Tuesday, June 17, 2008

تخاريف الخريف

اصدقائى من يومين كان عيد ميلاد مدونتى الحبيبه . . وعن طريقها اكتسبت صداقتكم وقرأت افكاركم وتواصلت معكم
وشعرت بسعاده غامره فى هذا العالم الجميل
اعتذر لغيابى الفتره السابقه واطمئنكم عليا واشكر من قلبى كل من سأل عنى واعذرونى فى عدم التعليق عندكم ان شاء الله
اتابع من جديد واسمحوا لى فى احتفالى بمدونتى ان اقدم اول بوست كتبته . اغلبكم لم يمر عليه وان شاء الله نتواصل قريبا
تمنياتى لكم بكل الخير واتركم للقرأه سلااااااااام

تخاريف الخريف

جلست فى ركنى المفضل فى البيت ومعايا كوب من النسكافيه وسرحت بخيالى ورن
جرس التليفون كان مندوب من رئاسه الجمهوريه
يبلغنى فيه انى سأقوم بتولى تشكيل الوزاره . قلت ده اكيد قريبى اللى بيحب دايما يستظرف وبيحاول يسخر منى خصوصا انى من وجهه نظره عايشه دور ابو العريف لكن نبره صوته والطريقه اشعرتنى بجديه المكالمه وابلغنى انه قبل انتهاء المكالمه سيرن الجرس وسيحضر مندوب لتسليمى خطاب التكليف الرسمى ولم انطق بكلمه اذا بجرس الباب يرن ويتم تسليمى الخطاب وكأنى مغيبه وتذكرت على الفور فيلم معالى الوزير ومسرحيه العالمه باشا وتشابه الاسماء خصوصا ان اسمى يطابق عميده احدى الكليات المرموقه وهى شخصيه شهيره .
شرحت للمندوب
السامى انى ست بسيطه وربه بيت ومعلوماتى متواضعه وان الموضوع تشابه اسماء صحيح متابعه للوضع لكن لا اصلح على الأطلاق لهذه المهمه انا بحب بلدى جدا وأفديها بروحى .
لكن عرفت من المندوب انه فى حاله اعتذارى
سأتهم بالتقصير
فى هذه المهمه وفهمنى بلطف انه مش من مصلحتى الاعتذار . ولما قلت له انا يوجد ملايين افضل منى
وانى ست عاديه كل تفكيرى فى اولادى وحاطبخ ايه النهارده واشوف فيلم اجنبى او العاشره مساء اوالقاهره اليوم قاللى
وأوضح لى ان لهذه الأسباب تم أختيارى
. ماتضيعيش وقت وألف مبروك وفهمنى بالذوق انه لو حاولت الأعتذار حاكون من القله المندسه التى تتهرب من المسئوليات و عندى الان طقم من السكرتاريه والمساعدين لأصدار اوامرى اعلنت انى حاجتمع ببعض الشخصيات الهامه وأختارت مكتبه الأسكندريه لتكون مقرالاجتماع و وقررت وحددت الشخصيات الى حاتحضر هذا الأجتماعوكانت كالآـى
السيد / عمـــــرو موسى
د/ عزيز صدقى ود الجويلى
والمتشاريين /هشام البسطويسى و احمد مكى والخضيرى وعبد العزيز زكريا ونهى الزينى
ود /يحيى الجمل ود/ اسامه حرب وحازم الببلاوى
الأساتذه / محمد هيكل وامين هويدى وفاروق جويده ورجاء النقاش ولويس جريس ودمحمد عماره الكاتب والخبير الاقتصادى والناشر المهندس / ابراهيم المعلم
واحمد المسلمانىومجدى مهنا ومجدى الجلاد واسامه هيكل وابراهيم عيسى وبلال فضل و عمرو اديب وحمدى قنديل وخيرى رمضان ومنى الشاذلى ورولا خرسا ولميس الحديدى و وفضيله توفيق وامال فهمى وناديه صالح وبثينه كامل ومحمود عوض وسلامه احمد سلامه الكنيسى واحمد فؤاد نجم الشهير بالفاجومى ود سحر الموجىونصر القفاص

ووائل لابراشى و فريده الشوباشى ود/ شيرين ابو النجا و يوسف شاهين ووحيد حامد ونجلاء فتحى ومحمد صبحى ونور الشريف والفنان الشاب احمد عيد

من رجال الدين الشيخ يوسف القرضاوى والأستاذ عمرو خالد و د / سليم العوا والبابا شنوده

وطلبت من كل جامعه ترشيح افضل
الاساتذه البارزين علميا وأخلاقيا علميا وأخلاقيا للانضمام لهذا الاجتماع الهام
وارسلت خطاب للدكتور احمد زويل افيده بماحدث ورجوته ان يتابع معى ماسيسفر عنه هذا الاجتماع الهام وان يرشح لى مايراه مناسب من العلماء وأن
يمنحنى نصائحه. كما دعوت الدكتور احمد عكاشه..
كما دعوت السيد المهندس / شريف ابراهيم من الشباب
وفى الميعاد المحدد حضرت هذه الباقه المتألقه من الشعب المصرىكان قلبى يخفق من الفرحه انى مع هذه الصفوه حضر الجميع والكل يتحسر
الست دى ست بسيطه تجبنا كده على ملا وشنا شعرت بضيق شديد
وكثرت الهمهمه وشعرت بضيق اكثر وبدأ لسانى يتلعثم ووتمالكت نفسى بالعافيه وبدأت اتكلم قلت ياجماعه انا
ست عاديه جدا زيي ملايين فى مصر وقطعا هناك افضل منى الاف المرات وانى اعرف
نفسى جيدا وانى لااصلح لهذه المهمه الجسيمه كثرت الهمهمه قررت انى اجعل الحاضرين يسمعونى قلت بنبره حاده انامجتمعه معاكم بناء على تعليمات السيد الرئييس
وفى هذه الاثناء
نظرت الى الحاضرين اتفحص رد الفعل رفع عمرو اديب حاجبيه ونظر الى خيرى رمضان وتبادلا الابتسام الخبيث
وفك محمد صبحى رباط عنقه
وباغتهم انا واثقه فى حبكم لمصر وانا اشارككم هذا الحب والأخلاص لكنى عاجزه على الأختيار
لذا قررت ان يقوم كل من الحاضرين ترشيح ما يترآى له بمنصب الوزير كل حسب تخصصه
هنا علق الفاجومى والله مصر فيها ناس زى الفل الست اجتهدت وعلى رأى المثل ايدى العيش لخبازه
على ان يتم شرح سبب هذا الترشيح ويتم دراسته والتصويت عليه
واذا بأم محمد الشغاله تصوت قلبتى النسكافيه ياحاجه
مش بأقولكم تخاريف بالصدفه كان احمد آدم بيغنى حاغير الخريطه ريطا ريطا
الحمد لله انا واثقه ان مافيش حد حا يقرأ غير اولادى بس حا يقلقوا على قوايا العقليه بس خلاص .

30 comments:

احساس لسه حى said...

عزيزتى
انتى مالك ومال السكة دى
ده الداخل فيها مفقود ولو مش مفقود دنيا هيتفقد اخره
خليكى جنب الحيط وربى عيالك
وعدى الدنيا القصيره دى على خير
احسن فى الايام البيضه دى مهما كان الانسان عادل مش هيعرف يلم المواضيع وهيظلم ناس هيظلم ناس
خربانه خربانه
سلااااااااااااام

ما علينا said...

مش ممكن يا كلمات
البوست دا تحفة
وهايل

كل دا من النسكافيه
نفسك تعلي حاجات كتير اوي
وبتحبيها اوي

مصر طبعا
زينا كلنا

نقول يا رب

محمود علي said...


بالتاكيد الاسلوب في الاختيار صح

بس ده مش بيحصل في مصر

osama said...

هيه في الحقيقة مش تخاريف ... بس في فرق كبير بين رجال فكر .. ورجال ادارة ... بغض النظر عن الذي يحدث في مصر الذي ليس له اي علاقة بأي شيء .. سوى الاستبداء والقهر ..
خالص تحياتي ...

klmat said...

احساس لسه حى
كل سنه وحضرتك طيب
سعيده جدا انا قرات البوست ده بالذات اول حاجه كتبتها
ياسيدى العمر واحد والرب واحد
وبعدين البوست عنوانه تخاريف
يعنى مره من نفسى
اكون فيها زى عبده مشتاق
فى الحقيقه انا نفسى اعرف
الاساس اللى بيختارو به تشكيل الوزاره
بس عرفت بس مش حاقول
علشان اربى الاولاد
اسعدتنى جدا تحياتى لك

klmat said...

ماعلينا
اشكرك جدا على كلامك اللى زى السكر
وسعيده جدا ان البوست عجبك
شوفتى بقه النسكافيه بتعمل ايه
امال لوكان مع النسكافيه
حته جاتوه كان حايحصل ايه
شرفتنى ياحبيبتى

klmat said...

محمود على
كل سنه وحضرتك طيب
سعدت جدا بتعليقك
اكيد طبعا الاختيار له اسس
تانيه فى بلادنا المفروسه
تحياتى وسلامى

klmat said...

osama
سعدت بتعليقك
الفكره هى ان المفروض يكون فى معايير
لأختيار القيادات والمجموعه
كانت تشكيله من المفكرين والعلماء
فمثلا رجال الدين المرموقين
يرشحوا شيخ للازهر
ويتم التصويت عليه
بدل ما احنا بنصوت على نفسنا
على فكره مدونتك جميله
شرفتنى ونورتنى

ولـاء said...

الله عليكي

و الله البوست راااااااائع
تصدقي من بدايتة
افتكرته بجد

و الله انتي رااااااائعه
و ربنا يجعلك سبب في تغيير
البلد للأفضل
و لو حتي بدعوة صادقة
و بنية صادقة

ربنا يوفقك يا رب
يا أجمل الاميرات

تحياتي و حبي و تقديري و احترامي
و كل حاجة حلوة في الدنيا
لأحلي أميرة

ربنا يحفظك و يسعدك
آمين يارب

:)

klmat said...

ولاء
اشكرك ياحبيبتى على الكلام الجميل
اللى بيدخل قلبى لأنى حاسه انه طالع من قلبك شوفتينى وانا عبده مشتاق
ربنا يخليكى ويوفقكك
ويحبب فيكى خلقه
عميق تحياتى

My Hope$ said...

حمدلله علي السلامة
والله كنت قلقانة عليكي موتتتتتتتتتتتتت
بشكل لا تتخيلة
وحشتيني جدا جدا جداااااااا
ياحبيبتي ياميرو
بجد بوست جميل
وكنت حاسة انة حلم بس قولت اعمل نفسي مصدقة وكدا هههههه
انا بقي نفسي ابقي محافظة اسكندرية
وعايزاكي معايا لما اتولي المنصب دة
هنخليها احلي بلد
وهخلي ياستي المكتب بتاعك في مكتبة اسكندرية
شكلك بتحبيها
حمد الله ع السلامة
حاسة اني اخدت نفسي لما اطمنت عليكي
حضن كبيررررررررررر ياحلي امممم
سلام

Mo3Az said...

:)
يارب عقبال ما يبقى بحق وحقيقى
اى حد بيحب البلد حتى لو فعلا انسان بسيط اوى ، ولكن يكفى حب البلد والضمير الحى

اصل بصراحة كل يوم اتأكد ان اللى موجوديم دلوقتى بيحبوا بلد تانية خاااالص
:D

كل سنه والمدونة بخير
ويارب دايما نقرا هنا كالعادة
...اروع ال
كلمات
(F)

Anonymous said...

Kol sana w enty w el blog bta3k taybeen ya st el 7bayb.

Sherif

ولــــــــــو said...

فظيييييع جدا
دي مش تخاريف وبس دي هلاوس سمعية وبصرية
بس والله تمام
كون ان حد يجيله فرصة زي دي ويقدر يصارع نفسة ويهزمها ويرفضها ده يبقى مش بني ادم ده اقرب للملايكة ويستاهل تمثال

عارفه عجبني انك تلمي ممثلين لكل فئات الشعب وكل واحد يختار ويحط سبب اختياره

والله لو كنتي بقيتي وزيرة كنتي هاتعملي طفرة بس معلش الناس الكويسة مش ليها حظ
كل سنة وبلوجر منور بوجودك وسطينا

Abeer said...

كل سنة والمدونة بخير وحضرتك بخييير
ومتغيبيش عننا
:)

ادم المصرى said...

عزيزتى احسنتى فى البوست واحسنتى اختيارك الموضوع والعيب كما قال المعلقين مش فى مصر مصر ما هى الا ارض الله ونحنو عليها وساكنيها اكيد العيب فينا وما يغير الله ما بقوم حتى يغيرو ما بأنفسهم صح ولا ايه اتمنالك الخير والحق مهما كان النتائج ولكن الحق لرحمان حق الله اتمنا زيرتك

اسكندراني في الغربة said...

اولا كل سنة و مدونتك وانت طيبين

انت بتفكري لصالح البلد علشان كدة التليفون دة عمرة ما حيجيلك

كل الناس دي و نسيتي العبد لله
انا كدة زعلت
:)
تحياتي

منى said...

ل سنه وانتى وبلوجك بكل خير

الحاجه الوحيده المشتركه بين الناس دى انك حاسه انهم بيحبوا مصر وعايزين مصلحتها رغم اختلاف الاتجاهات
وفعلا ده اللى احنا محتاجينه

يارب دايما منوره البلوج على طول
متبقيش تغيبى كتير
بتوحشينا
تحياتى وحبى

جسر الى الحياة said...

كل سنة والمدونة وصاحبتها بالف خير وسعادة وبعدين احلمى كلنا بنحلم بالافضل ومتهيالى الحلم مش هنتحاسب عليه ولا الاحلام كمان حرام سيبوها يا ناس تحلم يبقى لا الحقيقة بترضينا ولا حتى الحلم

دمعاتي said...

كل سنه وانت ومدونتك طيبين
اول بوست بيكون ليه طعم خاص
زي حاجتنا الشخصيه القديمه
كل مده الواحد يطلعها من مكانها ويتفرج عليها ويفتكر بيها ايام زمان

ربنا يبارك فيك

كاميليا said...

ههههههههه

كان لازم أحمد آدم يغنى على الخريطة؟؟
اهو دلق النيسكافيه

ايوه هو اللى دلقه

كعادتك دوما

عالم خاص
اخله بين سطورك


لازلت احبك


تحياتى واحترامى

appy said...

كل سنه وانتى ومدونتك جميله
وبعدين انتى شربتى ايه علشان التخاريف دى اصلها بتجيلى يا قمر ههههههه

ايوية said...

اولا كل سنة وانتى ومدونتك بالف خير
ثانيا ياريت كل رئيس او مسئول فى الدولة يعمل كدة بجد ويختار اكفاء العناصر ويناقشهم فى القرارات الى يحب يتخذها تحياتى

دكتور كسلان said...

اولا
كل سنة وحضرتك طيبة ويارؤب تكونى ديما بخير
انتى وكل اللى بتحبيهم
وكل سنة والمدونة جميلة وان شاء الله تكون اجمل واجمل
ويارب تفضلى تمتعينا بمواضيعك الحلوة

ثانيا
انا اسف عشن ما سالتش عليكى الفترة اللى فاتت
النت كان فاصل عندى بقاله اسبوعين
ولسه جاى النهارده
وقلت لازم تكونى اول واحدة اطمن عليها

بالنسبة للبوست
جميل جدا
الفكرة نفسها جميلة خصوصا انه اول بوست

ده غير الشخصيات اللى اختارتيها
اللى فعلا لو اجتمعوا بجد من غير تخاريف
ان شاء هيكون مستقبل مصر افضل
وانا متفق مع حضرتك فى كل الشخصيلت دى
او خلينى اقول معظمهم لان ليا تحفظات على قليل جدا جدا منهم
بس للا سف احنا قدنا شخصيتين من اهم الشخصيات دى
وهما د/عزيز صدقى
والاستاذ الكبير مجدى مهنا
ربنا يرحمهم ويدخلهم فسيح جناته


مرة تانية
كل سنة وحضرتك طيبة
ويارب تخاريفنا كلها تبقى حقيقة
سلاااااااااااااااااااااااااااااااااااام

و القادم....أجمل said...

كل سنة و المدونة و صاحبتها
و أسرتها و حبايبها بألف خير
وحشاني و الله جدااااااااااا

مفيش فينك يا ولـاء
:(

ربنا يحفظك يارب و يسعدك

تقديري و حبي

:)

عاليا حليم said...

لا سلامة قواكى العقلية يا ست الكل
كل سنة و مجونتك الجميلة طيبة و بخير و منورانا دايما

ابقى طمنينا عليكى ما تطوليش الغيبة

Anonymous said...

yala b2a 3ayzeen 7aga gdida

Sherif

جسر الى الحياة said...

هههههههههههه والله بوست روعة

تفتكرى ممكن ده يحصل فى يوم من الايام ان حد بيحب البلد كده زيك يبقى له دور ايجابى ملموس زى الدور اللى قمتى حضرتك بيه ...يارب يارب ده يحصل فى يوم من الايام وطولة البال تبلغ الامل

دمتى بحب ومودةوعقبال العيد المئوى للمدونة وصاحبتها ان شاء الله بالف صحة وعافيةوسعادة

بس خلاص ... said...

اسلوبك شيق وجميل فى الكتابة وفى الاختيار ... تعرفى لو الحكومة اتشكلت كده ياسيادة الريس مصر هتبقى قطعة من الجنة .... ولاكانتش اى حاجة فى البلدى اتحرقت

أبو خالد said...

كلماتك كما عهدتها
أفكارك رشيقة سلسةتدخلين علي النفس شعور الزمن الجميل
كل عام و أنتي و الأسرة الكريمة بخير
و تبدعين دائما
أختي الفاضلة أميرة
دعواتك