سياده الرئيس .........شكرا جزيلا

من اعماق قلبى بحمد ربنا وبشكره انه امد فى عمرى لحد ماشفت ولاد بلدى الشباب الرائع القوى اللى هب مره واحده وفك اسرنا من الخنوع والاستسلام ...تسلموا يااااارب وتسلم عقولكم الجميله النيره اللى استخدمت عقولها وسخرت وسائل الاتصال الحديثه لتجميع كل الشباب ومعاهم كل المصريين فى كل مصر ليهبوا ويقولوا لأ للظلم والفساد ومش حانسلم ولا حانطاطى وصدورنا مفتوحه لرصاصكم وسيارتكم لقتلنانموت فى الميدان افضل مانموت كمدا ومرضا باالسرطان والفشل الكلوى والكبدى وفى المرور والعبارات وقصور الثقافه ثم يتم فرض الضرائب ولم التبرعات لعلاج الامراض التى تسببوا فيها
سياده الرئيس
فى الوقت الذى ينعم مؤيديك با الفلل والسيارات الفارهه ويأكلون الكافيار ويوكلون البلطجيه يقف الغلابه ويموتوا فى طوابير العيش وانابيب البوتاجاز
من ينسى عبد الحميد شتا الذى انتحر لتفوقه وحصوله على المركز الأول فى امتحانات الخارجيه ليحقق حلمه فى ان يكون دبلوماسيا وعيبه انه غير لائق اجتماعيا
من يأخذ ارفع الأوسمه الكل يعرف انه يمص دم الشعب الا تكتفى بكل هذا وتطل علينا وتوعدنا وتوعدنا دون تحقيق اى شىء لأ ويتهمنا رئيس الوزراء بأننا غير ناضجين
وتشيد سيادتك باالأنتخابات الأخيره
سياده الرئيس شكرا فبتصميممك على موقفك زدتنا صلابه وقوه و وحدتنا كلنا مسلم ومسيحى نساء ورجال متعلمين ومثقفين وجاهلين علماء واطباء ومهندسين ومعلمين ومحاميين وبوابين وشغالات فى البيوت وسيدات مجتمع كلنا يد واحده ضدك وعلى حب بلدنا التى كنا نحلم بمغادرتها لكى نحصل على قوتنا وكرامتنا خارج بلدنا كنا نقول اننا مصريين واحنا خجولين دلوقتى بنقولها واحنا فخورين
لقد تألمنا جميعا وذرفنا الدمع على حفيدك والكل كان بيواسيك حتى المعارضيين لأننا بنى آدميين هل تأثرت وانت ترى مؤيديك يدهسون اولادنا باالرصاص والسيارات هل تشعر بقهره امهاتهم وابائهم وذويهم المفروض انك راعى لهم
اللى افهمه ان اى انسان هدفه فى الدنيا هى الوصول للسعاده هل يسعدك انك تحكم ناس رفضاك هل تنام وانت مرتاح الضمير
نفسى اعرف انت عايز ايه حكمت 30 سنه واخدت كل فرصك حققت امالك فى الحكم والسلطه ولديك تخمه من الأموال والعقارات وثلاثه وثمانين عاما ماذا تريد هل الشهور الباقيه التى تحكم فيها ناس اقل مايوصف انهم يرفوضك
كيف تنام وانت مرتاح الضمير هل انت سعيد وشعبك ضدك والعالم يلومك
سيدى من اجل كرامتك وصورتك ارحل وعش وحيدا

كره صغيره

ذهبت الى المول للتسوق مع صديقتها ودخلت معها الى احد المحال الخاصه باالملابس الرياضيه لشراء كوتشى اذا بصديقتها عيناها تمتلىء با الدموع وتبكى فى صمت وتأثر بالغ مع انها كانت تبدو سعيده ولا يوجد ما يعكر مزاجها

دهشت الصديقه وصاحت خير ما بك فى ايه

قالت لها وهى تبتسم ابدا ابدا مافيش حاجه بس عينى وقعت على الكره دى

وامسكت بكره صغيره ذات لون اخضر زرعى وفى حجم البرتقاله وعليها رسوم حمراء صغيره تشبه التى فى اركان ورق الكوتشينه واخذت تتمعن فى الكره بحنين بالغ

قالت ياالله الكره دى زى اللى كان بابا الله يرحمه اهداها لى وانا طفله كى العب بها لأن اخواتى الصبيان كانوا يستحوذن على الكره الموجوده فى البيت تمام كأنها هى

انا فاكره اليوم ده اوى وحضن بابا ليا وفرحتى بها كانت كبيره كنت العب بها وأرى فى عيونه الرضا لانه اسعدنى بها

وتمتمت الحكايه دى من زمان اوى اوى بمجرد ماشفت الكره افتكرت بابا وطفولتى سبحان الله مجرد كره وفى مرات اشياء تانيه قد تكون رائحه او اغنيه او لون ترجعنا سنين طويله لذكرى دفينه فى مكان فى القلب

عندما يرحل من نحبهم من الدنيا او با السفر بيرحلوا بجسدهم فقط ولكن يظلوا معنا فى قلوبنا ووجدانا محفورين فى الذاكره نتذكهرم من اشياء صغيره قد تكون ليست ذات قيمه ماديه غاليه ولكن ذكراها غاليه جدا وهناك من نراهم بجوارنا ولكنهم رحلوا من قلوبنا

مش صحيح البعيد عن العين بعيد عن القلب اللى فى القلب فى القلب

سلامى

اصدقائى الغاليين
من كل قلبى بتمنى لكل من زار مدونتى وعلق عندى وحتى من مر دون تعليق ان تكونوا جميعا بخير وسعاده
كنتم دائما سبب لسعادتى وتعليقكم بيفرحنى ويجبر بخاطرى
وبعتذربشده لعدم ردى على التعليقات لضيق وقتى بين عملى وبيتى والالتزامات العائليه خصوصا وانى مسافره خارج مصر لفتره وان شاء الله لما ارجع بالسلامه اكتب تانى .
متعكم الله بالصحه والعافيه والى اللقاء

لست الا بعض الاوراق

ادعو كل اصدقائى الاحباء الى مشاركه المهندس / شريف صاحب المدونه الجميله "شريف " فرحته فى نشر اول كتاب له
من زار مدونته يعى تماما ان الكتاب سيكون ممتع وجدير بالقرأه
لمزيد من التفاصيل زوروا مدونته وستكونوا فائزين حقيقى كتابته ممتعه ومفيده
http://cherry0000.blogspot.com
الف مبروووووووووووك ياشريف وعقبال ماتبقى سلسله

من القلب للقلب

نظر الجد الى حفيده نظره حانيه مملؤه بالحب وقاله تفسى احضنك وخايف اكرمش القميص

ارتمى فى حضنه قميص ايه ياحبيبى مافيش اجمل من حضنك وجلس بجانبه قوللى ياجدو انا شايف

عينك فيها كلام كتير وحاسس انك عايز تقوللى حاجه تحرك الجد ببطأ واخرج من محفظته صورته

وهو فى العشرينات شاب وسيم ملامحه تشبه الحفيد تماما

شايف انت شبهى قد ايه على فكره مش بس فى شكلك كمان فى تفكيرك وذوقك فى الالوان

واصناف الاكل تمام زيى علشان كده انا بحبك قوى وحاسس انك حته منى

انا دلوقتى عندى 80 سنه والحمد لله بتمتع بصحه وعافيه . عارف انا اغلب دفعتى اتخرجت من الدنيا

وزى ما انت شايف عايش لوحدى بعد وفاه جدتك وانت عارف كانت غاليه عليا قد ايه حزنت واتقهرت

وشعرت بالوحده لفتره من هول الفراق رغم توقعه فى سننا شويه ولقيت انى لو تعبت حااتعب كل من حولى وده شعور مش بحبه فقررت اخد بالى من صحتى وحزنى اعوضه بتذكر الذكريات الجميله بعمق زى الممثل اللى بيتقمص الشخصيه وينسى نفسه ويعيش فيها وشغلت نفسى بمشاكل اولادى واحفادى ونفسى انت كمان ماتخليش اى حزن يسيطر عليك مهما كان السبب قوى الحياه بتستمر عيشها واستمتع بها زى ما بيقول فريد الاطرش الحياه حلوه بس نفهمها انا حاعطيك خلاصه تجاربى وقرآتى بس ...

بس ايه ياجدو انا عارف ان الناس مش بتحب النصائح ومهما تنصحهم بيعملوا اللى فى دماغهم الى ان يكتشفوا

اخطائهم بعد فوات الأوان لكن ظنى انك مختلف وتحب من ينصحك

عارف ياجدو انت ماشاءالله عليك سنك كبير بس بجد انا حاسس انك صاحبى وفاهمنى اوى

كده تبقى انت اللى عجوز .... .. .... .شوف ياحبيبى

يااااه ياجدو كلمه حبيبى دى طالعه من قلبك و مست قلبى وروحى رغم انى عارف انك بتحبنى بس لما سمعتها منك شكل تانى

دى اول نصيحه لما تحب قول وعرف اللى بتحبه حاتفرح قلبه بالكلمه الجميله بس قولها لما تحسها وتكون طالعه من قلبك لأن تكرارها عمال على بطال يفقدها روعتها

لا تستجدى الحب ولاتطلبه دى مشاعر مش بايدنا و لا تهدر وقتك وكرامتك اللى يبيعك ابعد عنه . ولا تجرح احد خصوصا من يحبك . حتى وان كنت لا تحبه يكفى انك لا تحبه لا تخسره فان خساره انسان بيحبك بعيد كل البعد عن الذكاء

واعلم ان كل شىء محتمل وكل شىء نسبى وما يعجبك ويجذبك قد ينفر منه غيرك

بعض الناس اشبه بالخرقه القذره اذا اقتربت منها تأذيت من رائحتها واذا حاولت مسكها اتسخت يداك ابعد عنا وستقوم عربه القمامه بوضعها فى مكانها المناسب

تمام ياجدو . اهتم دايما بالتخلص من الحزن والهم او على الاقل تقاومه ومش حااقولك ازاى انت اللى لازم تعرف كل واحد فينا فيه حاجات بتساعده وتقويه لنزع احزانه اللى يسمع موسيقى تطلعه من همه اللى يخرج

.يزور شخصيه بيحبها اللى يتأمل فى جمال الطبيعه واللى بيخرج يتمشى او يزور من يرتاح لهم . واللى حتى يقعد فى بلكونته

فى ناس بتنمى احزانها وتفضل تعيش فيها دول بيتعبوا ومش بيغيروا الواقع والناس بتبعد عنهم لعبوسهم فتزيد معانتهم لو فكرت حاتلاقى فى احلك الظروف الدنيا بتمشى فلا داعى ان تهد قوتك وصحتك دور دايما عما يبهجك وجدد حياتك دائما فا التغيير له تأثير ايجابى

واذكر ربنا كثيرا فى سرك وتأمل بديع مخلو قاته وانت ماشى سبح بحمده واشكره حاتلاقيه معاك فى شدتك بيقويك وينصرك وبتزود ميزان حسانتك وبيطمئن قلبك .الا بذكر الله تطمئن القلوب

واياك والفراغ هو اس المشاكل اشتغل واشغل وقتك بما بفيدك ويزيد دخلك ومهارتك وخصص وقت للقرأه

دايما اسعى وراء العلم والمعرفه فهو مفتاح نجاحك وتقدمك حاول ان تتعلم من تجارب الآخرين خذ بالك ان اغلب الناس بتتعلم من تجاربهم وممن يكتشفوا بانفسهم لا مانع ان تضيف رصيد من خبرات من حولك

فى عبارات قرأتها لكتاب كبار واقتنعت بها ستجدها مكتوبه اقرأها :

الحياه الزوجيه شركه من اثنان . عندما يتوقف احدهما يجبر الآخر على القيام بالمثل

اذا اردت ان تنجح فى شىء ما فاجعل عينيك مفتوحه وركز تفكيرك فى هدفك فلا احد يصيب هدفه وهو مغمض عينيه .

الانتصارات والهزائم جزء من حياه كل انسان اما الذين لا ينتصرون ولا ينهزمون فهم الجبناء

الخوف من العقاب هو الذى يلزم الجميع

لااحد يستطيع اضافه حرفا على ماهو مكتوب . قدر كل انسان مكتوب سلفا . ولا تضيع وقتك فيما قد يحدث غدا

انه غيب لا يعلمه الا الله .

افعل ما تحب وتقتنع به طالما لا يتعارض مع دينك ومبادئك

لقد قابلت صعاب وعثرات كثيره فى حياتى لم ااسف عليها لانها زادتنى علم وخبره انظر لها من هذه الزاويه

اعمل دائما الخير مهما حدث ومهما قوبلت بنكران للجميل استمر فى فعل الخير ستشعر انك فى منتهى القوه والسعاده

والآن يا حبيبى دعوات من قلبى بالتوفيق فى كل حياتك