منى الشاذلى العاشره مساء

برنامج العاشره مساء

من البرامج الناجحه والمميزه رغم تشابه مضمونه مع كثير من البرامج حقيقى بيتم اختيار المواضيع المطروحه للمناقشه بعنايه كلها مواضيع مهمه وبتمسنا ومواكبه
لما يحدث يوم بيوم ودايما الضيوف بيتم اختارهم بذكاء مش بس فنانين لأ شخصيات جميله زى ابله فضيله د/ زويل د/مجدى يعقوب والحاج العربى توشيبا العربى ا/امين هويدى وفهممى هويدى وابطال من حرب اكتوبر ومن اشتركوا فى تحطيم المدمره ايلات وغيرهم كثيرين ممن نفتخر بهم ونحتاج لمعرفتهم اكثر ولنجد قدوه ومتعه فكريه تنعشنا وتنقذنا من كثير من البرامج التافهه

فى رأيى ان البرنامج بيرفع درجه الوعى عند المواطن المصرى وبيحترم عقله .كما انه يكشف المسئوليين على حقيقتهم بدون تجريح وبيفضح الفاسدين بطريقه ذكيه عن طريق تسليط الضوء على الوقائع ومناقشه كل الاطراف بطريقه موضوعيه كماحدث فى الاماكن التى تعانى من عدم وجود مياه واتكلم فيها المواطنين عن معانتهم اليوميه من سنين ووعود المسئولين التى لاتتحق وعن الدروس الخصوصيه والتحدث مع اولياء الامور والمدرسين .وقضيايا التعذيب واخلاق رجال الشرطه والعباره واكياس الدم الملوثه وغير ذلك كتيرمن المواضيع الهامه

واخيرا حلقه اول امس مع ا/ عادل حموده ومناقشه موضوع حبس الصحفيين واتاحه الفرصه للمشاهدين لأبداء ارائهم بحريه ومن الحلقات المميزه
فى حلقه شفتها تاريخ 16/10كانت مع فلاح مصرىبسيط لكن غايه فى الذكاء ومتابع للأحداث عن طريق القنوات الفضائيه شدنى حديثه ولابقته اكتر من كثير من الشخصيات العامه الشهيره . اتكلم فى كل حاجه سياسه وفن واقنصاد وربط بينهم اتمنى اعاده الحلقه لأن اسلوبه بالنسبه انه حاصل على شهاده محوالاميه ينم عن وعى عالى جدا واسلوب ممتع حتى ان منى الشاذلى كانت مستمتعه بحديثها معاه
كان كابس عليا النوم لكنى لم استطيع ان اقفل التليفزيون فقد شدنى حديثه وجعلنى فى منتهى اليقظه واعطانى امل
لما عندنا ناس بهذا الفكر الجميل حقيقى تمنيت ان كل الناس تشوف الحلقه دى وتشوف ازاى فلاح بسيط لكن فطين

شايف ان احنا بلد طارد للعلماء وده تعبيره هو . قال عايز حد يقوللى لو زويل رجع مصر حا تستفيد ايه من الفميتوثانيه من غير مايكون عندنا قاعد ه علميه. فى الزراعه ازاى ازرع كنتالوب قبل القمح مافيش ترتيب للأولويات هو بيتكلم بأسلوب جذاب وفيه ذكاء وبيضرب امثله واقعيه رغم انه معاهوش اى مؤهل ازاى نزرع الصحراء ونبنى على الارض الزراعيه .ونلوث النيل

حاجه تجن اجدادنا يبنوا الأهرامات واحنا مش عارفيين نعمل ابسط حاجه مش عارفيين ننظف بلدنا عندنا اهرامات من القمامه حاجه تكسف

وطبعا من اسباب نجاح البرنامج المذيعه الرائعه منى الشاذلى

فى رأيى هى افضل وانجح مذيعه مصريه

من الشخصيات الجميله الهادئه .اللى بتمتع بقبول عالى وملامح مصريه اصيله وصفاء ذهنى وثقافه ولابقه

واسلوب راقى فى الحوار ووعى بادق تفاصيل الوضوع اللى بتناقشه
جريئه ولكن بحياء ورقيقه ومؤدبه مثال للمذيعه المحترمه وبيعجبنى احتشامها فى مظهرها ولون شعرها الاسود نادرا ماتلاقى مذيعه شعرها اسود كله شعره دهبى .هى شخصيه مميزه بمعنى الكلمه
برنامج احترمه لأنه فعلا بيحترم عقول المشاهدين