Thursday, February 14, 2008

يارب سترك

ذهبت الى المستشفى لزياره قريبه غاليه عليا كانت على وشك اجراء عمليه المراره كنت عندها قبل الموعد
المحدد لاجراء العمليه بنص ساعه كانت تبدو متماسكه لكن اكيد من جواها قلق
وكانت لابسه اللبس المعقم وبونيه الشعر انا من جوايا
كنت خايفه اوى كان الله فى عون اى حد بيمر بالتجربه دى كان فى اتنين من اخواتها
ومامتها كانت فى البيت لان والدها مسن ومريض وكل شويه تتصل تطمئن عليها وهى بتعيط
شويه وجابوا الكرسى وطلبوها لحجره العمليات شفت فى عنيها الخوف والدموع قبلتنا وقالت ادعوللى
بدأ الخوف والقلق يتسلل لقلبى وبدأ يجى اقارب لها المهم لقيت نفسى مش قادره استمر
قلت انزل امشى فى الشارع وادعى لها
لما رجعت المستشفى كان عدد الزوار كتر وصل اخوها وازواج اخواتها الكل على وجهه علامات قلق
وكل واحد بيقول للتانى دى سهله اوى دى شكه دبوس والتانى يردد طبعا طبعا وشكله مرعوب .
معذورين من اللى بنسمعه عن الاهمال ونسيان الفوط وسرقه الكلى وغيره ... ربنا يستر ويشفى كل مريض
المهم عدا الوقت بطىء وطويل وبعد ساعه ونص فاتت بصعوبه جدا طلعت ممرضه وجهها جامد الملامح
وقالت عايزين حد فى حجره العمليات شعرت بدقات قلبى بتزيد ورجلى بترتعش وقلت فى نفسى يارب سترك ولطفك
ولقيت نفسى بمشى فى اتجاه حجره العمليات كان اخوها جرى وقبل ما اوصل كان رجع وطمينا
انها قامت بالسلامه وعايزين الحساب بس طريقه الممرضه بعيده اوى عن الذوق واللياقه
ايه المانع انها تقول حمد الله على سلامتها وحد يحاسب
حقيقى رعبتنى انا اتشاهدت وبدأت الابتسامه تعلو الوجوه وقالوا هى فى الافاقه
شويه ولقيتها نايمه على السرير اللى بعجل وبيتجهوا بها الى الحجره بتاعتها
كانت لسه تحت تأثير البنج والحجره فيها انا واخواتها واخوها
واخت زوجها اما زوجها
فهو مسافر خارج مصر ولم ترغب فى اخباره كفايه غربته
والكل اجمع اننا نقوله بعد ماتقوم بالسلامه
المهم انها بدأت تتكلم وهى مازالت تحت تأثير المخدر مع اهات الألم
كانت بتقول بحبك اوى ياربى احمدك يارب واشكرك وبحبك يا آمنه علشان انتى طيبه اوى آمنه دى بنت اختها ائئئئ اه اه
لحد كده والكلام زى الفل شويه ونقلت . ذاكريامهاب ذاكر يا جزمه يااااه ده انت غلس ممممممممممم ماشى يا مهاب
مهاب ده ابنها . الحقيقه انا قلقت قلت دى بدأت باابنها مين عارف حاتقول ايه تانى الخوف تنقل
على ابوه واخته موجوده وبقيت اقول يارب سترك
المهم ان ابنها كان موجود وكان بيرفع حواجبه ويقول ماشى اتفضحت
ولقيت اخوها بيقول لاخته ماتكلميهاش وعايز يغلوش انا قلت اطلع
علشان المفروض دى واحده مش فى وعيها وعقلها الباطن اللى بيتكلم
قلت الله لايقدر لو كنت مكانها ماحبيش حد يسمعنى حاقول ايه
ياخبر ياخبر تخيلوا كل واحد كده ترك عقله الباطن يتكلم ويقول بأه بيحب ميييييييييييين ويبكرهههههه ميييييييييين
ويطلع مشاعره وماخفى كان اعظم ..فضيحه
اوم ايه عملت ناصحه وفقيقه قلت يابت اطلعى يقوم الباقيين يحترموا خصوصيتها ويطلعوا فقاقه بأه
وطلعت لكن ماحدش طلع ورايا .....حقيقى ناس ذوق ذوق ذوق
بس انا قلت انا اعمل اللى احب انه يتعمل معايا وفضلت اتمتم فى سرى يارب سترك يارب سترك

39 comments:

walaa said...

ازيك يا كلمات عامله ايه
ربنا يوفقك ويتم شفاء قريبتك على خير
ان شاء الله
انا ولت بنتى حنين قيصرى
بس انا الحمد لله فقت علطول وما عقلى الباطنى مخرفش بولا كلمه
اصل كنت لسه متجوزه جديد ولسه عقلى الباطنى مشلش هموم
بس ادعيلى ان اجيب ولاد تانى والولاده التانيه هطلع بلاوى هههههههه هههههههه ربنا يستر يا اميره يا رب
العقل الباطنى ده حكايته حكايه
ويشفى كل مريض يا رب
تحياتى ولاء

دنيتى الجميله said...

اميره الاميرات اميره
بصراحه كلك ذوق وانا سعيده بشخصيتك دى جدا
لانى من ساعه معرفتك حسيت انك هتكون دى شخصيتك وانا سعيده ان احساسى طلع صحيح
وحمدلله على سلامه قريبتك
اما بالنسبه لتصرفات الممرضات وطبعا مش كلمهم اكيد كده انا مش عارفه هو من كتر اللى بيشفوه فبقى دا عادى عندهم ولا ده احساس بيختلف من واحد للتانى
انا خالتى شفاها الله كان عندها غسيل كلوى وكان نفسها مامتى تكون معاها رفضت بشده وكأنها بتتحداها لحد ما وصلت الدكتوره ولما شافت خالتى تعبانه سمحت لماما بالدخول عندها لحد ما نفسيتها ترتاح
ربنا يشفى كل مريض ومرضى جميع المسلمين

Unknown said...

هههههههههههه
عسل
انت عارفة انت اول حاجة عملتها اول ما فتحت
قريت البوست بتاعك
علي اد ماكنت منفعلة ومضايقة علي صاحبتك
بسبب طريقة كلامك
ولما جيتي تتنقلي علي البنج وفترة الافاقة
حسيت اد اية انت قدرتي تنقليني من حالة الحزن اللي الضحك
بجد اولا حمدلله ع سلامة صحبتك
ثانيا اسلوبك جميل
ثالثا
انا كنت عاملة عملية قبل كدا
قعدت اقولهم هو انا قولت اية وانا في البنج
محدش رضا يقولوي والدكتور قالي ربنا يباركلك يابنتي
نفسي افهم لحددلوقتي انا قولت اية علشان يقولي كدا
وفعلا المفروض الفترة دي تبقي
خصوصية مش كل الناس تعرفها
يلا سلام ياجميل

klmat said...

walaa
اهلا بك ويارب تكونى بخير
انا تمام الحمد لله وقريبتى ربنا اكرمها وتم
الشفاء الف حمد وشكر وربنا يشفى كل مريض يارب ميرسى على سؤالك كتر خيرك
ربنا يخلى لك حنين ويسعدك انتى وبابها
وتجيب اخ جميل وتكون طبيعيه وسهله جدا
وتقوللى كل خير وكل حاجه تبقى جميله
تعليقك بيسعدنى جدا
ربنا يحفظك ويسترك ويكتب لك كل اللى فيه
الخير ويحقق كل امانيكى ياااارب
حبى وتقديرى

klmat said...

دنيتى الجميله
ده انتى الجميله وكلامك جميل ربنا يخليكى
يارب الحمد لله قريبتى بخير
اكيد مش كل الممرضات بس عارفه لو كل
واحد فينا حط نفسه مكان اللى حايسمع
كلامه الدنيا حاتبقى اجمل ربنا يهدينا
هى لو قدرت قلق اهل المرضى الامور حاتختلف
سلامه خالتك الف سلامه ربنا يشفيها هى وكل المرضى يارب وتصرف الدكتوره انسانى
ياريت كل الاطباء والممرضات يكونوا
على درجه عاليه من الرحمه
كلامك جميل مش عارفه اعبرلك عن سعادتى به بس احنا حاسيين ببعض
ربنا يخليكى ويكتب لك كل اللى فيه
الخير ياااااااااارب
مع حبلى وتقديرى

klmat said...

my hope$
اهلا بك يامنى نورتى مدونتى
اشكرك جدا جدا على كلامك الجميل
ده بس من ذوقك وربنا ما يكتب
لاى حد تعب تانى والف حمد على سلامتك
عارفه غالبا حاتكونى حمدتى وشكرتى ربنا
صديقتى بدأت بحمد وشكر ربنا ورددت
كتير بحبك اوى يارب عايزه اصلى
وبعد كده نقلت للوم ابنها الحمد لله
عدت بس عرفت بعد كده انها كل كلامها
كان حمد وشكر لربنا
ربنا يديكى الصحه والعافيه ويحقق
امانيكى يااارب واشكرك جدا جدا
مع حبى وتقديرى

rack-yourminds said...

بجد ضحكتيني هههه مع ان الحكايه متسدعيش ضحك

الحمد لله ان ربنا شفاها ,وربنا يشفي كل مريض ,يا رب

تحياتي وسلامي

عصفور المدينة said...

اللهم سلم سلم وبعيدن أحيان كثيرة الناس لا تحترم هذه الخصوصية
ولكن يمكن لطرف مثلك أن يخرج منبها ويقول لهم هيا نخرج ولا تكتفين بالتلميح لأني لاحظت كثيرا في مثل هذ المواقف أنك إذا خرجت ربما يدخل أحد مكانك

عصفور المدينة said...

نسيت أن أدعو لها بالعافية شفاها الله وعافاها وربنا ينجح مهاب

3abdo me7tas said...

حمد الله على سلامتها ويا رب تكون آخر الأحزان
ربنا يشفيها يا رب ويشفى كل المسلمين أجمعين

Anonymous said...

شفاها الله
و رزقها الصحة و طول العمر

klmat said...

rack your minds
اهلا بك وربنا يسمع منك ويشفى كل مريض
واشكرك جدا وربنا يمتعك بالصحه والعافيه
مع تحياتى وتقديرى

klmat said...

عصفور المدينه
اهلا بحضرتك كلام حضرك مضبوط وانا فكرت اعمل كده بس لأن الموجودين كانوا قرباء لها من الدرجه الاولى وعلاقتى بهم غير قويه
وكنت اشعر ببعض الغربه معهم ولا اضمن
ردود الأفعال لذا قررت ان ابدأبنفسى
وكان عندى شعور انهم يريدون ان يسمعوا
والله اعلم بس ده شعورى
اشكرك جدا على مرورك الكريم
مع تحياتى وتقديرى

klmat said...

عصفور المدينه
ربنا يبارك فى حضرتك ويمتعك بالصحه والعافيه واشكرك جدا للدعاء لها ولمهاب
وربنا يسمع منك ياااارب
مع خلص تحياتى وتقديرى

klmat said...

3bedo me7tas
ازيك عامل ايه يارب تكون بخير
وربنا يقويك واشكرك جدا على دعاءك
ربنا يشفى كل مريض ويمتعك بالصحه والعافيه مع دعواتى لك بكل الخير
تحياتى وتقديرى

klmat said...

tazarat
اهلا بك واشكرك جدا على دعاءك
ربنا يديكى الصحه والعافيه
مع تحياتى وتقديرى

رئيس جمهوريه نفسى said...

الف حمدلله على سلامتها وربنا يتم شفاها يارب ويقومها بالسلامه العبد لله يوم ما عمل المعليه صمم انى محدش يكون معاه بعد العمليه غير انتيمى علشان الفضايح اصلى كده كده انا وهو مفضوحين قدام بعض
حركتك بالخروج كلها ذوق تحياتى

مدحت محمد said...

هههههههههه
الواحد فى البنج بيخرف وبيقول
كل اللى فى نفسه
على العموم الف حمدالله على سلامة قريبتك
وربنا يشفى كل مريض يارب

Anonymous said...

أحترمت فيك إحترام الخصوصية و رقة مشاعرك تجاه المريضة التى أدعو لها بالشفاء من رب العالمين هى و مرضى المسلمين اللهم آمين آمين
أبو خالد

klmat said...

رئيس جمهوريه نفسى
اهلا بك سياده الرئيس . ربنا يعطيك الصحه والعافيه وطول العمر بدون عمليات يارب . الحمد لله هى بخير وتماثلت للشفاء
اشكرك جدا جدا
تحياتى وتقديرى

klmat said...

دوحه
اهلا بك . معاك حق وربنا يديك
الصحه والعافيه ولا يحوجك للبنج وتخاريفه يارب سعدت جدا بتعليقك
تحياتى واحتراماتى

klmat said...

ابو خالد
اهلا بحضرتك وربنا يكرمك على ذوقك وكلامك الجميل ويعطيك الصحه والعافيه انت وكل حبايبك ويشفى كل مريض
نورت مدونتى
تحياتى وتقديرى

كاميليا بهاء الدين said...

حمد الله على سلامتها
وربنا يديكى الصحة والعافية دايما يارب

هههههههه
الحمد لله إنها مش قالت كتير
فكرتنى بواحدة قريبتى كانت برضو دخلت عملت عملية كده
وفى الإفاقة الحقيقة أبدعت.. مفيش حد مش كان له رساله من العقل الباطن
كله كله .. وكل اللى يجيى عليه الدور يسمع الكلمتين بتوعه ويخرج كأنه خارج من حمام سباحة توا
هههههههه

فى اللحظات دى.. الإنسان بيتكلم بصوت الصمت
بيقول كل اللى كان ساكت عنه

ربنا يشفى كل مريض يارب

تحياتى وحبى

kafrawy said...

بصى بقى

هما حبيتين صراحة

ع حبيتين شجاعة

كل واحد ها يجيب اللى ف بطنة عالطول

أمـ الله ـة said...

أولا حمد لله على سلامة أختنا
وجزاك الله خيراً على قيامك بالخروج من الغرفة وتطبيقك لقول الحبيب صلى الله عليه وسلم
لا يؤمن أحدكم حتى يحب لأخيه ما يحب لنفسه


وأسأل الله أن يسترنا فوق الأرض وتحت الأرض ويوم العرض عليك

hana said...

ربنا يشفيها يااارب
تعرفى ربتا بجد يستر ربنا يستر

الجنوبى said...

انت غلطانة انك مشيتى مش يمكن بعد ما انت مشيتى نقلت عليكى ههه
تحياتى
عمرو

loumi said...

عزيزتي أميره

حمدلله على سلامتها
والحمد لله ربنا ستر
إنك مشيتي
بس فضول غيرك خلاه يقعد يسمع
أنا كان حصل معي موقف كصديقتك
وبنا ستر وإعتذرت لواحده كانت موجوده
دون أن أشعر طبعاً
ولولا وجودها ووالدتي في الغرفه لما صدقت أني قلت ما قلت
:):):)

سلوى said...

العقل الباطن ده مصيبه بصراحه

ربنا يستر

وطبعا إنت اتصرفتي بكل شياكه بصراحه
وربنا لا يضعك في هذا الموقف ويحفظك

وحمدا لله على سلامه قريبتك

تحياااااااتي

Anonymous said...

سيدتى الفاضلة /ارجو من حضرتك الاشتراك معى ومع أختى فرنسا هانم
فى المطالبة بعودة الرقيقة زهرة الكاميليا إلى عالم التدوين فلقد أغلقت المدونة و انسحبت من أصدقائها و محبيها و لسيادتك و افر الشكر .. أبو خالد

klmat said...

الى ابنتى الحبيبه كاميليا
حاسه بكى اوى يا كامى انك مهمومه
وحزينه جدا اكيد معذوره ومتحمله كتيييير
غير انك انسانه رقيقه وحساسه
لما الواحد بيكون فى ازمه بيبقى مش عايز يشوف حد ولا يسمع نصيحه آلامه هو بس اللى حاسسها ربنا يفرجها يارب ياكاميليا
مش عايزه اقولك رغم ان العلاقه بيننا مجرد ردود على بعض فى التدوينات
لكن انا حاسه بكى وارسلت لك ايميلى
انا عندى احساس انى عارفه مشكلتك وبتعانى
من ايه ومين السبب فيها لكن مش اقدر اكتبها وجايز اكون غلطانه لكن كنت استشعر باحساسك بالوحده وكان احساسى
من زمان ان مامتك متوفيه وبعد كده
لقيت احساسى صادق لما كتبتى عنها
عايزه اقولك ان انتى تتحبى وانك انسانه
جميله ورقيقه وحسك مرهف وده من عوامل معانتك .حبيبتى كل منا بيمر بظروف قاسيه ووقتها بيكون منهك بس ثقى
ان ربنا حايكون معاكى وحايبدل احزانك بافراح باذن الله
مش يمكن اشعارك تتنشر ويبقى لك كتاب
زى ماحصل مع المدونات اللى نجحت انتى فعلا موهوبه ومش لازم تستلمى لاحزانك
قاومى ياكامى وممكن تفضفضى انا
لااملك الا الدعاء لك بان تنتهى معانتك وعذابتك وربنا يكرمك وافرح بك
وياريت ترجعى تفتحى مدونتك من تانى
وفضفضى فيها او افتحى واحده جديده
اعملى اى حاجه تسعدك بس انا نفسى اطمئن عليكى وبشكر ابو خالد جدا جدا
انه قصدنى اكيد حاسس بشعورى ناحيتك
ارجوكى طمينينى عليك ياحبيبتى

klmat said...

كاميليا
كلامك جميل وزى السكر وربنا
يعطيكى الصحه والعافيه وراحه البال
انا زعلانه اوى علشان حاسه بكى حزينه
بس ان الله مع الصابرين
دعواتى لك بكل لخير

klmat said...

kafrawy
اهلا بك ازيك يارب تكون بخير
عارف انا بعد الموقف ده جه فى دماغى
فيلم ارض النفاق وحبوب الصراحه
عندك حق ربنا يسترها معانا جميعا
ويمتعك بالصحه والعافيه
تحياتى وتقديرى

klmat said...

امــ اللــه
السلام عليكم
الله يكرمك عارفه ده فعلا مبدئى
لا يؤمن احدكم حتى يحب لأخيه مايحب لنفسه
لوكل واحد اتصرف كده الدنيا تبقى
افضل بكتير متعك الله بالصحه والعافيه
سررت جدا بمرورك واتمنى ان نتبادل الاراء
تحياتى وتقديرى

klmat said...

hana
اهلا بك نورتى مدونتى هى الحمد لله
بخير وربنا شفاها تماما الف حمد وشكر
وربنا يسترنا جميعا ويديكى الصحه والعافيه والهنا يااارب
سعدت جدا لمرورك ويارب نتبادل الاراء دايما
تحياتى وتقديرى

klmat said...

انسان بلا عنوان
اهلا بك ياعمرو . مش بعيد ابدا تكون
نقلت عليا لا استبعد هذا احناوجهات
نظرنا مختلفه فعلا لكن فى ود وده
شجعنى اكتر انى اخرج بس الازمه دى
عرفتنى غلاوتها عندى الحمد لله
اشكرك جدا وتمنياتى لك بدوام الصحه والعافيه
تحياتى وتقديرى

klmat said...

loumi عززتى لومى
اهلا بك بتوحشينى . الحمد لله على كل شىء
عارفه انا بطبيعتى مش بحب الفضول بس
فى ناس كتير كده . الحمد لله ان والدتك
كانت معاكى علشان تعرفك قلتى ايه
:)
ربنا يمتعك بالصحه والعافيه
ويفرحك باولادك يااارب
تحياتى وتقديرى

klmat said...

salwa
اهلا بك ياسوسو فينك من زمان وحشتينى اوى
اشكرك جدا على كلامك الجميل وربنا يديكى الصحه والعافيه ودايما يارب متألقه وناجحه شرفتينى بتعليقك ومتغبيش اوى كده
دعواتى بالصحه والعافيه والسعاده
تحياتى وتقديرى

klmat said...

الاخ لفاضل ابو خالد
اشكرك جدا جدا لدعوتك انا بمجرد
مازرت مدونتها قررت ان اطلب منها
تخليها اجازه مش غلق لا تتخيل
مشاعرى ناحيه كاميليا ومدى حبى لها و حزنى
لشعورى بالعجز لانى مش قادره اعمل
حاجه ربنا يفرجها عليها ويبدل
احزانها ويقويها ياااارب
ويكرمك ويحفظ اولادك ويفرحك بهم
ويصلح حالنا جميعا
خالص تقديرى واحترامى