Wednesday, November 12, 2008

بكيزه وزغلول

ارجوكى ياماما مش عايز اتغدا عايز انام
ليه ياحبيبى اصلى تعبان شويه
ودخل حجرته
ده اللى قاله ابنى الكبير عند رجوعه من المدرسه كان فى اولى ابتدائى واخوه كان فى كجى تو.
كان الوضع غريب فغالبا لما بيجى بيسأل عامله اكل ايه او يخمن من رائحه الطعام وانا من عادتى عند شعورهم بتعب بدى ليمون او اسبرين الحاجات المناسبه للحاله مش بروح للدكتور على طول لكن اليوم ده لاقتينى بلبس بسرعه ولبستهم وقلت حانروح للدكتور مع ان ابنى كان هادى مش اكتر انه عازف عن الأكل و قاللى بطنى بتوجعنى شويه
و عايز انام . كنت زى ما اكون مبرمجه وبدون تفكير حاجه كده زقانى للذهاب للطبيب بسرعه. سبحان الله
المهم بعد الكشف عليه الدكتور قاللى انا عايز تحليل حالا وحااكلم دكتور التحليل يطلع النتيجه بسرعه ولحسن الحظ كانت الشقه المواجه له معمل التحليل .رغم رعبى مش عارفه ليه كنت بتصرف بهدوء علشان خاطر الأولاد ماتقلقش
كان اليوم ده والده فى القاهره ولم يكن الموبايل ظهر المهم ظهرت النتيجه وانا برتعش من الداخل لقيت الدكتور بيقوللى ده لازم يعمل الزائده فورا معاكى عربيه . لأ
جرى جرى على مركز اسكندريه الطبى وحااتصل بالدكتور عصام السهوى لتجهيز حجره العمليات
نزلت وانا مرعوبه وابنى بيقوللى بلاش عمليه ياماما
ماتخافش ياحبيبى مش حاتحس بحاجه والألم حايخف بسرعه والصغير مسهم وخايف
المهم كانت العياده فى محطه الرمل والدنيا زحمه اوى ومافبش تاكسى فاضى وكلام الدكتور بيرن فى ودنى فورا اجرى مش عايزين نتأخر
كانت اشاره المرور والعربيات وافقه بقيت اجرى ادور على تاكسى كله مليان وبهرول وماسكه الأولاد . وبعدين لقيت تاكسى قصادى قاعده جنب السواق واحده ولم التفت ان هناك آخرى فى المقعد الخلفى من ربكتى واحتياحى
لقتينى بقول للسواق ابوس ايدك والنبى ودينى المركز الطبى ابنى محتاج عمليه بسرعه وانسابت دموعى
صعبت عليه وركبت واخذت اولادى جنبى واحنا التلاته وقتها كنا نميل للنحافه واعتذرت للراكبه اللى جنبى اللى كانت لا تزيد عن 20 عام وهى كمان رفيعه لقيتها بتقول
افففففففف ايه ده وبتوجه كلامها للسواق ازاى تركب واحده كمان بأولادها . لم يرد عليها
واللهى حرصت ان لا اشغل حيز كبير حتى لا اضايقها اخذت اولادى على رجلى وقلت لها معلش لو مش ظروف قاهره كنت نزلت
- ردت ببرود يووووووووو مش حانخلص
* واذا بالراكبه بجوار السائق تدور وجهها وتقولها الست من اول ماركبت اعتذرت وابنها تعبان نساع بعض دى حاجه طارئه
- وانتى مالك انتى وبتتكلم من طراطيف مناخيرها
* تصدقى انتى ماعندكيش دم "الأولاد بيبصوا لبعض مذدهلين " ونسوا موضوع العمليه
انا حصل خير ياجماعه ارجوكم مش عايزه خناقه بسببى
اللى جنبى : لأ مش خير
* الآخرى : لأ ده انتى فعلا ماعندكيش دم ده بدل ماتقولى لها سلامه ابنك
- :اووووووو انا مش حاكلم معاكى لأنك مش من مستوايا
كانت اشاره تانيه واعصابى باظت
* اللى بجوار السائق ست بنت بلد جدعه وقويه ادورت وبصت لها من فوق لتحت : ورينى مستواكى كده وهى بتحملق فيها. ده مستوى شبحطاجيه
-اووووووووووو انا لازم اروح الكسم انا اخويا زابت ورتبه ارجوك وادينا الكسم حالا مش ممكن اللى بيحسل ده
*انتى حاتروحى القسم بس بس خلقه تانيه وعايزه تديها بوكس ولكنى فادتها وبعدت اولادى شويه واخذت فى كتفى زغده متينه
السواق كان شاب صغير مرعوب وخايف مش عارفه ليه
الأشاره طولت
كان قصاد التاكسى تاكسى آخر صديق للسائق نادى عليه واد ياهيما ....ازيك ياحمووووووووو
والنبى ياحموو خذ الأخت وصلها فتح الباب وطلب من اللى بجواره النزول زغرلته انزلى خلصى والنبى ياختى والأحره وصلت . نزلت وهى بتشتنم اللى جنبى اللى
بعد نزولها
- كان المفروض حدرتك تودينا الكسم ايه ده ....لم انطق بكلمه واحتضنت اولادى
قالها علشان الطفل اللى تعبان وأخيرا وصلنا
اخذت الأولاد وجريت على الأستقبال لقيتهم عارفين من الدكتور ومجهزين الأمور وطلبوا منى التأمين وكان مبلغ كبير ومش معايا انا رايحه للدكتور ومعايا فلوس زياده لكن مش مبلغ بتاع تأمين عمليه كنت لابسه انسيال و خاتم وسلسله قلعتهم وقلتلهم
العمليه تتعمل والفلوس حاتيجى والذهب ضمان.
اخذوا الذهب وطلعت قابلينى دكتور التخدير وطمئينى ولبس ابنى درل معقم وبونيه بصيت لقيت ابنى الصغير بيصرخ لأ لأ لأ اخويا مش يلبس كده قعدت اهدى فيه وكان فى فى بيانات لازم املاها
واذا بى بعد تسليمها لا اجد ابنى الصغير بجوارى والممر كبير جدا وفى سلالم مش عارفه أطلع ولا أنزل كانت رجلى بترتعش وقلبى بيدق بسرعه والدموع متحجره وزى التايهه فى بلد غريب ومش عارفه اعمل ايه خايفه اطلع او انزل وخايفه استنى وحيرانه مش لاقيه حد جنبى بس قلبى بيقول يارب رحمتك ولطفك يارب
وانا واقفه وعينى زائغه لقيت دكتورماسك ابنى و بيقوللى خذى ياهانم الباشمهندس وافق اننا نعمل العمليه لأخوه بشرط تكون بشويش وابتسم ... حبيب قلبى
قعدت واخذته فى حضنى والحمدلله قام ابنى بالسلامه
واول مافاق ابتسم ليا وقاللى ماما شفتى بكيزه وزغلول اللى كانوا فى التاكسى.
فعلا ده كان ابلغ وصف ينطبق عليهم
كان يوم عجيب وكله قلق وقتها
الحمد لله فاتت سنوات اولادى اتخرجوا لكن مازال هذا اليوم محفور فى ذاكرتنا وبنضحك من قلبنا لما نفتكره ربما وجود بكيزه وزغلول كان رحمه بيا وباولادى شغلونا شويه عن الألم ربنا يبارك فيهم يارب . .

35 comments:

بس خلاص ... said...

العزيزة كلمات
سعيده جدا انى هكون اول تعليق ..اولا حمد الله على سلامة ابنك رغم انها متأخرة شويه ..وفعلا فى حاجات بتمر بينا مش بنقدر ننساها وبتفضل محفورة جوانا ... اما بالنسبة لبكيزة وزغلول اللى كانوا معاكى فى التاكسى ... فعلا هما شخصيتين متضادتين ... بنت البلد الجدعة اللى دمها حامى ومابيعجبهاش الحال المايل ... ودى قربت تنقرض من حياتنا للاسف وماعدش منها كتير ... والست اخت الزابت ..دى تلاقيها خريجة اكسام شرطة وتربية ارصفة .. بس هى متنكرة وخايفة من الزابت
للاسف الناس مابقوش ناس والانسانيه اصبحت عمله نادرة
اقولك طالما انتى واولادك وحبايبنا كلهم بخير ووووولايهمك

Anonymous said...

ياخبر دا انا فاتنى كتير
ومكسوفه منك جداا

بس عارفه انك هتسامحينى اذا كنتى سامحتى الهانم اخت الزابت
الشهيره ببكيزه هانم
ده موقف واحد من اللى بيعدى على الامهات
صحيح الجنه مش تحت اقدامهم بالساهل كده
ربنا يبارك لكم فى بعض
تحياتى
منى
احاسيس

Unknown said...

ميرو حببتي


ههههههههههههههه
بجد موت علي نفسي من الضحك

بس فعلا والله

احساس جميل قوي
وفعلا بكيزة وزغلول جم في وقتهم


وابنك في اية ولا في اية

لسةفايق من العملية
وفاكر الخناقة
هههههههههههه


بس قلب الام جامد عنك
مش بقولك اجمل ام ف الدنيا مش بتصدقيني
حتي اسئلي ولادك هيقولولك كدا
يابختهم بس انا مش بحسدهم

بس ربنا يخليكي ليهم ولينا كمان يااحلي ام

وحلوة حموووووووو دي
ههههههههههههههه

يااحلي اسكندارنية

بفرح اوي باهل بلدي اسكندرية وهما بيدونا احنا ياميرو اللي محلين التدوين من غيرنا مينفعش

ههههههههه
صح

يلا

طولت عليكي
بس انت وحشاني
مش بتفتحي الميل لية
نفسي اتكلم معاكي كيتر
مش عايزة تتكلمي معايا ولااية

مستينة ردك
وقوليلي مرة هتبقي قاعدة امتي
علشان
افتح وقتها
سلاممممممممممم

Anonymous said...

3la fekra ana ely 3mlt el 3amlya w kan youm zarif gdn.

Rbna y7'liki lya.

Sherif

klmat said...

بس خلاص
اهلا بك . انا اللى سعيده حدا بتعبيقك
فعلا الست بنت البلد دى كانت جدعه وحنينه وقامت بالواجب مع بكيزه واللهى انا اخذت منها لكميه فى كتفى كانت تستاهلها اخت الزابت .انا كنت بستغرب على قسوتها واللهى انا لو فى تاكسى وحد عنده ظروف حاحاول اساعده بس تقوللى ايه دى تربيه واحساس .اشكرك جدا على التعليق الجميل وماتحرميش منك
ربنا يديكى الصحه والعافيه يااااااارب

klmat said...

منى - احاسيس
اهلا بك ياحبيبنى فينك يارب تكونى بخير
مافيش داعى للكسوف انا احيانا بغيب عن ناس بحبهم اوى الكل مشغول .اهت الزابت
قلبها جامد مجرد شخصيه مرت عليا لكن اللى كانت قاعده جنب السواق الله يبارك لها كانت طيبه اوى ومش طايقه اللى جنبى وكان نفسها تضربها فعلا وجودن فى ناكسى هو اللى منعها والسواق نزلها لانه حس انها تعملها. اغلى حاجه فى الدنياء الابناء ربنا يخليكى يامنى ويفرح قلبك ويسعدك يااااااااااارب

klmat said...

my hopes
اهلا اهلا بك يا قمر واحشانى جدا يا بلدياتى . معاكى حق وجود بكيزه وزغلول ومتابعتهم على الطبيعه كان شو محصلش
وتعب ابنى شريف وقلق اخوه لاههم عارقه لو كانت الأمور طبيعيه كانوا مش حايمسكوا نفسهم من الضحك الواقعه دى اتسجلت وبدل
ما بنفتكر القلق بنضحك من قلبنا
بشكرك يامنمن على كلامك الجميل ربنا يخليكى. انا كمان احب اتكلم معاكى انا
مش ليا وقت معين مخصصاه بتبقى حسب الظروف
بس ان شاء الله احاول افتح اكتر علشان ندردش سوا وممكن كمان نتقابل
ربنا يخليكى ليا ويسعدك يااااارب

klmat said...

sherif
حبيب قلبى بطل البوست . رينا يخليك ليا وماتحرميش منك ابدا
ومش نكمل عواطف هناامام الجمهور بتاعى ههههههه وحشتنى اوى
ربنا يحفظك ويكرمك يااااااااارب

Abo 7anf said...

ألسلام عليكم
للاسف ناس كتير مش بتحس ببعضها
بس اهم جم علشان يعلوا فقره
تضحكى لما تفتكريها

Unknown said...

اتمني ياميرو

اشوفك قريب

وياسلام ممكن نتقابل كمان
دة شرف كبير ليا

ربنا يسهل ونعرف ندردش مع بعض

سلام

Empress appy said...

يا قلبى عليكى بجد
حسه بيكى فى الموقف
انما الست اللى عاوزة تروح الكسم دى يا ريتنى كنت انا اللى معاكى
اقولك على كلمه
انتى حنينه اوى واولادك ما شاء الله زيك
بس انتى ست جدعه

ما علينا said...

والله العظيم

اتخنقت من بكيزة اوي
وكان نفسي اديها بوكس انا كمان
بس كنت هانشن كويس


ولما ابنك الصغير تاه من قصداك
كان باقي لي تكة واعيط

بس ضحكت لما لقيتيه
وفطست من تعليق ابنك الكبير


ربنا يخليهم لك ويحميهم من اي ضرر


ومسألة تقدير الظروف
والاحساس بالناس

ليس لها علاقة بالمستوى
ولا التعليم

دي مسألة انسانيات
نابعة من القيم اللي كبرت جوا الشخص
ربنا يسعدك يارب

يا ارق واحن ام

دنيتى الجميله said...

اختى الحبيبه اميره
حمدلله على سلامه ابنك
يارب دايما يكونوا بخير وصحه وسعاده
وتشوفى احفادك منهم
امييييين
انا كنت ببكى لما قريت انزعاجك وموقف العمليه وتطور الاحداث الرهيب ده
لحد لما فاق ابنك وقلك على بكيزه وزغلول فعلا ضحكت جدا جدا
فعلا ناس غريبه جدا فى تاكسى واحد شخصيتين مختلفتين تماما
ربنا يرزقنادايما بأولاد الحلال
تحياتى لكى

Anonymous said...

أجمل مافى القصة قلبك اللى اطيب من الطيبة
انك ربنا على لسانك طول الوقت .. وهو ارحم الراحمين

يارب تشوفيهم ناس عظام ويقدروا قد ايه الواحد بيتعب قوى عشانهم .. وانه بيصبر عليهم كتيييييير لحد ما ماشاءالله بيبقوا كده

ساعتها يسهون كل شئ .. ويت
حول لذكريات .. مهما كانت صعبة .. الا انها بتتحول فى الآخر الى بكيزة وزغلول

تحياتى لك

د/ رامي شهاب الدين said...

أسلوبك السردى رائع رائع جدا لدرجة إنى إندمجت فى القصة وسرحت فيها لأخر سطر

طبعا على رأى إعلان نيدو : مفيش زى قلب الأم

الست إللى كانت جنب السواق بنت بلد جدعة ، ومثال لأغلب الشعب المصرى

أما البنت إللى كانت جنبك دى فدى نوع من البشر واخد مقلب فى نفسه ، يمكن عشان أخوها ظابط زى مابتقول.. بس الشئ إللى أنا متأكد منه دلوقتى إنه بعد مرور السنين زمان الأيام والليالى ربوها..وما أقسى الدروس إللى بنتعلمها لو كانت الأيام والزمن هو إللى بيعلمنا

ذكرى قد تكون صعبة بالنسبة ليكى .. ولكنها لن تنسى وقد تحمل لحظات سعيدة ولاسيما بعد خروج إبنك من العملية

ربنا يخليلك كل أولادك وتشوفى عيال عيال عيالهم

دمتى بكل الخير .. تحياتى

klmat said...

abo 7anf
وعليكم السلام ورحمه الله
فعلا لو كل واحد حسنا ببعض كانت الدنيا بقيت شكل تانى. جم فى وقتهم
سعدت بمرورك
دمت بكل خير

klmat said...

my hope$
اهلا يامنى . الشرف ليا بأذن الله ندردش سوا ويكون قريب
سلاااااااااام

klmat said...

appy
اهلا بك ياقمر .متخيله لو كنتى معايا
ايه اللى حايحصل فى الحقيقه الست اللى
كانت موجوده قامت بالواجب انا فاكره نظرتها لماقالت لها ورينى مستواكى كان فيها كل اللى فى نفسك تقوليه..
انتى الجميله وكلك ذوق ماتحرميش منك
ربنا يسعدك ويوفقك
دمتى بكل بخير

klmat said...

الأخت الحبيبه / دنيتى الجميله
الله يسلمك واشكرك جدا على دعواتك الجميله
معاكى حق الشخصيتين على النقيض واحده بنت بلد كلها شهامه وذوق وعلى طبعيتها
بينما الآخرى متكلفه وقاسيه ورقتها مصطنعه مافيش اجمل من القلب الطيب الحمد لله عدا على خير وشغلونا عن الألم شويه
تسلمى يارب ويبارك لك فى اسرتك وحبايبك
خالص حبى وامتنانى

دكتور كسلان said...

ازى حضرتك يا مدام اميرة
يارب تكونى بخير وفى اتم صحة وسعادة
وربنا يخليلك اولادك وتفرحى بيه
وان شاء الله ربنا ما يكرر اللى حصل

اكيد ده كان يوم صعب على حضرتك
لانك فاكرة كل حاجة فى اليوم ده

عجبتنى جدا شخصية زغلول
واعتقد انها اكيد صبرتك شوية فى اليوم ده
الحمد لله الشعب المصرى فيه خير
واكيد زغلول دى بتمثل معظم الشعب المصرى

اما بقى بكيزة
ربنا يخلصنا من الشخصيات اللى زى دى
الناس اللى عايشين فى ابراج عاجية ومش حاسيين ببقية الشعب
حتى مفيش ادنى محاولة للمساعدة


على فكرة ما علينا هيا جميلة اللى ضافتك ع الفيس بوك
ارجو ن الصورة تكون وضحت
ودلوقتى عرفتوا بعض كويس

سلاااااااااااااااااااااااام

klmat said...

ماعلينا
اهلا بك واحشانى اوى.
بكيزه خنيقه فعلا بس خلت اليوم اتسجل
وذكرى بنضحك اوى لما نفتكرها .كان يوم عجيب وقلق كبير بس الحمدلله ختامه كان مسك
واعتبرى نفسك قمتى بالواجب تسلم لى
طبعا الأحساس بالآخر والذوق ليس له علاقه بالمستوى المادى بل علاقه بالتقوى والتربيه
والحنيه . ربنا يحليكى ويسعدك
عميق حى وتقديرى

klmat said...
This comment has been removed by the author.
klmat said...

sherif العزيز
اهلا بك . ربنا يخليك انت الأطيب وأب حنين
مافيش اغلى من الأبناء ربنا يخلليهم ويبارك فيهم يارب. مهما بتتعب مش بحس انه تعب تقدر تقول تعب ممتع الحمد لله اشكرك جدا على الدعاء الجميل ربنا يبارك فيك وفى اولادك وتفرح بأولادهم يارب
دمت بكل خير وسعاده

klmat said...

د / رامى شهاب الدين
اهلا بك . واشكرك جدا على الأطراء ده بعض ماعندكم . الأخت اللى جنب السواق فعلا جدعه وشهمه وقلبها حنين التانيه اتمنى ان الأيام تكون علمتها ولو ان القسوه والحنيه فى اعتقادى جينات لو ظروف عاديه اعذرها لو اتضايقت لكن كانت شايفه انى فى ازمه ربنا يهدى .اما عن الأوقات الصعبه الحمد لله ربنا فرجها وفضل ليا الذكرى الحلوه اللى ارخها بكيزه وزغلول
سعدت جدا بتعليقك متعك الله بالصحه والعافيه
خالص تحياتى وتقديرى

klmat said...

الأبن العزيز د/ كسلان
اهلا بك انا بخير الحمد لله ربنا يخليك ويارب تكون بخير وسعيد
اشكرك جدا على التوضيح انا ماكنتش عارفه هى مين ده من دواعى سعادتى انا بحبها جدا كده الله ينور. زغلول شخصيه جميله وكلها طيبه وهى طبعا كانت زى الفل مش زى المسلسل بس روح بنت البلد الجدعه اما التانيه فدى مسكينه بتخسر حب الناس ربنا يهدى امثالها مصر مليانه ناس جميله بس مش واخده حقها ان شاء الله كل يكون فى موضعه انا متفائله ماضاقت الا مافرجت
تعليقك بيسعدنى وينور مدونتى
ربنا يسعدك وبوفقك ياااااااااارب
سلام ودعوات بكل الخير والتوفيق

سمراء said...

قلبي كان بيدق بشدة مع كل كلمة
من القلق
واهتزيت من الضحك على التعليق
الاولاد كدة يموتونا من القلق عليهم ويملوا حياتنا بهجة وسعادة
بتمني أكون أم
اتمني لكم حياة سعيدة وهادئة

سمراء

klmat said...

العزيزه سمراء
اهلا بك . سلامه قلبك ان شاء الله تكونى زوجه وام جميله ربنا يحقق كل امانيكى واشكرك جدا على دعواتك الجميله
انتى انسانه مرهفه المشاعر وصادقه اوى
كل الدعوات بكل الخير
عميق حبى وسلامى

حسن ارابيسك said...

فعلاً يوجد لدى كل منا مواقف لاتنسى وتظل محفورة في ذاكرته
والف حمد على سلامته اللي جت متأخرة متهيألي فوق ال 15 سنة
لكن سبحان الله ربنا بيسبب الأسباب دايماً
وزي ماذكرتي حضرتك ان بكيزة وزغلول دول يمكن ربنا حطهم في سكتك عشان يخففوا عنك ويشغلوكي شوية عن القلق والخوق اللي ممكن كانت تكون نتايجهم صعبه عليكي وعلى الأولاد
وفعلاً سبحان مسبب الأسباب
ربنا يخليلك ألاولاد وتفرحوا بيهم كده على طول ان شاء الله
تحياتي
حسن أرابيسك

klmat said...

حسن ارابيسك
اهلا بك . سعيده جدا بتعليقك ومعاك حق لكل شىء سبب وجود بكيزه وزغلول خفف عنى وعن اولادى كتير ورغم مرور سنين طويله ظلت محفوره فى الذاكره لانها واقعه غير عاديه
وتزامنت بعد اعاده عرض المسلسل
اشكرك على دعواتك الجميله تدوينتك الأخيره رائعه دائما مبدع
كل الدعوات بالصحه والسعاده
عميق تحياتى

Unknown said...

ميرو لو قاعدة وفاضية انا اون لاين علي الميل
عرفت انك فاتحة من الكومنت
سلام

mohamed ibrahim said...

بس بكيزة و زغلول خدموكي بجد في المشوار ده
خدمة مش ممكن
و عموما ربنا يخليلك ولادك و تفرحي بيهم
و بجد ده دليل علي ان قلب الام من اكبر المعجزات

تحياتي
محمد

klmat said...

انت تسأل والكمبيوتر يجيب
كل الدعوات بالتوفيق والتألق وان شاء الله اتابع البرنامج وسعدت بالزياره
خالص تحياتى

klmat said...

محمد ابراهيم
اهلا بكهما فعلا خدمونى الحمدلله واشكرك جدا على التعليق الجميل
اسعدتنى بمرورك
خالص تحياتى وتقديرى

و القادم....أجمل said...

يالله
الأمومة مش بالساهل
بجد و الله
الضغط العصبي اللي بتبأه فيه
ربنا يعينك يارب

----------
بس بجد البنوته اللي كانت جنبك
موقفها غريب
دا المفروض تاخد واحد من الولاد على رجلها
اه و الله

انتي عارفه انا لو في موقفك
بس اكون رايقة يعني
هتلقيني كنت
زغلول
هههههههههههههه
:D

ربنا يخليهم ليكي
و يحفظهم
و يخليكي ليهم يااااااااااااااارب
:)

إحترامي و تقديري
:)

klmat said...

القادم اجمل
اهلا ياولاء . فينك من زمان
اما عن البنوته اللى جنبى فهى
موقفها غير انسانى بالمره انا كنت مستغربه قسوتها.عارفه لوكنت فى ظروف تانيه كنت حافهمها ان اللى بتعمله ده عيب فى الظروف دى .
انتى حاجه تانيه كلك رقه وطيبه
الحمد لله الشو ده كان رحمه بيا
انتى واحشتينى اوى
ربنا يخليكى ويسعدك ياااارب
خالص حبى وتقديرى