Tuesday, August 28, 2007

لا بيتباع ... ولا بيتشرى


الحنان
كنت من فتره فى زياره صديقه لى كانت راجعه من العمره
وكان عندها قريبه شابه فى عيونها دموع محبوسه وحبيت تنزل لكن صحبتى مسكت فيها .عرفت انها معيده فى احدى الجامعات وحاصله على ماجستير وبتحضر للدكتوراه
وسنها حوالى 34 سنه وسبب حزنها هو انه بوفاه والدها وهى فى اعدادى افتقدت مصدر الحنان الوحيد فى حياتها
لها اخ تزوج وانجب وتعيش مع والدتها التى هى مصدر عذابها!!! هذه الشابه المتفوقه المحبه للعلم تجد سعاده غامره
فى القرأه وخصوصا فى مجال تخصصها وتسكن مع والدتها فى شقه صغيره . اوده نوم وسفره وصاله
وللعيله ورث من والدها المتوفى عباره عن اطيان تدر عليهم دخل وفير
والام هى المتحكم اشترت للأبن شقه فاخره وتصر على ضيافته 3 او 4 مرات فى الاسبوع تطبخ فيهم اشهى المأكولات
ويحضر الاخ وزوجته واولاده للغذاء مما يضيع بعض من وقتها والام متضرره جدا من الكتب ومن ابنتها وعلى طول تنتقدها رغم ان الام كانت مديره وحاليا بالمعاش
ولما قلت لها اكيد اخوكى حنين على مامتك قالت هو غرقان فى خيرها لكنه لايرضى عن تصرفاتها معى . ومستفيد
قلت لها طب طالما الحال ميسور خدوا شقه اوسع يكون لك فيها حجره مستقله
وحاتدفعوا فرق بين شقتكم الحاليه والجديده ومن ورث والدك قالت ان مامتها رافضه حتى تجديد البيت وانه محتاج
جدا تغيير الا ان الام تقول مستحيل وعلى جثتى
وهى مرتبهاعلى قد لبسها وكتبها كما ان والدتها بتطلب منها شراء حاجات للبيت
فى الحقيقه حزنت جدا لوضع البنت دى وفضل الموضوع يشغل بالى
وبعدين قرأت فى المصرى اليوم عن الطفل اللى تاه من سنين طويله حتى ظنت اسرته انه توفى خصوصا ان عنده اعاقه ذهنيه وتوليت تربيته اسره احسنت معاملته واحبته رغم ظروفه واصبح ابن لهم
وظهرت العيله القديمه وتمسكت بابنها فاذا بامه التى توليت تربيته تبكى بحرقه وتتمنى ان لا يفارقها ضناها
سبحان الله الام مش هى التى تلد الام هى التى تحب ابنها ايا كان شكله او ذكائه هى اللى عندها استعداد تضحى بعينها لاولادها القصه فى المصرى اليوم تاريخ اليوم لما قرأتها افتكرت الشابه الحزينه اللى بتتمنى شويه حنان من والدتها
المتيسره خصوصا انها صاحبه حق فى ميراث والدها وبدلا من ان تكون امها سندها وتغمرها بحناها منغصه عليها حياتها
فعلا الحنان لا بيتشرى ولا بيتباع سبحان الله

45 comments:

دكتور كسلان said...

تانى مرة اكون اول واحد يعلقلك
عشان متقوليش بعد كده انى كسلان

دكتور كسلان said...

بالنسبة للموضوع
انا مش مصدق ان ممكن يكون فيه ام بالشكل ده
دى معدومة تماما من عاطفة الامومة
حتى لو كانت بتعامل ابنها كويس
مش معقول تعمل التصرفات دى مع بنتها
انا معاكى فى ان الام اللى ربت وعاشرت الابناء هى اللى بتحس بيهم اكتر
وبتزعل عليهم وعلشانهم اكتر
بس برده المفروض ان عاطفة الامومة تتولد مع الست مع اول مولود
ربنا يهديلها امها
وترجع تحس بعاطفة الامومة تجاهها


عايز اشكرك على موضوعاتك الجميلة
من غير مجاملة والله العظيم
مدونتك احسن مدونة بزورها


انا اسف عشان معلقتش ع البوست اللى فات
النت كان فاصل
وكنت لسه هاعلقلك
لقيت البوست ده نزل

سلاااام

beroo said...

ربنا يسعد الناس كلها بس فعلا نماذج زي دي واكتر وهي دي الحياه

Abeer said...

حكاية ان مش الام اللي بتولد الام هي اللي بتربي ديه صح مليون في المية
ربنا يخليلنا امهاتنا يارب ويقدرنا على حسن معاملتهم
كل ما اقرا حاجة زي كدا
وافتكر في لحظة اني زعلت ماما مني في حاجة
بندم جداااااا
:(

Unknown said...

عزيزتى
انا شفت من الحالات دة كتير لان الاستاذ ابنها هو الولد فبتقول ان بيت ابنى الى لازم يبقى مستور انما البنت مسيرها لواحد ياخدها ويبقى مسئول عنها
الموضوع مش انها امها او لا الموضوع قديم عزيزتى موضوع ولد وبنت
موضوع عمرة مهيتغير فى مجتمعنا ابدا

Anonymous said...

Klam Gamil Ya a7sn w a7n om fi el donya.

Sherif

احساس لسه حى said...

عزيزتى
المشكله ان الام مش حسه بابنتها وانها مكبوبته لحد دلوقتى مش مرتبطه ولا عارفه تستقل ولا عارفه ترتاح مع امها
بس لازم تراعى سنها وان للام وجهه نظر حتى لو غلط مش هنعرف نغير رائيها وهى فى السن ده
على العموم لازم الاهل يدوا لكل ابن حقه وبلاش تبدى حد عن التانى
خدى بالك مش كل ام بتدى الولد وتسيب البنت
انا اعرف حاله الام بتدى البنت ومش عاوزه تدى الولد اى شئ مع انه عنده اطفال ومحتاج
ربنا يعين الجميع
تحياتى سلام

klmat said...

د/ كسلان
ماشاء الله على النشاط
للأسف نموذج الام دى موجود وفى
اقسى كمان من كده
ليا بوست قديم عنوانه
القلوب القاسيه كان
فى موديل للأمهات
اللى من النوع ده
كل سنه وانت طيب
الكلام اللى قلته على مدونتى
كتير اوى عليا
ربنا يخليك ويجبر بخاطرك
واشكرك جدا جدا
تعليقك بيسعدنى اوى
تحياتى ودعوات بالتوفيق

klmat said...

abeer
نورتنى وانا متفقه
معاكى تماما
وربنايخليلك
مامتك
تحياتى لك

klmat said...

ايويه
عارفه صحبتى قالت لى نفس
كلامك ده وهى طبعا قريبتها
وفاهمه بس انا كنت
مش مقتنعه اوى
بس هى اكدت لى ان
الام بطبيعتها مش حنينه
لكن الموضوع ولد وبنت
ربنا يهدى
اشكرك جدا على تعليقك
دايما منورانى

klmat said...

شريف باشا
اشكرك جدا جدا
على التعليق الرائع
دعوات بكل الخير

klmat said...

احساس لسه حى
انا موافقك فى كل كلمه كتبتها
بس فى الحاله دى الام حسب
ماوضحت لى صحبتى موضوع ولد وبنت
البنت ماشاءالله
ذكيه وعارفه ان والدتها مش
حا تتغير كانت بتفضفض
وبتحاول تفكر مع
قريبتها فى مطالبه والدتها
فى حقها فى الميراث
ربنا يعينها هى واللى زبها
مناصعب الحاجات
فى الدنيا قسوه الاهل
سعدت بتعليقك
شرفتنى ونورتنى

الزهراء said...

بصراحة مش قريت الردود كلها معلشش

بس كلامك صح جدا

وبصراحة كمان في نماذج زي دي كتير اوي

ولسه خالي كان بيحكي لي عن حاجات زي كدا

بجد ناس اتجردت من الاحساس تماما

بيخلفوا عيالهم وتلاقيهم بيرموهم في الشوارع او حتي مش بيهتموا بيهم

في النهايه

الدنيا مليااااااااااااااانه حاجات زي دي واكتر

دعي الخلق للخالق

وله في ذلك حكمة
يعني البنت دي اللي هيا فيه دا حكمة من ربنا ممكن اختبار او بلاء حاجات كتير اوي هيا نفسها لو فكرت ف كده هتعرف ان فيه الخير ليها مهما كان الموقف ايه

بس :):)

sahr said...

دي أول زيارة لمدونتك ومش عارفه اعلق اقول ايه انا مقدرش احكم على الام لان المفروض الحب والحنان دي غريزة في الام لا بتتباع ولا بتشتري بس انا اعرف ناس تانية بتفرق جاااامد في معاملتها مع اولادها ليه وإيه السبب مش عارفه

klmat said...

الزهراء
ميرسى جدا لتشريفى بالمرور عندى
الناس دى موجوده ومش قليليين
للأسف . بس لما بنفكر سوا ممكن
نوصل لكيفيه التكيف معاهم
والتعامل معهم بما يرضى الله
لصله الرحم
وكمان نحمد ربنا اللى عطانا
اهل بيحبونا وبيضحوا علشانا
تحياتى لك

klmat said...

sahr
نورتى مدونتى بتعلبقك
الام دى نوع من البش
بتكون عواطفه فيها شىء
من القسوه بتكون طبيعتها
زى مافى ناس بطبيعتها
حنينه والتفرقه فى المعامله
نهى عنها الرسول عليه الصلاه والسلام
ربنا يهديها ويهدينا
جميعا لفعل الصواب
وانا رايحه ازورك حالا
تحياتى وسلامى

klmat said...

bero
نورتنى بتعليقك
واسفه جدا فى التأخير فى الرد
على تعليقك الجميل
بعد ماكتبته
الظاهر مسحته بدون قصد
شرفتينى وكل سنه وانت طيبه

Doba said...

خليتى جسمى كله يقشعر من التلبد فى المشاعر- سبحان الله ربك مبيديش لكل الناس كل حاجة بيديهم ثروة واسرة واخ وام وبيت مع ذلك برده نزع من قلب الام الحنية

اللهم عافينا - ثم انتى دايما كده تكتبى موضوعات متميزة وتمس القلب

وجعتى قلبى يا شيخة روحى يارب ربنا يحبك ويحبب فيكى خلقه كمان وكمان

سلام يا قطة
هبة

Doba said...

يا أهالى البلوجات الكرام
طم ططم طم طم

أسمعوا وأعوووووووووووو
لقد قمنا بنشر الفصل الجديد - للقصة المجنونة والجوهرة المدفونة - كشف المستور - وعلى الحاضر أنه يعلم الغايب بحضور المدونة لقراءة القصة وكتابة التعليق - وعلى كل زاير انه ميدخلشى الا برجله اليمين ويجيبلى حاجة حلوة قوى فى ايديه

يا اهالى البلوجات الكرام
مستنياكم كلكم

تعالوووو زوروووووونا
باى باى
دوبه

Bossy said...

السلام عليكم


بحييك علي الربط بين المثالين
والفرق الواضح بينهم
انا بجد صعبانه عليا الانسانه دي
المفروض مامتها تعنها في مزكرتها وغلها وتهون وعليها
فعلا الحنان لابيتباع ولا بتشري
الله يكون في عونها

kafrawy said...

ف مثل بيقول

اللى ربى خير من اشترى

و بعدين الدنيا كلها كدة

محدش عاجبة حالة


سلام بقى

klmat said...

doba
سلامه قلبك .عارفه الموضوع
ده من حوالى شهر بس مأثر
فيا جدا لحد دلوقتى الصعوبه
ان القسوه
جايه من المفروض يكون نبع الحنان
بس ربنا له حكمه
ربنا يفرجها على الابنه واللى زيها
مره تانيه سامحنى لو كنت سببت
لك تعب
تحياتى للأستاذ يحى
واشكرك لدعوتىلقرأه
القصه المشوقه
شرفتنى ونورتينى

klmat said...

بوسى
السلام عليكم ورحمه الله وبركاته
عارفه يابوسى الربط حضر
فى ذهنى تلقائى
فى ناس بتتمنى ظفر طفل
وناس عندها اولاد
زى الفل وتتعبها
سبحان الله له حكمه
بفرح اوى لما اشوفك
عندى ربنا يكرمك
تحياتى ودعواتى

klmat said...

kafrawy
سعدت بتشريفك لمدونتى
واسمح لى برد الزياره
ربنا يصلح حالنا جمبعا
تحياتى وسلامى

rack-yourminds said...

قصتك بجد مؤلمه كتير

يبدو لي الايام دي أن الاباء هم المطالبين ببر اولادهم

كتير بقرأ واكيد انتي كمان عقوق االاباء للابناء

عجبا يا زمن


تحياتي لكي وشكرا كتير علي هذه اللمحه الانسانيه

klmat said...

واحد
السلام عليكم
انت عندك حق
وكده بقى
كله فى الاتجاه المعاكس
ربنا ينور بصيرتنا جميعا
بفرح لما اشوف تعليقك
تحياتى ودعواتى بالتوفيق

أبوسويلم said...

فعلا مش اى حد يكتب عن مشاكل الناس
والله انا كل مرة ازداد اعجاب بكتاباتك
وده لانها صادقة ونابعة عن معايشة الفكرة
للاسف انه لسه فيه ناس بالقسوة دى
الواحد لا يتخيل فكرة انه لا يعدل بين اولاده لاى سبب وانت ام وتفهمى ده كويس دول كلهم حتة من الواحد ازاى يقرق بينهم فى المعاملة
ده الرسول قالنا نعدل بينهم فى القبل مش فى المال ولا اى حاجة تانية
تحياتى والسلام

اسكندراني في الغربة said...

لكل قاعدة شواذ

محمود على said...


المثال الي انتي بتتكلمي عليه
مثال بسيط
انا مش بقلل من حجم الي حصل للبنت
او الضرر الي هيحصلها

بس في ناس بتقتل عيالها
وناس تخرجهم تشحت

Ert3ashat said...

صدقيني موضوعك لمسني
لال الحنان والله الا الحنان

عمره ما يشترى و للي معندوش حنان بيبقى قلبه قاسي بشكل......

احييكي و الله

monzer said...

على فكرة أنا أول مرة أكتب لك تعليق وإن شاء الله ما يكونش الأخير ...المهم ربنا يكون فى عون الأخت اللى اتكلمت عنها وربنا يهدى أمها ...الرسول عليه الصلاة والسلام أمرنابالمساوة بين الأخوات حتى فى القبلات ...ياريت تكون نصيحتك لها بالصبر والدعاء لأمها...

klmat said...

ابو سويلم
اشكرك جدا جدا غلى المدح
فى اسلوب كتابتى ده من ذوق حضرتك
ربنا يجبر بخاطرك
طبعا انامعاك تمامافى واجب
المساواه فى الابناء الغلاوه واحده
لانملك الا الدعاء ربنا ينور بصيرتنا
جميعا ويهدينا
ويصبر الابناء اللى بيعانوا من قسوه الاهل
شرفتنى جدا
تحياتى لك

klmat said...

محمود على
انا معاك تماما وانا اعرف
ان فى حالات اقسى بكتير
من الحاله دى
ربنا يكون فى عونهم
المهم الحمد لله
انك رجعت تعلق
ده اسعدنى جدا
تحياتى ودعواتى لك

klmat said...

اسكندرانى فى الغربه
يارب تكون بخير
انا معاك بس
المشكله ان شواذ القاعده كترت
اوى . كل سنه وانت طيب
تحياتى ودعواتى بكل الخير

klmat said...

monzer
المدونه نورت بتعليقك
واناكمان اتمنى مدوامه التعليق
واسمح لى امر عندك
ربنا يصبرها ويهدى والدتها
شرفتنى
تحياتى وسلامى

klmat said...

Erta3ashat
سعيده جدا بتعليقك
وانا معاك فى رأيك
من اجمل صفات الانسان هى الحنان
ودى حاجه ربانى
شرفتنى ونورتنى
تحياتى وسلامى

دنـيـا محيراني(ايناس لطفي said...

عندك حق يا كلمات الحنان و العنايه ملهومش علاقه بالقرب و الصله ده بيبقي احساس خارج من القلب نموذج الام ده انا شفته كتير
بس البنت لازم تكون اقوي من كده شويه و لا تستسلم بس هاقول ايه في الاخر ده مامتها و عايزه ترضيها ربنا معها و يرضيها

klmat said...

دنيا محيرانى
انا معاكى لازم تصبر لأنها
والدتها وده فىحد ذاته ثواب
بس عايز مقدره
ربنا يقويها
وان شاء الله ربناحايفرجها
عليها
اشكرك جدا على التعليق
نورتنى وشرفتينى

ما علينا said...

عارفة يا كلمات
في نماذج ابشع من كدا

يمكن هي بتعامل اخوها احسن منها

انا باشوف نماذج بتعامل
الغرب احسن من ولادها
لها ربنا

بالرغم من ان دي حاجة شاذه عن الطبيعة

الا انها من كثرة انتشارها اصبحت شيء عادي جدا

وللاسف انا مش باقدر الاقي له مبرر

فين غريزة الامومة
فين فطرة الام

الله اعلم


لكن فعلا تحمد ربها
انها بتشتغل ولها دخل ممكن تعيل نفسها به
والا كان وضعها كان هايبقى اسوأ

وفي كتير في اوضاع ابشع منها جدا

كان الله في عونها
وليس لها سوى الصبر
لانها مهما حدث هي امها

برضوا من الحياة





كلمات
صفحة التعليقات
تقيلة جدا عندي
واغلب الوقت بتديني ايرور
علشان كدا باتاخر عليكي
اعذريني

تحياتي وتقديري

Anonymous said...

فعلا قصة حزينة جدا

ربنا يهدي الام والبنت لازم تستحمل وتصبر لانها امها مهما كان

وربنا ييسر لها وتلاقي الشاب اللي ممكن ينتشلها من الحياة الكئيبة دي

aliaa said...

انا بجد حزينة جدا من اللى قراته عن البنت دى لاحول ولا قوة الا بالله
انا مش عارفة ازاى ام تعمل كده مع بنتها هى البنت تقريبا كده مش متزوجة صح؟ فالمفروض الام تعوضها وتهننها عشان متحسش باى حزن ده الواحد بيحس بالحزن لما يلاقى حته منه حزين وباين عليه الحزن سواء اخت او ام او اب
صعبه اوى والدتها ربنا يهديها انا هقولك على حل وهو انها تدعوا لها بان ربنا يهديها ليها يعنى يهدى ماماتها ليها فى كل صلاة وخاصة الفجر وقبل المغرب بساعة وان شاء الله الدعوة مستجابة لان ربنا ميحبش الظلم وعمره ماهيظلمك وده ابتلاء
ربنا يصبرها ويعينها

3abdo me7tas said...

انا مش عارف الأم دى بتعمل كده ليه بصراحة انا دمى اتحرق منها ولو شوفتها قدامى مش عارف انا ممكن اعمل ايه
ربنا يهدى الجميع

klmat said...

ما علينا
انامتفقه معاكى فى رأيك
وتحليلك واكيد فى حاجات اقسى من
كده بس كل واحد بيشوف مشكلته
اصعب مشكله عموما قسوه الاهل
وخصوصا الام شىء بشع
ربنا معاها يصبرها ويلهما الصواب
انتى تشرفنى فى اى وقت
القلوب عند بعضها
وربنا ما يحرمنيش
من تعليقك الجميل
شرفتينى ونورتينى

klmat said...

علياء
عندك حق فى كل كلمه كتبتها
البنت انسه ربنا يوفقها
وانا بتمنى ان يظهر ابن الحلال
اللى ينقذها ويهدى مامتها
تعليقك اسعدنى ونورتى مدونتى
تحياتى لك

klmat said...

3bdome7tas
الحمدلله انك مش حاتشوف الام
احناعايزين نهدى النفوس
ربنا يصبر البنت ويهديناجميعا
شرفتنى ونورتنى