Wednesday, April 16, 2008

بيتنا القديم

اماكن فى القلب
كنت ذاهبه لشراء بعض المستلزمات لبيتى ولقيت رجلى بتاخدنى ناحيه بيت والدى الله يرحمه .
البيت اللى اتربيت واتولدت فيه ونظرت لشقتنا الحبيبه واللى سكنها آخرون
بعد زواجى انا واخواتى ووفاه والدى
ولقيت نفسى بمشى ببطء وافتكرت طفولتى
وجيرانا الطيبين
وبناتهم اللى كنت بلعب معاهم بالعرايس واللى اصبحوا الآن امهات واولادهم شباب
نظرت الى المحل اللى تحت البيت فرأيت صاحبه اللى كان مفتول العضلات وشعره شديد السواد .
تحول الشعر الى ليفه بيضاء وانحنى ظهره .. شكله حسسنى قد ايه فات زمن طويل اوى ولم احس به
مر امامى شريط حياتى على طريقه فلاش باك الأفلام
ملئ بالذكريات المتنوعه فرح .. زعل ..اطمئنان ..قلق.. احداث كتيره
افتكرت لمتنا انا واخواتى حوالين امى لعمل كعك العيد
واعطاءنا قطعه عجينه نلهو بها حتى تتفرغ لعملها واصرارنا على وضعها لكى تخبز
وهى شديده السواد من كتر لعبنا بها.
لبس العيد الذى كنت اجده على سريرى اول ما اقوم من النوم وفرحتى به
زياره اعمامى وخالتى وفرحتنا بلمه العيله التى نادرا ماتحدث الأن
ايام المدرسه والجامعه وحلاوتها و الزهق منها احيانا..
فرحه النجاح والقلق قبلها خناقاتى مع اخواتى اثناء لعبنا

مرور الايام ولقاءات الانساب وترتيبات الزواج

صديقاتى وقعدات الدردشه وخروجاتنا للتمشيه على البحر .
كل الذكريات بدون ترتيب كانت فى رأسى وكأنى بقرأ تاريخ حياتى وبدايات كل الاشياء
كل ده اتحرك فيا بمجرد المرور من امام البيت. قد كده المرور السريع ده فكرنى بتاريخ طويل
مهما انتقلنا وذهبنا لبيوتنا الخاصه والتى ربما تكون ارقى واوسع
يظل البيت القديم له معزه وغلاوه
وطعم مميز لانه فيه جذورنا واغلى سنين عمرنا .

54 comments:

و القادم....أجمل said...

انا برضوو لاقيت رجلي بتاخدني هنا
هييييييييه
أول تعليق
هاجي تاني
بعد مقرأ

:)

و القادم....أجمل said...

السلام عليكم
أولا وحشاني جدا يا ميرو و الله
وحشااااااااااااااااااااني
اخبارك ايه يا جميل ؟؟
يارب دايما بخير

................

البوست روعه جدا
لأنه دا بحس بيه أوي لما افتكر بيتنا القديم
و كل ماجي أحلم أحلم بالبيت القديم
حنين غريب له
و تعلق شديد بالذكريات

تسلمي يا ميرو علي البوست
لأنه بجد بيحرك مشاعر جميلة
و حنين للماضي بكل ما فيه
من خير و حب و ترابط

احترامي و حبي و تقديري الشديد
ليكي يا قمر

:)

الجنوبى said...

يقول الامام الحسن البصرى
علامة الرشد ان تكون النفس الى وطنها مشتاقة والى مسقط راسها تواقة

تحياتى
عمرو

klmat said...

حبيبتى ولاء
واحشنى جدا . تصدقى واللهى انتى فى بالى
ومن امبارح وانا ناويه ازورك انتى
وفنان فقير وحشتونى اوى
بس انتى سباقه المدونات عند بعضها:)نورتى
المدونه يالولى انتى ازيك عامله ايه
انا الحمد لله بخير ده انتى اللى روعه
عارفه انتى قلتى حاجه مهمه جدا بالنسبه
لى انا معظم احلامى بتكون فى البيت القديم
الحنين لأيامنا الأولى
مش عارفه اقولك ايه على كلامك الجميل
ربنا يخليكى ويكرمك ويحقق كل ما تتمنيه يااااااارب
خالص حبى وتقديرى

klmat said...

انسان بلا عنوان
اهلا بك ياعمرو .واللهى انا مشتاقه
وتواقه يعنى اشكرك
جدا على التعليق الجميل
خالص احترامى وتقديرى

Empress appy said...

كنت سميه الحنين للماضى

عارفه يمكن انا علشان مستقله شويه بنفسى ففعلا بحس الاحساس ده ساعات كتير
انتى على فكرة رقيقه جدا

Anonymous said...

أنتظرت هذا البوست طويلا أختى العزيزة
أميرة و انتظرت ردك على تعليقى طويلا و حزنت لانقطاعك كل تلك المدة و لكن بيتنا القديم أعاد لى سكينة النفس بعد اضطرابها
أميرة الفاضلة
أرجوك ادعو لها من قلبك فالحالة فى تدهور سريع
و أشكرك على الأهتمام
أبو خالد

klmat said...

والقادم .. اجمل
حبيبتى ولاء حاولت اعلق عندك
ماعرفتش ولو انى مش عارفه محمد
بس ربنا يفرحه ويفرح كل حبايبك
جميل اوى اننا نفرح لبعض
دعوات كتيره بكل الخير
انا نغسى اطمئن على الجميله ماعلينا
مش باينه يارب يكون خير
تحياتى وحبى واحتراماتى

klmat said...

appy
اهلا بك . ده انتى الرقه نفسها
ربنا يخليكى سميه زى ماانتى عايزه
هو البيت القديم رمز للحنين للماضى
عارفه كان قلبى بيدق بصوت عالى وانا جنبه
فكرتكم بالذى مضى
خالص حبى وتقديرى

klmat said...

اخى العزيز ابوخالد
اهلا بك واشكرك جدا على مشاعرك
الطيبه واعتذر عن التاخير فى الرد
عليك وعلى كل اصدقائى معلش اعذرنى

ربنا يشفيها ويقويهاويعدى
الأزمه دى على خير يارب
ياااارب
هى وكل مريض ويعطيك الصحه والعافيه
والطمأنينه وراحه البال
خالص تحياتى وتقديرى

shaimaa samir said...

لو لم تشعرى بهذا
لن يكونلكلمة
الحنين
والذكريات
معنى

شعور خصب
جزاكى الله خيراااا

mohand said...

ما احلي الماضي بكل ما فيه من فرح واحزان


حين نتذكر الماضي نشعر بالاطمئنان فنحن نعلم ما حدث فيه ولذلك نطمئن له

اما المستقبل فانه شئ مبهم يجعلنا نخشاه

ياه
عارفه انا عشت في اكتر من 10 بيوت حتي الان

تنقلنا كتير كانت لظروف والدي

لكن كل بيت فيهم له ذكري وكل ذكري تحمل شئ تعلمته

فكرتيني باللذي مضي

ربنا يباركلك في عمرك وبيتك الجديد

http://kasperb4.blogspot.com/ said...

انا بيجيلي دايما الشعور ده وانا ماشي جمب مدرستي الثانوية
هي كانت ايام ما يعلم بيها الا ربنا صحيح
بس بردو الواحد بيتمنى ترجع تاني واعيش كل اللحظات اللي معرفتش اعيشها ومكنتش فاهمها ساعتها كويس

دمتِ بخير

la3lahakhier said...

نحن بالاماكن القديم ندوم
ومنها كنا

سمراء said...

كلمات
دة احساس جميل اقدره رغم اني عمري ما عشته
التاريخ
الجذور
اغلي سنين
انتقلت من مكان لمكان
من بيت لبيت
بين مجموعات مختلفة من البشر
لم اكن احظي بفترة تربطني بالاماكن
كان لهذا مساوء فلم اعد ارتبط بالاشياء
وكانت له ايجابيات فاستطيع اليوم ان احيا في اي مكان واقيم علاقات مع مختلف الناس

استمتع بقراءة موضوعاتك
اسعد بمرورك الدائم
وتعليقاتك القيمة
سمراء

و القادم....أجمل said...

معلش يا ميرو كنت قافلة التعليقات
دلوقتي فتحتها
:)
بس رجعت المدونة زي مكانت
:D

تعالوا زورونا
باي باي

;)
;)

منى said...

يااااه على رقتك يا اميره
يمكن انا مجربتش الاحساس ده
لانى ماغيرتش البيت اللى اتولد فيه
لكن متخيله احساسك اوى
ودقه القلب العاليه
والحنين
والذكريات
الانسان فعلا مجموع ذكرياته واحلامه
تحياتى يا قمر

انا مذنب said...

زكرياتك جميله قوي

الغريب ان الزكريات مش كلها زكريات حلوه في حياتنا ومع ذلك بتحب نحتفظ بيها جوانا قوي حلوه وحشه مره حتى مش مهم المهم كل واحد شايل جواه كنز ذكرياته جواه وقت وحدته يطلع منه صوره قديمه او كلمه سمعها من حد بيحبه او حتى خناقه عبيطه مع اخواته على لعبه عندهم يبص شويه للذكرى ويرجعها تاني بعد ما يتنهد ويفتكر ان الحياه عباره عن رصيدنا اللي حوشناه من ذكرياتنا
فكرة ايه هي الحاجه اللي بتصحي فينا ذكرى هي اللي بتختلف ممكن بيتنا القديم زي ما انتي حصلك
وممكن تقابلي حد كان زميلك او زميلتك في ابتدائي تشوفي ملامحه اتغيرت قوي لكن مع ذلك عرفتيه من اول نظره قلبك يخبط قوي مش علشان الشخص ده بالذات لكن علشان الوقت اللي بيفكرك بيه ممكن اصلا يكون كان زميل غلس مثلا لكن اشوفه افتكر كل اصحابي الطيبين اللي وقفوا معايا ضده اللي ساندوني في فترة معرفتي بيه
جميله قوي زكرياتك
ربنا يسعدك
لكي مني كل التحيه

المـــفـــــــقــــــــوعـــــة مــرارتـهــا said...

ياااااااااااااااااه

رجعتيني ببوستك ده لسنيييييين كتير وري
بجد كانت أحسن أيام
تحياتي للذكريات

Abo 7anf said...

السلام عليكم
كلمات
بصراحه مدونتك وافكارك هايله
مهو احسن حاجه الواحد يكون عندا زكريات قديمه
يلجئ ليها
وتقبلى مرورى

ولــــــــــو said...

والله كاني انا اللي رجعت بالزمن لورا
احلى احاسيس هي اللي بنعيشها ايام الطفولة
بتبقى اول مرة ف كل حاجه هي احلى مرة

بوست رائع وقمه ف الحلاوة

مدحت محمد said...

بيتنا القديم
تعرفى انا كنت بقعد عند تيتة الله يرحمها كتير جدا
وكنت كل لما اعدى من جنب البيت ابكى
لما افتكرها
المهم فكرتينى بموقف
كنت بلعب فى المدخل فى الاعدادى تقريبا راجل عجوز جار ستى بيقلى تدينى كام سنة قلتله معرفش
قاللى 70 سنة
ومش باين عليا سن لاننا فى زمانا مكناش شايلين الهم وكان الاكل بخيره
انا بشفق على جيلكم
المهم من كام اسبوع
كنت معدى جنب بيت ستى ببص
لاقيت الراجل ده واقف فى البلكونة
قلت ياسبحان الله

دنيتى الجميله said...

السلام عليكم يا اميره
ازيك عمله ايه
بوست رائع وجميل جدا
عارفه طبعا ان الكل قالك كده
بس هى دى الحقيقه
انتى عارفه انا اتولد واتربيت فى مدينه صغيره ولما دخلت الجامعه واتجوزت عيشت فى المحافظه اى بلد اكبر واجمل واحسن
ولكنى دائما احن واشتاق لمدينتى الصغيره الجميله الهادئه اللى شفت فيها ايام من اجمل ذكريات حياتى
ولما بسافر وازور اهلى هناك بدور على كل شارع وحته ممكن اكون مشيت فيها قبل كده مكان المدرسه مكان سكن اصدقائى كل حته تفكرنى بالماضى
كل ده وانا بقرأ البوست تذكرته واشتقت ليه اكتر
دمتى بكل سعاده وحب

Coca said...

تصدقي انتي لما حكيتي انا كمان افتكرت حاجات عدت وفاتت

ليها معايا ذكرياتي وفي قلبي حنين ليها

اسلوب رقيق جدا حقيقي

تحياتي

klmat said...

shimaa samir
اهلا بك ياشيماء هو فعلا شعور
بالحنين اغلى مايملك الأنسان فى رأيي هو
الذكريات . اتمنى ان نتيبادل دايما الأراء
خالص حبى وتقديرى

klmat said...

mohand
ازيك يامهند عامل ايه يارب تكون
بخير . تحليلك مضبوط الماضى عدا بس ذكرياته لسه عايشه جوانا وحته من تاريخنا علشان كده بتكون غاليه علينا
سعدت جدا بتعليقك تسلم ايدك
خالص تحياتى وتقديرى

klmat said...

الام وامال
فى حاجات كتيره ماكناش فاهمنها واحنا
صغيرين ومن الصعب او من المستحيل ترجع
الأيام تانى علشان كده بنحن اليها
باين عليك كنت شقى اوى ايام سنوى
ربنا يكرمك ويوفقك
خالص تحياتى وتقديرى

klmat said...

l3lahakhair
معاكى حق . خالص حبى وتقديرى

klmat said...

سمراء
اهلا بك بتنورى مدونتى بظهورك
كل حاجه لها ايجابيتها وسلبياتها
جميل انك تقدرى تتكيفى مع الجديد بسرعه
اشكرك جدا على كلامك الجميل ده من ذوقك
ورقتك .. تمنياتى لك بكل الحب والتوفيق
خالص حبى وتقديرى

klmat said...

القادم اجمل
اهلا بكى ياقمر
جميله اوى تعالو زورونا
غالى والطلب رخيص
ربنا يكرمك ويسعدك مدونتك
جميله برائحه النعناع
علم وينفذ وجرى على النعناع
خالص حبى وتقديرى

klmat said...

انا مذنب
اهلا بك . وسعيده بزيارتك مدونتك
لها طابع خاص بطعم مختلف
انت قلت تعبير عجبنى فعلا ذكرياتنا هى الكنز الحقيقى الذى نملكه والذى لايملكه سوانا . ممكن حاجات كتيره تفكرنا بذكرياتنا سواء حلوه او مش كده
ممكن اغنيه او كلمه لها مدلول خاص
معاك حق . سعدت جدا بتعليقك
واشكرك جدا على دعواتك ربنا يكرمك ويوفقك
خالص احترامى وتقديرى

klmat said...

مفقوعه مرارتى
اهلا بكى ياسوسو والف سلامه
هلى مرارتك فكرتك بالذى مضى
يارب اللى جاى يكون اجمل
خالص حبلى وتقديرى

klmat said...

abo 7anf
اهلا بك . ربنا يخليك على الكلام اللى بيرفع المعنويات ده . تيجى ايه جنب مدونك
اللى كلها عذوبه . ربنا يكرمك ويوفقك يااااارب
خالص احترامى وتقديرى

klmat said...

whispers just for a night
ربنا يبارك فيك ويجازيك كل خير
وياريت كلنا نحاول ندافع عن اسلامنا بطريقه متحضره كده وبالسلوك
خالص احترامى وتقديرى

ولد مصري said...

أول زيارة

مش عارف ليه حسيت بهدوء غريب وعيني ماشية على الكلمات لدرجة إن كبس عليّ النوم

على فكرة عشان ماتفهمنيش غلط أنا مدب شوية في كلامي بس والله ما أقصد غير إني حسيت بسكينة وهدوء وده غالبا من تأثير الذكريات

نتمنى نشوفك عندنا في يوميات وهمسات وعباد الرحمن

تحياتي

klmat said...

ولو
اهلا بك ياحاتم نورت مدونتى بجد
القمه فى الحلاوه تعليقك
فكرتك بالذى مضى ها ..ههها
على رأى مارى منيب
ميرسى لك وربنا يكتب لك كل اللى فيه الخير
خالص تحياتى وتقديرى

ammola said...

يا أحلى كلمات
وعاملة أحلى البوستات
موضوع الحنين ده ممكن يخلينى اتفتح فى العياط لما تلاقى مدونتك بقت البحر المتوسط..خلينى ساكتة كده الله يخليكى
الحنين للاماكن والناس واللمة وكل تفصيلة حتى لو كانت منمنمة بس الذاكرة شبطانة فيها أوى
أيييييييه...الله يسامحك
ده انا بحاول أهرب بالعافية علشان لما بادخل نفق الذكريات بتاعى دايما الاتجاه بيكون"وان واى" ياللا وما الانسان الا مجموعة ذكريات
:)
شفتى الحكم بتاعتى

klmat said...

مدحت محمد
ربنا يبارك فيك وتعيش وتفتكر
جدتك وتترحم عليها ويديك طول العمر
والرجل الكبير اللى فى 70 ده ايام
الخير كله يعنى ممكن يلعب فى المنتخب
حابلغ حسن شحاته
ربنا يوفقك ويديك الصحه بسعد جدا بمروروك خالص تحياتى وتقديرى

klmat said...

دنيتى الجميله
انتى الجميله ومدونتك ومشاعرك جميله
دايما ذكرياتنا الاوللا فى بدايه كل شىء
اول خطوه اول كلمه بتكون غاليه اوى
ربنا يجمعك دايما انتى وحبايبك على خير
ومش عارفه اقولك ايه على كلامك الجميل
ربنا يخليكى ياحبيبتى
خالص حبى وتقديرى

klmat said...

coca
اهلا بك اول زياره ويارب تتكر ونتبادل الأراء . يارب اكون فكرتك بحاجات حلوه
سعدت جدا بمرورك ربنا يكرمك
خالص حبى وتقديرى

klmat said...

walld masry
اهلا بك اول مره ويارب ماتكونيش
الأخيره . اقولك اول ماتحتاج السكينه والهدوء تعالى عندنا حاتغمض عينك
مش زى التانيين مش ممكن تغمض عينيك
شرفتنى خالص تحياتى

klmat said...

ammola
اهلا بكى ياجميله لأ والنبى بلاش عياط
ماكنش قصدى بس عارفه ماخبيش عليكى
انا وانا بكتب البوست ده فعلا عيطت
ومن قلبى لانى افتكرت ابويا الله يرحمه
بشدته وحنيته بس الا انتى حاتخليها
البحر الابيض وانا البحر الاحمر
واللى عايز نهر النيل يتفضل
ربنا مايجيب دموع ويارب اللى جاى
يكون اجمل بكتير ربنا يسعدك ويحقق
كل امانيكى وتكون حياتك بمبى
خالص حبى وتقديرى

موناليزا said...

معاكى حق
وما اجمل الذكريات واحنين لحضننا القديم

walaa said...

كلامك ده فكرنى بيبت الشعر اللى بيقول

نقي فؤادك حيث شئت من الهوى ماالحب إلا للحبيب الأول
كم من منزل في الأرض يألفه الفتى وحنينه أبدا لأول منزل
وفعلا البيت هو اول بيت نشأنا وترعرنا فيه وفيه اجمل زكريات حياتنا عارفه يا اميره انا بقالى 4سنين متزوجه
اكيد مريت بذكريات حلوه
بس والله عمرى ما حسيت بفرحة ولا ذكريات بيت بابا
ودايما بنحن للبيت وبنروح نقعد نفتكر الذكريات الجميله
تحياتى للبوست الجميل ده
ولاء

klmat said...

monaliza
اهلا بك دايما متفقين فى الاراء
ربنا يكرمك ويسعدك
خالص حبى وتقديرى

klmat said...

walaa
اهلا بك يالولى . بيت الشعر معبر
جدا وربنا يسعدك والأيام اللى جايه تكون
اجمل . عارفه دايما البيت اللى نشأنا
فيه له غلاوه خاصه اول ما العين فتحت
على حب الام والاب وكل انواع الحب الاول
ربنا يسعدك ياااااارب
خالص حبى وتقديرى

الجنوبى said...

تعالى خدى التاج بتاعك من عندى

رئـــــيسـة حزب الأحلام said...

الموقف دة حصلى لما عديت جنب البيت القديم وكان لينا ذكريات جميلة اوى فيه تحياتى

Unknown said...

يااااا
العودة اللي الماضي فلاش باك سريع
في وقت اسرع
تصويرك هايل اخدتيني معاكي في الشارع
ولمة اخواتك حولين مامتك
لدرجة اني تخيلت الهدوم بتاعت العيد وانت صاحية ولاقتيها علي السرير
الناس بتاعت زمان كانت حنونة وطيبة
والام كانت زمان ام والاب كان زمان اب دلوقتي محدش بقي فاضي لحد
كلنا بقينا ملهين في حاجات ابعد ما تكون عن الانسانية والمشاعر الرقيقة
اسفة لتاخيري عن زيارتك بس انا والله الايام دي طالع عيني في الابحاث والامتحانات
ارجو ان تتقبلي اعتذاري وتسامحيني وتكوني منستنيش
سلام

klmat said...

انسان بلا عنوان
اهلا ياعمرو منور مدونتى
واشكرك جدا على التاج الجميل
خالص تحياتى وتقديرى

klmat said...

رئيسه حزب الاحلام
اهلا بك منوره مدونتى
وعقبال مانشوف الحزب بتاعك
مكسر الدنيا
نورتتينى
خالص حبى وتقديرى

klmat said...

my hopes
اهلا بك ياقمر طبعا عذرك معاكى وان
شاء الله بالنجاح الباهر
دايما بنحن للى فات فيه ذكريات جميله
وكان فيه دفء فى العلاقات معاكى حق
اشكرك على كلامك الجميل
وربنا ينجحك ويوفقك ويسعدك يااااارب
خالص حبى وتقديرى

Mo3Az said...

:)
فعلا استرجاع الذكريات بيبقى شىء جميل
حتى لو كانت صعبه ، يتذكرها الانسان بحنين غريب

وياسلام باه لما يكون فى موقف عبيط ، نقعد نضحك على نفسنا اوى
ونقول يااااااااااه

دوام الحال من المحال
جميل كلامك يا فندم ما شاء الله
(F)

klmat said...

mo3az
اهلا بك منور المدونه حقيقى. ربنا يكرمك
ويسعدك وتكون كل ايامك جميله
تعليقك بيسعدنى جدا وانا متفقه معاك فى رأيك تماما
خالص تحياتى وتقديرى