Tuesday, December 23, 2008

التدوينه البيضاء تنفع فى الايام ....... الــ


علمت من مدونه ابى الجميله ان يوم 25/12 تم اغلاق عدد من المدونات فى تونس منذ عده اعوام وفى هذا اليوم من كل عام يتوقف المدونين التوتسيين عن الكتابه تعبيرا سلميا عن احتجاب زملائهم واقترحت ابى ان نتضامن معاهم واراها فكره وجيهه وتعبيرا عن المطالبه بحريه الرأى وبناء عليه اضم صوتى لصوتها.

Sunday, December 21, 2008

بحر الهواء


حدودته قبل النوم
يحكى ان كان فيه رجل معروف عنه ولعه وشغفه بالنساء ولو حتى شاف فستان متنشر على حبل غسيل يفكر فيمن سترتديه اوم ايه هذا الرجل كان غنى ومش بيعتق اى امرأه او فتاه يصادفها ويمثل عليها دور الولهان والمتيم ويغدق عليها بالمال وكل يومين معاه واحده اشى سمراء واشى شقراء مره تخينه وتاره رفيعه وكل البنات حلوين وبعدين ايه جت عنده شغاله فى البيت وعلى قد حالها ولكن طماعه شويه والرجل ده كان فاهمها
فضل ياغازلها ويااموره وياغندوره والبنت فهمته انها فعلا بتميل اليه ولكن لو بيحبها مافيش امامه عير المأذون
ولما شاف انها مش ممكن تلين الا بالجواز قال بسيطه فقابل ابوها وعمها وطلبوا منه مهر و لكن الرجل كان مش تمام واستخسر يدفع المهر للشغاله المسكينه وقالهم بكل جديه ان فلوسه كلها فى شركات وعقارات واراضى وان بنتهم تتقال بالمال وعلشان يبيع ممكن يخسر والموضوع ياخد وقت وان مهرها لازم يكون كبير اصلها قطوقطه
لكن حلا لهذه المشكله حايكتب لها حته ارض
فرح الأب والعم وقالوا على خيره الله وجاب عقد الارض اللى تم وصفها بانها فى ارض بحر الهوا ويحدها من الشمال قطعه ارض ملك لفلان ومن الجنوب ارض ملك علان ومن الناحيه الشرقيه فيحدوها كذا ومن الغربيه ..وهكذا وتم الفرح وقعدت معاه وشويه وظهرت فتاه آخرى عجبته ثارت الزوجه وعلا صوتها قالها بقولك ايه انتى تحمدى ربنا انى اتجوزتك ولا نستينى انتى مين فوقى لنفسك ياحبيبتى ودى حياتى وانا حر فيها وانتى هنا لخدمتى فاهمه ولا الباب يفوت جمل غضبت الزوجه وراحت لابوها وعرفوا سيرته وان دى اخلاقه فكروا وقرروا ان تطلب الطلاق واهى حته الارض تنفعها وتم الطلاق وذهب الاب والعم يدوروا على مكان هذه الارض فلم يجدوا لها اثر فذهب العم للرجل وسأله فين ارض بحر الهوا قال له على شط بحر الهوا و اشار الى قلبه وقاله هنا

Sunday, December 7, 2008

عيد سعيد وعمر مديد وكل سنه وانتم طيبين وفرحانين ومتجمعين مع الأهل والأحبه

Tuesday, November 25, 2008

ماما ميا


دعوه للبهجه والسعاده
رن التليفون وكانت صديقتى الحبيبه سوسو
اميره .... فاكره فرقه الأبا
ياااااااااه طبعا
انا دخلت فيلم جميل جدا اسمه ماماميا حايعجبك اوى فيه اجمل اغانى فرقه الأبا ... وعايزه ادخله تانى تيجى معايا .. اجى اوى اللى شجعنى اسماء ابطال الفيلم هايلين وكنت قرأت عنه فى مدونه شريف ومدح فيه
الفيلم رائع جدا كله غناء ورقص فى جزيره جميله فى اليونان المناظر خلابه الموسيقى عذبه والرقصات كلها حيويه ومرح .
قصه الفيلم عن
دونا " ميريل ستريب " امرأه مليئه بالحيويه والمرح متصالحه مع نفسها احبت فى شبابها رجل احبها ايضا ولكنه كان خاطب وهجرها بعد ان رقصا ومرحا سويا و..... ثم احبت ثانى وتركها ايضا بعد ..... وبعد الثالث قررت ان تعيش بمفردها معتمده على ذاتها و حققت حلمها فى ان يكون لديها فندق تديره هى
وابنتها المخطوبه صوفى .وتتمنى صوفى ان تعرف من هو والدها بينما تتهرب الأم دائما من الأجابه وتفرأ صوفى مذكرات الأم وتعلم ان فى حياه امها ثلاث رجال يحتمل ان يكون كل منهم ابيها فترسل
تدعوهم متقمصه شخصيه الأم للجزيره الخلابه حيث الماء والخضره والوجه الحسن وحتى يسلمها ابيها لزوجها فى يوم عرسها كما تتمنى . وهنا تحدث مفارقات كوميديه وحوار بالغناء يعطيك شعور بالبهجه والسعاده
ميريل سبيرت تخطت الستين ترقص وتغنى وتقفز كما لو كانت فى ريعان الشباب وكذلك صديقاتها والثلاث رجال
انا لم احرق الفيلم لمن يريد ان يراه لأنه يعتمد على الموسيقى والغناء والمواقف الظريفه بالأضافه للمناظر الخلابه
تخرج من الفيلم وانت فى حاله من النشوى والسعاده والأمل وتعى انه حتى لو ضاعت فرصه فهناك شيئا آخر او فرصه ثانيه فى المقابل .
علينا ان نحيا ونمرح ايا كان عمرنا.ولو ان بعض الأغنيات فيها شىء من الشجن ولكنه ممزوج بالأراده والعزه
شكرا صديقتى العزيزه اعطتينى جرعه رائعه من المتعه والأنسجام

Wednesday, November 12, 2008

بكيزه وزغلول

ارجوكى ياماما مش عايز اتغدا عايز انام
ليه ياحبيبى اصلى تعبان شويه
ودخل حجرته
ده اللى قاله ابنى الكبير عند رجوعه من المدرسه كان فى اولى ابتدائى واخوه كان فى كجى تو.
كان الوضع غريب فغالبا لما بيجى بيسأل عامله اكل ايه او يخمن من رائحه الطعام وانا من عادتى عند شعورهم بتعب بدى ليمون او اسبرين الحاجات المناسبه للحاله مش بروح للدكتور على طول لكن اليوم ده لاقتينى بلبس بسرعه ولبستهم وقلت حانروح للدكتور مع ان ابنى كان هادى مش اكتر انه عازف عن الأكل و قاللى بطنى بتوجعنى شويه
و عايز انام . كنت زى ما اكون مبرمجه وبدون تفكير حاجه كده زقانى للذهاب للطبيب بسرعه. سبحان الله
المهم بعد الكشف عليه الدكتور قاللى انا عايز تحليل حالا وحااكلم دكتور التحليل يطلع النتيجه بسرعه ولحسن الحظ كانت الشقه المواجه له معمل التحليل .رغم رعبى مش عارفه ليه كنت بتصرف بهدوء علشان خاطر الأولاد ماتقلقش
كان اليوم ده والده فى القاهره ولم يكن الموبايل ظهر المهم ظهرت النتيجه وانا برتعش من الداخل لقيت الدكتور بيقوللى ده لازم يعمل الزائده فورا معاكى عربيه . لأ
جرى جرى على مركز اسكندريه الطبى وحااتصل بالدكتور عصام السهوى لتجهيز حجره العمليات
نزلت وانا مرعوبه وابنى بيقوللى بلاش عمليه ياماما
ماتخافش ياحبيبى مش حاتحس بحاجه والألم حايخف بسرعه والصغير مسهم وخايف
المهم كانت العياده فى محطه الرمل والدنيا زحمه اوى ومافبش تاكسى فاضى وكلام الدكتور بيرن فى ودنى فورا اجرى مش عايزين نتأخر
كانت اشاره المرور والعربيات وافقه بقيت اجرى ادور على تاكسى كله مليان وبهرول وماسكه الأولاد . وبعدين لقيت تاكسى قصادى قاعده جنب السواق واحده ولم التفت ان هناك آخرى فى المقعد الخلفى من ربكتى واحتياحى
لقتينى بقول للسواق ابوس ايدك والنبى ودينى المركز الطبى ابنى محتاج عمليه بسرعه وانسابت دموعى
صعبت عليه وركبت واخذت اولادى جنبى واحنا التلاته وقتها كنا نميل للنحافه واعتذرت للراكبه اللى جنبى اللى كانت لا تزيد عن 20 عام وهى كمان رفيعه لقيتها بتقول
افففففففف ايه ده وبتوجه كلامها للسواق ازاى تركب واحده كمان بأولادها . لم يرد عليها
واللهى حرصت ان لا اشغل حيز كبير حتى لا اضايقها اخذت اولادى على رجلى وقلت لها معلش لو مش ظروف قاهره كنت نزلت
- ردت ببرود يووووووووو مش حانخلص
* واذا بالراكبه بجوار السائق تدور وجهها وتقولها الست من اول ماركبت اعتذرت وابنها تعبان نساع بعض دى حاجه طارئه
- وانتى مالك انتى وبتتكلم من طراطيف مناخيرها
* تصدقى انتى ماعندكيش دم "الأولاد بيبصوا لبعض مذدهلين " ونسوا موضوع العمليه
انا حصل خير ياجماعه ارجوكم مش عايزه خناقه بسببى
اللى جنبى : لأ مش خير
* الآخرى : لأ ده انتى فعلا ماعندكيش دم ده بدل ماتقولى لها سلامه ابنك
- :اووووووو انا مش حاكلم معاكى لأنك مش من مستوايا
كانت اشاره تانيه واعصابى باظت
* اللى بجوار السائق ست بنت بلد جدعه وقويه ادورت وبصت لها من فوق لتحت : ورينى مستواكى كده وهى بتحملق فيها. ده مستوى شبحطاجيه
-اووووووووووو انا لازم اروح الكسم انا اخويا زابت ورتبه ارجوك وادينا الكسم حالا مش ممكن اللى بيحسل ده
*انتى حاتروحى القسم بس بس خلقه تانيه وعايزه تديها بوكس ولكنى فادتها وبعدت اولادى شويه واخذت فى كتفى زغده متينه
السواق كان شاب صغير مرعوب وخايف مش عارفه ليه
الأشاره طولت
كان قصاد التاكسى تاكسى آخر صديق للسائق نادى عليه واد ياهيما ....ازيك ياحمووووووووو
والنبى ياحموو خذ الأخت وصلها فتح الباب وطلب من اللى بجواره النزول زغرلته انزلى خلصى والنبى ياختى والأحره وصلت . نزلت وهى بتشتنم اللى جنبى اللى
بعد نزولها
- كان المفروض حدرتك تودينا الكسم ايه ده ....لم انطق بكلمه واحتضنت اولادى
قالها علشان الطفل اللى تعبان وأخيرا وصلنا
اخذت الأولاد وجريت على الأستقبال لقيتهم عارفين من الدكتور ومجهزين الأمور وطلبوا منى التأمين وكان مبلغ كبير ومش معايا انا رايحه للدكتور ومعايا فلوس زياده لكن مش مبلغ بتاع تأمين عمليه كنت لابسه انسيال و خاتم وسلسله قلعتهم وقلتلهم
العمليه تتعمل والفلوس حاتيجى والذهب ضمان.
اخذوا الذهب وطلعت قابلينى دكتور التخدير وطمئينى ولبس ابنى درل معقم وبونيه بصيت لقيت ابنى الصغير بيصرخ لأ لأ لأ اخويا مش يلبس كده قعدت اهدى فيه وكان فى فى بيانات لازم املاها
واذا بى بعد تسليمها لا اجد ابنى الصغير بجوارى والممر كبير جدا وفى سلالم مش عارفه أطلع ولا أنزل كانت رجلى بترتعش وقلبى بيدق بسرعه والدموع متحجره وزى التايهه فى بلد غريب ومش عارفه اعمل ايه خايفه اطلع او انزل وخايفه استنى وحيرانه مش لاقيه حد جنبى بس قلبى بيقول يارب رحمتك ولطفك يارب
وانا واقفه وعينى زائغه لقيت دكتورماسك ابنى و بيقوللى خذى ياهانم الباشمهندس وافق اننا نعمل العمليه لأخوه بشرط تكون بشويش وابتسم ... حبيب قلبى
قعدت واخذته فى حضنى والحمدلله قام ابنى بالسلامه
واول مافاق ابتسم ليا وقاللى ماما شفتى بكيزه وزغلول اللى كانوا فى التاكسى.
فعلا ده كان ابلغ وصف ينطبق عليهم
كان يوم عجيب وكله قلق وقتها
الحمد لله فاتت سنوات اولادى اتخرجوا لكن مازال هذا اليوم محفور فى ذاكرتنا وبنضحك من قلبنا لما نفتكره ربما وجود بكيزه وزغلول كان رحمه بيا وباولادى شغلونا شويه عن الألم ربنا يبارك فيهم يارب . .

Saturday, November 8, 2008

حزن فى القلب

من حوالى ساعتين قلت افتح الفيس بوك من باب الترويح عن النفس والتسليه واذ ابى اتصدم بخبر وفاه شاب فى مقتبل العمر 26 سنه
يااااالله . وصديقه بينعيه وبيطلب الدعاء له بالمغفره وأن يكون فى الجنه .
لم اتمالك نفسى كنت ناويه بعد الفيس بوك ارد على كل من علق عندى وجبر بحاطرى ولكنى لم استطع
.حزنت من قلبى وبكيت . هذا الشاب كان يحلم ويخطط لمستقبله
وفجاه تتلاشى كل الأحلام والخطط لتضع نهايه حزينه وألم لأهله وحبايبه الله يرحمه ويحسن اليه ويكون مثواه الجنه ويصبر اهله

الدنيا مش مستاهله للتطاحن والكذب والخوف . الحياه مهما طالت قصيره قصيره مافيش اسرع من الأيام
مش مستاهله نزعل على فرصه ضاعت او خساره فلوس او فشل مشروع كلها اشياء مجرد اشياء ممكن تعويضها اما فقدانسان فده مؤلم والخساره .
انها اراده الله لا نملك سوى الصبر والدعاء وان لله وانا اليه راجعون

الموت علينا حق لكنه جرح غائر فى القلب . ربنا مايحرم حد من اهله وحبايبه ويرحم موتانا ويحسن ختامنا ويصبر كل من فقد حبيب وسامحونى محتاجه افضفض .

Sunday, November 2, 2008

منى الشاذلى مع د / مصطفى السيد

عالم ووزيـر وبينهما فرق كبير
سعدت جدا وشعرت بفخر لما عرفت من الجرائد ان العالم المصرى د/ مصطفى السيد تم تكريمه من بوش تقديرا لأبحاثه فى معالجه المرض اللعين وحسيت ان المصرى عظيم بس لو وفروا له الفرصه .
فى الحقيقه اول مره اقرأ عن هذا العالم ولما استضافته الرائعه منى الشاذلى فى العاشره مساء اكتشفت انه بدا ابحاثه فى هذا المجال لمعاناه زوجته التى شاركته حياته 25 عاما بهذا المرض ووفاتها وكان شديد التأثر وهو بيتحدث عنها بوفاء وحب وعلم وخلق ماشاء الله
كان الرجل شديد الحياء والتواضع وتحدث عن انجازه ببساطه وشرح سهل ليوصل المعلومه للمشاهد العادى و
كانت منى الشاذلى مغتاظه من تجاهل رموز الدوله والتراخى فى تقدير الرجل وقالت انها اتصلت صباحا بمكتب رئيس الوزارء د / نظيف لتسأله لماذا لم يذهب بنفسه لأستقبال العالم الجليل فلم تتحدث اليه ولكن تحدثت الى احد المسئولين فى مكتبه وكلمتهم بحرقه وعنف زى ماقالت مستنكره عدم الاهتمام فى نفس اليوم وبعد مكالمتها عصرا اتصل د/ نظيف بالعالم وهنأه يعنى حاجه كده سد خانه . كان د /مصطفى شاعر بالخجل والمراره فى نفس الوقت ومش عايز يضيع وقت فى لوم او عتاب
ولما طلبت منى الشاذلى التعليق قالها
انتى لك فضل فى انك لفتى نظرهم وكان يبرر اكيد رئيس الوزارء مشغول وكان محرج مش عارف يقول ايه
طب لما بنعمل انجاز فى الكره بيذهب كبار المسئولين لاستفبال اللعيبه وده شىء جميل طب وانجاز علمى رائع وعالم مصرى يكرمه ويحترمه الدول الكبرى وبلده ولا هنا لأ والأدهى

قالت انها حاولت الأتصال بالدكتور هلال وزير التعليم العالى لكن كان غير متواجد وسألت منى د / مصطفى الم يتصل بك د / هلال قالها ان مكتبه اتصل به للتهنئه واخذ يبرر فى خجل اصل د/ هلال لسه راجع من اليابان وكان عنده برد وكان ينوى مقابلته ده اللى قالوا له مدير مكتب د / هلال ماشى راحت منى الشاذلى قالت نشوف التقرير ده ونرجع تانى التقرير مقابله بين د هلال ومندوب العاشره مساء
لماذا لم تتقابل مع د/ مصطفى السيد
الوزير : احنا كعلماء متابعينه وعارفين انجازته من قبل ماتنشر وعارفين خطواته وبنباركها وبنقابله (ماشاء الله عارف كل حاجه بس مدكن )
منى الشاذلى ده كان كلام د/ هلال تعليقك ايه ي يا د / مصطفى ابتسم فى خجل هو قال انه كعالم متابع لكن فى الحقيقه
لم تتم المقابله وانا مسافر بكره ان شاءالله
اكتفت المذيعه اللامعه بالتقرير . العالم لم يصف نفسه بانه عالم رغم ان هو كده فعلا ولم يكذب فى حديثه وكان فى غايه التواضع وبيحاول يبسط المعلومات بينما الوزير ....
هى دى افضل طريقه لتوضيح مدى جداره وصدق كل واحد فى موقعه العالم .. الوزير .. البرنامج الهادف

مذيعه حياديه صدق فى التقديم وحس و طنى ويقظه حقيقى برنامج محترم وكل القائمبن عليه يستحقوا التحيه
الف مبروك لدكتور مصطفى وربنا يوفقه ويصل لعلاج من اجل كل المرضى شافهم الله وعافنا

Monday, October 20, 2008

السر

The secret

تحديث
بكره بأذن الله حلقه اوبرا عن كتاب السر اتمنى تشوفها

من فتره كنت بتفرج فى التليفزيون على برنامج اوبرا وكانت بترشح كتاب اسمه السر للقرأه واتعمل فيلم وحقق نجاح مذهل
الكتاب بيقول ان هناك سر يخلينا نحقق احلامنا بسهوله فالفقير ممكن ان يصبح غنيا والفاشل ممكن ينجح والمريض ممكن ان يشفى حاجه كده زى الفانوس السحرى وان الوصفه مفعولها اكيد بالضبط زى ماتكون بتخنار سلعه من كتالوج وطلباتك كلها مجابه .
" طبعا كله بأذن الله. "
حلقات اوبرا اللى بتتعرض عندنا بتكون قديمه المهم ان الكتاب ده حقق نسبه عاليه جدا من المبيعات بعد اذاعه البرنامج وتهافت عليه الجميع من شتى انحاء العالم وتم ترجمته للعديد من اللغات ومنها العربيه قلت اشتريه
ذهبت الى دار الشروق لقيت ثمنه 105 جنيها للنسخه العربى والنسخه الانجليزيه ب 130 جنيها الحمد لله انى لم اشتريه لأن ابنى قاللى ممكن تنزليه من النت وحصل حاكتب لكم الويب للى يحب يقرأه .
الكتاب بيقول باختصار ان سر السعاده وتحقيق الاحلام هو قانون الجذب . على ان الشبيهه يجذب شبيهه وان للأفكار قوه مغناطيسيه كما ان لها تردد وعندما تفكر يتم ارسال افكارنا الى الكون وتجذب اليها مغناطيسيا كل الافكار الشبيهه والتى على نفس التردد فمن يفكر فى الحب ويتمناه سيجذب له الحب ومن يحب المال ويتمناه سيصل اليه ومن سيفكر فى اشياء سلبيه سيجلبها لنفسه
بقوه وتدبير الكون المسخر لكل منا وهكذا ..
وان كل شىء يرسل للخارج يعود علينا وعلى فكره الايمان بأن الدنيا بما فيها مخلوقه لنا لكى ننعم بها وان بها وفره من كل شىء وتكفى الجميع وكل مرض مهما كان عضال له شفاء . الكتاب يحتوى على عده فصول عن الحب والمال والصحه الزواج...
السر انك تكون على يقين ان الدنيا دى اتخلقت لك والكون مسخر لكى يعطيك ماتريد زى مصباح علاء الدين
مثال : واحد مش غنى وعايز يكون غنى عليه ان يكون على
يقين ان رغبته فى الغنى ستتحقق ويتخيل مدى سعادته ويشترى مايرغب فيه ولا يقطر على نفسه ويعيش الحاله كأنها حدثت سيشعر بسعاده غامره وبهجه ويطرد اى احساس سلبى ويترك الباقى سيسخر الكون وتحدث قوى الجذب هذه لتحقق رغبته لاتسأل كيف ومتى كل الامور ستتيسر وستتحقق الأمنيه بفعل قوه الجذب
على ان تكون الرغبه قويه والايمان بانها ستتحقق حتى تضبط درجه تردد الرغبه مع درجه تردد الكون
وسرد الكتاب اسامى لمشاهير اغنياء سبب غناهم هذه الطريقه
اما من يفكر بطريقه سلبيه فسيجذب له امور سلبيه فالذى يخاف من الفقر ويقطر سبزداد فقرا وسيجلب الفقر لديه وهكذا . وهذا ما يتردد فى امثالنا الشعبيه المليئه بالحكمه اللى يخاف من العفريت يطلع له .
كما في الكتاب امثله حقيقيه عديده لحالات مختلفه مثل مريض بمرض صعب لديه يقين بالشفاء وتم الشفاء بالفعل عن طريق
يقينه وفرحته بتخيل الشفاء تدخل عليه البهجه والسعاده ويروى في الكتاب المريض بنفسه ماحدث تذكرت مريم نور وكيفيه شفاءها من ورم فى رأسها اصابها وهى قى الثلاثين من عمرها وهى حاليا فوق ال 70 ربيع وماشاء الله عليها نفس الفكره فهة تؤمن بقوه الطبيعه
واحده عايزه تتجوز تخيلت العريس المثالى وافسحت مكان فى دولابها لملابسه وعاشت الخيال وكأنه حفيقه وبالفعل تقدم العريس المنشود . "انا اؤمن بالقوه الخفيه والاشارات السماويه وان حسن الظن بالله بيحقق المنشود "

روح التفاؤل والأمل والشعور با البهجه نتيحه تقمصنا حاله تحقيق الهدف المنشود تساعدنا للوصول اليه والثقه بالنفس وفى الله هى كلها اشياء ايجابيه لم لا نحاول ان نفعل
الكتاب اثر فيا بالايجاب وشجعنى للرجوع للكتابه
وانا منهمكه فى القرأه عند النقطه دى رن التليفون وكانت صديقه ليا ونظرا لتأثرى بالموضوع قلت اقول لها
على الكتاب وموضوع السر ضحكت ضحكه جميله اوى وقالت لى
اميره فكرتينى بفيلم لعيد المنعم مدبولى بيقول فيه انا "مش طويل واهبل انا قصير اوزعا "ضحكتنى من قلبى
بردوا من عوامل الوصول للهدف كما فى الكتاب الضخك
السر بيشترط ان نمتن بما لدينا ونحمد الله "لئن شكرتم لأزيدنكم " وحسن الظن بالله وده موجود فى دينا
مش حانخسر حاجه لو قرأنا ونحاول نطبق ولنبدأ بطلب صغير على ان يكتب كل منا تجربته مع تمنياتى لكل من يقرأ ان تتحقق كل امانيه

http://www.4shared.com/file/59358382/23d3498e/___online.html?s=1

Thursday, July 24, 2008

اصدقائى

تحديث :
اصدقائى
تمنياتى للجميع بكل الخير واشكر من قلبى كل من سأل عنى بالأيميل او التعليق . انا الحمد لله بخير لكن حماسى
للكتابه فتر خصوصا وان الأوضاع العامه كلها مش مشجعه وكل مااريد كتابته اجد الكثير كتبه وكل ما انوى اكتب
الاقى نفسى مش مطوعانى حتى ان لدى بعض المواضيع مكتوبه كمسوده احتفظ بها تحتاج لمجرد مراجعه الاقى
نفسى عازفه حتى عن المراجعه اعتقد انها مرحله ارجو ان لا تطول .
مره تانيه اشكر من قلبى كل من سأل عنى واطمئنكم انا بخير والحمد لله والسلام عليكم .


اتمنى ان تكونوا جميعا بخير . انا بخير الحمد لله
محتاجه اجازه جدا ان شاء الله تكون سعيده واشكر من سأل عنى لغيابى واعتذر عن تأخيرى فى التعليق واتمنى لكم كل سعاده
الى اللقاء قريبا بأذن الله

Tuesday, July 8, 2008

الثوره الداخليه



كان يشعر بملل ورتابه الايام وعدم الارتياح وكان يعى السبب قلديه شعور بانه غير محبوب ولا احد يرضى عن تصرفاته دائما ملام منذ كان طفلا لم يكن لديه

ثقه فى نفسه فلم يكن متفوق ولا بليد مجرد طالب متوسط وايضا ترتيبه بين اخواته فى الوسط

فكان الاخ الاكبر هو المسيطر ويقال له اسمخ كلام اخوك الكبير وراعى اخوك الصغير فهو ننوس عين امه فعليه السمع والطاعه من الكبير والصغير بينما لا احد يستمع اليه هكذا استمرت حياته

لا يوجد فيها جديد وفى شوق دائم للحنان والحب الذى يفتقده .

وبينما هو شارد وجد كتاب نساه احد اصدقاء اخوه وقام بتصفحه فاذا به يشده ويقرر ان يقرأه من الجلده للجلده كان الكتاب عباره عن روايه تغوص فى اعماق النفس البشريه وتشرح التقلبات فى الشخصيه وهل من الممكن ان تتحول شخصيه تميل للضعف الى شخصيه قويه وكانت الاجابه مابين السطور الحب له تاثير السحر والرغبه فى التغيير والاخذ بالاسباب وحب الخير والعمل الخيرى كلها عوامل قويه تبدل الحال

الروايه اعترافات لشابه تعرضت منذ طفولتها لقهر من عائلتها لانها لم تكن بجمال اخواتها او ذكائهم هكذا نشأت دائما تعقد مقارنات بينها وبين اخواتها لا تكون فى صفها مع انها تتمتع بقدر من الجمال ولكنها فقدت ثقتها بنفسها وفى الروايه سرد للعديد من المواقف الصعبه التى تعرضت لها ووجدت من حولها يسخر منها او هكذا توهمت نتيجه لحساسيتها الشديده

وجد المواقف كانها تحكى عما حدث له شخصيا وسببت له الم بالغ وتواليت احداث الروايه فى تفاصيل شعر بها . حتى انه شارك البطله احساسها فى انها لن تجد من يحبها لكثره عيوبها

وعندما تزوجت من احبها كانت تشك فى حبه رغم ان زوجها دائما يثنى عليها ويتغزل فى محاسنها وكان يراها اجمل نساء الدنيا وفى احد الايام اصيبت بنزله برد شديده فوجدت زوجها فى غايه القلق ويحنو
عليها ويأخذ اجازه من عمله ويسهر طول الليل على رعايتها وبمرور الايام شعرت بصدق مشاعره ووثقت فى حبه وبادلته بحب اكبر واستعادت جزء من ثقتها بنفسها

كان الزوج محب للقرأه واسع الاطلاع يهتم بشراء كتب متنوعه مابين قصص وروايات الى كتب فى مجالات محتلفه فاذا بها تشاركه وتقرا كل ما يقتنيه وتناقشه فيه فاضاف لها الكثير من المعلومات واصبحت تعمل كل شىء بحماس هذا ماكان ينقصها فى حياتها بعد ان كان عملها رتيب اصبحت تحبه وتتقنه انه الحب الذى يجعل كل شىء جميل .

واتاحت لها طبيبعه زوجها الاجتماعيه التعرف على
العديد من الاصدقاء فاختلطت بزوجاتهم واندمجت معهم فاصبح لها عالم جديد متنوع اثرى شخصيتها وكان من ضمن

مايحرصون عليه عمل خيرى كل شهر زياره لدار ايتام او دور مسنين وماشابه مما كان يرقق احساسهم ويشعرون بما اسبغ الله عليهم من نعمه فيحرصوا على طاعه الله والاكثار من الصلاه مما جعلهم راضيين عن انفسهم وحظوا بحب مجتمعهم واحترامه

كانت زوجه احد الاصدقاء الاقرب الى قلبها انيقه جدا وتعمل فى مجال تصميم الازياء توطدت علاقتها بها مما جعلها تهتم بمظهرها واناقتها فالمظهر الانيق يمنح الثقه والراحه للنفس وبهذا تالت اعجاب الجميع وتبدل حالها من عدم الثقه بالنفس الى امرأه جميله واثقه فى نفسها معتزه بروحها فى تواضع كم كانت تخشى ان تقول رأيها فيسخر منها المحيطين بها كما كان يحدث من قبل اما الآن فهى تقول رأيها وتتناقش فيه وقد تغير من وجهه نظهرها ولم لا طالما هناك راى افضل ولا يعيب المرء ان يخطأ بل ان الاخطاء تعلم ولكن علينا ان نتعلم منها ولا نكررها ونستفيد من اراء الآخرين وتجاربهم

.كان الكتاب مترجم باسلوب جميل ومؤثر وعباره عن مواقف رأى تفسه فيها وعندما اتمه شعر بتبدل حاله من الهم الى السرور وهدوء النفس وشعر ان بطله القصه تشبهه كثيرا من حيث النشاه والتربيه

وتيقن انه مابه من هم لانه استسلم لاراء الآخرين فيه وتعود عليها ولم يحاول ان يقاومها مما احبطه واصبح مهمل فى مظهره وافكاره حتى صار ما لم يكن فيه من عيوب فيه فعلا واذا به يتأثر بما قرأه و يثور على نفسه ويقرر ان ينسف كل مابه من افكار سلبيه بثها فيه الآخرين ويتخلص من كراكيب افكاره ويتحرر من سجن تاريخه حتى يفسح مكان لافكار اخرى مليئه بالامل وتبعث على التفاؤل

فقام بشراء عده اطقم انيقه ذات الوان مريحه ومرحه واشترى بعض من الكتب لنفس الكاتب وقرر ان يعمل مايحب ويقول ما يقتنع به
وياخذ بكل الاسباب التى تدعم ثقته بنفسه ذهب الى الحلاق وطلب منه قص شعره وعمل تغيير مناسب وضع عطره وارتدى ملابسه
الجديده شعر بتحسن فى معنوياته وما ان خرج حتى قابله احد جيرانه بوااااوو و تبدو جميل شعر بارتياح عميق. وكأن الكتاب الذى قرأه عمل ثوره داخليه .

Tuesday, June 17, 2008

تخاريف الخريف

اصدقائى من يومين كان عيد ميلاد مدونتى الحبيبه . . وعن طريقها اكتسبت صداقتكم وقرأت افكاركم وتواصلت معكم
وشعرت بسعاده غامره فى هذا العالم الجميل
اعتذر لغيابى الفتره السابقه واطمئنكم عليا واشكر من قلبى كل من سأل عنى واعذرونى فى عدم التعليق عندكم ان شاء الله
اتابع من جديد واسمحوا لى فى احتفالى بمدونتى ان اقدم اول بوست كتبته . اغلبكم لم يمر عليه وان شاء الله نتواصل قريبا
تمنياتى لكم بكل الخير واتركم للقرأه سلااااااااام

تخاريف الخريف

جلست فى ركنى المفضل فى البيت ومعايا كوب من النسكافيه وسرحت بخيالى ورن
جرس التليفون كان مندوب من رئاسه الجمهوريه
يبلغنى فيه انى سأقوم بتولى تشكيل الوزاره . قلت ده اكيد قريبى اللى بيحب دايما يستظرف وبيحاول يسخر منى خصوصا انى من وجهه نظره عايشه دور ابو العريف لكن نبره صوته والطريقه اشعرتنى بجديه المكالمه وابلغنى انه قبل انتهاء المكالمه سيرن الجرس وسيحضر مندوب لتسليمى خطاب التكليف الرسمى ولم انطق بكلمه اذا بجرس الباب يرن ويتم تسليمى الخطاب وكأنى مغيبه وتذكرت على الفور فيلم معالى الوزير ومسرحيه العالمه باشا وتشابه الاسماء خصوصا ان اسمى يطابق عميده احدى الكليات المرموقه وهى شخصيه شهيره .
شرحت للمندوب
السامى انى ست بسيطه وربه بيت ومعلوماتى متواضعه وان الموضوع تشابه اسماء صحيح متابعه للوضع لكن لا اصلح على الأطلاق لهذه المهمه انا بحب بلدى جدا وأفديها بروحى .
لكن عرفت من المندوب انه فى حاله اعتذارى
سأتهم بالتقصير
فى هذه المهمه وفهمنى بلطف انه مش من مصلحتى الاعتذار . ولما قلت له انا يوجد ملايين افضل منى
وانى ست عاديه كل تفكيرى فى اولادى وحاطبخ ايه النهارده واشوف فيلم اجنبى او العاشره مساء اوالقاهره اليوم قاللى
وأوضح لى ان لهذه الأسباب تم أختيارى
. ماتضيعيش وقت وألف مبروك وفهمنى بالذوق انه لو حاولت الأعتذار حاكون من القله المندسه التى تتهرب من المسئوليات و عندى الان طقم من السكرتاريه والمساعدين لأصدار اوامرى اعلنت انى حاجتمع ببعض الشخصيات الهامه وأختارت مكتبه الأسكندريه لتكون مقرالاجتماع و وقررت وحددت الشخصيات الى حاتحضر هذا الأجتماعوكانت كالآـى
السيد / عمـــــرو موسى
د/ عزيز صدقى ود الجويلى
والمتشاريين /هشام البسطويسى و احمد مكى والخضيرى وعبد العزيز زكريا ونهى الزينى
ود /يحيى الجمل ود/ اسامه حرب وحازم الببلاوى
الأساتذه / محمد هيكل وامين هويدى وفاروق جويده ورجاء النقاش ولويس جريس ودمحمد عماره الكاتب والخبير الاقتصادى والناشر المهندس / ابراهيم المعلم
واحمد المسلمانىومجدى مهنا ومجدى الجلاد واسامه هيكل وابراهيم عيسى وبلال فضل و عمرو اديب وحمدى قنديل وخيرى رمضان ومنى الشاذلى ورولا خرسا ولميس الحديدى و وفضيله توفيق وامال فهمى وناديه صالح وبثينه كامل ومحمود عوض وسلامه احمد سلامه الكنيسى واحمد فؤاد نجم الشهير بالفاجومى ود سحر الموجىونصر القفاص

ووائل لابراشى و فريده الشوباشى ود/ شيرين ابو النجا و يوسف شاهين ووحيد حامد ونجلاء فتحى ومحمد صبحى ونور الشريف والفنان الشاب احمد عيد

من رجال الدين الشيخ يوسف القرضاوى والأستاذ عمرو خالد و د / سليم العوا والبابا شنوده

وطلبت من كل جامعه ترشيح افضل
الاساتذه البارزين علميا وأخلاقيا علميا وأخلاقيا للانضمام لهذا الاجتماع الهام
وارسلت خطاب للدكتور احمد زويل افيده بماحدث ورجوته ان يتابع معى ماسيسفر عنه هذا الاجتماع الهام وان يرشح لى مايراه مناسب من العلماء وأن
يمنحنى نصائحه. كما دعوت الدكتور احمد عكاشه..
كما دعوت السيد المهندس / شريف ابراهيم من الشباب
وفى الميعاد المحدد حضرت هذه الباقه المتألقه من الشعب المصرىكان قلبى يخفق من الفرحه انى مع هذه الصفوه حضر الجميع والكل يتحسر
الست دى ست بسيطه تجبنا كده على ملا وشنا شعرت بضيق شديد
وكثرت الهمهمه وشعرت بضيق اكثر وبدأ لسانى يتلعثم ووتمالكت نفسى بالعافيه وبدأت اتكلم قلت ياجماعه انا
ست عاديه جدا زيي ملايين فى مصر وقطعا هناك افضل منى الاف المرات وانى اعرف
نفسى جيدا وانى لااصلح لهذه المهمه الجسيمه كثرت الهمهمه قررت انى اجعل الحاضرين يسمعونى قلت بنبره حاده انامجتمعه معاكم بناء على تعليمات السيد الرئييس
وفى هذه الاثناء
نظرت الى الحاضرين اتفحص رد الفعل رفع عمرو اديب حاجبيه ونظر الى خيرى رمضان وتبادلا الابتسام الخبيث
وفك محمد صبحى رباط عنقه
وباغتهم انا واثقه فى حبكم لمصر وانا اشارككم هذا الحب والأخلاص لكنى عاجزه على الأختيار
لذا قررت ان يقوم كل من الحاضرين ترشيح ما يترآى له بمنصب الوزير كل حسب تخصصه
هنا علق الفاجومى والله مصر فيها ناس زى الفل الست اجتهدت وعلى رأى المثل ايدى العيش لخبازه
على ان يتم شرح سبب هذا الترشيح ويتم دراسته والتصويت عليه
واذا بأم محمد الشغاله تصوت قلبتى النسكافيه ياحاجه
مش بأقولكم تخاريف بالصدفه كان احمد آدم بيغنى حاغير الخريطه ريطا ريطا
الحمد لله انا واثقه ان مافيش حد حا يقرأ غير اولادى بس حا يقلقوا على قوايا العقليه بس خلاص .

Friday, May 30, 2008

دائره الحب


ذات صباح قرع مزارع بصخب باب احد الاديره . عندما فتح الاخ الحارس الباب قدم اليه المزارع عنقود عنب فاتن
-ايها الاخ العزيز هذا افخر عناقيد العنب ارجو ان تقبله هديه منى
- شكرا ساخذه الى رئيس الدير الذى سيبتهج لتلقى هذه الهديه
-لا لا احضرته لك انت
-لى انا ؟ لكنى لا استحق مثل هذه الهديه الجميله . هبه الطبيعه
كلما اقرع الباب تفتح انت . عندما اتى الجفاف على الحصاد كنت تعطينى كسره خبز وكاس نبيذ . اود ان تغدق عليك حبات العنب هذه بعضا من حب الشمس ومن جمال المطر قدره الله العجائبيه
وضع الاخ الحارس العنقود امامه وقضى الصباح باكمله يتامله اعجابا.كانت الحبات جميله بالفعل لهذا السبب قرر ان يقدم الهديه لرئيس الدير . الذى طالما تفوه بالحكمه وقد اعتبرها الاخ نعمه عليه
سر رئيس الكهنه اشد السرور بالعنب ثم تذكر ان احد الرهبان مريض ,وفكر ساعطيه العنب من يدرى قد يدخل بعض البهجه لحياته
لكن لم يظل العنب لفتره طويله فى غرفه الراهب المريض لانه فكر فى الاخ الطباخ رعانى جيدا اعطانى افخر الطعام لآكلها وانا واثق انه سوف يسر بهذا العنب
عندما حضر الاخ الطباخ وجبه الغذاء اعطاه العنب
- هذه لك انت على اتصال وثيق بعطاء الطبيعه وستعرف ما تفعل بها انها نتاج الله
عجب الطباخ لجمال حبات العنب ولفت انتباه مساعده لكمالها لقد بلغت من الكمال درجه يصعب معها ايجاد من يقدرها كما سيفعل الاخ الحافظ الذى كان مسئولا عن السر المقدس والذى اعتبره كثيرون فى الدير انه رجل قديس
غير ان الاخ الحافظ اعطى العنب الى اصغر المترهبين الداخلين ليجعله يدرك ان عمل الله يمكن ان يتجلى فى ادق تفاصيل الخلق. عندما تلقى المترهب العنب امتلأ قلبه بمجد الرب لانه لم يسبق له ان رأى عنقودا بهذا الجمال . فى الوقت
نفسه تذكر يوم دخوله الى الدير والشخص الذى فتح له الباب ان تلك الحركه المتمثله فى فتح الباب سمحت له ان يصبح جزء من جمع يعرفون قيمه العجائب
وقبل حلول الليل حمل عنقود العنب الى الحارس
- كل واستمتع انت تقضى معظم وقتك هنا وحيدا هذا العنقود سيفيدك
ادرك الحارس حينها انه المعنى بالهديه تلذذ بالعنقود حبه حبه وخلد الى النوم وهو سعيدا بهذه الطريقه قفلت الدائره
دائره السعاده والفرح التى تلف من هم فى اتصال مع طاقه الحب
السطور السابقه من احدى روائع باولو كويليو اسمها الزهير هذا مثل داخل القصه ليبين لنا فعل الحب وطاقته وان من له
نصيب فى شىء سيكون له مهما كان قريب من ايادى اخرى كما نقول بلبلدى تبقى فى ايدك وتقسم لغيرك
عجبتنى حبيت اكتبها
القصه شلال من الافكارعن الحب هى قصه كاتب شهير تهجره زوجته بدون اى مبررات ويسيطير عليه هاجس وحيد يؤرقه لماذا هجرته
وكيف ان مجموعه من القيم الموروثه التى يؤمن بها الانسان تستعبده فيكرس نفسه وماله فى سبيلها
الزهير قصه تغوص فى اعماقنا والجانب الغامض فى نفوسنا



Monday, May 19, 2008

فات الميعاد

دخل منزله وهو مهموم كعادته عندما يعود الى منزله . ولكن هذا اليوم له الم خاص انه يوم وفاه امه .
قال لنفسه لست حزين بالقدر الكافى لا اعلم هل انا اكره امى ام احبها !!!! لطالما تمنيت البعد عنها
انا الآن حر طليق لا احد يسألنى كنت فين ولا جيت منين
هذا ماتمنيته الحريه ان افعل ما اريد وها انا لا زوجه ولا اولاد ولا ام بدون مسئوليات استطيع
ان اقابل من اريد من النساء ان اسهر . اصرف او اقرط لن يلومنى احد ورغم انى وصلت الى ما اريد الا انى اتعس من الأول لا ادرى ماذا افعل .
اشعل سيجارته واخذ يفكر فى سبب تعاسته . قال كان حلمى ان اكون مميز لأ مش مميز بل مميز جدا الكل يشهد
بذكائى اصبح معى مال لكنى لااستمتع به !!!
اشعر انى ثور فى ساقيه . . اى انسان يريد ان يجد بجانبه من يشعربه ويشاركه اعماق احاسيسه .
انا اعترف انى اريد كل شىء بدون ان اخسر شىء رغباتى كلها متناقضه فانا احب ان يرانى الناس رجل محترم ذو مهابه متدين وانا ايضا كده لكن لدى رغبه فى نفس الوقت فى معرفه الكثير من النساء زى محمد فوزى بيقول الزهور زى الستات لكل لون طعم ومعنى وانا احب الزهور لا يجتمع الوقار والتدين والعلاقات النسائيه بس انا كده .
احب المال ويصعب عليا صرفه بعد المعاناه فى جمعه بداخلى صراعات فانا سجين بين الصوره التى احب ان يرانى فيها الناس وبين حقيقتى وكلاهما ضد الأخر
احببت جاره لى لم تكن من نصيبى لأنها لا تروق امى ولا من حولى كانت حلم عمرى لماذا فرطت فيها
لقد كنت مسلوب الاراده امام امى من وجهه نظرها استحق الأفضل فهى من مستوى ضعيف ماليا واجتماعيا كان عليا
الرضوخ من اجل الشكل الأجتماعى الذى انا ايضا اميل اليه فانا ارغب فى زوجه اتباهى بها وفى نفس الوقت احبها
وهو ماكان لايتوفر في محبوبتى وعندما تزوجت زوجتى كانت افكارها مغايره لى تماما فانا افكر دائما فى تنميه المال
بينما هى تحب صرفه حقا لم تكن مبذره ولكنى كنت اتصيد لها الأخطاء كنت اضخم عيوبها
ثم يرهقنى ما افعل ولكنى كنت مدفوع لهذا لا اعلم لماذا كان يروق لى ان اراها تتألم ثم اشعر بذنب لطالما تمنيت البعد والراحه من هذا العذاب خصوصا عند تسامحها كان
كل همها ارضائى وخدمه الأولاد
بينما انا اريد حبيبتى السابقه بشقاوتها ودلالها ورأيت انها من باعدت بينى وبين حبيبتى فقسوت عليها وكلما رضخت قسوت اكثر حتى وصلنا الى الطلاق وشعرت بالشفقه عليها ولكنى كنت اكابر واضخم عيوبها بل انى احيانا اصفها بما ليس فيها لقد حققت ما اريد واذا بى اكتشف انى حققت رغبه زوجتى بعد طول المعاناه من
قسوتى ويأست منى طلقتها ثم حزنت وتظاهرت بصوره الضحيه والمحترم الذى يطلق لانها رغبه زوجته استغليت
عدم شكوتها وتضألت صورتى امام نفسى فتعبت اكثر .
اذن فى زواجى وطلاقى رضوخى لرغبات الآخرين . فقدت حبى من اجل امى .علمت بوفاه زوج محبوبتى
قررت ان اذهب الى مكان عملها بعد مضى ثلاثه وعشرون عاما . وجدت امرأه اخرى كره ولها اطراف سلمت عليا
سلام باهت لم ارى بريق عينيها بل كانت حزينه لوفاه زوجها كما عمدت ان تسمعنى كم كان المرحوم عظيم
حتى انى ندمت لذهابى وتلاشت صوره الماضى الحبيب
لقد عشت مقهورا منذ طفولتى فانا لا اتخذ اى قرار كل شىء برغبه امى . حقا انها تريد مصلحتى لكنها افقدتنى القدره
على اى قرار يخصنى انى اتظاهر بالقوه وان كل قرارتى من دماغى بينما انا هش فى اتخاذ القرارت المصيريه
امى
والآن بعد ان اختارك ربك الى جواره واصبحت حر وتحررت من سيطرتك بحبك واصبحت فى الخمسين من عمرى هل تعلمى اننى فقدت قدرتى على اتخاذ اى قرار لقد ادمنت ان تتخذى لى كل قرارتى
لو رجع الزمن بى لكنت اعيش حقيقتى وبدون اقنعه واتخذ قرارى بنفسى وملىء ارادتى كنت لا اعير ماذا يقول الناس كنت اسمع مايقوله قلبى ولن اهتم بماذا يقول الناس كنت حا انسى الخوف من الفشل .الخوف من الفشل هو الذى دفعنى اليه
لكن للاسف فات الميعاد

Wednesday, May 7, 2008

هديه بطعم الحب


من يومين طلع فى دماغى افتح كل الكروت التى تهدى لى فى المناسبات
لدى كارت مميز جدا من زماااااااان ودى حكايته
كان عمر ابنى الكبيرحوالى 5 سنوات فى كجى ون والصغير 4 وفى يوم عيد الام كان والدهم بيشترى لهم هدايا لكى يقدموها لى ولكنهم اردوا ان يهادونى هديه منهم الى جانب هديه ابيهم من حر مالهم .
ففوجئت بهم فى غايه السعاده وبيعطونى كارت مازلت احتفظ به حتى الآن عباره عن قطعه كرتون لونها بيج ومضلعه كانت موجوده داخل علبه دواء !! قاموا بقطعها ورسموا عليها سيده ماسكه حقيبه يد واشاروا عليها بسهم وكتبوا ماما . ...
ياسيدى على الدقه
لها رجل طويله واخرى قصيره وايد الى نصف وسطهاوالآخرى طويله وشعر غريب منكوش
وكتبوا اهداء كل حروفه الاملائيه خطا وملونين الكارت حقيقى تحفه.. وكتبوا ماما حبيطتنا الحب امى
حقيقى كارت موطميز جدا صناعه يدويه
دى اغلى هديه عندى وأضعها بجوار علبه ذهبى وكأنها مجوهرات وهى تعنى لى كده فعلا فرحت جدا جدا بهذه الهديه وفى اليوم التالى لعيد الام ذهبت الى محل بجوار منزلى يبيع عطور وماشابه ولقيت البائع بيبتسم لى ابتسامه عريضه وبيرحب بيا وقاللى ان اولادى مروا عليه لما نزلوا من اتوبيس المدرسه وطلبوا منه اغلى زجاجه برفان بفلوسهم بقى واعطوا له كل مايملكوا وهو 75 قرش
ولما شرح لهم ان مافيش برفان بالمبلغ ده قاللوا ماشى هى بتحب كريم نيفيا وطبعا المبلغ ما يجبيش المهم ان الرجل ضحك معاهم وقالهم ماما بتحبكم اوى من غير هدايا لاتتصوروا سعادتى بهذه القصه اللى فات عليها كتير وعرفتها من البائع وقاللى كانوا متأثرين اوى لعدم تمكنهم من الشراء

تفكيرهم ان يضحوا بكل مايملكوا 75 قرش حته واحده يعنى 2 شيبسى وواحد كارتيه بسعر وقتها معناه كبير
لان الشيبسى كان حبهم الاول
سيظل هذا الكارت غالى على قلبى لان احساس الحب فيه واصلنى اوى واللهى لو شفتوا الكارت لازم تضحكوا من الصوره المرسومه الست مافيش فيها حاجه طبيعيه كله مشوه لكن بالنسبه لشعورهم قمر قمر .. ولا الكلام مش مترتب امى الحب حبيبطتنا .. بالنسبه لى يفوق فى جماله احلى بيوت الشعر
الخوف يكونوا شايفنى كده هههههههههههه
لما بضحك معاهم واوريهم الكارت بيضحكوا من قلبهم ويقوللى ياحبيبتى ده شكلك فى هذه المرحله
انا اللى كده لأ وماسكه شنطه...حبايبى ربنا يبارك فيكم وافرح بكم يااااااااارب

تحديث
بناء على طلب المدونين تم انزال الصوره . عايزه اقولكم ان عندى 2 كارت تانين صناعه يدويه لما شافوا فرحتى بالكارت
قالوا نديها كمان . السهم موجود فى الكارت اللى بنط فيه الحبل معلش حصل لبث فى بوست تانى بقى
واحد راسمنى بنط الحبل آه واللهى بس الشهاده لله مش منكوشه بزعرورتين !!! والتانى سموا سوسو قصدهم صوصو نسبه الى صوصوه العصافير بس عايزين جاليرى يقدر
الفن :D
احقاقا للحق هما فنانين فعلا بس مش رسم . الصغير كان بيعزف بيانو سماعى وهو عنده 7 سنوات من غير ماحد يعلمه
ودخل معهد موسيقى فى الصيف الموضوع عايز بوست تانى
الكبير غاوى تمثيل وكان فى فريق التمثيل فى كليه فكتوريا وهو فى ثانوى ولما دخل كليه الهندسه كان فى فرقه التمثيل
وعمل مسرحيه بس الحقيقه انا تعبته لأن كل شويه بروفات وخفت عليه
هما دلوقتى مهندسين ونفسى اجوزهم واعمل زى مارى منيب ربنا يسعدهم وكل الشباب يااارب
:)

Tuesday, April 22, 2008

سلف ودين

الاخوه قبل الزواج وبعده
العادى ان الاب والام والاولاد بيكون بينهم علاقه طيبه وود الى ان يتزوج الابناء . وتلاقى العلاقه بين الاخوات مش زى الأول دخل فيها قلنا وقالوا واتصلوا وما اتصلوش وحاجات ماكنتش موجوده قبل الجواز
طبعا دخول اطراف جديده هو السبب
اللى بيحصل ان بيكون الزوج او الزوجه غيور وعايز شريكه له وبس وعايز ياخده من اهله بدل ما العيلتين يندمجوا ويكونوا عيله واحده لأ .
تلاقى الطرف القوى يضغط على الطرف الضعيف ويبعده عن اهله ويطلع فيهم القطط الفاطسه
مع انى ماشفتش قطط فاطسه .
المهم ده بيحصل كتير تلاقى الزوجه مش طايقه حماتها مع انها هى اللى ربت حبيب
القلب اكيد فى حموات متعبه هن فى الاصل امهات متعبات بردوا لو الحماه فكرت انها فى يوم كانت زوجه وان جيل بيسلم جيل وتشوف لما كانت زوجه كانت بتحب ان زوجها يكون معاها دايما حاتلتمس لها العذر ولو الزوجه فكرت بانها فى يوم من الايام حاتكون حماه وتفكر تحب زوجه ابنها تعاملها ازاى الامور حاتختلف


الابن يروح يزور خطيبيته وتبدأ تقولوه مامتك واختك وهو مش يحاول يوفق بين وجهات النظر لأ يبدأ فى الهجوم على اهله او العكس الام والاخت ضد الزوجه او الخطيبه
ونفس الشىء الزوج مراته تشيله من اهله اما اهلها مافيش افضل منهم . مين فينا مش بيغلط شويه تسامح ..لكن كل طرف عايز يمتلك الطرف الثانى ويستحوذ عليه وينسيه اهله ويعمل من الحبه قبه والبعض بينساق دون تفكير !!!!
ياريت كل طرف يحافظ عللى علاقته باهله بعد الجواز ويحاول ينضم لاهل الطرف التانى ويضمه لعيلته مش
لازم العمليه تبقى فريقين اهلى وزمالك
لايؤمن احدكم حتى يحب لاخيه ما يحب لنفسه

لو كل واحد بص فى عيلته حايلاقى علاقته بخالاته اقوى بكتير من عماته علاقته باهل امه عموما اقوى.
انا كمان كنت كده بس بعد ما كبرت واستقليت بحياتى حرصت على صله الرحم والتقرب للطرفين
مش معقول كل الخالات طيبات والعمات لأ . الام هى اللى دايما بتعمل كده .
تلاقى الزوجه ترى اخطاء من اهلها ولكن تداريها وتغفرها واخطاء اهل زوجها تكبرها وتضخمها او العكس .
زوجه الأب او زوج الأم يعامل اولاد الطرف التانى بقسوه الاولاد مالهموش ذنب لو فكر ان ابنه او ابنها
او هو شخصيا كان مكان الابن ويحن عليه مش افضل ويكسب فيه ثواب .
حد عارف كمان شويه حا يحصل ايه . الا يكفى مافيهم من الم الفراق .
الدنيا مش مستاهله كل هذه الصراعات واللى بيظلم اهل الطرف التانى بيكبر الاولاد ويعملوا فيه اللى عمله زمان
كنت بسمع الكلام ده كتير وكان فيه شويه شك لكن انا شفت ولمست حالات عن قرب عداله الله ولو بعد حين بتظهر
مش بقولكم كله سلف ودين

Wednesday, April 16, 2008

بيتنا القديم

اماكن فى القلب
كنت ذاهبه لشراء بعض المستلزمات لبيتى ولقيت رجلى بتاخدنى ناحيه بيت والدى الله يرحمه .
البيت اللى اتربيت واتولدت فيه ونظرت لشقتنا الحبيبه واللى سكنها آخرون
بعد زواجى انا واخواتى ووفاه والدى
ولقيت نفسى بمشى ببطء وافتكرت طفولتى
وجيرانا الطيبين
وبناتهم اللى كنت بلعب معاهم بالعرايس واللى اصبحوا الآن امهات واولادهم شباب
نظرت الى المحل اللى تحت البيت فرأيت صاحبه اللى كان مفتول العضلات وشعره شديد السواد .
تحول الشعر الى ليفه بيضاء وانحنى ظهره .. شكله حسسنى قد ايه فات زمن طويل اوى ولم احس به
مر امامى شريط حياتى على طريقه فلاش باك الأفلام
ملئ بالذكريات المتنوعه فرح .. زعل ..اطمئنان ..قلق.. احداث كتيره
افتكرت لمتنا انا واخواتى حوالين امى لعمل كعك العيد
واعطاءنا قطعه عجينه نلهو بها حتى تتفرغ لعملها واصرارنا على وضعها لكى تخبز
وهى شديده السواد من كتر لعبنا بها.
لبس العيد الذى كنت اجده على سريرى اول ما اقوم من النوم وفرحتى به
زياره اعمامى وخالتى وفرحتنا بلمه العيله التى نادرا ماتحدث الأن
ايام المدرسه والجامعه وحلاوتها و الزهق منها احيانا..
فرحه النجاح والقلق قبلها خناقاتى مع اخواتى اثناء لعبنا

مرور الايام ولقاءات الانساب وترتيبات الزواج

صديقاتى وقعدات الدردشه وخروجاتنا للتمشيه على البحر .
كل الذكريات بدون ترتيب كانت فى رأسى وكأنى بقرأ تاريخ حياتى وبدايات كل الاشياء
كل ده اتحرك فيا بمجرد المرور من امام البيت. قد كده المرور السريع ده فكرنى بتاريخ طويل
مهما انتقلنا وذهبنا لبيوتنا الخاصه والتى ربما تكون ارقى واوسع
يظل البيت القديم له معزه وغلاوه
وطعم مميز لانه فيه جذورنا واغلى سنين عمرنا .

Thursday, April 3, 2008

نعمل ايه

الناس دى ساكته ليه . صحتهم بتتدمر باكل مسمم ومياه وهواء ودم وضمائر ملوثه
الناس دى مش ساكته بتتكلم مع بعضها ومش عارفه تعمل ايه عايزه حاجه تضمن لها نجاح نذمرها
المعتقلات مليانه وايه النتيجه ورغم كل التعب ده
يظهر على
الشاشه من تسبب فى حدوث كل هذا ويبتسم فى برأه او ربما بلاهه ويتحدث عن انجازات غير مسبوقه لانراها ولا نشعر بها . كمان العيب فينا .
هى فعلا غير مسبوقه طوابير العيش وشهدائها وغلاء المعيشه . لم نرى هذا وقت الحروب
اما غلاء الحديد فمحظور التحدث فيه غلاء المساكن غير مسبوق . الاستلاء على الاراضى وتشريد الاهالى بدعوى التطوير .
تبوير الاراضى الزراعيه وبيع اراضى بتراب الفلوس للمحاسيب .
بناء ثم هد !!!
واختفى الكلام عن البنيه التحتيه
لأن مافيش اصلا . طب نعمل ايه . الناس كلها متذمره اطباء مهندسين قضاه موظفين وعمال يعنى حاجه بالأجماع الناس مش بليده بس نفسها اتقطع من ركوب مواصلات غير ادميه ووقوف فى طوابير العيش وامراض متفشيه وشعور باليأس والأحباط يهد .
الناس مش مستسلمه بس منهكه طب نعمل ايه ؟؟؟؟؟؟؟؟؟؟؟

سمعت د / جلال امين فى قناه الجزيره بيقول ان جزء من الحل مانراه الآن من اضراب اساتذه الجامعه.
وقفات الاطباء والقضاه وعمال المحله . هذا التحرك الذى قد نراه بسيط هو مصدر قلق للكبار
دوام الحال من المحال . .

Saturday, March 29, 2008

شويه ضى وجيه عزيز

ذهبت امس لحضور حفل الفنان الرائع وجيه عزيز . كان اولادى عازمنى لمعرفتهم مدى اعجابى بهذا الفنان الجميل كل حاجه كانت جميله اوى المكان الجمهور والصحبه
المكان مكتبه الاسكندريه .
الجمهور العدد مش كبير لكن من نوعيه السميعه الراقيه والاعمار مختلفه

وجيه وفرقته النابغه حاله خاصه ..غناء بشكل تانى حاله فريده من الأبداع والجمال زى شويه ضى فى ليل ظلامه حالك
الالحان شرقيه اصيله و صوت غايه فى العذوبه والجمال فيه قوه ودفء عجيب
وقدره عبقريه على تغيير النبرات
بياخدك لعالم من الفرح الممزوج بالشجن والحزن مشاعر مختلفه مضفره ببعض
والنتيجه ضفيره جميله مرصعه بالجواهر القيمه
كنت عارفه ان اولادى داخلين علشان يسعدونى الا انى لقيتهم متجاوبين جدا من غير مايقوللى
بعرف شعورهم من ملامحهم مما زاد شعورى بالاحساس بالنشوى مش عارفه اوصفه
اغانى وجيه وموسيقاه بتتغلغل فى الروح وتأخدك لتعيش فى عالمه السحرى الخلاب

كل اغنيه تحس انها معموله تفصيل بمقاس من يسمعها لانها كلها مشاعر انسانيه مرينا او بنمر بها
حب.. قلق .. هدوء.. زعل.. فرح .. وتلميحات عن وضعنا الحالى
كان فى الصف اللى امامى طفل وطفله بصحبه مامتهم قبل ماتبدأ الحفله قلت فى سرى دى حفله مش بتاعت اطفال
لازم اللى يحضرها تكون ناس غاويه طرب وتحسن الاستماع فى اثناء غناءه الكل بيسمع وكأنك فى مكان مقدس
لايجوز فيه الكلام او حتى الهمهمه فكنت قلقانه منهم لما بدأت الحفله كانوا ماشاء الله عليهم متجاوبين جدا
وبيسمعوا وينصتوا ويصفقوا بحماس بعد نهايه كل اغنيه واضح انهم من معجبيه .
وفى اغنيه زعلان شويه كانوا برددوا مع الجمهور وكأن الجمهور كورال
الاطفال كانوا حافظين كل اغانيه حاجه تفرح سعدت بهم وبامهم اللى بتسمعهم فن جميل كده
كان بيقول مثلا
زعلان شويه يردوا . ... من ايه
فرحان شويه.... على ايه
مبسوط شويه ....كده ليه
قلقان شويه ....على ايه
او اغنيه قول معايا قول بجد
هى عيشه ولا موته ولا فوته فى حاره سد...نفسى اكتب كل اغانيه .اسموعها افضل

الآلات والنغمات شرقيه والكلمات جميله المعانى عميقه والاسلوب مميز
فن له طابع مصرى اصيل وكأنه سيد درويش الجديد
فى امل رغم ان
مافيش اى دعايه للحفله كل اللى حاضرين هم اللى بيتبعوا اخباره ويبحثوا عنه فهو
مثل المعدن النفيس يتم التنقيب والبحث عنه لا يسعى الينا بل نحن نسعى اليه وننقب عنه .

لكن اكيد فى ناس تتمنى ان تسمع هذا النوع من الطرب الا انها لا تعرفه لان اغانيه لاتعرض فى الاذاعه او التليفزيون
حقيقى خساره .كنت اتمنى ان يكون المسرح ممتلىء على اخره لانه يستحق اكثر من كده بكتير
فى نهايه الحفله وقف الطفل واخته اللى كنت قلقانه منهم وصفقوا بحماس وجرى الطفل ناحيه المسرح
ومد ايده الصغيره ليسلم
على وجيه وانحنى الفنان القدير ليصافح الطفل انحناء الفنان الشامخ.
كانت سهره ممتعه جدا بشكر حبايبى اللى عزمونى واسعدونى جدا وكمان علشان اناعارفه
انهم حايقرأوا وعارفه التعليق يعنى ماجبتيش سيره اننا عازمناكى على العشاء ادينى قلت
حقيقى كان عشاء فاخر وسهره جميله مش ممكن انساها


Sunday, March 16, 2008

مين الخسران


توسلت اليه بدموعها الحاره لكى لا يتركها لم يكن توسلها حبا فيه وان كانت لم تكرهه
فهى لا تعرف الكراهيه ولكن حبا فى توفير جو عائلى لبناتها الصغار وحفاظا على الشكل الاجتماعى واملا فى تغييرهه
ولكنه لم يأبه لتوسلها ولا لدموعها
واتهمها بالاهمال والنكد وتركها ظلت تبكى وتراجع تصرفاتها فوجدت انها كانت دائما تتنازل
من اجل اسعاده
كم زارت اصدقاء له لم تكن تشعر اتجاههم باى موده لاجله
كم من مرات تعمد عدم مرافقتها فى زيارتهالاهلها بحجج واهيه وتسبب فى احراجها

كيف اعطته كل مالها لكى يبدا مشروعه و كم مره تنازلت ان تشترى ماتحتاجه لتوفر له
كم مره حاولت ان تشاركه اهتماته وسهرت فى انتظاره لتعد له العشاء بينما هو يلهو
كم انفقت على اهتمامها بنفسها كى تروق له لم تندم على كل هذا يمكن لو لم تفعل لندمت لتقصيرها.
هو لم يحبها وتزوجها بناء على رغبه اهله تمنيت حبه ولكن القلب له احكامه حاولت جاهده ان يحبها ولكنه
لا يراها فقلبه وعقله مع اخرى ما ذنبها فليدعها وشأنها . ان كنت لا تحبنى فقلبك ليس ملكك
ولكن لا تظلمنى هكذا كانت تقول لنفسها
وبعد ذرف الدمع الغالى وشعورها بالخزى واهتزاز ثقتها بنفسها
يكفى ان ترى فى نظره من يعلم قصتها سؤال لماذا هجرها مما زاد من آلامها
وبعد ضياع وقت ليس بالقليل ركزت تفكيرها على بناتها وكيف تحميهم من تكرار ماحدث لها
وعودت نفسها ان تعيش مستقله وتعتمد على نفسها وتسعد بناتها وتكون هى ايضا سعيده
كم من زوجه فقدت زوجها والحياه مش بتقف .
هجرهه لها فيه قسوه وجرح غائر فى القلب والروح واسئله محرجه وفضول وطمع ممن يحيطون بها .
بعد الصدمه ومرحله فقدان الاتزان عاد لها الهدوء النفسى ولم يكن لديها وقت للحزن بين عملها
ورعايه بناتها وشغل البيت كانت زحمه الواجبات نعمه من ربنا حتى ان جراحها تعافت
كان كل همها ان تنشأ بناتها سويات فكانت لا تذكره بسوء كل اللى بتقوله طباعنا مختلفه
وكانت تهتم بزيارتهن لابيهم اسبوعيا حفاظا على صله الرحم ولوعيها ان حب الاب حب غريزى
وحتى تضمن لهن صحه نفسيه سليمه فلا تحرمهمن من رؤيته خوفا عليهن من الشوق اليه بينما
هو مش فارقه معاه وان كانت تخشى ان يفسد صورتها امامهن الا ان هذه الزياره بمرور الوقت
وكبر البنات وزياده وعيهن كان سبب اكتشاف قد ايه والدهم ظالم و انانى
ولا يهتم الابذاته وانه افسد صورته هو دون قصد بينما هى تزداد كفه محبتها كل يوم
ووجدت فى بعده عنها سلامه وطمانينه فلم تعد ترى علامات خيانته والاستهتار بمشاعرها
ونعمت بسلام نفسى وتوطدت علاقتها بالله وبعد ان ظلت سنوات تلوم نفسها بان يمكن لو فعلت كذا كان افضل او
ان لم تفعل كذا كان الاصح كما كان يوهمها دائما انها غلطانه ومش فاهمه حاجه يااااه كم كانت صبوره
كان المقربين منها يقولون لها بكره يندم فكان هذا الكلام يؤلمها اكثر من ان يصبرها
فعدم ذكره افضل سعدت وهى ترى بناتها متفوقات بل ان لديهن وعى اكثر منها
اتصلت بها عمتها لتهنئها بعيد ميلادها ودعت لها بان الله سيعوضها عن تضحياتها ابتسمت وقالت
الحمد لله وقالت فى نفسها
ابدا لم اكن مضحيه بل سعيده وفائزه فقد عشت امتع لحظات حياتى وانا ارى بناتى من الطفوله
الى مرحله الشباب بتركيز كبير
كم كانت سعادتها وقت ظهور نتائجهم بتفوقهن كم مره ذهبت معهن لترى نشاطتهم الفنيه وكانت فخوره بهن
اسعد الاوقات فى لمتهم وهن يشاهدن فيلم فى التليفزيون مع اكياس اللب والسودانى والفشار
وسماع ضحكاتهن وقفاشتهن
حتى شجارهن كان طفولى وبرىء يعقبه جلسات مصالحه وضحك من القلب ذهابهم للسنيما وتبادل ارائهم
لقد ضاع منه وقت جميل ومنحها اياه .
لو استمرلكان سيفسد هذه المتعه باختلاق مشاكل لا وجود لها .
فعاشت طفولتها وشبابها من خلالهم مره اخرى كم هى سعيده وراضيه عن حياتها وعن نفسها.
لو استطاعت لشكرته لبعده عنها لقد منحها قوه لم تكن تحلم بها بل سعدت بها
لاهو عايش مع حبيبته فعاش سعيدا او حاول ان يراها ويرى بناته فهنأ نفسه وهنأهن
تمتمت فى سرها هو الخسران
هذه التدوينه كتبتها من حوالى شهر واحتفظت بها لانى كنت ناويه اعيد صياغتها وبعد ين عرضتها على صديقه لى
تعانى من نفس الظروف عجبتها وحمستنى لنشرها كما هى

Tuesday, March 11, 2008

السميائى ساحر الصحراء

السيميائى ساحر الصحراء
دار الهلال
ده اسم قصه تأليف باولوكويليو وترجمه بهاء طاهر وهى اكثر القصص مبيعا فى العالم
اسلوبها اكثر من رائع وخلاب ... تحفه
ده غير عمق المعانى والدروس
المستفاده من كل صفحه دون ملل بل شعور باستمتاع ونشوى لا استطيع وصفها كما تسمتع وانت تسمع موسيقى تحبها وتشعر بان روحك سعيده او كما تكون مع داعيه مؤمن له اسلوب جذاب بيخاطب عقلك وروحك من اجل تدعيم ايمانك فيها لمسات جميله عن الاسلام
هى اشبه بالحدودته التى تجذبك بشده ولاتستطيع ان تؤجل قراءتها من فرط جاذبيتها وتأثيرها المدهش والممتع فتأخذك فى عالم اشبه بالأساطير ولكنه زاخر بالحكم والدورس المفيده فى حياتنا وتثبت معانى إيمانيه منها أن الإنسان لا يستطيع أن يهرب من المكتوب عندما تكون الاشياء مقدره فلا سبيل لتفاديها ,وأن عدم معرفتنا بالمستقبل رحمة بنا فإن كان شيئا حسنا
فسيكون بمثابه مفاجأه
حسنه وان كان شيئا سيئا فكنا سنقاسى ونتألم فى انتظاره
وندرك ان الحكمه نأخذها من اشياء قد نراها بسيطه وعاديه
الروايه عن شاب ترك الدراسه رغم توسل أسرته له بدراسه اللاهوت إلا انه يحب الترحال
فقرر ان يكون راعى للأغنام لانها الوسيله المتاحه للترحال فى أوان القصه
" لاحظ ان وظيفه الرعى عمل بها معظم الانبياء " لا أعلم إن كانت مقصودة أم لا لكننا نستنتج أنه تعلم منها
اشياء لا يمكن تعلمها
من المدارس تعلم ان هناك لغه غير لغه الكلام وهى التى كان يتفاهم بها مع غنمه
وكان دائم القراءة ومحب لها .رأى حلم يتكررعن مكان كنز وذهب الى عرافه فسرته
بوجود كنز حقيقى عند اهرام مصر التى تستغرق وقت طويل للوصول اليها .
فقرر ان يقطع رحله طويله مملؤه بالمخاطر والاثاره للوصول للكنز
كما انه سيضطر لبيع غنمه و يصادف بائع كريستال يعمل عنده سيتعلم منه الكثير ويعلمه ايضا
ويتعرض لمواقف وعلامات تتعدى لغه الكلام لغه خفيه فيتعلم الحكمه وفهم الذات وان لكل انسان حلم يأمل ان
يحققه فى شبابه ولكن قوى لا يدركها تحاول ان تنحيه عن تحقيق حلمه وتحقيق ذاته بكثير من العقبات
التى تصل خطورتهالدرجه انه كاد يفقد حياته وسرقه كل مايملك لكنه يرى علامات تحثه
على المثابره لتحقيق حلمه وتفعيل ارادته وفى هذه الرحله التى عانى فيها الكثير
يتعرف على حبيبته ويتعلم اشياء لا يمكن معرفتها لو لم يقم بهذه الرحله المثيره ويقابل السيميائى
وهو بمثابه العالم الكيميائى ذو الخبره والحكمه وهو من يرافقه
فى هذه الرحله الرائعه ويتعلم منه الكثير
ويعى ان على الإنسان أن يتخذ قرارته بنفسه
وان هناك إشارات وعلامات تعتبر بمثابه رسائل من الله تساعدنا على تحقيق احلامنا ولكن لمن يعيها
وأن أثمن كنز هو الحب الحقيقى وانه يجب ان نستمع الى قلوبنا وان إراده الإنسان أقوى من الخيال
فاذا أردنا ان نتنحى عن امور فرضت علينا من الآخرين وجب علينا ان نختار ونقرر بانفسنا مانريد ان نفعله
كما ان الكنز الذى نبحث عنه قد يكون بالقرب منا جدا .
هذه بعض الحكم الموجوده فى القصه المكتوبه باسلوب غايه فى الروعه وحجمها مش كبير 180 ص
. قصه جديره بالقرأه اقرؤها ولن تندموا بل ستستمتعوا وتستفيدوا جدا

Wednesday, March 5, 2008

يوم بالالوان والموسيقى التصويريه

وانا فى الثانويه العامه كنت اشعر بقرب نهايه مرحله انى تلميذه وانى على ابواب مرحله
الشباب التى اشتاق اليها وساصبح طالبه جامعيه
لم تكن تعنينى اى كليه التحق بها لأن مافيش كليه تنا سب ميولى فهى مزيج من شويه علمى على شويه ادبى !!!!
فانا احب بعض فروع الرياضيات جدا مثل الهندسه والجبر
اما حساب المثلثات والتفاضل والتكامل والاحصاء لاتستهوينى واحب اللغات .
والجغرافيا اسامى البلاد وعواصمها بدون رسم خرائط او دخول فى تضاريس يعنى من كل ماده عايزه حته
لسه مافيش كليه مطابقه لميولى !!!!
فكنت اذاكر واركز على المواد التى اميل اليها اماباقى المواد كانت تتراكم وانا اقول لسه بدرى الامتحان فى يونيو
لحد ماوصلنا لشهر ابريل فى مواد متفوقه فيها واخرى مركونه على الرف وكتبها نظيفه زى ما استلمتها
فى الوقت ده بالذات وقرب الامتحانات اشعر ان الدنيا حلوه اوى الجو بتاع رحلات وقعده فى بلكون منزلى التى ترى البحر
لكن ضميرى واجعنى لانى مش قادره اقوى ارادتى واذاكر كما ينبغى .
المهم استيقظت من نومى فى اوائل ابريل ومسيطره عليا فكره ان شهرين وحاسيب مدرستى اللى بقالى 3 سنوات فيها
وحبيتها وحبيت الطريق اللى بمشى فيه اليها وحاتخلى عن لبس المدرسه اللى اتعودت عليه
فقررت بينى وبين نفسى انى اسجل اليوم ده فى ذاكرتى وبقيت اقول لنفسى سجلى فى دماغك احداث اليوم والأماكن
بالصوت والألوان فهذه الايام لن تعود
فاكره انى عملت شعر ى ذيل حصان والتوكه لونها بنى غامق واحتضنت شنطتى واهتمت برباط عنقى الازرق وكاميرتى عيونى
وفنجلتها واذانى صاغيه ولمعت الطبله تأهبا للتسجيل وكنت سعيده اوى بفكره التسجيل فى الذاكره
اول حاجه كانت جميله انى سمعت اغنيه شاديه الشمس بانت من بعيد جايه ومعاها يوم جديد
اخدت نفس عميق زاد من انتعاشى وفى المدرسه كانت الكاميرا تتجول وتسجل المدرسين والمدرسات لا بسين ايه همساتهم لبعض .
الطابور وتحيه العلم ونشره الاخبار المدرسيه
ثم اخذت وكيله المدرسه المايك وطلبت من البنات عدم الوقوف فى شرفات المدرسه لوجود شبان بيعاكسوا البنات والعكس
كنت سامعه كل كلمه ومركزه قوى بهدف التسجيل ووضع فايل منظم فى الذاكره
لكن لم يعنينى معنى الكلام فصورت وكيله المدرسه فى التايير الزيتى الانيق والنظاره السوداء واحمر الشفاه البرتقالى
وشعرها القصير المصبوغ .
الطوابير وهى تتفرع للفصول على انغام موسيقى جميله
وبعدين قلت فاضل انى اخد صوره للموقع من كل الاتجاهات اتجهت للشباك الذى يرى البحر الممتد بلونه الازرق الجميل والامواج البيضاء الهادئه وكانت رائحه البحر هله واخذت صوره رائعه مازلت اتذكرها
ثم اتجهت بادواتى للناحيه الآخرى فى اتجاه المنازل حتى اسجل بمنتهى الأمانه كل حاجه بضمير
الكلام ده كان فى الخمس دقائق اللى بين الحصص طلعت اسجل من ناحيه المساكن كان فى داده بتشاور ليا بس انا
مش واخده بالى بتشاور ليه بس اخدت لها صوره . وهى تشاور بحماس اكتر لابأس اخدت لها صوره تانيه
وانا سعيده ولكن لم تكتمل سعادتى شعرت بذيل حصانى بيتشد منى خير الله ما اجعله خير التسجيل لم يكن فيه اكشن
كانت وكيله المدرسه ماره من خلفى ورأتنى وانا فى الممر الى بيطل على المساكن
وتوهمت انى من البنات اللى بتعاكس الشبان وده ابعد مايكون عن طبعيتى افتكرت كلامها فى الطابور
ولم استطع ان اتكلم ولكنى كنت مندهشه و بضحك فى سيرى ده انا بسجل اليوم وكده الذكرى حاتتحفر وتثبت اكتر
ولكن بدأت تشد ذيل حصانى اكتر وانا فى حاله ذهول ازاى تظن فيا كده ده انا وضعى مختلف ووقوره
وببتسم فى بلاهه وبدأ شعرى وكرامتى تؤلمنى واستشعر خطوره الموقف .
ولكن مدرسه الكيمياء شافتنى وانقذتنى من ايدها وقالت لها دى بنت مؤدبه جدا دخلت فصلى وانا مش مصدقه بس سجلت بنجاح
ورغم مرور سنين طويله لكن الفايل موجود. لما رجعت البيت وقعت عينى على كتاب الأحياء وكانت بالنسبه لى من المواد العويصه
وشكل الكتاب مرعب ضخم جدا اتصلت بسلوى صحبتى وانا زعلانه اوى من نفسى لأنى بضيع وقت كتير و من المستحيل الوقت يكفى طمينتنى وقالت لى انا
عندى الحل. انا وانتى حانخلص الاحياء النهارده !!!10 دقائق وحاكون عندك حضرى الشاى لقيتها جايه وتحت ابطها جورنال .
ايه ده يابنتى قالت لى ده مكرر الأحياء كان ملخص بيتباع فى مكتبه جنب بيتها فيه كل رسوم الاحياء وملخص الشرح.
فقرأناه فى ساعتين وحفظنا الرسوم وقعدنا نشرب الشاى واوهمنا نفسنا باننا خلصنا المقرر ونجحت فيها على الحركرك

سعادتى كانت لاتوصف رغم موقف الوكيله المرعب لانى سجلت بامانه واحتراف ووهمى انى خلصت مقرر الاحياء زاد سعادتى !!!فات زمن طويل لكن اليوم محفور فى ذاكرتى بالالوان والموسيقى التصويريه

Tuesday, March 4, 2008

صباح جميل مشرق

صباح معطر بالورد والياسمين
لما تفتح الايميل بتاعك وتلاقى رساله جميله مرسله لك من احد قراء مدونتك
بيصبح عليك ويقولك سلامتك وازيك وايه اللى مزهقك ويتمنى لك الخير ويرسل لك رقم الموبايل ويقولك انت مش لوحدك انا معاك تفتكر شعورك حا يكون ايه ؟ اكيد حاجه تسعد وتقول الدنيا بخير والاجمل لما يكون الراسل انت بترتاح لكتابته ولاسلوبه وبتحب تقرا له وتشعر انه مش غريب عنك ده بالضبط اللى حصل معايا امبارح كنت فى عملى وبفتح الايميل كالمعتاد لقيت ايميل عنوانه جديد عليا مرسل من الجميله لومى الحقيقه شعرت قد ايه ممكن الواحد يكسب صداقات جديده وقد ايه ممكن ايميل يغير المود من حاله احباط الى امل لفته جميله بتدل على نبل اخلاق ورقى ومشاعر جميله
كان عندى شويه حاجات مستعجله بس كنت فى حاله نشوى ونفسى ارد على لومى واقول لها ربنا يخليكى ياحبيبتى النهارده ا اتصلت بها ومن قبل ما اقول اسمى عرفتنى . نمره جديده عليها وبعد ارسال الايميل ربطت على طول كانت مكالمه سريعه بس جميله واتعرفنا على بعض اكتر ليه انا بكتب لكم اللى حصل ولم اكتفى بشكر لومى وبس . لأنها اسعدتنى جدا فوق ما تتوقعوا او يمكن فوق توقع لومى ولقيت انها لفته جميله كان لها تأثير رائع عليا قلت ياريت كل اللى يقدر يخفف عن اى حد حتى لو مافيش معرفه شخصيه يعمل كده حايكسب صديق او يدعم صداقته اكتر وحايسعد غيره حقيقى لفته رائعه جدا كان لها تاثير عميق .
فى تصرفات بسيطه بس بيكون لها اثر قوى مش ممكن يتنسى
خالص حبى وودى لك يالومى الجميله وربنا يحميكى وتكونى سعيده وتسعدى دايما الآخرين

Thursday, February 28, 2008

زهقانه

مع انى بطبعتى لااميل للشكوى او التذمر واحوالى بخير الحمد لله
الا انى اشعر بحاله زهق وملل وصدقونى سببها الرئيسى الاحوال العامه
كان الله فى عون من يعانون من ظروف ماليه صعبه لكن حتى الناس الناجحه ومعاها فلوس
بقيت مش طايقه البلد فيه ايه اكتر من كده
ابلغ مثال للوضع ده الحضرى
ناجح جماهيريا وماديا ايه اللى يخليه يهرب من مصر
قعدت افكر لقيت الواحد مش مطمئن للمياه اللى بيشربها معاه فلوس يجيب مياه معدنيه تطلع لنا
تحذيرات من تلوث المياه الخضار غير مأمون ومليان هرمونات
مطاعم مشهوره وجدوا فيها اطنان من الزيت الفاسد واخرى تقدم لحم الحمير
لا قدر الله لو حد تعب تبقى مش مآمن لمعمل تحليل لازم تحلل فى اكتر من واحد الدم وتلويثه ومشاكله
القمح المستورد ودايما مش مطابق للمواصفات عمارات بتتهد على سكانها
تفتح التليفزيون تلاقى اصحاب الكروش قاعدين بيتكلموا على الانجازات والعداله وكل واحد ماسك سبحه يعنى كده بأه بعيد عن الشبهات قال يعنى الرجل تقى والناس حاتشوف السبحه تصدقه والشعب تعبان ومنهك ومل هذه الوجوه
ناس عندها مليارات وبتتحكم فى الاسعار وتقولك الاسعار ارتفعت عالميا طب والاجور بردوا ارتفعت عالميا
واصحاب المليارات قله واللى على الحديده الاغلبيه
حوادث الطريق ربنا يكفينا شرها قولولى ايه يخللى الواحد مش زهقان

اعذرونى بس فعلا انا زهقت

Monday, February 25, 2008

زهره الكاميليا


هى ابنتى التى لم انجبها احبتها فى الله دون اى معرفه شخصيه من اشعارها وجدت فيها انسانه رقيقه حنونه محبه للحياه محترمه ومتدينه ولكنها تعانى فى صمت تشتاق كطفله صغيره الى حضن امها التى افتقدتها تتذكر ايامها معاها وقسوه الايام وافتقاد الحنان بعد رحيلها . اشعر بغربتها وهى فى بلدها كل من يقرأ مدونتها يستشعر مدى رقتها وعذوبه كلماتها وموهبتها انسانه بكل ماتعنى هذه الكلمه من معانى ساميه حتى من لا يميل للشعر يحب اشعارها كما انها تمتاز بخفه دم وذكاء بتظهر من تعليقاتها قامت مؤخرا بغلق مدونتها لمعانتها التى لاتريد ان تكتب عنها او تتضح فى كتابتها حتى لا تزيد الامها حبيت اقولك ياكامى انى اتمنى ان تستمرى فى الكتابه لانك موهوبه ولك محبين كتير وان شاء الله يكون لك مستقبل باهر وربنا يقويكى ويبدل احزانك بافراح يااااااااااااااارب كاميليا بحبك اوى واستشعر انك تشعرين بى . انا مش موهوبه زيك والا كنت كتبت فيكى شعر بس انا عايزاكى تعرفى ان كل اللى بيدخل مدونتك بيحبها جدا وده معناه انك انسانه شفافه وتتحب وبتخطفى القلوب ربنا
يسعدك ياكامى وترتبطى بانسان جميل زيك وتكونى اسره جميله وتجيبى لنا زهور صغننه جميله زيك
لما حبيت امر عندك كعادتى لقتيك بتعتذرى وبتقفليها لأ ده انتى تستمرى وتطلعى طاقتك فى الكتابه فكرى تانى ياكامى
وربنا ينور بصيرتك ويلهمك بكل ماهو صواب حقيقى انا مش عارفه اعبرلك عن شعورى لكن عارفه انه واصلك
انا عايزه اقولك انى تهمنى راحتك وسعادتك وغلق المدونه فى اعتقادى لا يخفف الألم اكتبى ياكامى
دى وسيله للفضفضه انا لا املك الا الدعاء لك بالفرج والفرح وان يبدل الله احزانك بالسعاده
يارتينى كنت جنبك اقدر اضمك وامس دموعك واخفف جراحك
اكثرى من الدعاء والصلاه ولاتبكى فان الله معك ومعك قلبى ودعائى
خالص شكرى وتقديرى لابو خالد الذى طلب منى مناشده كاميليا لعدم غلق مدونتها الجميله
تحديث
كاميليا الرقيقه ذات القلب الطيب والمشاعر المرهفه شعرت بمدى حبنا لها وتقديرنا لمدونتها الجميله
وموهبتها الفائقه وقدرتها على التعبير باسلوب سلس وجميل استجابت لعدم الغلق
مبروك لنا ودعاؤنا لكى ياكامى بالتوفيق والسعاده واشكرك جداااااااااااااااااااااااااااااااااااا

Thursday, February 14, 2008

يارب سترك

ذهبت الى المستشفى لزياره قريبه غاليه عليا كانت على وشك اجراء عمليه المراره كنت عندها قبل الموعد
المحدد لاجراء العمليه بنص ساعه كانت تبدو متماسكه لكن اكيد من جواها قلق
وكانت لابسه اللبس المعقم وبونيه الشعر انا من جوايا
كنت خايفه اوى كان الله فى عون اى حد بيمر بالتجربه دى كان فى اتنين من اخواتها
ومامتها كانت فى البيت لان والدها مسن ومريض وكل شويه تتصل تطمئن عليها وهى بتعيط
شويه وجابوا الكرسى وطلبوها لحجره العمليات شفت فى عنيها الخوف والدموع قبلتنا وقالت ادعوللى
بدأ الخوف والقلق يتسلل لقلبى وبدأ يجى اقارب لها المهم لقيت نفسى مش قادره استمر
قلت انزل امشى فى الشارع وادعى لها
لما رجعت المستشفى كان عدد الزوار كتر وصل اخوها وازواج اخواتها الكل على وجهه علامات قلق
وكل واحد بيقول للتانى دى سهله اوى دى شكه دبوس والتانى يردد طبعا طبعا وشكله مرعوب .
معذورين من اللى بنسمعه عن الاهمال ونسيان الفوط وسرقه الكلى وغيره ... ربنا يستر ويشفى كل مريض
المهم عدا الوقت بطىء وطويل وبعد ساعه ونص فاتت بصعوبه جدا طلعت ممرضه وجهها جامد الملامح
وقالت عايزين حد فى حجره العمليات شعرت بدقات قلبى بتزيد ورجلى بترتعش وقلت فى نفسى يارب سترك ولطفك
ولقيت نفسى بمشى فى اتجاه حجره العمليات كان اخوها جرى وقبل ما اوصل كان رجع وطمينا
انها قامت بالسلامه وعايزين الحساب بس طريقه الممرضه بعيده اوى عن الذوق واللياقه
ايه المانع انها تقول حمد الله على سلامتها وحد يحاسب
حقيقى رعبتنى انا اتشاهدت وبدأت الابتسامه تعلو الوجوه وقالوا هى فى الافاقه
شويه ولقيتها نايمه على السرير اللى بعجل وبيتجهوا بها الى الحجره بتاعتها
كانت لسه تحت تأثير البنج والحجره فيها انا واخواتها واخوها
واخت زوجها اما زوجها
فهو مسافر خارج مصر ولم ترغب فى اخباره كفايه غربته
والكل اجمع اننا نقوله بعد ماتقوم بالسلامه
المهم انها بدأت تتكلم وهى مازالت تحت تأثير المخدر مع اهات الألم
كانت بتقول بحبك اوى ياربى احمدك يارب واشكرك وبحبك يا آمنه علشان انتى طيبه اوى آمنه دى بنت اختها ائئئئ اه اه
لحد كده والكلام زى الفل شويه ونقلت . ذاكريامهاب ذاكر يا جزمه يااااه ده انت غلس ممممممممممم ماشى يا مهاب
مهاب ده ابنها . الحقيقه انا قلقت قلت دى بدأت باابنها مين عارف حاتقول ايه تانى الخوف تنقل
على ابوه واخته موجوده وبقيت اقول يارب سترك
المهم ان ابنها كان موجود وكان بيرفع حواجبه ويقول ماشى اتفضحت
ولقيت اخوها بيقول لاخته ماتكلميهاش وعايز يغلوش انا قلت اطلع
علشان المفروض دى واحده مش فى وعيها وعقلها الباطن اللى بيتكلم
قلت الله لايقدر لو كنت مكانها ماحبيش حد يسمعنى حاقول ايه
ياخبر ياخبر تخيلوا كل واحد كده ترك عقله الباطن يتكلم ويقول بأه بيحب ميييييييييييين ويبكرهههههه ميييييييييين
ويطلع مشاعره وماخفى كان اعظم ..فضيحه
اوم ايه عملت ناصحه وفقيقه قلت يابت اطلعى يقوم الباقيين يحترموا خصوصيتها ويطلعوا فقاقه بأه
وطلعت لكن ماحدش طلع ورايا .....حقيقى ناس ذوق ذوق ذوق
بس انا قلت انا اعمل اللى احب انه يتعمل معايا وفضلت اتمتم فى سرى يارب سترك يارب سترك

Tuesday, February 12, 2008

صنع بلدنا ومابيتكسرش

حاجه تفرح ودعوه للتفاؤل
على صوتك بالغناء
مبروك مبروك الله على الفرحه جميله بتجمع كل الأحباب
والله وعملوها الرجاله
انا مصرى وابويا مصرى
الحقيقه انا ماليش فى الكره بس فرحت اوى لما كسبنا كاس افريقيا السبب الرئيسى لفرحتى انى شفت الشباب المحبط فرحان وبيغنى وبيرقص واى نصره لمصر فيها فرحه وفيها امل اننا ممكن ننجح بادوات مصريه مائه فى المائه بس الله لايقدر لو كنا اتغلبنا يكفينا اننا كنا مشرفين وده اللى بتمناه اننا نبقى مشرفين فى كل حاجه وده ممكن جدا يعنى الفريق اللى حقق النصر ده كل اللاعبين مصريين والمدرب مصرى وكمان كان ماحدش متوقع فوزوهم طيب لو كان الفريق ده مدربه واحد تانى كان ياترى حايحقق نفس النصر الجواب لو كان فى نفس قدره حسن شحاته ونفس الوطنيه كان حايحققه يعنى لو كان الجوهرى كنت حاتوقع نفس النتيجه اللى عايزه اقوله ان الاساس هو القياده المدرب اختار اللاعبين والمساعدين قيسوا على كده كل حاجه لو شركه فاشله وجه مدير ناجح بنفس العاملين ممكن يقودوهم للنجاح والعكس صحيح
بس خلاص اييييييييييييييه
ربنا يصلح حالنا يارب
حاجه تانيه فرحتنى اوىىىىىىىىىىىى
امبارح كان ضيوف العاشره مساء 3 نماذج لمدونات جميله جدا وناجحه
اتنين غاده وواحده رحاب بسام عايزه اتجوز مع نفسى حواديت
نجحوا من غير واسطه ولم يكن فى حسباتهم تحقيق هذا النجاح والظهور فى برنامج ناجح
البنات كانوا مثقفات وصادقات علشان كده نجحوا وعلى طبيعتهم بدون كلفه
فرحه منى الشاذلى كانت باينه فى عيننها . جميل اوى تشجيع الناجحين بيرفع من معنوياتهم ويزيدهم نجاح
وكمان بيدى امل لباقى الشباب ان النجاح ممكن بدون واسطه بس مجهود وتوفيق من ربنا سبحانه وتعالى .
دور نشر واعيه وحققت مبيعات واتاحت فرصه للمواهب الشابه وبرنامج رائع بيواكب كل الاحداث . كنت فرحانه جدا
مافيش اجمل من النجاح

Sunday, February 10, 2008

الاستاذ / رجاء النقاش والباب الضيق


الباب الضيق

ده عنوان مقاله للاستاذ رجاء النقاش اثرت فيا جدا وحبيت الخصها المقاله دى موجوده ضمن مقالات اخرى رائعه فى كتاب جميل جدا له اسمه تأملات فى الانسان
يقول الاستاذ رجاء النقاش
فى الفتره المزدهره من حياه الانسان وهى فتره الشباب . يبدو كل شىء ممكن ونتيجه للدفعه القويه المفاجئه من دفعات الحياه يبدو الانسان فى نظر نفسه قادر على كل شىء ثم يبدأ يصطدم بالحياه ويجد ان الأحلام العريضه لامجال لها وان الافكار المثاليه تحتاج الى كثير من التعديل فقد يكتشف ان الفتاه التى يحبها لم تكن بكل هذه الروعه التى كان يتصورها من قبل وان الصديق الذى كان يؤمن به ويضعه فى اعمق مكان فى القلب يتصرف بانانيه
وان العمل الكبير الذى كان يحلم به قد تحول الى شىء محدود بسيط ...
لقد كان يظن انه سيقوم باعمال عظيمه رائعه .. وتتوالى المفاجأت والصدمات النفسيه التى تجرف معها التفاؤل والحيويه
وتخلق الحزن والكآبه ولحظه الصدمه تمر تقريبا بحياه كل انسان..وهناك من يعتبرون هذه اللحظه نهايه الحياه
هناك من ينتحرون او يغيبون عن الحياه بالجلوس على مقهى والاستغراق فى العاب تافهه متكرره
وهناك من يعبرون لحظه الصدمه ويستمرون فى الحياه وشيئا فشيئا يكتشفون ان الحياه بعد الصدمه اعمق
ولكن الخروج من الصدمه يحتاج الى بوصله تحدد للانسان اتجاهه وترسم له الطريق حتى لايضيع
وكل الاطباء الكبار للنفس البشريه يقولون ان البوصله الو حيده هى العمل
ولكن السؤال : ماذا نعمل ؟
جيته وهو من اعظم اطباء النفس البشريه ان العمل وحده هو الذى يعطى باقى الاشياء فى الدنيا معناها وطعمها الحلو
فالعمل هو القوه السحريه التىتجعل الحياه ربيعا دائما ان العمل هو الذى ينعش الحب والصداقه
ثم يقول لنا
ان من الخطأ ان نرسم لأنفسنا خطه ضخمه لأعمال كبيره ونتنظر ان يتحقق ذلك بصوره مفاجئه..فاذا لم يتحقق
ماكنا نحلم به اصابتنا التعاسه وامتلأت نفوسنا بالكآبه
والطريق الصحيح الذى يقودنا لنبع الحياه الحلو الدافئ هو ان يقول الانسان لنفسه
" ان الخطه المثلى هى ان اعمل الواجب القريب منى " دع هذا الذى يتحسس طريقه فى الظلام والضوء المرتجف
ويدعو ويبتهل لاقبال الفجر يستمسك بهذه الوصيه ويحرص عليها اشد الحرص وهى ان يعمل الواجب القريب منه
فاذا قام بذلك اصبح الواجب الذى يتلوه واضحا ظاهرا
العمل الصحيح الذى يحمل سر السعاده والتغلب على آلام الحياه هو :
عمل اواجب القريب من الأنسان
فالواجب القريب قد يكون حلقه ضيقه ولكن اتمام هذا الواجب يقود الى دائره اوسع فالخطوه الاولى تقود
الى الخطوه التاليه واكثر الناس الذين يحلمون بالأعمال الكبيره هم اكثر الناس فهماوادراكا لحقيقه هى :
ان هذه الاعمال تبدأ دائما بمراحل صغيره متواضعه
يمكننا ان نلاحظ فى حياتنا ان عدد من الشباب الفاشلين يتميزون بذكاء ومواهب واضحه.. ولكنهم مع
ذلك فاشلون يائسون والسر الحقيقى البسيط انهم نسوا " الواجب القريب منهم " انهم ينظرون الى هذا الواجب
نظره ازدراء .. فأين هذا الواجب القريب البسيط من الاحلام الكبيره والامانى العريضه
وحكمه جيته التى يلخصها فى دعوته الى عمل الواجب القريب هى نفسها حكمه المسيح :
جتهدوا ان تدخلوا من الباب الضيق فالعمل البسيط المتواضع البعيد عن الاضواء
هو الباب الضيق الباب الذى لا يحب الكثيرين ان يدخلوامنه للحياه لانهم يفضلون الابواب الواسعه
التى تؤدى بهم لاهدافهم
هذه الابواب الواسعه التى نسجتها الثروه والشهره او غير ذلك من ابواب الحياه
ان التفكير فى هذه الابواب هو الذى يسمم حياتنا ويجعلنا نشعر بالفشل والعجزعن تحقيق احلامنا ويؤدى الى
التمزق النفسى ...ولكن الباب الضيق هو العمل الصغير المتواضع الذى يؤدى الى عمل اوسع منه
وقد يكون الباب الضيق خاليا من اى بريق الا فى شئ واحد هو انه يؤدى الى الاحساس بمعلى الحياه
الامساك بالخيط السحرى الرفيع الذى يجعل القلب مليئا بالأمل ..
ويجعل ا لعين تبصر فى الحياه اشياء قد لا تراها العيون العاديه
ان الباب الضيق فى كلمات طريق السعاده الداخليه العميقه
بعد قرأتى للمقاله دى افتكرت ان كثير من المشاهير واغنى اغنياء العالم عملوا فى بدايتهم باعمال بسيطه جدا
اشهر الفنانين بدايتهم كومبارس كلهم دخلوا من الابواب الضيقه
رحم الله الاستاذ رجاء النقاش واسكنه فسيح جناته كان ناقدا واديبامرموقا