Friday, August 17, 2007

الناس عجائن



فى احدى حلقات القاهره اليوم الاخيره اتصل ولى امر طالبه فى اولى ثانوى فى احدى المدارس الشهيره فى الأسكندريه
وقال ان بنته عندها ملحق فى الرياضيات وفوجىء بها بتقوله شوفلى واسطه تنجحنى . انا صحبتى "ن" وقالوا اسمها بالكامل
حاتنجح من غير ماتدخل امتحان الملحق وقالت ان عندها واسطه كبيره فى حكومتنا الذكيه. الاب قالها ماتصدقيش الكلام ده وذاكرى . المهم يوم امتحان الملحق لم تحضر الطالبه المذكوره وكانت
النتيجه نجاحها مما اثار استياء الطالبات واولياء الامور بعد كده اتصل موجه الرياضيات فى المدرسه واقر بصحه الواقعه
وانه قد طلب منه بضم الطاء اعاده تصحيح ورقه الطالبه وحصل لكنه وجدها لا تستحق النجاح او الرأفه وكتب كده على ورقه التصحيح لاخلاء مسئوليته وراحه ضميره
بعد كده وصلت المدرسه لجنه ولا لجان الأمم المتحده مكونه من 9 افراد فى ماده الرياضيات وتم نجاحها !!!!!!
للأسف مش عارفه تم ايه بعد كده
شوفوا بقى البنت قريبه المسئول عندها حوالى 16 سنه تنجح وهى لاتستحق النجاح وبدل ما اهلها يحثوها على المذاكره
لأ ماتزعليش يا حبيبه بابا حاتنجحى طب يعنى غش بمساعده الاهل لأ ونجاح من غير امتحان طب غشوا بذكاء شويه
كان ممكن البنت تحضر الملحق وتنجح وماحدش يحس وده طبعا مصيبه لكن حتى يراعواعدم القيل والقال ده بيورى مدى الأستهتار و كمان الفشخره بمعرفه المسئولين
طب لو البنت استمرت تنجح بنفس الطريقه وتتخرج شوفوا بقه حاتعمل ايه بجهلها لما تشتغل حتى لو ما اشتغلتش
دى لما تبقى ام حاتربى اولادها ازاى

النشأه الطيبه فى السنين الاولى من العمر من الرضاعه وحتى 10 سنوات هى الاساس وممكن فى سن اقل التوقع
بنوعيه شخصيه الطفل .من السنه الاولى بيكون الطفل زى العجينه التى يتم تشكيلها لكن لو اختلطت العجينه بتراب او

مواد ضاره صعب اوى استخراجها بعد كده

فى مواقف فى طفولتى محفوره فى ذهنى مش بقدر انساها
كنت فى ابتدائى وكان فى بنتين ماشاء الله غايه فى الذكاء والشطاره واحده اسمها سناء والتانيه ايات كانوا بيقعدوا جنب بعض فى اخر تخته فى الفصل علشان اطول مننا كان بينهم تفاهم وحب ومنافسه مين حاتكون الاولى وفى احد امتحانات الشهر دخل المدرس وكتب الامتحان على السبوره وبعد شويه قال سنا ء ماتبصسش فى ورقه ايات بس لقينا سناء ماشيه بين الصفوف بحماس شديد ومعاها ورقه الامتحان وقالت للمدرس ادينى صفر انا مش غشاشه بتقولها بمنتهى الثقه هى واثقه انها صاحبه حق
والمدرس ارتبك قالها خلاص جايز انا عينى بربشت طفله مش طايقه احد يتهمها بالغش

لم تخاف او تحلف كما فى اغلب الاحوال فضلت تاخد زيرو ولا يتهمها احد بالغش اتربيت على كده على فكره هى الآن فى مركز مرموق جدا عن جداره طبعا اتربيت صح كان عمرنا حوالى 7 سنين

قبل كده وفى نفس المرحله كان معانا بنت بليده جدا كل يوم تيجى تاخد كرسه منى
وتنقل الواجب المهم كان فى مساله 2+3= 0000

على مايبدو كان نظرها ضعيف نقلت المسأله خطأ كانت كاتبه المسأله 3+3=5
المدرس قالها انتى غاشه الواجب حلفت 100 يمين وعظيم ابدا اصل انا ومنى بنذاكر سوا طبعا كلنا ضحكنا.اكيد اتربيت على الكذب والكسل

طريقه التربيه بتشكل البنى ادم
فى سن سبعه تقدر تتوقع الطفل حا يكون كاذب ولاصادق
حايقود ولا ينقاد هادى ولاشقى يعنى لوطفل نشأ على بيت فى تقوى الله ووالده والدته بيأدوا الفرائض
مش بيكذبوا على بعض اسرار بيتهم مش مشاع اذنه اتعودت على سماع الكلام الطيب واخر فى اسره الام بتحكى خصوصيتها للجيران والاصحاب والاب بيشتم بالفاظ مش تمام اكيد الطفل حايقلدهم
موضوع حب القرأه وسماع الموسيقى بيكون له تأثير كبير فى التذوق الحاجات دى ببتشكل البنى ادم من بدرى اوى
افتكرت كل ده بعد حلقه القاهره اليوم واللى يعرف حصل ايه ياريت يقولنا

صلاح جاهين بيقول

علمى ان كل الخلق من اصل طين وكلهم بينزلوا مغمضين

بعد الدقائق والشهور والسنين تلاقى ناس اشرار وناس طيبين

30 comments:

و القادم....أجمل said...

السلام عليكم
الموضوع هايل جدا للمناقشة
فعلا زي مقولتي تربية الطفل تعتمد علي النشأة من الصغر
في موقف البنت دي
ايه الدلع دا
!!
دا كده هتفضل فاشلة طول عمرها
فاشلة في كل حاجه
لا لا لا بجد حرام
و هتلاقي اهلها اساسا كانوا زيها
ماهي دايرة و بتدور
!
الطفل اللي متربي صح
علي عادات و قيم و مبادئ سلمية
بيطلع ناجح و متفوق في حياتة
فيه ناس بتفتكر العادات زي
دقة قديمة و ياي و تخلف
و رجعية و كلام كده
دا أكبر غلط طبعاااااااا
شوفت امبارح لقاء مع
الاستاذة نعمة الباز
بتقول انا قابلت وحده بتقولي
ابني ميعرفش يتكلم الا انجليزي بس
فقالتلها انتي حقك تلطمي
اللطم الغير ارادي بتاعنا دا
!!!!!
و قالت لازم الانسان يعرف عاداته الاول و التقاليد
و بعدين يتجه براحتة لدراسات تانية
و لغات تانية و ثقافات تانية
-------------------
اسفة يا أميرتي
انا خرجت شوية بره الموضوع
بس الصراحه حبيت اوي النقاش
و خصوصا موضوع التربية
:)
-------------------
كل التحية و الحب و التقدير
لك ِ أميرة
ربنا يوفقك و يعينك
و يجعلك ذريتك كلها صالحة
ان شاء الله
:)

klmat said...

ولاء
اشكرك جدا على التعليق
الجميل وابدا انتى ماخرجتيش
عن الموضوع كله مرتبط
بالتربيه هى الاساس
وربنا يخليكى وينجحك ونفرح بكى
وسعيده اوى بدعاكى ليا
ربنا يسمع مننا جميعا
تحياتى لك

momken said...

انا متفق معاكى جدا
الغش والكذب اصبح وا هما خلفيه التبلوة اصبحوا هما الون السائد الى عليه بيترسم كل الاشياء


الغش طرطش رش عالوش بويا
مدريتش مين بيلياتشو
او مين رذين
شاف الزمان وشى
مش زى ابويا
شاخت وشوشنا بين زين وشين
تحياتى

Unknown said...

كلمات اشكرك لطرح ذلك الموضوع
لانى بجد تعبت من الواسطة تعبت من اخذ حقوق الغير تعبت من الكذب والغش
تعبت ومش لاقية حل
ياريت كل واحد يربى اولادة صح ياريت

أبوسويلم said...

للاسف يا أخت أميرة ان اباء وأمهات كتير مما بيشغلش بالهم الحاجات اللى اتكلمتى عليها الاب مشغول بالفلوس او بالشلى اللى بيسهر معاهم وهيروحوا فين ويعملوا ايه ويضيعوا وقتهم ازاى والام كمان قعدة قدام التلفزيون او مع صاحباتها او بيعملو شوبنج وطالما اولاد بياكلو ويشربوا وبيجيلهم لبس يبقى خلاص هم عملوااللى عليهم تجاه ابنائهم
للاسف قليل جدا من الاباء اللى بيقعد مع اولاده ويعلموا قيمة معينة او يعرفوا الحلال من الحرام او يتابع سلوك اولاده ويشوف بيتصرفوا ازاى فى مواقف معينة وانا شايف ان معظم الاخطاء دى سببها تفاهة الاباء وعدم ادراكهم لمسئولية الابوة ومعناها وقيمتها الحقيقية
ومش غريب فى بلد زى مصر ان الكوسة توصل لملاحق اولى ثانوى لانك اكيد فى مصر
الموضوع جميل جدا وتناولك ليه رائع وربنا يوفقك
سلام يا اخت اميرة

محمود على said...


الكدب بقي صنعه
والسرقه كيف
والظلم هوايه
والغدر صفه
والغش مزاج

ابتسمي انتي في مصر

shahy said...

اميرة هانم

موضوعك جميل بس بيوجع

وطبعا معاكي حق في كل كلمة

انتي عارفة من كتر ما انا حاسة ان التربية دي حاجة مهمة وصعبة
اشتريت مجموعة شرايط لدكتور نفسي اسمة حاتم ادم
وفعلا فادتني جدا

وربنا يقدرنا على تربية العيال بما يرضي الله

تحياتي

aliaa said...

موضوع ممتاز احيكى عليه يا كلمات
بجد كلنا تعبنا من الوسايط والغش وعدم الضمير الواحد بقى خلالالالاص هيطق من اللى بيحصل عينى عينك انا ليا زميلة عشان والدها بيشتغل فى جريدة كبيرة اول ماتخرجت اشتغلت فيها هى كمان وانا وزمايلى لايصين اهوه
عادى بقى شئ عااادى
بس لا يسعنا ان نقول سوى حسبى الله ونعم الوكيل
تعرفى ان فى الجريدة الموقرة الىل اشتغلت فيها زميلتى فيها بند بيقول يمنع تشغيل كل من له صلة قرابه حتى المرتبة التالتة عارفة يعنى ايه يعنى الاب اصلا مرتبة اولى للبنت يعنى المفروض متشتغلش فيها
لكن ازاى ؟ كل شئ يمشى عشان عيون البيه
حسبى الله ونعم الوكيل
ربى وسطتى ولن تغلب واسطة اساسها الله

klmat said...

الى ممكن
سعيده جدا بتعليقك والحمد لله
اننا متفقين فى الرأى
وتعليقك زين زين زين
تحياتى وسلامى

klmat said...

ايويه
كلنا تعبانين من الظلم والتزييف
يارب كل واحد يربى اولاده صح
المشكله ان اللى مش متربيين
بقوا مسئولين .
حسبى الله ونعم الوكيل
شرفتنى ياايويه وبأذن الله
ربنا فرجه قريب
شرفتنى
سلامى وتحياتى

klmat said...

ابوسويلم
حقيقى بتشرفنى بتعليقك عندى
وانا معاك فى رأيك
الأب والأم مش بيدوا
الوقت الكافى لأولادهم
المهم فى الوقت الباقى يكونوا
قدوه هما المثل الأعلى للأولاد
ربنا يصلح حالنا جميعا
تحياتى وسلامى لحضرتك

klmat said...

محمود على
انت بتقول الخلاصه
بس بردوا فى لسه
ناس عندها مبادىء
بس مش فى اماكنهم
ربنا يصلح حالنا يارب
سعيده بتعليقك
تحياتى وسلامى

klmat said...

shahy
ازيك عامله ايه
ان شاء الله اولادك
يتربوا افضل تربيه
الاولاد بيقلدوا الاب والام
هما القدوه وجميل ان الواحد
يقرأ فى كتب تساعده
فى تربيه اولاده
يارب يكونواقره عين
لك وتفرحى وتسعدى بهم
ان شاء الله
تحياتى وسلامى

klmat said...

aliaa
حسيت اوى ياعلياء قد ايه
عانتى من الوسطه حقيقى الشعور
بالظلم شعور مرير
بس انا احساسى ما بيخيبيش
ربنا حايفرجها عليكى قريب
وان شاء الله ابارك لك بتعيينك
انتى اسلوبك جميل وكل كتابتك
فيها تقوى
ومن يتقى الله يجعل له مخرجا
سعيده اوى بتعليقك
ربنا معاكى
شرفتنى ونورتينى

Anonymous said...

El 7aga el gamola en lsa fi nas zyk liha mbad2 gamila

Sherif

Anonymous said...

El 7aga el gamola en lsa fi nas zyk liha mbad2 gamila

Sherif

harmless said...

حتى القاع له درجات

عندما تسمح الانظمه بان يمتلك الثروة الفاسد والمنافق واللص والراشى والمرتشى
فنحن فى القاع

وعندما تتكامل مصالح الحكام مع اللصوص فيتبادلون المنافع ويتقاسمون الثروة والسلطة ويفقرون الملايين ويحبطون الملايين فهذا قاع سحيق

وعندما يخترق الفساد العدل فيتكبر المجرمون وياخد الفاسدون اماكن الشرفاء
فقد وصلنا الى اخر الهاوية

klmat said...

الباشمهندس شريف
اشكرك جدا جدا ومعروف عنك
انك صاحب مبادىء انت المثل الاعلى
ربنا يخليك

klmat said...

harmless,
للأسف الشديد احنا فعلا على حافه
الهاويه وربنا يستر
تحليلك فى محله
اشكرك جدا على التعليق
نورت مدونتى
تحياتى وسلامى

دكتور كسلان said...

السلام عليكم
بالنسبة لموضوع الكوسة
لو نهر النيل بقى صلصة
مش هيكفى الكوسة اللى فى مصر
انا معاكى ان التربية الصحيحة من الصغر هى اللى بتشكل الانسان
عندك حق فى كل كلمة قولتيها
خصوصا موضوع النشاة فى بيت ملتزم ويتقى الله


اقتراح بسيط
ممكن تسمى مدونتك
كلمات ماثورة

3abdo me7tas said...

الموضوع بصراحة عايز قاعده كده وتمخيخ عشان الواحد يرد عليه
ادعيلي بس وانا ان شاء الله هرجع وهقول رأيي ان شاء الله

ما علينا said...

جاية طبعا اشوف ردك على تعليقي
ما لقيتش ليه بقى
لان واضح انه طار واتحذف
قبل ما تقريه
او ما اتحفظش من اصله

والخلاصة يا كلمات

ان الطفل بيتولد صفحة بيضا
اول خطوط بتتخط فيها
بيقوم بيها البيت خاصة الام

وكلنا عارفين
حتى الخطوط لو اتمحت بتسيب اثر واضح
لان الصفحة كانت بيضا

قصدي ان اللي بيزرعه البيت
سواء خير او شر
صعب جدا حد تاني يقلعه

لكن المجتمع كله بيحصد نتيجة الزرع دا
بما فيهم البيت والصفحة اللي كانت بيضا

واعتقد ان بيت الشعر دا ما حدش يقدر يخالفه

الام مدرسة ان اعددتها
اعددت شعبا طيب الاعراق

وسلام ايتها الام الجميلة
بحسك دايما بتكتب بقلب ام

loumi said...

العزيزة كلمات
انا معاك طبعاً إن إحنا اللي بنكون شخصيه اولادنا بالتربيه السليمه او غيرها
بس المشكله ان اللى بيشوفوه بره البيت فى الواقع حاجه صعبه جدا وبتبقا محتاجه منهم مصارعه ومجاهده عشان يفضلوا متمسكين بالمبادىء اللى اتربوا عليها
وليس امامنا سوى الدعاء لهم
تحياتي يا قمر

klmat said...

د/ كسلان
اتمنى انتكون فى احسن
حال وعندك حق فى موضوع الكوسه وصلصه
النيل ولا اجدعها صلصه
واشكرك على مدحك
دهمن ذوقك
تحياتى لك

klmat said...

3abedo me7tas
مخمخ زى ماانت
عايزر وربنا يوفقكويكتب لك
كل خير انشاء الله
تحياتى وسلامى

klmat said...

ماعلينا
ازيك انا اقدر
مااردش على تعليقك
اكيد تاه فى السكه
كلامك وتحليلك مظبوط جدا
والام اساس وربنا
يوفق وينور بصيره
كل الامهات
دورهم بقى اصعب
اليومين دول اوى
وطبعا الام مدرسه
سعدت اوى بتعليقك وتحليلك
تحياتى وسلامى

klmat said...

loumi
طبعا انا معاكى جدا
حاليا دور الام والبيت
بقى اكتر صعوبه
الاولاد بقوا عفاريت
والمغريات والانحرافات
بقيت متنوعه
نعمل اللى علينا وندعو الله
ان يحمى اولادنا
وينور بصيرتنا وبصيرتهم
نحياتى لك

catroz said...

هما الخسرانين
علموها تعتمد على غيرها من صغرها
و تنجح من غير مذاكره
هتتعب اوى البنت دى لما تكبر

klmat said...

Catroz
عندك حق حاتتعب
وتتعب بعدم العلم
والتباهى بالحسب والنسب
مش بالعلم والمبادىء
المدونه نورت بتعليقك
شرفتنى
سلامى وتحياتى

اسامة يس said...

موضوع جميل...
ومعاك الف حق ... من شب على شيء شاب عليه ...
اسلوب سرد مميز
دمت بكل ود
خالص تحياتي