Monday, December 31, 2007

سنه جديده علينا سعيده


امنياتى المعنويه
ساعات قليله وتنتهى السنه دى وتبدأ سنه جديده يارب تكون سعيده علينا كلنا
ولما قعدت افكر فى اللى نفسى يتحقق السنه الجايه لقيت كل امنياتى معنويه
نا نفسى اوى 2008 يحصل فيها حاجه كبيره ايه هى مش عارفه بالظبط بس محتاجه حاجه تهزنى من كتر الفرحه حاجه تكون لبلدنااشوف كل المصريين فرحانين ومتفائلين وواثقين ان بلدنا بتاخد اول خطوه فى الطريق الصحيح البلد نظيفه والشباب واثق ان فى فرص عمل ومصانع بتبنى وبنزرع اراضينا الزراعيه مش بنبنى عليها وبنبنى فى الصحراء مش بنزرعهاومافيش اصوات كلاكسات ولا ميكروفونات فى الشوادر وصوت الأذان جميل وفيه خشوع وخطبه الجمعه بدون زعيق وتشنج ومافيش فتاوى من اياها
ومافيش اهمال لمنع الحوادث والكوارث والمتسببيين فى غرق العباره وتلوث الدم والمياه والفاسدين كل واحد فى موقعه المناسب
وانا بكتب الكلام ده كنت حاسه زى ما اكون بجرى من كتر ما الأمنيات كتيره لأن للأسف بلاوينا متراكمه وكل يوم بتزيد حته وحسيت وكأن افكارى فى الخلاط .لكن المختصر نفسى تبتدى اول خطوه فى التغيير الصحيح خطوه تدينا امل . لقتيت دماغى فيها اغنيه ونشيد ماهى بقيت فى الخلاط
اغنيه فايزه احمد لقيتك فين المقطع
اه ياقلبى ودعوه من قلبى اللى حب
اللى غايب هاتو تانى
واللى خاصم صالحو تانى على اللى فايتو من سنين
اللى قاسى حننو
واللى غيران هدى قلبه بكلمتين
ونشيد الرائع النقشبندى
ماشى فى نور الله بدعى واقول يارب يارب
مالى عنك غنى وانت فى غنى عنى يارب
تبارك لى فى مالى وصحتى وعيالى وكل اعمالى يارب يارب
يارب كل الدعوات اللى فى الخلاط قصدى دماغى ربنا يحققها لنا جميعا قولوا يارب

Sunday, December 30, 2007

مش فاكره مش فاكره

كل مره بشوف بشوف بشوف مين مين مش فاكره مش فاكره ببقى نفسى نفسى أ أ أ
برضوا مش فاكره يااااااه بس ممكن مصر تتقدم بى بى يوووووو برضوا مش فاكره مش فاكره!!!
ربنا يجازى اللى خلانى مش فاكره






Wednesday, December 26, 2007

كلام مهم

كان والدى رحمه الله ويحسن اليه عندما يقرأ حاجه تعجبه يعيد كتابتها فى مفكره خاصه به ووجدت العبارات التاليه

مكتوبه بخط يده فى ورقه صغيره من سنين طويله ولا اعلم ان كانت كلامته ام نقلها .ايا كانت فهى كلمات عجبتنى

ووجدتها تصلح لأى زمن . الورقه المكتوبه فيها شكلها قديم جدا عمرها اكتر من 20 سنه ولقيتها كلمات مفيده

قلت اكتبها كاتب :

عندما تشعر ان الله معك تشعر بقوه عظيمه جباره
اوهامنا هى التى تضخم حجم اعدائناوخضوعنا هو الذى يمنحهم الجبروت
كلمه لا لها قوه هائله فهى قادره ان تجعل الظالم يتراجع او يتوقف او يخاف
اذا نكست رأسك امام ظالم طلب منك ان تنحنى واذا انحنيت طلب منك ان تركع واذا ركعت طلب منك ان تسجد واذا سجدت لظالم داسك بالأقدام
احذر ان تثق بجبار وتتوهم انه قادر ان يبطش بخصومك فهو اذا بطش باعدائك اليوم فسوف يبطش بك غدا .الجبابره لا يؤتمنون
الظلم مؤقت والعدل الى الأبد.والباطل لن يدوم ولابد ان ينتصر الحق فى النهايه .قد يسيرالباطل فى موكب تتقدمه الطبول والمزامير .ولكن لابد لن ينتهى بجنازه لايمشى فيها احد. البطوله تغدر بالطغاه.تدق ثم تسكت فجأه تعزف للأقوياء ثم تلعنهم.تبتسم للمستبدين ثم تضحك منهم .السذج وحدهم هم الذين يتوهمون انهم سيبقون للأبد فى القمه.ان القمه احيانا هى الطريق الوحيد للهاويه

Monday, December 17, 2007

بدنا نجوز على العيد ونعمر بيت جديد


الجواز بدايه حياه جديده بمذاق مختلف . ممكن يبقى بمذاق العسل او الله لا يقدر بصل
المهم اعرف واحده اتجوزت وبعد شهور بعيد عنكم ظهرت مشاكل كبيره فا قلت لها ازاى ده انتم فى شهور العسل
قالت لى لأ انتى مش فاهمه اصل الجواز زى البرميل نصه اللى فوق عسل ونصه اللى تحت زفت وانا فتحته بالمشقلب ضحكنا ربنا يعينها مع انها كانت عايشه مع زوجها قصه حب قبل الجواز .بس كان انانى وهى مع حاله الحب والرغبه
فى الجواز كانت بتتغاضى عن العيب ده وكان مش واضح بالصوره اللى شافتها بعد الجواز
القرار الخاص بالزواج ده فى رأيي اهم قرارفى حياه الانسان لأنه بدايه حياه جديده ونشأه اطفال حياتهم حاتتأثر
بالأم والأب يا أما سعداء واسوياء او الله لا يقدر عندهم مشاكل. علشان كده القرار ده محتاج رويه وصراحه مع النفس
وناخد بالأسباب وبعد كده نسيبها على الله وكل شيء نصيب
الجواز عن طريق الحب ولا العقل المفروض نوازن بينهم قدر الأمكان لننعم بحياه جميله
تلاقى واحد بيحب واحده جدا ولكن يراها بعيون المحبه التى قد لا ترى عيب جوهرى زى اللى كتبت عنها فى البدايه. وعندما ينصحه احد او يلمح للعيب يرد لأ ماانا حاغيرها او حابرمجها تبرمج مين يا عزيزى هى جايه مبرمجه جاهز . بل ممكن هى تبرمجك قدره البنات
فى الموضوع ده اعلى معلش احنا بنتكلم

فى الحقيقه ماحدش بيغير حد او يبرمجه واذا كنا لانستطيع تغيير انفسنا بسهوله طب حانغير غيرنا ازاى
الكمال لله فى عيوب ممكن التغاضى عنها او التكيف معاها ولكن هناك عيوب صعبه زى البخل والانانيه دول بيندرج تحتهم عيوب كتيره فالبخيل كذاب لأنه بيدارى مايملك علشان ماحدش يطلب منه حاجه . والبخيل مش بخيل فى الفلوس وبس حتى فى عواطفه او حتى فى الكلمه الحلوه يستخسر يطلعها والانانى كتر تفكيره فى مصلحته بيموت
اى حب لان الدنيا زى ما بيقولوا اخد وعطاء حتى الشخص اللى بطبعه بيحب العطاء بيشتاق ان ياخد ولو كل حين. والبخيل لا يعطى والعياذ بالله والانانى انا ثم انا مافيش حاجه اسمها ايثار او تضحيه عند اختيار شريك او شريكه حياتك ابعدوا عن البخلاء والأنانيين دول يتفات لهم بلاد
برضو الناس العاقله اوى ويحسبوها من ناحيه النسب والمركز الادبى والحاله الماليه على عينى وراسى بس لازم يكون
فى تجاوب وراحه نفسيه .فى ناس مريحه وتشعر بانهم قريبين لكن حسابات بس بدون راحه نفسيه صعب اوى فى الجواز

فكروا كويس اوى قبل الجواز دى عشره عمر وازنوا بين العاطفه والعقل . مع امنياتى بكل السعاده لمن يقبل على
اهم قرار فى حياه الانسان وهو اختيار الزوج او الزوجه
وطبعا الشرط الساسى فى الشريك ان يكون بيتقى الله لو حب حايكرم ويصون ولو كره الله لا يقدر لايظلم وحديث الرسول عليه الصلاه والسلام المعروف بظفر بذات الدين اللى بيخاف ربنا نطمئن اليه
وربنا يسعدكم

Wednesday, December 12, 2007

جميله .....بس


من يومين وبتتردد فى ودنى اغنيه الرائع وجيه عزيز من حقنا نحلم ولو كده وكده وحسيت ان الأغنيه دى بترجم مشاعرى وبتقول اللى نفسى فيه كلمات الاغنيه بتقول
من حقنا نحلم و لو كده وكده
ونشوف الدنيا حلوه مع انها مش كده
نفرح حبه ثوانى واصرخ واقول بحبك وتقوللى قولها تانى قولها تانى
من حقنا نحلم . نحلم بس وخلاص ونقوم الصبح عادى ونقابل نفس الناس
نحلم حتى بسكات
ونشوف حاجات حاجات
مثلا مثلا الناس سعيده وشاطره مش بليده وقريبه وبعيده بتحضن بعضها
مثلا مثلا مافيش جراح والخنقه بقيت براح وانا لو تعبت ارتاح فى حضن قلبها
مثلا مثلا الكون جمــــــــــيل والنيل بقى الف نــــــــيل
وطن مالوش مثيل فى الدنيا كلها
المهم بقى مسيطر عليا الحلم انى اشوف مصر نظيفه وبتبرق وناسها مبسوطين والبسمه على وجهوهم والسعاده بتطل
من عيونهم .المهم وانا فى عز الحلم ده قابلت صديقه كانت فى فرنسا مرافقه لزوجها واستمرت هناك لمده
اربع او خمس سنوات ورجعت لادخال اولادها المدارس كانوا طفلين جمال سن 4 و5 سنين
كان الاولاد بحكم وجودهم هناك بينطقوا العربى وعليه الاكسا الفرنساوى فمثلا البرتقاله يقولوها بورتقاليه
الفراوله فوروليه وهكذا المهم قلت لها على وجيه عزيز والحلم فكرتنى لما قلت لابنها شفت ياحبيبى مصر جميله ازاى فهز راسه بمعنى لأ
قلت له ايه لسه ماشفتهاش ولا مش جميله قاللى لأ جميله بس زباليه
ضحكت انا وصحبتى بس كان صعبان عليا ان حتى الاطفال مش عجبهم مستوى بلدنا خصوصا فى حته النظافه
ورغم كده كان صوت وجيه عزيز فى ودانى
مثلا الكون جميــــــــــــل والنيل بقى الف نيل
يارب يحقق احلامى واشوف بلدى زى مابيكتبوا على المدارس جميله نظيفه ومتطوره

Monday, December 3, 2007

الحاسه السادسه 3

تنويه نزولا لرغبه بعض الأصدقاء اكمل وارجو كل من يعلق ان لايجامل سأكون اسعد بالرأى الحقيقى
كما رأى البعض ان موقف الحما غير واقعى فقررت ان اعتبر الجزء الفائت منتهى
ويحدث تفاهم . وفكرت ماذا لو كان محمد خائن وماذا لو ...تابعو معى

ِرجعت سهام هى ومحمد والبنات البيت وفى طريق العوده فتح محمد راديو العربيه وكانت ام كلثوم بتغنى انا
لن اعود اليك تنهدت سهام وشعرت بعدم ارتياح وضيق وقالت فى سرها حتى الفال مش حلو .ولكنها لم تتكلم ولم يتكلم هو ايضا وكان الجو يخيم عليه الحزن
وعند دخولهم البيت كان محمد كأن لم يحدث شىء ولكنه يدوبك نص ساعه بدون كلام ولا سلام ودخل ينام
قامت هى وعشيت البنات ودخوا يناموا لم تستطع النوم او البكاء لديها شعور اكيد بخيانته ولكن فكرت فى كلام حماتهاواخذت جمله واحد تانى يقولك ايوه بخونك واضربى رأسك فى الحيط تتردد فى ودنها. قلبها وعقلها يؤكدان انه خائن مش محتاجه اثبات وسألت نفسها طب لو كان فعلا خاين اعمل ايه يااااااه شعور دفين بالأهانه والاستهتار بها لم تتغير تصرفات محمد نفس السرحان وعدم الكلام ومافيش اخبار عن العمره المزعومه ولا تستطيع ان تطلبها. وفى خلال عده اشهر بعد هذه الواقعه حاولت بكل الطرق ان تقرب من محمد ولكن كل يوم بيزيد البعد اكتروكل يوم قلبها يتعصر
من الحزن والألم
بدأت تفتش فى اوراقه وتشوف ارقام التليفون على الموبايل ولقيت اسم فتحيه قالت لنفسها اكيد فتحيه اللى جاتنى . اتصلت بها ردت عليها فتحيه بعصبيه انا كنت عايزه انصحك بس انتى كنتى حا تقطعى عيشى بس انا عذراكى
وعرفت منها ان محمد كان بيتقرب لها وانها عامله عنده واعترفت لها بانها كانت بتحب محمد وانه مفهمها ان مراته مريضه وعلى فراش الموت وكان عندها امل تتجوزه وانه خدعها ولكن بعد فتره اتعلق بالمهندسه
مرفت ردت سهام وايه مرفت دى كمان عرفت منها انها متجوزه وصغيره ولم تنجب ولكن جوزها فى امريكا له سنتين وشكله مش راجع وسايبها زى البيت الوقف واترجتها فتحيه ان لا تخبر محمد انها قالت لها كده ده ممكن يقطع عيشى قالت لها ماتخافيش وفهمت سهام ان دافع فتحيه هو الانتقام من محمد
ارادات ان تبكى ولكن مش عارفه مافيش دموع بس القلب ينزف وبدأت تراقبه الى ان تأكدت ان قصه فتحيه صح
ياااااه كل ده يطلع منك يامحمد ايه متجوزه توم كروز ولا جورج كلونى
اتصلت بها نجوى للأطمئنان عليها قالت لها كله تمام وقالت لنفسها ده ابو اولادى وبلاش فضايح .
دخلت حجرتها وبصت لنفسها فى المرآه يااااااااه اخيييييييييي غبيه غبيه حماره لابسه فستان انا بكرهك اتفو عليكى اد ايه انتى خايبه
خد ميراث ابوكى وضحك عليكى اقول ايه حماره وشعرت كأنها اسماعيل ياسين فى فيلم العتبه الخضراء
وقعدت تعيط حتى تورمت عيناها وفاقت على جرس الباب وعوده البنات من المدرسه وحاولت ان تكون متماسكه ادام البنات دول مالهومش ذنب واخدها كلام البنات وماحدث فى المدرسه ورغبتهم فى الاشتراك فى فريق الموسيقى
وكأنه فاصل لمخها حضرت الغداء وفتحت التليفزيون للبنات اثناء الغذاء لعدم رغبتها فى الكلام
كان فى مشهد فى تمثيليه البطله بتقول مافيش حد حايمسح دمعتى من على خدى غير ايدى . قالت لنفسها دى اشاره
ليا انى افتح و اسمع الجمله دى هو كده فعلا ماحدش حايمسح دمعتى
غير ايدى ودخلت اودتها يار ب انت عالم بحالى وشايف ومطلع الهمنى الصواب انجد نى من حيرتى
واخذت عهد على نفسها ان لا تحاول ان تستميل محمد فهو لا يستحقها داير يضحك على الستات الظالم لأ واخد حقى
هو لم يحبنى انا لا الومه على مشاعره ولكن الومه على ظلمه ليا من اول النهارده لأ من اللحظه دى انا حابدأ من جديد من الصفر من غير ميراث وحا اعرف اخللى الكل يحترمنى مش حاستدر العطف ولا الحب انا برفض الشفقه من النهارده حاكلم نفسى واخد وادى معاها انا
اللى وصلت نفسى لكده .عيوب محمد معروفه ليا بس انا كنت مش عايزه اشوفها انسان انانى عايز الكون كله يدور حواليه اهتماته ورغباته
امه ربيته ان يكون هو الأول فى كل حاجه عموما هو مايساهلش افكر فيه انا افكر فيا . مش حاجى على نفسى علشانه تانى ابدا ولازم يكون ليا دخل لازم . مش عايزه حاجه من وشه.وبدأت رحله البحث عن العمل كل يوم تشترى الأهرام وتلف ولكن باءت جميع المحاولات بالفشل ولكنها كانت تقول لنفسها افكر فى مشروع ولكن مشروع ايه والفلوس منين بس ان شاء الله فى مخرج
وكانت دائمه الدعاء ولديها نفس القناعه الغريبه بأتيان الفرج.
اتصلت بها نجوى وطلبت منها الذهاب لشراء قمصان نوم وراحت لمحل شهير لانها عايزه قمصان شيك ووجدت
اسعارهم خياليه قماش لينو عادى جدا بس الوان راقيه وذوق رفيع فى التصمييم استغربت سهام من الاسعا ر وقالت لها
ده مايتكلفش كده ابدا لكن نجوى ردت ماتلاقيش الدانتيل ده والذوق واشتريت
روحت سهام وتذكرت هوايتها القديمه فى الخياطه وفى اليوم التالى ذهبت لسوق القماش واشترت قطعتين ومجله بورداقديمه امعانا فى التوفير ودانتيل مناسب زى اللى فى قمصان نجوى وقررت ان تنفذهم وفعلا طلعوا شيك جدا
وتكلفتهم ارخص من السوق بكتير. اتصلت بنجوى وقالت لها تعالى حالا وصلت نجوى واعجبت بهم جدا وقالت ده انتى كده ممكن تبيعهم قالت لها الله ينور عليكى هوده مشروعى انا حابيع ارخص من السوق بكتير والمكسب حايزيد لما
اشترى جمله ومش حاخيط لزباين علشان مش عايزه رجل فى البيت انا حافصل واعرضهم على المعارف وعندى فى
العيله عرايس كتير حاقول دول معرضين للبيع علشان لاحد يقولى وسعى اوضيقى وردت نجوى وان اول زبونه
اكرمينى شويه واحتضنوا بعض وشجعتها نجوى على الاستمرار ولم يشعر محمد بمشروعها اصبح يعود متأخر وكانت بالنسبه لها فرصه لزياده الانتاج
ركزت كل همها فى تربيه بناتها على ان يكن اكثر وعى منها وكان تجلس معهن هن ستذكرن الدروس وهى تخيط
وتغمرهم بحبها وحنانها تعويضا عن بعد ابوهم وتقولهم مشغول حتى لا تؤثر على نفسيتهم بالسلب وبدأت تعقد جلسات مع نفسها تكلم روحها مافيش حد حايفهم احساسها الا هى .كانت تحلل شخصيه محمد وتحلل شخصيتها فوجدت فجوه عميقه
من الصعب تضيقها ان لم يكن مستحيل .وبدأ حلم يروادها حلم من احلام اليقظه ان تنجح فى حياتها بمعنى ان تكون
سعيده من غير محمد يعنى لو محمد مات لا قدر الله الحياه حاتستمر ولازم اسعد نفسى شعارى سهام تسعد سهام
حانجح وحايندم عليا ولا مايندمش انسيه ياسهام ده كلامها لنفسها

الا انه لم يرحمها فاختلق معها مشكله وشكله كان ناوى انه يتعبها فقررت بينها وبين نفسها انتذهب الى والدته فى الصباح لتخبرها بماحدث حتى لايزداد فى ظلمه

رغم كل هذا كانت فرحه بما قررته وبصداقتها لنفسها وقربها من بناتها فكانت تقضى معاهم ساعات من السعاده الغامره وبما ادخرته من اموال وشعرت ان لها كيان آخروذهبت الى منزل حماتها وقبل ان ترن الجرس كانت الشغاله بتفتح الباب رايحه تشترى حاجات قالت لها اتفضلى الحاجه جوا لم تشعر حماتها بدخولها كانت فى اوده مجاوره تتحدث بالتليفون وحدثت مفاجأه مهوله كادت تفقدها وعيها
نكمل قريبا

تحديث
ستصل سهام لحقيقه ان زوجها خائن واهله على علم وذلك من المكالمه التليفونيه بين حماتها واختها
واصبح امامها حلين
الاول ان تستلم للأمر الواقع وترضا بهذا الوضع للظروف الأقتصاديه وضعف شخصيتها وقله طموحها
او ترفض وتطلب الطلاق وتركز فى النجاح فى عملها وتربيه اولادها والتغلب على نقاط ضعفها
وكل من الحلين موجود على ارض الواقع واتر ك لك الأختيار
النهايه او البدايه