النساء جنبها ولاحاجه ويرجوها ان تظل بجانبه وتنخدع الفتاه الا ان مع تكرار القصص تبدأ مرحله الفوقان والندم وقد تصل الى كرهها لنفسها او قد تسلم له نفسها وتبدأ فى البكاء والنحيب وهو لا يشعر بألامها وتستغرب معقوله هوده الرجل اللى بحبه معقوله حنانه ينقلب الى هذه القسوه وتراه اتجه الى عمليه صيد اخرى وبينما هى تتمزق من الألم هو فى بدايه مرحله جديده بل احيانا يشعر بسعاده عندما يراها تتعذب فهو صاحب ضمير ميت زى دراكولا عندما يمتص دم الفريسه ويراها تنزف ويستعذب المها والعياذ بالله
طبعا انا بأكد ان ده بعض من الرجال واغلبهم بيكون غنى وفلوسه بتساعده ويبرر لنفسه زى ما الأنسان يحتاج للترفيه بأن يدخل سينيما او مسرح علشان يقدر يشتغل بعد كده هو دى وسيله الترفيه بتاعته ويبرر اصل انا عايز افكر فى شغلى
هذا ما كتبته بعد قرأه مقاله فى احدى التدوينات لفتاه رقيقه جدا تستغرب موقف حبيبها لكثره علاقته النسائيه وكيف كانت تثق
به انا كتبت لأنى شعرت ان فى كتير من بناتنا بينخدعوا فحبيت الفت نظرهم وربنا ينور بصيره بناتنا ويهدى رجالنا