Tuesday, October 30, 2007

اقدام واعتاب

حكت لى صديقتى ان العماره المجاوره لها عتبتها مش حلوه العماره سبعه ادوار كل دور به شقتين كل الشقق اسر تعانى من مشاكل اجتماعيه
زوج وزوجه لم يرزقوا بأطفال والشقه المجاوره الزوجه تصر على الأقامه فى منزل والدتها وزجها يقبل الوضع

على مضض وغير سعيد بهذا الوضع وحجه الزوجه لأحتفاظ بشقه الأم بعد عمر طويل والشقه خاليه
شقه فيها ست كبيره فى السن وابنه فاتها سن الزواج وابتسم لها الحظ وظهر ابن الحلال لكن للأسف شهور وطلقت وتوفيت الأم وتعيش ابنتها فى حاله حزن دائم اما باقى السكان فكلهم مطلقين واسر مفككه

فيماعدا اسره تبدو سعيده كانت صديقتى قلقه عليهم لكن توفيت والده الزوج فرحلت الأسره لتعيش فى منزل الأم المتوفاه لاتساعها يعنى نفدوا بجلدهم

قالت لى صديقتى اللى حظهم كويس تحدث احداث غير متوقعه فيتم مغادره العماره

كانت صديقتى قلقه على اسره تبدوسعيده ومستقره
رب الاسره استاذ جامعى وزوجته تعمل فى شركه كبيره ولديهم ابن صغير وجميل شهور قليله ووجدوا شقه
بمواصفات افضل وباعوا الشقه فسعدت صديقتى جدا بانتقالهم لخوفها عليهم عندها يقين ان قدم العماره دى مش تمام

فى مره سمعت الفنان محمد نوح بيقول انه مش بيعتقد فى موضوع الأقدام والأعتاب لكن والدته كانت دايما تقولوا يابنى الدنيا دى اقدام واعتاب فى ناس قدمها يكون قدم سعد وناس لأ وبعدين عمل اكتر من مسرحيه مع واحد معروف ان قدمه مش تمام بس محمد نوح قال لنفسه لأ خلينى عملى وانسى حكايه الأعتاب والاقدام وكان عنده نص يتوافر فيه كل عوامل النجاح

ولكن العمل ده فشل قال لنفسه ممكن تكون عوامل اخرى اثرت زى ذوق الجمهور وتوقيت عرض المسرحيه وجرب حظه مع نفس الشخص فى عمل اخر لكن المخرج مرض ولم يستكمل العرض وتكررت احداث مشابهه مع نفس الشخص وهنا اعاد تفكيره فى موضوع الاقام واقتنع به بعد التجربه
تفتكروا فعلا الدنيا اقدام واعتاب
عايزه اعرف رأيكم

42 comments:

Doba said...

بصراحة بصراحة مش عارفة فعلا
بس على حد معلوماتى ان من الممكن ان تزداد نسبة الشيطان فى مكان او الجن بمعنى اخر فى مكان وهناك يزداد المشاحنات وخاصة اذا لم يكون اصحاب المنازل من المقربين لله ولم يكن هناك قرآن يتلى فى هذه المنازل

بس موضوع الاعتاب دى مش عارفة
هو حقيقى فيه ناس نحس كده تحسى انهم كل لما بيدخلو حاجة يخسروا بس برده التوفيق والرزق من ربنا

تقبلى مرورى
تحياتى
هبة

Ert3ashat said...

مش هنقول اقدام و اعتاب لا
هي ممكن تون مثلا ربنا مش راضي عن الشخص ده ف بيعقدله اموره و حياته كلها
و يمكن مان تكون ابتلاء بس من ربنا...
يمكن مش عارف بس ده رأي

harmless said...

عقلى يرفض بشده الاستسلام لهذا الرأى
انا طبعا مثلك سمعت هذا الكلام كثيرا وتعرضت لبعض المواقف التى يمكن تفسيرها هذا التفسير

لكن من باب المنطق ومن جمع كل الثقافات والمعتقدات على بعض لا ارى انه من المنطقى ابدا طبقا لقواعد الدنيا ان يضع الله اى انسان فى هذا الموقف حتى لو كافر او ملحد

لا يمكن ان يكون انسانا منحوسا الى الابد ويكون نحسه ممتدا الى الاخرين من الجيران او الاقارب او الشركاء

وقد تعاملت مع محمد نوح وانا فى الكلية وقد دعوته الى احياء حفل وتعاملت معه قبل واثناء وبعد الحفل ولا اعتقد ان سلوكه كان يأهله لاى نجاح
اعتقد انه اخذ نصيبه العادل

Unknown said...

الموضوع ده على فكرة
لا طبعا مافيش حاجة أسمها أقدام و اعتاب فى قدر ربنا و مشيئته أو سوء او حسن تصرف من الانسان

http://kasperb4.blogspot.com/ said...

ده يعتبر تشاؤم وطيرة
والنبي صلى الله عليه وسلم نهى عن ذلك
ارجوكي اقري المقالة دي وهستفيدي ان شاء الله

http://www.islamway.com/?iw_s=Article&iw_a=view&article_id=454

klmat said...

Doba,
اهلا بك ياهبه بتنورنى بتعليقك
عارفه انا كمان متحيره بس اللى استرعى
انتباهى ان العماره فيها 14 أسره
بدون مبالغه كلهم عندهم ظروف
لدرجه انها اخدت سمعه فى الشارع
وتحليلك منطقى
سعدت جدا بمرولاك عندى
تحياتى وسلامى لك

klmat said...

erta3ashat
اهلا بك انا فى الحقيقه مش عارفه
التفسير للموضوع اكيد كل شيء باراده ربنا قديكون مكتوب الضرر عن طريق السكن فى هذا المكان الله اعلم
سعيده جدا بمرورك عنندى
تحياتى وسلامى

klmat said...

harmless
اهلا بك . انا كمان معاك فى موضوع الأشخاص
مش معقول واحد نحس على طول بس احتمال والله اعلم ان يكون الشخص ده من الحاسدين
الله واعلم
اما موضوع العماره فده فعلا حقيقى
14 اسره ظروفهم غير سويه مع مراعاه
ان تم عزال وحصل نفس الشىء
قد يكون الضرر عن طريق السكن فيها الله اعلم بس ده اللى حصل واحتارت فى تفسيره
سعدت جدا بمرورورك
تحياتى وسلامى

klmat said...

عاليا حليم
مرحب بك باعاليا
اكيد ربنا سبحانه وتعالى كاتب كل شيء ومقدر لاخلاف فى هذا على الاطلاق
بس ممكن يكون ربنا كاتب لحد عدم الوفاق
ويكون مقدر له السكن فى هذا المكان
الله اعلم طبعا بس تكرار الموضوع فى نفس المكان حتى يصل انه ياخد سمعه
غلانى احتار
اشكر جدا على التعليق
شرفتنى ونورتنى

klmat said...

الام وامال
مرحب بك
انا لا اقصد موضوع التشاؤم . كل شىء مقدر ومكتوب .انا لفت نظرى
ان كل سكان العماره فى ظروف غير سويه
حتى مع تغيير بعض السكان
تكرر نفس الشىء حتى اصبح لها سمعه
فى الشارع. البعض بيقول ان العماره دى
معمول لهاعمل او سحر وانا
احتارت فى التفسير
بالنسبه للأشخاص ممكن يكون مش موضوع قدم
بس يكون الشخص ده من الحاسدين
الله اعلم ان شء الله حاقرأ المقاله
اللى اشرت اليها واشكرك جدا
سعدت بتعليقك وتشريفك بالمرور
تحياتى لك

rack-yourminds said...

سيدتي تعرفي انا بجد مكنش عندي خلفيه كتير عن حكاية الاقدام والاعتاب بس يعني البوست بتاعك فهمني حكاية الموضوع ده

بس انا لا أؤمن بهذا الكلام اللي عن الاقدام والاعتاب

قُلْ لَنْ يُصِيبَنَا إِلا مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ)


هذه الوصية التي علمها النبي -صلى الله عليه وسلم- لابن عباس -رضي الله عنهما- إذ قال له: (يا غلام إني أعلمك كلمات احفظ الله يحفظك، احفظ الله تجده تجاهك. إذا سألت فاسأل الله، وإذا استعنت فاستعن بالله، واعلم أن الأمة لو اجتمعت على أن يضروك بشيء، فلن يضروك إلا بشيء قد كتبه الله عليك، ولو اجتمعت على أن ينفعوك بشيء، لن ينفعوك إلا بشيء قد كتبه الله لك، رفعت الأقلام، وجفت الصحف)

والله اعلم
---------

تحياتي لكي

klmat said...

واحد
السلام عليكم
ازيك يارب تكون بخير
طبعا كل شىء مكتوب ومقدر
ده لامناقشه فيه بس ممكن يكون
ربنا كاتب لمن يسكنون المكان الضرر بالوسيله دى يعنى ان لااؤمن
بالدجل والشعوذه
بس السحر موجود
انا عايزه اعرف
حكايه العماره دى معروفه فى الحى
يعنى لوعرفت ان فى عماره
زى دى ممكن تاخد شقه فيها
ولا حاتبعد
انا شخصيا كل امورى بسلمها لله
بس لن اشعر براحه نفسيه وحاابعد
انا كتبت واقعه حقيقيه
سعدت جدا بتعليقك
تحياتى لك

دكتور كسلان said...

ياستى ولا تحتارى ولا حاجة

ربنا كاتب عليهم كده

حتى لو كل السكان اشقياء

فده قدرهم

انا معاكى ان لحسد والسحر موجودين

بس محدش يعرف يعمل لحد حاجة الا باذن الله سبحانه وتعالى

سلام

أبوسويلم said...

هو ممكن يكون فيه شىء نفسى من شىء معين او شخص معين ويستحيل معه التاقلم او الشعور بالراحة مع هذا الشخص او الشىء النعين
لكن رسول الله نهى عن التشاؤم والطيرة وهو ما نسميه الاقدام او الاعتاب
والله اعلم
تحياتى
والسلام

ما علينا said...

طبعا الناس قالت كل الكلام اللي ممكن يتقال

يعني انا اوافق هبة في مسألة
ان في مكان يكون غالب عليه تواجد الجن
لسبب ودا سمعنا عنه كتير

لكن دا طبعا مش شماعه نعلق عليها كل الظواهر

واوافق
الغاليين كسلان وابو سويلم
وباقي الاخوة

في ان الموضوع ما هو الا قدر
وكا شيء في حياتنا هو بقضاء ربنا
ومفيش حاجة اسمها انسان قدمه وحش او حلو

لان دا طبعا تشاؤم وتطير
والرسول عليه الصلاة والسلام
نهى عن ذلك

غير كدا
انه مفيش حد بيتحمل ذنب حد


المواضيع كلها بتكون مجرد حالة نفسية
بتسيطر علينا وبس

لكن الانسان ان ]اخذ بالاسباب
ويتوكل على المولى عز وجل

اكيد احساسه بالحياة سيختلف



جميل جدا الموضوع
ومهم جدا
لانه فعلا بيناقش فكرة منتشرة جدا جدا بينا

سلامي لك وحبي وتقديري

klmat said...

د/كسلان
اتمنى ان تكون فى احسن حال
سبب حيرتى انه توجد شقه خاليه
فى هذه العماره وسعرها
كويس ولى قريب يبحث عن شقه
لكن الحمد لله اصحابها
تراجعوا عن بيعها املا فى زياده السعر
وكنت خايفه اكون سبب
فى شراء شىء غير مريح
دايما منورنى بتعليقاتك
تحياتى لك

klmat said...

ابو سويلم
اهلابك
انا اوافقك فى الرأى تماما
فى ناس من الصعب التأقلم
معاهم.انا مش قصدى تفاؤل وتشاؤم
السكان بيعللوا ان فى
سحر اوعمل
نتيجه لمعاناه كل السكان
الله اعلم
سعدت جدا بتشريفك بالتعليق
تحياتى لك

klmat said...

ماعلينا
منوره المدونه بتعليقك وتحليلك
انا معاكى ومع كل الاخوه اللى علقوا
فى رأيهم ومقتنعه به
بس حبيت احكى عن ظاهره شغلتنى فعلا
واستفادت جدامن التعليقات
نورتنى وشرفتنى
تحياتى وسلامى

Anonymous said...

مش عارفة بس حقيقي اذا كان ليها واقع ولا مع ان امي بتعتقد قوي في المواضيع دي وكمان بس هي في الاول والاخر مشيئة الله الي بتم سلامي ليكي ياقمر

klmat said...

قلوب حائره
فى ناس كتير بتتعتقد فى الكلام ده
والظواهر اللى بتتكر بتزود
الاعتقاد ده لكن واضح
من اغلب اللى علقوا
ان دينا نهى عنه
حقيقى شرفتنى
والبوست الأخير بتاعك
رائع كالعاده
تحياتى لك

محمود على said...


انا لحد فترة قريبه مكنتش بعتقد في الحجات ديه

بس لقيت مواقف بتحصل قدامي بتثبت الكلام ده
بس الحمد لله لسه محصلتليش

klmat said...

محمود على
اهلا بك انا بردوا زيك كان
الكلام عن الاقدام والاعتاب لايعنينى
ولكن تكرار حدوث مواقف زى
سكان العماره اللى اكتر من 14 اسره
لان فى ناس عزلوا وحصل نفس الشىء
وعلشان التطير زى ماقال
كل الأخوه المعلقين حرام
يجوز نوع من اعمال السحر
اما الأشخاص فممكن يكونوا حاسدين
الله اعلم
اشكرك على التعليق
وسلامى لك

سلوى said...

المسأله مش تشاؤم وتفاؤل
لكن الموضوع إلى حد ما صح
سمعت مرة أحد المشايخ يقول أن المكان ممكن أن يحب صاحبه أو يبغضه
وهناك قصص كثيره تؤيد ذلك

وأولا وأخيرا هي اسباب

وفقكم الله
تحياااااتي

klmat said...

اهلا بك يا سوسو
نورتنى مدونتى وانا اميل
لرأيك جدا
مدونتك رائعه
شرفتنى ونورتنى

mohand said...

السلام عليكم

احب اقولك اني مش بقتنع بالموضوع ده نهائي
ومش مقتنع بموضوع الحظ والصدف

في قدر وفي عمل الانسان واصرارة
دول اللي بيتبني عليهم الحياة

بس عموما الموضوع فعلا محتاج تاخدي الاراء
بس اغلب الشعب المصري هيقول اه فيه اعتاب واقدام


تحياتي العطره
واسف لتاخري في زيارة مدونتك

قطوف said...

انا عن نفسى الموضوع دا مأثر فيا خصوصا أيام الامتحانات والقلم دا وشه فقر والقميص
بس والدتى كانت على طول تقولى ان فيه حديث بيقول ان فيه سبعين الف واحد هيدخلو الجنه من غير حسلب
مهم الى مبيتطايرش يعنى يتشائم
بوست جميل احييك

احساس لسه حى said...

عزيزتى
شوفى فى ناس حظها فى الدنيا كويس مكتوبلها ترزق دائما
ودايمن لما يكونوا فى شئ ينجح وده يا رضا من عند ربنا على العبد
يا يمكن يكون بيزود نعمته عليه وهو لا يشكر ويزودها اكتر لحد ما هيفوقه بشئ يوجعه ويالمه
وفى ناس حظها وحش جدا ودول مش نحس ولا حاجه بس ربنا عاوزهم يصبروا وبشر الصابرين اهم شئ اننا ما نحولش تلغى شئ علشان تفكير زى ده او نفعل شئ مع شخص علشان احساس زى ده
لاننا نتوكل دائما على الله
ونسبها على الله بدل مل شئ مظبوط والانسان مش وحش
تحياتى
سلام

klmat said...

mohand
السلام عليكم ورحمه الله وبركاته
شوف انا بعتقد ان الحظ موجود
او قول مثلا توفيق انا مثلا
فى االثانويه العامه كان فى سؤال
تعلم عليه صح وغلط وكنت متردده
وكنت قاعده جنب الباب
وكانت بتمر واحده من الاوائل بتراجع
مع زميله وقالت الاجابه وكتبتها
فى اخر دقيقه وكانت صح
وبعدين فى حاجات كده كتير
تقدر تقول توفيق
بس الواحد يعمل اللى عليه
سعدت بتعليقك
وحضرتك تشرف فى اى وقت
تحياتى وسلامى

klmat said...

سى السيد
فى حاجات بتدى الواحد راحه نفسيه
لبس معين شخص بيرتاح ليه
اغنيه بيحبها يسمعها تفتح نفسه
ده بيحصل مع اغلبنا
تعليقك عندى بيسعدنى
تحياتى لك

klmat said...

احساس لسه حى
اكيد كل شىء مقدر ومكتوب
والحظ والتوفيق موجودين
انا اللى استرعى انتباهى تكرار الشىء فى نفس المكان.يعنى مثلا لوفى
شقه فاضيه فى العماره دى تاخدها
ولا تقول خيرها فى غيرها
ياريت اعرف رأيك
تحياتى وسلامى

Abeer said...

بصراحة انا مش عارفة حكاية الاقدام والاعتاب
بس انا مؤمنة تماما ان في ناس عينها وحشة وبتفلق الحجر
ربنا يعافينا جميعا
انا مكنتش بصدق في كدا غير لما اتكرر قدامي
واحدة معرفة كانت عندنا في البيت وعلقت على التليفزيون مفيش ثواني
اششششششششششششششششش

مرة تانية علقت علي شعري
وقعت من على السلم واتكسربي ضلع

المرة التالتة كنا بنزور قرايبنا
ولقيناها هناك
كنت خايفة ادخل
بس اعدت اقرا قران طول القعدة واستخبا في ماما
ربنا يعافينا يارب

رحــــيـل said...

انا اعتقد انها اقدار فكل شئ يحدث لنا مكتوب
اما موضوع الاعتاب هذا فلا اظنه
الناس بتحب تكبر المواضيع وبتتكلم كتير
ده اللى بيفتح المجال ان الكلام اللى زى ده ياثر على عقول الناس
اقبلى مرورى الاول وليس الاخير ان شاء الله
خالص تحياتى لكى

klmat said...

Abeer
الحسد موجود فى القرآن وانا معاكى تماما
ان فى ناس عينها مش تماما قرأه المعوذتين
بتحمى
ومتفقه تماما بالقدر والمكتوب حتى
الله لايقدر لما حد تتصيبه عين من حسود
بيكون مكتوبه الضرر بالوسيله دى
ربنا يحميكى ويوفقك
تحياتى لك
سلامى

klmat said...

ra7eel
يسعدنى ويشرفنى مرورك عندى
انامعاك كل شىء مكتوب
بس موضوع الاعتاب لخبطنى شويه
لان قصه العماره دى حقيقيه
وده اللى خلانى اهتم بس ممكن
يكون مقدر لمن يسكنها الضرر
الله اعلم
تحياتى وسلامى

أحساس لسه حى...كلام من جوه روح لكل روح said...

عزيزتى
لو عجباكى الشقه خديها ولو حصل شئ زعلك مش هيكون من الشقه هيكون شئ هيحصل بيها او من غير
بس انتى لو حصل شئ هترميها على الشقة
ودى مشكلتنا ان الطبيعى يحصل لحد كل ما هو عايش فى الدنيا مشاكل
بس بيجبها على فرد او مكان اواى شئ المهم بيدور على سبب
سلااااام

klmat said...

احساس برضوا لسه حى
السلام عليكم
اشكرك جدا على الأهتمام والنصيحه
وعندك حق كل شىء مقدر ومكتوب
وكلامك منطقى جدا
تحياتى لك

Mo3Az said...

اعتقد ان مفيش حاجة اسمها كدة

يقول الحق تبارك وتعالى :

"انا كل شىء خلقناه بقدر "

هو بس المضوضوع لما بيتكرر كذا مرة الواحد بيقول كدة

لكن الموضوع فى الاول والاخر بتاع ربنا

قل لن يصيبنا الا ما كتب الله لنا

واعلم ان الامة لو اجتمعت على ان يضروك بشىء فلن يضروك الا بشىء قد كتبه الله عليك رفعت الاقلام وجفت الصحف

موضوع مهم
جزاكم الله خيراً على هذا الطرح

loumi said...

العزيزة أميرة

لا بد أن هناك اسباب لكل مشكله تحدث
وخاصة المشاكل العائليه
الناس بتتغير مع الزمن
والمفاهيم تتبدل
أما موضوع الأعتاب فلا أستطيع أن أجزمه
أو أنكره ولكن
أنا دائماً مع إحساس الإنسان بالراحه في المكان الذى يعيش فيه
او يجلس فيه

تحياتي

klmat said...

Mo3az
السلام عليكم
انا مؤمنه تماما ان كل شىء
مكتوب ومقدر
معروف ان الواحد لو
داس على قشره موز حايتزحلق
مقدر له بهذه القشره ان يقع
من الجائز ان يكون هذل المكان
به عمل او سحر
ومقدر لمن يسكنه
ان يحدث له الضرر
اشكرك جدا على التعليق
شرفتنى ونورتنى تحياتى لك

klmat said...

loumiعزيزتى
يامرحب بك
انا معاكى ان الواحد
لازم يكون مرتاح نفسيا للمكان
اكيد وطبيعى حدوث مشاكل
اجتماعيه فى كل مكان
لكن المحير تكرار حدوث الأنفصال
فى نفس المكان وانا مقتنعه
ان الناس دى حتى لو كانت فى مكان
تانى حايحصل نفس الشىء
بس عدم وجود حاله استثنائيه
من بين 16 اسره امر محير
شرفتنى وسعيده بتعليقك
تحياتى وسلامى

و القادم....أجمل said...

ممممممممممم

مش عارفه يا ميرو و الله
مظنش يعني
بس هيا تلاقيها الصدفة
الصراحه مش بحب اركز في الحاجات دي
لأني ممكن افكر كتير
و اعد اجيب يمين و شمال
و دا بيرهقني ذهنيا

ربنا يسعد الجميع يارب
و يسعدك يا أحلي ميرو
ربنا يحفظك و يحفظ الجميع

تحياتي و حبي و احترامي

:)

klmat said...

ولاء
اهلا بك يابنبون وكريم شانتيى
شوفى انا كمان كنت اشوف
ان الكلام ده مبالغ فيه وش مقتنعه به
بس موضوع العماره ده حقيقى وحصل
فشغلنى شويه بس احسن حاجه
الواحد يخليها على الله
سعيد جدا بمرورك
وربنا يفرحنا بنجاحك ودبله الخطوبه
سلااااااااااام