Tuesday, March 4, 2008

صباح جميل مشرق

صباح معطر بالورد والياسمين
لما تفتح الايميل بتاعك وتلاقى رساله جميله مرسله لك من احد قراء مدونتك
بيصبح عليك ويقولك سلامتك وازيك وايه اللى مزهقك ويتمنى لك الخير ويرسل لك رقم الموبايل ويقولك انت مش لوحدك انا معاك تفتكر شعورك حا يكون ايه ؟ اكيد حاجه تسعد وتقول الدنيا بخير والاجمل لما يكون الراسل انت بترتاح لكتابته ولاسلوبه وبتحب تقرا له وتشعر انه مش غريب عنك ده بالضبط اللى حصل معايا امبارح كنت فى عملى وبفتح الايميل كالمعتاد لقيت ايميل عنوانه جديد عليا مرسل من الجميله لومى الحقيقه شعرت قد ايه ممكن الواحد يكسب صداقات جديده وقد ايه ممكن ايميل يغير المود من حاله احباط الى امل لفته جميله بتدل على نبل اخلاق ورقى ومشاعر جميله
كان عندى شويه حاجات مستعجله بس كنت فى حاله نشوى ونفسى ارد على لومى واقول لها ربنا يخليكى ياحبيبتى النهارده ا اتصلت بها ومن قبل ما اقول اسمى عرفتنى . نمره جديده عليها وبعد ارسال الايميل ربطت على طول كانت مكالمه سريعه بس جميله واتعرفنا على بعض اكتر ليه انا بكتب لكم اللى حصل ولم اكتفى بشكر لومى وبس . لأنها اسعدتنى جدا فوق ما تتوقعوا او يمكن فوق توقع لومى ولقيت انها لفته جميله كان لها تأثير رائع عليا قلت ياريت كل اللى يقدر يخفف عن اى حد حتى لو مافيش معرفه شخصيه يعمل كده حايكسب صديق او يدعم صداقته اكتر وحايسعد غيره حقيقى لفته رائعه جدا كان لها تاثير عميق .
فى تصرفات بسيطه بس بيكون لها اثر قوى مش ممكن يتنسى
خالص حبى وودى لك يالومى الجميله وربنا يحميكى وتكونى سعيده وتسعدى دايما الآخرين

16 comments:

منى said...

انا اول تعليق
انا سعيده اوى بسعادتك دى
انتى انسانه جميله قوى ورقيقه يا اميره
انا والله بحبك اوى
ربنا يسعدك دايما

Anonymous said...

سيدتى الفاضلة
تصدقى كنت هأعمل كده و لكن خشيت أن تسئ الظن ،سعيد أنا كونك سعيدة فأنتى إنسانة رقيقة القلب دمتى سعيدة..
أبو خالد

klmat said...

عزيزتى منى
اهلا بك . انا الأسعد ربنا يخليكى يامنى
واللهى يامنى انا كمان بحبك فى ناس كده
تلاقى نفسك بتحبيهم وكأنك بتعرفيهم
يمكن احنا مش بنعرف بعض معرفه شخصيه
بس بتلاقى فى اهتمام مشترك نوعيه المواضيع
والاراء وحتى النفسيه كل ده
بيبان فى التدوينات اللى بنكتبها علشان كده بتيجى الالفه . الحمد لله انى اتعرفت على ناس جميله وانتى منهم معرفه الناس
الحلوه بتخللى الدنيا اجمل
ربنا يديم المحبه ويفرح قلبك ويحقق امانيكى
خالص حبى وتقديرى

klmat said...

الاخ الفاضل ابو خالد
كأنك عملت وانا لايمكن اسيء الظن فى حد
زيك باين من اسلوبك سمو اخلاقك وطيبه قلبك وحبك للخير وانا كنت بتابع تعليقاتك عند كاميليا من زمان وشعرت
بنبل اخلاقك ربنا يكرمك ويفرحك باولادك
ياااااارب
خالص تقديرى واحترامى

سلوى said...

يعني مش عارفه
مشاعر مين فيكم أكثر نبلا ورقي

عزيزتي المرأ على دين خليله

ما شاء الله
ربنا يبارك فيكم

وفعلا عندك حق لما بتجدي حد بيسأل عليكي ومهتم

دمتى بكل خير عزيزتي

رحــــيـل said...

اميره

تصدقى فعلا بجد فى علاقات انا عملتها من عالم التدوين رائعه جدا جدا
ربنا يدومها علينا نعمه بجد كلنا

فى لقاء يوم السبت للمدونين فى اقاهره فى ساقيه الصاوى الساعه11 صباحا
لو قدرتى تكونى موجوده ان شا ءالله
تحياتى لكى

mohamed emera said...

السلام عليكم
اول زيارة ليا وشفت فيها مشاعر جميله قوى
ربنا دايما يجمعك بالاصدقاء اللى تحبيهم ويخففوا عنك وتاخدوا ايد بعض للجنه
جنه الدنيا وجنه الاخرة كمان
تحياتى

احساس لسه حى said...

عزيزتى

اول حاجه هى مشاعر كويسة وجميلة انها تحس انك مضيقه وتحاول انها تخليكى تفتحى قلبك ليها وتحاول تتكلم معاكى وتريحك

وطبعا الاجمل لو الانسان ده تتمنى تكلمه وتعرفه وتتعرف عليه

بس اكيد لازم الانسان يختار الشخص المناسب اللى يبعتله اميله ويديله موبيله علشان ما يحرجهوش ولا يحرج نفسه

وصعب انا مثلا لو لقيت اى امراه بلوجر مضيقه ابعتلها اميلى وكمان رقم موبيلى

اظن ده هيكون تصرف مش حلو منى

ولا ايه رائيك

تحياتى
سلام

klmat said...

salawa عزيزتى
اهلابك يا سوسو وربنا يكرمك
واشكرك جدا على كلامك الجميل
لومى سباقه حقيقى ربنا يسعدها ويسعدك
كل تدويناتك رائعه
خالص حبى وتقديرى

klmat said...

ra7eel عزيزتى
اهلا بك ياساره فعلا معاكى حق
عالم التدوين رائع وفى ناس بعتز بها جدا
واصدقائى وبحب اعرف رأيهم وبثق فى تفكيرهم
واشكرك جدا على دعوتك لى لساقيه الصاوى
حقيقى كنت اتمنى اكون معاكم بس
انا من اسكندريه وصعب بالنسبه لى
ياريت تبقى تكتبى عن اللقاء ده
خالص حبى وتقديرى

klmat said...

mohammed,
اهلا بك فى زيارتك الاولى ويارب تتكرر
وانت جيت فى وقت مناسب البوست
كان فيه مشاعر جميله اصل اللى قبله
كان مختلف
الحمد لله نورت مدونتى
خالص تحياتى وتقديرى

klmat said...

احساس لسه حى
اهلا بك . شوف جميل اوى اننا نشعر ببعض
والطبيعى انك مش حاترسل ايميلك او رقم
الموبايل الا لشخص واثق فيه وصدقنى
اللى بنكتبه بيبين كل واحد ميوله ايه واخلاقه ايه من الموضوعات والتعليقات
انا اللى راسلتنى سيده زييى عن نفسىمش
حارسل ايميلى او رقم الموبايل لرجل لكن
اعلق عنده فى مدونته واحاول اساعده
وابدى رأيي واعتبره اخ او ابن لى طالما مواضيعه محترمه نتبادل الاراء والتشاور
ولو حد ارسل لى ايميل سارد بالشكر
ولن اسئ الظن وساكتفى بالشكر كتر خيره
ولكنى لن اتبادل الحديث بالموبايل
انا لااؤمن بصداقه بين رجل وامرأه
قد يقول البعض انى رجعيه بس ده مبدأعندى
خالص تحياتى وتقديرى

الجنوبى said...

ايوة ياست اميرة ماشية معاكى فل
اللى اداكى يدينا امال انا مفيش حد بيعبرنى هههه
ربنا يسعدك
تحياتى
عمورة اللعيب

loumi said...

يا حبيبتي

يا رب كل صباحاتك
جمال وإشراق

أنا ما عملتش يا أميره
غير إللي حسيت إنه ممكن يخفف عني ويسعدني
لو إتحطيت في نفس الحاله من الزهق والضيق
ومكالمتك كان لها نفس أثر السعاده في نفسي ويمكن أكثر
وربنا يكرمك يا رب دنيا وآخره
ويسعدك ويسعد كل الناس إللي حواليكِ

موبايلات بقا
:):):)

سلام يا جميله

klmat said...

انسان بلا عنوان
اهلا بك ياعموره ايه ده بأه
مافيناش من قر ههههههه
طبعا انا بضحك معاك . انت
مدونتك جميله بس مافيش عنوان
نعمل ايه . شرفتنى وربنا يكرمك ويسعدك ياااااارب
خالص تحياتى وتقديرى

klmat said...

loumi حبيبتى
صباحك سكر
واللهى يالومى ربنا يعلم انتى اسعدتينى
جدا والجميل ان كان الصبح فى بدايه
اليوم ولما بتكون البدايه جميله الامور
بتمشى . عارفه انا التدوينات بتاعتك
دايما بترجم احساسى بس باسلوبك الجميل
ده اللى بيحصل معاياواقول فى نفسى سبحان
الله ده اللى عايزه اقوله وتعليقاتك بتعجبنى جدااا ولما راسلتينى قلت ده
من القلب للقلب رسول
ميرسى ياحبى
ربنا يكرمك ويسعدك وتفرحى باولادك
ويديكى الصحه والعافيه اكيد موبايلات
:):) :)
سلااااااااااااااااااام