Wednesday, July 11, 2007

تفرق كتير

فى شخصيلت قابلتها فى حياتى من وانا طفله لكن تركت بصمه فى تكوينى واكيد مش انا بس ده بيحصل مع ناس كتيره

ممكن شخص واحد يحببك فى نفسك وفى الدنيا وعلى العكس
مثلا فى المدرسه

فى ابتدائى كان فى مدرسه اسمها ابله بهيجه بشوشه وبتهتم بجذب اهتمامنا وبتشرح بأسلوب سلس ومحبب واللى مش فاهم تحاول تبسط له المعلومه دون تجريح. كانت تدرس العربى مع انى اجد صعوبه فى النحو والأعراب لكن بطريقتها خلتنى احب العربى وحصته مع انى كنت مع مدرس تانى بيكبس عليا النوم من اول مايدخل واتمنى الحصه تخلص وكان ده شعور الفصل كله غير ان الفاظه كانت لا تليق بمدرس

المنهج واحد والطلبه هما هما بس مدرس يحببك فى الماده وتانى يكرهك فيها الوظيفه واحده بس الاداء مختلف تفرق كتير

فىالمدرسه الثانويه كنت وزميلاتى لانبالى بحصه الألعاب ونعتبرها مالهاش لازمه وكان وقتها بناخد حصتين العاب فى الاسبوع حصه بتديها مدرسه المدرسه . وحصه بتديها احدى طالبات معهد التربيه الرياضيه كتدريب الزامى لها وكانت فى السنه النهائيه وكنا بنقابل الأتنين بعدم جديه

فأذا بالطالبه وكنا بنقولها ابله شاديه

تقولنا طبعا كلكم بتحبوا سعاد حسنى وجمالها وشقاوتها وذكرت بعض جميلات الشاشه المصريات والاجنبيات بدأنا نسمعها وقالت دول ناس الرياضه اساسيه فى حياتهم ولازم كل يوم يمارسوا رياضه ولو حاجه بسيطه ويالا بينا نعمل زيهم علشان تحافظوا على جسمكم وطبعا كلنا عايز نبقى زى الفتاتنات بدأنا نهتم با الحصه وكانت مخطوبه وطالبه سألتها وخطيبك بيحب الرياضه ردت عليها طبعا وبدأت تكلمنا عنه باختصار و تعاملنا زى ماتكون اختنا الكبيره وبدأنا نتعلق بها وعلشان نرضيها كنا نواظب على الحصه.

اما الحصه التانيه فكانت المدرسه كسلانه اوى كنا نختلق الأعذار لعدم الحضور وهى لاتبالى
مجرد اداء واجب تقيل على قلبها وخلاص

شخصيتن بيأدوا نفس الوظيفه بس بأسلوب مختلف واحد يخليك تحبه ويدفعك للتقدم ويبث فيك الامل ويسعدك وواحد لو انت بتحبه بيبعدك عنه لأ وممكن يخليك تفقد ثقتك فى نفسك خصوصا فى السن الصغيره. فعلا تفرق كتير
حتى على مستوى تربيه الأطفال تلاقى طفل عنده كرامه واعتزاز وثقه فى نفسه وآخر فى نفس عمره ممكن يكون اجمل منه شكلا واكثر ذكاء لكنه

فاقد ثقته فى نفسه تلاقى الاول بيسمع من اهله كلام فيه تشجيع وفى اهتمام بمحاوله اعتماده على نفسه ويشعر بحنان اهله بل وتدليلهم بقدر . والتانى ممكن يكون بيسمع تعالى يامنيل ماهو انت اصلك مش نافع فى حاجه لو فلحت ابقه قابلنى .اسلوب التربيه مختلف

كان لى زميله فى العمل شكلها لطيف جدا لكن دايما شايفه نفسها مش حلوه وبالدردشه معاها عرفت منها ان مامتها من صغرها دايما تقولها تعالى ياقرده مانتى شبه عمتك انتم الاتنين قرود البنت فقدت ثقتها فى نفسها طبعا فى عوامل آخرى زى الجينات الوراثيه . بس التربيه عليها عامل كبير

افتكر ابنى وهو صغير كل يوم يدوخنى علشان يشرب اللبن ويفضل باباه يرغبه فى اللبن لكن مافيش فايده ومره لاقيته راجع من المدرسه وبيقوللى عايز اشرب كوبايه لبن كبيره فرحت جدا ماشاء الله ايه ده كله وسألته ايه الحكايه قاللى ميس ليلى قالت انها حاتحب اللى يشرب اللبن وكان بيحبها جدا وهى كانت لطيفه جدا وحنينه على الأطفال .وفعلا بدأ يشرب اللبن ويحبه . هى مدرسه ومربيه فى نفس الوقت خلت طفل يحب حاجه مش بيحبها دى طبعا حاله استثنائيه فى اللى بيحصل حاليا لكن لسه فى ناس محترمين حقيقى بتفرق من اداء واحد مميز لتانى عايز يخلص مجرد واجب تقيل

حتى فى برامج الاذاعه والتلفزيون فى 100 برنامج للأطفال اغلبها متخلفه لكن مين فينا يقدر ينسى ابله فضيله فى غنوه وحدودته من 40 سنه واجيال مختلفه اتعلقت بها افتكر مره كنت راكبه تاكسى وكان نفسى اسمع الحدودته لآخرها رغم كبرسنى شخص واحد بيقدم نفس الماده بس بتفرق كتير فى طريقه التناول والأسلوب

نيجى بقه على مستوى القيادات بصفتى اسكندرانيه ما اقدرش انسى اللواء عبد السلام المحجوب

من اول يوم مسك فيه المحافظه غير شكلها شعب اسكندريه هو هو بس شخص واحد بنفس الادوات والامكانيات غيره تماما مع ان اللى قبله كان متواجد لفتره طويله

هوده اللى بتمناه ان يكون الانسان الماسب فلى المكان المناسب

لو عندنا قيادات مناسبه موجوده فى اماكنها وضعنا حايتغير لكن لما يتولى

القياده قريب فلان وعلان قول يارحمن يارحيم .
حاليا من مسوغات تعيين المسئول ان يكون عديم الضمير وفاسد ولص
وقلبه جامد وكده يبقى عنده شفافيه ونزيه ومناسب للمرحله

ابله فضيله اتعينت فى الاذاعه بعد اجتيازاها امتحانات مش لانها قريبه مسئو

تخيلوا لو وزاره البحث العلمى تولاها د / احمد زويل او لو عمرو موسى استمر فى وزاره الخارجيه اوتولى منصب رئيس الوزاره كانت حاتفرق كتير
شكل الدنيا بيفرق كتير من تناول مسئول لآخر

مش كده ولا ايه

23 comments:

و القادم....أجمل said...

راااااااائع
العرض جميل جدا ما شاء الله عليكي
نيدي للأول للشخصيات اللي مش هفدر انساها
علي مستوي التعليمي
ابتدائي أبلة زوزو
كنت في فصل فيه استاذ هو طيب
بس أول مشوفته عيطت
:(
جت أبلة زوزو دي و اعدت
تدلع فيا و تقولي معلش
بجد حبتها و اتعلقت بيها جدااااااا
فيه مدرسين تانيين
بس برضوو دكاترة الجامعه
زي دكتور رمد
كان طريقة شرحه ممتعة لدرجة هايلة
---------
النقطة السياسية
برضوو الدكتور حسين رمزي كاظم
اول مجه الشرقية
أبدع بأمانه في المحافظة
و عمل أحلي شغل
و شاااالووووووه
:((
دا العادي عشان الفساد
ينتشر
و أوم ايه
نبعد عن السياسة
و ندور علي لقمة العيش
كده و لا ايييييه
:(
----------

تحياتي و تقديري ليك يا جميل

klmat said...

يارب دايما القادم اجمل ميرسى جدا على تعليقك رفعتى معنوياتى مع تمنياتى لك بالنجاح والتفوق ويارب دايما تقابلى شخصيات جميله زيك

altwati said...

سيدتي
بعد التحية
أتفق معك في كل ما كتبت خاصة موضوع التنشئة
وإهانة الطفل
أو الإهتمام به وتدليله أحيانا في الطفولة له أثر بالغ على شخصيته
أذكر أنني في أول يوم في المدرسة الإعدادية ، طردتني مدرسة العلوم لأنني كنت أضع ساقا فوق الأخري
واتهمتني بأنني لا أحترمها
وجاء أحد المدرسين الأشاوس وصفعني إرضاء لها
من يومها وأنا أرى المدارس كأقسام الشرطة
حتى في الجامعة كنت أقل زملائي حضورا
خوف لم يغادرني حتى هذه اللحظة
دللي ابنك ما استطعت
وأبلغيه سلامي
تحياتي

klmat said...

To : altwati
سعدت جدا بزيارتك لى والحمد لله اننا متفقين فى الرأى وتألمت من موقف مدرسه العلوم وزميلها انا اؤمن بالثواب والعقاب الغير مهين اللى يصحح الخطأ مش يسبب الم نفسى يمتدللمراحل التاليه واسفت اكتر لأثره عليك لمده طويله ربنا يقويك العيب فى هؤلاء النوعيه المفروض انهم يعلموا ويربوا اسمها تربيه وتعليم معلش .اما بخصوص انى ادلع ابنى اللى اتكلمت عليه صاحب حكايه شرب اللبن فهو ابنى الكبير والحمد لله مواظب على شرب اللبن حتى الآن
والفضل لميس ليلى ربنا يخليها .ابنى
تخرج العام الماضى من كليه الهندسه وحاليا بيشتغل فى شركه مرموقه وفى الحقيقه هو واخيه الاصغر مهندس ايضاتخرج السنه دى هم كل مااملك من ثروه ربنا يخليهم هما اللى بيدلعونى دلوقتى وعلمونى الكمبيوتر فانا لم ادرسه اصبحت انا اللى بتعلم وهما اللى بيدلعونى الحمد لله عقبالك اما سلامك فقد وصل لأنهم بيقرأو ما اكتب ومايصلنى من تعليق فهم اصدقائى الحقيقين
ميرسى جدا سعدت اوى بتعليقك وشرفتنى

اسكندراني في الغربة said...

في ابتدائي كان عندي ابلة اسمها رشيدة درستلنا اولى و تانية وتالتة
وفي رابعة طلع قرار انها تنزل تاخد فصل سنة اولي و تسيبنا لابلة تانية
مقدرش اوصفلك اد اية الحزن الي كنا فية
صدقي او متصدقيش انحنا عملنا اضراب من غير منكون عرفين يعني اية اضراب
مكناش بنحضر في فصلناو ننزل نقعد مع ابلة رشيدة مع فصل سنة اولى
وحصلت معجزة (بالنسبلنا ساعتها) انهم غيروا القرار و رجعوها لفصلنا تاني
انا ممكن انسا اي حاجة الا ابلة رشيدة و الموقف دة
عندك حق حاجات كتير بتفرق من شخص للتاني

klmat said...

اسكندرانى فى الغربه
سعدت جدا بمرورك وتعليقك هى فتره ابتدائى دى بيبقى لها تأثير كبير والمدرسين بيأثروا فينا قوىوطبعا مصدداقك لانى كنت بحب المدرسه علشان فيها ابله بهيجه وده عن تجربه حتى وانا فى الكليه كان فى ماده اسمها التأمين وكانت بالنسبه لى دمها مش خفيف وبعد شهرين من بدء الدراسه اتغير الدكتور لظروف مش فاكرها ودرس لى د/ عادل عز هو مسك وزاره البحث العلمى بعد كده من اول محاضره حببنى فى الماده وجبت فيها امتياز طريقه شرحه كانت سلسله وفى مره طالبه اغمى عليها من الزحمه فاهتم جدا بها وقطع المحاضره وتانى محاضره سأل عنها واطمئن عليها وقسم الدفعه الى اتنين يعطى نفس المحاضره مرتين لتخفيف الزحام فشعرت اد ايه هو انسان وكل دفعتى كانت بتحبه جدا اكيد بتفرق من واحد لتانى شرفتنى واتمنى تتكرر دايما خصوصا اننا اسكندرانيه زى بعض ربنا يسعدك ويؤنس غربتك وترجع لنا بالسلامه.

momken said...

عندك حق والله
والسؤال الذى طرحه الله سبحانه وتعالى
هل يستوى الذين يعلمون والذين لا يعلمون
ام يستوى الاعمى والبصير
ولا الضلمات ولا النور
والظل ولا الحرور

لا يستون مثلا

صدق الله العظيم

تحياتى

klmat said...

momken
السلام عليكم ورحمه الله وبركاته
اشكرك جدا على التعليق والسؤال الذى طرحه الله تعالى والذى اشرت اليه فى تعليقك هو خير اجابه ومسك الكلام
اسعدتنى بمرورك عندى وشرفتنى واسمح لى ان ارد الزياره مع كل الأمنيات الحلوه

Bossy said...

السلام عليكم


انا اول مره ادخل هنا
مدونة اسمها زي اسم مدونتي
كتير بنقابل شخصيات تاثر فينا
كل مرحله بنقابل فيها ناس تانيين
المشكله ان مينفعش اننا نكمل مع ناس معينين كل مرحله بتوصلك لمرحله
ومعاكي حق في السؤال بتاعك

klmat said...

بوسى
سعيده من قلبى انك دخلتى ويارب ماتكنش اخر مره وفعلا الحياه عباره عن مراحل وان كنا مش بنكمل مع الشخصيات الجميله اللى كنا نتمنى انها تواصل معانا فيكفينا انها اثرت فينا ومهما مرت السنين مش بننساها بنفتكرهاوندعو لها باالخير. انامن الناس اللى مش بتحب التقليد وارجو ان لايضايقك ان اسم مدونتك زيى انا كنت ناويه اسميها الأيام وكنت بسمع اغنيه ماجده الرومى كلمات ومنهنا جت فكره الأسم انا بحب نزار جدا.واسمحى لى ارد الزياره اسعدتينى جدا جدا بمرورك تحياتى لك

Hadota .. حدوتة said...

العامل النفسى وعنصر الاحياء مهم جدا

انا كنت شغالة مدرسة فى مدرسة اطفال
وكان فعلا بيحصل معانا مواقف كده
وبنقابل شخصيات زى اللى قولتى عليها من الابتدائى للجامعة

هيا بتعتمد على كاريزما البنى ادم وقوة شخصيته
ومدى قدرته على كسب حب الاخرين

ودا اللى لازم يتوفر فى اى مسؤول
دا غير قدرته على حسن التصرف
واستغلال الموارد المتاحة
تحياتى ليكى

و القادم....أجمل said...

فينك يا جميلة
وحشانا

و يا رب تكوي بخير دايما

:)

سكتم بكتم said...

شوفي يا أنسة اميرة
قال رسول الله صلي الله علية الصلاة والسلام
"إذا وسد الأمر إلي غير أهلة فأنتظر الساعة"
يعني لما واحد يؤهل لمنصب لمجرد أنه قريب فلان ولا معاه توصية من فلان يبقي علية العوض
لما يحس المجتهد الغلبان أن كل اللي بيعملة ملوش لازمة حيسيب الأخلاص والأجتهاد في العمل
ومش حتلاقي الطبيب الشاطر العطوف ولا المهندس المتواضع الخلوق ولا المدرس الراضي القنوع ولا القاضي الحكيم

مش حتلاقي غير فلان أبن الناس وفلان الغلبان
والجيل الجديد مش حيلاقي زيك حد يتأثر بية وياخده مثل أعلي

من الأسكندرية الحبيبة
سكتم بكتم

Doba said...

انا بس ليه تعقيب على أولادك ربنا يحميهم ويخليهملك ودايما يفرحو قلبك - انا برده عمرى منسى ابدا مدرسة الانجليزى كانت بتحبنى وبتخلينى اقرا انجليزى كتير وعلشان كده انا شاطرة فيه لحد دلوقتى وبحبه جدا

ياريت والله فعلا لو كل شخص مناسب يتحط فى المكان المناسب ليه - اكيد الميزان هيتعدل كتير - بس عموما ما ضاقت إلا لما فرجت

تحياتى وسلامى --- هبة

klmat said...

القادم اجمل
موجوده والحمد لله ربنا يخليكى دايما فاكرانى وانا بدعى لك بالنجاح الباهر بأذن الله
تحياتى ودعواتى بكل الخير

klmat said...

الى حدودته
السلام عليكم ورحمه الله وبركاته
ويارب تكونى بخير وانا معاكى طبعا العامل النفسى مهمجدا واوفقك فى كل ارائك واشكرك جدا على مرورك
تحياتى وسلامى

klmat said...

سكتم بكتم
تحياتى لك وشكرا على مرورك بس انسه ازاى وانا عندى اولاد يسمع من بقك ربنا هههههههههههههه
شرفتنى واسعدنى تعليقك جدا

klmat said...

doba
هبه
نورتينى وسعيده جدا بتعليقك ويارب تكرريها .ومدونتك جميله جدا
شرفتينى دعواتى لك بالسعاده

ما علينا said...

ياه
كدا ونص طبعا
كلامك معلق على نفسه

خدتيني معاك لحظة بلحظة
انت في مدارسك
وانا في مدارسي
فكرتيني باصدقائي من مرسيني ومدرساتي
وبرضوا بالمتجهمين منهم
على مر كل المراحل التعليمية


وفعلا الحال ياغير كتير

لو ان دايما الشخص المناسب بيكون في المكان المناسب

klmat said...

ماعلينا
سعيده جدا بتعليقك وعلى رأى مارى منيب فكرتك بالذى مضى
ويارب اكون فكرتك بأيام جميله ون شاء الله الجاى يكون اجمل
شرفتينى لك تحياتى

دكتور كسلان said...

معرفش اقوللك غير ان كلامك ينفع يكون قاموس للحكم و الاقوال الماثورة
فعلا مسؤول فى مكانه المناسب
كله بيعتمد ع الواسطة ودرجة القرابة
اى منصب دلوقتى كده
حتى الرئيس

دكتور كسلان said...

قصدى مفيش مسؤول فى مكانه المناسب
شكل التعليق ده هيودينى فى داهية
ههههههههه

klmat said...

الى دكتور كسلان
اشكرك جدا على التعليق
وكويس انك لحقت نفسك
احنا بنتكلم عمومامش
قصدنا حاجه لاسمح الله
يارب يجى اليوم ونشوف كل واحد فى المكان اللى يناسبه
ساعتها نفسى اعرف
حايكونوا فين
شرفتنى جدا وسلامى لك