Saturday, June 23, 2007

عيون المحبه


فى اغنيه جميله بيغنيها لطفى بشناق بيقول فيها

لا مونى اللى غاروا منى قالوا لى اش عاجبك فيها قلت للى غارو منى خدوا عينى شوفو بها
كلمات الأغنيه توضح انه شايف جمال لايراه الا المحب انها عيون المحبه

العين فعلا مرايه لمشاعر الأنسان مافيش اجمل من عيون المحبه دى بتشوف كل حاجه جميله فى المحبوب لأنها مش بتهتم بس بالشكل الخارجى لأ كمان بالروح والشخصيه والطبع. ودى بتشوفها فى نظره ام فرحانه بجمال بنتها او وسامه وذكاء ابنها .أو اتنين بيحبوا بعض ومن غير كلام من النظرات بتقدر تقرا قد ايه بيحبوا بعض .بدون ماتقول الأم بحبك يابنتى او قد ايه انتى جميله بتشوفها فى نظره عين المحب لمحبوبه فالعين بترجم المشاعر ايا كانت وبتبين
حاله الواحد النفسيه فرحان زعلان قلقان
.افضل عيون عندى العيون السعيده لما تشوف واحد سعيد بيظهر بريق فى عيونه
. وكأنها تبتسم لك ابتسامه جميله مافيش اجمل من العيون الباسمه تشعرك بالسعاده وكأنها عدوى يارب اشوف كل عيون احبائى ومن يقرألى باسمه
وعيون المحبه ترى فى من تحب كل شئ جميل فالأم التى تحب بنتها تراها جميله جدا وممكن تكون الحقيقه غير كده خالص . هى بتحب فيها حته منها وامتداد لها وحب ربانى مالوش حل
افتكر حكت لى صديقه اخوها بيحب فتاه بدينه جدا ورفضت امه ازاى يابنى اذا كانت كده قبل الجواز. انت مش شايف تخينه قد ايه كان يرد بس دمها خفيف
ترد امه يابنى دى شوحه يرد واللهى شواحنها ده اكتر حاجه عجبانى فيها .هو شايف فيها الجمال الداخلى ممكن . او هى حاجه روحيه زى ما بيقولوا كيمياء الحب . مافيش معايير معينه اللى تحبه انت غيرك لأ ومع المعامله وطول العشره قد تزداد هذه المحبه نتيجه للتفاهم والتعود وقرب الطباع..

لما يكون فى واحد بيحب واحده حب حقيقى ويعرضوا عليه بدلا منها ملكه جمال بيرفضها لأ هو عايز حبيبته اللى بيحبها لأنه يراها بعيون المحبه اجمل من ملكه جمال العالم

ياريت كلنا نشوف بعض بعيون المحبه.

8 comments:

Anonymous said...

Ana lya comment wa7d enty ktba en (la shy2 m3y ela el klmat) ana mt2kd en enty m3aky 7ob rbna w 7ob el nas el kwyseen (El kwyseen bs).

Sherif

klmat said...

realy I have love of kind people like you,
dy ya fendm el set magda el romy elly bet2ol kda fi o3'nit klmat

ولــــــــــو said...

صدقت
الانسان لما يحب بيتغاضى عن اي عيوب وممكن يحولها لمزايا تدعم موقفه
بس اعتقد انه صعب جدا اننا نشوف نفس الناس بمرايه الحب
اصلها عاميه مابتشوفش اصلا
البوست جميل ودعوه للمحبه لكن عندي تساؤل
يعني ايه شوحه؟؟؟؟
بجد ماعديتش عليا قبل كده
تحياتي

klmat said...

ولو
نورت المدونه
فى مثل بيقول حبيبك يبلع لك
الزلط وعدوك يتمنى لك الغلط
انا معاك
شوحه يعنى عندها حول
زى احمد نبيل بتاع البانتونيم
سعدت جدا بتعليقك
تحياتى لك

rack-yourminds said...

فعلا اللي بيحب بيشوف حبيبه ملك جمال أو ملكة جمال

اللحظه اللي بيقضيها معه من أجمل لحظات العمر

الحب ده شئ جميل

تحياتي لكي عيل هذا البوست الرائع

تسلم ايدك

klmat said...

wahed,
دايما بتشجعنى اشكرك جدا
على التعليق الجميل
تحياتى واحترامى لك

asftel7b said...

بجد كلمات اكثر من رائعه وفعلا دى عيون المحبه
زى ما بيقول مرأه الحب عمياء
بس عمياء عن العيوب لانك بتحب كل حاجه حتى لو وحش فى نظر ناس تانين
زى مثال الشخص اللى مرتبط ببنت تخينه
هى عجباه كده

klmat said...

asftel7b
اهلا بك . عيون المحبه بتشوف حتى العيوب
بمنظور المحبه مزايا فمثلا التخينه
تخينه بس خفيفه فى الحركه والدم
هو بيحب الجوهر والشكل على عيبه
ربنا يحبب فيكى خلقه بسعدنى اوى تعليقك
خالص حبى وتقديرى