Monday, August 13, 2007

كوكى عبده


اصحى ياكريمه يالا يا بنت علشان تجيبى الجرايد وتحطيها للسكان
وتلحقى تروحى المدرسه
قامت كريمه اف يخرب بيت السكان والجرايد والمدرسه انا زهقت من العيشه دى نفسى اعيش
زى بقيت الناس
طب يالا يالا قومى هاتى الجرايد وبعدين برطمى زى ماانتى عايزه
قامت كريمه واشتريت الجرايد وهى داخله البيت شمت رائحه بارفان تفوح فى المكان اعجبتها ولقيت امامها رجل طول بعرض وانيق وواضح انه من الأثرياء
وبه بعض الشيب برأسه وسألها هو اللواء خيرى فى الدور الكام
قالت فى العاشر
تحب اطلع معاك
لأ انا حا استنى فى العربيه انا معايا ميعاد معاه الساعه 8 الصبح امام العماره
وحبيت اتأكد ان هو ساكن هنا
طب بالأذن طلعت بسرعه ووزعت الجرائد ولما نزلت
وجدته يجلس فى العربيه
وبعد عشر دقائق خرجت بلبس المدرسه
قال لها لسه نص ساعه على ميعاد الباشا تعالى اوصلك
المدرسه ردت بجد كانت امنيتها تركب عربيه واهى جت الفرصه
ركبت معاه وقالها على فكره انتى جميله اوى ياكريمه
تشكر يابيه
ايه رأيك تسيبك من المدرسه والجرايد والهم ده وتشتغلى معايا
وحاخليكى حاجه تانيه خالص
موافقه
طب خدى الكارت بتاعى واتصلى بيا علشان الحق ميعاد اللواء خيرى
لااحظ مدحت بيه ان كريمه استاجبت بسرعه للركوب معاه ولم تترد ولم تسأل عن طبيعه العمل
والبنت حلوه وقال لنفسه البيت عندها استعداد كويس اوى وشكلها يجى منه هى صحيح بلدى شويه بس دى سهله
ورجع لمقابله اللواء خيرى
اللى كان عايزه فى تسهيل الأجراءات الجمركيهالخاصه باستيراد المعدات للفندق الذى يمتلكه
وفى المقابل كان اللواء خيرى يتمتع هو وعائلته بالأقامه فى الفندق العائم الذى يمتلكه مدحت بيه
نظام شيلنى واشيلك والكل مستفيد
كانت كريمه ذكيه وجميله ولكنها ساخطه على حياتها وشايفه انها تستاهل احسن من كده بكتير ووجودها فى العماره الشيك
ورؤيتها للبنات اللى فى سنها وطريقه لبسهم زاد من هذا الشعور
ولما راحت المدرسه قابلت صديقتها نورا اللى كانت ظروفها مشابهه الى حد كبير لظروف كريمه وكل
منهما بيلعن الفقر وسنينه ويتمنى ان يكون عنده عربيه
وشقه فاخره ويحكم ويتأمر ومعاه فلوس كتيرهى دى السعاده
الفلوس والشقه والعربيه وعيشه مستريحه
وحكيت كريمه لنورا اللى حصل من مدحت بيه
شجعتها نورا على الأتصال بيه وقالت لها ياريت توصيه عليا
وفعلا اتصلت به وقابلها ولم يضيع وقت عرفها
على مستر فريد مين مستر فريد ده . ده ياستى بتاع كله حايديكى كورس فى طريقه الكلام والاكل والاتيكيت
وبعدين انتى مش نفسك تكونى غنيه ومعاكى فلوس
فريد حايعلمك كل حاجه حايخليكى هانم بصحيح
وعرفت بعد كده ان طبيعه العمل هى الرقص فى الملهى اللى فى الفندق
يعنى حاجه فرفشه ونعنشه وحاتاخد مرتب كبير ولو حبيت كمان تقيم فى غرفه من غرف الفندق مافيش مانع
كان ابو كريمه عم عزت كما يناديه السكان رجل كبير فى السن لاحول ولاقوه له وامراته هى
الكل فى الكل وكانت فى شبابها امرأه لعوب وتزوجت عزت وهى فى فوق الاربعين طبقا للمثل ظل رجل ولا ظل حيطه وبعد 5 سنين انجبت منه كريمه .
قالت كريمه لامها اللى حصل والأم على خيره الله ملعون الفقراما عم عزت فلا يملك غير انه يوافق على كل اللى تقوله ام كريمه
سابت كريمه المدرسه واتعلمت الرقص واصبح لها اسم وبقيت تتطلب فى افراح المشاهير
وشويه بشويه رقصت فى مشهد فى احد الافلام
وفيلم ورا فيلم بقيت نجمه شهيره
تظهر فى البرامج التليفزيونيه على انها فنانه وحاصله على ليسانس اداب ماهو طبيعله عملها لها علاقه بردوا بالاداب
وهى الأن كوكى عبده وعندها اكتر من عربيه وتحققت احلامها
ولكنها لم تشعر بأى سعاده ولا تعرف سبب لهذه التعاسه
كانت بتتمنى الفلوس والمركز وحصل
دخلت حجرتها ولقيت نفسها بتعيط بحرقه مش عارفه ليه كل العز والفلوس لكن مش مبسوطه
وقالت لنفسها يمكن علشان بفتقد الحب الحقيقى
ابوها وامها كل همهم فلوسها بس فى حمدى بيه اللى بيجى كل يوم علشان يشوفها
وبسمعها كلام معسول وعينيه بتأكد انه ولهان لكن طبعا مش ممكن يتجوزها كانت بتقول كده لنفسها
حمدى بيه اللى كان محامى مغمور ولكن قدر يتزوج
من احدى الارامل بعد ان ورثت من زوجها وعرف يغدر بها وياخد فلوسها. وكان يتردد على الملاهى الليليه ولكن بعد
ظهور كوكى اصبح مواظب على الملهى اللى بترقص فيه كوكى هى بالنسبه له كوكتيل من النساءلا تكتمل سعادته ولا يهنأ له بال الا برؤيتها . كان بينهم حاجه مشتركه ربما تكون الظروف والأهداف ده غير الارتياح والاتنين فاهمين
بعض كانت بتمر بينهم لحظات صمت ولكن نظرات عيونهم بتتكلم بكل اللغات وعرفت كوكى قيمتها عند حمدى وعرفت
توصله لطلبها للجواز وتم الزواج وانتقلت الى شقه اخرى كان معظم تكاليفها هى اللى دافعها علشان تكتمل الصوره
فنانه مشهوره زوجه لمحامى وقالت لنفسها كده حققت هدفى الزوج والشهره ملابس فاخره عربيه اخر موديل والكل يعرف انها ليسانس اداب ولو حبيت تقول دكتوره فى ايدها بردواكل حاجه ممكن تشتريها بفلوسها .
وفى السكن الجديد حست قد ايه الزوجات فى العماره بيخافوا على ازواجهم منها كانت بتقول لنفسها غيره بس
كانت من جواها حاسه ان الستات بتبص لها على انها خاطفه رجاله
بس الاحساس ده ساعد على ظهور حاله الحزن والبكاء تانى خصوصا بعد استغلال حمدى لها ماديا
وزادت نوبات البكاء التى تنتابها نفسها تحس بالسعاده
الفلوس والشقه والزوج والشهره كلها موجوده
بس ايه اللى ناقصها مش عارفه
الأولاد مشروع مؤجل وقابل للألغاء ماهو مش معقول الجسم الجميل ده يضيع فى حمل وولاده
كما انها تعودت على نظره الاعجاب بقوامها ماهو ده رأس مالها كما ان
العاطفه دى مالهاش حيز على الاقل فى الوقت الحالى وبينما هى تبكى افتكرت
ان فى حديث لها حايتذاع فى برنامج اهل الفن
قامت وفتحت التليفزيون كان فاضل نص ساعه على حديثها وكان فى برنامج فى قناه اخرى عن السعاده
مع طبيب نفسى شهير واتصل احد المشاهدين وحكى مشكلته انه لديه
كل ما يسعد اى بنى ادم ولكنه يشعر بغم وحزن عميق لايجد له سبب مع ان عنده مال وفير وزوجه جميله واولادولكنه
يتعذب ويبكى ولايستطيع الشكوى لأن ليس لديه ما يشكومنه
ركزت كوكى وحسيت ان المشكله بتاعتها هى . وقالت اشوف يمكن الاقى حل لتعاستى
وبدأ الدكتور يسأل المتحدث انت بتشتغل ايه ولكن كان الاتصال اتقطع
قالت المذيعه طب يادكتور نتكلم بصفه عامه فى ناس كتير بنسمع انها مش مبسوطه رغم توفر
متطلبات الحياه الكريمه وناس تانيه ظروفها الحياتيه فيها معاناه فى مستوى المعيشه ويمكن يدوبك بيعيشوا بالضرورى
وفى منهم يمكن عنده امراض والعياذ بالله ورغم كده اسعد ايه التفسير
رد الدكتور فى الحقيقه الموضوع ده كبير وعايز حلقات كتيره وفى مؤلفات ودراسات عن السعاده فى ناس
عندها رضا وحاله طمأنينه داخليه وتلاقى اقل حاجه تسعدهم الموضوع له شق علمى وكيمائى وشق تانى سلوكى
الشق الكيميائى ده ربانى فى ماده فى المخ بتفرز حاجه زى الحشيش دى مسئوله عن مزاج الفرد تلاقى واحد ماعندوش فلوس
ويقول قول ياباسط حاتفرج من هنا ولا من هنا ويسهلها عن نفسه
وتانى فى نفس الظروف او احسن يخبط ويرقع ويتنرفز
بيصعب الأمور على نفسه دى حاجه مش بأيد الواحد لها علاقه بالوراثه والجينات بس فى ادويه بتقوم بعمل الماده اللى بيفرزها المخ
طب والشق التانى السلوكى
ده بيبقى ان الواحد بيعمل حاجات هو عارف انها غلط لكن بتسبب له سعاده وقتيه وبعدها يشعر بالندم ويعيد الكره ويفضل
يعذب نفسه زى التاجر اللى بيغش بضاعته وعايش دور التاجر الأمين اللى بيخاف ربنا فى الوقت نفسه هو عارف انه بيرتكب ذنب
وكل ما بيزيد ذكاء المذنب يتفنن فى اسلوب الغش والتغطيه عليه ويعيش فى صراع
بين الصوره اللى بيتمناها ادام الناس واحساسه بالذنب وعدم احترامه لذاته يسبب له
الم نفسى
سرمن اسرار السعاده هو انسجام الظاهر والباطن حاله الصلح بين الانسان ونفسه بينه وبين الآخرين والأهم بينه
وبين الله سبحانه وتعالى الأيمان بالله وانه قاضى عادل وانه بيعمل مايرضاه الله ولايغضبه بيمنحه قوه وسعاده
كمان اعمال الخيرمساعده الفقراء اعانه مريض و العمل الشريف
واذا بكوكى تجهش بالبكاء بصوت عالى اه ياقلبى هوده انا نفسى اكون محترمه نفسى الناس تحبنى وتحترمنى كانسانه
ومش قادره ابطل رقص واشوف الكل وهو بيحسدنى على جمالى
طب اعتزل واتحجب لأمش حااقدر طب ماانا كمان ببسط الناس واسعدهم وده عمل شريف اما انت صحيح دكتورمش تمام اهىء اهىء
طيب بقى احول اشوف البرنامج بتاعى



تمت





32 comments:

محمود علي said...


انتي لخصت كتير من مشاكلنا
في قصه جميله جدا

ايوية said...

قصة جيدة ومعبرة عن واقع ناس كتير بتحلم انها توصل لحجات كتير بسرعة ولما بتوصل بسرعة بتزهق بسرعة

اشكرك

aliaa said...

جميلة اوى القصة يا كلمات
كتير من الناس عايشة حياه كلها ترف لكن مش لاقيه السعاده لان السعاده بتيجى من التقرب من ربنا وحب الله وليس حب الشهوات
ووالله الناس لو جربت بس انها تقرب من ربنا مرة واحده وتشكى همومها هتعرف معنى الحب والسعاده
ربنا يهدينا جميعا
ليكى يا جميل عندى تاج تعالى خديه
وجاوبى عليه

shahy said...

تسلم ايدك يا اميرة
القصة جميلة جدا

ماشاء الله عليكي

في انتظارك تمتعينا كمان

تحياتي

3abdo me7tas said...

السلام عليكم
بصراحة القصة بتاع حضرتك بتتكلم عن حاجات كتير اوى مش حاجه واحده يعنى بتتكلم عن الفقر والغنى والحرام والحلال وراحه البال و و و و
حاجات كتير اوى الواحد مننا نفسه يبقى عنده عربية و و و سواء جاية بطريقة شرعية او غير شرعية انا بقو نفسه بس احنا عايزين الستر من عند ربنا وبس لو عرفنا نجيب العربية و الحاجات التانية بعرقنا وبفلوس حلال ماشى يبقى تمام لو معرفناش يبقى نعرف ان ربنا مقدم لينا الخير باذن الله
فيه حاجات كتير عايز اتكلم فيها بس مش مجمع بصراحة
بس عجبتنى آخر القصة
وأقدر أقول على آخرها
ولا حياه لمن تنادى
تمت
:D

ما علينا said...

قصة قصيرة سريعة جامعة شاملة

ايه يا كلمات دا كله

اكتر حاجة عجبتني
نهاية القصة
واقعية جدا
فعلا الناس بتتاثر وضميرها يوجعها
لكن بشكل مؤقت
زي كريمة كدا

نفسها تنضف
وتحترم نفسها بس التمن غالي من وجهة نظرها
او صعب عليها

يبقى
دمعتين
على بقين هو دا قدري ونصيبي

وتغير بقى تشوف البرنامج بتاعها
غالبيتنا كدا
في الاخر بنقلب القناة
ونكمل حياتنا عادي
بنفس اسلوبنا
اللي هو اصلا سبب تعاستنا

Anonymous said...

El ksa wd7t moshklt el shbab fi masr el ezdwgya, el ksa bt2ol klam zy el fol

دنــــيــــــا مـحـيـرنـي said...

عزيزتي كلمات مقتدرتش اسيب القصه غير في نهايه كلمتها بجد جذبتني جدا ما شاء الله عليكي بس النهايه كان نفسي توب ادينا امل شويه ان المذنب و المخطي ممكن يرجع لله بس انت عارفه الحقيقه هي نفسها النهايه الاي قولتها هاقول ايه ربنا يهدي كل عاصي
تحياتي يا مبدعه

klmat said...

محمود على
اشكرك جدا على التعليق
واتمى مدومه الزياره
شرفتنى
تحياتى وسلامى

klmat said...

ايويه
نورتنى بتعليقك اغلبنابعد
مانمتلك ما كنا نتمناه نكتشف
انه كان لايستحق كل هذا العناء
لانها ماديات فانيه
بل ان البعض يتمنى لو لم يحصل عليه
زى اللى حب واتحدى العالم علشان يتجوز حبيبته
وبعد كده نسمع انه طلقها

شرفتينى تحياتى وسلامى

klmat said...

aliaa
اولا اشكرك جدا جدا على التاج
ده شرف ليا وبأذن الله ارد عليه
ثانيا تعليقك جميل
السعاده الحقيقيه انك تحسى ان
ربنا معاكى فى اكتر من كده ايه
ربنا يصلح حالنا جميعا
شرفتنى وميرسى لك على التاج
تحياتى وسلامى

klmat said...

shahy
ربنا يخليكى دايما رافعه
معنوياتى انا سعيده جدا
انها عجبتك
تحياتى وسلامى

klmat said...

3abdo me7tas,
سعيده جدا بمتابعتك
كل ده وانت مش مجمع
امال لما تجمع حاتقول ايه
وعايزه اعرف رايك بعد ما تجمع
تحياتى وسلامى

klmat said...

ما علينا
مش عارفه اقولك ايه
على تعليقك الجميل وتحليلك
انتى فعلا بتنورى المدونه
انا فكرت فى النهايه
ورأى من رأيك
هو ده اللى بيحصل فاغلب
الاحيان
لايغير الله ما بقوم حتى يغيروا ما بانفسهم
هى مش عايزه تتغير عايزه
ترقص وتكون محترمه
مافيش حد بياخد كل حاجه
تحياتى وسلامى

klmat said...

anonymous
we enta kman t3likak zay el fawel
mercy gdn lik
salamy we ta7iaty

klmat said...

دنيا محيرانى
الحمد لله ان القصه عجبتك
وربنايجبر بخاطرك
اما النهايه فى الحقيقه
انا سمعت راقصه مشهوره
فى التليفزيون بتقول انها بتتمنى
ان تعتزل طب ايه اللى يمنع
هو بيبقى تمنى وحب الدنيا
غالب اكترووجهه نظرى ان ده الواقع
رغم ان الطريق ده مش هو طريق السعاده
ربنا يهدينا جميعا يارب
اكيد فى ناس بتوب بس
مش كتير
تحياتى وسلامى

و القادم....أجمل said...

جميلة أوي القصة يا أميرة
بجد رائعه
و شدتنا كلنا لقراية النهاية
الانسان دايما مش بيرضي بحاله
بيسعي ورا المادة
و هو معذور برضوو
بس لو جه قارن بجد
السعادة الحقيقة في راحة البال
و دوام الصحة
:)
تحياتي و حبي لك يا جميل
و ربنا يسعدك دايما
و يديم عليكي و علي الجميع
نعمة الصحة

klmat said...

القادم اجمل
دايما منورانى بكلامك الجميل
الحمد لله انها عجبتك
ربنا يدى الجميع نعمه الرضا
والصحه مع راحه البال
تحياتى وسلامى

Ert3ashat said...

روعه بجد
قصتك شدتني اوي والله انا قريتها على ك>ا مره و على طو كنت باجي اكمل
رائعه بجد احييكي

wahed said...

قصتك حلوه كتير

علي فكره انتي بجد موهوبه في كتابة القصص

وانا كمان بحب القصص


تحياتي ليكي

حــكــايــة said...

اكيد فعلا ان راحة الانسان مش فى الفلوس ولا الشهرة , لكن فى راحة الضمير

و اكيد فعلا بردو ان ناس كتير بتقول كدا و مش بتعمل بكلامها

قصتك قالت كل دا
قصة جميلة بجد , تسلمى :)

klmat said...

erta3ashat
ربنا يخليك ده بس من ذوق
حضرتك . مدونتك جميله جدا
تحياتى وسلامى

klmat said...

واحد
ربنا يكرمك لا موهوبه ولاحاجه
ده بس من ذوقك
شرفتنى ونورتنى

klmat said...

الى حكايه
ميرسى جدا على التعليق
وانتى نورتى مدونتى
راحه الضمير عامل قوى
من عوامل السعاده
ومفهوم السعاده بيختلف من واحد للتانى
يعنى لو كوكى موضوع الاحترام ده مش
شاغلها كان ممكن تكون سعيده
الله اعلم
حقيقى شرفتنى ونورتينى

david santos said...

I passed to congratulate it with its work and to desire a good August to it in vacation.

Doba said...

كلمات

حقيقى قصة جميلة قوى وبتتكلم على حاجات سلبية فى المجتمع واللى مليان بشخصيات من هذا القبيل

انا بس ليا تعقيب بسيط

فين الدين - الرضا بما يتكتبه الله سواء خير او شر - لسه الناس مبقتشى تعلم اولادها يعنى ديانة وحب الله والرضا بالمقسوم؟؟ مش عارفة

جميلة جدا قصتك - والتفسير بتاع الدكتور هايل

تحياتى وسلامى
هبة

دكتور كسلان said...

قصة جميلةجداااااااااااااا
وده شئ طبيعى
لان انا متاكد ان كل اللى كتبتيه واللى ان شاء لله هتكتبيه لازم يكون حلو
بالنسبة للقصة
انت فعلا لمستى الواقع بشكل كبير
معظم الناس مش حاسة بالسعادة حتى لو ظروفها كويسة
لان الناس افتقدت نعمة الرضا
علشان بعدنا عن ربنا
يقوالله سبحانه وتعالى فى كتابه الكريم
ومن يعرض عن ذكرى فان له معيشة ضنكا
صدق الله العظيم

اسكندراني في الغربة said...

احلي ما في القصة التحليل النفسي الي في الاخر
مين فينا مش عاوز المال و الجاة و السعادة و السلطة
مبن فينا مش شايف انة يستحق الافضل
الي عاوز كل حاجة في الدنيا عارف انة ملهوش حاجة في الاخرة
-------------
اللهم لا تجعل الدنيا اكبر همنا
-----------
القصة جميلة
وخصوصا النهاية المنطقية
كنت حزعل لو خلتيها تتحجب مثلا
بس كدة نهاية صح
تحياتي

klmat said...

David Santos
Many thanks for your comment,
With all good wslhes.

klmat said...

doba,
سعيده جدا ان القصه عجبتك
واكيد التربيه عليها عامل
ان اشرت ان والده كوكى كانت لعوب
فى شبابهادى تربيتها
انا معاكى جدا التربيه والدين
اساس وتعليق الدكتور ده
حقيقى انا سمعته من د/ عادل صادق
ميرسى جدا على التعليق
وربنا يرضا علينا جميعا
تحياتى وسلامى

klmat said...

د /كسلان
منور تعليقك بيسعدنى جدا
واشكرك جدا على مدحك فى اللى بكتبه
ده من ذوقك وكرمك
ورأيك هو الخلاصه
طريق السعاده هو ان تفعل
ما امرنا به الله
الا بذكر الله تطمئن القلوب
حقيقى شرفتنى

klmat said...

اسكندرانى فى الغربه
يامرحب بك
ويارب تكون فى احسن حال
سعيده جدا بتعليقك
والحمدلله ان النهايه عجبتك
علشان ماتزعلش
وتعليق الدكتور علميا صح
ربنا يسعدك ويؤنس غربتك
وترجع لاهلك وحبايبك واسكندريه
بالف سلامه
تحياتى وسلامى