Wednesday, March 5, 2008

يوم بالالوان والموسيقى التصويريه

وانا فى الثانويه العامه كنت اشعر بقرب نهايه مرحله انى تلميذه وانى على ابواب مرحله
الشباب التى اشتاق اليها وساصبح طالبه جامعيه
لم تكن تعنينى اى كليه التحق بها لأن مافيش كليه تنا سب ميولى فهى مزيج من شويه علمى على شويه ادبى !!!!
فانا احب بعض فروع الرياضيات جدا مثل الهندسه والجبر
اما حساب المثلثات والتفاضل والتكامل والاحصاء لاتستهوينى واحب اللغات .
والجغرافيا اسامى البلاد وعواصمها بدون رسم خرائط او دخول فى تضاريس يعنى من كل ماده عايزه حته
لسه مافيش كليه مطابقه لميولى !!!!
فكنت اذاكر واركز على المواد التى اميل اليها اماباقى المواد كانت تتراكم وانا اقول لسه بدرى الامتحان فى يونيو
لحد ماوصلنا لشهر ابريل فى مواد متفوقه فيها واخرى مركونه على الرف وكتبها نظيفه زى ما استلمتها
فى الوقت ده بالذات وقرب الامتحانات اشعر ان الدنيا حلوه اوى الجو بتاع رحلات وقعده فى بلكون منزلى التى ترى البحر
لكن ضميرى واجعنى لانى مش قادره اقوى ارادتى واذاكر كما ينبغى .
المهم استيقظت من نومى فى اوائل ابريل ومسيطره عليا فكره ان شهرين وحاسيب مدرستى اللى بقالى 3 سنوات فيها
وحبيتها وحبيت الطريق اللى بمشى فيه اليها وحاتخلى عن لبس المدرسه اللى اتعودت عليه
فقررت بينى وبين نفسى انى اسجل اليوم ده فى ذاكرتى وبقيت اقول لنفسى سجلى فى دماغك احداث اليوم والأماكن
بالصوت والألوان فهذه الايام لن تعود
فاكره انى عملت شعر ى ذيل حصان والتوكه لونها بنى غامق واحتضنت شنطتى واهتمت برباط عنقى الازرق وكاميرتى عيونى
وفنجلتها واذانى صاغيه ولمعت الطبله تأهبا للتسجيل وكنت سعيده اوى بفكره التسجيل فى الذاكره
اول حاجه كانت جميله انى سمعت اغنيه شاديه الشمس بانت من بعيد جايه ومعاها يوم جديد
اخدت نفس عميق زاد من انتعاشى وفى المدرسه كانت الكاميرا تتجول وتسجل المدرسين والمدرسات لا بسين ايه همساتهم لبعض .
الطابور وتحيه العلم ونشره الاخبار المدرسيه
ثم اخذت وكيله المدرسه المايك وطلبت من البنات عدم الوقوف فى شرفات المدرسه لوجود شبان بيعاكسوا البنات والعكس
كنت سامعه كل كلمه ومركزه قوى بهدف التسجيل ووضع فايل منظم فى الذاكره
لكن لم يعنينى معنى الكلام فصورت وكيله المدرسه فى التايير الزيتى الانيق والنظاره السوداء واحمر الشفاه البرتقالى
وشعرها القصير المصبوغ .
الطوابير وهى تتفرع للفصول على انغام موسيقى جميله
وبعدين قلت فاضل انى اخد صوره للموقع من كل الاتجاهات اتجهت للشباك الذى يرى البحر الممتد بلونه الازرق الجميل والامواج البيضاء الهادئه وكانت رائحه البحر هله واخذت صوره رائعه مازلت اتذكرها
ثم اتجهت بادواتى للناحيه الآخرى فى اتجاه المنازل حتى اسجل بمنتهى الأمانه كل حاجه بضمير
الكلام ده كان فى الخمس دقائق اللى بين الحصص طلعت اسجل من ناحيه المساكن كان فى داده بتشاور ليا بس انا
مش واخده بالى بتشاور ليه بس اخدت لها صوره . وهى تشاور بحماس اكتر لابأس اخدت لها صوره تانيه
وانا سعيده ولكن لم تكتمل سعادتى شعرت بذيل حصانى بيتشد منى خير الله ما اجعله خير التسجيل لم يكن فيه اكشن
كانت وكيله المدرسه ماره من خلفى ورأتنى وانا فى الممر الى بيطل على المساكن
وتوهمت انى من البنات اللى بتعاكس الشبان وده ابعد مايكون عن طبعيتى افتكرت كلامها فى الطابور
ولم استطع ان اتكلم ولكنى كنت مندهشه و بضحك فى سيرى ده انا بسجل اليوم وكده الذكرى حاتتحفر وتثبت اكتر
ولكن بدأت تشد ذيل حصانى اكتر وانا فى حاله ذهول ازاى تظن فيا كده ده انا وضعى مختلف ووقوره
وببتسم فى بلاهه وبدأ شعرى وكرامتى تؤلمنى واستشعر خطوره الموقف .
ولكن مدرسه الكيمياء شافتنى وانقذتنى من ايدها وقالت لها دى بنت مؤدبه جدا دخلت فصلى وانا مش مصدقه بس سجلت بنجاح
ورغم مرور سنين طويله لكن الفايل موجود. لما رجعت البيت وقعت عينى على كتاب الأحياء وكانت بالنسبه لى من المواد العويصه
وشكل الكتاب مرعب ضخم جدا اتصلت بسلوى صحبتى وانا زعلانه اوى من نفسى لأنى بضيع وقت كتير و من المستحيل الوقت يكفى طمينتنى وقالت لى انا
عندى الحل. انا وانتى حانخلص الاحياء النهارده !!!10 دقائق وحاكون عندك حضرى الشاى لقيتها جايه وتحت ابطها جورنال .
ايه ده يابنتى قالت لى ده مكرر الأحياء كان ملخص بيتباع فى مكتبه جنب بيتها فيه كل رسوم الاحياء وملخص الشرح.
فقرأناه فى ساعتين وحفظنا الرسوم وقعدنا نشرب الشاى واوهمنا نفسنا باننا خلصنا المقرر ونجحت فيها على الحركرك

سعادتى كانت لاتوصف رغم موقف الوكيله المرعب لانى سجلت بامانه واحتراف ووهمى انى خلصت مقرر الاحياء زاد سعادتى !!!فات زمن طويل لكن اليوم محفور فى ذاكرتى بالالوان والموسيقى التصويريه

41 comments:

منى said...

هييييييه تانى مره على التوالى اول تعليق
لسه واحده وابقى هاتريك
ههههههههه
تصدقى انا برضه مكنتش لاقيه كليه فيها اللى عايزاه
كنت بحب اللغات والمواد الادبيه بس الجغرافيا مش كلها وكنت بحب الكمياء والاحياء وبكره الفيزياء

رجعتينى بالبوست ده لثالثه ثانوى بتاعتى
كانت ايام
وبنا يسعد ايامك
تحياتى يا قمر

الجنوبى said...

ايوة ياعم الرايق
فعلا كانت ايام جامدة واحلى حاجة فيها انى انا وصاحبى كنا بنغلس على اى حد
اييييييييه دنيا راح الشباب وايام وحب الشباب
تحياتى عمرو

Anonymous said...

Youm Gamil.

Sherif

Anonymous said...

متشابهة ذكرياتك الجميلة مع ذكرياتى التى تسبق ذكرياتك بسنين طويلة لأننى ممن درسوا فلفل و شرشر فى الأبتدائية وفى الثانوية بدأ الحب يدق باب القلب مع بنت الجيران و كانت مدرستى فى و سط البلد (ميدان الشهداء)و كانت مدرستها على البحر و كنت أقف لأراها من على بعد خمسمائة متر و اخجل حين ترانى و أنصرف لحال سبيلى و ايضا كنت أسجل كل تلك الذكريات فى بلوك نوت ضاع منى ..
سيدتى أعجبتنى طريقة سردك و تصويرك المثبت فى الذاكرة..ذكريات جميلة جميلة
أبو خالد

سلوى said...

أيام جميله فعلا

وجميل إنك سجلتيها
فكرتيني بها والله

بس مين سلوى المنقذه دي

ههههههههههههههه

دمتى بكل خير وسعاده

مدحت محمد said...

هلبس نضارة قريب بسبب خطك الرفنع ده
ياسلام على الذكريات الجميلة
يوم بالالوان والموسيقى التصويرية
تعرفى حتة البنات اللى بيعاكسو ولاد دى بقت منتشرة بطريقة غبية
الاول كانت البنات تتعاكس وتتكسف انها بتتعاكس دلوقتى بقى العكس
فعلا
علامات يوم قيامة
تحياتى

مدحت محمد said...

بتقليلى انت من سن اولادى
ده انا عندى25 سنة حرام عليكى
هههههههه
لسة فاكرة من ساعتها
ايام ثانوى

حمامة said...

الله

جميل اوي يا بختك
انا بقى صعب افتكر اى حدث من ايام الثانوى لأن ذاكرتي مش قوية
ولانى مكنتش بروح المدرسه اصلا كنت مقضياها منازل كانوا صحابى لما اوحشعم يتصلوا بيا يابنتى وحشتينى انزليلنا يوم مش بفتكر الا الاحداث المهمة اوى
تصدقى فى ناس كتير وحشتنى معرفش عنهم حاجة

يااااااااا فكرتينى :)

Unknown said...

ياة
تصدقى فكرتينى باجمل ايام حياتى بالرغم من ناس كتير بتكرة المرحلة الثانوية وبخاصة ثالثة
الا انها كانت اجمل سنة فى حياتى
موضوع احيكيى علية وذكريات جميلة رجعتنى لاحلى سنة فى عمرى

walaa said...

ايام الثانوى رجعينا لذكريات الماضى
خليها تنسينا هموم الحاضر
بس بقه انا كنت عكسك انا كنت شقيه بس كنت مؤدبه والله برده
واكيييد فى ذكريات فى حياتنا لاتنسى
المدرسه الثانوى الوحيده التى تطل على البحر على ما اتذكر هى هدى شعراوى صح الكلام
بان انى اسكندرانيه يعنى
تحياتى يا جميل
ولاء

دكتور كسلان said...

ازيك يا مدام اميرة
يارب تكونى بخير
ويارب تكون ايامك كلها سعيدة وتكون ذكريات جميلة

بوست جميل جدا
مش عارف حسيت وانا بقرا البوست
ان انا بسمع اغنية محمد منير
يا بنت يا ام المريلة كحلى

بتبقى فعلا ذكريات جميلة جدا
انا بحب جدا فترة الثانوى
بحبها بحلوها ومرها
خصوصا لما كنا نزوغ من المدرسة
هيا صحيح حاجة غلط
بس كنا بنحب نتشاقى

فكرتينى بالايام الجميلة دى

جميلة جدا فكرة التسجيل
اكيد انت بتستمتعى جدا لما بتشوفى الصور دى

ربنا يجعل ايامك كلها سعيدة

انا اسف انى بتاخر فى زيارة المدونة

سلاااااااااااااااااااااااااااااااام

دكتور كسلان said...

زيك يا مدام اميرة
يارب تكونى بخير
ويارب تكون ايامك كلها سعيدة وتكون ذكريات جميلة

بوست جميل جدا
مش عارف حسيت وانا بقرا البوست
ان انا بسمع اغنية محمد منير
يا بنت يا ام المريلة كحلى

بتبقى فعلا ذكريات جميلة جدا
انا بحب جدا فترة الثانوى
بحبها بحلوها ومرها
خصوصا لما كنا نزوغ من المدرسة
هيا صحيح حاجة غلط
بس كنا بنحب نتشاقى

فكرتينى بالايام الجميلة دى

جميلة جدا فكرة التسجيل
اكيد انت بتستمتعى جدا لما بتشوفى الصور دى

ربنا يجعل ايامك كلها سعيدة

انا اسف انى بتاخر فى زيارة المدونة

سلاااااااااااااااااااااااااااااااام

klmat said...

عزيزتى منى
اهلا بك فى اى وقت تنورينى
بصراحه صعب توفير كليه بالمواصفات
بتاعتى ده انا عايزه حته من كل ماده
والحمدلله ان فى حد زيى:)
دايما بتكون مراحل الدراسه جميله
رغم عدم حبنا للمذاكره
ربنا يكرمك ويسعدك يارب
حقيقى تعليقك بيسعد قلبى
خالص حبلى وتقديرى

klmat said...

انسان بلا عنوان
اهلا بك ياعمرو . عارف الواحد
علشان يبقى رايق بيحاول يفتكر
حاجات حلوه علشان الامور تمشى
المهم بطلت تغلس على صاحبك ولالسه
يلفندم لما انت تقول راح الشباب
انا اقول ايه دى نفريتيتى الانتيم
بتاعتى ربنا يسعدك
خالص تقديرى وتحياتى

klmat said...

الباشمهندس شريف
ربنا يجعل كل ايامك جميله وهنيه
يااارب
خالص تحياتى وتقديرى

klmat said...

عزيزى ابو خالد
اهلا بك وكويس انى فكرتك بذكريات
جميله بينى وبينك فتره مش طويله
بين عادل وسعاد وشرشر
فركه كعب هههههه.
اشكرك جدا جدا دايماجابر بخاطرى
ربنا يكرمك ويفرحك باولادك
خالص تحياتى وتقديرى

klmat said...

salwa عزيزتى
اهلا بك نورتى مدونتى كانت
ايام جميله فعلا . سلوى دى صحبتى من ثانوى
وكنا جيران فى نفس الحى
ودهها خفيف جدا ودايما عندها حلول فوريه
لما اتجوزنا انا سافرت مرافقه لزوجى وهى كمان بينا وبين بعض قارات ولما رجعت مصر
تصورى كان بيتها جنب بيتى فى نفس الحى
والعلاقات والحب بينا وبين اولادنا مستمر
حتى الأن الحمد لله الظاهر كل اللى اسمهم
سلوى عسوله
خالص حبى وتقديرى

klmat said...

مدحت محمد
اهلا بك . عارف ايامى كان من
الصعب تلاقى بنت بتعاكس اولاد موجودين بس قله
لكن الايام دى ربنا يهدى
وبعدين يعنى انا قلت لك انك فى سن
اولادى وعارفه سنك لازم يعنى تسيح ايون
ياابنى انت فى سن اولادى بس انا مش عجوزه هههه
اما بالنسبه انى لسه فاكره فى ايام
مش ممكن تتنسى وبعدين انا كنت بركز
انى اسجل علشان احكى لاولادى ويارب
يدينى العمر واحكى لأحفادى
وخللى موضوع السن فى سرك
خالص تحياتى وتقديرى

klmat said...

حمامه
اهلا بك انا كنت بحب اروح
المدرسه بشوف فيها اصحابى اللى
علاقتى لسه معاهم لحد الآن حقيقى
عرفت ناس كويسه واصحابى لكن
دول لهم تاريخ معايا واحنازى
مانكون اهل الحمد لله
سعدت جدا لمرورك
نورتينى مع خالص تحياتى وتقديرى

klmat said...

عزيزتى ايويه
اهلا بك وانا سعيده انى فكرتك بأيام جميله
يارب كل ايامك تكون جميله وسعيده
لانك دايما بتحاولى تسعيدى الاخرين
خالص حبى وتقديرى

klmat said...

walaa عزيزتى
اهلا بك يالولو انا كنت فى
راس التين الثانويه . اكيد طبعا
كنتى مؤدبه انا كنت بطبيعتى هاديه
وشقاوتى داخليه يعنى بين القربيين
جدا منى وكنت احافظ على احترامى جدا
وده اللى خلا مدرسه الكيمياء تنقذنى
الحمد لله ايام جميله اوى
ربنا يسعدك ويكرمك يااارب
خالص حبى وتقديرى

klmat said...

عزيزى د / كسلان
اهلا بك ويارب تكون بخير وسبب
عدم ظهورك انك ماشى فى مشروع الجواز
انا كل شويه ازورك الاقى مافيش جديد
ولو كنت معلقتيش كنت حاسأل عليك
فى مدونتك
انا بخير الحمد لله
الحمد لله انى فكرتك بايام الشقاوه الجميله
انا عايزه اقولك انا ماكنش معايا كاميرا
انا كنت باخد الصور فى مخى وكنت بركز
لكن اللى يشوفنى ساعتها يقول انى بتنح
بس مش كده خالص انا كنت عايزه صور
حيه تقدر تقول كاميرا فيديو مثلا
اما بالنسبه لاغنيه منير انا بحبها اوى بس عارف فى اغنيه للمصريين من تاليف صلاح جاهين افتكرتها دلوقتى بتقول
فى كل حى ولد عتره وصبيه جمال
وكلنا اهل وعشره وجيره وخلان
زمانه ماشى بخطوه يدب زمانها كبرت وبقيت ام الايام بتجرى
انا سعيده اوى انك رجعت تعلق
ربنا يخليك وافرح بك قريب يارب
خالص تحياتى وتقديرى

كاميليا بهاء الدين said...

الله

ذكريات جميلة
كنت متخيلاكي في كل كلمة
من وصفك الدقيق

ذكريات المدرسة دي من اروع الذكريات

دمت جميلة

كاميليا

مدحت محمد said...

ربنا يديكى الصحة
ههههههههههههههه

Shaimaa Zaher said...

إزيك يا أميرة

أنا بس باطمن عليكي

وبادعو الجميع من خلال مدونتك لزيارة مدونة الشهيدات

منى وندى ونهر ضحايا عمارة لوران المنكوبة

وشكرا لإنسانيتك

رابط المدونة

http://monanahrnada.blogspot.com/

دنيتى الجميله said...

ايه اللون الجميل ده
انتى صورتى اجمل ايام الدراسه
ايام الثانويه واحساسك بانك فضلك زقه وتبقى انسه جامعيه
ايام حلوه كانت كلها مرح وصداقات ملهاش اول من اخر
انا احب اصحابى الى الان من ايام ثانوى
ربنا يسعد ايامك كلها
سلام يا اميره الاميرات

أحساس لسه حى ...أنا مش موافق said...

عزيزتى
انا بحب الحاجات دى قوى

ذكريات بتفكرنا بالماضى

ودايمن ذكرى الماضى احلى من حاضرنا

90%من اللى بيفتكروا الماضى بيلاقوا احلى من حاضرهم

ليه مش بتحلوا الدنيا دايمن

على العموم دائما اسعدى بذكرياتك الى ان يكون الحاضر ملئ بالاشياء الجميله التى لا مكان فيها لاى ذكر

حلوة

او

وحشه

تحياتى

سلاااام

klmat said...

ابنتى كاميليا
اهلا بك منورانى انا فعلا سعيده
بالذكريات دى وحبيت اشارككم فيها
ربنا يسعدك وتكون ايامك كلها
سعاده
خالص حبى وتقديرى

klmat said...

مدحت محمد
اهلا بك وكبرت لك الخط
وربنا يقويك انت كمان
خالص تحياتى وتقديرى

klmat said...

shimaaa zaher
اهلا بك ياشيماء ويارب تكونى بخير
انا الحمد لله تمام ربنا يخليكى
انا كمان بتمنى من الكل يزور
مدونه الشهداء دى اقل حاجه
نقدر نعملها دى دعوه كريمه منك
وربنا يجازكى كل خير ويجازى
كل من يزورها بالخير لانه بيخف
عن والدهم ربنا يقويه
اتمنى لك طول العمر بصحه وسعاده
خالص حبى وتقديرى

klmat said...

دنيتى الجميله
ربنا يخليكى ياقمر على
كلامك الجميل ودعواتك ليا
الحمد لله انا سنوات الدراسه
كانت بالنسبه لى اغلبها جميله
ربنا يجعل كل ايامك ودنيتك جميله
على طول يارب
خالص حبى وتقديرى

klmat said...

انا مش موافق
اهلا بك ياحسام ومبروك المدونه الجديده
واضح انك حزب معارضه من الاسم
الماضى فى ذكريات جميله واخرى
مش تمام بس انا حبيت اشاركم
فى الحلو والحاضر بردوا فيه من ده وده
بس دايما بيكون فى حنين للماضى
من فات قديمه تاه
ربنا يوفقك
مع خالص ودى وتقديرى

Anonymous said...

جميل جدا جدا .. الوصف والسيناريو ملآن بلون ورائحة البحر وكأننا شايفين الشبابيك .. اللى طالة عليه .. وعالمساكن .. مع ان لحد دلوقت مافهمناش اللى يتشاور بحماس وخدتى لها لقطتين كانت بتشاور ليه؟

كلمات
ممكن كام فايل حتى نعود ولو لبعض الوقت للزمن الجميل؟

من فضلك يعنى

Anonymous said...

أنا لحد دلوقت مش قادر احدد .. انت بقى عندك اتنين شريف

Anonymous شريف
وهو بيوقع باسمه بعد التعليق

وانا بادخل باللينك بتاعى مباشرة

طبعا أهلا بكل شريف فى مدونتك الجميلة .. حبيت بس اوضح مين يبقى مين

تحياتى ليكى وعالبوست الذى يثير الذكريات الجميلة

shahy said...

انا كمان سمعت اغنية محمد منير وانا بقرا كلامك

واكيد طبعا فكرتيني بأيام ثانوي

بارك الله فيكي يااميرة هانم

عن اذنك هانعش الذاكرة واعيش الايام دي شوية


تحياتي

arsenalwy said...

بسم اللة ما شاء اللة

الذاكرة حديد

انا مبحسدش ولا حاجة

بس ياترى فى الاخر دخلتى كلية اية؟؟؟؟؟؟

klmat said...

عزيزى شريف
اهلا ومرحب بك . سعيده اوى ان
ذكرياتى وصلت بالصوت والصوره
وكمان بريحه البحر المنعشه

عارف انا بعد التصوير وموقف الوكيله
اللى عمرى فى حياتى مااتعرضت له الحمدلله
وتهدئه مدرسه الكيماء ومدحها فيا لما
رجعت البيت وانا بفر الفايل
اتهيأللى ان الداده كانت تقصد تحذيرى
والله اعلم

الفايلات كلها تحت امرك
اما شريف فهو مهندس خارج مصربيجبر بخاطرى ويعلق عندى كتر خيركم
سعدت جدا بمرورك واسفه لتاخيرى زيارتك
من غير مااحلف انا كنت ناويه امر على
مدونتك الجميله لان كل الفايلات اللى فيها جديره بالقرأه
خالص تحياتى وتقديرى

klmat said...

shahy عزيزتى
ازيك ياشاهى واحشنى يارب تكونى
انتى واسرتك وحبايبك بخير
جميل اوى ان يخطر على بالك منير وانتى
بتقرأى ذكرياتى انا بحبه جدا
فكرتكم كلكم بااذى مضى
يارب اللى جاى يكون اجمل وتفرحى باولادك
ويخللى ابو الدراويش
خالص حبى وتقديرى

klmat said...

arselanwy
اهلا بك ياسيدى مافيش قر ولا حاجه
انتم ليه حاسين انى من قدماء المصريين
يعنى كبيره مش حا انكر بس مش عجوزه
هههههههه دخلت ياسيدى كليه التجاره
سعدت بمرورك
خالص تحياتى

Unknown said...

غريب اوي ان الاقي حد زيي
انا برضه يوم 10 مارس السنه دي
بيمثلي أشياء كتير و من قبله بيوم و انا حاسه ان اليوم ده لازم اصورة بكاميرا عيوني
و لان ربنا مش عاوزني انساه اتوفي فيه جدي و انا عمري ما افتكر تاريخ وفاة حد بس اليوم ده يوم انا فاكراه بالدقيقه و الثانيه

شكلي نكدت عليكي
بس انا عاوزه احييكي علي الكلام ده
و علي طريقة تفكيرك اللي انا و انتي مشتركين فيها علي ما اظن

تحياتي
ياسمين
ميس دوت
نحو التغيير العملي

klmat said...

miss dot
اهلا بك يا ياسمين نورتى مدونتى
ما غريب الا الشيطان . عارفه انا سعيده
اوى ان تفكيرك زيى عمليه التسجيل فى الذاكره مفيده جدا وكأننا بنحفظ تاريخنا

اسفه لوفاه جدك ربنا يرحمه ويديكى طول العمر والصحه واتمنى اننا نتبادل الأراء دايما مع كل الامنيات الحلوه
خالص تحياتى وتقديرى