Thursday, January 15, 2009

من القلب للقلب

نظر الجد الى حفيده نظره حانيه مملؤه بالحب وقاله تفسى احضنك وخايف اكرمش القميص

ارتمى فى حضنه قميص ايه ياحبيبى مافيش اجمل من حضنك وجلس بجانبه قوللى ياجدو انا شايف

عينك فيها كلام كتير وحاسس انك عايز تقوللى حاجه تحرك الجد ببطأ واخرج من محفظته صورته

وهو فى العشرينات شاب وسيم ملامحه تشبه الحفيد تماما

شايف انت شبهى قد ايه على فكره مش بس فى شكلك كمان فى تفكيرك وذوقك فى الالوان

واصناف الاكل تمام زيى علشان كده انا بحبك قوى وحاسس انك حته منى

انا دلوقتى عندى 80 سنه والحمد لله بتمتع بصحه وعافيه . عارف انا اغلب دفعتى اتخرجت من الدنيا

وزى ما انت شايف عايش لوحدى بعد وفاه جدتك وانت عارف كانت غاليه عليا قد ايه حزنت واتقهرت

وشعرت بالوحده لفتره من هول الفراق رغم توقعه فى سننا شويه ولقيت انى لو تعبت حااتعب كل من حولى وده شعور مش بحبه فقررت اخد بالى من صحتى وحزنى اعوضه بتذكر الذكريات الجميله بعمق زى الممثل اللى بيتقمص الشخصيه وينسى نفسه ويعيش فيها وشغلت نفسى بمشاكل اولادى واحفادى ونفسى انت كمان ماتخليش اى حزن يسيطر عليك مهما كان السبب قوى الحياه بتستمر عيشها واستمتع بها زى ما بيقول فريد الاطرش الحياه حلوه بس نفهمها انا حاعطيك خلاصه تجاربى وقرآتى بس ...

بس ايه ياجدو انا عارف ان الناس مش بتحب النصائح ومهما تنصحهم بيعملوا اللى فى دماغهم الى ان يكتشفوا

اخطائهم بعد فوات الأوان لكن ظنى انك مختلف وتحب من ينصحك

عارف ياجدو انت ماشاءالله عليك سنك كبير بس بجد انا حاسس انك صاحبى وفاهمنى اوى

كده تبقى انت اللى عجوز .... .. .... .شوف ياحبيبى

يااااه ياجدو كلمه حبيبى دى طالعه من قلبك و مست قلبى وروحى رغم انى عارف انك بتحبنى بس لما سمعتها منك شكل تانى

دى اول نصيحه لما تحب قول وعرف اللى بتحبه حاتفرح قلبه بالكلمه الجميله بس قولها لما تحسها وتكون طالعه من قلبك لأن تكرارها عمال على بطال يفقدها روعتها

لا تستجدى الحب ولاتطلبه دى مشاعر مش بايدنا و لا تهدر وقتك وكرامتك اللى يبيعك ابعد عنه . ولا تجرح احد خصوصا من يحبك . حتى وان كنت لا تحبه يكفى انك لا تحبه لا تخسره فان خساره انسان بيحبك بعيد كل البعد عن الذكاء

واعلم ان كل شىء محتمل وكل شىء نسبى وما يعجبك ويجذبك قد ينفر منه غيرك

بعض الناس اشبه بالخرقه القذره اذا اقتربت منها تأذيت من رائحتها واذا حاولت مسكها اتسخت يداك ابعد عنا وستقوم عربه القمامه بوضعها فى مكانها المناسب

تمام ياجدو . اهتم دايما بالتخلص من الحزن والهم او على الاقل تقاومه ومش حااقولك ازاى انت اللى لازم تعرف كل واحد فينا فيه حاجات بتساعده وتقويه لنزع احزانه اللى يسمع موسيقى تطلعه من همه اللى يخرج

.يزور شخصيه بيحبها اللى يتأمل فى جمال الطبيعه واللى بيخرج يتمشى او يزور من يرتاح لهم . واللى حتى يقعد فى بلكونته

فى ناس بتنمى احزانها وتفضل تعيش فيها دول بيتعبوا ومش بيغيروا الواقع والناس بتبعد عنهم لعبوسهم فتزيد معانتهم لو فكرت حاتلاقى فى احلك الظروف الدنيا بتمشى فلا داعى ان تهد قوتك وصحتك دور دايما عما يبهجك وجدد حياتك دائما فا التغيير له تأثير ايجابى

واذكر ربنا كثيرا فى سرك وتأمل بديع مخلو قاته وانت ماشى سبح بحمده واشكره حاتلاقيه معاك فى شدتك بيقويك وينصرك وبتزود ميزان حسانتك وبيطمئن قلبك .الا بذكر الله تطمئن القلوب

واياك والفراغ هو اس المشاكل اشتغل واشغل وقتك بما بفيدك ويزيد دخلك ومهارتك وخصص وقت للقرأه

دايما اسعى وراء العلم والمعرفه فهو مفتاح نجاحك وتقدمك حاول ان تتعلم من تجارب الآخرين خذ بالك ان اغلب الناس بتتعلم من تجاربهم وممن يكتشفوا بانفسهم لا مانع ان تضيف رصيد من خبرات من حولك

فى عبارات قرأتها لكتاب كبار واقتنعت بها ستجدها مكتوبه اقرأها :

الحياه الزوجيه شركه من اثنان . عندما يتوقف احدهما يجبر الآخر على القيام بالمثل

اذا اردت ان تنجح فى شىء ما فاجعل عينيك مفتوحه وركز تفكيرك فى هدفك فلا احد يصيب هدفه وهو مغمض عينيه .

الانتصارات والهزائم جزء من حياه كل انسان اما الذين لا ينتصرون ولا ينهزمون فهم الجبناء

الخوف من العقاب هو الذى يلزم الجميع

لااحد يستطيع اضافه حرفا على ماهو مكتوب . قدر كل انسان مكتوب سلفا . ولا تضيع وقتك فيما قد يحدث غدا

انه غيب لا يعلمه الا الله .

افعل ما تحب وتقتنع به طالما لا يتعارض مع دينك ومبادئك

لقد قابلت صعاب وعثرات كثيره فى حياتى لم ااسف عليها لانها زادتنى علم وخبره انظر لها من هذه الزاويه

اعمل دائما الخير مهما حدث ومهما قوبلت بنكران للجميل استمر فى فعل الخير ستشعر انك فى منتهى القوه والسعاده

والآن يا حبيبى دعوات من قلبى بالتوفيق فى كل حياتك

11 comments:

منى said...

بما انى السبب فى العوده فلازم اكون التعليق الاول
ومش بس عشان كده
لكن حاسه ان الوست موجه ليه

كن محتاجه اسمح نصائح الجد
واشوفها قدامى
وكانك حاسه بيها

ربنا ميحرمنيش منك
كل الحب

klmat said...

منى
اهلا بك ياحبيبتى . كلامك بيسعدنى جدا
وربنا يخليكى ويسعدك يارب . انتى انسانه جميله اوى مدونتك بتقول كده
خالص حبى ودعوات بكل الخير

بس خلاص ... said...

اجمل الكلمات دائما اقرائها عندك ... بساطة اسلوبك وعمق الافكار يشدنى الى اخر حرف
انا شخصيا استفدت جدا جدا من هذه الكلمات هناك اشياء كثيرة اطبقها فى حياتى وهناك ماتعلمته
على فكرة اسمح لى ان انسخ هذه الكلمات واعطيها لاولادى لكى تكون منهجا لهم وقدوة لهم
حمد الله على سلامتك
لاتنقطعى عن التدوين اكتبى وانتى فى كل الاحوال ستجديننا دائما بجانبك احبائك واخواتك

Empress appy said...

كنت بسمع لجدى افتقده لما توفى لانى كنت عارفه ان وجوده دلوقتى هيفرق كتير فى حياتى
على فكره اعصابى بترتاح لما بقرا حاجه انتى كتباها

الربان said...

تحياتي

نصائح غاليه...نشكرك عليها...اي علاقة انسانية هي مثل " النبته :...لابد ان نرويها حتي تكبر
و تثمر...

تحياتي و تقديري

بنت الاسلام said...

فعلا محدش بيزود حاجة علي المكتوب وجميل اننا ننظر للجراح من جانب يقوينا مش يهدنا ويكسرنا

تحياتي

Anonymous said...

Walahi eslob gamil w m7trm gdn gdn gdn.

Moz moz moz

Ebnk Sherif

جسر الى الحياة said...

كلمات دافئة من قلب دافىء وعقل متسع الافق ..دمتى طيبة وبالف خير عزيزتى

دكتور كسلان said...

ازى حضرتك يا مدام اميرة
يارب تكونى بخير ان شاء الله
معلهش انا بقالى فترة مش بزور المدونة

الموضوع جميل جدا
النصايح دى مهمة وقيمة جدا
والله كلمات فعلا عظيمة
وعجبتنى كل كلمة فيها

خصوصا
افعل ما تحب وتقتنع به طالما لا يتعارض مع دينك ومبادئك
وفعل الخير بدون انتظار مقابل

ربنا يخليكى ويكرمك
الموضوع جميل جدا جدا
ربنا ما يحرمنيش منحضرتك ومن كلامك الجميل ده
سلاااااااااااااااااااااااااااااااام

Anonymous said...

يشرفنى ويسعدنى ان يصدر لى اول كتاب

لست الا بعض الأوراق" معروض بمعرض "
الكتاب

التفاصيل على البلوج الخاص بى

www.cherry0000.blogspot.com

تحياتى لك

مصطفي زهران said...

ازيك ياكلمات اخبارك ايه انا جيت عشان اقولك كل عام وانت بخير مع انها جت متأخرة واعذريني كنت الفتره الي فاتت في شغل بغطي موضوع غزة وكنت في رفح والدنيا كانت ملخبطة شوية...عموما انا هاتابع مدونتك من النهارده