الحاسه السادسه 3

تنويه نزولا لرغبه بعض الأصدقاء اكمل وارجو كل من يعلق ان لايجامل سأكون اسعد بالرأى الحقيقى

كما رأى البعض ان موقف الحما غير واقعى فقررت ان اعتبر الجزء الفائت منتهى

ويحدث تفاهم . وفكرت ماذا لو كان محمد خائن وماذا لو ...تابعو معى

ِرجعت سهام هى ومحمد والبنات البيت وفى طريق العوده فتح محمد راديو العربيه وكانت ام كلثوم بتغنى انا

لن اعود اليك تنهدت سهام وشعرت بعدم ارتياح وضيق وقالت فى سرها حتى الفال مش حلو .ولكنها لم تتكلم ولم يتكلم هو ايضا وكان الجو يخيم عليه الحزن

وعند دخولهم البيت كان محمد كأن لم يحدث شىء ولكنه يدوبك نص ساعه بدون كلام ولا سلام ودخل ينام

قامت هى وعشيت البنات ودخوا يناموا لم تستطع النوم او البكاء لديها شعور اكيد بخيانته ولكن فكرت فى كلام حماتهاواخذت جمله واحد تانى يقولك ايوه بخونك واضربى رأسك فى الحيط تتردد فى ودنها. قلبها وعقلها يؤكدان انه خائن مش محتاجه اثبات وسألت نفسها طب لو كان فعلا خاين اعمل ايه يااااااه شعور دفين بالأهانه والاستهتار بها لم تتغير تصرفات محمد نفس السرحان وعدم الكلام ومافيش اخبار عن العمره المزعومه ولا تستطيع ان تطلبها. وفى خلال عده اشهر بعد هذه الواقعه حاولت بكل الطرق ان تقرب من محمد ولكن كل يوم بيزيد البعد اكتروكل يوم قلبها يتعصر

من الحزن والألم

بدأت تفتش فى اوراقه وتشوف ارقام التليفون على الموبايل ولقيت اسم فتحيه قالت لنفسها اكيد فتحيه اللى جاتنى . اتصلت بها ردت عليها فتحيه بعصبيه انا كنت عايزه انصحك بس انتى كنتى حا تقطعى عيشى بس انا عذراكى

وعرفت منها ان محمد كان بيتقرب لها وانها عامله عنده واعترفت لها بانها كانت بتحب محمد وانه مفهمها ان مراته مريضه وعلى فراش الموت وكان عندها امل تتجوزه وانه خدعها ولكن بعد فتره اتعلق بالمهندسه

مرفت ردت سهام وايه مرفت دى كمان عرفت منها انها متجوزه وصغيره ولم تنجب ولكن جوزها فى امريكا له سنتين وشكله مش راجع وسايبها زى البيت الوقف واترجتها فتحيه ان لا تخبر محمد انها قالت لها كده ده ممكن يقطع عيشى قالت لها ماتخافيش وفهمت سهام ان دافع فتحيه هو الانتقام من محمد

ارادات ان تبكى ولكن مش عارفه مافيش دموع بس القلب ينزف وبدأت تراقبه الى ان تأكدت ان قصه فتحيه صح

ياااااه كل ده يطلع منك يامحمد ايه متجوزه توم كروز ولا جورج كلونى

اتصلت بها نجوى للأطمئنان عليها قالت لها كله تمام وقالت لنفسها ده ابو اولادى وبلاش فضايح .

دخلت حجرتها وبصت لنفسها فى المرآه يااااااااه اخيييييييييي غبيه غبيه حماره لابسه فستان انا بكرهك اتفو عليكى اد ايه انتى خايبه

خد ميراث ابوكى وضحك عليكى اقول ايه حماره وشعرت كأنها اسماعيل ياسين فى فيلم العتبه الخضراء

وقعدت تعيط حتى تورمت عيناها وفاقت على جرس الباب وعوده البنات من المدرسه وحاولت ان تكون متماسكه ادام البنات دول مالهومش ذنب واخدها كلام البنات وماحدث فى المدرسه ورغبتهم فى الاشتراك فى فريق الموسيقى

وكأنه فاصل لمخها حضرت الغداء وفتحت التليفزيون للبنات اثناء الغذاء لعدم رغبتها فى الكلام

كان فى مشهد فى تمثيليه البطله بتقول مافيش حد حايمسح دمعتى من على خدى غير ايدى . قالت لنفسها دى اشاره

ليا انى افتح و اسمع الجمله دى هو كده فعلا ماحدش حايمسح دمعتى

غير ايدى ودخلت اودتها يار ب انت عالم بحالى وشايف ومطلع الهمنى الصواب انجد نى من حيرتى

واخذت عهد على نفسها ان لا تحاول ان تستميل محمد فهو لا يستحقها داير يضحك على الستات الظالم لأ واخد حقى

هو لم يحبنى انا لا الومه على مشاعره ولكن الومه على ظلمه ليا من اول النهارده لأ من اللحظه دى انا حابدأ من جديد من الصفر من غير ميراث وحا اعرف اخللى الكل يحترمنى مش حاستدر العطف ولا الحب انا برفض الشفقه من النهارده حاكلم نفسى واخد وادى معاها انا

اللى وصلت نفسى لكده .عيوب محمد معروفه ليا بس انا كنت مش عايزه اشوفها انسان انانى عايز الكون كله يدور حواليه اهتماته ورغباته

امه ربيته ان يكون هو الأول فى كل حاجه عموما هو مايساهلش افكر فيه انا افكر فيا . مش حاجى على نفسى علشانه تانى ابدا ولازم يكون ليا دخل لازم . مش عايزه حاجه من وشه.وبدأت رحله البحث عن العمل كل يوم تشترى الأهرام وتلف ولكن باءت جميع المحاولات بالفشل ولكنها كانت تقول لنفسها افكر فى مشروع ولكن مشروع ايه والفلوس منين بس ان شاء الله فى مخرج

وكانت دائمه الدعاء ولديها نفس القناعه الغريبه بأتيان الفرج.

اتصلت بها نجوى وطلبت منها الذهاب لشراء قمصان نوم وراحت لمحل شهير لانها عايزه قمصان شيك ووجدت

اسعارهم خياليه قماش لينو عادى جدا بس الوان راقيه وذوق رفيع فى التصمييم استغربت سهام من الاسعا ر وقالت لها

ده مايتكلفش كده ابدا لكن نجوى ردت ماتلاقيش الدانتيل ده والذوق واشتريت

روحت سهام وتذكرت هوايتها القديمه فى الخياطه وفى اليوم التالى ذهبت لسوق القماش واشترت قطعتين ومجله بورداقديمه امعانا فى التوفير ودانتيل مناسب زى اللى فى قمصان نجوى وقررت ان تنفذهم وفعلا طلعوا شيك جدا

وتكلفتهم ارخص من السوق بكتير. اتصلت بنجوى وقالت لها تعالى حالا وصلت نجوى واعجبت بهم جدا وقالت ده انتى كده ممكن تبيعهم قالت لها الله ينور عليكى هوده مشروعى انا حابيع ارخص من السوق بكتير والمكسب حايزيد لما

اشترى جمله ومش حاخيط لزباين علشان مش عايزه رجل فى البيت انا حافصل واعرضهم على المعارف وعندى فى

العيله عرايس كتير حاقول دول معرضين للبيع علشان لاحد يقولى وسعى اوضيقى وردت نجوى وان اول زبونه

اكرمينى شويه واحتضنوا بعض وشجعتها نجوى على الاستمرار ولم يشعر محمد بمشروعها اصبح يعود متأخر وكانت بالنسبه لها فرصه لزياده الانتاج

ركزت كل همها فى تربيه بناتها على ان يكن اكثر وعى منها وكان تجلس معهن هن ستذكرن الدروس وهى تخيط

وتغمرهم بحبها وحنانها تعويضا عن بعد ابوهم وتقولهم مشغول حتى لا تؤثر على نفسيتهم بالسلب وبدأت تعقد جلسات مع نفسها تكلم روحها مافيش حد حايفهم احساسها الا هى .كانت تحلل شخصيه محمد وتحلل شخصيتها فوجدت فجوه عميقه

من الصعب تضيقها ان لم يكن مستحيل .وبدأ حلم يروادها حلم من احلام اليقظه ان تنجح فى حياتها بمعنى ان تكون

سعيده من غير محمد يعنى لو محمد مات لا قدر الله الحياه حاتستمر ولازم اسعد نفسى شعارى سهام تسعد سهام

حانجح وحايندم عليا ولا مايندمش انسيه ياسهام ده كلامها لنفسها

الا انه لم يرحمها فاختلق معها مشكله وشكله كان ناوى انه يتعبها فقررت بينها وبين نفسها انتذهب الى والدته فى الصباح لتخبرها بماحدث حتى لايزداد فى ظلمه

رغم كل هذا كانت فرحه بما قررته وبصداقتها لنفسها وقربها من بناتها فكانت تقضى معاهم ساعات من السعاده الغامره وبما ادخرته من اموال وشعرت ان لها كيان آخروذهبت الى منزل حماتها وقبل ان ترن الجرس كانت الشغاله بتفتح الباب رايحه تشترى حاجات قالت لها اتفضلى الحاجه جوا لم تشعر حماتها بدخولها كانت فى اوده مجاوره تتحدث بالتليفون وحدثت مفاجأه مهوله كادت تفقدها وعيها
نكمل قريبا

تحديث
ستصل سهام لحقيقه ان زوجها خائن واهله على علم وذلك من المكالمه التليفونيه بين حماتها واختها
واصبح امامها حلين
الاول ان تستلم للأمر الواقع وترضا بهذا الوضع للظروف الأقتصاديه وضعف شخصيتها وقله طموحها
او ترفض وتطلب الطلاق وتركز فى النجاح فى عملها وتربيه اولادها والتغلب على نقاط ضعفها
وكل من الحلين موجود على ارض الواقع واتر ك لك الأختيار

النهايه او البدايه

الحاسه السادسه 2

وقفت سهام ونجوى فى حاله من الدهشه وقطع سرحانهم صوت الست نتكلم جوه

ولكن سهام تذكرت ان بناتها على وصول ومحمد منبه عليها مادخلش حد غريب ممكن يكون الهدف سرقه او اعتداء فاعتذرت للست بحجه ان عندها ميعاد مع

الدكتور وقالت لها بكره الساعه 9 الصبح حاكون جاهزه ونتقابل معاكى فوتى عليا حاتلاقينى على باب العماره .استغربت نجوى من تصرف سهام وقالت ده انا مش قادره استنى كنا عرفنا وخلصنا بس ده انتى طلعتى بركه واحنا مش عارفين

ردت سهام اللى حاتقوله انا حسيته مش حاتفرق معايا مين وبصراحه ممكن محمد يطب فى اى وقت ويسيب الموضوع ويمسك فى انى ماسمعتش كلامه وممكن يكتشف كدبتى

ردت نجوى بس انا مش مرتاحه للست دى بكره يبان سكتت نجوى شويه وبعدين قالت اقولك ايه اللى خلا محمد يعمل كده ونكون مفتوحين على بعض وماتزعليش منى

ردت سهام نجوى انتى اقرب اليا من اخواتى انا ثقتى فيك اد ثقتى فى نفسى ياريت تصارحينى

شوفى انتى كنتى جوازه صالون مافيش قصه حب بينك وبين محمد

ردت سهام طب ما اناحبيته من قلبى

نجوى جميل اوى حبتى بس مافهمتهوش

سهام : ليه بتقولى كده انا كنت بعمل كل اللى يرضيه وبوافقه على كل حاجه

نجوى : انتى كده قلتى سبب مهم .يعنى لما يسألك رأيك فى حاجه بيكون ردك اللى تشوفه اللى انت عايزه

طب لما توافقيه على كل حاجه فين النصيحه وفين الرأى وتفكيرك المستقل كده كأنه عايش لوحده وقبل مايسألك بيكون عارف الأجابه الرجل بيحب الست اللى بتشغل مخها مش لوك بس

سهام : انا كنت عايزه ارضيه . نجوى : ترضيه اه لكن تلغى شخصيتك لأ . هوضمن حبك واستسلامك

وحطك فى الفريزر وقت مايعوزك يطلعك فين سهام بتاعت زمان اللى كان لها رأى تعتزبه

وبرضوا انك سبتى شغلك دى حاجه مش صح . الشغل بيدى الواحده كيان انسى انتى ومحمد دلوقتى عموما لو الزوج مش حانقول خاين حصل له حاجه الله لايقدر يبقى فى دخل للزوجه مش معتمده عليه

سهمت سهام وقالت لها عندك حق بس ده مش مبرر للخيانه

ردت نجوى خدى بالك من نفسك وكده الموضوع حصل فعلا زى ماحكتى لمحمد يعنى ضميرك مش حايأنبك واحساسك
صادق بس انا رغم كل ده حاسه ان محمد برىء والست دى شكلها مش مريح ممكن تكون هى اللى على علاقه به وعايزه تنهى العلاقه بينكم اصل غريبه اوى واحده تتطوع بحاجه زى دى سامحينى ياسهام انا مش عايزه اسيبك بس
انا اتأخرت حاطلع واتصلى بيا فى اى وقت لو عايزانى معاكى بكره فى مقابله الست قوليلى انا ممكن امد الاجازه بكره كمان.
ردت سها م حااتصل بكى وانصرفت نجوى .لم تمر ساعه على هذا الموقف الا واتصلت حماه سهام
وقالت لها تعالى انتى والبنات واتغدوا عندى وحاتصل بمحمد يطلع عليا بعد شغله عندى اخبار جميله حاولت تعتذر
ولكن حماتها اصرت وقالت علشان تعرفى الأخبار الحلوه يالا لبسى البنات وتعالى.
ذهبت سهام الى بيت حماتها وعقلها شارد اشبه بالتائهه ليست لديها قدره على التفكير ولكنها تشعر ان الله معها وان ازمتها ستنفرج ازاى مش عارفه رغم القلق والحزن لكنها تشعر بيقين انفراج ازمتها رغم الغيوم لديها قناعه عجيبه ان الأمور ستتحسن دائما تردد من يتق الله يجعل له مخرجا
واستقبلهتا حماتها فرحه وحكيت لها ان سهى اخت محمد جالها عريس وعايزه محمد يسأل عليه ولمحت لسهام ان البيت
السعيد اساسه الست وان الست اللى متطلباتها كتير ونكديه بتخسر جوزها وحسيت سهام ان الكلام موجه لها وان محمد
مفهم مامته انها لها طلبات مرهقه قردت سهام شوفى ياماما محمد فى عينى ومش بطلب منه حاجه فوق طاقته فما كان من حماتها الا انت مصمصت شفايفها على طريقه احسان شريف فى فيلم اشاعه حب بنت سلطح ملطح وكتمت سهام غيظها وانتهت الزياره على خير
وفى اليوم التالى نزلت فى التاسعه تماما ووجدت الست موجوده وفى الطريق حكت لها ان محمد بيعرف سيده جميله ومتزوجه من رجل ضعيف الشخصيه وان الست لعبيه حاجه كده زى تحيه كاريوكا فى فيلم شباب امرأه وان الست دى بتفرض نفسهاعلى محمد وهو هيمان فيها وسألتها سهام وانتى ايه صالحك فى كل ده قالت لها احنا ولايا زى بعض وانا عايزه لك الخير . سهمت سهام شويه واتطلعت فى وجه الست وحست انها بتكدب رغم الحجاب اللى بترتديه
الا انها شعرت انها امرأه لعوب فطلبت منها بدل مايروحوا النادى ان تتوجه بها الى منزل حماتها وهى الوحيده القادره
ان تأمر محمد بالبعد عن هذه السيده وفعلا راحوا وبهتت والده محمد من القصه وشعرت بضيق شديد وشعرت بظلم ابنها لسهام وعرفت ان سهام حبيت تثبت لها عمليا عدم تقصيرها حتى لاتستمر فى تلميحاتها

استأذنت والده محمد لعمل الشاى واتصلت بابنها واخبرته بماحدث فطلب منها ان تعطل الست لحد ما يجى وفعلا .

حضر محمد وبهت عندما رأى السيده وسلم عليها اهلا يافتحيه اضطربت جدا وأستأذنت ولكن سهام قالت لها رايحه

فين مش لما نشوف ايه الحكايه هو دخول الحمام زى خروجه ولكنها قالت الاولاد فى الشارع لازم اروحهم ورد محمد
سيبها تمشى بالسلامه

جلس محمد يضرب كف بكف ويقول الحمدلله انها جت لحد كده الست دى عندها اضطراب نفسى وهى زوجه احد العاملين عندى وكنت احاول حل مشاكلها مع زوجهاوكاد ان يطلقها اكثر من مره لما تسببه له من مشاكل وبعدين بقيت تتصل بيا بدون مبرر وتقوللى واحشتنى وانا بحبك فابتعدت عنها وعن زوجها و. وردد لا حول ولا قوه الا بالله ولما رأى الشك فى عيونهم علا صوته وانا مستعد اثبت هذا

ولكنى لا اقبل ان يشكك حد فى اخلاقى وشرفى بطريقه يوسف وهبى وبدأ يتوجه لسهام بالكلام ازاى ياهانم تسمحى لنفسك تمشى مع واحده ماتعرفيش حاجه عنها انا مش منبه عليكى تتصلى بيا وما تصرفيش من دماغك وكمان 100مره هنا قاطعته امه بحزم
جرا ايه يامحمد انا نفسى شكيت احنا مش ملايكه

ربنا يهدى سيركم وانا متبرعه بعمره لكم انتم الاتنين انتم محتاجين تقربوا لربنا بالشكر ربنا اداكم كل حاجه
بيت جميل واولاد زى الفل فكروا فيهم واعقلوا انتم الاتنين واقفلوا الموضوع ده وبصيت لسهام خدى جوزك مالكمش
غير بعض وابعدوا الشيطان ودخل محمد يشطف وجهه وجرت وراه امه
محمد ادينى فرصه اكلم سهام وغمزت له بما يفيد اتلكع شويه
وما ان دخلت لقيت سهام بتعيط بصى ياماما انا مش مقتنعه اخدتها فى صدرها وقالت لها ابنى بيخاف ربنا اطمنى
وفى حاجه باقى عليكى وعايز يثبت لك انه برىء ولو لاقدر الله بيعرف واحده تديها له كده على طول . ممكن واحد
يقولك اه بعرف واحده تانيه واخبطى راسك فى الحيط ويبقى عينى عينك خدى بالك من نفسك ومنه عندكم اولاد فاجهشت
سهام بالبكاء يعنى علشان بناتى يذلنى لأ انا عندى كرامه وعندى اهل واقدر اشتغل مافيش حاجه تلوى دراعى مش حايضحك
عليا بكلمتين انا مش ساذجه للدرجه دى
ردت حماتها انتى بنتى وكرامتك تهمنى انا السنين والايام علمتنى كتير اسمعى كلامى وحافظى على بيتك وماتتكلميش معاه فى الموضوع ده تانى عايزه تشتغلى وماله يبقى عندك دخلك واهتمامتك انا بقول لسهى بنتى اوعى تسيبى شغلك حتى لو حاتجوزى مليونير دى خطوه صح وممكن تشتغلى معاه اهه يبقى تحت عينكى بس اهدى وعدى الازمه دى
وحتى لو مش مصدقه اعملى انك مصدقاه حايتعب ويعمل حسابك وربنا يهديكم ودخل محمد
بصت له امه وقالت سبحان الله انا امبارح شفت عمرو خالد بيقول لما الزوج وزوجته يصلوا جماعه فى الفجر مع بعض ويقروا القرآن سوا ربنا بيوفق بينهم ويزيدهم محبه واخدتها فى حضنها وقالت ابنها بوس مراتك وخدها وحياه مها ونهى متزعلها انت معاك ست الستات ارتاحت سهام لكلام الوالده ومسحت دموعها ومحمد اخد ايدها وودع والدته وقالها محتاجين دعاكى

الحاسه السادسه

دخلت سهام حجرتها بعد نزول زوجها لعمله ومها ونهى لمدارسهم

نظرت لنفسها فى المرآه مازلت تحفتظ برشاقتها واناقتهاولم يتغير شكلها رغم مرور 10 سنوات زواج .

وقالت لنفسها لماذا يعاملنى بهذا الفتوروالجفاء رغم اهتمامى به وحبى له وايداع كل ما املك

فى مشروعه ولا ينوبنى منه سوى الامبالاة واهماله لى ولمشاعرى .
اد يه انا مجروحه ومتضايقه خصوصا من نفسى من الغلطه الفظيعه اللى ارتكبتها اخيرا
واثناء شرودها رن جرس التليفون كانت صديقتها الانتيم التى تسكن معها فى نفس العماره

ردت بصوت مرتعش ايوه يانوجا ازيك

مالك يابنتى فى ايه

ابدا ابدا مافيش حاجه

بس ضميرى واجعنى اوى اصلى

ردت نجوى انا حاجى اشرب الشاى معاكى
نجوى واووو جميله اوى قصه شعرك والنيو لوك ده وكمان غيرتى نظام الشقه بس كده اجمل بكتير
ردت سهام تصورى ان محمد ماخدش باله لا من قصه شعرى ولا من تغسيير نظام البيت
ردت نجوى لأ معلش دى حاجه واضحه جدا هو اللى عامل نفسه مش واخد باله
انا حاسه انه بيخونى مش حاسه انا متأكده
طب وايه اللى مخليكى متأكده اوى شوفى ياستى مش بيتكلم معايا خالص طالع نازل مبوز وكأنه قاعد فى جنازه
عارفه غيرت فى نظام البيت وعملت نيو لوك وسألته كتير فى ايه

بيكون رده مافيش ولما اكلمه يرد اممممممممم ايوه اويهز راسه بالموافقه اوالرفض عرضت عليه نخرج ندخل سينيما نتمشى يكون رده الافلام كلها بتيجى فى التليفزيون او يقلبها نكد

وبعدين قلت ده بيهتم بالكره بقيت اشوف برنامج شوبير واقرأ الصفحه الرياضيه علشان اشاركه اهتمامه ولا هو هنا

سهمت نجوى وقالت قطيعه الرجاله دى مش بيجى منها غير وجع الدماغ وكلهم خاينين

وقامت سهام تجيب الشاى وهى بتقول واللهى يا نوجا ما قصرت لعبت معاه كل اللعبات سيجا على العالى وسيجا على الواطى ونطه الانجليزى وبريلا بريلا

ومافيش فايده

نجوى مش عارفه اقولك ايه لا تقوللى ولا تعيدى بس انا ضميرى واجعنى اوى لأنى عملت حاجه مش تمام

نجوى خير وغوشتينى

رن جرس التليفون وردت سهام ايوه يامحمد لأ مش حاطبخ النهارده عندى بواقى اكل وحا احمر بطاطس واعمل

سلطهن نفسك فى حاجه طيب ماشى

انا كويسه جدا لأ مافيش حد جه لأ ما جتيش ما تقلقش حابص من العين السحريه قبل ماافتح . عايزاك طيب

سهمت نجوى ما الراجل مهتم وبيسأل

اسكتى اتتى اصلك ماتعرفيش حاجه طيب احكى لى بس انا عايزه اعرف ايه اللى واجع ضميرك الأول

شوفى ياستى امبارح عملت الأكل اللى بيحبه وحطيت البارفان وقلت بعد الغدا وشرب الشاى

دردش معاه واسمع الكلام اللى قاله شوبير وقعدت زاكرته
لاقيته ولا هنا وامممممممممم ايييي
قلت من غير تفكير ولا ترتيب واللهى يانوجا الكلام اللى حا اقوله لك

عارف يامحمد فى حاجه غريبه اوى حصلت النهارده

قاللى ههاااااااا خير

قلت بعد مانزلت ورجت شغلك والباص جه للبنات لقيت الباب بيخبط وواحده

بتقولى انا عارفكى انتى سهام وجوزك محمد وبناتك مها ونهى قلت لها ايوه خير حضرتك تعرفنى منين ماكملتيش كلامى لقيته راح رامى الجرنال من ايده وبرق بعينيه ومعرفش عينيه وسعت ازاى

وقاللى هااااا قولى وبعدين باهنمام بالغ ولونه اتغير اوعى تكونى دخلتيها هااااا

لأ طبعا مادخلتهاش وبعدين كان فى حد طالع على السلم بصيت لاقيته مشى على اطراف اصابعه ولا اجدع بالرينا

وشاور ليا علشان ماتكلميش وبص من العين السحريه كان صوت وقع القدام اختفى اتنهد وولع سيجاره

وقاللى الست دى كانت عايزه ايه قلت له قالت لى انك بتعرف واحده تانيه ولما سألتها مين فالت لى حااقولك كل حاجه

بالتفصيل ولو عايزه اخليكى تشوفيهم بعينك

رد بنت الــــ ...... هاا وبعدين قلت ابدا رن الموبايل بتاعها وقالت عن اذنك حاجى لك تانى وماجتبش

جن جنونه وضرب كف بكف وقعد يشتم فيها

وسألنى شكلها ايه ردت عادى .يعنى ايه عادى
تخينه ولا رفيعه قلت بين البتين

يوووووووووو طب محجبه ولا لأ

قلت كانت حاطه بونيه ممكن تكون محجبه او مش عامله شعرها ورايحه للكوافير

يييييييييييي طب وقالت ايه كمان قلت مافيش اكتر من كده

وقلت له شوف بقى انا عايزه اعرف منك ايه الحكايه ولقيت نفسى متضايقه جداومتعصبه وكأن القصه حقيقيه

وقعد يقوللى انه مافيش حد فى دماغه غيرى ان واالبنات ومشروعه وانه بيحبنى وانه مقصر فى حقى وانه وانه

وبقى مش على بعضه وتقريبا مانميش طول الليل وكان باين عليه القلق اوى

ماخبيش عليكى فى الأول كنت فرحانه وحاسه انى باخد بتارى وانى اعمله قلق يشرب شويه

وزى مانتى شايفه كل شويه يتصل ويسألنى جت ولا لسه

ردت نجوى يااااااه وانتى ازاى جاتلك الفكره دى
ابدا واللهى ده انا مستغربه ازاى انا عملت كده وضميرى واجعنى جدا بس بقول لنفسى طول عمرى صادقه معاه

وعمرى ماكدبت عليه ولما اكذب يهتم بيا اوى كده ولا فعلا بيعرف واحده وخايف يتكشف

شوفى ياسهام محمد واعى وكفايه لجد كده ماتقوليش انك اخنرعتى القصه دى ولا حاجه بس انهى الموضوع لحد كده

دق جرس الباب بصت لقيت واحده بتقول لها انتى سهام وجوزك محمد ايوه

خير فى حاجه

ابدا انا جايه انصحك جوزك بيخونك وبيعرف واحده وانا خايفه عليكى

سهمت نجوى وسهام وتمتمت نجوى فى سرها سبحان الله ده انتى مكشوف عنك الحجاب. لو ماكنتش شايفه وسامعه بودانى كنت مش ممكن اصدق
الست تحبى ادخل واحكى لك

عا يزنها تبقى بمبى بمبى

عوامل مساعده لجعل حياتى تتلون بلون بمبى حيث انها رماديه اللون لا ابيض ولا اسود
بطبيعتى اميل للفرفشه ولكن من منا لم يمر بما ينغص عليه صفوه وحتى من حباه الله بعدم وجود مشاكل وده نادر بيلاقى المود العام مش حلو نشرات الأخبار واللى بيحصل فى العراق وفلسطين اخبار الغرقى وغلاء المعيشه حتى لو الواحد بعد عن كل ده تلاقى وجوه الناس فى الشوارع اغلبها عابسه .حتى فى اكتر من مدونه عزيزه عليا لقيت اصحابها فى حاله حزن يرقى للألم النفسى قلت اكتب عن حاجات عملتها وخففت عنى وربنا يفرجها علينا جميعا

المشى عموما بس على البحر بيخلينى فى حاله من الهدوء والرضا وبينعش روحى منظره و ريحته فى هدوؤه او حتى هياجانه له عليا تأثير عجيب زى مايكون سحر وكأنه منطقتى لغسل همومى . منظر الغروب وسحره الاقينى فى نفسى بقول الله من قلبى واسبح واحس ان وجوده رساله من ربنا بتورينى قدرته الانهائيه ويزداد ايمانى وارجع بيتى بمعنويات افضل
حاجه تانيه لما بكون بصحبه حلوه مشتركه معايا فى الميول وفى تفاهم بينا وحبذا لو قاعدين فى مكان جميل او بنتمشى على البحر الصحبه دى ممكن حد من عيلتى او واحده صحبتى انا صحباتى من ايام الطفوله حتى الأن فى ثقه وتفاهم عميق بينا الحمد لله بس مش حد محدد بالذات الصحبه الحلوه بتحسن من المود بتاعى جدا علشان كده بحاول اخرج على الاقل مره كل شهر مع صحبه ظريفه
كتاب مفيد باسلوب جذاب اجد فى القرأه متعه و لايشترط نوع معين وان كنت اميل للقصص الأجتماعيه وكل مايخص علم النفس
طبعا انى اكتب فى مدونتى واتجول فى المدونات الأخرى اللى فى كتير اوى بقوا بالنسبه لى اصحاب احب اشوف كاتبين ايه وايه رأيهم فى اللى بكتبه
السينيما وده جه بعد تجربه . كنت مره حزينه و حاسه بملل وزهق وخفت اعصابى تفلت منى فأأثر على بيتى فاقترحت انى اعزمهم على سنيما وطلبت منهم يرشحوا اىا فيلم فى الحقيقه لم يعنينى اسم الفيلم انا داخله علشان اخبى احزانى لكن اللى حصل ان الفيلم كان ظريف وفعلا طلعت من الحاله اللى كنت فيها وسعدت جدا بقرارى ده مع انى كان متهيألى انى حادخل اعيط حتى انى اتمنيت يكون فيلم نكد وادى لدموعى حريتها لقيت نفسى بخرج من حزنى واندمج مع الفيلم واكتشفت ان التغيير مهم جدا .

مش لازم نسيب نفسنا لحد ما نوصل لمرحله الزهق انا زى ميلودى بتحدى الملل بس مع الفرق طبعا
ولقيت ان الواحد لما يكون مش عايز يحكى مشكلته ويخرج عنها شويه ممكن يدخل السنيما بس يكون الفيلم حلو ويشد. الدعاء له تأثير عالى جدا افتكر مره قريت فى بريد الجمعه فى الاهرام عن شاب بعانى من مشكله كبيره فقعد يدعى ويبكى ووقعت فى ايده ورقه كان فيها دعاء سيدنا موسى " ربى انى لما انزلت الى من خير فقير" وكررالدعاء ده كتير جدا باخلاص وبكاء فما كان الا وتتحل مشكلته بطريقه ربانيه غير متوقعه كان ايامها اللى بيحرر بريد الجمعه الاستاذ عبد الوهاب مطاوع الله يرحمه واتكلم عن اثر الدعاء

انا من يومها وانا دايما اردد هذا الدعاء وغيره طبعا عموما ذكر ربنا والقرب منه فيه كل الحلول
احيانا بيكون الأنفراد بذاتى واقعد فى ركن معين فى بيتى واسرح مع نفسى واحاول افتكر المواقف الحلوه اللى فاتت وارجع بذاكرتى فاستعيد ايام حلوه تساعدنى على اعاده الأحساس بالسعاده
مشاهده التليفزيون فى برامج معينه ظريفه بالنسبه لى العاشره مساء والقاهره اليوم د / فيل واوبرا او فيلم جميل افتكر مره كان مزاجى مش تمام وكان فى حفله لكاظم الساهر او كاظم الساحركما تسميه الكاتبه حسن شاه فعلا كانت سهره ممتعه وتاثيرها امتد يومين تلاته بعدها كنت محتاجه اشحن بتطلعى رساله نأسف لقد نفذ رصيدكم
اضطر اشحن تانى فى حاجه كمان كنت بعملها من وانا صغيره الناس اللى ماقدرش اواجها والومها او حتى اتخانق معاها لو مدرس او حد كبيرفى السن ماينفعش اواجه بغلطه كنت اخد ورقه واكتب فيها كل اللى عايزه اقوله وممكن اعنف الشخصيه دى واحيانا اشتمها وكأنى بنفس عن نفسى مش شرط لموقف معايا بس بعد ماعمل كده كنت بستريح دلوقتى بفضض معاكم الحمد لله
فى حاجه تانيه مهمه اوى لما اساعد حد افرحه او اشاركه همه او احس انى ساهمت فى حل مشكله.

من الحاجات اللى بحبها اوى نباتات الظل لما اراعيها والاقيها بدأت تنبت بتخللى البيت شكله حلو وبتدى نوع من البهجه

دى عواملى ا لمساعده علشان الحياه يكون لها طعم افضل انتم بتعملوا ايه ؟؟؟؟.
عايزين نساعد بعض

الحب عن بعد

فى شخصيات بحبها اوى وكنت اتمنى اكون قريبه منهم بحبهم من غير ما اعرفهم معرفه شخصيه ممكن بعرفهم عن طريق الصحافه او التليفزيون او المدونات

من الشخصيات دى منى الشاذلى وسماح انور وكتبت عنهم قبل كده
انا بحب اوى الدكتوره سحر الموجى . اول مره شفتها كان فى برنامج ارجوك افهمنى تقديم بثينه كاملعجبنى اوى طريقه استماعها ومناقشتها للمشاكل بتاعت المشاهدين وردودها
حسيت انى بسمع واحده متعمقه فى فهم النفس البشريه ومثقفه جدا وبسيطه وقريبه من قلبى .وبحكم انى قارئه مدمنه للمصرى اليوم لثقتى فى اغلب اللى بيكتبوا فيها ناس صادقه ووطنيه ومحترمه وسعدت جدا لما لقيت لسحر الموجى انضمت للجريده بمقاله اسبوعيه
كل مقالاتها تنم عن حب لأولاد بلدها وغيوره على سمعه بلدها وصريحه واسلوبها سلس وجميل

بعد كده لقيت د/ يحى الجمل وانا بعزه واحترمه جدا كتب عنها مقاله عن روايتها نون ودورت عليها فى دار الهلال المكتبات وبعدين اخيرا ابنى ربنا يخليه لاقها وجابها الحمد لله

من الشخصيات التانيه

مجدى الجلاد رئيس تحرير المصرى اليوم شفته فى اكتر من برنامج العاشره مساء والقاهره اليوم

رأى صريح ووطنى مخلص وذكاء وعجبنى جدا فى نشر اجزاء من مقاله بتهاجمه دون ان يرد عليها فى جريدته وكأنه بيقول للقارىء احكم انت ايام انقطاع المياه وثوره الجراكن كتب مقاله بيخاطب فيها الرئيس حسنى مبارك قاله حفيد سيادتك فى البسين والناس عطشانين

وغيرها مقالات جريئه وصريحه ومافيش فيها ذره نفاق

فى ناس كتير تانيه مشهوره وناس تانيه مش معروفه بحبهم جدا ممكن احبهم علشان بسمع عنهم خير الحب فى ظنى بيكون نابع من جمال ونبل الشخصيه اخلاقها وعدم انانيتها حبها للخير والجمال وثقافتها مش بشكلها برأيها وفكرها
ظنى ان الناس دى حاتكون ان شاء الله من اسعد الناس لأنهم عايشن وحاسين بالناس اللى حواليهم

لم تغريهم الشهره او المال ومافكروش يقربوا للسلطان فكسبوا

حب الناس وثقتهم ودى قمه السعاده

تحديث

فى ناس كتير اوى بحبها لم اكتب عنها لكن اغلبهم فى البوست بتاع تخاريف الخريف والبوست ده بحبه جدا لأنه

اول بوست كتبته تحياتى للجميع