Wednesday, May 7, 2008

هديه بطعم الحب


من يومين طلع فى دماغى افتح كل الكروت التى تهدى لى فى المناسبات
لدى كارت مميز جدا من زماااااااان ودى حكايته
كان عمر ابنى الكبيرحوالى 5 سنوات فى كجى ون والصغير 4 وفى يوم عيد الام كان والدهم بيشترى لهم هدايا لكى يقدموها لى ولكنهم اردوا ان يهادونى هديه منهم الى جانب هديه ابيهم من حر مالهم .
ففوجئت بهم فى غايه السعاده وبيعطونى كارت مازلت احتفظ به حتى الآن عباره عن قطعه كرتون لونها بيج ومضلعه كانت موجوده داخل علبه دواء !! قاموا بقطعها ورسموا عليها سيده ماسكه حقيبه يد واشاروا عليها بسهم وكتبوا ماما . ...
ياسيدى على الدقه
لها رجل طويله واخرى قصيره وايد الى نصف وسطهاوالآخرى طويله وشعر غريب منكوش
وكتبوا اهداء كل حروفه الاملائيه خطا وملونين الكارت حقيقى تحفه.. وكتبوا ماما حبيطتنا الحب امى
حقيقى كارت موطميز جدا صناعه يدويه
دى اغلى هديه عندى وأضعها بجوار علبه ذهبى وكأنها مجوهرات وهى تعنى لى كده فعلا فرحت جدا جدا بهذه الهديه وفى اليوم التالى لعيد الام ذهبت الى محل بجوار منزلى يبيع عطور وماشابه ولقيت البائع بيبتسم لى ابتسامه عريضه وبيرحب بيا وقاللى ان اولادى مروا عليه لما نزلوا من اتوبيس المدرسه وطلبوا منه اغلى زجاجه برفان بفلوسهم بقى واعطوا له كل مايملكوا وهو 75 قرش
ولما شرح لهم ان مافيش برفان بالمبلغ ده قاللوا ماشى هى بتحب كريم نيفيا وطبعا المبلغ ما يجبيش المهم ان الرجل ضحك معاهم وقالهم ماما بتحبكم اوى من غير هدايا لاتتصوروا سعادتى بهذه القصه اللى فات عليها كتير وعرفتها من البائع وقاللى كانوا متأثرين اوى لعدم تمكنهم من الشراء

تفكيرهم ان يضحوا بكل مايملكوا 75 قرش حته واحده يعنى 2 شيبسى وواحد كارتيه بسعر وقتها معناه كبير
لان الشيبسى كان حبهم الاول
سيظل هذا الكارت غالى على قلبى لان احساس الحب فيه واصلنى اوى واللهى لو شفتوا الكارت لازم تضحكوا من الصوره المرسومه الست مافيش فيها حاجه طبيعيه كله مشوه لكن بالنسبه لشعورهم قمر قمر .. ولا الكلام مش مترتب امى الحب حبيبطتنا .. بالنسبه لى يفوق فى جماله احلى بيوت الشعر
الخوف يكونوا شايفنى كده هههههههههههه
لما بضحك معاهم واوريهم الكارت بيضحكوا من قلبهم ويقوللى ياحبيبتى ده شكلك فى هذه المرحله
انا اللى كده لأ وماسكه شنطه...حبايبى ربنا يبارك فيكم وافرح بكم يااااااااارب

تحديث
بناء على طلب المدونين تم انزال الصوره . عايزه اقولكم ان عندى 2 كارت تانين صناعه يدويه لما شافوا فرحتى بالكارت
قالوا نديها كمان . السهم موجود فى الكارت اللى بنط فيه الحبل معلش حصل لبث فى بوست تانى بقى
واحد راسمنى بنط الحبل آه واللهى بس الشهاده لله مش منكوشه بزعرورتين !!! والتانى سموا سوسو قصدهم صوصو نسبه الى صوصوه العصافير بس عايزين جاليرى يقدر
الفن :D
احقاقا للحق هما فنانين فعلا بس مش رسم . الصغير كان بيعزف بيانو سماعى وهو عنده 7 سنوات من غير ماحد يعلمه
ودخل معهد موسيقى فى الصيف الموضوع عايز بوست تانى
الكبير غاوى تمثيل وكان فى فريق التمثيل فى كليه فكتوريا وهو فى ثانوى ولما دخل كليه الهندسه كان فى فرقه التمثيل
وعمل مسرحيه بس الحقيقه انا تعبته لأن كل شويه بروفات وخفت عليه
هما دلوقتى مهندسين ونفسى اجوزهم واعمل زى مارى منيب ربنا يسعدهم وكل الشباب يااارب
:)

75 comments:

و القادم....أجمل said...

أووووووووووووول تعليق

:D

و القادم....أجمل said...

يا عسل يا عسل يا عسل
الله بجد
ربنا يخليهوملك يا أميرة يارب
و يخليكي ليهم
أكيد شعور جميل أووووي
الأطفال دول براءة و جمال
ملوووش نهاية

ربنا يسعدكم يارب

:)

أبو خالد said...

من أراد الراحة و السكينة فليدخل مدونة أميرة
أختى الغالية/أميرة
قلت قبل هذا أنتى من زمن جميل
و لو أنك مقلة فى الكتابة
و بتوحشنا كلماتك الرقيقة الحميمية
ربنا يفرحك بأبنائك و يجعلهم من السعداء
دمتى إنسانة تنتمى لزمن جميل مش شرط
بالسن و لكن بالروح
تحياتى و أحتراماتى

Empress appy said...

ههههههههههههه والله بقالى تلات ايام مش عارفه اضحك
بس موتينى من الضحك ربنا يخليهم لكى بجد بيبقى شعور حلو من جواهم

klmat said...

القادم .. اجمل
اهلا ياولاء ده انتى اللى عسل ابيض
وحلاوته زياده على رأى عدويه
جميل تعليقك يالولو فعلا مافيش اجمل من برأه الأطفال وعفويتهم
ربنا يخليكى ويسعدك وافرح بك
ويكون القادم اجمل دايما يااارب
خالص حى وتقديرى

klmat said...

اخى العزيز ابو خالد
اهلا بك وكمان دعايه لمدونتى لراغبين
الراحه والسكينه انشالله يخليك يالا
بقى عايزه اشوف راغبين كتير:D
والدعايه من مصدر موثوق به
ابو خالد شخصيا
معلش انا كنت مشغوله اعذرنى فى التأخير
فى الكتابه
وميرسى جدا على كلامك الجميل ودعاؤك لى
ولاولادى ربنايخليك انا فعلا من الزمن
الجميل بالروح والسن .. زميله يعنى :D
يارب يفرح قلبك ويطمئنه ويديك
الصحه انت واسرتك وكل حبايبك
خالص احترامى ووتقديرى

klmat said...

appy
اهلا بك . 3 ايام من غير ضحك
ليه كده يارتينى كتبت قبل كده
ده انتى اجمل فرفوشه ربنا يسعد
قلبك ويبعد عنك كل ما يعكر صفوك
الحمد لله انى هونت عليكى شويه
ربنا يفرحك ويوفقك
خالص حبى وتقديرى

الربان said...

تحياتي

موضوع جميل...ما اجمل الحب بين افراد الاسرة الواحدة....بارك الله لك فيهم
و بارك فيك لهم...

هذه اولي خطوات بناء الاسرة السعيدة، الحب هو الاساس ...و تعليم الابناء الحب
يبني ابناء اسوياء نفسيا ..

مرة اخري بارك الله فيك و فيهم...

تحياتي و تقديري

رحــــيـل said...

عزيزتى اميره

ربنا يبارلك فيهم يارب

هى بجد فى حاجات بيكون ليها طعم تانى كده
وخصوصا لما تكون من حد بنحبه قوى

ربنا يخليهملك وتفرحى بيهم

منى said...

يعنى اولاد اميره الجميله
عايزاهم يعملوا ايه غير كده؟
طبعا طالعين لمامتهم
فى الحنيه والرقه بس مش فى الرسم اكييد
هههههه
ربنا يبارك لك فيهم ويسعدكم دايما مع بعض
ويفرحك بيهم وميحرمكوش من بعض ابدا
تحياتى وحبى

Shaimaa Zaher said...

جميل أوي يا أميرة :))

بصراحة أنا كمان حبيت أولادك مع إني ما شفتهمش وطبعا حبيتك أكثر وأكثر ...مش مامتهم بقى، وأمال إيه؟

:))))

سمراء said...

الاولاد هديه غالية من ربنا
اجمل هدية
لما بقابل اولاد اصحابي في كل الاعمار من سن 1 يوم الى 20 سنة
بحس اني بحبي معاهم بتكلم اول كلمة بمشي اول خطوة بقلق عليهم في الامتحانات بسمع حكايات حبهم الساذجة بوصلهم دروسهم وبشتري معاهم هدومهم وهدايا امهاتهم واصحابهم
بتجدد كل يوم معاهم
ربنا يسعدهم ويفرحكم بيهم ديما ويخليكوا لبعض
اسفة طولت عليك
تسعدني زياراتك وتعليقاتك
سمراء

la3lahakhier said...

ههههههههههههههههههههه
يارب يباركلك فيهم بس عجبتنى اوى رجل ورجل دى
ههههههههههههههههه
كل التحية يا احلى الامهات

Unknown said...

ههههههههههه
عجبني اوي الكارت بتاع الاولاد
والله دي احلي من اغلي هدية
ربنا يبارك فيهم
ويخليهم وتفرحي بيهم وباولادهم كمان يا احلي ام في الدنيا
وكمان لية منشرتيش الصورة انا كنت نفسي اتفرج علي الابداع بتاعهم شكلهم رسامين زي
همابقو اد اية دلوقتي
انت عارفة انا مرة جبت لماما برفان بس كانت ريحتة وحشةةةةةةة بس علي اد الفلوس
الراجل لما طلعتلة الفلوس اللي معايا استقل بيهم قام قال بدل ما ازعلها وامشييها اديها فاضية اداني حاجة كدا متعرفيش بدرة العفريت المهم انا فرحت بشكل الازازة وقولت يلا هتعجب ماما
طبعا ماما مردتش تكسفني وقالتلي حلوة بس طبعا انا اخد بالي انها عجبها بامارة انها محنطها في الدولاب ومش بتحط منها اكتشفت وقتها انها مش حلوة هههههه طفلة بقي
سلام

walaa said...

ربنا يخليهملك وتفرحى بيهم يارب
اكيد فى ذكريات جميله لا تنسى وما احلى هذه الذكريات لما تبقى من الاولاد
دمت ام رقيقه
ولاء

(احمد سكر ) said...

ربنا يبارك ليكى فيهم يارب

ويخليهملك

واكبر هديه انهم يدخلو عليكى بشهاده كبيره

تحياتى

وبوسه لاولادك من خالهم
سكر

حسن ارابيسك said...

موضوع الكارت ده موضوع جميل وخلق انتفاضةصغيرة جوه قلبي كده من تخيلي للحدث أنا ممن يحتفظون بأشياء كثيرة في حياتهم لها مناسبات مميزة وتتضمن ايضا اوراق كثيرة ليس لها أي قيمة مادية غير ذكرى غالية جدا فحينما نسترجعها عند مشاهدتها توجع قلبنا شويه مهما كانت الذكرى حلوة
لذلك فمعك كل الحق باعتزازك بذلك الكارت السريالي من أولاد حفظهم الله لكي وجعلهم أبناءً بارين بك
كنت أتمنى مشاهدة الكارت الجميل لأنني من محبي مشاهدة رسومات الأطفال الجميلة العفوية
أرابيسك

سلوى said...

ما شاء الله
ربنا يخليهم لك ويبارك فيهم

وتفرحي بيهم

بس إبقى إعزمينا

قصتك جميله
وطبعا لازم الكارت ده يكون له مكانه خاصه

ربنا يبارك لكم فيهم يا رب ويخليكي لهم

أنا سلوى ... بس من مدونه كلام البنات
إبقى نورينا

3abdo me7tas said...

ازيك يا مدام أميرة
اخبارك ايه
انتى نسيتينا باين قلت افوت أسلم عليكي واعزمك
اولا ربنا يخليلك اولادك يا رب
وفعلا الهدية مش بقيمتها او بشكلها
الهدية برمزها
فعلا الموقف ده عمر ما انسان ينساه
ربنا يخليهم ليكي يا رب
تانى حاجه
انا عازمك على خطوبتى
هى جنبكم
تعالى البلوجر عندى وانتى ترعفى فين اوعى متجيش
:)

دنيتى الجميله said...

عزيزتى اميره
بجد بجد ضحكتينا من القلب
ربنا يسعدك يا رب
بس يا سلام لو كنتى حطيتى صوره الكارت
وااااااووو
مكنتش اعرف انك جميله كده
بنتى برضوا فى الحضانه رسمتنى جميله جدا
انا صوعقت لماشفتها
واحده رأسها زى الكرنبه وجسمها زى المثلث بس الوارم شويه
ولا رجليه وايدى حكايه
يظهر اننا حلوين فى عيون ولادنا قوى

klmat said...

عزيزى الربان
اشكرك جدا على كلامك الجميل جدا
وانا معاك الحب والحنان بيعملوا اسره
سعيده الحمد لله ربنا يكرمك ويسعدك
انت واسرتك ويديم المحبه بينكم
خالص تحياتى وتقديرى

الجنوبى said...

الله الله الله ايه الجمال دا ربنا يخليلك ولاد حضرتك

تحياتى

عمرو

klmat said...

ra7eel
اهلا بك ياسوسو ربنا يخليكى ميرسى
على الدعوات الجميله الحب بيخللى
كل حاجه اجمل
ربنا يسعدك ويكرمك يارب
خالص حبى وتقديرى

klmat said...

منى
اهلا بك ياحبيبتى ده انتى الجميله وكلامك جميل بينقط سكرربنا يسعدك ويوفقك
ويملا حياتك حب ويمتعك بالصحه
خالص حبى وتقديرى

klmat said...

shimaa zaher
اهلا بك . عارفه انا كمان بحبك مش بيقولوا من القلب للقلب رسول فى مدونات
كده بتحبى مدونينها من اسلوبهم وطيبه قلبهم بتبان فى كتابتهم وانتى منهم
ربنا يبارك فيك ويسعدك وحياتك تبقى حب فى حب
خالص حبى وتقديرى

klmat said...

سمراء
اهلا بك . انتى عارفه طول عمرى بحب الاطفال
جدا وبحب كل حاجه صغننه . جميل اوى انك
تتقربى لاولاد اصحابك من كل الأعمار
انتى ودوده وحبوبه اوى وانتى ماطولتيش
ياريت تطولى كلامك جميل واسلوبك حلو
يااسمر يا سكر وشكرك من قلبى لدعاءك لى ولأولادى الله يخليكى
ربنا يكرمك ويسعدك وافرح بكى قريب
خالص حبى وتقديرى

klmat said...

la3lhakhair
اهلا بك . عجبتك رجل ورجل ماشى وايد وايد كمان علشان تنبسطى اكتر
احلى الامهات ربنا يجبر بخاطرك
ويسعدك ويحقق كل امانيكى يااارب
خالص حبى وتقديرى

klmat said...

my hopes
اهلا بك انا نزلت الصوره علشان تشوفى الابداع طبعا كتر خيرهم دول كانوا صغننين اوى انا مش متذكره اوى فى كجى2 او اولى ابتدائى كانوا بيل مش باينين من الارض
هما دلوقتي مهندسين واحد هندسه اتصالات
والثانى كمبيوتر
اماعن البرفان بتاع مامتك انا كنت عملت
كده بردوا مع مامتى وانا صغننه كانت
ريحتها قويه وفظيعه بس الامهات بتفرح
عندى محفظه عمرى مااستعملتها منهم فى مرحله متقدمه شويه لونها ذهبى عجيب بس
محتفظه بها فى دولابى وغاليه عليا اوى
ربنا يخليكى ويسعدك ويفرح قلبك
خالص حبى وتقديرى

klmat said...

walaa
اهلا بك ده انتى الرقه نفسها معاكى حق
ذكريات جميله جدا وغاليه على القلب
اشكرك جدا ربنا يخللى بنتك ويكرمك
ويعطيكى كل ماتتمنيه
خالص حبى وتقديرى

klmat said...

سكر
اهلا بك يااحمد وحمدالله على سلامتك
وربنا يخلى لك اولادك وتفرح بهم ياااارب
خالص تحياتى وتقديرى

klmat said...

حسن ارابيسك
اهلا بك . انا كمان زيك بحتفظ بحاجات زى قصايص ورق عليهاكلام عجبنى الكروت اللى
بعتز بهاوشويه حاجات غاليه عندى جدا
لقيمتها المعنويه
يارب الرسم يعجبك . سعدت جدا بتعليقك
ويارب دايما نتزاور لان رايك بيهمنى اوى
ربنا يكرمك ويسعدك ويوفقك يارب
خالص تحياتى وتقديرى

klmat said...

حسن ارابيسك
اهلا بك . انا كمان زيك بحتفظ بحاجات زى قصايص ورق عليهاكلام عجبنى الكروت اللى
بعتز بهاوشويه حاجات غاليه عندى جدا
لقيمتها المعنويه
يارب الرسم يعجبك . سعدت جدا بتعليقك
ويارب دايما نتزاور لان رايك بيهمنى اوى
ربنا يكرمك ويسعدك ويوفقك يارب
خالص تحياتى وتقديرى

klmat said...

free heart
اهلا بك يا سوسو منوره مدونتى
اشكرك جدا لدعاءك لى ولاولادى
واشكرك انك عرفتينى على مدونتك
الجميله كلام البنات حقيقى هايله
ربنا يكرمك ويسعدك وينولك كل امالك
خالص حبى وتقديرى

klmat said...

3bedo me7tas
اهلا بك ياعريس الف مليوووووووووووون مبروك يا ابنى ربنا يتمم على خير ويسعدك
انت وداليا ويحقق كل امانيكم ويرزقم
بمدونين صغننين
طبعا انا مش ناسيك ازاى بس انا فعلا مقصره سامحنى واشكرك جدا على دعوتك
مره تانيه الف الف مبرووووووووووووووووك
خالص تحياتى وتقديرى

klmat said...

دنيتى الجميله
اعلا بك ياحبيبتى ربنا يخليى لك بنتك
وتفرحى بها وتقر عينك بها . الكميل كمان
بيرسم واضح اننا قمر قمر قمر
هههههه كفايه انها من ايدهم
ربنا يبارك ويخلى لك بنتك ويحفظها هى وكل اسرتك وكل الامهات والاباء والابناء
خالص حبى وتقديرى

klmat said...

انسان بلا عنوان
اهلا بك ياعمرو منور مدونتى ربنا
يكرمك ونفرح بك ويسعدك ياااارب
خالص تحياتى وتقديرى

اميره الصعيد said...

ربنا يسعدك بيهم وتسعدي معاهم يا رب وانا لو منك اشتري برواز مكتب واحط الكارت الرائع دا فيه واحتفظ بيه علشان اوريه لاحفادي
ربنا يهنيكو ويسعدكو

Unknown said...

يارب ربنا يسعدنا كلنا ويسعدك

تقبلى تحياتى

klmat said...

اميره الصعيد
اهلا بك يارانيا منوره مدونتى
اقتراحك جميل انا فعلا بتمنى يجى اليوم
اللى اشوف احفادى ويشوفوا فن ابهاتهم
عارفه انا محتفظه يشهادتهم وهم فى
كجى ون وتو وعندى بعض اوراق الامتحانات
وهم فى ابتدائ الحاجات دى بتسعدنى اوى
عقبال ماتفرحى بيحيى ويسر ياااارب
ياريت دايمانتبادل الاراء
ربنا يكرمك ويسعدك وسلام كبير لمحمود شقيقك
رئيس جمهوره نفسى ربنا يحفظكم جميعا
خالص حبى وتقديرى

klmat said...

هيثم الدهشان
اهلا بك وربنا يسمع منك ويحقق كل
امانيك ويكتب لك كل مافيه الخير
خالص تحياتى وتقديرى

Unknown said...

ماش اء الله ربنا يحفظهلملك يا رب

شعور جميل اوى و الكارت رغم انه بسيط لكن اكيد يعنى ليكى الكثير

دكتور كسلان said...

الاخت العزيزية اميرة
ربنا يخليلك اولادك يلرب
وتفرحى بيهم اكتر واكتر

انا اسف ع التاخير فى زيارتك كالعادة
بس ان شاء الله مش هتتكرر تانى
لان انا رجعت ادون تانى وان شاء الله مش هاكسل تانى

انا رجعت بموضوع مهم جدا عن نكبة فلسطين
وعايز حضرتك تساعدينى فى الموضوع ده
عايزين نوصل الموضوع لكل الناس اللى نعرفهم

سلاااااااااااااااااااااااااااام

Abo 7anf said...

السلام عليكم
فكرتنى وانا صغير وبعمل كروت لماما
ربنا يخليهم ليكى
واحساسهم جميل قوى

loumi said...

الغاليه أميره

بصراحه ما فيش أجمل من هدايا الأولاد
وخاصة لما تكون من عملهم الخاص
ربنا يكرمهم ويسعدك بيهم
ويحافظ عليكم

تحياتي يا قمر

ammola said...

يااااااه تخيلى زى ما كنت متخيلة صورتك بالظبط
:)
بجد ولادك حلوين اوى وانا لو منك ابروز الكروت دى واعلقها لانها اجمل من اى تابلو
بس الراجل بتاع الهدايا ده كان ممكن يعمل زى الراجل اللى رحت له وانا صغيرة قلت له انا عايزة اجيب هدية لماما فى عيد ميلادها قام قال لى اختارى اللى انت عايزاه...وبعد كده لما شاف بابا حاسبه طبعا على الهدية وبعد كده بابا "حاسبنى"برضة عليها
:(

كاميليا بهاء الدين said...

ههههههه

كارت جميل اوي

كلنا كنا بنعمل كده واحنا صغيرين
وندور علي شرايط علب الجاتوه عشان نزوق بيها ونعمل ورق نلزقه علي الكارت

ربنا يحفظهم لك ويحميهم يارب
ويسعدك بهم وبذريتهم

دمتى بكل الحب

Anonymous said...

عجبنى قوى الرسم ده

بيقول ان ماما فى قلبهم وحبيبتهم .. ربنا يخليهم لك ويبارك فيهم يارب .. ولولا انى ولادى البنات اتجوزوا فعلا كنت قلت لك كان يشرفنى

نطالب بنزول الكروت والرسوم الأخرى قريبا

تحياتى لك

klmat said...

عاليا حليم
اهلا بك واشكرك جدا على الدعاء لنا
ربنا يسعدك ويكرمك وافرح بكى قريب
خالص حبى وتقديرى

klmat said...

د /كسلان
اهلا بك يابنى ازيك والف حمد على رجوعك
للتدوين واشكرك على دعاءك ربنا يكرمك
اتمنى انى اقدر اعمل اى حاجه
ربنا يوفقك ويسعدك ويكتب لك فى كل خطوه الف سلامه
خالص تحياتى وتقديرى

asftel7b said...

بجد بوست رائع
ربنا يبارك لك فيهم يارب
واكيد احلى شعور لما تحس انهم عايزين يعملوا اى حاجه عشان يسعدوكى بس ربنا يسعدهم ويوفقهم الى ما يحب ويرضى

klmat said...

abo 7anf
اهلا بك . واشكر على تعليقك الجميل
ربنا يسعدك ويوفقك
خالص تحياتى وتقديرى

klmat said...

loumi حبيبتى
اهلا بك واحشنى . اشكرك جدا على كلامك ودعاءك ماترميش منك وربنا يخلى لك اولادك ويسعدك ويفرحك بهم
خالص تحياتى وتقديرى

klmat said...

ammola
اهلا بكى . شفتى جمالى اجنن صح
ماشى يااموله . اما بالنسبه للبائع
اللى حاسب باباكى زمان صعب تلاقى حد
يعمل كده بس فعلا ضحكتنى وانتى بتقولى
ان الصوره شبهى انتى عسوله ربنا يكرمك
اشكرك على تعليقك الجميل ربنا يوفقك ويسعدك... خالص حبى وتقديرى

klmat said...

كاميليا
اهلا بك ويارب تكونى بخير
مايفعله الاطفال مهما كان بسيط بيفرح
اهلهم اوى . ربنا يكرمك ويسعدك ياجميله
خالص حبى وتقديرى

klmat said...

sherif
اهلا بك . اشكرك على كلامك الجميل
واللهى ده كان يبقى شرف عظيم . اما عن باقى الرسوم فهى فضيحه
خليها فى سيرك ماتقوليش لحد ماشى
ربنا يكرمك ويخلى لك اولادك ومامتهم
ويفرحك باحفادك يارب
خالص تحياتى وتقديرى

منى said...

انا جيت تانى
ايه البورتريه الرائع ده
هههههههه
والله مش تريقه
انا فعلا عجبانى وكان طعم الحب باين فيها
انا نزلتها على الكمبيوتر عندى
بحب كل حاجه صادقه ومفيش اصدق من كده

على فكره بقى
عندى كذا كارت من العينه دى وكمان جوابات انا صحيح مش عندى اولاد
لكن عندى حبايب كتير بيكتبوا جوابات لمس منى وبرضه مليانه اخطاء املائيه
ههههههههه
تحياتى لاحلى عيله

سلوى said...

كلاكيت تاني مرة

إزيك يا أميرتي

جيبالك تاج
والله مانت مرجعاه
ههههههههههه

لك تاج عندي يسعدني إنك تجاوبيه
دمتى بكل الخير

http://kasperb4.blogspot.com/ said...

اللـــــــــــــــــــــه
والله جميل جدا
وفكرتيني بيا انا واختي بردو من زمن كنا فكرنا ف نفس الفكرة ان احنا نقدم لأمنا هدية في عيد الأم
واشترينا كارتين كل واحد بربع جنيه
هههههه
والله لسة موجودين لحد دلوقت
يااااااه
مر عليه أكتر من اتناشر سنة

ربنا يخليهلمك ويباركلك فيهم وتفرحي بعيال عيالهم
:)

mostafa rayan said...

ربنا يفرحك بيهم

Unknown said...

ربنا يخليهملك يارب
والكارت الغالى التانى يكون من احفادك لما يكتبوا احلى تيتة

خالتى بمبة said...

دا بقى الحب الحقيقي ربنا يخليهم لك واكيد السعادة اللي بتعشيها كل عينك ما تشوف الكروت دي لا يضاهيها سعادة لما بتشوفي اي هدية حتلك تانية حتى لو كانت الماظ

bastokka طهقانة said...

الله ما شاء الله ربنا يخليهم
على فكرة الرجل الطويلة و اليد الطويلة دي في محلها لانهم جعلوا ما امامهم اطول من اللي بعيد عنهم

يا رب تفرحي بيهم و باولادهم
بوست مطميز
اوروفوار

maioya said...

ربنا يخليهم يارب
وتفرحي بيهم وبعيالهم
كنت مبسوطه اوي وانا بقرا
مش عارفه ليه :)

رئيس جمهوريه نفسى said...

ربنا يخليهم ليكى يارب ويفرحكم بيهم ونشوفك مارى منيب قد الدنيا قادر ياكريم :D وش بيضحك

klmat said...

منى المحبوبه
اهلا بك ده حاجه تفرحنى انك تعلقى تانى وعجبك البورتيريه ده ربنا يخليكى اجمل
شىء مشاعر الحب الصادقه والتعبير عنها
بيوصل مهما كانت الوسيله بسيطه
انتى كمان تتحبى وواضح ان تلاميذك عندهم
مشاعر جميله تجاهك شخصيتك جواها طاقه حب
كبيره باينه اوى فى تدويناتك الجميله
ربنا يسعدك ويفرحك وتجيبى لنا منى جميله
صغننه واخواتها
اسعدتينى جدا بكلامك الجميل
خالص حبى وتقديرى

klmat said...

سلوى الجميله
اهلا بك تاج مره واحده اشكرك جدا جدا
ولو انى اجابه التاجات صعبه بالنسبه لى شويه
لكن ما اقدرش ارفض لك طلب ان شاء الله ارد عليه وربنا يسعدك ويوفقك ياسلوتى الجميله

klmat said...

الام وامال
اهلا بك . وربنا يخليك انت واختك وتعيشوا وتجيبوا وخللى لك مامتك وكل اسرتك
احساسك ودعواتك واصلنى ربنا يكرمك
ويوفقك ياااارب
خالص تحياتى وتقديرى

klmat said...

Moustafa rayan
هلا بك وميرسى على دعوتك ربنا يخليك
خالص تحياتى وتقديرى

klmat said...

ايويه
اهلا بك وحشتينى. ما اتحرميش من دعواتك وتعليقك الجميل
ربنا يسعدك ويكرمك
خالص تحياتى وحبى

klmat said...

خالتى بمبه
اهلا بك نورتى مدونتى بتعليقك الجميل
ربنا يكرمك . مدونتك جميله ودمها خفيف
سعدت جدا بزيارتك وان شاء الله دايما
نتبادل الاراء
خالص حبى وتقديرى

klmat said...

طهقانه
منورانى اهلا بك كمان الاولاد طلعوا عندهم بعد نظر فى اطو الارجل واللهى ده
انتى العثل عثل فى مدونك وتعليقك
مطميزه ربنا يكرمك ويوفقك وتسعدينى دايما بتعليقك ودايما نعرف رأى بعض
كل امنياتى الحلوه
خالص حبى وتقديرى

klmat said...

may
اهلا بك وميرسى جدا لدعاءك ليا واصلنى
وانبسطت انك كنتى مبسوطه وانتى بتقرأى ده حاجه تسعدنى جدا اوى و تعليقك دخل قلبى
ربنا يوفقك ويسعدك وينجحك بأذن الله
خالص حبى وتقديرى

shaimaa samir said...

مس مشاعر قلبية
ربنا يباركلك فيهم
وتجوزيهم
وتشيللى اولادهم كمان
بس متبقيش زى مارى منيب الله يكرمك
ده انتى اميرة يا اميرة

تحياتى لك

على فكرة
كونهم راسمين رجل وايد ااقصر
ده يدل على انهم فاهمين منظور من صغرهم
يعنى رسمينك فى المنظور مش بشكل مسطح زى الاطفال العادية
ههههههههههههه
معلشى فنون تطبيقية وبنحب نحلل
هههههههه

klmat said...

shimaa samir
اهلا بك منوره المدونه وكمان طلعوا عندهم منظور فنى
ربنا يخليكى وافرح بك وبهم
معرفش اعمل مارى منيب خالص
امنيتى ان زوجات اولادى يكونوا بمثابه بناتى لانى كان نفسى يكون عندى بنات
ان شاء الله زوجاتهم يبقوا كده
اشكرك جدا على دعواتك الجميله
ربنا يبارك فيكى ويحقق امانيكى
خالص حبى وتقديرى

جسر الى الحياة said...

هههههههههه فكرتينى بابنى وهو فى كى جى ون من كام سنة واول كارت بمناسبة عيد الام عمله بنفسه مع الميس فى المدرسة بس كان هديته لامى انا لانها تقريبا هيا اللى مربياه
دلوقتى هو فى سنة 5 ومع ذلك بيفتكر يوم عيد الام ويحتار وساعات يبكى لانه مش عارف يجيب لى ايه ولما بيجيب لى كارت ووردة باقعد انا وهو نبكى ونحضن بعض ربنا يخلي لك اولادك ويبارك لك فيهم