Thursday, November 8, 2007

اروح لمين



انا من هواه سماع الأغانى القديمه والجديده بس اللى كلامها له معنى وبصوت جميل ولحن زيه
والمطربين اللى بحبهم كوكتيل من القديم على جديد عربى على غربى مايمنعش وبسمع كل واحد على حسب
انا حااعمل ايه يعنى مثلا لو فى وقت ناويه فيه ارتاح واهدى اعصابى اسمع فيروز لكن لوعايزه اتحرك بسرعه مثلا تنظيف او ترتيب
فى البيت اسمع عدويه زحمه يادنيا زحمه وحبه فوق وحبه تحت الاقينى بتحرك بحيويه ونشاط وبسرعه
كل وقت وله اغانى
لكن تصوروا ان فى اغانى بترجعنى للماضى وتخلينى اعيش الماضى وممكن اعيط او اطير من السعاده وكأن اللى حصل من عشرين سنه حصل تانى حتى انى ممكن افتكر الموقف وكنت لابسه ايه ومين كان معايا
افتكر مره اتصلت بواحده صحبتى لقيت صوتها محشرج وعايزه تعيط اتخضيت عليها اوى وسألتها انتى تعبانه
قالت لأ قهرانه وطلبت منى اخرج معاها وفعلا اتمشينا شويه وعرفت منها انها على خلاف كبير مع جوزها
ونفسها تنفصل عنه وانه بيخونها لكنها ليس لها مورد رزق لانها تركت عملها بناء على رغبته
للتفرغ له وللاولاد ووافقت لأنه كان وقتها كويس معاها لكن ظهرت امرأه اخرى البت كيانه على حد تعبيرها
علما بان صديقتى تهتم بمظهرهاوباولادها ومثقفه واهله بيحبوها جدا ومتضامنين معاها كما انها تقيه جدا
ولكنه تعرف على اخرى وبيحاول يضايقها حتى تطلب هى الطلاق علشان ماتاخدوش حاجه
وحاولت تدور على شغل لكن طبعا صعب وبيت والدها تزوج فيه اخيها بعد وفاه والدتها ومش عارفه تعمل ايه
تعبنا من المشى وقلنا نقعد فى ديليس المهم ركبنا تاكسى وكانت ام كلثوم تشدو اروح لمين واذا بصديقتى تجهش باالبكاء وانا اللى المفروض اقويها اعيط معاها بحرقه
اغنيه عملت فينا كل ده كلام له معنى المهم موضوع صحبتى انتهى على خير لكن لحد دلوقتى لما اسمع الاغنيه دى افتكر الموقف وافتكر دموع صحبتى واشم ريحه بارفانها وكأن الموضوع حصل النهارده والاقى دموعى على خدى
وانا فى الكليه واحلام البنات وفارس الأحلام كانت اغنيه يادبله الخطوبه عقبالنا كلنا كأنها بترجم مشاعرى بكلام جميل وصوت رائع
ولحن مميز لحد دلوقتى لما اسمعها بفرح وبحس انها بتعبر عن مشاعر كل الشباب
فى اغنيه مش عارفه لمين كنت وانا فى ثانوى المدرسه تبعد عن البيت حوالى محطه كنت امشيها انا واتنين من صحباتى كان فى قهوه فى نص الطريق والراديو مفتوح على اخره الساعه سبعه ونص كان فى اغانى معينه تتغنى الصبح كلها رائعه تخلينى اشعر بانتعاش وسعاده اول اغنيه على مدارسكو المولى حارسكو بنين وبنات مش فاكره بقيتها بس كان كلام بيحمس على الأجتهاد وحب بلدنا واغنيه تانيه ياصباح الخير ياللى معانا ورائعه شاديه الشمس بانت من بعيد جايه ومعاها يوم جديد يجعل نهارنا نهار سعيد
لى صديقه ربنا يخليها ليا كانت اغنيه شاديه دى تخليها قمه فى السعاده. فى فتره كنت فيها خارج مصر وانا بحب اغانى محمد قنديل جدا
وبحكم انى اسكندرانيه كنت لما اسمع بين شطين وميا عشقتكم عنايا يا يا غاليين عليا ياهل اسكندريه كنت اتأثر جدا واشعر قد ايه اسكندريه ومصر كلها وحشتنى
وفى اغانى تانيه كتيره بس مش عايزه اطول
لما اسمعها ترجعنى لذكريات قديمه وكأن الأغانى بتكتب احداث عشتها

42 comments:

رحــــيـل said...

فعلا كل موقف بتحفر جوانا بيتحفر بكل جوانبه وكل تفاصيله
وخصوصا لما تكون الاغنيه مناسبه للموقف نفسه
دايما بعد كده لما نسمعها نفتكر الموقف ده على طول
المشكله بقى لما تكون ذكرى مش حلوه
الاغنيه بتفضل مصدر قلق وازعاج لينا كل ماتتسمع
وفى فعلا كلمات والحان بتثير جوانا مشاعرجميله جدا وحاله من السعاده مع ان مش لازم يكون ليها ذكرى جوانا
تحياتى لكى

klmat said...

ra7eel
عزيزتى ساره
كلامك مظبوط فى اغانى بتفكرنا بذكرياتنا
وفى اغنى بنحبها ونحسها لجمالها
زيارتك اسعدتنى جدا
تحياتى وامنياتى بالتوفيق

Dr. Diaa Elnaggar said...

العزيزة كلمات،

متفق معك في موضوع الأغاني، لكن حاجة أساسية عايز أعرفها، صاحبتك ازاي موضوعها انتهى على خير؟.

عميق تحياتي وشاكر ليكي زيارتك لمتأملتي المتواضعة.

عميق تحياتي

ضياء

rack-yourminds said...

بجد بحييكي علي موضوعك الجميل والخفيف واللي فيه كمان بعض الفقرات بتضحك مع ان موضوع صحبتك يحزن شويه بس الحمد لله انتهي علي خير

--------

انا بقي بعشق عبد الحليم حافظ وبحب جدا ام كلثوم وده ميمنعش اني بسمع اغاني حديثه بس طبعا لازم تكون كلماتها كويسه واللحن يكون كويس والصوت كمان يكون كويس

اما المطرب اللي بيخليني ابكي فطبعا المطرب المفضل لي وهو العندليب ,..عبد الحليم وهو بيغني بيبقي حاسس بكل كلمات ومعاني الاغنيه وده بتلاحظيه في عيونه في حركاته عشان كده انا بحب جدا اسمع عبد الحليم وهو بيغني علي المسرح

---

تحياتي وسلامي ليكي

مدحت محمد said...

كلمات ضحكتينى
لما قلتى
لما بحب ارتاح بسمع فيروز ولما احب
اشتغل بحيوية
بسمع عدوية
حسستينى بوفائك لما حزنتى لحزن صاحبتك
ربنا يديمها عليكم صداقة
حل مشكلة زميلتك
دعوة نفقة
وتطلب الطلاق عادى
مش صعبة يعنى حلها
مادام هى عندها عيال
مش عارف يااخواتى الرجالة اتجننو ولا ايه
واحد يخون وواحد
يدمن
وواحد
يهرب
مش يحمدو ربنا
ربنا يهدى
تحياتى ليكى ياكلمات

سلوى said...

كلمات
أحييك على كلماتك
ومشاعرك الجميله

على فكرة الأغاني بتاعه الصبح دي
اللي إنت ذكرتيها
بترجعني برضه لفترة المدرسه والصحيان بدري وكده
ربنا يوفقك
تحياااااتي

klmat said...

د /ضياء
سعيده جدا بزيارتك مدونتى ده شرف ليا
اما عن مدونتك فهى جميله ومش متواضعه
بل رائعه ومفيده
اما عن حل مشكله صديقتى محتاج بوست
هى وصديقاتى كلنا
بنحترم خصوصيات بعض
واكيد كلنا عندنا مشاكل بس بنسب
متفاوته زى اى بيت
وطبيعه صديقتى تقيله جدا بس
انا اتصلت فى وقت كانت فى فى غايه الحزن والضعف .المهم انه تركها فى شقتها لمده
3 سنوات او اكتر وكان بتوصل اولاده
لحد بيت مامته ولما كنت اسألها
تقول الحمدلله وكان بيرسل لها مصروف
هى قالتلى كده
وعمرها ماذمت فيه
كل همها انها تشتغل
والحمدلله بعد شهور قليله
رجعت شغلها
لأن علاقاتها فى العمل
كانت كويسه وهى كفاءه
وده كان مضدر سعاده لها وثقه بنفسها وهو لم يتزوج
بعد كده غابت عنى شويه اتصلت بها
رد عليا هو وكأن لم يكن
ولما سألتها قالت لى كانت غلطه
وانه علمهادرس ان الشغل لاغنى عنه
ابدا مع انهاكانت ترى العكس
هى فكرت فى مصلحه اولادها
كما انها بطبعتها متسامحه
وحاليا مش بفتح السيره
دى خالص لما اسأل عنه
بتقوللى تمام الحمدلله
من يتق الله يجعل له مخرجا
سعدت انك متفق معايا
فى موضوع الأغانى
تمنباتى لك بكل الخير
سلامى

klmat said...

rack yourminds
ازيك يا واحد منور مدونتى
احب انك تضحك .انا مش بحب اكتب مواضيع
حزينه بس هى جت كده والحمد لله اتحلت

اما عن عبد الحليم فكلنا مجتمعين عليه
ده مدرسه الحب صوت واداء ومشاعر
انا بحب كل القديم مش القديم بس والقديم اوى انا بحب جدا عبد المطلب وعبد الوهاب
وفى نفس الوقت بحب كاظم الساهر
ومنير ولطفى بشناق وماجده الرومى

وبحب عدويه جدا بيساعدنى على الحركه السريعه وله طعم خاص
نورتنى وشرفتنى

klmat said...

doha
مبسوطه جدا انى خليتك ضحكتى
اما عن الرجاله فمن ده وده
زى الستات بس فى مرحله فى العمر
بيخرفوا شويه
بس مش كلهم مش عايزين حد
يزعل اما عن صحبتى
فهى تميل للحلول الوديه
علشان نفسيه اولادها
ولأن اهله كانوا فى صفها
وهم له فى قلبها مكان وعشره
اتحلت الحمد لله
سعدت جدا بمرورك
تحياتى وسلامى

klmat said...

rack-youminds
واحد
نسيت اقولك انى بسمع اغانى الشباب
يعنى اغانى نانسى
لطيفه وبسمع عمرو دياب
وشيرين وحماقى
ومن الاجانب سيلين ديون
تحياتى لك

klmat said...

salwa
اهلا بك منورانى
عارفه اغانى الصباح دى جميله
وبتخلنى اشعر بنشوى
بتمنى تطلع اغانى جديده بالمستوى ده
تحياتى وسلامى

احساس لسه حى said...

عزيزتى
طبعا الاغنيه ممكن نفكرنا بانسان غالى او مكان بنحبه او ذكرى جميله
بس طبعا لكل حاله اغنيه زى ما قولتى بس فى اغانى ممكن نسمعها فى اى وقت الفرح والحزن هى جميله بكلامها ولحنها وصوت مطربها متكامله
طبعا موضوع صحبتك ده بيحصل لكتير من الستات وفى اللى بترضا بالامر الواقع وفيه اللى مش بترضا بس اكيد هى تتحمل شويه من المسئوليه هتقولى هى كويسه وزى الفل انا عارف انه صح
المسئوليه جايه من الاختيار واوعى تقولى انه مكنش باين عليه اكيد كان فى عيوب كتير وضحه ليها بس علشان حب نحيته او شيفاه عريس كويس رضيت تخدعه بالعيب ده اللى كبر مع الوقت
وانتى مقولتيش حصل ايه كمليت معاه ولا سبيتوا ولا ربنا هداه
نحب بطمن بس
تحياتى يا جميل
سلام

klmat said...

احساس لسه حى
انا معاك تماما فى اغانى لهادكرى وفى اغانى
جميله لذاتهاالكلمات والصوت واللحن
وفى اغانى بترتبط بموقف
بالنسبه لصحبتى انا معاك هو فيه
عيوب وهى بتداريها وقبلت بها
واهله كمان عارفيين علشان كده وقفوا معاها اناما حكتش القصه لأنى كنت معنيه
بوقع الأغنيه فى الظرف ده
اما عن صحبتى حاولت محاولات مضنيه لرجوعها للعمل وحصل
وزوجها رجع لها بعد فتره
طويله ولم يتزوج
الأخرى
ورغم علاقتنا القويه
لم تحكى لى تفاصيل
وانااحترمت خصوصياتها
لكن الموضوع ده اثر فيها
بالأيجاب من ناحيه شغلها
هى حاليا فى مركز مرموق الموضوع
ده من سنين مش قليله
تحياتى وسلامى

loumi said...

العزيزة أميره
فعلاً وجداننا كله تشكل بفعل كلمات وألحان قديمه وحديثه
فلكل كلمه أثر ولكل لحن ذكرى

أنا أوقات كثيره أصحى وفي أغنيه معينه معلقه في ذهني وأفضل أرددها طول اليوم لحد ما أزهق
وطبعاً تتداعى الذكريات

تحياتي لك

klmat said...

loumiعزيزتى
سعدت بتعليقك وانا معاكى
ان وجدانابيتأثر بالكلام
الحلو واللحن الجميل
سواء جديد او قديم
وانا كمان احيانافى اغانى الاقيها
معلقه معايا
وبتردد على مسامعى
تحياتى وسلامى

Anonymous said...

يمكن موضوع الاغانى المرتبطه بموقف معين بنفتكره كتير ومش حتصدقى لو قلت ليكى انها كانت وسيله الغش بتاعى فى الامتحنات انا كنت من النوع الى لما يذاكر لازم اشغل الكاسيت جنبى واكتب على راس لموضوع اسم الاغنيه الى بسمعها ولو عجبتنى حته على جنب الكتاب واكتبها لو دخلت الامتحان ولقيت الموضوع الى ذكرته على انغام الاغنيه بفتكر الاغنيه بسترجع صوت المطرب او المطربه وابتدى احل
فى اغانى بترتبط معايه بره موضوع المذكره باحداث سعيده او حزينه بس اكتر اغنيه كنت بحبها يا نور عينى بتاعت تامر حسنى لانها كانت دائيما بتفكرنى باول رقصه مع خيبتى يوم فرح اخوها وكان كل الناس بتبص لينا انا وهى بس بعد الانفصال كرهت تامر حسنى والاغنيه وخطيبتى طبعا

klmat said...

رئيس جمهوريه نفسى
اهلا بك طبعا اصدقك
انا الحاجه اللى كانت محتاجه
حفظ كنت بلحنها
بس زعلت انك
كرهت الاغنيه وخطبتك
اكيد لك اسبابك
بس لن شاء الله تحب
اغنيه جديده وترقص
على انغامها
مع شريكه عمرك
ويكون بينكم موده ورحمه
مدونتك جميله وكلام فى السياسه
هايله
تحياتى لك

ماسة الحب said...

كلمات
انا اولا مبسوطة من زيارتك لمدونتي
وزاد من انبساطي انك اسكندرانية وانا بعشق اسكندرية واهلها
انتي تعبيراتك سهله وبسيطه ومعبره جدا
عارفه كمان انا دايما بتعلق معايا اغاني كده وكلها بعد كده بيبقي ليها مواقف معايا زي اغاني فيروز ومحمد عبده ليها معايا مواقف جميله
كمان اغاني خالد سليم وام كلثوم
وسميره سعيد بحسها اوي وبحس انها بتغنيلي انا
وكمان اصاله ومحمد محي انا بطبعي بحب الاغاني النكد وتلاقيني عشت معاها عشان كده تلاقيني من عشاق اغاني مصطفي كامل
اتمني اننا نتعرف علي بعض ويكون لي الشرف اني اكسب صديقه جديده

أبوسويلم said...

يا سلام كده لما تسمعى لما بدا يتسنى بصوت فيروز
ولا سكن الليل
فعلا متفق معك تماما ان كل اغنية ولها وقتها
لكن الاغانى دلوقتى صعب نقول انها زى اغانى زمان
لان الكلمات اصبحت اكثر ركاكة والموسيق ما عادش فيها طرب
صحيح
على فكرة عدوية من اجمل الاصوات التى تغنت بالعربية رغم ان له اغانى كثيرة مالهاش اى معنى
ورغم انى مش اسكندرانى للاسف الا ان باتذكر الاسكندرية دايما لما اسمع شط اسكندرية لفيروز واسكندرية الصبية لحنان ماضى
فعلا فيه اغانى بترتبط باحداث او اشخاص معينين
ما هى الدنيا ايه غير شوية كلمات وحبة مواقف
تحياتى يا فندم
والسلام

klmat said...

ماسه الحب
انا مبسوطه لأنبساطك
ومبسوطه اكتر انك زورتينى
ويسعدنى جدا نكون اصدقاء
مدونتك حقيقى جميله
واسلوبك رائع
اماعن الأغانى النكد
فهى بتبقى دايما كلامها حلو
ومؤثر
تمنياتى لك ى بكل الخير
سلام

klmat said...

حقى اهرتل
Many thanks for your comment
With all good wishes

klmat said...

ابو سويلم
يا الف مرحب
انا معاك فى كل ماكتبت
اغانى زمان كلها كلمات جميله
ومعانيها عميقه وتدخل القلب
وكان الستثناء انك تلاقى
اغنيه ركيكه دلوقتى العكس
يعنى هى حاتيجى على الأغانى
وانا معاك عدويه صوت جميل ومميز
واغانيه دمها خفيف
سعدت بتعليقك جدا
تحياتى وسلامى

Unknown said...

سبحان الله أهو الى انتى بتحكيه ده بيحصلى بس مع مطرب واحد بس دون غيره مع انى بحب مطربين كتير تانية هو عبد الحليم و ده ماحدش من صحابى قادر يفهمه او يعذرنى فيه الفرق بأه أنه بيظهرلى مش فى المواقف الى بتستدعى الذكريات بس و لكن فى مواقف حاضرة و بتكون الاغنية كلماتها و لحنها معبرين عن الموقف زى ما حصل فى موقف صاحبتك الى تعبانة مع زوجها زى ما يكون حد حاسس بيا و محاوطنى الحكاية دى بتحصلى من صغرى

الموضوع ده غريب بصراحة و انا مش لقيلاه تفسير تفتكرى ده أيه ؟

klmat said...

عاليا حليم
عزيزتى عاليا العندليبيه .مين فين
مش بيحب عبد الحليم ده هو مدرسه الحب
ودايما المواقف اللى بتحصل تنطبق على اغانيه لأنه غنى لكل المواقف
اول مره تحب ياقلبى كل اللى بيجب اول مره يحس بها
اللى حبيبه معذبه يبقى قسوه حبايبى مغلبانى
اللى ناجح حاتلاقيه
قولى اى موقف حتلاقى عبد الحليم
هو الراحل الخالد الله يرحمه
سعدت جدا بتعليقك
تحياتى وسلامى

اسامة يس said...

صدقت ... للكلمات ذاكرة .. وللروح ذاكرة .. وللموسيقى ذاكرة... ونحن ذاكرة...هناك اغاني بالفعل تربطك بحدث معين فاذا سمعتها تداعى الحد امام ناظريك وكانك تعيشه للتو ... وتنتابك الحالة التي كنت عليها ولو في الشعور ...

بوست جميل ودافئ ويبدو اني كلما سأستمع الى اغنيه لها موقف ساتذكر البوست ..
دمت بكل ود..
خالص تحياتي

mohand said...

السلام عليكم
نفس اللي بيحصل معايا بالظبط


والله الاغاني دي بتمثل ذكريات كتير


المشكلة بقي
اني فاكر اني علقت اول واحد
بس مش فاهم ايه اللي حصل

klmat said...

osama
اهلا بك سعدت جدا بتعليقك وبكلماتك
الرقيقه اشكرك جدا
وسعيده اكتر ان البوست بتاعى
حايرتبط بالأغانى اللى
لهاذكرى عندك
مدونتك جميله
شرفتنى ونورتنى

klmat said...

mohand
عليكم السلام ورحمه الله وبركاته
اعتبر نفسك اول تعليق
اغلبنا بيحصل معاه كده
وده بيبين اد ايه الأغانى
لها تأُثير
نورت مدونتلى
تحياتى لك

Anonymous said...

جميل الحنين للماضى لأنه جزء من وجودنا

وكل الأغانى اللى حكيتيها فعلا كان بتستولى على كل مشاعرنا وبالذات على مدارسكو المولى حارسكو واقولك كمان ياصباح الخير ياللى معانا الكروان غنى وصحانا

الغريب اننا كانت حياتنا ابسط ويمكن دلوقت عندنا حاجات ماكانش عندنا ربعها .. بس كنا أسعد

قصة صاحبتك بتكرر لأن الازواج لايشعرون بالمسئولية .. واللى بيتغير بسهولة هايملّ تانى بعد مايوصل للى هو عايزه .. هانفضل كده على طول؟

لكن الاولاد .. لازم نصبر شوية يمكن الامور تنصلح .. وندعى بالهداية

عارف أنه كلام عادى وسهل نقوله .. بس مطلوب

دعائى لها بالخير

klmat said...

sherif
اهلابك انا معاك فى كل كلمه كتبتها
وسعيده جدا ان اغنيه على مدارسكو
لها صدى عندك انا من ايام المدرسه
ماسمعتهاش وكنت بحس بها اوى
شوف لما تسمع حد بيدعيلك فى اغنيه
ذكريات جميله ورأيك فى قصه صحبتى مظبوط
لانى عرفت بعد كده بس مش منهامن حد
معاه فى الشغل انه مش بيحب يتحمل مسئوليه وهى بتدارى
واولادها متفوقين جدا والحمدلله
وهى بتعرف تلملم الجراح
المهم انى
سعيده جدا بتعليقك
ومرورك عندى
تحياتى وياصباح الخير

محمود على said...


انا لحد دلوقتي بفتكر البحر باغاني عمرو ومنير
وام كلثوم بتفكرني وانا بذاكر بليل
الموضوع ده جامد كده
انا مش عايز اقولك اني بشم رائحة البحر
لما بسمع اغنية معينة لعمرو سمعتها اول مرة هناك

klmat said...

محمود على
اهلا بك
الأغانى الحلوه بتأثر فينا
وبتأُثر اكتر لما بترتبط بموقف معين
ساعتها بتفتكر المكان وكل ملابسات
الموقف زى الموسيقى التصويريه فى الافلام
وده بيزيد اكتر مع الناس العاطفيين
وسعيده ان الموضوع عجبك
سلامى

دكتور كسلان said...

ازيك يا اخت اميرة

الموضوع جميل جدا

فعلا فيه اغانى كتير جدا مرتبطة معايا بذكرى معينة

او بتفكرنى بفترة زمنية معينة

انا لحد دلوقتى لما اسمع البوم الحب الحقيقى لمحمد فؤاد

افتكر ايام ما كنت فى ثانوى

وافتكر كل ذكرياتى الحلوة

دا غير اغانى عبد الحليم

اللى الواحد مينفعش يحب الا لما يسمعها

بس اكتر اغنية بحبها له هى موعود
خصوصا اول كوبليه

انا بحلب اغنية محمد قنديل بين شطين وميه

لانى بعشق اسكندرية

بس الصراحة لما بسمعها

بتفكرنى بفيلم الطريق الى ايلات

على اساس انها كلمة السر لبدء العملية
هههههههههههههههه

سلااااااااااااااام

klmat said...

العزيز د/كسلان
الحمد لله انا بخير
يارب انت تكون فى اتم صحه وعافيه
انا بحب اغانى كتير اوىىىىىىىىى
عايزه كشكول
واغنيه محمد فؤاد الحب الحقيقى رائغه
ومعانيها جميله انا كمان بحبها
وبحب شاديه فى اغنيه بنفس الأصم
عبد الحليم كلنا بنحبه وتعلمنا الحب على ايديه وكل اغانيه رائعه
وعلشان الاغانى مرتبطه بالمشاعر
بتأثر فى وجدانا
اماعن قنديل فكل اغانيه جميله
جميل واسمر وياحلو صبح ياحلوطل
ياحلو صبح نهارنا فل
نهارك فل بأذن الله
تحياتى وسلامى

shahy said...

اميرة هانم

كلامك صحيح طبعا كل اغنية مرتبطة بموقف الواحد بيفتكرة على طول اول لما يسمع الاغنية

فكرتيني بنفسي في اول زواجي سافرت مع ابو الدراويش خارج مصر لمدة اربعة اشهر تقريبا وبالرغم من ان المدة مش طويلة الا اني سمعت اغنية صباح بتاعة سلمولي على مصر سلمولي
وقعدت اعيط اعيط اعيط وكأني غايبة عن مصر سنين

تحياتي

و القادم....أجمل said...

صح و الله يا أميرة
الاغاني و الكلمات و ارتباطها بالذكريات
جميلة اووووي
لكن لما تبأه ذكري حزينة
او قاسية
بتجرح اوووووووووي

تحياتي و حبي يا أميرتي

(ممكن طلب صغنون حاولي تخلي نوعية
الكومينات مش انها تظهر في صفحه لوحدها
متهيألي بتكون تقيلة في التصفح
خليها زي عندي كده تتفتح صفحة جديدة
فاهمه وجهة نظري يا جميل ؟؟)

truelove said...

كده اغيب اجي القيكي منزلة بوست م غير ما تديني خبر ماشي انا همشي دلوقتيوبكرة هي اقراه على مزاج بس برضه متشابهين في حبنا للست هي ايه الحكاية يا خوفي لكون بكلم نفسي

Unknown said...

كلمات
بوست زي العسل
من اول الكلام
وانا حاسة اني بقرا كلام من واحدة اسكندراينة شميت ريحة اسكندرية في مدونتك من قبل ما اعرف لما عرفت بقي بقيت مش مصدقة قولت معقول عرفت لوحدي كدا
وفعلا ياصباح الخير يالي معانا ويجعل نهارنا نهار سعيد
كنت بسمعهم وانا رايحة المدرسة
لدرجةا ني لما بسمعهم بفتكر الايام دي وبخاف احسن تاني يوم يبقي المدرسة بجد
ومسخرة الحتة بتاعت زحمة يادنيا زحمة
هههههههههههه
طبعا بلدياتي فا لازم تبقي عسل يعني
مش معقول مفيش حد من اليكس مش عسل
شكرا لزيارة حضرتك مدونتي التانة المتواضعة واتمني زيارتك دايما
سلام
مني

klmat said...

عزيزتى شاهى
ازيك يارب تكونى فى احسن حال
الاغانى اللى مرتبطه بمصر بتأثر
فينا اوى واحنا مسافرين
عندك حق
سعدت بتعليقك
كل الامنيات الحلوه لم ولأبو
الدارويش والاولاد
تحياتى

klmat said...

ولاء
ازيك عامله ايه
انا معاكى الأغنيات
لماتكون مرتبطه بذكرى مش ولابد
بتكون مؤلمه بس زى ماتكون بتأرخ
للأحداث
اما بالنسبه لطلبك الصغنون
علم وتم التنفيذ عندك حق
كده افضل
نورتينى يالولى
سلااااااااااام كبير

klmat said...

my hope$
اهلا بك يامنى
عارفه انتى اللى دمك خفيف وزى السكر
واللهى ضحكت من قلبى وانتى
بتقوللى على اغنيه عدويه مسخره
كامه مسخره دى ضحكتنى اوى
اسكندرانيه بقى يامونى
مدوناتك جميله واسلوبك جميل
واحنا الأتنين
متأثرين باغانى الصباح الجميله
بهديكى اغنيه محمد قنديل
ياحلو صبح يا حلو طل
ياحلو صبح نهارنا فل
نهارنا فلل بأذن الله

klmat said...

truelove
اهلا بك اعملك ايه
حضرتك اللى جايه متأخر
لكن ملحوقه
حاستناكى تنورنى
معلش الترتيب فى الرد
اتلخبط بربشه عين
سلااااااااااااام