Monday, December 31, 2007

سنه جديده علينا سعيده


امنياتى المعنويه
ساعات قليله وتنتهى السنه دى وتبدأ سنه جديده يارب تكون سعيده علينا كلنا
ولما قعدت افكر فى اللى نفسى يتحقق السنه الجايه لقيت كل امنياتى معنويه
نا نفسى اوى 2008 يحصل فيها حاجه كبيره ايه هى مش عارفه بالظبط بس محتاجه حاجه تهزنى من كتر الفرحه حاجه تكون لبلدنااشوف كل المصريين فرحانين ومتفائلين وواثقين ان بلدنا بتاخد اول خطوه فى الطريق الصحيح البلد نظيفه والشباب واثق ان فى فرص عمل ومصانع بتبنى وبنزرع اراضينا الزراعيه مش بنبنى عليها وبنبنى فى الصحراء مش بنزرعهاومافيش اصوات كلاكسات ولا ميكروفونات فى الشوادر وصوت الأذان جميل وفيه خشوع وخطبه الجمعه بدون زعيق وتشنج ومافيش فتاوى من اياها
ومافيش اهمال لمنع الحوادث والكوارث والمتسببيين فى غرق العباره وتلوث الدم والمياه والفاسدين كل واحد فى موقعه المناسب
وانا بكتب الكلام ده كنت حاسه زى ما اكون بجرى من كتر ما الأمنيات كتيره لأن للأسف بلاوينا متراكمه وكل يوم بتزيد حته وحسيت وكأن افكارى فى الخلاط .لكن المختصر نفسى تبتدى اول خطوه فى التغيير الصحيح خطوه تدينا امل . لقتيت دماغى فيها اغنيه ونشيد ماهى بقيت فى الخلاط
اغنيه فايزه احمد لقيتك فين المقطع
اه ياقلبى ودعوه من قلبى اللى حب
اللى غايب هاتو تانى
واللى خاصم صالحو تانى على اللى فايتو من سنين
اللى قاسى حننو
واللى غيران هدى قلبه بكلمتين
ونشيد الرائع النقشبندى
ماشى فى نور الله بدعى واقول يارب يارب
مالى عنك غنى وانت فى غنى عنى يارب
تبارك لى فى مالى وصحتى وعيالى وكل اعمالى يارب يارب
يارب كل الدعوات اللى فى الخلاط قصدى دماغى ربنا يحققها لنا جميعا قولوا يارب

36 comments:

mohand said...

السلام عليكم

ربنا يبارك لك في كل اللي طلبته ويحققهولك

كل سنه وانتي طيبه

زيا رب السنه الجايه تكون افضل عليكي

تحياتي

و القادم....أجمل said...

السلام عليكم
ان شاء الله الايام الجاية
بإذن من الله
تكون بتحمل تفاؤل و خير للناس كلها
ربنا ينولك اللي في نفسك يا أميرة
و يتقبل دعواتك

تحياتي و حبي

:)

فى القلب said...

كل سنه وأنتى طيبه يا جميله

ويارب تكونى أحلى وأجمل فى السنه الجديده

ولــــــــــو said...

حلو اوي رغم كل اللي بتشوفه وبيحصل حوالينا واللي بيدينا احباط ف انه مش هايكون فيه حاجه كويسه تظهر ف الافق اننا برضه نبقى متفائلين
اتمنى ان ربنا يحققلك امنياتك وتكون سنه بدايه نتغير فيها ونغير اللي حوالينا
كل سنه وانتي كويسه

دكتور كسلان said...

كل سنة وانت طيبة
وبالف خير وصحة وسعادة
انت وكل اللى بتحبيهم

ويارب تتحقق كل امنياتك واحلامك
اولا حلامك الشخصية ليك ولاسرتك
ثانيا احلامك بالنسبة لبلدنا

ويارب نشوف بلدنا احسن من كده
وان شاء الله هتكون
طول مافيها ناس زى حضرتك
احنا محتاجين فعلا للامل ولمزيد من التفاؤل

بدعيلك من كل قلبى ان كل احلامك تتحقق

سلاااااااااااااااااااااااام

Anonymous said...

آمال و طموحات مشروعة أدعو الله أن يحققها للشعب المصرى ، كل عام و أنت و الأسرة الكريمة بخير وربنا يعيد عليكم الأيام وأنتم جميعا فى كامل الصحة و العافية ..
أبو خالد

rack-yourminds said...

السلام عليكم

يا رب حقق املنا وطموحاتنا

يا رب بارك لنا في صحتنا

كل سنه وحضرتك طيب وفي خير وسعاده مع اسرتك

تحياتي وسلامي

سلوى said...

كل سنه وإنت طيبه أيتها الرقيقه
ويارب يكون عام خير وسعاده وصحه لك ولكل أسرتك وكل من حولك

أعنيه فايزة جميله فعلا


أما النقشبندي فما أروعه

بجد إنت أخترت إتنين بحبهم جدا

دمتى بكل ود

klmat said...

mohand
وعليكم السلام ورحمه الله وبركاته
اشكرك جدا على امنياتك ليا
وربنا يكرمك وتكون سنه كلها
حب وسعاده وصحه وهنا
لك ولكل حبايبك
سلامى

klmat said...

القادم اجمل
وعليكم السلام ورحمه الله وبركاته
ويارب ياولاء كل القادم يكون اجمل
لك ولعيلتك وكل حبايبك
ونجاح باهر باذن الله
سنه كلها حب وسعاده لك
ياجميله
سلامى

Hadota ... حدوتة said...

ربنا يسعدك ويحقق لك كل احلامك يارب

كل سنة وانتى طيبة يا جميلة

happy new year

Anonymous said...

كل عام والفرح يشعل شموعة بدنبتك.........كل عام والهنا تزهر ورودة ببسمتك.......كل عام وانتى الى الله اقرب وعن المعاصى ابعد.وشكرا لزيارتك لى فى دنيتى الجميلة

Unknown said...

ياااااااااااااااااااااااااااارب
2008
تبقه سنه فك الكرب عن المصريين
اللي هما احنا
يارب مطالبنا مش كتير
هما مطلبين
حاكم عادل وشعب محترم
وكل عام وانتم بخير
:)

احساس لسه حى said...

عزيزتى
كل سنة وانتى طيبة وبخير يا رب عليكى وعلى كل اللى بتحبيهم قولى اميين
شوفى اتمنى زى ما انتى عاوزه بس اتمنى الممكن لا المستحيل وانتى امنياتك كتير واللى محصلش فى عشر سنين مش هيحصل فى سنه
بس بندعى ربنا بالستر بس ونحمده على اللى بيحصلنا يمكن رحمنا من حاجات اكتر بسبب صربنا ده واملنا
سلام

ماسة الحب said...

يارب كل اللي اتمنتيه يتحقق مع اني شاكة في الموضوع ده اصلا بس مش عيب انك تتفائلي
كل سنه وانتي طيبه ياجميله اسكندريه
انتي حد جميل عشان كده امانيكي يارب تتحقق

Anonymous said...

عام سعيد عليكي يا اميرة
عام ملي بالنجاح والفلاح
عام كله سرور
عام يكون زيادة ليكي في كل خير يارب

klmat said...

فى القلب
كل سنه وانت واسرتك وحبايب
طيبين وكل احلامك تتحق
مدونتك جميله جدا
بتدخل القلب
ربنايوفقك
سلاااامى

klmat said...

ولو
اهلا بك وكل سنه وانت وحبابيك
بخير وعلشان نقدر نعيش لازم يكون
عندنا امل رغم اللى شايفينوا
وتخيل فرحتنا لما املنا يتحقق
ان شاء الله تكون سنه سعيده علينا
سعدت جدا بتعليقك
ربنا يوفقك
سلامى

klmat said...

د / كسلان
كل سنه وانت طيب وكل اسرتك
وحبايبك بخير . وربنا يخليك حاسه
بدوعاك وانت فى منزله اولادى ربنا
يفرحنا بك وتكون سنه جميله علينا كلنا
وربنا يسعدك ويكرمك ويفرح قلبك
يااارب واشكرك من قلبى على كلامك الجميل
سلامى

klmat said...

ابوخالد
كل سنه وانت واسرتك وحبايبك
طيبين وبلدنا بخيرونشوفها فى مكانه
تليق بها يارب
شرفتنى بتعليقك
سلامى

klmat said...

rack yourminds
اهلا بك وكل سنه
وانت واسرتك وحبايبك بخير
وربنا يحقق كل امانيك
وسنه حلوه ان شاء الله
دايما جابر بخاطرى
ربنا يخليك
سلامى

klmat said...

salwa
اهلا بك وكل سنه وانت واسرتك
وحبايبك بخير وربنا يحقق كل احلامك
وسعيده ان اختيارى عجبك
وربنا يقبل دعاؤنا يارب
ويديك الصحه والعافيه ويزيدك علم
سلامى

klmat said...

حدودته
كل سنه وانت طيبه ياقمر
وكل اسرتك وحبايبك بخير
وكل امانيك تتحق
وتكون سنه جميله لنا
كلنا ياااارب
سلامى

klmat said...

نور الهدى
كل عام وانت واسرتك وحبايبك بخير
وربنا يسمع منك يارب
ويكتب لك كل اللى فيه الخير
مدونتك جميله
سلامى

klmat said...

mask
اهلا بك وكل سنه وانت
واسرتك وحبايبك طيبيين
انا ممكن اضمن لك شعب
محترم اما المطلب التانى
ربنا يرزقنا به يارب
انا فى صلاتى بدعى ربنا
ان يولى امرنا لمن يتقى
الله فينا
سنه سعيده لك ولبلدنا ياااارب
سلامى

klmat said...

احساس لسه حى
كل سنه وانت واسرتك وكل
حبايبك بخير عارف الأمنيات
كتيره بس ده حقنا وبلدنا ممكن تبقى
احسن من كده بكتير بس لو فى نيه
ورغبه من القياده
مش صعب ربنا يحقق امالنا يارب
سعدت جدا بتعليقك
وسنه حلوه انشاء الله
سلامى

klmat said...

ماسه الحب
كل سنه وانت واسرتك
وحبايبك بخير .مش
كتير علينا طلبتنا مش مستحيله
هى بس يبقى مافيش سرقه وفى عدل
كل حاجه حاتتصلح ربنا يحقق
املنا يارب ويحقق لك كل احلامك
وتكون سنه جميله وسعيده
لك ولنا يااارب
سلامى

klmat said...

بيبيووووو
كل عام وانت بخير وكل اسرتك
وحبايبك بخير وتحققى كل امانيكى
واحلامك وتكون سنه جميله يااارب
سلامى

محمد الوكيل said...

يالا كل سنة وإنتم طيبين وآدي السنة الجديدة بدأت والحمد لله..
وربنا يوفق الجميع ^^
بالمناسبة يا ريت حضرتك تشرفي مدونتي الجديدة جداً بالزيارة:
http://mangablade.blogspot.com
شكراً
محمد المصري

walaa said...

كده انت بتتكلمى عن مصر فى الاحلام
صدقينى يا كلمات كلنا نفسنا مصر تبقى احلى بلد فى الدنيا بس ازاى فى وسط الفساد ده وكلنا واقفين نتفرج على الفساد ده
ويارب كل احلامنا كلنا تتحقق

تحياتى لك بعام اسعد علينا

ولاء

klmat said...

محمد المصرى
اهلا بك وكل سنه وانت طيب
واسرتك بخير والف مبروك
لمدونتك وبالنجاح والتوفيق بأذن الله
واشكرك على تشريفى ودعوتك الكريمه
سلامى

klmat said...

walaa عزيزتى
اهلا بك وكل سنه وانت طيبه
وكل اسرتك وحبايبك بخير
وربنا يصلح حالنا وانا شايفه
ان كل انجاز بيبدا حلم وبعدين
نبدأ فى تنفيذه والناس بدأت تتحرك
والأضرابات والأعتصامات كترت
فى ايجابيه وان شاء الله تكون سنه
سعيده علينا وعلى بلدنا يااارب
شرفتنى وربنا يسعدك
سلامى

Doba said...

يارب يحققلك كل اللى عندك فى الخلاط ويباركلك فى الاولاد وفى الاسرة ويصلح حال بلدنا

والاهم

اننا نصلح من أنفسنا

تحياتى يا كلمات كتير ممزوجة فى كل كلمة موضوع جديد مختلف متألق

هبة

رحــــيـل said...

عزيزتى اميره

ربنا يوفقك ويكون عام سعيد عليكى يارب

ويتحقق كل اللى بتحلمى بيه

تحياتى وتقديرى

klmat said...

doba عزيزتى
اهلا بك ياهبه وكل سنه وانت واسرتك وحبايبك بخير
وميرسى على كلامك الجميل ودعواتك
وربنا يسعدك ويحقق امانينا كلنا يارب
ربنا يخليكى

klmat said...

ra7eel
عزيزتى ساره اهلا بك
وكل سنه وانت واسرتك وكل حبايبك بخير
وان شاء الله تكون سنه سعيده تحققى فيها
كل امنياتك وتمحى فيها كل الجراح
ياااارب
سلاااام