Friday, August 24, 2007

سيدتى الجميله

ساعات اصادف ناس يكونوا مصدر للسعاده من يومين شفت واحده منهم .كنت فى طريقى الى عملى ووقفت انتظر تاكسى

ولقيت عربيه ملاكى فيات صغيره وقفت امامى وكانت بتقودها سيده منقبه

قالت لى بذوق اتفضلى اوصلك انتى عايزه تاكسى قلت لها ميرسى جدا ربنا يخليكى دلوقتى يجىتاكسى اعتقدت انها تعرض خدماتها خصوصا انى وقفت شويه

قالت لى انا تاكسى ركبت بجانبها وانا معجبه بها جدا

ودار بينا الحديث التالى

انا سعيده جدا انك فكرتى تستغلى العربيه تاكسى

قالت اعمل ايه انا عندى بنتين واحده ثانويه عامه والتانيه اعداديه السنه دى . وانتى عارفه قد ايه الدنيا غاليه والدروس الخصوصيه ومهما تقتصدى البيت بياخذ فلوس كتير

قلت لها ربنا يعينك انتى نموذج مشرف وبيفكر صح

قالت اسعى ياعبد وانا اسعى معاك مش احسن ما استلف او استنى حد يعطف عليا وقالت لى.

انا كمان لو حد بنت او ست عايزه تتعلم السواقه بعلمها بس بخاف على العربيه من البهدله

انا برافو عليكى

سألتها وياترى بتوصلى رجال

قالت لأ مالوش داعى طالما فى ستات لكن لو اسره ممكن

عبرت لها عن فخرى بها اعطتنى رقم الموبايل وقالت لى لو احتاجتينى كلمينى

فرحت بها جدا ودعوت لها فى سيرى وسجلت رقمها

نموذج مشرف للمرأه المصريه التى لاتضع يدها على خدها وتندب حظها.

سيدتى لك كل تقديرى واحترامى مع اخلص الدعوات لكل من يجتهد ان يرزقه الله رزق وفير وربنا يبارك فيه

ذهبت الى عملى وانا فى غايه السعاده والنشاط الحمد لله

43 comments:

Anonymous said...

Momkn el nemra lw sm7ty.

Sherif

Bossy said...

السلام عليكم

ساعات بنقابل ناس نحس انهم نقط نور في حياتنا
طبعا انا احترم واحده زي دي وربنا يعنها ويرزقها دايما

3abdo me7tas said...

فعلا مصر بخير يا رأفت

انا بهزر والله مش بتريق
انا اوقات بشوف ناس كتير زى الست دى واكتر بس فيه حاجه انتى ساعت ما وقفت ليكي انتى مش خوفتى يمكن تخطفك ولا حاجه او او او انتى عارفه الايام دى بقت وحشة اوى بجد
اما بالنسبة لنموذج المرأة اللى انتى بتحكيه لينا انا شايف انه شيئ جميل جدا جدا
والشغل مش عيب

أنا بقولك بقى خلاص لازم حضرتك تشترى عربية بقى انا شايف انك خلصتى مصروف البيت على التاكسيات

موضوع جميل ومش غريب طبعا انه جميل
تحياتى

ايوية said...

اكيد طبعا ربنا يعينها
ويقدرها تربى واولادها من عملها

و القادم....أجمل said...

ربنا يعينها و يرزقها هيا

و ولادها يارب

بس يا أميرة الواحد برضوو ميأمنش

بيني و بينك انا لو اتعرضت

للموقف دا هخاف اركب

اعذريني لصراحتي

بس بجد انا بشوف رجالة كتير عملين

العربيات الملاكي تاكسيات

و بخاف جدا أركب

أنا أكيد سعيدة انها معتمدتش علي حد

بس برضوو خفت عليكي الصراحه

خلي بالك من نفسك يا جميلة

خلي بالك من نفسك

و ربنا يعين الجميع

و يرزقنا كلنا بالحلال

تحياتي و حبي

:)

loumi said...

العزيزة أميره
فعلاً في ناس لما بنقابلهم بيأثروا فينا جامد وبيدونا طاقه تساعدنا اننا نكمل المشوار
والست دى طبعا لها كل احترام
لأنها توصلت لطريقه تساعد بها نفسها وبناتهابس حاقولك على بعض النقاط
اولاً شجاعه منك انك تقبلي تركبي مع سيده منقبه وخاصة ان سيارتها ملاكي
انا لست ضد النقاب فهو حريه شخصيه
ثانياً بما انك معك تليفونها حاولي ان تنبهيها لانها قد تتعرض للكثير من المشاكل لانه ليس من حق اي شخص ان يشغل سيارته الملاكي اجرة
فغالباً هناك قواعد تخضع لها هذه المهنه
لان ولاد الحرام ما خلوش لولاد الحلال حاجه
بس هى فكرة كويسه ان يبقا فيه سيارات تقودها سيدات
كتاكسي
وربنا يسترها معانا جميعاً
دوشتك معلش
بس اصل لسه حاصله مشكله من واحده منقبه دخلت على والدي فى مكتبه تطلب عمل ولما قال لها ما عنديش شغل
طلّعت عليه سكينه وقالت له طلع اللى فى جيبك ولولا انه زعق فيها
وقام لها من على المكتب الله اعلم إيه اللي كان ممكن يحصل
الناس خلاص تعبت وبقت ممكن تعمل اي حاجه
تحياتي لك ولقلبك الكبير

wahed said...

فعلا نموذج مشرف للمراة المصريه

موقفك هذا بيحمل معاني انسانيه كتير


تحاتي لكي

Fedaa AL Eslam said...

بصى هو طبعا ربنا يعينها ويرزقها ويكرمها بس

انتى مش شايفه ان فى حاجه غريبه يعنى


يعنى مخفتيش انك تركبى مع واحده منقبه فى عربيه ومش متأكده كمان اذا كانت عربيه ولا تاكس

يعنى انا لو مكانك اخاف

يا بنتى ده انا عاوزة اجيب عربيه عشان بخاف اركب مترو الى فيه ناس كتيراقوم اركب عربيه ومش تاكس كمان ومع واحده منقبه يعنى لو خطفتك مش هتعرفى شكلها


صدقينى انا مش اقصد انى انتقدك بس انا بحاول اوصلك ان الزمن ده مش فيه امان خالص وبجد الدنيا بقى وحشه جدا وعموما خالى بالك من نفسك

klmat said...

الى الباشمهندس / شريف
لأ طبعا النمره للستات فقط
شرفتنى يافندم

klmat said...

bossy
السلام عليكم ورحمه الله وبركاته
سعدت جدا بتعليقك
نورتنى تحياتى وسلامى

klmat said...

3abedo me7tas
رأفت عايزه اطمين عليك
ماتخافبش ياشريفه
انا ليا جاره موظفه فى بنك
وبتوصل اولاد فى سكتها للمدرسه
باجر شهرى الموضوع كان بالنسبه لى مش غريب وكنت فرحانه
لكن والدتى وواحده صحبتى خوفونى وغلطونى جدا .بس طريقه كلامها كانت صادقه جدا
شغلى قريب من البيت
التاكس مش بياخد كتير وده بند ثابت
كأن مرتبى اقل بالمبلغ ده
المواصلات صعبه جدا
وانا ميسوره والحمدلله
لولا الحر كنت مشتها
ازيك بجا
شرفتنى جدا سلامى وتحياتى

klmat said...

ايويه
يارب تكونى بخير
ربنا يعينها ويقوينا جميعا
نورتنى وشرفتنى
تحياتى وسلامى

klmat said...

القادم اجمل
ولاء انتى عندك حق
حرص ولا تخون
فى الحقيقه وقتها لم يخطر ببالى
اى خوف بس اعلى غلطونى وخوفونى
بس الست فعلا وده احساسى
اختارت مورد رزق يناسبها
الحمد لله
وربنا يقويها
ربنا ينجحك
شرفتنى ونورتنى

klmat said...

loumi
انا سعيده بتعليقك
انا كل تفكيرى وقتها ان ست
بتحاول تساعد اسرتها بطريقه شريفه
وكنت سعيده جدا بها
لكن فى البيت عندى عملوها مشكله
من منطلق الخوف عليا
وحكوا حاجات زى اللى
حصلت مع بابكى حاجه تخوف
جدا الناس السوء كتروا
اعتقد ان الست عارفه موضوع التاكسى
وهى بتختار اللى حايركب والله اعلم
شرفتنى ونورتنى

klmat said...

wahed
اتمنى ان تكون فى احسن حال
تعليقك بيسعدنى جدا
ربنا يرزقنا جميعا
تحياتى وسلامى

klmat said...

fadl el aslam
وجهه نظرك ونظر الناس اللى خايفه
تحترم جدا
انا بصراحه لم اخاف كنت
شايفه واحده بتسعى لرزقها
والدنيا زحمه والصبح
وانالبسى بسيط وعملى
ومش لابسه دهب خاتم مش
باين ولو كلنا فكرنا كده
ممكن نقطع رزق حد عايز يكسب بالحلال
بس ماخبيش عليك
مش حااقدر اعملهاتانى
وربنا يعينها ويرزقها
نورتى مدونتى
واتمنى تكرار الزياره
تحياتى لك

3abdo me7tas said...

طيب طالما حضرتك مش عايزة تجيبي عربية
اشتريها وهاتيهالى انا وخلاص
ويبقى ضربنا عصفورين بحجر

harmless said...

هذا السيناريو الجميل الذى يتكرر فى الحياة عشرات المرات

ضيق فى الرزق
زيادة فى المصاريف
قلة حيلة
ثم
تسليم الامر لله
فيوحى الله بطريق رزق لم يكن فى الفكر ولا الحسبان
ونتساءل بتعجب
معقول الطريق ده يجيب فلوس
والسعى يبدأ
وتوفيق الله يعمل
يذلل الصعاب
ويبعد المشاكل

يد الله الرحيمه تظلل الجميع

اسكندراني في الغربة said...

المشهد دة بيتكرر كتير في بلدان مختلفة
بس تكوت واحدة ست هي الي بتعرض خدمة التوصيل دي جديدة
طبعا من حق اي انسانة ان تحسن من دخلها بطريقة شريفة
الفكرة ان احنا لية وصلنا لكدة؟

سى السيد said...

انا معاكى ان هى تشتغل بس بتهيألى فيه شغلنات غير دى كتير ممكن تشتغلها عشان المضايقات بس اختيار جيد للموضوع احسدك عليه انى فى انتظار زيارتك على مدونتى من زمان مانستناش سلام ربنا يوفقك تسنحيلى أضيف مدونتك عندى

Doba said...

انا تعليقى زى هارمليس بالظبط

ما ضاقت الا لما فرجت وما شاء الله انها قدرت تفكر وتتحرك لرزقها ورزق اولادها

تحياتى
هبة

أبو سويلم said...

فعلا شىء مفرح
لكن الوضع اكيد مش هيكون سهل دايما لكنه يستحق المحاولة ويكفيها ان تقوم بما عليها
منهم لله اللى وصلونا للحال دى
وفعلا المرأة المصرية دى أعظم امرأة فى العالم
فعلا موضوعاتك متميزة جدا جدا جدا
تحياتى يا أخت أميرة
سلام

احساس لسه حى said...

عزيزتى
مش عارف اللى بتعمله ده صح ولا غلط
صح لانها بتحاول تساعد نفسها علشان نكمل الحياه اللى مبهدلانا دى
ولا غلط علشان ممكن تعرض نفسها لحاجات كتير ومضيقات كتير
اصبحت الحلول اللى ادام الناس قليلة
وعلشان نهرب من نار بنرمى نفسنا فى نار
ربنا يستر على الجميع
سلام

احساس لسه حى said...

عزيزتى
مش عارف اللى بتعمله ده صح ولا غلط
صح لانها بتحاول تساعد نفسها علشان نكمل الحياه اللى مبهدلانا دى
ولا غلط علشان ممكن تعرض نفسها لحاجات كتير ومضيقات كتير
اصبحت الحلول اللى ادام الناس قليلة
وعلشان نهرب من نار بنرمى نفسنا فى نار
ربنا يستر على الجميع
سلام

klmat said...

3abdo me7tas
انا ممكن اتصرف لك فى عربيه لعبه
تحياتى لك

klmat said...

harmless
اشكرك جدا على التعليق الجميل
هو ده التحليل المنطقى اللى بيحصل
ربنا ينور بصيرتنا جميعا
للرزق الحلال ويبارك فيه
سعدت بتعليقك جدا
شرفتنى ونورتنى

klmat said...

اسكندرانى فى الغربه
اتمنى ان تكون بخير
للاسف وصلنا للدرجه دى
والحمدلله انها وجدت وسيله
للرزق ربنا يفرجها غلينا
سعدت بتعليقك
شرفتنى ونورتنى
وربنا يقويك

klmat said...

سى السيد
مدونتك جميله ودمها خفيف جدا
فى الحقيقه انا لم اختار الموضوغ
الواقعه هى اللى فرضته عليا
اتمنى للست دى واللى زيها
كل التوفيق
بالنسبه للمضايقات
اعتقد انها بتنقى من يركب
معها وربنا يعنيها
سعدت بتعليقك
شرفتنى ونورتنى

klmat said...

doba
يارب تكونى فى احسن حال
واناكمان معاكى ومع
هارم ليس فى نقس الراى
ربنا يفرجها علينا جميعا
ومن يتقى الله يجعل له مخرجا
سعدت بزيارتك
شرفتنى ونورتنى

klmat said...

ابو سويلم
شرف لى ان تشكر فى مواضيعى
اشكرك عليه جدا جدا
فعلا الست المصريه ست مشرفه
وربنا يفرجها علينا يارب
سعدت جدا بتعليقك
نورتنى
سلامى وتحياتى

klmat said...

احساس لسه حى
شرفتنى جدا بالتعليق
فى اعتقادى انه مش غلط
هى اختارت مورد رزق يناسب قدرتها
ودخله معقول
كونها بتوصل ستات فقط
بيدل انها حريصه
وربنا يحميها ويفرجها
على بلدنا
سعدت بزيارتك ويارب تتكرر
تحياتى وسلامى

momken said...

لا تتصور وأنت في ربيع حياتك أنك في الخريف
املأ روحك بالأمل
الأمل في الغد يزيل اليأس من القلوب
و يلهيك عن الصعوبات والمتاعب والعراقيل
الميل الواحد في نظر اليائس هو ألف ميل
وفي نظر المتفائل هو بضعة أمتار
اليائس يقطع نفس المسافة في وقت طويل لأنه ينظر إلى الخلف
والمتفائل يقطع هذه المسافة في وقت قصير لأنه ينظر إلى الغد
فالذين يمشون ورؤوسهم إلى الخلف لا يصلون أبدا
فإذا كشرت لك الدنيا فلا تكشر لها
جرب أن تبتسم

جميل اوى البوست بتاعك وتجربه حياتيه هايله وحاله نتمنى ان سود فى مجتمعنا
طلب الرزق ليس عيبا او حراما
ولو المجتمع فيه الف سيده مثل هذه السيده لاصبحنا افضل من اليابان

تحياتى

semsem said...

لو ناس كتير فكرت كده والله ما هيبقا عندنا مشاكل

دائما كل شى لهو حل


القصه رائعه
تحياتى

klmat said...

ممكن
ازيك . كل سنه وانت طيب
تعليقك رائع
الامل هو الى بيخلينا نستحمل
ونكمل وننجح
انا متفقه معاكجدا فى رأيك
طب يارب نبقى زى ماليزيا
اليابان حته واحده
شرفتنى جدا
تحياتى لك

klmat said...

semsem
زى ما بيقولوا الحاجه
ام الاختراع
نتمنى ان كلنا نحاول نحل مشاكلنا
شرفتينى

دكتور كسلان said...

اما قلت لازم اعلق ع البوست ده
بس حبيت اعلق ع البوست الجديد عشان اكون اول واحد
ربنا يعينها ويوفقها
طول عمر الست المصرية تشرف
بس انا زعلان ع الظروف اللى وصلتها لكده
واللى الشعب المصرى كله او معظمه بيعانى منها
منهم لله
ربنا يحاسبهم ع اللى بيعملوه فينا

klmat said...

د/كسلان
لأ طبعا مش كسلان
انا بس كنت عايزه احمسك
علشان تعلق
الحمدلله ستات مصر ورجالها بخير
منهم لله طبعا اللى وصلونا لكده
لهم يوم ويارب يكون قريب
مدونتى بتنور بتعليقك
تحياتى لك

kafrawy said...

فلنرفع القبعة

لاناس

يريدون العيش ف سلام

klmat said...

kafrawy
شرفتنى ونورتنى بتعليقك
ما قل ودل
تحياتى وسلامى

محمود علي said...


ست محترمه
وعايزه تشتغل بالحلال
والاحترام والادب

تموت الحره ولا تاكل بثديها

klmat said...

محمود
انا من رأيك
وربنا يفرجها عليها
وعلينا كلنا
سعدت جدا بتعليقك
شرفتنى مع دعوات بكل الخير

ما علينا said...

لا كدا مش نافع

دا انا لازم ادفع البونديرة دوبل
ايه التاخير اللي انا متاخراه دا

بصراحة يا كلمات
وانا باقرا اللي انتي كتباه
باحس كدااني قاعدة في مكان هادي
وجو في منهى الجمال

غير انك دايما
تبهريني
وتفكريني ببرنامج كان بييجي في الراديو
يوم السبت او الثلاثاء
اسمه من الحياه
كان دايما يجيب قصص من الحياة

بس قعلا انت قلبك طيب جدا يا كلمات
انا مكانك
كنت مستحيل اركب
وكمان منتقبة

برغم اني منتقبة
لكن ما كنتش هاركب نهائي

الحمد لله ان ربنا ستر

وحرصي بقى بالله عليكي

klmat said...

ماعلينا
كلامك جميل وتعليقك بيسعدنى
جدا انا فعلا بحب نوعيه برنامج
من الحياه والبرامج اللى فيها
لمحات انسانيه
عارفه انا لم اشعر باى خوف
مش تهور كنت شايفه واحده
بتكافح ووجدت وسيله محترمه
للرزق لكن خفت بعد
ماسمعت اراء زيك والايام
دى الواحد بيسمع حوادث فظيعه
ربنا يرزقها رزق واسع
ويديها على قد نيتها
واوعدك انى حااكون احرص
سعدت بتعليقك جدا جدا
وخلى الاجره عندى المره دى
تحياتى وسلامى