Thursday, April 3, 2008

نعمل ايه

الناس دى ساكته ليه . صحتهم بتتدمر باكل مسمم ومياه وهواء ودم وضمائر ملوثه
الناس دى مش ساكته بتتكلم مع بعضها ومش عارفه تعمل ايه عايزه حاجه تضمن لها نجاح نذمرها
المعتقلات مليانه وايه النتيجه ورغم كل التعب ده
يظهر على
الشاشه من تسبب فى حدوث كل هذا ويبتسم فى برأه او ربما بلاهه ويتحدث عن انجازات غير مسبوقه لانراها ولا نشعر بها . كمان العيب فينا .
هى فعلا غير مسبوقه طوابير العيش وشهدائها وغلاء المعيشه . لم نرى هذا وقت الحروب
اما غلاء الحديد فمحظور التحدث فيه غلاء المساكن غير مسبوق . الاستلاء على الاراضى وتشريد الاهالى بدعوى التطوير .
تبوير الاراضى الزراعيه وبيع اراضى بتراب الفلوس للمحاسيب .
بناء ثم هد !!!
واختفى الكلام عن البنيه التحتيه
لأن مافيش اصلا . طب نعمل ايه . الناس كلها متذمره اطباء مهندسين قضاه موظفين وعمال يعنى حاجه بالأجماع الناس مش بليده بس نفسها اتقطع من ركوب مواصلات غير ادميه ووقوف فى طوابير العيش وامراض متفشيه وشعور باليأس والأحباط يهد .
الناس مش مستسلمه بس منهكه طب نعمل ايه ؟؟؟؟؟؟؟؟؟؟؟

سمعت د / جلال امين فى قناه الجزيره بيقول ان جزء من الحل مانراه الآن من اضراب اساتذه الجامعه.
وقفات الاطباء والقضاه وعمال المحله . هذا التحرك الذى قد نراه بسيط هو مصدر قلق للكبار
دوام الحال من المحال . .

58 comments:

سمراء said...

كل ليل وله اخر
احنا كمان من الناس دول
في حال غياب الثقة اللي احنا عايشين فيه مش قادرين نصدق انه فية حد بيقود حركة حقيقية علشان نساندة ونقف جانبة لكن املنا حد حقيقي يظهر يكون همة الناس والبلد وبحدسنا نحسه ونمد ايدينا في ايده
لسة عندنا امل
اشكرك على زياراتك
سمراء

ammola said...

نعمل ايه؟؟
نبدأ بأنفسنا
احنا مش مكفينا اللى بيتعمل فينا..لا..بناكل فى بعض كمان
نبدأ بأنفسنا

Anonymous said...

e7na mt2nash 3la Keda .. :(

Sherif.

ميندوزا المصري said...

للأسف معتقدش ان الاعتصام ده هيفيد في اي حاجه لأن معظم الشعب مش هينفذه بالأضافه اني سمعت اخبار ان في البنوك الحكوميه وبعض الاماكن راحلهم شبه تهديد ان اللي مش هيروح منهم الشغل يوم الاحد هايتبهدل واحنا اجدع شعب يخاف
وكمان انا لحد دلوقتي مش قادر افهم الاعتصام ده او الوقفه الاحتجاجيه ديه المفروض انها تحقق ايه عشان لما تخلص نقدر نحدد هيه نجحت والا فشلت

http://kasperb4.blogspot.com/ said...

نعمل كتير والله
بس نعمل ونتحرك بدل السكون اللي مموتنا ده

ودايما في امل بفضل الله
لأن دوام الحال من المحاااال

تسلم ايدك

دكتور كسلان said...

ازيك يا مدام اميرة
يارب تكونى بخير دايما

متشكر جدا جدا على سؤالك علىّ
انا اسف على التاخير فى زيارة مدونتك الجمية
وانا اكيد اللى خسران

بالنسبة للبوست
اعتقد ان جزء من الحل الاضراب العام
اللى هيكون بكرة ان شاء الله 6ابريل
بس يارب الناس تستجيب للدعوة دى

لان خلاص احنا اتخنقنا
ومعدش فيه فى ادينا حل الا كده

المهم ان احنا نتحرك
ومنستناش النتايج
ونبطل السلبية اللى احنا فيها

انا بحيى عمال غزل المحلة وموظفو الضرائب العقارية
واساتذة الجامعات والاطباء
وكل من يستطيع ان يقول لأ

من غير الاضرابات والاعتصامات دى مش هنعرف ناخد حقنا
خصوصا فى ظل الفساد اللى عايشين فيه

واللى يتابع مقالات د.جلال امين فى المصرى اليوم
هيعرف قد ايه حجم الفساد اللى احنا فيه
وازاى انتشر فى كل مؤسسات الدولة
من عهد الثورة لحد وقتنا هذا

انا شايف ان الاضراب ده هو احسن حل
وان كان فيه حول تانية

بوست جميل
وتساؤلك فى محله
نعمل ايه؟

انا اسف ع الاطالة
سلاااااااااااااااااااااااااااااااااااااااااااااام

Empress appy said...

اممممممممم نعمل كتير نغير نفسنا ونتحرك وبعدين هنعمل اكيد
احنا شاطرين بجد فى الكلام
وطبعا الكبار بيقلقوا
بس مش مننا من حاجات تانيه بمعنى بلاش نلعب مع الاسد فهمتى

منى said...

على اد ما انا سعيده انا الناس العاديه خلاص هتتكلم
على اد ما انا خايفه من حدوث تجاوزات سواء من المواطنين او من الامن
ربنا يستر ويكتب اللى فيه الخير

mohand said...

تفتكري فعلا ان ده جزء من الحل؟

كاميليا بهاء الدين said...

النهاردة يوم الاضراب
كنت اتمنى اكون موجودة

بس كل اللى قدرت اعمله
انى احط علم مصر فى عربيتى

رجل المرور افتكر انى باحتفل باليوم الوطنى لبلدى
ههههه

يارب يارب يكون الاضراب ايجابى
ويفرق مع الحكومة .... الذكية

تحياتى لصديقة قلبى

Anonymous said...

اختى العزيزة /أميرة
" فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ "
بشريات الفرج قادمة فأن مع العسر يسر و لكل ظالم نهاية.
أبو خالد

Hossam Nasr said...

السيدة Klmat

نأمل أن يكون الإعتصام أو أحداث 6 أبريل "والتي لم نرصد من ثمارها سوى بعضاً من القمصان السوداء" بداية لتغيير نأمله. ولكن ياسيدتي هكذا المصريون. لا يتحركون إلا بعد مرور أكثر من مائة سنة على الظلم. واسألي التاريخ من أيام فرعون إلى إحتلال الإنجليز.

إحترامي وتقديري

حسن ارابيسك said...

كلمات
هي بحق كلمات لها كل التقدر والاحترام
لتميزها بموضوعات تحمل الكثير من القيم والمعاني والمضمون لذلك قرأت اليوم الصفحة الأولى من مدونتك وأعجبت بكل من
بالالوان والموسيقى التصويريه
السميائى ساحر الصحراء
مين الخسران
شويه ضى وجيه عزيز
وان شاء الله اكمل موضوعات السابقة فأنا لا أحب أن يفوتني موضوعات المدونات القيمة
وبمناسبة وجيه عزيز حضرت له حفلات كثيرة وهو فنان لايختلف عليه اثنان
مثله مثل مرسيل خليفة

أعجبتني رائعتك
مين الخسران وهو لون أعتبره من القصص القصيرة والتي تحمل دلالات كثيرة في سطور قليلة ومختزله
عموما تحليلك للمواضيع قيم جداً
فلكي مني كل التقدير والاحترام
أرابيسك

Anonymous said...

نعمل كل ما هو صحيح

وهو باختصار كل ما فى قدراتنا .. نتقن عملنا .. نتقن علاقاتنا بكل من حولنا .. نقول الحق دائما ونتمسك به .. ننتبه جيدا لاولادنا حتى لايتوهون فى هذا الزحام ويفقدون التمييز

نحن مطالبون ياسيدتى باقصى ما يمكننا .. وليس المستحيل

حينما تأتى فرصة فى أى شئ .. نبدأ .. ونرفض مبدأ ياكله يا بلاش .. ذلك يصقلنا ويصهرنا فى بوتقة الأمل ..

هناك الكثيرون ممن حالهم أسوأ .. لكن يفوتنا أننا من أفضل الشعوب فى الشكوى
لكننا لانفكر فى حلول .. فى انتظار معجزة ما .. لاتأتى

نريد حلا جاهزا ونحن جالسين نحتسى زنجبيلا .. ولا تقولى لى أعمل ايه .. حينما كنت فى سيدنى سألت الرجل .. ماذا تريدنى أن أفعل؟ رد .. لاأعرف .. أمامك المصنع كله .. قم بجولة فيه .. ثم عد وقل ماذا يمكنك أن تقدم لنا ..

هذا ما يجب أن نعلمه لأولادنا

هل هناك نموذج ناجح يقارب ظروفى؟ لاتقولى ليس هناك .. ببساطى .. أعمل زيه .. ولاتخجل من التقليد .. اليابان بجلالة قدرها قامت على تقليد منتجات العالم .. وقدمته مرة أخرى بشكل أفضل

آسف للإطالة .. بس انت بتختارى مواضيع جميلة ..

موناليزا said...

طبعا لازم الكبار دول يقلقوا لان لو الاضراب حصل بالفعل وبدون خوف هنطلع كذابين امام العالم كله وان بلدنا معيشانا فى رخاء دى مجرد كدبة

la3lahakhier said...

رايى مع امولة نبدأ بنفسنا
يا جماعة مين بيشترى الغالى ماهو احنا نبطل نشترى ايه المانع نحدد سلع معينة ونقاطعها بمنتهى الهدوء واحنا بنروح مدارسنا ومصالحنا بس نحاول ماساعدهومش على الاقل
دا مجرد راى
كلمات على فكرة وحشتينى

سمراء said...

كلمات
لقد تركت لك تعليقا
اشكرك
سمراء

klmat said...

سمراء
اكيد الثقه مفقوده وان شاء
الله يطلع علينا النهار بنور ساطع
كنت اتمنى ان يكون الجميع اكثر ايجابيه
على الاقل عدم الخروج من البيت
لكن كان هناك تهديد بالخصم من الراتب
والناس مش مكفيها المرتب
الامل موجود وبأذن الله يتحقق قريبا
انا كمان اشكرك جدا
خالص تقديرى وتحياتى

klmat said...

ammola
انا معاكى نبدأبانفسنا ده اللى نقدر
نعمله حاليا
خالص حبى وتقديرى

klmat said...

ميندوزا المصرى
الوقفه كان هدفها توصيل الرأى للمسئولين
اننا بنقول لأ بطريقه متحضره وبروفه
لاننا نبقى يد واحده
هى اثرت بدليل اخطار البنوك والمؤسسات
بخصم 7 ايام لمن يتغيب
رغم ان الوقفه مش جماعيه لكن عملت نوع
من الصداع على الاقل اسعار تقف لحد كده
دى كل اسبوع بتزيد
فى اعتقادى انها لم تضر فيماعدا
احداث مشاغبين المحله
خالص تحياتى وتقديرى

klmat said...

الباشمهندس شريف
هى عيشه ولاموته ولا فوته فى حاره سد
العمر واحد والرب واحد
وعمر الشقى بقى
خالص تحياتى ودعواتى لك بكل الخير

klmat said...

آلام وآمال
انا معاك فى كلامك
والامل موجود رغم الألم
وان شاء الله الللى جاى افضل
خالص تحياتى وتقديرى

klmat said...

د / كسلان
وانا بقول البلوج منور ليه ياهلا ياهلا
انا بخير الحمد لله . المهم انت فين يارب
تكون ماشى فى مشروع جواز

انا معاك فى كل كلمه كتبتها وان شاء
الله حالنا يبقى افضل وقريب فى استجابه
حقيقى بنأمل فى اكتر ولكنها بدايه
انت ماطوليتش ولاحاجه خد راحتك دى مدونتك وبتنور بك

ان شاء الله دايما تكون كسبان وانا كسبت
تعليقك ربنا يكرمك ويسعدك ياااارب
خالص احترامى وتقديرى

klmat said...

appy
اهلا بك احنا فعلا بنتكلم كتير معاكى حق
ويارب نبدأنعمل حاجه البرغوث بيعمل
قلق للأسد مش بيلعب معاه ههههه ربنا كبير
ودوام الحال من المحال
خالص حبى وتقديرى

klmat said...

منى
احساسك دايما صادق فعلا اللى حصل
فى المحله من تكسير وحلرق مايرضيش حد
بس كل حاجه لها ايجابياتها وسلبياتها
ربنا يحمى بلدنا ويحصل اللى بنتمناه كلنا
ياااارب
خالص حبى وتقديرى

Unknown said...

اكيد لازم يكون فية حل

walaa said...

على رأى الشاعر عبد الرحمن يوسف انت الوحيد الذى اكلت من خيرات بلادنا لكننا لم نستطع اشباعك
الراجل ده فساده فاق الحد وبقى ولا على باله اللى بيحصل فى البلد فحسبنا الله ونعم الوكييل
فعلا الاضراب هو الحل احنا مش عايزينك بالاجماع ياريت تمشى وتسبنا
تحياتى ولاء

الربان said...

تحياتي

ان طال الليل لابد من طلوع الفجر..

التغيير سنة الحياة...و دوام الحال من المحال.

أيضا نحن في حاجة الي ان نساعد انفسنا
فنتراحم و نؤدي عملنا باتقان واخلاص
معظم مشاكلنا من انفسنا نحن...بالاضافة
طبعا الي الحكومة و مشاكلها...

يعني لو كل واحد اخرج زكاة ماله...لن
نجد فقيرا في مصر...لو كل موظف راعي الله
في عمله لم راينا رشي... وهكذا...
الا يسهم ذلك في تخفيف وطأة الحياة علي الناس.


تحياتي و تقديري

karim said...

هى دية مصر و العالم العربى المتخلف منذ مئات السنين و مش ممكن نتغير غير بعد مئات السنسن ايضا لابد من تغيير مفهوم الثقافات و مفهوم ان تكون انسان حقيقى عند الشعب

momken said...

اكيد فيوم معلوم تترد فيه المظالم ابيض على كل مظلوم( الى هما احنا)
اسود على كل ظالم (هما يعنى) ركزى معايا شويه

البوست رائع تحياتى ليكى ولروحك الثائره

تحياتى

harmless said...

لكل نتائج مقدمات
والنظر الى حاله ما فى لحظه زمنيه واحده قد لا يعطى صوره تتيح توقع المستقبل

لكن الانسب النظر الى تطور الحاله عبر الزمن
بمقارنه 2005 و2006 و2007 سيبدو واضحا تصاعد السخط الشعبى عاما بعد عام
يتصاعد ايضا الشعور بعدم الرضا والشعور بكراهية النظام والشعور بفساد الحكام والشعور بوجوب التغيير

والسؤال
الى اى مدى يستطيع هذا النظام الصمود فى وجه هذه الكراهيه المتصاعده التى وصلت الى مؤيديه وحراسه وجنوده وفى ظل مناخ من العولمه وتقارب المسافات وسهوله المقارنه مع الشعوب الحره

يبدو ان الليل اوشك على الانتهاء
وصار الامل ان يحدث التغيير باقل خسائر ممكنه غهذاالنظام البشع دمر كل شئ وهو موجود واتمنى اى ينتهى ويرحل بدون دمار اضافى

ماسة الحب said...

كل الحكايه اننا نفوق من الغيبوبه لو فوقنا هنتعلم ناخد حقنا ووقتها هنتعلم نحلم

Unknown said...

جيتى ع الجرح سؤال بسأله لنفسى كل يوم
اعمل أيه ؟ اعمل أيه ؟

أيه الحل مع البلد دى ؟

Mo3Az said...

ان الله لا يغير ما بقوم حتى يغيروا ما بأنفسهم

اكيد بكرة احسن
اذا حاولنا نغير
ان شاء الله

Anonymous said...

3ayzeen mawdo3 Gdid.
7drtk fen?

Sherif

تلميحاتى - يوسف الشافعى said...

العيب مش فى اللى حواليهم حراس العيب اكيد فى الناس اللى خايفين من الحراس وبعدين احنا ماعتش عندنا ثقافة الكفايه لا بالعكس لما نعرف ان فى شئ بيغلى بنجرى عليه ونشتريه بدل مانأااطعوا المشكله ان احنا مش عارفين نأااطع حتى اللى كاتم علينا
احنا عاملين زى القط اللى بيحب خناءو
ياريت تزورينى وتصلى الرحم اللى بين المدونيين

klmat said...

العزيزه ايويه
ان شاء الله فيه حل اتمنى ان يكون قريب
خالص حبى وتقديرى

klmat said...

شريف
اهلا بك . اعتذر عن تأخيرى فى الرد
وعلشان فى اتنين شريف حصل لخبطه زائد
انى كنت فى حاله عدم تركيز سامحنى

ميرسى جدا على ثناءك على مواضيعى وانت
ماطوليتش ولاحاجه وطول زى ماانت عايز
كلامك جميل وانا معاك جدا لكن فى حاجات
مش بايد الفرد زى مثلا عدم العداله
عندما يخطأ الصغير يتم محاسبته حساب عسير
وابن فلان او علان لأ
المحسوبيه لما يكون واحد متفوق ولايتم تعيينه
لانه غيلر لائق اجتماعيا
لمانزرع فراوله قبل القمح
لما يتم تجريف الأرض بقرارت سياديه
مشكلتنا فى رأيى غياب العدل ناس تزور الانتخابات يكونوا نجوم وناس لم تزور تروح السجن ... وسوء
توزيع الدخل .. الاحتكار وغياب الدوله
عن القيام بالصناعات التقيله
لما تكون القيادات غير ملتزمه وهمها
المصالح الشخصيه بتغيب القدوه وبتنفلت
الاخلاق وتسود الانتهازيه والشعور بالظلم ويصبح الملتزم
ورافض الرشوه مخلوق غريب
اكيد كل منا يبدأ بنفسه صحيح لكن
وجود قيادات مخلصه وجديره بمناصبها وسياسات ثابته ضروره حتميه
طولت عليك .. سعدت جدا بتعليقك
خالص تحياتى وتقديرى

klmat said...

mohand
اهلا بك . بدايه الوعى جزء من الحل
وشويه شويه بيزيد اتمنى ان يلهمنا
الله بالحل ونكون ايد واحده
خالص تحياتى وتقديرى

klmat said...

كاميليا
اهلا بك واحشنى جدا اعذرينى فى التأخير
غصب عنى. ربنا يقويكى وانتى معانا
اينما كنتى . ربنا يوفقك فى كل خطواتك
ونشوف بلدنا قريب احسن من كده بكتير ان شاء الله
خالص حبى وتقديرى

klmat said...

الأخ اعزيز ابو خالد
انا معاك فى كل كلمه كتبتها وعندى قناعه
تامه بها . اتمنى ان يكون الفرج قريب
يارب تكون كل احوالك بخير
خالص تحياتى وتقديرى

klmat said...

whispers just for a night
اهلا بك . مش حا نختلف ده نتيجه
ان فى عدد كبير اميين ومشغولين بلقمه
العيش مش تبرير لكن دى حقيقه
الناس تعبانه اوى مهدود حيلها
ربنا ينور بصيرتنا جميعا
سعدت بزيارتك واتمنى ان نتبادل الأراء
خالص تحياتى وتقديرى

klmat said...

حسن ارابيسك
اهلا بك ومرحب . سعدت جدا جدا
بتعليقك خصوصا انه من موهوب زيك
متشكره جدا جدا
انت كمان مدونتك رائعه مش مجامله دى حقيقه ياريت نتبادل دايما الأراء
خالص تحياتى وتقديرى

klmat said...

monaliza
اهلا بك اعذرنى على التاخير فى الرد
طبعا الاضراب عدا ولكنه كان له تأثير
الحكومه مرتبكه اما عن مايقولوه فى
الخارج احوالنا معروفه من الفضائيات والبرامج المحترمه زى العاشره مساء وقناه الجزيره والسفراء الاجانب اللى فى مصر
المهم فى الداخل ربنا يصلح حالنا ونبقى ايد واحده وقلوبنا تبقى على بعض اكتر من كده . سعدت جدا بتعليقك
خالص حبى وتقديرى

klmat said...

la3lhakhair
انا معاكى ومع اموله ربنا يصلح حالنا
والكل يكون ايجابى
ربنا يسعدك
خالص حبى وتقديرى

klmat said...

سمراء
قرات تعليقك وعلقت
تمنيياتى لك بكل الخير
خالص حبى وتقديرى

klmat said...

walaa
ازيك ياولاء واحشنى اوى
مهم اوى اننا تكون ايدينا
فى ايد بعض وربنا يجازى اللى وصلنا لهذا الحال . طبعا الزياده السكانيه والغلاء العالمى :)انا حاعترف من غير ضرب
ربنا يصلح حالنا
ويولى امرنا من يتقى الله
خالص حبلى وتقديرى

klmat said...

الربان
اهلا بك . كلامك مقنع تماما وانا
متفقه معاك جدا فى رأيك
ربنا ينور بصيرتنا ويهدينا جمييعا
خالص تحياتى وتقديرى

klmat said...

karim
اهلا بك . عدد اخوانا الاميين
فى البلد مش شويه والفقر موجود بنسبه
عاليه والناس مشغوله بقوتها دى عوامل بتساعد على الاستسلام نتمنى ان نغير
من انفسنا وليبدأ كل منا بنفسه
سعدت بزيارتك
خالص تحياتى وتقديرى

klmat said...

momken
اهلا بك وركزت معاك يارب تكون
بيضا على الكريم وسودا على اللئيم
ماشى . حقيقى نورتنى
خالص تحياتى وتقديرى

klmat said...

harmless
اهلا بك . اتفق معاك فى الرأى
واتمنى ان تكون بدايه صحوه ويحدث
مانتمناه جميعا ونشوف بلدنا فى
مكانه تليق بها وبامكانيتها الهائله
وبتاريخها
خالص تحياتى وتقديرى

klmat said...

ماسه الحب
اهلا بك واحشتينى
غيبوبتنا شديده شويه
ان شاء الله نفوق
خالص حبى وتقديرى

klmat said...

عاليا حليم
ازيك ياعاليا بفرح لما اشوفك عندى
ربنا يصلح حالنا ويبقى لنا هدف
كلنا ايد واحده لتحقيقه وقريب
يااارب
خالص حبى وتقديرى

klmat said...

mo3az
اهلا بك . طبعا معاك حق فى
كل كلمه كتبتها
اتمنى ان نغير من انفسنا للأفضل
ويارب نشوف اللى بنتمناه قريب
ان شاء الله حايكون قريب
خالص تحياتى وتقديرى

klmat said...

الباشمهندس شريف
ahlan bik 3olm we tm ya fendm
talabatk awamr
rabna yea7meek
With all good wishes

klmat said...

يوسف محمد الشافعى
اهلا بك وبعدين يعنى فى القط اللى
بيحب خناؤه .متهيأللى شاف حصل
ايه للقطط اللى قبلوه اعتقد
انه كرهه خناؤه باجماع منقطع النظير
لفرط ذكاء خناقه الدور على الخناق
حايخنق نفسه بنفسه
خالص تحياتى وتقديرى

asftel7b said...

إن الله لا يغير ما بقوك حتى يغيروا ما بأنفسهم

فهل هنقدر نغير من أنفسنا
كلماتك محفزه فعلا

klmat said...

asftel7b
انا شايفه بوادر تغيير وان
شاء الله يكون له صدى وليبدا كل منا بنفسه .خالص تحياتى وتقديرى