Tuesday, January 22, 2008

نحو الأميه


ذكريات الخدمه العامه
"وما الخدمه العامه الاخدعه كبيره "
لماتخرجت كان عندى حماس للشغل وطبعا كان فى سنه خدمه عامه فقررت انى اسعى ان اخدها فى مجال محو الاميه علشان يبقى فى فرصه اشتغل الصبح المهم انى سعيت لكده والحمد لله حصل كنت بدرس محو الاميه فى مدرسه مش بعيد عن بيتى والصبح اشتغلت بعقد فى شركه كبيره حصل فيها مواقف عجيبه .
مش مهم مش مهم فى بوست تانى

المهم كان عدد التلميذات فى محو الاميه اقل من عشره اعمارهن من 9 سنوات حتى 75 آه واللهى كده زى قراء مجله ميكى كان ايامى يكتبوا عليها من سن 8 لــ 88
ما علينا قلت فى عقل بالى ربنا اكرمنى ولقيت شغل احاول اعلم الناس دى واكسب ثواب كان فيهم بنتين او تلاته
صغيرات من سن
9 و12 سنه وحوالى خمسه او سته من 25 الى 35 سنه وواحده فوق السبعين .
كوكتيل غريب كلهم ناس حالتهم الماديه ضعيفه جدا البنات الصغيرات كانوا بيبعوا فى السوق
ليمون و جبنه قريش بيقفوا مع والدتهم ربنا يعنيهم
اللى من 25 الى 35 متجوزات وعايزين يذاكروا لأولادهم .
ده اللى قالوه لي .
ا اما
الست الكبيره 75 سنه دى كانت لطيفه جدا صابغه شعرها بالحنه فلونه احمر لانه اساسا ابيض وعلى راسها طرحه شفافه سودا مش بتربطها بتسيبها تهفهف على رقبتها وتمسك كراسه فى ايدها وتجرى عليا اول ماتشوفنى وتمسى عليا وتقوللى ازيك يا ابله انا كنت بقول فى سيرى ده انتى اللى تيتا .
وكانت بتتصرف وكأنها طفله عندها 5 سنوات كنت بحبها اوى

كان نفسى فعلا اعلمهم واخليهم يواظبوا على الحضور لانى عرفت من واحده درست فى محو الاميه قبلى
قالت لى دول مش غاويين علم ولا حاجه دى وسيله بيخرجوا بها من البيت وكأنهم رايحين النادى

المهم لقيت فعلا كل يوم فى حد يغيب
قلت لازم اعمل حاجه تشدهم وتخليهم ييجوا يتعلموا
كلهم بنات يبقى موضوع الطبيخ والحلويات يهمهم انا اختار اصناف سهله جديده بشرط تكون اقتصاديه وكمان ابقى ادى بين يوم وتانى دروس مبسطه فى الدين عن سيره الرسول عليه الصلاه والسلام المهم بدأت بنبذه عن حياه الرسول و فى حصه كنت بشرح فيها ماحدث بعد وفاه سيدنا محمد
وبمجرد ماقلت لما سيدنا محمد ص. ع مات لقيت واحده من الستات وشها احمر وخبطت على صدرها بقوه وصرخت فى وشى سيدنا محمد مات !!! لا اله الا الله لا اله الا الله
.. واللهى مااعرف ولا حد قاللى ياابله ..ولا عندى خبر لا حول ولا قوه الا بالله . واخدتها الجلاله وكان بادى عليها التأثر
كنت عايزه انفجر من الضحك بس كنت خايفه على شعورها ومش عايزه باقى الستات يقلسوا عليها المهم استأذنت علشان اشرب طلعت اضحك ودخلت تانى لابسه وش الجديه وتماسكت وفهمتها ان الكلام ده من زمان هى كانت فاهمه ان سيدنا محمد نبى ومش ممكن يموت بس احنا مش شايفينو !!!
الموقف يضحك بس يصعب عليك الناس دى شقيانه بين شغل فى البيوت او بيع سلع بسيطه ومن كتر التعب ياكلوا ويناموا وابيض ياورد

اما الست الكبيره دى كانت حكايه الظاهر انها عندها طفوله متأخره او ما عشتش الطفوله بمعناها
كنت بديهم 1 و 2 لحد 5 يكتبوها
واجب جابت الواجب وادينى صح يا ابله وبتهز راسها فى دلال
عملت لها علامه صح تدبدب فى الأرض لأ بقى انا خطى حلو ادينى نجمه حرام كده !!!
وحاجات من كده
وتمشى وهى حاضنه الكراسه ولا سعاد حسنى
المهم فى يوم اديتهم اسهل واسرع كيكه وشرحت لهم الطريقه
تانى يوم الست جت وجايبه معاها هريسه غير كيكتى خالص شكلا وموضوعا وقالت لى عملتها زى ماقلتى بالظبط يالا خليهم يصقفوا لى .
كانت فتره ظريفه بس فعلا ماكنوش عايزين يتعلموا للأسف كانوا جايين يتسلوا باستثناء بنت واحده او اتنين
فكانت نحو الاميه مش محو الاميه بس اخدت الشهاده
واللهى كان نفسى اعلمهم الكتابه والقرأه هما استفادوا بس مش زى ماانا كنت عايزه الموضوع عايز حماس ورغبه من اللى بيتعلم واللى بيعلم
اغلب الدارسين مرهقين وعايزين يتعلموا من غير تركيز او يتسلوا ونسبه كبيره من اللى بيدرسوا رايحين متضررين زى فتره الجيش عايزين ياخدوا اتمام الخدمه وبس مافيش دافع او حب للعمل الاجتماعى ده كان ما شعرت به فى وقتها
بس اعتقد دلوقتى ممكن فى اميين قرأه وكتابه لكن ظنى ان الوعى ارتفع الفضائيات والكابل موجوده حتى فى البيوت الفقيره
واحنا من 100 سنه ولسه نحو الاميه مثمره وبناءه ماشيه بالتوازى مع البنيه التحتيه عقبال مانوصل للفوقيه على قكره الست
الكبيره كان اسمها فوقيه الحاجه فوقيه . ...والله ماحاتفرق معانا الاسامى

45 comments:

harmless said...

استمتعت جدا اختى العزيزة بهذا البوست بذكرياته الجميله ومعانيه الراقية ورايتنى ارغب فى التعليق على ثلاث نقاط

اول نقطه انى ارى ان افضل عمر يمكن للانسان ان يعطى فيه بلده ومجتمعه بحب واخلاص هو اوائل العشرينات او الخمسينات فما فوق

فالعمر الاول يتصف الشباب بالاخلاص والرومانسيه والحب والرغبه فى تحقيق الذات وافاده المجتمع وذلك قبل ان تاخده الحياة فى مسئوليات بيته واسرته ومتاعب المعيشه

والعمر الثانى يشعر الانسان انه مضى من حياته اكثر مما تبقى وانه لن يحقق على المستوى الشخصى اكثر مما حقق ولذا من المنطقى ان يتجه تفكيره الى العمل الاجتماعى ومحاولة التأثير والافاده

المشكله ان نظامنا الميمون اقفد الشباب انتماءه واصابه باليأس فانصرف تفكيره الى الهجره
واصاب الكبار بالانانيه والسلبيه واللامبالاه وفقدان الثقه فانصرفوا الى البيوت والنوادى


التعليق الثانى عن الامية التى طالت جدا مما ينم على خيبه تنظيميه كبيره
فمن ناحية اننا لم نقلل اعداد الاميين من الكبار ومن ناحية لم ننمنع انضمام اميين جدد من اجيال جديده
والحلول سهله ومتجربه لكن لاحياة لمن تنادى

التعليق الاخير على الهريسه فقد ذكرتنى القصة بامى الغالية ونحن صغار حيث صنعت لنا كيكه ونسيت ان تتضع الماده التى تجعلها تنفش فخرجت شئ وسط بين الكيك والهريسه
واخوكى لسانه متبرى منه فسميت هذا المنتج كيكريسه وصرنا حتى الان كلما اردنا ان نداعبها نطلب منها ان تصنع لنا كيكريسه
كانت تغضب فى الماضى ولكنها اتعودت الحمد لله

rack-yourminds said...

بجد ضحكتيني وانا بقرا البوست ههههههه باين عليكي دمك خفيف جدا
---

جميل ان الواحد يساعد الناس ويفيد بلده وده بيخلي الواحد منا سعيد ومبسوط من نفسه وحاسس انه مش عاله علي المجتمع

بوست بجد جميل واسمتعت جدا بقراءته

تحياتي وسلامي

mohand said...

السلام عليكم

مصر بتتقدم بينا يا ابله


:)::):)

كاميليا بهاء الدين said...

هههههههه

عجبتنى أوى الحاجة فوقية المتحمسة دى
والنجمة اللى بتحبها

أكيد كانت فترة جميلة بالنسبة لك
فيها ذكريات جميلة

بوست حلو اوي
وطريقة سردك للأحداث ووصفك جميلة اوي

تحياتى وتقديري

كاميليا

ماسة الحب said...

والله يا اميرة بوست هايل فكرتيني بايام الكلية والابحاث في المناطق الشعبية
كنت بعمل دراسة عن اهم المعالم السياحية والحضارية لمحافظة الجيزة موقع جامعتي لاني كنت من طالبات النشاط المتميزين في الجامعه المهم الدراسة دي خليتني اروح مناطق في الجيزة عمري ما سمعت عنها قابلت ناس كتير ستات علي الفطرة بيتكلمو بعفوية شديده والله كنت بحب اوي اسمع منهم واستفيد
بوست دمه خفيف
تحياتي

ماسة الحب said...
This comment has been removed by the author.
klmat said...

harmless
اهلا بحضرتك ده انا اللى استمتعت
بتعليقك الجميل وانا معاك فى كل كلمه كتبتهاعن مراحل العطاء لكن للأسف
الحكومه الميمونه عامله زى ميمون اللى
انت عارفه
اماعن الهريسكيك اول ما اتعلمت اعمل كيكه حاولت اظبطها وفعلا بس نسيتها فى الفرن لحد ماشميت ريحه شياط كان والدى الله يرحمه من بعدها كل مايحنى اعمل كيكه يقوللى ماتقومى تشيطلنا كيكه (:
والحمد لله ان البوست عجبك ده شرف ليا
ربنا يوفقك مع احترامى وتقديرى
سلااااام

klmat said...

rack your minds
اهلا بك . الحمد لله انك ضحكت
لازم شويه فرفشه واشكرك جدا
على كلامك الجميل مش عارفه اقولك ايه
ربنا يسعدك ويوفقك يارب
سلامى وتحياتى

klmat said...

mohansd
وعليكم السلام . تصدق ان تعليقك
ضحكنى من قلبى. المهم مصر ماتتقدمش
اكتر من كده يامستر
:) :)
تحياتى وسلامى

klmat said...

كاميليا
اهلا بك ياجميله انا سعيده لانى
ضحكتك . انا كمان بحب الحاجه فوقيه
هى فعلا مجتهده وعسوله
فعلا كانت فتره حلوه الحمد لله
وميرسى على كلامك الجميل ياكوكى
ياجمل زهره كاميليا
ربنا يوفقك ويسعدك يارب
تحيااااتى

klmat said...

ماسه الحب
الحمد لله انى فكرتك بايام حلوه
يارب الايام اللى جايه تكون احلى
وشكرا على كلامك الجميل
ربنا يسعدك ويحفظك يارب
تحياتى وسلامى

دنيتى الجميله said...

حبيبتى اميره
فعلا ما احلى ايام الخدمه العامه
بتبقى ليها ذكريات عندنا كلنا
بس انا كنت سعيده
اوى بالحاجه فوقيه
لطفولتها المتأخره
كويس انك تحسى بأنك سبب لسعاده انسان وانك بتعيشيه فتره حلوه من حياته
ممكن متكونش استفادت من الدراسه زى منتى عايزة بس انتى عيشتيها مرحله هى كانت محتاجه تعيشها
وده شىء جميل انك ادرتى تعمليه ليها
واتمنالك النجاح اكتر واكتر

مدحت محمد said...

انتى فكرتينى ساعة لما رحت اخد خدمة عامة
برضه اخدتها فى مدرسة
بس مكنتش بروح غير مرة كل شهر امضى
وارجع كانت جنب البيت
برضه
المهم انا كنت حابب اقلك ايه
اه افتكرت
الحاجة فوقية
دى بجد
فكرتنى برضه لما كنت فى اسكندرية واحدة ست عجوزة كانت قاعدة فى وسطنا
وعاملة فى نفسها البدع
وعايشة برضه فى الدور
وفى وسط الكلام بقلها ياحاجة قامت بصتلى حتة بصة
ههههههههه
هى ايامنا كلنا فيها اليوم الحلو واليوم الوحش واليوم اللى بيحصل فيه حاجات عادية
واليوم اللى بيحصل فيه حاجات غريبة بتشد انتباهنا
واهى فى الاخر ماشية وبتعدى
دمتى بكل خير

Mo3Az said...

هههههههه

حقاً ذكريات جميلة ومميزة
كلما كانت اللحظات بها احداث كثيرة كلما كان من الصعب نسيان تلك اللحظات

ولما نفتكرها نقعد نضحك زى دلوقتى كدة ونقول هيييييه :)

بس على اى حال ، نلتى الاجر والثواب يا فندم بغض النظر عن النتائج
(f)

--------
لكم تاج عندنا مررتهولك
تفضلوا بقبوله
:)

رحــــيـل said...

عزيزتى اميره

هو فعلا موضوع محو الاميه ده للاسف بيتم كأنه جيش محدش بيهتم ان الناس تستفيد فعلا
انا معملتش خدمه عامه وبصراحه احسن انا اساسا فعلا معنديش صبر انى اكون مدرسه نهائى

بس انتى بجد افكارك كانت كويسه معاهم

خالص تحياتى وتقديرى

Anonymous said...
This comment has been removed by the author.
Anonymous said...

العزيزة جدا كلمات

كما انت .. تتمتعين بخفة دم عالية خصوصا فى ذكرياتك الجميلة

لكننى هذه المرة أدخل لشئ هام ..يبدو ان هناك شريف آخر غيرى يعلق عندك وتردى عليه انت وكأنه أنا

أنا أدخل عندك باسمى الصريح الذى تجدينه ازرق وليس

Anonymous

ثانيا أن لاأكتب العربية بالانجليزية

chat كأهل ال

وانما اكتبها كما يكتب الجميع

احببت ان انوّه حتى تعرفى من يحدثك

آسف للإطالة

Anonymous said...

عجبتنى اوى بتاعه الست الى مكنتش عارفه ان الرسول عليه افضل الصلاه والسلام مات


بس بجد صعبانين عليا

لان ظروفهم وحياتهم صعبه

واحنا كتير منا مش حاسين بيهم


يالا حصل خير


بس مدونه جميله جدا

klmat said...

دنيتى الجميله
اهلا بك واشكرك على كلامك الجميل
وتعليقك اللى استشعر الحب فيه
من بين سطوره. ربنا يكرمك ويحفظك
ويحقق كل امنياتك
تحياتى وسلامى

klmat said...

دوحا
اهلا بك . فى مواقف مش من السهل ننساها
وفى شخصيات نفس الشىء بتكون لهاتأثير
ايجابى او سلبى او كوميدى

وبعدين انت شايف الست عامله شغل
كبير تقولها ياحاجه انت اللى ماعنكش حج
ههههه
سعدت بتعليقك
تحياتى وسلامى

klmat said...

mo3az
اهلا بك . وكمان مش جاى بايدك
فاضيه جايب تاج . ربنا يخليك اشكرك
جدا بأذن الله ارد عليه بس ربنا
يهدى النت ويستقر

فى حاجات فعلا مش بتتنسى
ولما نفتكرها بنتأثر بها حسب ماتكون
مفرحه او غير كده معاك حق
سعدت بتعليقك
تحياتى وسلامى
(f)

klmat said...

sherif
اهلا بك . ومتشكره جدا على
موضوع خفه الدم ده بس من ذوقك
اما بالنسبه للمهندس شريف اللى بيعلق
فهو تشابه اسماء مش اكتر هو مش مدون
بس بيعلق عندى وهو بردوا شرح لى نفس
الشىء اشكركم جدا
تحياتى وسلامى

klmat said...

dr.nour
اهلا بك وسعيده بزيارتك
وكلامك الجميل. لا تتخيللى انا
كنت عايزه اضحك قد ايه من الموقف ده
فعلا الناس دى عايزه اللى ياخد بايده ويحنو عليها ربنا يعينيهم
مره تانيه سعيده بتعليقك ويارب
تتكرر دايما
تحياتى وسلامى

دكتور كسلان said...

ازيك يا مدام اميرة
يارب تكونى دايما بخير
انت وكل اهلك وحبايبك

بوست دمه خفيف جدا
واللى عجبنى اكتر
حماسك للموضوع
ونيتك انك تعملى حاجة بجد

ده غير انها بتبقى ذكريات حلوة
خصوصا الكلام العفوى اللى بتسمعيه منهم


سلام يا اختى العزيزة

walaa said...

ههههههههه
ازيك يا كلمات عامله ايه ضحكتينى والله انا برده قضيت الخدمه دى شكلك كده مدرسة لغه عربيه زى ولا لامش عارفه بس ما كنش فيه الحاجه فوقيه وزى ما قلتى فعلا واخدنها تسيليه بس فى ناس عايزه تتعلم بجد
تحياتى لك ولاء

و القادم....أجمل said...

السلام عليكم
ممكن أدخل
؟!!
:D
نتكلم الأول عن البوست
بحس انها مشكلة متبادلة في كل المجالات
المرسل و المستقبل
يعني المدرس و التلاميذ
الطبيب و المرضى
اختلاف الشخصيات هي اللي بتتحكم
في نجاح او فشل الخدمة بينهم
ربنا يجازيكي خير يا قمر علي نيتك
الطيبة في المحاولة يارب
و كمان افكارك فعلا رااااااااائعه
عملية الابهار و الجذب دي بتغير
من روتين العمل
ان شاء الله لما اطلع دكتورة أطفال
هعمل أوده ملاهي عندي في العيادة
اه و الله
:)

وحشاااااااني أووووووووووووي يا حبي
ربنا يحفظك دايما
و يطمنني عليكي
:)

loumi said...

العزيزة أميره

الواحد فعلا لما بيتخرج
بيبقا عنده حماس إنه يحقق حاجات كتير
بس زى ما إنتِ قلتِ
الناس دول كانوا
جايين مش بهدف التعليم
وبما أن الهدف مش موجود عندهم فأي مجهود يبذل معهم سيكون بلا طائل
بدليل إن واحده أو إتنين هم إللي إستفادوا لأن هدفهم كان التعلم فعلاً

أما جولات المطبخ وعمايله
فحدثى ولا حرج

تحياتي لك

شيرين said...

هههههههههه عثل اوي والله تيتا اللي كانت بتقولك ياابلة دي والحنة اللي في شعرها دي انا متخيلة اللون اصل انا اعرف حد صابغ شعره كده بردو

بجد ربنا يكرمك وتفيدي الناس وكمان تستفيدي ثواب انتي كمان

تحياتي أيامنا الحلوة

Unknown said...

باه البنت كانت فاكرة ان النبى ما ماتتش بس احنا مش شايفينوه ؟؟؟؟؟؟

عارفة يا كلمات انتى تستاهلى جايزة ع البوست ده ليه ؟ مش عشان تلقائيتك و خفة ظلك بس . لا . عشان كشفتى من واقع تجربة حقيقية للناس الى نايمة على ودنها أن مصر لسة فيها جهل و مرض و فقر

ناس كل ما تحاولى تواجهيههم بالحقيقة دى تاخودهم الجلالة و يقولولك سمعة مصر و مش سمعة مصر يتنيلوا على خيبتهم

تحياتى

Abeer said...

بجد بوست تحفة جداااا
يضحك ويبكي
بس للاسف دول لهم عذرهم
لكن لما تلااقي شاب جامعي وحالتة انيل من كدا 200 مرة ايه عذره
للاسف بردو
دلوقتي باة فيه الامية المقنعة

تحياتي

Doba said...

حكايات جميلة وممتعة بالفعل والواحد على الرغم من كل شىء بيتعلم من تجاربه وتلاقى ان بدايات العمل هى اكتر حاجة أثقلت جوانا حاجات قيمة للغاية مبتتعوضشى

لو ليكى ذكريات زى دى اكتر ممكن نستفاد منها أشركينا فيها

بداخل كل امرأة دائما طفلة صغيرة تحب أن تداعب خصلات شعرها وتلعب وتلهو ولكن كيف ومتى واين

تحياتى
هبة

klmat said...

عزيزى د/ كسلان
اهلا بك ازيك انت يارب تكون بخير وكل امورك تمام . انا بخير الحمد لله اشكرك جدا
على سؤالك عليا وعلى تعليقك الجميل
خفه دم ايه ده بس من ذوقك انا كل اللى عملته حكيت اللى حصل بس فعلا ذكريات جميله . ربنا يقوينا كلنا ونقدر نعمل حاجه يارب
تمنياتى ودعواتى لك بكل التوفيق والسعاده وسلااااااااام

klmat said...

walaa عزيزتى ولاء
اهلا بك ويارب تكونى بخير
عارفه ياولاء الخدمه العامه دى
مش مجديه دى وسيله لتأخير التعيين
بس بالنسبه لى كانت فتره مفيده
الحمد لله بس كان نفسى اعمل حاجه اكبر
سعدت جدا بتعليقك
ويارب دايما نتبادل الاراء
تحياتى وسلامى

klmat said...

القادم اجمل
اهلا ياولاء فينك ياحبيبتى واحشتينى جدا
انتى دخلتى القلب مش المدونه وبدون
استئذان ياسكر
الف مبروووووووووك نجاحك ياجميله
ويارب تكونى دكتوره اطفال عظيمه
انا معاكى جدا فى العلاقه بين
المرسل والمستقبل ربنا يحقق
كل امانيكى يارب
تعليقك بينور مدونتى
تحيااااتى

klmat said...

loumi هزيزتى
واحشانى جدا جدا
ومتفقه معاكى تماما اول مابتخرج
بيكون كلنا حماس بس الحقيقه
مش بيستغل وفعلا الناس جايه
حب استطلاع وتسليه الموضوع
عايز وعى اكتر
نورتينى ياصديقتى

3abdo me7tas said...

كالعادة يا مدام أميرة
موضوعاتك الجميله اللى بتحس الواحد انه عايز يعمل أى حاجه عشان يقدر يساعد
بالنسبة لمحو الأمية دا شيئ جميل اوى اوى فى مصر بس يا خسارة فيه ناس بتعمله غلط
فيه ناس لما يقولو احنا هنروح ندرس لمحو الامية عشان ناخد فلوس على كل راس قصدى شخص يعنى ساعات بيكتبو أسماء وهميه وساعت الامتحان يجيبو ناس تانية خالص متعلمة وتمتحن مكانهم واللجنة تقول ما شاء الله
الضمير يا مدام أميرة الضمير هو اللى ناقص الأيام دى مش الأمية ومحو الأمية

klmat said...

عزيزتى شيرين
واللهى ده انتى اللى عثل .وربنا
يجعل كل ايامك حلوه ونسمع زغروده
حلوه قريب . ربنا يسعدك ويوفقك
تحياتى القلبيه

klmat said...

عاليا حليم
الجائزه وصلت فعلا انك والحمد لله
بتكتبى فى مجله معروفه الف مبروك
ياعاليه وتعليقك عندى بيسعدنى جدا
بلدنا محتاجه كتير وان شاء الله
تكون افضل
واشكرك جدا على كلامك الجميل
ربنا يخليكى ياعاليا ودايما
ناجحه على طوووول يارب
تحياتى القلبيه

klmat said...

abeer عزيزتى
وحشتينى جدا . معاك حق ياعبير على قد
مالمواقف دى بتضحك على قد ما بتحزن
ان فى ناشس شقيانه ومش عارفه تعيش
ومعلوماتها ضعيفه جدا واللى يحزن اكتر
الناس اللى عندها فرص تقرأ وتتطلع
وبردوا ضايعه
ربنا يصلح حالنا جميعا
متغبيش اوى كده بتوحشينى
تحياتى القلبيه

klmat said...

doba عزيزتى
نورتى مدونتى لك وحشه واللهى
ان شاء الله اكتب الذكريات اللى علقت
فى ذهنى . انا معاكى داخل كل منا ست
او رجل طفل بس زى مانتى قولتى
يطلع امتى وفين هو ده الوعى
سعدت جدا بتعليقك واشكرك جدا
تحياتى القلبيه

shahy said...

ابلة ياابلة
ممكن تبقي تقوليلي على طريقة الكيكة علشان اعملها وتصقفيلي وتديني نجمة


معاكي كل الحق يااميرة هانم في ناس فعلا ماتعرفش حاجة في الدنيا غير شغلها والبيت وخلاص

تحياتي

klmat said...

shahy عزيزتى
اهلا بك واحشنى
ماشى انا ممكن اديكى الطريقه بس المهم
تعمليها مش تروحى تعملى هريسه وعايزه نجمه واللهى الست دى كانت مجتهده جدا
اكتر من الصغيرين الناس التانيه معذورين
من كتر الشقا ربنا يفرجها وينور بصيرتنا
كلنا يارب . تعليقك بيعدنى او ياشاهى
سلامى لك وللجباره والشنيور وابوالدراويش
تحياتى القلبيه

منى said...

كلمات
جميل قوى ان الواحد يحب يفيد غيره
لكن ده مش كفايه
لازم الطرف الاخير يكون مقتنع بالفايده دى
عموما انتى عملتى اللى عليكى
واكيد كتير استفادو
حتى لو مجرد انهم اتعلموا يعملوا كيكه
ههههه
جميله الذكريات
ياترى ايه اخبار الحاجه فوقيه؟

klmat said...

عزيتى منى
اهلا بك انامتفقه معاكى فى
رايك تماماجميل جدا ان الواحد يفيد
وانا كمان استفادت عرفت ناس جديده
وقضيت معاهم وقت ظريف واتعاطفت معهاهم
جدا وكنت اشعر بحبهم فمنحونى سعاده
ربنا معاهم فى الحقيقه معرفش الحاجه
فوقيه فين حالياان شاء الله تكون بخير الكلام ده
من اكتر من 20 سنه بس انا
مش عجوزه اوى
هههههههه
تحياتى القلبيه

3abdo me7tas said...

هو انا مش موجود ليه تحت
حد يبعبرنى يا جدعان