Saturday, August 4, 2007

ناس محترمه

ناس محترمه
كنت راكبه تاكسى من يومين وكان الجو شديد الحراره وكنا فى عز الظهروقف التاكسى مده طويله فى الاشاره بتاعت سيدى جابر
كان الجو خانق والكل بيصب منه العرق وبدأ صوت الكلاكسات يعلا مما زاد من الشعور بالضيق

اناكنت بقول يارب الاشاره تفتح حاسه ان الهواء سخن ومش قادره اتنفس
فى الوقت ده كان فيه شاب عمره حوالى 18 سنه يرتدى كاب على راسه
وملابسه بسيطه ولكن نظيفه وعلى وجهه ابتسامه رغم الجو الخانق

وكان رايح جاى بنشاط فى وسط العربيات معاه مناديل
كلينكس وكيس كبير مليان اكسسوارات للعربيات زى الفرش اللى بيتحط على تابلوه العربيه
وفوط صفراء وحاجات من النوع ده ورايح جاى بنشاط صعب عليا اوى
فى شباب فى سنه فى فى المصايف وشكله طالب وبيحاول يكسب بعرق جبينه
بمجرد ما قرب امام الشبك بتاعى طلعت 10 جنيه قاللى عايزه ايه قلت دى علشانك
البسمه راحت من على وشه وقاللى انا بشتغل

وفص ملح وداب

انا قصدى اساعده بس على ما يبدو انى جرحته لم اتمالك دموعى وطلبت من السواق
ان يشترى منه وانا اللى حادفع السواق قاللى وانا كمان حاشترى
بس للأسف الاشاره فتحت
السواق قاللى هو بيشتغل مش بيشحت قلت عارفه واللهى انا قلت
زى ابنى واساعده وانفجرت فى البكاءلانى بدل مااساعده
سببت له الم . السواق كان ابن حلال لما حس قد ايه انا قهرانه
قاللى واللهى لو كلنا حانحس ببعض الامور حاتتحسن وقاللى كلام جميل خفف عنى
بس انا كنت زعلانه جدا وقعدت احمد ربنا بقه انا قعده فى تاكسى مش ببذل مجهود وحرانه
ومتضايقه وهذا الشاب الجميل فى عز الحر شايل وعمال يلف
كل اللى اقدرت اعمله ان دعيت له من قلبى ان ربنا يوسع فى رزقه ويبارك فيه
واعجبت به وبحبه لكرامته وبشاشته مع ان الوجوم والغضب كان منتشر حتى اللى قاعدين فى عربيات مكيفه مش مستحملين الاشاره
بينما هو بيتصبب عرق وشايل وعلى رجليه وبيبتسم
احيانا فى ناس بتاخد الموضوع كتسول لكن فى ناس عايزه
مورد رزق وعدم وجود فرص بديله بيضطرها تعمل كده
موقف تانى مشابه وبعد الأول بحوالى 10 ايام

كنت فى سموحه وكان فى عربه فاكهه عليها كريز قلت اشترى
وكان فى اتنين عساكر مرور الظاهر بيسلموا ورديه المهم لقيت
واحد منهم بيقول للفكهانى ادينى بنص جنيه رد الفاكهانى مافيش حاجه بنص جنيه
رد العسكرى ليه هو العنب ده بكم كان فيه زبونه واقفه قالت للفكهانى اوزن له نص كيلو وانا اللى حادفع
العسكرى حلف ميت يمين انه بيحسبه عنب وشكرها ولسه حايمشى
الست قالت له والنبى ما تكسفنى اعتبرنى امك وحياه امك لا انت واخده
الفكهانى اتكسف والعسكرى كان محرج والست تحلف الفكهانى والنبى اديله احسن حاجه
العسكرى مشى والست جرت وراه واللهى ده اللى حصل
حسيت ان الدنيا لسه بخير وفى ناس على قد حالها بس عندها كرامه وعزه نفس
مشيت وانا بدعى للعسكرى وللست وزعلانه على الوضع بتاع الناس
وسعيده ان فى ناس بتحس بشقا وتعب الناس الغلابه
بس حزنى على الناس الشقيانه كان اكتر
ياريت كل اللى ربنا مقدره على مساعده الناس يساعدها من غير ما يجرحها وربنا يرحمنا جميعا يارب

45 comments:

دكتور كسلان said...

انا شكلى كده محظوظ
اول واحد يعلقلك
بالنسبة للموضوع
الرسول عليه الصلاة والسلام قال
الخير فى وفى امتى الى يوم الدين
الحمد لله لسه الخير موجود فينا
بس للاسف الظروف اللى الناس عايشينها هى اللى بتخلى الخير ده ميظهرش
انا باحيى الشاب ده لانه ماستسلمش للظروف اللى الحكومة -منها لله-هى اللى حطتنا فيها
يرب تجعل الخير فينا دايما

aliaa said...

بجد احساسك ومشاعرك جميلة اوى يا كلمات
ربنا يديكى على اد نيتك وحبك للخير وللناس
ويرزق كل واحد بيسعى
وياريت تبقى كل الناس زيك كده وتحس ببعض

و القادم....أجمل said...

ربنا يعزك يا أميرة
بجد فيه ناس بتحب تشتغل
و تكسب فلوسها بعرقها
و علي النقيض تلاقي التسول انتشر
ووحده تلاقيها بصحتها ادامك
و بتشحت
حاجه بشعة الصراحه
ربنا يهدي الجميع
و يرزق الجميع بالحلال
تحياتي و حبي لك
:)

اسكندراني في الغربة said...

انا مش عارف الناس بتستغرب لية من مواقف زي دي
مش كل الشعب بيطلع في اخبار الحوادث حرامية و مختلسين و مغتصبين و ارهابيين
اغلبنا والحمد لله لسا مصريين
اغلبنا لسة بنعرف الحلال من الحرام
اغلبنا لسة مسلمين
------
معلش مقصر في الزيارة
تحياتي

Bossy said...

السلام عليكم

جزاكي الله كل خير

شفتي قد ايه الولد الاولاني عنده تحمل للمسؤليه وتحدي للظروف
عكس ناس تانيه كتير ظروفه احسن الف مره ومعندهاش ادني تحمل للمسؤليه
ربنا يعينه ويعين كل اللي زيه
ياريت بجد نحاول نحس ببعض ونقدر ظروف بعض

klmat said...

الى دكتور كسلان
سعيده بتعليقك والحمد لله
ان الخير موجود وربنا يزيده يارب
وصدق رسول الله صلى الله عليه وسلم
اشكرك واحييك

سلامى

klmat said...

علياء
ربنا يخليكى انتى اللى كلامك جميل
اوى الحمد لله الدنيا بخير
وفى ناس كتير اوى خيره
شرفتينى تحياتى وسلامى

klmat said...

القادم اجمل
ولاء سعيده بتعليقك وعندك حق
فى ناس صحتها كويسه وبتتسول
دول مش بتعاطف معاهم
بس فى ناس شقيانه اوى وبتكسب
قليل وبتحب كرامتها
ربنا يصلح حالنا جميعا
والحمد لله ان الدنيا بخير
وفى شباب جميل بيكافح
ربنا يوسع فى رزق الجميع
شرفتينى
تحياتى وسلامى

klmat said...

اسكندرانى فى الغربه
حقيقى انا سعيده اوى بتعليقك
لأنك لك مده مش باين ومافيش
مواضيع جديده فى مدونتك
وكنت عايزه اطمن عليك
ربنا يكون فى عونك فى الغربه
ويقويك ويرجعك لأهلك وحبايبك بألف سلامه
انا معاك فى رأيك
وانت مش مقصر فى الزياره
اكيد وقتك ضيق
ربنا يوفقك
شرفتنى
سلامى وتحياتى

klmat said...

بوسى
السلام عليكم ورحمه الله وبركاته
انا متفقه معاكى فى كل كلمه
كتبتيها وربنا يهدينا ويرحمنا جميعا يارب وتعليقك جميل اوى
تحياتى وسلامى

أمــانــى said...

ازيك يا قمر
فعلآ فى ناس مش بتحب تاخد حاجة من حد حتى لو مش معاهم
والذى قال فيهم نبى الرحمة والهدى صلى الله عليه وسلم
عن أبي هريرة قال : قال رسول الله صلى الله عليه وسلم : { ليس المسكين الذي ترده التمرة والتمرتان ولا اللقمة واللقمتان , إنما المسكين الذي يتعفف , اقرءوا إن شئتم : لا يسألون الناس إلحافا }
واجبنـا نســأل عليهم ونقوم بتوصيل مطالبتهم دون ان يحسوا اننا نقدم لهم المساعدة
تحياتى لكى

شمعة أمـــــل said...

فعلا الخير لسه موجود جواه ناس كتير بس يمكن الظروف الصعبه اللى بيمر بيها ناس كتير مش مخلياهم يقدروا يساعدا المحتاجين
وبالنسبه للشاب والعسكرى فانا بحييهم عل كرامتهم لانى بشوف ناس بتذل نفسها وبتشحت برغم انها فى كامل صحتها
ربنا يكرم الجميع ويفك كرب كل محتاج
تحياتى على البوست الجميل ده

Unknown said...

تحسبهم اغنياء من التعفف

ربنا يوفق اى انسان لا يتاخذ فقرة سبيل للتسول
وشكر للبوست الرائع واعزينى من قادرة اكتب اكتر من كدة لان كلامك موئثر جدا

انا كمان حصلى نفس الموقف مع طفل صغير جميل جدا لاقيتة واقف فى محطة المترو بيبع بخور
ورفض ياخد اى فلوس غير لما اشترى منة
ولما قولتلة طيب هشترى رفض ياخد غير حق البخور وبكى وقالى انا والله فى المدرسة
ربنا يوفقة ويكرمة

محمود على said...


مصر فيها ناس كتير وحشه
بتخلينا ناخد فكره او انطباع غلط عن المجتمع
بس في ناس اكتر منهم كويسين اوووي
ومحترمين اوووي
وبالتاكيد
هيظهروا في يوم من الايام
اكتر من الناس التانيه

Ert3ashat said...

صدقيني مش عارف اقولك ايه
بجد الموقف ده اثر فيّ اوي

حاجه فوق طاقة البشر و مع ذالك مستحملين و صابرين ز محافظين على كرامتهم...

بجد يا رب الشاب ده ربنا يوسعها عليه يا ربببببب يا رببببببب

klmat said...

اهلا بك ياامانى
انا الحمد لله بخير ويارب انتى كمان
تكونى تمام وظروف الشغل افضل يارب
تعليقك جميل ياامانى .صدق رسول الله
صلى الله عليه وسلم
وربنا يوسع على الجميع
تحياتى وسلامى

klmat said...

شمعه امل
انا معاكى جدا فى رأيك الدنيا بقت غاليه اوى واللى بيكفى نفسه يبقى كويس ممكن المساعده تكون لو فى فرصه
عمل حد يقدر يدل عليها او حتى تشجيع بكلمه حلوه والحمد لله الشاب والعسكرى
اخدوا دعوات كتيره دى برضوا
مساعده يارب ربنا يرزقهم
وربنا بيكرم المجتهد
تعليقك جميل اسعدنى جدا
تحياتى وسلامى

klmat said...

ايويه
سعيده اوى بتعليقك وربنا يكرم
الطفل الجميل ده هو واللى زيه
ويجازى اللى وصلنا للحاله دى
كلامك جميل اوى يا ايويه
شرفتينى تحياتى وسلامى

klmat said...

"محمود "انا مش معاهم
انا متفقه معاك فى الرأى
فى ناس كتيره ممتازه بس
المشكله ان الناس اللى مش تمام
هى اللى فى ايدها السلطه
ودوام الحال من المحال
ربأذن الله بكره حايكون احسن
مدونتك جميله اوى
شرفتنى تحياتى وسلامى

klmat said...

ارتعاشات
احساسك وتأثرك واصلنى جدا
وربنا يسمع دعائنا جميعا
وسبحانه اسمه العدل يقينا
ربنا بيعوض وبيوسع فى الرزق
هى امتحانات والناس الجميله
المكافحه بتدينا دروس
فى الصبر والمثابره وبتخلينا نحمد ربنا
سعدت جدا بتعليقك
تحياتى وسلامى

دكتور كسلان said...

ياريت تزورى مدونتى
وتشاركينا حملة
من اجل رفع الظلم عن المظلومين

momken said...

جميله الكرامه وجميل العفاف والله الناس حلوين اوى وطيبين اوى
انا كمان حصل معايا موقف وشادته
لسيده عندها حوالى سبعين سنه نحيفه جدا جسمها قليل جدا مستخبى فى جلابيه متواضعه كانته غاطسه فى قلب صدوق القمامه وبتلم منه تقريبا بلاستيك او حاجه كده
وجت بنت او سيده حوالى تلاتين سنه وطلعت من شنطتها فلوس وبتحاول تديها للست
لكن الست العجوزة رفضت بشده وماقلتش غير كلمه واحده رددتها كتير اوى لاء لاء لاء
اكنها بترفض تتنازل عن كرمتها وتمسكها بيها لاخر لحظه
الله عليكى يامصر الله على الكرامه الى بتلاقى ناس كتير قادره ومعاها بيتنازلوا عنها علشان يزودوا الرصيد

انتى هايله انك سجلتى الحاله دى
البوست روعه وحابس دمعه فى عنيا علشان قدامى ناس
تحياتى

klmat said...

دكتور كسلان
انا فعلا زرت مدونتك وانت مش د /كسلان
لأ انت انسان اوى وانا شايفه انك
ماشاء الله نشيط
يارب كلنا نبقى ايد واحده ضد الظلم
انامعاك وربنا يجازيك بكل الخير
تحياتى واحترامى لك
سلام

klmat said...

ممكن
تعليقك هو اللى رائع وانا اسفه ان الموضوع ده خلا كل اللى قرأه عنده
دمعه فى عينه انا عن نفسى قلبى بيعيط
وكل واحد فينا حا يكون صادف ناس من النوعيه الرائعه دى . ده فى حد ذاته
بيخلينانتحمل مشاكلناوبيصبرنا
وطول مافى ناس محترمه حايحصل التغيير بأذن الله . حقيقى تعليقك اسعدنى اما الناس اللى بيطاطو علشان يزودا الرصيد
انا معايا النوعيه دى صدقنى رصيدهم بيزيد فعلا بس احتقار الناس لهم بيزيد
وان كان فى الداخل
شرفتنى تحياتى وسلامى

Anonymous said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Se você quiser linkar meu blog no seu eu ficaria agradecido, até mais e sucesso.(If you speak English can see the version in English of the Camiseta Personalizada.If he will be possible add my blog in your blogroll I thankful, bye friend).

Anonymous said...

Bgd Dh a7la klam 2reto mn Zman.

El donya b 7'er tol mfih nas taybeen zyk

Amr Mohy said...

في حياتنا نواحي جميلة جدا بس دايما نتجاهلها علي حساب النواحي السلبية

بقي كل حاجة نقول الناس بقيت وحشة والناس مش مش بترحم .. هو اى نعم فعلا اغلب الناس كده بس ميمنعش لسه فى الاحترام والادب والاحساس عند بعض الناس وبسببهم الامل لسه موجود دائما :)

نـــــــور said...

السلام عليكم
اول زيارة ليا للمدونة الجميلة دي ومش هتكون الأخيرة بإذن الله

بجد البوست مؤثر اوي وعشان من القلب دخل للقلب على طول

ربنا يكرمك ويجزيك خير

3abdo me7tas said...

السلام عليكم ورحمه الله وبركاته
دى تقريبا ممكن تكون اول زيارة ليا عند حضرتك فى المدونة وبصراحة انا قريت المدونة كلها الصبح
الصبح الساعه 6 صباحا كده قلت ادخل اشوف المدونة دى ايه نظامها دخلت قريت اول بوست التانى شدنى وانا فى آخر التانى لقيت التالت بيشدنى وانا فى آخر التالت لقيت القصة بتشدنى قلت بس كفاية بالترتيب بقى عشان نركز وبعد ما خلصت وقفت فى الشباك وقعدت افتكر القصة اللى حضرتك كاتباها وكل المواقف اللى فيها حتى المواقف بتاعتك فى البوستات التانية وانا قاعد ببص للسما كانت صافية والعصافير طايرة فيها صدقينى حسيت بالتفائل والأمل من جديد
لو جينا نتكلم على كل بوست صدقينى انا مش هلاقى كلمات أقدر اعبر بيها على بوستاتك
كان نفسي الصبح اكتب التعليق ده عشان كان كل الكلام فى دماغى اللى عايز اقوله بس يا خسارة النت فصل ساعتها وقلت اكتبه دلوقتى عشان مسافر بكره باذن الله مشوار مهم بالنسبة لمستقبلى وانا طمعان فى دعوه حلوة من حضرتك لابنك يا ريت
لما ارجع باذن الله ان شاء الله هعلق على كل بوست وخلى بال حضرتك انا رغاى درجة اولى ربنا يستر بقى
ممكن نقول سلام مربع
قصدى سلام مؤقت
salam

اسلام رفاعى said...

عذرا للتحليق خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن طلاب الاسكندرية المختطفين
التفاصيل بمدونتى

loumi said...

العزيزة أميره
قريت أمبارح البوست
وبصراحه ما قدرتش امسك دموعي وانا باقرأ وسيبت تعليق بس تقريبا النت فصل منّي
إن شاء الله الولد ده ربنا حيكرمه دنيا واخره لانه عايز ياكل من تعبه وبجهده مش صدقه ولا احسان من حد
إحنا اوقات مشاعرنا بتطغى على تفكيرنا و لما بيصعب علينا حد بنحاول نقدم له مساعده وأغلبنا بيفتكر ان المساعده الماديه هى الحل وده مش صحيح لاننا بالطريقه دى بنساعدهم على التواكل والكسل
انا طبعا مقدرة إحساسك كأم
وكمان تصرف السيده عند بياع الفاكهه لان هو ده السلوك المطلوب مننا كلنا التعاون والتكافل
(لا تطعمنى سمكه ولكن علمنى الصيد)
ده مثل صينى
يا ريت كل واحد فينا يقدر يعلم شاب او فتاه حرفه او يقدر يعملهم مشروع صغير ويشاركهم عليه عشان ما يحسوش انه صدقه يعمل الكلام ده
تحياتى لك

klmat said...

Camiseta
Many thanks for your comment ,really
I want my bolog to be own to me only , I write what I feel , so please dont angry from me ,
Thanks again
Best wishes

klmat said...

anonymous
ya sidy rabna yougber be 7'trak
el hamdo lel aalh el donia be 7'air
we ashkorak gdn gdn
salamy

klmat said...

شاب مصرى
انا معاك فى الرأى جدا الناس اللى مش تمام اكتر وده اللى بيخلى الناس الطيبه
حاجه مختلفه اوى
بس الحمد لله رغم كل المساوىء بلدنا بخير
وربنا حا يحميها بأذن الله
علشان الناس الطيبه اللى زيك
تحياتى وشرفتنى بزيارتك

klmat said...

نور
سعدت بزيارتك وشعورك واصلنى
وشرف ليا اننا نزور بعض
سلامى وتحياتى

klmat said...

عبده محتاس
بجد انا مش عارفه اقولك ايه انا
فعلا محتاسه بعد الكلام الجميل اوى
اللى انت كتبته عن مدونتى
ربنا يخليك ويبارك فيك
وانت طبعا من قبل ماتكتب انا
ذكرت مدونتك فى التاج بتاعى
وقلت ان اجمل بوست كان بايجوميترى
فعلا مدونتك جميله جدا مش مجامله
ده رأيي
انا كنت بحس بسعاده لما اشوف البحر
من غير مااعرف السبب والموضوع بتاهك فسره
شرفتنى اوى اوى واكتب زى مانت عايز
ده شرف ليا
اسعدتنى جدا
تحياتى وسلامى

klmat said...

اسلام رفاعى
اشكرك جدا للمرور عندى
النهارده فى المصرى اليوم النائب
العام امر بالتحقيق
فى اختفاء الطلبه
وربنا يظهر الحق ويكون
فى عون الطلبه واهاليهم
شرفتنى

klmat said...

عزيزتى لومى
سعيده بتعليقك
والمثل الصينى فيه كل الحكمه
طبعا اللى يقدر يعلم حرفه او صنعه
شئ رائع
وعارفه لو الشاب ده كان متسول
كنت مش حا اساعده كان
بيعرض بضاعته من غير الحاح
واضح انه بائع
كان نيتى اكافأه
وربنا يقدرنا جميعا على فعل الخير
بطريقه سليمه انا معاكى
سلامى وتحياتى

klmat said...

الى عبده محتاس
السلام عليكم ورحم الله وبركاته
اتمنى من الله العلى العظيم ان يكتب لك كل
ما فيه الخير ويوفقك ويكون لك مستقبل
وتروح وتيجى بألف سلامه
تحياتة

rack-yourminds said...

بجد شكلك كده حنينه كتير ,الله يحفظك امثالك نادرين جدا في هذا الزمن

كتر الله من امثالك

تحياتي ليكي

klmat said...

الى واحد
ربنا يخليك ده بس من ذوقك
الدنيا بخير وفيها ناس حنينه
بس هما فعلا مش كتير
اشكرك جدا على مدحك
وربنا يجبر بخاطرك
تحياتى وسلامى لك

ما علينا said...

جميل جدا احساسك
واحساس السيدة الأخرى
والأجمل موقف كل من
الشاب والعسكري
تخيلي كدا لو كل القادرين

كان احساسهم زيك
وكل المحتاجينموقفهم
مماثل لموقف الشاب و العسكري

يا ترى كان يبقى حالنا ايه

klmat said...

ماعلينا
الجميل فغلا تعليقك
وربنا يصلح حالنا جميعا
تحياتى وسلامى

سابرينا said...

كل ماالواحد يقول
بقت عتمه
يلأقي ناس
لسه جواها نور وبتنور العتمه
thanx 4 sharing it!!!!!

klmat said...

sabrina
جميل اوى ان الواحد يلاقى
حد ينور العتمه الحمد لله
انا كل ماييأس الاقى
ربنا باعت رساله
يطمنى بها
ان شاء الله فى امل
ربنا اسمه العدل والحق
بعد الضيق أتى الفرج
سعيده جدا بتعليقك
ونورتنى
تحياتى وسلامى