Tuesday, April 22, 2008

سلف ودين

الاخوه قبل الزواج وبعده
العادى ان الاب والام والاولاد بيكون بينهم علاقه طيبه وود الى ان يتزوج الابناء . وتلاقى العلاقه بين الاخوات مش زى الأول دخل فيها قلنا وقالوا واتصلوا وما اتصلوش وحاجات ماكنتش موجوده قبل الجواز
طبعا دخول اطراف جديده هو السبب
اللى بيحصل ان بيكون الزوج او الزوجه غيور وعايز شريكه له وبس وعايز ياخده من اهله بدل ما العيلتين يندمجوا ويكونوا عيله واحده لأ .
تلاقى الطرف القوى يضغط على الطرف الضعيف ويبعده عن اهله ويطلع فيهم القطط الفاطسه
مع انى ماشفتش قطط فاطسه .
المهم ده بيحصل كتير تلاقى الزوجه مش طايقه حماتها مع انها هى اللى ربت حبيب
القلب اكيد فى حموات متعبه هن فى الاصل امهات متعبات بردوا لو الحماه فكرت انها فى يوم كانت زوجه وان جيل بيسلم جيل وتشوف لما كانت زوجه كانت بتحب ان زوجها يكون معاها دايما حاتلتمس لها العذر ولو الزوجه فكرت بانها فى يوم من الايام حاتكون حماه وتفكر تحب زوجه ابنها تعاملها ازاى الامور حاتختلف


الابن يروح يزور خطيبيته وتبدأ تقولوه مامتك واختك وهو مش يحاول يوفق بين وجهات النظر لأ يبدأ فى الهجوم على اهله او العكس الام والاخت ضد الزوجه او الخطيبه
ونفس الشىء الزوج مراته تشيله من اهله اما اهلها مافيش افضل منهم . مين فينا مش بيغلط شويه تسامح ..لكن كل طرف عايز يمتلك الطرف الثانى ويستحوذ عليه وينسيه اهله ويعمل من الحبه قبه والبعض بينساق دون تفكير !!!!
ياريت كل طرف يحافظ عللى علاقته باهله بعد الجواز ويحاول ينضم لاهل الطرف التانى ويضمه لعيلته مش
لازم العمليه تبقى فريقين اهلى وزمالك
لايؤمن احدكم حتى يحب لاخيه ما يحب لنفسه

لو كل واحد بص فى عيلته حايلاقى علاقته بخالاته اقوى بكتير من عماته علاقته باهل امه عموما اقوى.
انا كمان كنت كده بس بعد ما كبرت واستقليت بحياتى حرصت على صله الرحم والتقرب للطرفين
مش معقول كل الخالات طيبات والعمات لأ . الام هى اللى دايما بتعمل كده .
تلاقى الزوجه ترى اخطاء من اهلها ولكن تداريها وتغفرها واخطاء اهل زوجها تكبرها وتضخمها او العكس .
زوجه الأب او زوج الأم يعامل اولاد الطرف التانى بقسوه الاولاد مالهموش ذنب لو فكر ان ابنه او ابنها
او هو شخصيا كان مكان الابن ويحن عليه مش افضل ويكسب فيه ثواب .
حد عارف كمان شويه حا يحصل ايه . الا يكفى مافيهم من الم الفراق .
الدنيا مش مستاهله كل هذه الصراعات واللى بيظلم اهل الطرف التانى بيكبر الاولاد ويعملوا فيه اللى عمله زمان
كنت بسمع الكلام ده كتير وكان فيه شويه شك لكن انا شفت ولمست حالات عن قرب عداله الله ولو بعد حين بتظهر
مش بقولكم كله سلف ودين

75 comments:

Unknown said...

اكيد كلة سلف ودين طبعا
وكما كنت بتعامل اهلك هيعملوك
وزي ما واحدة بتعامل حماتها وحش هتلاقي مرات ابنها تعاملها وحش
وفعلا دايما كلنا نميل لاهل الام اكتر من الاب
ودة طبيعي لان الام هي اللي بتربي وهي اللي قاعدة مع الاولاد الاب طول اليوم برة بيشتغل هيفضي لاية ولا اية
بس هي بتبقي ع حسب الام نفسها ان كانت بتحب عيلة جوزها ولالا وعلي هذا بتعود ولادها
والمفروض يتعودو علي الاتنين علشان اولا صلة الرحم وثانيا عزوة بردة
هههههه
بحب بوستاتك بحس ان حد مجرب مش مجرد خواطر
ربنا يخليكي لينا
سلام

klmat said...

my hope$
اهلا بك . انتى بتحبى بوستاتى وانا
بحب تعليقاتك لانى بحس انك فهمتى قصدى
ودى حاجه بتسعدنى جدا
اتمنى ان الشباب يغير الوضع ده
وكل واحد يحب عيله التانى او اضعف
الايمان مايبعدش عنها ويكون فيه
تسامح مش نقعد لبعض على كل كلمه
كلامك الجميل بيرفع مهنوياتى اوى
ربنا يخليكى ويسعدك وينجحك يارب
خالص حبى وتقديرى

دنيتى الجميله said...

كلام جميل جدا جدا
وواقعى جدا جدا
صحيح فيكى my hope$ فعلا رأى
كلامك حكم وصحيح ومفيد
بارك الله فيكى
حقيقى حكايه الحموات ومرات الابن
وزج او زوجه الاب والام
وحكايه العيله والخالات والعمات
مع انى بصراحه بحب الطرفين جدا وطبعا ده راجع لأمى الحبيبه
دمتى بكل خير وحب وسعاده يا أحلى اميره

رحــــيـل said...

عزيزتى اميرة

تعرفى ان اوقات من كتر اللى بسمعه وبشوفه اقول الواحد يعيش لواحده احسن

كل واحد مش بيفكر غير فى اللى هو عايزه وبس ومش مشكله بقى الطرف التانى عايز ايه
بس انا اعتقد ان لو فى حب اكيد كل طرف هيحاول ميزعلش التانى ويعمل اللى يرضيه ويحاول مش يزعله

وفعلا كله سلف ودين
تحياتى لكى وتقديرى

Anonymous said...

أختى العزيزة / أميرة
كلماتك فيها سر عجيب حميمى لأنها تخاطب عقولنا و اللى حادث لينا فى كل العائلات فعلا ألاخوة يظلوا أخوة إلا أن يتزوجوا و يتبدل الحال لغير الحال يا ليتنا جميعا نعود لكتاب الله و هدى نبيه صلى الله عليه و سلم لنصل للحل المثالى.
أميرة أكرر أنتى تنتمى لزمن جميل دمتى إنسانة طيبة .
أبو خالد

و القادم....أجمل said...

السلام عليكم
و الله يا أميرة الموضوع مهم جدا
و فعلا عندك حق
بس فيه حاجات ممكن تمنعنا

* لا تعليق *

احترامي و تقديري
:)

سمراء said...

جميل قوي
لكن هناك بعد اخر مش متعلق بالزوج والزوجة لكن متعلق باهلهم اللي مفهموش انهم هيستقلوا ويبدأوا حياة مختلفة عن حياتهم
ويضغطوا عليهم انهم يعيشوا زي ما هم عايشيين
والزوج والزوجة عندهم معتقدات بتقول لو مسمعتش كلام اهلى هكون عاق ليهم واللي ملوش خير في اهله ملوش خير في حد تاني

اشكرك
سمراء

ammola said...

معلش أنا جاية اقولك على حاجة يمكن تهمك وبعدين حاقرا على رواقة علشان أعرف أحلّى
:)
اخطفى رجلك لمدونة"قولا سديدا"البوست الاخير قد يهمك
سلام يا قمر وجاية تانى أن شاء الله

klmat said...

دنيتى الجميله
اهلا بك . يافندم مش عارفه اقولك ايه
دايما بتفرحنى بكلامك الحلو
عارفه الحكايه دى منتشره فى كل الاوساط
وحتى شفتها فى افلام اجنبيه
هى عايزه بس اننا نبدل الاماكن
كل واحد يحط نفسه مكان الآخر
ونلتمس العذر لبعض وندفع بالتى هى
احسن . ربنا يخللى لك مامتك وكل حبايبك
ويخليكى ليا
خالص حبى وتقديرى

klmat said...

رحيل
اهلا بك ياساره وحشتينى
لأ ماينفعش نعيش لوحدنا جميل اوى ان
العيله والحبايب يزيدوا
بس بلاش ندق على كل كلمه والمثل بيقول
اللى يدق يتعب . نعذر بعض ونطول بالنا
نبين رأينا من غير تجريح وان كان فى صعوبه
يبقى زيارات خفيفه مع كلمه حلوه الامور بتبقى احسن المشكله ان دلوقتى من ظروف
الحياه وصعوبتها اقل حاجه بتكبر
ربنا يهدينا جميعا ويصلح حالنا
نورتينى مع خالص حبى وتقديرى

كاميليا بهاء الدين said...

انا مش هتكلم عن صلة الرحم والاهل
علشان مش اعيط
لانى فى الوقت الحاضر موجودة بينهم
كلهم جنبى ومعايا
وكل همى
اللحظة اللى هامشى فيها
وصورتهم تبعد وتبعد
ومش يفضل منها
غير ايد بتشاور
وبتقول مع السلامة

صلة الرحم
واحتضان الأهل بالعيون والقلب
دفا وامان

تحياتى

klmat said...

عزيزى ابو خالد
اهلا بك ويارب تكون بخير انت واسرتك
وكل حبايبك . عارف الموضوع ده شاغلنى
لانى شفت الحب اللى بين الأخوات فتر بعد الزواج فى كتير جدا مما يحيطون بى
وفى بعض بينهم خصام واعلم ان الحب
موجود واحزن جدا لهذا الدنيا مش مستاهله
مهما طال العمر فهو قصير
اما حكايه انى من الزمن الجميل خليها فى سرك ههههه. هو مش من زمان اوى يعنى
انا كبيره اه عجوزه لأ :) يعنى مش من عصر مينا بعديه بشويه
خالص تحياتى وتقديرى

klmat said...

القادم اجمل
اهلا بك يالولى .متفقين ان ده
واقع صح . ياريت قدر الامكان نحاول
ان نكون قريبين من بعض لو فى تعارض
جامد مثلا حماه دايما تضايق زوجه ابنها بدافع الغيره بتحصل كتير
ممكن تبعد هى شويه علشان متتعبش نفسها
لكن ماتحوليش تبعد الابن عن امه مهماحدث اكيد الموضوع فى ايد الزوج لكن احيانا
بيكون ضعيف امامها حاسه ان
جواكى كلام مش عايزه تقوليه .. قدر
الامكان نحاول .. انا سعيده
جدا لرجوعك للكتابه وتبادل الاراء
رأيك بيهمنى جدا جدا
ربنا يسعدك ويكرمك يارب
كل الحب والتقدير

klmat said...

سمراء
اهلا بكى . طبعا الأهل بيكون لهم دور انا
معاكى لكن الزوج والزوجه ممكن يسحبوا
نفسهم شويه بمعنى مش يحكواخصوصياتهم او يشتكوا لاهلهم لأن وكل واحد بيتعاطف مع ابنهعلى حساب التانى كل الاطراف مشتركه
فى اللى بيحصل . بتعجبنى جدا نظرتك للأمور
وتحليلك لها وبحب اعرف رأيك دايما
لكى منى كل الحب والتقدير

Anonymous said...

أختى الغالية / أميرة
لم أقصد و الله سن
و لكنى كل ما أشعر فى أى إنسان الصدق و الطيبة و حنية القلب أطلق عليه أنه ينتسب لزمن جميل و أرى فى حضرتك كل هذة الصفات بالأضافة إنسانيتك ..
تحياتى و أحترامى ..
أبو خالد

Mo3Az said...

:)
نقول لمين ومين يسمع
لو نعامل الناس زى ما نحب انهم يعاملونا ، ماكانش حاجة من دى حصلت

موضوع جميل ومهم
ربنا يجزيكى خير يا فندم

mohand said...

كله سلف ودين حتي المشي علي الرجلين

loumi said...

الغاليه أميره

كل المشكله في التربيه
لو كل أسرة تربي أولادها
وبناتها على حب الغير وحب الخير لكل من حولهم وعدم تصيد الأخطاء
لكان الحال أفضل بكثير
بس مش كل الناس كده
وده واقع
وربنا يسعد كل الناس
يا رب
لأن الدنيا مش ناقصه
مشاكل فوق المشاكل
تحياتي لك

klmat said...

ابنتى الحبيبه كاميليا
نورتى مصر وربنا يلم الشمل ويحقق امانيكى استمتعى بوجودك معاهم ولاتفكرى
فى لحظه السفر خليهافى وقتها لتنعمى
بحلاوه اللقاء وربنا يكتب لك فى كل خطوه الف سلامه
بتوحشينى اوى
عميق حبى وتقديرى

klmat said...

ammola
اهلا بك انا فعلا زورته وياريت كلنا نقاطع كل من يمس معتقداتنا ودينا دى طريقه عمليه ومؤثره وراقيه بس المهم كلنا نشارك
اشكرك جدا على دعوتك وفى انتظارك
عميق حبى وتقديرى

klmat said...

الأخ العزيز ابو خالد
اهلا اهلا بك يافندم انا بهزر معاك
انت انسان حساس وعلى خلق عالى وانا
فاهمه اقصدك وانا بقول انى ام واولادى شباب على وش جواز ربنا يحميهم هم وكل الشباب يعنى المسأله معروفه وكل صغير بيكبر
انا سعيده جدا والحمدلله بسنى انا فعلا من الزمن الجميل وده من حظى انا احيانا احب اهرج :)وعارفه اللى عندك
عارف انا بتعامل مع شباب فى منهم عابس
وكأنه عجوز وفى ناس زيي كده من الزمن الجميل لكن روحه شباب انا بسعد بتعليقك واهتمامك وبتمنى اشوف مدونتك
قريب حاتكون جميله لان اسلوبك واحساسك جميل اوى
عميق احترامى وتقديرى

klmat said...

mo3az
اهلا بك يامعاذ ربنا يكرمك ويعزك الامل
فيكم ان شاء الله ربنا يسعدكم
دايما رافع معنوياتى ربنا يوفقك
عميق تحياتى وتقديرى

walaa said...

والله عندك حق فى كل اللى بتقوليه عارفه لو الحماه وحشه باخلاقك الكويسه انت هتخليها كويسه
يعنى لو كل مره تقلبى اسأتها باحسانك هيجى عليها يوم وتتكسف منك عارفه يا كلمات انا متزوجه فى بيت عيله يعنى حماتى ساكنه تحت منى اول ما تزوجت شوفت منها حاجات
بس انا اخدت ده بصدر رحم عارفه احنا دلوقتى حبايب اكتر بكتيير من الاول علشان كده
بقول لكل زوجة ابن خدى حماتك بحب وليين مع مرور الوقت هتكون غاليه عليك زى امك
انا بقه عندى بنتى والله بجد بتحب عماماها اكتر من خلانها
صدقينى على حسب حنية عمامها عليها مش اكتر ولا اقل
وشكرا على البوست الجميل ده
تحياتى الى احلى قمر فى اسكندريه
ولاء

klmat said...

mohand
جميل اوى المثل ده اول مره اسمعه
بس عجبنى اوى
نورت مدونتى
خالص تحياتى وتقديرى

la3lahakhier said...

والله يا كلمات ربنا ليس غافل عما يفعلون
وكتير شفنا بعنينا اللى كانوا بفتروا اخرتهم ايه
ربنا يسترها معانا

Abo 7anf said...

السلام عليكم
كما تدين تدان
وبعدين مشاكل الازواج لازم تكون مبنهم
والاهل ميتدخلوش الا فى حدود
وميحولوش يفرضوا نفسهم
والابن او الابنه
يكونوا عاقلين
ووفقك الله فى مواضعيك

Unknown said...

فعلا الدنيا مش مستاهلة كل الصراعات دى

تحياتى

asftel7b said...

يااااااااااااه

زى ما يكون حسه بيا وبالجرح اللى انا فيه.نفسى افهم ناس ان كل حاجه سلف ودين

لو يعرفوا كده اكيد عمرهم ما هيعملوا اللى بيعملوه

واللى يغيظك اللى هو بيتعمل دلوقتى اللى عملوه زمان وبرضو مش قادرين يفهموا

هتقولى ايه الدنيا عمت قلوبهم زى ما عمت عيونهم

ربنا يهدى عباده

بجد موضوع رائع

منى said...

ازيك يا اميره
عارفه انا دايما مقتنعه بحكايه سلف ودين دى
واد ايه فعلا العلاقات الاسريه لما بتبقى صح بتبقى الحياه اجمل
عارفه طبعا انا بحب ماما زى كل واحده ما بتحب ماماتها
لكن معجبه بيها اوى لانها على اد ما اهلها كويسين وعلاقتنا بيهم ممتازه
كانت دايما بتحاول تقربنا من اهل بابا
وتقابلهم احسن من اهلها ومتقصرش فى الواجبات الاجتماعيه معاهم يمكن اكتر من بابا نفسه
رغم انهم من بلد تانيه
والنتيجه انهم بيحترموها جدا وبيحبونا اوى بسببها
وبيعتبروا بيتنا هو بيت العيله مش بيت جدى
ربنا يكرمك يا اميره يارب ويعطيكى على اد قلبك الطيب وروحك الجميله
تحياتى

سندباد said...

زيارة اولي ومش هاتكون الاخيرة باذن الله
تحياتي الخالصة
فكرة البوست حولة اوي
وجميل اوي العنوان

أبو خالد said...

أختى العزيزة / أميرة
دى أول زيارة لى معرف أنتهينا من غير معرف مع أطيب أمنياتى لك بحياة سعيدة
أنتظرى منى تاج أهدته لى زهرة الكاميليا

سلوى said...

فعلا والله كل شئ يلف ودين

فعلا الأيام دول

بوستك واقعي جدا

كل طرف عايز يأخد الطرف التاني ويمتلكه

دون مراعاه لا لصله رحم ولا لأي شئ إنساني
وتبقى حرب

مع إن المفروض دول عيله

ربنا يهدي الجميع

تحياااااتي

موناليزا said...

ياسلام لو الجميع حرصوا على رضا الله واتعاملوا مع البشر ابتغاء مرضات الله
والله ماكنا هنجد مثل هؤلاء
موضوع قيم ويستحق التقدير

اميره الصعيد said...

عارفه المشكله الى انتى بتقوليهى دى بتظهر عندنا فى الصعيد خصوصا لما يكون الاخوات متجوزين فى بيت العيله بتبقى المعارك والخلافات للصبح

momken said...

الموضوع جميل اوى اهنيكى عليه
كمان انتى اتكلمتى فى الموضوع من جانب اى حد يتكسف يتكلم عنه من الجنب ده لاحسن يطلعه الف واحد عاملين فيها مثالين ويقولوا ايه ده معقوله الحجات دى موجوده
مع ان المواقف دى موجوده داخل كل بيت بس كلنا اتعلمنا نكون زى النعام الى بيدفن راسه فى الرمل علشان ميشوفش مشكله ويحاول يوجهها

ان رئى ان الاصل فى المشاكل هو الشخص نفسه اقصد الزوج او الزوجه عندما يشرع فى اقامه المقارنات ويصرح بها لزوجته
يقارن بين الاهل والاهل
والاخ البايظ الى هو اخوها واهوة هو الدبلوماسى
ويقارن بين عمتها الى رد سجون وعمته الى دكتوره فى الجامعه
فتبداء هى تاخذه من هذا العلم دون ان يدرى بطريقه سورى الحريم
فلانه قالت وعادت ومش عارف ايه
لحد الامور ما توصل للدرجه الى بنتكلم عنها
لو كلنا اتقينا الله فى التعامل مع الاخر واعتبرناه مش اخر
اعتقد الشكل هيتغير
الدين المعامله

تحياتى

Unknown said...

مش عارف مبحبش تصنيفات العيلة وده من عيلتي وده من عيلتك
ده الجواز انصهار لعلتين في عيلة واحدة
بسأكيد بوست جميل ومليان
ربنا يوفقك

mohand said...

ارجو المرور علي اخر موضوعاتي في مدونة الباحث عن الحقيقة باسم استفتاء عن الافتاء يهمني رايك
تحياتي

mostafa rayan said...

عندك حق الدنيا مش مستاهلة لأنها اصلا منفاتة وكمان اسمها دنيا يعني قليلة وحقيرة بس مين يسمع ومين يفهم
تحياتي

Empress appy said...

علشان كده بعامل اهلى كويس الحمد لله ساعات بشطح اه بس بتراجع عن الغلط
حلوة التدوينه وفى الجون

shirry said...

علي فكرة عسول اوي البوست دا
بجد وانتي كمان مختارة عنوان جايب من الاخر
لاء بجد باين عليكي عسولة ماشاء الله
وشكلها مش هتكون الزيارة الاخيرة ان شاء الله

بس ساعات كل واحد بيقي شايف اهله احسن ناس في الدنيا
وفي ناس تانية برضو بتبقي متفتهمة الوضع

ربنا يوفق الجميع

Doba said...

احب اقولك انه يسعدنى ويشرفنى نكون أصدقاء حقيقى بجد لانك انسانة محترمة للغاية وبيسعدنى وجودك جدا

فى اعتقادى الشخصى ان الراجل بسلبيته هو اللى بيخلى الست تشيل من مامته واخواته لانه مش بيحاول يهدى بينهم او يوفق فى وجهات النظر لانه بسلبية شديدة بيريح دماغه ويكبر ويطنش فالدنيا فتتهاون

انا عملت زيك على فكرة
قررت انى اعمل صلة رحم بغض النظر عن آراء الآخرين وتصدقى لقيت انى صح وحسيت ان انا وهما مبسوطين جدا

وباحرص جدا على كده علشان ابنى كمان
من يصل رحمه يصله الله برحمته

تحياتى يا احلى كلمات
هبة

جيفارا المصري said...

في زمن المادة البشع اللي احنا عايشينه وفي زمن التدين المظهري او البعد الكامل عن طريق ربنا طبيعي جدا انننا نفقدمعني صلة الرحم وتغيب عنا معاني جميلة زي الأخوة و احترام الكبار

في معظم اللي قولتيه الدور الأكبر بيقع علي الرجل اللي هو الأبن الخطيب او الزوج او ابن الزوج
طول ماهو بيتعامل بمعاني الرجولة الحقيقية ...بالتأكيد هيقدر يوازن اموره و هتستقيم حياته بصورة جيدة

مودتي

منى said...

كلمات الجميله
مفيش بوست جديد ليه؟؟؟؟؟؟
لعل المانع خير
تحياتى

klmat said...

lumi
اهلا بك ياقمر واحشنى جدا . انا متفقه معاكى تماما التربيه والتعود اساسى ياريت يكون فى حب وتسامح اكتر
ربنا يهدينا جميعا
نورتينى وربنا يخلى لك اولادك وكل اسرتك وحبايبك وتشوفيهم
فى احسن حال ويحقق كل امانيكى يارب
خالص حبى وتقديرى

klmat said...

walaa
اهلا بك ياقمر وماشاء الله عليكى .الصبر جميل وبحسن معاملتك بتكسبى بس احيانا
فعلا فى ناس مافيش فايده فيها موجودين
لو لاقدر الله حد صادفهم وقرر انه يبعد شويه مافيش مانع بس مش قطيعه ممكن يقلل من اللقاءات ويسيب الطرف التانى على علاقه طيبه باهله
ربنا يخللى لك بنتك وتفرحى بهاوتشوفيها
زى ماتتمنى واكتر واللى مامتها زيك لازم تكون رائعه . تعليقك جميل اشكرك جدا عليه وماتحرميش منك ابدا
خالص حبى وتقديرى

klmat said...

l3lhakhair
اهلا بكى كلامك مضبوط وحكيم جدا
ربنا يكرمك ويسعدك ودايما نتبادل الاراء
خالص حبى وتقديرى

klmat said...

abo 7anf
وعليكم السلام ورحمه الله وبركاته
اهلا بك ومعاك حق تماما المفروض
كل بيت له خصوصياته ولاداعى لحكايه
المشاكل للاهل
سعدت جدا برأيك ربنا يوفقك ويسعدك
خالص تحياتى وتقديرى

klmat said...

هيثم الدهشان
اهلا بك لاول مره ويارب تتكرر . انامعاك
فى رأيك . سعدت بتعليقك
خالص تحياتى وتقديرى

klmat said...

asftle7b
اهلا بك منوره . شوفى فى ناس الايام بتعلمها والاختلاط فتبدأ تفكر وتعيد حسابتها وتغير من طريقتها وفى ناس لا الايام ولا النصيحه بتفيدها مبرمجين على
نمط معين ومنهم اللى مبرمج على عداء عيله
شريكه هو اتربى على كده . ربنا يهدينا جميعا . بحب اوى اعرف رأيك وياريت دايما نتبادل الاراء
خالص تحياتى وتقديرى

klmat said...

منى
اهلا بك ازيك يارب تكونى بخير .انا كويسه
الحمد لله وماشاء الله على مامتك ربنا يخليها
لك . التربيه عامل اساسى فى الموضوع ده
انا امى ست طيبه ومتسامحه وبتحب اهل والدى ولكن حماتها جدتى يعنى كانت طيبه لكن لها كلام ناشف بس كلامهاده حتى مع اولادها فكانت امى تبعد حتى لاتسمع مايؤذى
مشاعرها جدتى بتحبها بس هو طباع مختلفه
لما كبرت وازنت وبقيت اعذر جدتى لانها ست
كبيره وده اسلوبها لاتقصد اذيه بس
مش اى حد بيقدر يستحمل المهم نحاول
بحب اعرف رايك اوى ربنا يخليكى ويسعدك يارب خالص حبى وتقديرى

klmat said...

اخى العزيز ابو خالد
اهلا بك معرف سعدت جدا جدا
لافتتاح مدونتك ان شاء الله تكون جميله وناجحه لنك شخصيه محترمه وودوده
ربنا يوفقك فى كل خطوه تخطوها
خالص تحياتى وتقديرى

klmat said...

salwa
اهلا بك منورانى وانتى عارفه قد ايه
بيهمنى رأيك وكلامك مضبوط تما ما
ربنا يهدينا جميعا وينور بصيرتنا
ويسعدك ويكرمك يااارب
خالص حبى وتقديرى

klmat said...

monaliza
اهلا بك منوره مدونتى وكلامك جميل
ياريت نعمل كلنا به اللى بيمشى
على هدى الدين بيرتاح
ربنا يهدينا جميعا ويجعلنا نفعل ما امرنا به رأيك بيهمنى اوى
ربنا يكرمك ويسعدك
خالص حبى وتقديرى

klmat said...

اميره الصعيد
اهلا بك يااميره كلاكيت اول مره خطوه
عزيزه ياريت تتكرر . عارفه مش فى الصعيد بس
انا شايفه ان الموضوع موجود حتى فى البلاد
الاجنبيه من فتره شفت فيلم اجنبى كان
عن العلاقه بين الزوجه والحماه وصلت
لدرجه الضرب . ربنا يهدى
انا سعيده جدا بزيارتك ومدونتك جميله
وان شاء الله دايمانتبادل الاراء
ربنا يسعدك ويكرمك
خالص تحياتى وتقديرى

klmat said...

mazlomeen
اهلا بك . انا معاك المفروض ان العيلتين
بقوا عيله واحده لكن الواقع غير كده
ربنا يهدى . سعدت لمرورك واتمنى ان
تتكرر . ربنا يوفقك ويكرمك
خالص تحياتى وتقديرى

klmat said...

momken
اهلا اهلا بك . ازيك يارب تكون بخير
انا معاك تمام فى رأيك . عارف
المفروض ان العيلتين بقوا عيله واحده
وكل طرف يحاول يقرب مش يبعد ويقارن
ربنا يهدينا جميعا . اشكرك جدا على كلامك الجميل. سعدت جدا بتعليقك
ربنا يكرمك ويوفقك ياااارب
خالص تحياتى وتقديرى

klmat said...

mohand
اهلا بك علم وتم التنفيذ .دى حاجه تشرفنى
احييك من قلبى على مواضيعك
خالص تحياتى وتقديرى

klmat said...

mostafarayan
اهلا بك ومرحب اول زياره ويارب مش اخر
واحده رايك مضبوط وانا معاك
نورت مدونتى و مدونتك جميله
تمنياتى لك بكل توفيق
خالص تحياتى وتقديرى

klmat said...

appy
انتى اللى حلوه وقمر واشكرك على كلامك
وربنا يهدينا جميعا
خالص حبى وتقديرى

klmat said...

shiry
اهلا بك ومرحب ده انتى وتعليقك اللى
عسوله ربنا يخليكى فى الغالب كل واحد بيشوف اهله مافيش بعد كده بس نعطى
فرصه لبعض نكون عيله واحده
ربنا يكرمك ويسعدك ويسعدنى اننا نتبادل وجهات نظرنا
خالص حبى وتقديرى

klmat said...

doba
اهلا بك ياهبه منوره انا كمان يسعدنى
اوى صداقتك ومن مدونتك حاسه ان فى كتير
اوى من طباعك وارائك قريب منى

جميل ما فعلتى اعلاقه الطيبه بالعيله
بتدى طمأنينه وسعاده ورضا ربنا

معاكى تماما الرجل لما بيكبر دماغه او
يحكى كل حاجه لأهله هو ممكن يغفر لزوجته بعد كده اى هفوه لكن الأهل
مش بنفس السهوله الله ينور
ربنا يخليكى ليا ويخليلك يوسف ووالده
ويديم المحبه يااااااارب
خالص حبى وتقديرى

klmat said...

جيفارا المصرى
اهلا بك سعيده جدا بزيارتك الاولى واتمنى ان نتبادل الزيارات وسعيده جدا برأيك لأنه صريح وواقعى فعلا الرجل
عليه دور كبير جدا فى الموضوع ده ولما كلنا نتبع تعليمات دينا الدنيا حاتبقى اجمل بكتير
تسلم يارب
خالص تحياتى وتقديرى

klmat said...

اختى الحبيبه منى
ازيك يارب تكونى بخير . انا تمام الحمد لله
بعتذر عن التاخير كنت مشغوله شويه
مابين الشغل وبعض الواجبات الاجتماعيه
تسلمى يارب متحرميش منك ابدا
خالص حبى وتقديرى

رئـــــيسـة حزب الأحلام said...

الزواج نعمة كبيرة ولكن تحيطها كثير من النقمات الت تحول الزواج الى تعاسة محققة وبما انى لم اجرب نعمة
الزواج
فتحياتى لكى وشكرى العميق للموضوع الحيوى

klmat said...

رئيسه حزب الاحلام
اهلا بك . فعلا الزواج نعمه كبيره وفيه سعاده بس بشرط يكون الاختيار صح وفى توافق بعد كده كل الامور قابله للعلاج
سعيده جدا بزيارتك واتمنى دايما نزور بعض
ربنا يسعدك وتكون حياتك كلها جميله وسعيده
خالص حبى وتقديرى

Anonymous said...

كلمات العزيزة

دعوت لك فى الكعبة بأن يصلح لك الحال .. ويرزقك من أوسع الأبواب .. ويحفظك من كل شرّ انت والأسرة جميعا

اللهم تقبل دعاء

rovy said...

السلام عليكم ورحمة الله وبركاته
اول مره ازورك .. سعيده بمعرفتى لمدونتك اللى بتدل على شخصيه واعيه ومثقفه .. حقيقى نظرتك للامور عجبتنى قوى .. وفقك الله وجزاك خيرا .
تقبلى مرورى ولكى خالص تقديرى
تحياتى
rovy

ammola said...

معلش أتأخرت عليكى
سبحان الله..الموضوع كله بيتلخص فى كلمة واحدة أننا نحب للاخرين ما نحب لانفسنا
بس حاقولك أيه؟ موال الحموات ده شغال من قديييييييم الازل وباينه مش بيخلص
تحياتى ومودتى

klmat said...

sherif عزيزى
اهلا بك والف حمد وشكر على سلامتك
وربنا يحقق كل دعواتك وعمره مقبوله بأذن الله . واشكرك جدا جدا على دعاءك لى
ربنا يبارك فيك ويرضا عنك ويسعدك
انت واسرتك وكل حبايبك
عميق تحياتى

klmat said...

ammola
اهلا بك انتى تشرفى فى اى وقت . فى كل امور الدنيا يجب ان نحب لغيرنا ما نحبه لأنفسنا
معاكى حق بس المواضيع اللى فيها صله
رحم وبتأثر على العلاقات الاسريه
محتاجه حرص اوى
سعدت بتعليقك ربنا يكرمك ويسعدك
خالص تحياتى وحبى

الربان said...

تحياتي

الموضوع جميل...و مطلوب من الكل ان يقرأ بتمعن...ثم نحاول التطبيق...
مثل ما قلتي حضرتك...لماذا لا نكون عائلة واحدة كبيرة, و نتجمع سويا في
المناسبات لتوطيد عري المحبة...

و الله لو صلحت النوايا و النفوس لانصلح
الكثير من احوالنا...
نسال الله للجميع المعافاة الدائمة في
الدين و الدنيا و الاخرة.


تحياتي و تقديري

klmat said...

عزيزى الربان
اهلا بحضرتك . احب اقولك انى بعتز
برأيك جدا لأن من مدونتك واضح مدى
ثقافه وتدين حضرتك وكتابتك كلها
معانى واهداف عميقه
ربنا يكرمك ويحفظك سعدت جدا بتعليقك
خالص تحياتى وتقديرى

truelove said...

اسفة قوي يا ايمرة على التاخير عليكي الفترة دي كلها بس والله كنت في دوامة في الشغل والبيت وحاجات فوق بعضها بس اول ماجت فرصة ادخل فوتك عليكي انتي وكام مدونة عزاز على قلبي وحشاني وبوستك ده كله انا معاكي فيه علشان كده انا بفضل الله عمري ما اشتكيت لخطيبي لا من امه ولا من اي شي لاني مؤمنة لو فتحت الشكوي هديله الفرصة انه كمان يشتكي وهنقعد لبعض على السقطة واللقطة زي ما بيقولوا تحياتي ليكي وسلامي

klmat said...

truelove
انتى واحشنى اكتلر وانا كمان مقصره
معاكى ومع حبايب كتير اعذرونى
ربنا يسعدك انتى وخطيبك ويتمم على خير
ويبعد عنكم كل المشاكل واللى بتعمليه
عين العقل. ربنا يديم المحبه والود
حقيقى فرحت اوى بزيارتك دى
وان شاء الله دايما
ربنا يوفقك يااارب
خالص حبى وتقديرى

جسر الى الحياة said...

طبعا اللى بتحب زوجها بجد تكرم امه وطول عمر امى تقولى اكسبى دعوة حماتك الطيبة بالخير وصدقينى يا مدام اميرة اللى يعرف فعلا فضل ربنا عليه يلاقى وجه من وجوه الخير زى وجود الحماة والحمد لله انا معنديش حما انا عندى ام تانية ام مخلفتنيش لكن انا باعتبرها امى وحتى فى عز خلافاتى مع زوجى واللى احيانا كتير بتبقى فى عيد الام ومعرفش ليه التوقيت دايما بيبقى كده لازم ابعت لها هديتها واكلمها لو مرحتش لظرف ماودائما ابنى الكبير هو مرسال عيد الام مع ان زوجى بيكبر دماغه من ناحية ماما بس انا عمرى ما فوتت مناسبة احاول اسعدها فيها ورغم كدة انا مقصرة جدا فى حقها وربنا يغفر لى تقصيرى
مهم اننا نؤكد على صلات الرحم فى زمن تلاشت فيه كل القيم بس زى ما رسولنا الكريم قال الخير فيا وفى امتى الى يوم الدين صدق رسول الله ص