نفسى

نفسى اعمل حاجه ايجابيه لبلدى واحس انى مواطنه بتشارك فى نهضه بلدها ولو بحاجه بسيطه كلنا بنتتقد بعض وبنقول ان المصريين سلبيين . طيب اللى بيقول كده بيعمل ايه غير النقد . ده الكلام اللى شاغلنى وبكلم نفسى عنه علشان اكون ايجابيه ممكن اعمل ايه فكرت فى موضوع محو الاميه يعنى هو فى فصول مفتوحه بس فى ناس من اخوانا اللى عايزين يتعلموا مايعرفوش طريقها او بيشتغلوا ومواعيدهم بتتعارض مع الفصول دى لو بصينا حوالينا حانلاقى اغلب البوابين مابيعرفوش يقراوا فى اولاد فى سن صغيره فى المحلات برضوا ما بيعرفوش الشغلات فى البيوت ايه رايكم لو كل واحد فينا فكر انه يعلم 3 او 4 والمكان ممكن يكون فى الجامع او اىمكان يتفقوا عليه اختيارى للجامع حلا لمشكله المكان وفى ميعاد يناسب المجموعه . تخيل ساعدتك لما تعلم 4

ياريت كل البنات الجميلات اللى فىسن 12 سنه يبدأوا فى تعلم الحياكه والتريكو وشغل الابره الكنافاه اللاسيه الاعمال اليدويه المتقنه بتكون اغلى من شغل المكن لو البنت اتعلمتها فى سن صغيره حاتشغل وقتها فى هوايه نافعه ممكن تكون مصدر دخل معقولاوحتى لبيتها فى المستقلبل تخيلوا الاموره لمايكون عندها 18 سنه حاتعمل شغل متقن ومبتكر قدايه
وكمان حاتكون فخر لاسرتها بانتاجها المتميز

فى الحقيقه انا نفسى فى حاجه اكبر وطموحى اعلى بس مافيش امكانيات ماديه كبيره اقدر اعملها يعنى انا مثلا اسكندرانيه كل ماشوف البحر وشواطئنا العديده سواء البحلر الابيض او الاحمر استغرب لما اشوف فى السوبر ماركت اسماك معلبه اغلبهامن المغرب واليونان والانتاج المصرى ضعيف وردىء . يعنى مافيش واحد يعمل مصنع لتعليب الاسماك فى رشيد او اسكندريه او اى مدينه ساحليه
فى محافظه الاسماعليه قرات فى احدى المجلات فى العام الماضى ان محصول الفراوله كان غزير جدا وللاسف كانت بتفسد لعدم وجود وسائل لحفظها مش ممكن واحد مقتدر او بمجهود الاهالى يعملوا مصنع مربى وعصائر وكمبوت او المحافظه تتولى عمل مشروع يحل مشكله البطاله واعتقد التكلفه مش عاليه
يمكن انا ماعنديش افكار كفايه ايه رايكم نبدأ بموضوع محو الاميه تخيلوا لو كل واحد علم 4 والاربعه اللى اتعلموا يحاولوا يجيبوا غيرهم وتمشى العمليه

نفسى اشوف اقتراحات عمليه نقدر ننفذها ونتداولها وتعود علينا كلنا بفايده

فى برنامج صناع الحياه لعمر خالد كان طلب من كل من يراه ان يقوم باعاده ترتيب دولابه وسوف يجد ملابس لا يلبسها
لانها مش موضه او ضاقت المهم ممكن الاستغناء عنها منها الدولاب حايكون منظم ومنها انه حايتبرع بها لحد محتاج حايفرح بها وتدحل البهجه فى قلبه فى الايام المفترجه وحا يكسب ثواب
عايزين نساعد بعض وقلوبنا تكون مشغوله بحب ومساعده من يحتاجون معاونتنا
الفكره محاوله عمل الخير بالاتفاق نختار حاجه ونبدأ كلنا فيها ونحاول نتداولها المهم حاجه ممكن نطبقها بسرعه
ولها تاثير محسوس ونحاول نخلى معارفنا يتجاوبوا معانا ويشاركونا

طبعا دى حاجات ضعيفه بالنسبه لطموحاتنا بس نبدأ بالحاجات البسيطه اقضل من ان لانبدأ وشويه بشويه يمكن
نقدر نعمل حاجه كبيره فى بالنا كلنا

ولو فى افكار عندكم عمليه اكتبوها و نحاول نطبقها

ممكن

كل سنه وانتم طيبين رمضان على الابواب ربنا يعيده علينا بكل خير ويصلح حالنا وحال بلدنا يارب انا فى الحقيقه مشغوله جدا الايام دى بحفظ بعض الخضروات وبعمل حاجات تساعدنى على الأنجاز السريع وماخدش وقت فى عمليه الطبيخ وتسهل عليا فى العزومات ويكون فى وقت كافى للعباده بأذن الله

ليا رجاء اول ماكتبت فى المدونه لم يعلق احد على اى بوست كتبته وده طبعا لجهلى لانى لم ازور اى مدونه ومستنيا الناس تعرفنى وعايشه دور الصحفيه واحبط جدا لعدم التعليق

ونظرا لانشغالى اليومين دول ممكن اطمع منكم فى قرأه البوست القديم بتاعى وارشح لكم
عيون المحبه والقلوب القاسيه
كل سنه وانتم طيبين وسنه سعيده علينا جميعا فى انتظار رأيكم

لا بيتباع ... ولا بيتشرى

الحنان

كنت من فتره فى زياره صديقه لى كانت راجعه من العمره

وكان عندها قريبه شابه فى عيونها دموع محبوسه وحبيت تنزل لكن صحبتى مسكت فيها .عرفت انها معيده فى احدى الجامعات وحاصله على ماجستير وبتحضر للدكتوراه
وسنها حوالى 34 سنه وسبب حزنها هو انه بوفاه والدها وهى فى اعدادى افتقدت مصدر الحنان الوحيد فى حياتها
لها اخ تزوج وانجب وتعيش مع والدتها التى هى مصدر عذابها!!! هذه الشابه المتفوقه المحبه للعلم تجد سعاده غامره
فى القرأه وخصوصا فى مجال تخصصها وتسكن مع والدتها فى شقه صغيره . اوده نوم وسفره وصاله
وللعيله ورث من والدها المتوفى عباره عن اطيان تدر عليهم دخل وفير
والام هى المتحكم اشترت للأبن شقه فاخره وتصر على ضيافته 3 او 4 مرات فى الاسبوع تطبخ فيهم اشهى المأكولات
ويحضر الاخ وزوجته واولاده للغذاء مما يضيع بعض من وقتها والام متضرره جدا من الكتب ومن ابنتها وعلى طول تنتقدها رغم ان الام كانت مديره وحاليا بالمعاش
ولما قلت لها اكيد اخوكى حنين على مامتك قالت هو غرقان فى خيرها لكنه لايرضى عن تصرفاتها معى . ومستفيد
قلت لها طب طالما الحال ميسور خدوا شقه اوسع يكون لك فيها حجره مستقله
وحاتدفعوا فرق بين شقتكم الحاليه والجديده ومن ورث والدك قالت ان مامتها رافضه حتى تجديد البيت وانه محتاج
جدا تغيير الا ان الام تقول مستحيل وعلى جثتى
وهى مرتبهاعلى قد لبسها وكتبها كما ان والدتها بتطلب منها شراء حاجات للبيت
فى الحقيقه حزنت جدا لوضع البنت دى وفضل الموضوع يشغل بالى
وبعدين قرأت فى المصرى اليوم عن الطفل اللى تاه من سنين طويله حتى ظنت اسرته انه توفى خصوصا ان عنده اعاقه ذهنيه وتوليت تربيته اسره احسنت معاملته واحبته رغم ظروفه واصبح ابن لهم
وظهرت العيله القديمه وتمسكت بابنها فاذا بامه التى توليت تربيته تبكى بحرقه وتتمنى ان لا يفارقها ضناها
سبحان الله الام مش هى التى تلد الام هى التى تحب ابنها ايا كان شكله او ذكائه هى اللى عندها استعداد تضحى بعينها لاولادها القصه فى المصرى اليوم تاريخ اليوم لما قرأتها افتكرت الشابه الحزينه اللى بتتمنى شويه حنان من والدتها
المتيسره خصوصا انها صاحبه حق فى ميراث والدها وبدلا من ان تكون امها سندها وتغمرها بحناها منغصه عليها حياتها
فعلا الحنان لا بيتشرى ولا بيتباع سبحان الله

سيدتى الجميله

ساعات اصادف ناس يكونوا مصدر للسعاده من يومين شفت واحده منهم .كنت فى طريقى الى عملى ووقفت انتظر تاكسى

ولقيت عربيه ملاكى فيات صغيره وقفت امامى وكانت بتقودها سيده منقبه

قالت لى بذوق اتفضلى اوصلك انتى عايزه تاكسى قلت لها ميرسى جدا ربنا يخليكى دلوقتى يجىتاكسى اعتقدت انها تعرض خدماتها خصوصا انى وقفت شويه

قالت لى انا تاكسى ركبت بجانبها وانا معجبه بها جدا

ودار بينا الحديث التالى

انا سعيده جدا انك فكرتى تستغلى العربيه تاكسى

قالت اعمل ايه انا عندى بنتين واحده ثانويه عامه والتانيه اعداديه السنه دى . وانتى عارفه قد ايه الدنيا غاليه والدروس الخصوصيه ومهما تقتصدى البيت بياخذ فلوس كتير

قلت لها ربنا يعينك انتى نموذج مشرف وبيفكر صح

قالت اسعى ياعبد وانا اسعى معاك مش احسن ما استلف او استنى حد يعطف عليا وقالت لى.

انا كمان لو حد بنت او ست عايزه تتعلم السواقه بعلمها بس بخاف على العربيه من البهدله

انا برافو عليكى

سألتها وياترى بتوصلى رجال

قالت لأ مالوش داعى طالما فى ستات لكن لو اسره ممكن

عبرت لها عن فخرى بها اعطتنى رقم الموبايل وقالت لى لو احتاجتينى كلمينى

فرحت بها جدا ودعوت لها فى سيرى وسجلت رقمها

نموذج مشرف للمرأه المصريه التى لاتضع يدها على خدها وتندب حظها.

سيدتى لك كل تقديرى واحترامى مع اخلص الدعوات لكل من يجتهد ان يرزقه الله رزق وفير وربنا يبارك فيه

ذهبت الى عملى وانا فى غايه السعاده والنشاط الحمد لله

الناس عجائن

فى احدى حلقات القاهره اليوم الاخيره اتصل ولى امر طالبه فى اولى ثانوى فى احدى المدارس الشهيره فى الأسكندريه
وقال ان بنته عندها ملحق فى الرياضيات وفوجىء بها بتقوله شوفلى واسطه تنجحنى . انا صحبتى "ن" وقالوا اسمها بالكامل
حاتنجح من غير ماتدخل امتحان الملحق وقالت ان عندها واسطه كبيره فى حكومتنا الذكيه. الاب قالها ماتصدقيش الكلام ده وذاكرى . المهم يوم امتحان الملحق لم تحضر الطالبه المذكوره وكانت
النتيجه نجاحها مما اثار استياء الطالبات واولياء الامور بعد كده اتصل موجه الرياضيات فى المدرسه واقر بصحه الواقعه
وانه قد طلب منه بضم الطاء اعاده تصحيح ورقه الطالبه وحصل لكنه وجدها لا تستحق النجاح او الرأفه وكتب كده على ورقه التصحيح لاخلاء مسئوليته وراحه ضميره
بعد كده وصلت المدرسه لجنه ولا لجان الأمم المتحده مكونه من 9 افراد فى ماده الرياضيات وتم نجاحها !!!!!!
للأسف مش عارفه تم ايه بعد كده
شوفوا بقى البنت قريبه المسئول عندها حوالى 16 سنه تنجح وهى لاتستحق النجاح وبدل ما اهلها يحثوها على المذاكره
لأ ماتزعليش يا حبيبه بابا حاتنجحى طب يعنى غش بمساعده الاهل لأ ونجاح من غير امتحان طب غشوا بذكاء شويه
كان ممكن البنت تحضر الملحق وتنجح وماحدش يحس وده طبعا مصيبه لكن حتى يراعواعدم القيل والقال ده بيورى مدى الأستهتار و كمان الفشخره بمعرفه المسئولين
طب لو البنت استمرت تنجح بنفس الطريقه وتتخرج شوفوا بقه حاتعمل ايه بجهلها لما تشتغل حتى لو ما اشتغلتش
دى لما تبقى ام حاتربى اولادها ازاى

النشأه الطيبه فى السنين الاولى من العمر من الرضاعه وحتى 10 سنوات هى الاساس وممكن فى سن اقل التوقع
بنوعيه شخصيه الطفل .من السنه الاولى بيكون الطفل زى العجينه التى يتم تشكيلها لكن لو اختلطت العجينه بتراب او

مواد ضاره صعب اوى استخراجها بعد كده

فى مواقف فى طفولتى محفوره فى ذهنى مش بقدر انساها

كنت فى ابتدائى وكان فى بنتين ماشاء الله غايه فى الذكاء والشطاره واحده اسمها سناء والتانيه ايات كانوا بيقعدوا جنب بعض فى اخر تخته فى الفصل علشان اطول مننا كان بينهم تفاهم وحب ومنافسه مين حاتكون الاولى وفى احد امتحانات الشهر دخل المدرس وكتب الامتحان على السبوره وبعد شويه قال سنا ء ماتبصسش فى ورقه ايات بس لقينا سناء ماشيه بين الصفوف بحماس شديد ومعاها ورقه الامتحان وقالت للمدرس ادينى صفر انا مش غشاشه بتقولها بمنتهى الثقه هى واثقه انها صاحبه حق

والمدرس ارتبك قالها خلاص جايز انا عينى بربشت طفله مش طايقه احد يتهمها بالغش

لم تخاف او تحلف كما فى اغلب الاحوال فضلت تاخد زيرو ولا يتهمها احد بالغش اتربيت على كده على فكره هى الآن فى مركز مرموق جدا عن جداره طبعا اتربيت صح كان عمرنا حوالى 7 سنين

قبل كده وفى نفس المرحله كان معانا بنت بليده جدا كل يوم تيجى تاخد كرسه منى

وتنقل الواجب المهم كان فى مساله 2+3= 0000

على مايبدو كان نظرها ضعيف نقلت المسأله خطأ كانت كاتبه المسأله 3+3=5

المدرس قالها انتى غاشه الواجب حلفت 100 يمين وعظيم ابدا اصل انا ومنى بنذاكر سوا طبعا كلنا ضحكنا.اكيد اتربيت على الكذب والكسل

طريقه التربيه بتشكل البنى ادم فى سن سبعه تقدر تتوقع الطفل حا يكون كاذب ولاصادق
حايقود ولا ينقاد هادى ولاشقى يعنى لوطفل نشأ على بيت فى تقوى الله ووالده والدته بيأدوا الفرائض
مش بيكذبوا على بعض اسرار بيتهم مش مشاع اذنه اتعودت على سماع الكلام الطيب واخر فى اسره الام بتحكى خصوصيتها للجيران والاصحاب والاب بيشتم بالفاظ مش تمام اكيد الطفل حايقلدهم
موضوع حب القرأه وسماع الموسيقى بيكون له تأثير كبير فى التذوق الحاجات دى ببتشكل البنى ادم من بدرى اوى
افتكرت كل ده بعد حلقه القاهره اليوم واللى يعرف حصل ايه ياريت يقولنا

صلاح جاهين بيقول

علمى ان كل الخلق من اصل طين وكلهم بينزلوا مغمضين

بعد الدقائق والشهور والسنين تلاقى ناس اشرار وناس طيبين