Monday, October 20, 2008

السر

The secret

تحديث
بكره بأذن الله حلقه اوبرا عن كتاب السر اتمنى تشوفها

من فتره كنت بتفرج فى التليفزيون على برنامج اوبرا وكانت بترشح كتاب اسمه السر للقرأه واتعمل فيلم وحقق نجاح مذهل
الكتاب بيقول ان هناك سر يخلينا نحقق احلامنا بسهوله فالفقير ممكن ان يصبح غنيا والفاشل ممكن ينجح والمريض ممكن ان يشفى حاجه كده زى الفانوس السحرى وان الوصفه مفعولها اكيد بالضبط زى ماتكون بتخنار سلعه من كتالوج وطلباتك كلها مجابه .
" طبعا كله بأذن الله. "
حلقات اوبرا اللى بتتعرض عندنا بتكون قديمه المهم ان الكتاب ده حقق نسبه عاليه جدا من المبيعات بعد اذاعه البرنامج وتهافت عليه الجميع من شتى انحاء العالم وتم ترجمته للعديد من اللغات ومنها العربيه قلت اشتريه
ذهبت الى دار الشروق لقيت ثمنه 105 جنيها للنسخه العربى والنسخه الانجليزيه ب 130 جنيها الحمد لله انى لم اشتريه لأن ابنى قاللى ممكن تنزليه من النت وحصل حاكتب لكم الويب للى يحب يقرأه .
الكتاب بيقول باختصار ان سر السعاده وتحقيق الاحلام هو قانون الجذب . على ان الشبيهه يجذب شبيهه وان للأفكار قوه مغناطيسيه كما ان لها تردد وعندما تفكر يتم ارسال افكارنا الى الكون وتجذب اليها مغناطيسيا كل الافكار الشبيهه والتى على نفس التردد فمن يفكر فى الحب ويتمناه سيجذب له الحب ومن يحب المال ويتمناه سيصل اليه ومن سيفكر فى اشياء سلبيه سيجلبها لنفسه
بقوه وتدبير الكون المسخر لكل منا وهكذا ..
وان كل شىء يرسل للخارج يعود علينا وعلى فكره الايمان بأن الدنيا بما فيها مخلوقه لنا لكى ننعم بها وان بها وفره من كل شىء وتكفى الجميع وكل مرض مهما كان عضال له شفاء . الكتاب يحتوى على عده فصول عن الحب والمال والصحه الزواج...
السر انك تكون على يقين ان الدنيا دى اتخلقت لك والكون مسخر لكى يعطيك ماتريد زى مصباح علاء الدين
مثال : واحد مش غنى وعايز يكون غنى عليه ان يكون على
يقين ان رغبته فى الغنى ستتحقق ويتخيل مدى سعادته ويشترى مايرغب فيه ولا يقطر على نفسه ويعيش الحاله كأنها حدثت سيشعر بسعاده غامره وبهجه ويطرد اى احساس سلبى ويترك الباقى سيسخر الكون وتحدث قوى الجذب هذه لتحقق رغبته لاتسأل كيف ومتى كل الامور ستتيسر وستتحقق الأمنيه بفعل قوه الجذب
على ان تكون الرغبه قويه والايمان بانها ستتحقق حتى تضبط درجه تردد الرغبه مع درجه تردد الكون
وسرد الكتاب اسامى لمشاهير اغنياء سبب غناهم هذه الطريقه
اما من يفكر بطريقه سلبيه فسيجذب له امور سلبيه فالذى يخاف من الفقر ويقطر سبزداد فقرا وسيجلب الفقر لديه وهكذا . وهذا ما يتردد فى امثالنا الشعبيه المليئه بالحكمه اللى يخاف من العفريت يطلع له .
كما في الكتاب امثله حقيقيه عديده لحالات مختلفه مثل مريض بمرض صعب لديه يقين بالشفاء وتم الشفاء بالفعل عن طريق
يقينه وفرحته بتخيل الشفاء تدخل عليه البهجه والسعاده ويروى في الكتاب المريض بنفسه ماحدث تذكرت مريم نور وكيفيه شفاءها من ورم فى رأسها اصابها وهى قى الثلاثين من عمرها وهى حاليا فوق ال 70 ربيع وماشاء الله عليها نفس الفكره فهة تؤمن بقوه الطبيعه
واحده عايزه تتجوز تخيلت العريس المثالى وافسحت مكان فى دولابها لملابسه وعاشت الخيال وكأنه حفيقه وبالفعل تقدم العريس المنشود . "انا اؤمن بالقوه الخفيه والاشارات السماويه وان حسن الظن بالله بيحقق المنشود "

روح التفاؤل والأمل والشعور با البهجه نتيحه تقمصنا حاله تحقيق الهدف المنشود تساعدنا للوصول اليه والثقه بالنفس وفى الله هى كلها اشياء ايجابيه لم لا نحاول ان نفعل
الكتاب اثر فيا بالايجاب وشجعنى للرجوع للكتابه
وانا منهمكه فى القرأه عند النقطه دى رن التليفون وكانت صديقه ليا ونظرا لتأثرى بالموضوع قلت اقول لها
على الكتاب وموضوع السر ضحكت ضحكه جميله اوى وقالت لى
اميره فكرتينى بفيلم لعيد المنعم مدبولى بيقول فيه انا "مش طويل واهبل انا قصير اوزعا "ضحكتنى من قلبى
بردوا من عوامل الوصول للهدف كما فى الكتاب الضخك
السر بيشترط ان نمتن بما لدينا ونحمد الله "لئن شكرتم لأزيدنكم " وحسن الظن بالله وده موجود فى دينا
مش حانخسر حاجه لو قرأنا ونحاول نطبق ولنبدأ بطلب صغير على ان يكتب كل منا تجربته مع تمنياتى لكل من يقرأ ان تتحقق كل امانيه

http://www.4shared.com/file/59358382/23d3498e/___online.html?s=1

59 comments:

Anonymous said...

انا باحجز اول تعليق بس
حمد لله على السلامة يا أميرة
وحشتينا أوي

عمرو

osama said...

اللهم آمين ويحقق الجميع آمانيه ...
نعم الكون هو صدى الذات .. فذاتك هي كونك...
وحين تتسع لترى العالم جميلاً وتبتهج تسعى الاشياء لارضاءك..
لكن بصدق الامر يحتاج الى عزيمه كبيرة ويحتاج ايضا الى رفيق درب..


دمت بكل ود...
خالص تحياتي...

بس خلاص ... said...

اتبة اجمل كلمات احييك على هذا الموضوع الجميل ... وانا اعتقد ان هذا الموضوع قريب جدا من الحقيقة لان الانسان لن يكون الا ما اراد هو لنفسه وبتوفيق من المولى عز وجل ... ولقد قرأـ موضوع مشابه لذلك فى ان الانسان اذا اراد شيئا لابد ان يحققه بشئ من الاصرار والمثابرة ولقد لمست هذا فى تجارب شخصية كثيرة بالنسبة لى ... جزاكى الله كل الخير
ارجوان تقبلى مرورى .. وان لااكون ضيفة ثقيلة واستمتع برشاقة وجمال كلماتك

Sherif said...

عندك حق .. الاعتقاد فى الشئ يولد الارادة أيضا

جميل الموضوع وسأذهب للينك

My Hope$ said...

ميرووو حببتي


ازيك

وحشاني كتير
انا حاسة اني رخمة قوي


ناس كتير وحشتني ومقصرة في حقهم متزعليش مني


عجبني تحمسك لحاجة عجباكي
اوي

لدرجة انك تكتبي عنها
وتصدقي عندك حق

وياريت النظرية تنفع
اوعدك
هنفذها بقوة شديدة


ولما تتحقق
هقولك عليها


يلا
بحبك كل يوم اكتر من اليوم اللي كان قبلة
وكل سنة وانت بخير وطيبة وجميلة واحلي ماما في الدنيا

سلام

klmat said...

اهلا بك ياعمرو
نورت المدوته اشكرك جدا على التغليق وسعدت وشرفت بمرورك وبعلنك الفائزبالمركز الاول 5 حنيها
ربنا يوفقك

klmat said...

osamaالعزيز
اهلا بك .كل شىء فى الدنيا مختاج اراده
اتفق معاك. حقيقى سعدت بمرورك ورأيك
بيهمنى جداربنا يوفقك
عميق تحياتى

klmat said...

بس خلاص
اتقبل مرورك ده انتى نورتى المدونه بكلامك الجميل وتعليقك اللى اتفق معاكى تماما فيه ربنا يوفقك
شرفتينى

klmat said...

العزيز شريف
اهلا بك واتمنى ان الكتاب يعجبك
تعليقك اسعدنى
ربنا يوفقك
شكرا لك

يا مراكبي said...

أنا قريت ملخصلت للكتاب ده برضه

وبرغم من إن محتواه ليس له أساس علمي وبرغم من إنه كلام يبدو عليه بعض من عدم المنطق لكن أنا فكرت فيه ولقيته إلى حد كبير ممكن .. مش عايز أقولك إني كمان شفت حالات حقيقية كده

klmat said...

my hope$
ازيك انتى وحشتينى كتير انا كمان مقصره
انتى تيجى فى مدونتك الوقت اللى يريحك
كلامك جميل وانتى عمرك ماكنتى رخمه ده انتى كلك ذوق ورقه انا كمان بحبك من القلب للقلب رسول
تعليقك فكرنى باغنيه لمدحت صالح مش بتتذاع بس جميله اوى بتقول كلماتها
بحبك كل ماتطلع شمس بحبك بكره اكتر من امس
بحبك وانا بسمع الحان بحبك وانا بختار الوان حقيقى خطرت فى بالى
دمتى بحب وهنا

klmat said...

يامركبى
اهلا بك منور . فى حاجات مش بيكون لها اساس علمى او احنا مش عارفينه لكن بتصدق . عموما الأمل والبهجه والتفاؤل
كلها حاجات ايحابيه مش بتضر وبتدفع للأمام. جرب مين عارف
سعدت جدا بمرورك وانشاء الله دايما
ربنا يوفقك شرفتنى

سميرة said...

عزيزتي
اشكرك على كلماتك الرقيقة اثناء زيارتك لمدونتي المتواضعة
بالنسبة لموضوع البوست فطبعاً مهم جداً ، لازم نكون مؤمنين بإمكانياتنا وقدراتنا ونحارب علشان نوصل لاهدافنا ومن رأيي على قد طموحات الانسان هايوصل بإذن الله
اسفة للاطالة
دمتى بالخير دائماً

klmat said...

سميره
اهلا بك وانا اللى بشكرك وتعليقك فى محله
انتى ماطوليتش ولا حاجه طولى زى ماتحبى
دى مدونتك وكلامك ومدونتك جميله فعلا
ربنا يوفقك
شرفتينى

عايش علي الهامش said...

رغم اعتراضي علي فكرة تجاذب الافكار المتشابه وان من يريد المال يجذبه وان من يريد الحب يجذبه لان لو هذا النطق صحيح لكانت كل جوازات العالم ناجحه وكل شركة قايمه علي الشراكه لايمكن تخسر
لكن فكرة الامل في حد ذاته هو الشئ الجديد الامل انك قادر علي فعل شئ والايمان بذلك وقبلهما الثقه في رحمة الله ده الجديد
شكر لك

دكتور كسلان said...

السلام عليكم

اولا
انا سعيد جدا جدا ان حضرتك رجعتى للتدوين تانى
وحشتنى بوستاتك الجميلة

ثانيا
انا اسف عشان اتاخرت فى التعليق
انا كنت تعبان شوية ولما جيت اعلق النت فصل

بالنسبة للبوست

انا بحب النوعية دى من الكتب
بالرغم من اختلافى مع بعض افكارها
انا بعتبرها عامل حفاز لكل انسان انه يحسن من وضعه
سواء كان ماديا او عاطفيا او دينيا او رياضيا او اجتماعيا

واعتقد ان السر ده بينبع من داخل الانسان
ولازم يكون مبنى على نقطتين مهمين واساسين
هما التوكل على الله والاخذ بالاسباب
بالنسبة للنقطة الاولى وهى التوكل على الله
لازم نكون معتقدين تمام الاعتقاد ان كل شئ بيد الله
وحضرتك اشرتى للنقطة دى

بالنسبة للنقطة التانية وهى الاخد بالاسباب
اعتقد ان انها بنفس القدر من اهمية التوكل على الله
ودينا الحنيف بيامرنا بكده
وبيامرنا بعدم الركون والتواكل على الله

والكتاب اللى حضرتك قدمتيه هو مضمون الاخذ بالاسباب
بمعنى ان كل واحد فينا لازم يخطط لمستقبله
ويكون عنده الطموح والامل انه يكون احسن
واعتقد ان الاشارات السماوية او القوى الخفية اللى بيتضمنها الكتاب
هى عبارة عن نتايج ملموسة للتخطيط السليم والممنهج لحياتنا
ونتيجة طبيعية للسعى والرغبة فى التغير للاحسن وعدم الركون والتواكل

انا قريت كتاب اسمه 25 قصة نجاح
ذكر فيه الكاتب 25 قصة لمشاهير العالم واثريائه
وازاى كانوا لاشئ واصبحوا اصحاب شركات عالمية
وكان مضمون كل قصة هو الارادة والطموح والتخطيط السليم


لكن للاسف عندنا فى مصر معظم الناس متواكلين
ومعتقدين ان ده توكل وبيقولوا ربنا كتب علينا كده
هو صحيح ربنا مقدر لنا كل شئ
بس فين دورنا احنا

البوست جميل جدا وشيق
واسف ان طولت على حضرتك
سلاااااااااااااااااااااااااااااااااااااااااااااااااااااااااااااااام

klmat said...

عايش على الهامش
اهلا بك . الكتاب بيوضح انه مش بمجرد الرغبه فى الشىء يتم تحقيقه لأ . اول الخطوه ان الأنسان يمتن بما لديه فيقوم بحمد الله ثم يتمنى ويكون لديه ثقه فى تحقيق الامنيه ويدعو بها
فى صلاته ثم يتخيل بقوه انه حصل عليها ويعيش الحاله وكأن امنيته تحققت لاحظ انا كاتبه المضمون. الوضع يختلف لما تشوف الفيلم او البرنامج وتقرأ الكتاب
ومش حاتخسر حاجه لو تصفحت الكتاب اضعف شىء انك ستشعر بالبهجه والأمل وده فى حد ذاته جميل. اشكرك جدا على المرور واتمنى لك كل توفيق

Anonymous said...

بلوجر نور يا اميره
ربنا ميحرمناش منك ابدا

لاء راجعه ببوست حكايه
تعرفى فيه افكار هنا من زمان بتلف وتدور فى عقلى
ولما قلتها مره لوحده صاحبتى خافت معرفش ليه

بس وصلنى من البوست جزئيه كده ان احنا نعيش الحاله ونستمتع بالشعور اللى عايزينه حتى من قبل ما يحصل فعل
الافكار والقوى المغناطيسيه
ممكن الاحلام كمان بكون له القوه دى؟؟؟
يعنى نحلم حلم ونبعته لحد
او نكتشف ان احنا كلنا كنا بنحلم نفس الحلم سوا
تعرفى ده حصل معايا فعلا
بجد الموضوع مثير اوى
هحاول اقرى الكتاب
مرسىى اوى يا اميره عليه
تحياتى
منى
احاسيس

klmat said...

د/ كسلان
وعليكم السلام ورحمه الله وبركاته
اهلا اهلا بك وسلامتك الف سلامه انا كمان سعيده انى رجعت اكتب والسبب الكتاب وحلقه اوبرا. من وجهه نظرى الكتاب مش بيتعارض مع الأيمان بالله بالعكس هى زى بالضبط لما الواحد يدعى ويكون واثق ان ربنا بأذنه حايستجيب ولا يدعو الى الكسل انت حاتمارس عملك عادى بس حاتعيش حاله ان هدفك قد تحقق الكتاب مليان بأمثله حقيقيه وبصدف بتحدث تساعد على تحقيق الهدف بفعل الجاذبيه والله اعلم
الجميل فيه ان الشرط الأساسى البعد عن المشاعر السلبه والشعور با/تنان والحمد والبهجه بمالدينا وبما سيتحقق ويقينا انه سيتحقق بأذن الله طبعا . هو بيعمل تغيير فى النفسيه ويعطى امل ولا يغير الله مابقوم حى يغيروا ما بانفسهم ياريت تصفحه وعرف رأيك بعد القرأه ولو قدرت تشوف الفيلم يبقى عظيم
انت ماطوليتش انت اسعدتنى بتعليقك جدا ومتشكره جدا جدا على كلامك الجميل ده بس من ذوقك
عميق تحياتى

klmat said...

الحبيبه منى - احاسيس
واحشانى اوى انا اللى ميرسى على كلامك الجميل
الكتاب شيق ويستحق القرأه وبيبعث على البهجه والتفاؤل
اتمنى ان تقرأيه وتبتهجى ويارب يكون وسيله لتحقيق احلامك
بشكرك جدا وبحبك اوى
سلاااااااااااام

قوس قزح said...

انا شوفت السى دى لنفس الموضوع ده
و اعتقد ان هو لسه عندى
و لما اتفرجت عليه لاقيت ان اغلب الحاجات اللى بيقول الواحد مفروض يعملها هى نفس الحاجات تقربيا اللى مطلوبة من المسلم
و يمكن كان تركيزه اكتر على التفاءل الدائم
و وضع هدف معين للوصول له

ربنا يحقق لكى كل احلامك
تحياتى

Anonymous said...

7'alina wraky lma nshof a ely 7y7sl.

Sherif

klmat said...

قوس قزح
اهلا بك وسعيده بمرورك واتمنى ان الكتاب يعجبك
وربنا يحقق احلامنا جميعا ويكتب لنا مافيه الخير
ربنا يوفقك واشكرك جدا

klmat said...

sherif ,
اهلا بك حضرتك جاى متأخر .وكمان متحفز تشوف ايه اللى حا يحصل ان شاء الله كل خير وهنا طالما بنستعين بالله ومستبشرين خير كل اللى جاى حا يكون خير
سعدت بنعلبقك جدا جدا
ربنا يحقق احلامك ويكتب لك كل مافيه الخير
اشكرك جدا

NeRmeeN said...

السلام عليكم ورحمة الله

ازيك يا كلمات؟؟؟؟ دى اول زيارة تقريبا ليا فى مدونتك يا رب اكون ضيفة خفيفة:]

بالنسبة للكتاب..يا ريتنى كان عندى ابن عشان يقولى ماتنزليش تشتريه يا ماما اضربيه من النت و خلاص:)
لانى بصراحة لما سمعت كلام عنه ماكدبتش خبر ..ونزلت اشتريه من دار الشروق ب 105 جنيه:(( ..حاولت وقتها اجيبه من النت...بس كانت النسخة العربى مش متوفرة ....والنسخة الوحيدة المتوفرة ..كانت وحشة جدا...والصفح مقلوبة

المهم مع احترامى الشديد لكل اللى عجبهم الكتاب ...انا شايفة ان الكتاب عبى الهوا فى ازايز و بعها للناس

لانه مناقض لنفسه ..شوية يقول ان ده مايمنعش ان فى حاجة اسمها قدر..وشوية تانية يحسسك ..ان الكلام ده قانون زى قوانين الفيزياء و الكمياء لازم تتحقق اذا توافرت شروطها

طب اقولك على حاجة..وانا بقرا الكتاب ..حاولت اقنع نفسى بشوية حاجات فيه..وفعلا بقيت بفكر بشكل ايجابى ..وكنت فى يوم نازلة فيه ومقبلة على الحياة و كلى تفائل...وكل الافكار الايجابية تشع منى..ومع الاسف اليوم طلع ملغبط جدا جدا جدا
بصى عموما يمكن النقطة الايجابية اللى فى الكتاب انو بيدعو للتفائل..ودى حاجة كويس جدا ..ومتسقة مع المقولة بتاعة تفائلوا بالخير تجدوه

وكمان الرسول صلى الله عليه وسلم نهى عن التشاؤم و التطير..ولكن انا كل اللى برفضه ..انو يحول ان التفائل ده قاعدة
وان لازم طالما الواحد توقع ان الحاجة هتكون كويسة ..يبقى لازم تكون كويسة
اعتقد ان ده مش واقعى بالمرة...وكتير بنكون مخططين لحاجات و متافئلين بحاجات و بيحصل عكسها تماما

انما الكتاب دخل بقى فى منعطفات تانية خالص شايفاها قللت كتير من مصداقيته

زى اللى نفسها تقابل شريك حياتها..وبقت تتعامل على انه موجود ..وبتسيب مكان ليه فى السرير جنبها..والفقير اللى عايز يبقى غنى ويقدر يعمل كده بمجرد التفاؤل..كل ده بصراحة انا شايفاه مجرد مغازلة لعقول الناس ..عشان مبيعات الكتاب تكتر و ينتشر اكتر

لكن مع الاسف ماكنش حد غلب :(((

وما تشاؤن الا ان يشاء الله

واللى مكتوب لينا هو اللى هنشوفه
واذا كان حد حصل انه كان فقير وبقى غنى..يبقى هو كان قدره مكتوب انه يكون فقير ..وبعد كده يتعب و يشتغل لحد ما يكون غنى ..او تجيلوا فلوس ..ده شىء مكتوب

اسفة للتطويل ..وتقبلى مرورى:)

klmat said...

nermeen
اهلا بك سعيده بوجودك جدا وبرأيك المستنير
وان شاء الله نفرح بكى ويكون لك ابناء باريين. شوفى انا كتبت نبذه عن كتاب شدنىواثر فيا بالأيجاب وشايفه ان الواحد يكون على يقين ان كل اللى جاى خير كون ان اليوم مشى معاكى مش تمام رغم تفاؤلك لعلها رحمه عسى ان تكرهوا شيئا وهو خير لكم . بالطبع والمنطق انه قد تحدث امور لا نتوقعها ولا نرغبهابتكون مشيئه الله وكل شىء مكتوب دينا بيقول كده .فمثلا الكوارث الطبيعيه لا يد لنا فيها. لكن لا يتعارض مع مضمون الكتاب فيما يخص افكارنا . الاساس هو التفاؤل فرضا ان واحد بطبيعته متشائم وشايف ان مافيش فايده وشاء القدر ان يشوف الفيلم او قرا الكتاب فاصبح عنده امل واتغيرت نفسيته فتغير حاله الى الأفضل
ان الله لايغير مابقوم حتى يغيروا ما بانفسهم الكتاب بيدعو الى تغيير الأفكار والنفس وبيركز على كده مع العمل فممكن واحد يكون فاشل لانه مش بيحب عمله
ويحلم انه بيغير مجال عمله وتسيطر الفكره عليه فيغير المسار بأن يعمل مايحبه بتدبير من عند الله بتحصل. كتير منا يفكر فى شخص ما ويتمنى يقابله اذا بالتليفون يرن ويجده اويقابله .الكتاب اوضح انه لايوجد زمن معين لتحقيق الامنيه قد يكون التردد مختلف ما علينا ده كتاب له من اقتنع به ومن يرفضه يكفى متعه القرأه والعلم به. انا كنت حاشتريه لولا انه مغلف لا يمكن تصفحه خفت على 100 جنيهاالحمد لله
على فكره الصفحه المقلوبه ممكن تعديلهامن قائمه الادوات والخط الصغير بيكبر من الضغط على زائد وكنترول
حقيقى يانرمين سعيده بتعليقك جدا ومدونتك جميله حبيت اعلق على موضوع ناس من زمن فات لكن معرفتش حااحاول
اشكرك جدا ويارب تزورنى تانى وانا اللى طولت عليكى عميق تحياتى

Abo 7anf said...

السلام عليكم

حمدالله على السلامه
فينك من زمان

ورجعلنا بكتاب شكله جميل
ان شاء الله هنزله

دكتور كسلان said...

ازيك يا مدام اميرة

انا قلت لازم اعلق تانى
لان الموضوع فعلا يستحق

انا كلمت صاحبى فى الموضوع ده وقلتله ينزل الكتاب
هو احمد صاحب مدونةولاد النهاردة
ربنا يجازيه خير عشان هوانشط منى كتير ونزل الكتاب

المهم
الكتاب فى مجمله بيحيى فينا الايجابية
وبيدعونا للتحرك واستغلال طاقات او مواهب عندنا
بنكون غافلين عنها ومش واخدين بالنا منها

ولو انا استفدت من الفكرة دى
يبقى الكتاب رائع جدا
المهم الفكرة توصل ونحاول نغير من نفسنا بجد


كان ليا تعليق بسيط على كلام الاخت نيرمين بعد اذن حضرتك
انا معاها ان كل شئ مقدر لينا ومكتوب علينا هو اللى هيكون
والحمد لله كلنا مؤمنيين بكده اشد الايمان
بس مش معنى كده ان احنا نستنى قضاء ربنا ونقول ده مكتوب علينا
وممش معنى الرضا بقضاء الله والقناعة بما فى ايدينا
ان احنا نفضل قاعدين فى مكانا وما نتحركش او نسعى
كده نكون متواكلين

مفيش تناقض بين الايمان بالقدر والسعى للتغير

والكتاب ده بيدعونا للتغير ون احنا نكون ايجابيين اكتر
وحتى لو الكتاب فيه سلبيات
نسفيد احنا من ايجابياته

وبعدين مش شرط ان انا اقنع نفسى ان الشئ ده هيكون كويس
وللاسف ما يطلعش كويس
المهم ان انا حاولت ان الشئ ده يكون كويس

انا اسف يا اخت نيرمين اذا كنت علقت على كلامك من غير ما استاذنك
اصل الموضوع شدنى جامد



الموضوع جميل جدا يا مدام اميرة

سلااااااااااااااااااااااااااااااااااااااااااااااااااام

klmat said...

abo 7anf
وعليكم السلام ورحمه الله وبركاته
الله يسلمك ويارب تكون بخير والكتاب يعجبك
يستاهل القرأه
خالص تحياتى

klmat said...

د / كسلان
اهلا بك وسعيده جدا ياريت كل شويه تعلق دى حاجه تفرحنى اوى
شوف انا اتعمدت وانا بكتب البوست اشير الى صديقتى اللى رأيها مقوله مدبولى زى د/ نرمين ان الكتاب يعبأ الهوا فى ازايز ده رفع الروح المعنويه والشعور بالتفاؤل يكفى لكن وجهه نظر نحترمها لكل واحد قناعته والطبيعى ان تكون فى قناعات مختلفه ردى على نرمين لو قرأته للآخر مضمونه ان الكتاب بيدعو الى تغيير الأفكار وبالتالى النفس وفى القرآن لا يغير الله ما بقوم حتى يغيروا ما بانفسهم
لاتعارض لكن فى شيوخ معارضه للكتاب بشده ونزل اكتر من كتاب بيعارض فكره الجاذبيه
انا عندى قناعه بالكتاب لأن قبل قرأته او المعرفه به بسنوات مرت بأزمه كبيره
وكل الظروف والملابسات تفيد بصعوبه بل استحاله حلها لكن كان عندى يقين انها ستزول حتى ان امى قالت لى يابنتى ماتفكريش فى حلها واقبلى الأمر حتى لا تحبطى فى حاله استمرارهاولكن كان عندى يقين انها ستفرج اوى ازاى مش عارفه وكان بيغمرنى شعور بالسعاده غير عادى واذا بالأزمه تنفرج بحل ربانى غير متوقع بالمره ولا فى الأفلام الهندى والله كده
بعد كده مرت بى وبمن حولى حاجات مشابهه
كنت لا اجد لها تفسير غير ان حسن الظن بالله والدعاء مع التقوى من يتق الله يجعل له مخرجا . الكتاب بدون اشاره واضحه يدعو الى الفضيله بيأكد على ان الكون فى وفره تكفى الجميع فى كل شىء وكل من يطلب ويجتهد سينول مراده فى حاله هذه القناعه لن يكون هناك سرقه اوحقد اوحسد كل واحد حايأخذ ما يتمناه من الله سبحانه وتعالى . المهم انه كتاب مفيد وليس فيه ضرر او بعد عن الأيمان ولكنها وجهات نظر يحترم كل منا رأى الآخر وان اختلف معاه وتظل روح الموده موجوده وجميل اوى اننا نفكر ونشغل دماغنا حقيقى سعدت اوى بتعليقك وبتعليق نرمين ويارب تتحق امانيكم وامنياتنا جميعا
خالص تحياتى وامتنانى

كاميليا said...

مش عارفة ليه حسيت ان الخلاصةهى

الرضا بما قسمه الله

فالفقير الذى لن يقطر على نفسه وينفق ويعيش وكأنه غنى .. هذا فى حد ذاته رضاء بما قسمه الله وأملا فى رزق وفير من الله جزاء رضائه بقسمته ..

سوف اقرأ هذا الكتاب
ان شاء الله

وحشتينى اوى خالص
واسفة على التأخير


كل الحب

دنيتى الجميله said...

اميرة حبيبتى وحشتينى جدا
حمد لله على سلامتك
ربنا يطمنا عليكى دايما
انتى كنتى بتقرئى الكتاب ده
واحنا قاعدين هنا من غيرك
ههههههههههههه
على فكرة حكايه الكتاب دى حلوة
وانا فعلا محتاجه اجربها
نفسى اعمل حاجه معينه ولكنى مش عارفة خالص لدرجه انى حسيت بالفشل
ولما قريت البوست قلت هبدأ من جديد
دمتى بكل خير

klmat said...

الحبيبه كامى
سعيده جدا بوجودك انتى واحشنى على طول
انامعاكى السعاده هى مزيج من الرضا والأمل . ربنا يوفقك ويسعدك ويحقق كل امانيكى
خالص حبى وامتنانى

klmat said...

دنيتى الجميله
انتى واحشنى اكتر وكل الأصدقاء فعلا واحشنى انا كنت مش مبسوطه من الحاله العامه ورزلت لكنى افضل بعد قرأه الكتاب يارب يعجبك سعدت جدا بتعليقك الجميل ربنا يكرمك وتفضل على طةل دنيتك جميله
خالص حبى وامتنانى

اقصوصه said...

الكتاب شكله روعه

تشوقت كثيرا لقرائته

عن نفسي اؤمن جدا بفكرة الكتاب

طرح مميز

تمنياتي بالتوفيق

klmat said...

اقصوصه
اهلا بك وسعيده جدا بتعليقك ورقه مشاعرك
اتمنى ان الكتاب يسعدك ويسعد كل اصدقائى
هو ده سبب كتابتى
خالص تحياتى وتقديرى

محمد ابراهيم said...

هي الفكرة كلها يا كلمات
انه الايمان و التسليم بقضاء الله
و الرضا بما قسمه الله
هو الي بيصلح الاحوال
اعتقد انه اوبرا حاولت تقول الكلام ده او قالته فعلا
لان اي حاجة من الحاجات دي بتبقي ابتلاء من الله
فاما الصمود و القبول فيتعدل الحال الي ما هو احسن
و اما السخط فيتزايد الحال سوءا
تحياتي
محمد

ابو بدر الدين said...

السلام عليكم ورحمة الله وبركاته
كتابة جميلة وتعليقات جميلة
حدد لك هدف لكي تسعد في الدنيا والاخرة وسسسسسااااااااام

DR.HAMAS said...

موضوع مفيد فعلا


الثقة فى الله أساس النجاح

لأن الكون كله قائم بيه و ليه


جزاكم الله خيرا


د.حماس

Beram ElMasry said...

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

عاليا حليم said...

جميل جدا
انا متشوقة اقرا الكتاب ده

a7mad Nabeel said...

السلام عليكم
يعطيك العافية على الموضوع الحلو
بالنسبة لي شاهدت فيلم وثائقي عن الموضوع
و في الحقيقة كنت متحمسا قبل أن أشاهده للعناوين المكتوبة على الكتاب و ما قاله البعض عنه

لكنني للأسف لم أكتشف ما يبهرني بالكتاب !!!

فكلها شعارات مكررة
موجودة و نعرفها

هذه أحاديث للرسول الأعظم محمد صلى الله عليه و آله :

"تفاؤلوا بالخير تجدوه"

"لو تعـلقت هـمة أحـدكم فـي الثـريا لنـالها"

يقول أمير المؤمنين علي عليه السلام: من طلب شيئا ناله أو بعضه

دمت بخير :)

klmat said...

محمد ابراهيم
اهلا بك . انا متفقه معاك فى كل كلمه
وسعدت بتعليقك جدا .الكتاب بردوا بيقول
ده الأضافه انه قدم نماذج كانت عندها معاناه واتخطتها بالتطبيق.ياريت دايما نتبادل الأراء مرورك شرفنى
خالص تحياتى وتقديرى

klmat said...

ابو بدر الدين
اهلا بك الجميل فعلا تعليقك ده من بس من ذوقك ربنا يكرمك ويوفقك
خالص تحياتى وتقديرى

klmat said...

dr.hamas
اهلا بك وانت قلت الخلاصه
بارك الله فيك اسعدتنى جدا بمرورك
ربنايوفقك خالص تجياتى وتقديرى

klmat said...

beeram el masry
شعر جميل وعقبال ماتبقى زى بيرم
بس مش كنت تقوللى رأيك ايه
حقيقى شعر جميل لكن فى امل الفارس موجود
بس بلا جواد لكن الأمل موجود
سعدت بمرورك
تحياتى وسلامى

klmat said...

عاليا حليم
اهلا بك وحشتينى اوى وسعيده ان مضمون الكتاب عجبك ان شاءالله لماتقرأيه تستمتعى وتستفيدى
خالص حبى وتقديرى

klmat said...

a7med nabil,
وعليكم السلام ورحمه الله
ويعطيك العافيه . عارف الكتاب بيعمق الأيمان كله المعانى الجميله موجوده فى دينا
الجميل اللى فيه فى رأيى الناس اللى حصلوا على مايتمنون بالتطبيق للفكره وسردهم ماحدث لهم ده اللى بيشد اى حد حايقرأ الخلاصه حايشعر انها مجرد حكم لكن التفاصيل
وكونها حدثت بالفعل ده الجديد
مرورك اسعدنى وشرفنى مدونتك جميله
خالص تحياتى وتقديرى

Beram ElMasry said...

الاخت . klmat
سلام وتحية
ذكرت فى حديثك عن ( كتاب السر ) ان من له تجربة يذكرها
ماحدث وارويه يخيل لى انه وهم مع انه حقيقة ثابتة بالاوراق والنتائج ، ان خريج فنون تطبيقية ، حاصل على درجة الدبلوم اثار اسلامى ، تم نشر رسمى التخطيطى لحفائر القصر العينى عام 79 فى جريدة الاهرام ، فى شهر سبتمبر 86 ذهبت الى عملى خارج محافظة القاهرة لطلب اجازة مرضى مفتوحة بسبب مرض يفقدنى البصر تقريبا ، قابلنى دكتور صديقى يصرخ من شدة الفرح لانه كان حيموت لو لم يجدنى ويتوسل ان اذهب معه لكلية الاثار جامعة القاهره ، وللتعاقد مع جامعة صنعاء للتدريس :
انا ساعتها شبه كفيف
الساعة 9 ونحن خارج القاهرة وبالمواصلات العامة وحتى الان لا اعرف اى وسيلة مواصلات استخدمناها لنصل فى الموعد الساعة 11
وجدت ثلاثة متقدمين غيرى اقلهم معه ماجستير ، ويختارنى د . عبد الحليم نور الدين للتدريس
وللحصول على شهادة خبرة من العمل والزمن المحدد لها 15 يوم ووكيل الوزارة فى اجازة مرضى ، تستخرج فى 24 ساعة لا اصدقة انا ، ولم ادفع رشوة ولم اعرف اى شخص من الادارة ، ولن انسى ماقالتة مديرة مكتب وكيل الوزارة لى ( انا مش عرفاك وعمرى ما شفتك انما وكيل الوزارة يطلبة الوزير بالخطا يبقى ربنا جابه عشان يمضيلك شهادة الخبرة ) وتحقق حلم كنت قد نسيته
شكرا يا اميرة ان كلن هذا اسمك وارجو ان تعاودى الزيارة

klmat said...

bearm al masry
اهلا اهلا بك . تعليقك اسعدنى جدا.ربك لمايريد كل العقبات والعراقيل بتزول خصوصا لما بنكون متفائلين وراضيين بالمكتوب انا شخصيا مرت بعقبات كان الكل يرى صعوبه حلها
لكن كان جوايا يقين ان ربنا معايا وبيحبمينى هذا الشعور كان ملازمنى والحمد لله العقبات زالت بصوره مذهله وصدف زى اللى فى الأفلام شوف الواقعه بتاعتك ان يتم الأتصال بطريق الخطأعلشانك مخصوص ده رضا من ربنا يرضا عنك ويفتح لك كل الأبواب ويزيدك علم ورضا انا على يقين ان اللى بيقول يارب من قلبه وبصدق ويرضا بقسمته ربنا بيكرمه شوف مشاعر صديقك الحميله كلها نعم لما بنفرح بما نملك ونحمده بيزيدنا وده بيقره الدين والكتاب وضحه بحكاوى حدثت مع اشخاص منهم مشاهير واعترفوا بها علشان كده كان له صدى. انا سعيده اوى بتعليقك الجميل واكيد حااواظب على زياره مدونتك لانها جديره بالزياره وان شاء الله اقرأ مافاتنى
شرفتنى اوى دعوات من القلب بكل الخير والسعاده

klmat said...

bearm el masry ,
انا نسيت اقول حاجه مهمه ان فى ناس بتستعجل تحقيق الحلم وو اتأخر شويه بتيأس
هنا ممكن مايتحققش لأن تحقيق الحلم محتاج حسن الظن بالله ولو بعد حين . حاجه تانيه انك استحقت المنصب وتفوقت على من معهم ماجستير فى المقابله والأهرام مش بينشر الا مايستحق النشر دايما يارب ناجح ومتألق
اميره

ولــــــــــو said...

بصراحة الموضوع مشيق ويستحق التجربة فعلا
هاقرا الكتاب واحاول اطبق ولو نفع ليكي النص
فرحان اوي اني علقت عندك النهاردة

ما علينا said...

ما زلت اخجل عن مواجهتك
بالتعليق لديك
بعد طول غيابي هذا

ولكن ربي يعلم انى كنت مقيدة نفسيا

وحالما استعدت نفسي
اتيت اليكم بها

راجيه ان تقبلوا اعتذارى


لقد افتقدتك كثيرااااااااا

ودائما انت ملهمة للامل والتفاؤل
اختيارات موضوعاتك وكلماتك
التى تنبعث من قلب ام

تدعوا دائما للثقة والايمان بالله

ومثلما ذكرا اغلب المعلقين

ان مضمون الكتاب وافكاره ليست بالشيء الجديد

فانها امور بديهيه

كل منا اذا عرف امكانياته حق المعرفة
وحدد ما يريد

واجتهد لتحقيق هدفه
وكانت ثقته في الله وحده

ان شاء الله سيصل لما يتمنى

المولى سبحانه وتعالى عند حسن ظن عبده به

ما علينا سوى ان نؤمن بقدرة الله
عز وجل

ثم ان نؤمن بقدراتنا نحن
ونتيقن اننا قادرين على تحقيق احلامنا

وانا نكون دائما لدينا هدف وحلم نسعى اليه

المهم
هو السعى
وليس ان نحلم فقط
ونتحسر ونحقد على الاخرين


ولقد قرأت مقولة اعجبتنى جدا
لا اتذكر لمن هي
نصها

"ان اردت ان تتمنى فتمنى ما تستطيع فعله وان فعلته فتمنى ما لاتستطيع فعله وان اصبت فاسعى لفعل ما لا تستطيع ان تتمناه "


اعجبتنى جدا تلك المقولة
فعلى المرء الا ياتى بحلمه من نهايته ويتحسر على انه ليس لجيه

علينا ان نحلم تدريجيا
لكل قمة منحدر يجب الصعود منه
فلنحلم باجتياز اول مسافات السفح
ثم المسافة التالية

وهكذا حتى نصل الى قمة الحلم


كعادتى اطلت
اجدنى استعيد نفسي بينكم


وجزء من ماعلينا يلح على جدا

الا وهو
توقيع الضبط على الدكتور كسلان
والامساك به متلبسا بذلك التعليق الرائع الطويل جدا لدرجة الاستفاضة

وكانه ايقن وركن الى انى تغيبت عن دنيا التدوين

واخذ يجول ويصول بتعليقاته التى كان يبخل بها على



اعتذررررررررر بشدة
عما فات

وايضا اعتذر عن التاخير في التعليق

مفتقداكى جدااااااااااا

و القادم....أجمل said...

الثقة و الإيمان بالله

:)

رائع يا أميرة
البوست دا جميل فعلا

ربنا يكرمك

:)

حمدلله على السلامه

blue-wave said...

على فكرة الكتاب دا تحفه بجد وانا بنصح الكل انه يجيبه ويقراة
تحياتى

klmat said...

ولو
انا كمان فرحانه انك علقت . فى رايي الكتاب يستاهل لأنه بسشع امل وده جميل
يارب تحقق كل امانيك وفى انتظار النص بس
مش تنسى
ربنا يسعدك ويوفقك
مع خالص تخياتى وتقديرى

klmat said...

ماعلينا
اهــــــــــــلا بك وحمد الله على سلامتك
ولاداعى للخجل انا مقدره الظروف ولاداعى للأعتذار وحقيقى
سعيده من قلبى لرجوعك ووحشتينى اوى

مضمون الكتاب مش جديد لكن ان بتحدث من قام بالتطبيق ونجحت معاه هذه الطريقه هو وسيله لتغيير النفس وبث الأمل خصوصا انها مش شخصيات وهميه ونظريه الجاذبيه جديده مين عالم قد يكون لها ن مرجع دينى لا نعلمه
المهم ان له تأثير ايجابى والحكم بعد القرأه و انا متفقه معاكى ان الثقه فى الله وفى النفس من عوامل النجاح
مره تانيه وحشتينى وربنا يحقق امانيكى وبسعدك
خالص حبى وتقديرى

klmat said...

القادم اجمل
اهلا اهلا ياولاء وحشتينى اوى
ربنا يخليكى كلامك جميل ودايما القادم اجمل
مافيش اجمل من الامل
ربنا يحقق كل احلامك ياقمر
خالص حبى وتقديرى

klmat said...

blue wave
اهلا بك وسعيده جدا برأيك وتعليقك
ربنا بحقق كل امانيك واحلامك يارب
خالص تحياتى وتقديرى