Wednesday, November 28, 2007

الحاسه السادسه 2



وقفت سهام ونجوى فى حاله من الدهشه وقطع سرحانهم صوت الست نتكلم جوه
ولكن سهام تذكرت ان بناتها على وصول ومحمد منبه عليها مادخلش حد غريب ممكن يكون الهدف سرقه او اعتداء فاعتذرت للست بحجه ان عندها ميعاد مع
الدكتور وقالت لها بكره الساعه 9 الصبح حاكون جاهزه ونتقابل معاكى فوتى عليا حاتلاقينى على باب العماره .استغربت نجوى من تصرف سهام وقالت ده انا مش قادره استنى كنا عرفنا وخلصنا بس ده انتى طلعتى بركه واحنا مش عارفين
ردت سهام اللى حاتقوله انا حسيته مش حاتفرق معايا مين وبصراحه ممكن محمد يطب فى اى وقت ويسيب الموضوع ويمسك فى انى ماسمعتش كلامه وممكن يكتشف كدبتى
ردت نجوى بس انا مش مرتاحه للست دى بكره يبان سكتت نجوى شويه وبعدين قالت اقولك ايه اللى خلا محمد يعمل كده ونكون مفتوحين على بعض وماتزعليش منى
ردت سهام نجوى انتى اقرب اليا من اخواتى انا ثقتى فيك اد ثقتى فى نفسى ياريت تصارحينى
شوفى انتى كنتى جوازه صالون مافيش قصه حب بينك وبين محمد
ردت سهام طب ما اناحبيته من قلبى
نجوى جميل اوى حبتى بس مافهمتهوش
سهام : ليه بتقولى كده انا كنت بعمل كل اللى يرضيه وبوافقه على كل حاجه
نجوى : انتى كده قلتى سبب مهم .يعنى لما يسألك رأيك فى حاجه بيكون ردك اللى تشوفه اللى انت عايزه
طب لما توافقيه على كل حاجه فين النصيحه وفين الرأى وتفكيرك المستقل كده كأنه عايش لوحده وقبل مايسألك بيكون عارف الأجابه الرجل بيحب الست اللى بتشغل مخها مش لوك بس
سهام : انا كنت عايزه ارضيه . نجوى : ترضيه اه لكن تلغى شخصيتك لأ . هوضمن حبك واستسلامك
وحطك فى الفريزر وقت مايعوزك يطلعك فين سهام بتاعت زمان اللى كان لها رأى تعتزبه
وبرضوا انك سبتى شغلك دى حاجه مش صح . الشغل بيدى الواحده كيان انسى انتى ومحمد دلوقتى عموما لو الزوج مش حانقول خاين حصل له حاجه الله لايقدر يبقى فى دخل للزوجه مش معتمده عليه
سهمت سهام وقالت لها عندك حق بس ده مش مبرر للخيانه
ردت نجوى خدى بالك من نفسك وكده الموضوع حصل فعلا زى ماحكتى لمحمد يعنى ضميرك مش حايأنبك واحساسك
صادق بس انا رغم كل ده حاسه ان محمد برىء والست دى شكلها مش مريح ممكن تكون هى اللى على علاقه به وعايزه تنهى العلاقه بينكم اصل غريبه اوى واحده تتطوع بحاجه زى دى سامحينى ياسهام انا مش عايزه اسيبك بس
انا اتأخرت حاطلع واتصلى بيا فى اى وقت لو عايزانى معاكى بكره فى مقابله الست قوليلى انا ممكن امد الاجازه بكره كمان.
ردت سها م حااتصل بكى وانصرفت نجوى .لم تمر ساعه على هذا الموقف الا واتصلت حماه سهام
وقالت لها تعالى انتى والبنات واتغدوا عندى وحاتصل بمحمد يطلع عليا بعد شغله عندى اخبار جميله حاولت تعتذر
ولكن حماتها اصرت وقالت علشان تعرفى الأخبار الحلوه يالا لبسى البنات وتعالى.
ذهبت سهام الى بيت حماتها وعقلها شارد اشبه بالتائهه ليست لديها قدره على التفكير ولكنها تشعر ان الله معها وان ازمتها ستنفرج ازاى مش عارفه رغم القلق والحزن لكنها تشعر بيقين انفراج ازمتها رغم الغيوم لديها قناعه عجيبه ان الأمور ستتحسن دائما تردد من يتق الله يجعل له مخرجا
واستقبلهتا حماتها فرحه وحكيت لها ان سهى اخت محمد جالها عريس وعايزه محمد يسأل عليه ولمحت لسهام ان البيت
السعيد اساسه الست وان الست اللى متطلباتها كتير ونكديه بتخسر جوزها وحسيت سهام ان الكلام موجه لها وان محمد
مفهم مامته انها لها طلبات مرهقه قردت سهام شوفى ياماما محمد فى عينى ومش بطلب منه حاجه فوق طاقته فما كان من حماتها الا انت مصمصت شفايفها على طريقه احسان شريف فى فيلم اشاعه حب بنت سلطح ملطح وكتمت سهام غيظها وانتهت الزياره على خير
وفى اليوم التالى نزلت فى التاسعه تماما ووجدت الست موجوده وفى الطريق حكت لها ان محمد بيعرف سيده جميله ومتزوجه من رجل ضعيف الشخصيه وان الست لعبيه حاجه كده زى تحيه كاريوكا فى فيلم شباب امرأه وان الست دى بتفرض نفسهاعلى محمد وهو هيمان فيها وسألتها سهام وانتى ايه صالحك فى كل ده قالت لها احنا ولايا زى بعض وانا عايزه لك الخير . سهمت سهام شويه واتطلعت فى وجه الست وحست انها بتكدب رغم الحجاب اللى بترتديه
الا انها شعرت انها امرأه لعوب فطلبت منها بدل مايروحوا النادى ان تتوجه بها الى منزل حماتها وهى الوحيده القادره
ان تأمر محمد بالبعد عن هذه السيده وفعلا راحوا وبهتت والده محمد من القصه وشعرت بضيق شديد وشعرت بظلم ابنها لسهام وعرفت ان سهام حبيت تثبت لها عمليا عدم تقصيرها حتى لاتستمر فى تلميحاتها
استأذنت والده محمد لعمل الشاى واتصلت بابنها واخبرته بماحدث فطلب منها ان تعطل الست لحد ما يجى وفعلا .
حضر محمد وبهت عندما رأى السيده وسلم عليها اهلا يافتحيه اضطربت جدا وأستأذنت ولكن سهام قالت لها رايحه
فين مش لما نشوف ايه الحكايه هو دخول الحمام زى خروجه ولكنها قالت الاولاد فى الشارع لازم اروحهم ورد محمد
سيبها تمشى بالسلامه
جلس محمد يضرب كف بكف ويقول الحمدلله انها جت لحد كده الست دى عندها اضطراب نفسى وهى زوجه احد العاملين عندى وكنت احاول حل مشاكلها مع زوجهاوكاد ان يطلقها اكثر من مره لما تسببه له من مشاكل وبعدين بقيت تتصل بيا بدون مبرر وتقوللى واحشتنى وانا بحبك فابتعدت عنها وعن زوجها و. وردد لا حول ولا قوه الا بالله ولما رأى الشك فى عيونهم علا صوته وانا مستعد اثبت هذا
ولكنى لا اقبل ان يشكك حد فى اخلاقى وشرفى بطريقه يوسف وهبى وبدأ يتوجه لسهام بالكلام ازاى ياهانم تسمحى لنفسك تمشى مع واحده ماتعرفيش حاجه عنها انا مش منبه عليكى تتصلى بيا وما تصرفيش من دماغك وكمان 100مره هنا قاطعته امه بحزم
جرا ايه يامحمد انا نفسى شكيت احنا مش ملايكه
ربنا يهدى سيركم وانا متبرعه بعمره لكم انتم الاتنين انتم محتاجين تقربوا لربنا بالشكر ربنا اداكم كل حاجه
بيت جميل واولاد زى الفل فكروا فيهم واعقلوا انتم الاتنين واقفلوا الموضوع ده وبصيت لسهام خدى جوزك مالكمش
غير بعض وابعدوا الشيطان ودخل محمد يشطف وجهه وجرت وراه امه
محمد ادينى فرصه اكلم سهام وغمزت له بما يفيد اتلكع شويه
وما ان دخلت لقيت سهام بتعيط بصى ياماما انا مش مقتنعه اخدتها فى صدرها وقالت لها ابنى بيخاف ربنا اطمنى
وفى حاجه باقى عليكى وعايز يثبت لك انه برىء ولو لاقدر الله بيعرف واحده تديها له كده على طول . ممكن واحد
يقولك اه بعرف واحده تانيه واخبطى راسك فى الحيط ويبقى عينى عينك خدى بالك من نفسك ومنه عندكم اولاد فاجهشت
سهام بالبكاء يعنى علشان بناتى يذلنى لأ انا عندى كرامه وعندى اهل واقدر اشتغل مافيش حاجه تلوى دراعى مش حايضحك
عليا بكلمتين انا مش ساذجه للدرجه دى
ردت حماتها انتى بنتى وكرامتك تهمنى انا السنين والايام علمتنى كتير اسمعى كلامى وحافظى على بيتك وماتتكلميش معاه فى الموضوع ده تانى عايزه تشتغلى وماله يبقى عندك دخلك واهتمامتك انا بقول لسهى بنتى اوعى تسيبى شغلك حتى لو حاتجوزى مليونير دى خطوه صح وممكن تشتغلى معاه اهه يبقى تحت عينكى بس اهدى وعدى الازمه دى
وحتى لو مش مصدقه اعملى انك مصدقاه حايتعب ويعمل حسابك وربنا يهديكم ودخل محمد
بصت له امه وقالت سبحان الله انا امبارح شفت عمرو خالد بيقول لما الزوج وزوجته يصلوا جماعه فى الفجر مع بعض ويقروا القرآن سوا ربنا بيوفق بينهم ويزيدهم محبه واخدتها فى حضنها وقالت ابنها بوس مراتك وخدها وحياه مها ونهى متزعلها انت معاك ست الستات ارتاحت سهام لكلام الوالده ومسحت دموعها ومحمد اخد ايدها وودع والدته وقالها محتاجين دعاكى

33 comments:

و القادم....أجمل said...

هييييييييييييييه
أول تعليق
حاجزة مكان
معلش يا ميرو و الله
بس بحب اقرأ اكتر بالليل
بعد مكون ذاكرت
استنووووووني قريبااااااا

صباح الورد يا أميرتي

:)

د. ضياء النجار said...

العزيزة أميرة،

هو انت متأكده ان هذه السيدة تبقى حماة الزوجة؟؟؟؟؟؟؟؟؟؟؟؟؟؟

أصل دا لو حتى كانت مامتها ما كانت تبقى بالعقل والحنية والاحتواء دا.

بس ما خبيش عليك يا أميرة، كان نفسي يبقى في جزء ثالث ورابع للأقصوصة دي، لأن نفسك في الحكي حلو بجد، لكن معرفش ليه قفلتيها بدري قوي كده؟ يمكن كنت خايفة نزهق؟ لأ، مكناش حنزقق، وعلى العموم ممكن تجربي في قصة تانية وشوفي كده حنزهق واللا لأ؟

عميق تحياتي

ضياء

klmat said...

اهلا ياولاء
صباح البنبون والكريم شانتيه
مكانك محفوظ اهم حاجه عندى مذكراتك
البوست موجود مش حايطير
ويارب بالنجاح والتفوق
وميرسى على المتابعه
دعوات من قلبى بكل الخير
سلاااااااااام

klmat said...

عزيزى د / ضياء
حقيقى مش عارفه اقولك ايه
على كلامك الجميل جدا
الحماه هى ام برضوااولا
وانا احيانا
اتخيل نفسى لما اولادى حايتجوزو
حااكون حما .انا كنت بحب حماتى اوى اوى
الله يرحمها ويحسن اليها كل كلامها كان بينقط سكر وكانت طيبه جدا
فنموذج الحما الطيبه موجود
وانا كنت معجبه باسلوب حماتى
بتعامل كل زوجات ابنائها بحب
وامومه صادقه بالأضافه انها ذكيه
كسبتنا كلنا بحسن تصرفها وريحت ابنائها
والحما الذكيه
تدور على سعاده ابنها وفى القصه
سهام شخصيه طيبه وبتحب جوزها
من مصلحه ابنها ان يستمر معاها
انا فعلا اختصرت
فى ناس لما تلاقى البوست طويل
تبعد من الاول الكل مستعجل وانا خفت حد يمل
على فكره ليا قصتين فى البوست القديم بحبهم جدا
واحده اسمها ساكن قصادى والتانيه
كوكى عبده وبرضوا بنفس الطريقه
فيهم شىء من الواقع اللى بنصادفه
فى حياتنا ياااااااااه
ده انا طولت ومش عايزه اكون ممله
تعليقك بيسعدنى جدا جدا
زى مابتقول
عميق تحياتى

د. ضياء النجار said...

عزيزتي أميرة،

لأجل خاطري، جربي، وحتشوفي إن الناس مش حتزهق، بس حرام تحرمينا من نفسك النثري الشهي هذا. وبعدين دا انت ربنا بيحبك جدا إن كان لك حماة بهذا الشكل. ربنا يديم عليك الأيام بسعادة وراحة بال، وحاقرأ القصتين وحاقولك رأيي إن شاء الله.

وافر تحيتي وخالص مودتي

(:

ضياء

klmat said...

عزيزى د/ ضياء
سعيده جدا جدا برأى حضرتك
وانا فعلا بحس ان ربنا بيحبنى
واعطانى اكتر مما استحق وبتمنى
رضاه ويارب ماكنش بتعب حضرت
فى قرأه القصص القديمه
بس هى مش طويله
يارب يسعد وقتك ويخليلك حبايبك
وحااقلدك
عميق تحياتى

د. ضياء النجار said...

عزيزتي اميرة،

لا أحد يحصل فوق ما يستحق، عبارة دينيا مش مضبوطة، لأن القرآن يقول: لا يكلف الله نفسا إلا وسعها، والأفضل ان تقولي: ربنا عجّل لي بما يراني مستحقة له. وهذه من نعم الله علينا فعلا، ولكننا لا ندري عنها شيئا.

وافر تحيتي وخالص مودتي :)

ضياء

doha said...

اميرة
اسمعى كلام دكتور ضياء
وبعدين القصة
الواحد
طلع منها بحاجات كتير جميلة
اولها طاعة الزوج
وعدم التسرع فى الحكم
والتقرب من ربنا
وفعلا
ان بعض الظن اثم
وطريقة سرد ممتازة
يمكن جيت متاخر شوية
ومعلقتش من الاول بس قريت
لانى كنت بمر بدور برد مطلع عينى
القصة جميلة ومشوقة ومفيدة
وتقبلى تحياتى

truelove said...

تعرفي يا اميرة اني متخيلة حماتي حد كده برضه بالرغم من خوفي من اني هعيش قريبة منها بس حاسة ان نفسها معانا هيكون بركة لينا واللهي الحماة هنا في قصتك انسانة عاقلة وذات خبرة كبيرة ربنا يحرصها ويخليها ويجعل كل الحموات اقصد الامهات لانهم في الاساس امهات زيها يارب سلامي ليكي وياريت تنورني

klmat said...

عزيزى د / ضياء
انا شايفه ان ربنا اكرمنى ولكن
احيانا مش قليله امور الدنيا
بتاخدنى فاصلى بسرعه
ومش بالخشوع المطلوب
يعنى اتمنى انى اقرب من ربنا
اكتر لان ده فى وسعى
اتمنى من الله عز وجل ان يغفر
لى وبجعلنى افعل ما امر به
واشكر حضرت جدا جدا
مع دعوات بكل الخير

klmat said...

doha ,
سلامتك من البرد الف سلامه
وانت تيجى فى اى وقت وسعيده
جدا ان القصه عجبتك
وربنا يسهل واقدر اكتب
حاجه تانيه تعجبك
حقيقى بشكرك جدا
لان كلامك اسعدنى جدا
ربنا يخليك ويسعدك
تحياتى وسلامى

klmat said...

true love
ربنا يكرمك وحماتك تكون طيبه
وعارفه مين فينا مش بيغلط
ممكن الواحد يفوت شويه
احيانا بنختلف مع امهاتنا
لكن بنحبهم لو كل واحد
وكل واحده اعتبرت حماتها امها
والحماه اعترتهم ابناء مش
حايكون فى مشاكل بس ده
مايمنعش ان فى حموات بتكون غياره
جدا بطبيعتها مش بتتحمل
تشوف ابنها بيحب مراته
وبتخلق مشاكل وبتنسى انها
كانت فى يوم من الايام زوجه
جيل بيسلم جيل بس للى يعقلها
ربنا يوفقك ويهنيكى يارب
شرفتينى ونورتينى

Mask said...

كلمات .. هيه ام محمد معندهاش بنت اخطبها...
انا نفسي الست دي تبقه حماتي..
بصي انا مع رأي الدكتور ضياء انك تكملي بقيت القصه.. لانها عجباني
ودي ياستي بعض تبس كده تكملي بيها..
تعود بنت ام محمد من البعثه
وتتعرف عن طريق النت على صاحب مدونه دمعاتي ويطلب ايدها فترفض ام محمد الى ان تتوسط كلمات كاتبة القصه لدى ام محمد ويتم الفرح وتوته توته فرغت الحدوته.. ومتسنيش تضيفي شويه اكشن على فيروسات مع مارشات عسكريه في الاول وقران في الاخر وبكده تبقه القصه كامله من مجاميعه :)
هاجري انا بقه قبل ما حد من المعلقين يبتدي يحدفني بالكومنتات

klmat said...

mask
لأ معلش يعنى حضرتك جاى تتقدم بعد
مالبنت جالها عريس ومحمد اداله كلمه
بس ام محمد نفسها موجوده نروح بعيد ليه
بس طبعا انا مارضاش من غلبه اخد قد امه
والدمعات تنزل وانا اعيط
شوف القصه كده كفايه عليها
نشوف موضوع تانى ونعمل فيه شويه
تحابيش وعروسه جميله بس قولى المواصفات
اللى عايزاهاعلشان نفصل المواضيع
وشويه عفش والتربتت تى
ودقى يامزيكا
ربنا يسعدك وتاخد واحده جميله
شكلا وقلبا تعليقك خلانى
اضحك من قلبى وتقول دمعاتى
قول ضحكاتى
اشكرك جدا جدا على جمال تعليقك
تحياتى وسلامى

mohand said...

السلام عليكم

:D:D:D:D

وانا كده ارتحت

القصة حلوه وواقعية الي حد كبير

بتحاولي توصليلنا بيها احنا معشر الرجال يعني

اولا ان الست عندها رادار فعلا بتحس بجوزها

وانها بتعمل كل اللي تقدر عليه عشان ترضية

وكمان بتوصلي للست لنهل متقعدش في البيت لانها اكيد هتحتاج الشغل في يوم

يعني القصة لها هدف ودا اهم شئ

ورغم اختلافي في الهدف الاخير

بس فعلا تحياتي لك علي مجهودك الرائع وابداعك

klmat said...

mohand
اهلا بك وسعيده بتعليقك واالست
بيبقى عندها رادر دى حقيقه
وبيختلف مداه من ست للتانيه
موضوع الشغل ده انا شفت ستات
من اسر كريمه عانوا كتير بعد الطلاق وفاه الزوج لان المعاش مش بيكفى وكمان
اللى بتشتغل وقتها بيكون مشغول
بحاجه مفيده بتدر لهادخل
وبتنظم حياتها ومش قاعده
لزوجها على الواحده ولكل ظروفه
المهم ان تكون بيتها واولادها
فى المرتبه الاولى وقد تكون
الرؤيا عندك مختلفه المهم ان كل
منا يعمل لما يقتنع به ويسعد اسرته
ربنا يكرمك ويوفقك ويسعدك
تحياتى وسلامى

rack-yourminds said...
This comment has been removed by the author.
rack-yourminds said...

ازيك يا كلمات

بجد قصه جميله وهادفه

وعجبتني شخصية الحماة ورقتها مع زوجة ابنها وتفهمها لغيرتها ومحاولتها التوفيق بينها وبين ابنها .. يا ريت كل الحماوات زي كده

كمان انتي طرحتي في هذه القصة مسألة مهمه ا لا وهي ان تشارك المراة زوجها وتناقشه وتبدي ارائها ومواقفها مع ما يثيره الزوج من موضوعات وده بجد شئ جميل عشان الزوج يحس ان زوجته بتتفاعل معاه في كل ما يتعرض له من مواقف

كمان تطرقتي الي عمل المراة ..وانا شايف طالما ان عمل المراة مش هيخليها تهمل في رعاية ابنائها ومش هتقصر في حق زوجها يبقي مفيش ضرر انها تعمل


مره اخري بجد قصه جميله

تسلم ايدك

ra7eel said...

عزيزتى اميره

بجد جميل جدا
كل معنى ورا السطور
يعنى كلام نجوى لسهام عن الزوجه جميل
وكلام الحماه جميل
بجد كانت قصة لذيذه
خالص تحياتى وحبى

klmat said...

rack yourminds
ازيك يارب تكون فى احسن حال
انا الحمد لله بخير
مبسوطه جدا ان القصه عجبتك
واشكرك جدا جدا
ربنا يةفقك يااااااارب
تحياتى وسلامى

klmat said...

ra7eel
انتى اللى كلامك جميل ولخصتى الاهداف
ربنا يكتب لك كل اللى فيه الخير
سعيده جدا جدا بتعليقك
تحياتى وسلامى

shahy said...

هاتكملي امتى
انا عاوزة اسمع الباقي ماليش دعوة ومش هاقول رأيي غير في الاخر
ماتتأخريش علينا يا اميرة هانم

تحياتي

no chance said...

السلام عليكم طبعا احييكى على التكملة الحلوة اوى دى و انا مش هنقدها انا بس هقولك سيناريو من رايى انه كان ممكن يكون افضل اوك؟بعد اذنك
لو كانت سهام سمعت كلام صاحبتها نجوى
وكانت تعبت محمد شوية وعملت مشاكل مع اممه كمان وفى الاخر بقى تبقى تعرف الحقيقة ويتصالحو بدل مانتى نهيتى الاحداث بشكل سريع اوى كدة

دكتور كسلان said...

اولا الف مبروك ع النيو لوك

ثانيا بالنسبة للبوست

تحفة ورائع كالعادة

جميلة اوى المعانى اللى وصلتلى م القصة الجميلة دى

احنا مش لازم نمشى ورا احساسسنا دايما

ولازم نتانى ونفكر بعقلنا

عشان ما نهدمش حياتنا

ولازم نسمع للاكبر مننا والاكتر خبرة

حتى لو كان احساسنا صادق

لازم نحكم عقلنا مش عواطفنا

واللى عجبنى اكتر

اسلوبك الجميل فى سرد القصة

زى ما اكون شايف المشاهد اللى حصلت

ربنا يكرمك واعرف استفيد من خبرتك اكتر واكتر

سلااااااااااااااااااااااااااااااااااااااااااااام

ماسة الحب said...

بصي يااميرة اولا انتي خافتي توقعاتي تماما انا حسبتك هتزودي شويه شطه وفلفل للقصه وبعدين فين الحماة اللقطة دي دول يابنتي انقرضوا
بس اسوبك جميل وياريت تسمعي كلام كل الناس وتكملي كتابه
منتظرينك
مني

Sherif said...

ودعائى لهما أنا أيضا

حلوة حلوة

كمان

klmat said...

عزيزتى شاهى
يارب تكونى بخير .ادينى كملت
عايزه اعرف رأيك لأنه يهمنى
ميرسى جدا وفى انتظارك
تحياتى وسلامى

klmat said...

no chance
انا بحاول اختصر منعا للملل
دلوقتى الكل بيقول هات من الآخر
بس ماشى اقرأ الجزء الثالث
واقولى رأيك وملحوظتك هامه
تحياتى وسلامى

klmat said...

اخى د/ كسلان
سعيده بتعليقك بس احيانا
الاحساس بيكون صادق فعلا هو
احساس مبنى على تصرفات الطرف التانى
عموما شوف الباقى ويارب يعجبك
وانت دايما بتكرمنى بتعليقك
كتر الف خيرك
وربنا يخليك
وسلام كبيييييييييييير

klmat said...

ماسه الحب
اهلا بكى . عارفه انا ممكن
اطول بس خايفه على وقتكم
الحما فى الاساس ام وفى امهات
جميله وامهات متعبه
تابعى معايا
وفى انتظار رأيك
ربنا يكرمك ويحفظك
سلااااامى

klmat said...

sherif
اهلا بك
سعيده اوى انها عجبتك
اشكرك جدا جدا
سلاااااامى

و القادم....أجمل said...

هيييييييييييه
أنا جيييييييييت
أول رد
و أحر رد
طبعا السكر في الاخر
:D
ههههههههههههه
،،،،،،،،،،،،،،،،،،،
وحشاني جدا يا ميرو و الله
و مبروك النيولوك الجامد دااااا
;)
،،،،،،،،،،،،،،،،،،،

نيجي للقصة
كل معمل نفسي ذكية و اختمها
الاقيها راحت لسبب تاني اشد اقناع
بجد يا أميرة اسلوبك رائع
و محتوي الموضوع نفسه
من نصايح
فعلا معظم الستات بتحتاجها
زي حكاية رأيك دي
مينفعش فعلا كل حاجة اللي انتي شايفة
اللي انتي تحبه
لازم تقول رايها
مش مجرد اثبات ذات لا
عشان متتهزش بمرور الايام
؛؛؛؛؛؛؛؛؛؛؛؛؛؛؛؛؛؛؛؛؛؛؛

روعه يا أميرتي و الله
ربنا يسعدك و يحفظك يارب
تحياتي و حبي و كل حاجة حلوة ليكي

:)
:)
:)

klmat said...

القادم اجمل
اهلا اهلا ياولاء البدايه سكر
واخر تعليق مسك الختام
منورانى وكلامك جميل زيك
ربنا يخليكى على كلامك الحلو
وانا معاكى اوى الراجل بيحب
الست اللى لها رأى
عموما كلنا بنحب اللى
يقول وجهه نظره ممكن
يقول فكره جديده
تكون فيها فايده
ميرسى على كلامك السكر
حقيقى منوره
ربنا يوفقك ويحقق كل امانيك
يارب
تحياااااااتى