Wednesday, July 25, 2007

رأيى

عرفت قصه الطفله هند من احدى المدونات كانت قد قامت بالكتابه بعد اذاعه برنامج 90 دقيقه
وتألمت جدا وكتبت تعليقى من منطلق ان الطفله اغتصبت

ولكنى لمت الأم لعدم احساسها ببنتها

ومن عادتى ان اقرأ التعليقات بستفيد جدا وبعرف الناس بتفكر ازاى
وشدنى تعليق من المدونه الجميله القادم اجمل وخصوصا ان صاحبتها طالبه فى كليه الطب وربنا ينجحها قالت

انها درست ان حاله الأغتصاب لاينتج عنها حمل
وان لابد للتحقيق ان يأخذ مجراه

ولقيت نفسى بفكر فى ام هند
وحسيت انها بعيد عن بنتها وكنت حاكتب بس قلت ان بعض الظن اثموكمان الموضوع محزن
تانى يوم بفتح التلفزيون شفت الطفله وعيلتها وبيطالبوا بأعدام الجانى وعرفت ان الأب والأم والبنت كانوا يسكنوا فى غرفواحده وحمام مشترك

وفكرت ايه اللى كان يحصل لو ماحصلش حمل

كان الموضوع كأن لم يكن والبنت بتمارس حياتها عادى
طب ازاى
اللى اعرفه من الأفلام وصفحات الحوادث ان من يتعرضون لهذه الواقعه المؤلمه يعانون نفسيا وبيشفوا كوابيس

ومنهم من يصاب بعقد نفسيه ويحجم عن الزواج
لكن هذا لم يحدث فى حاله هند !!!

حاجه تانيه المفروض ان البنت تعرضت لهزه نفسيه والأهل صعدوا العمليه للتأثير على الرأى العام
كويس لكن ظهورها فى 3 برامج 90دقيقه و فى العمق وحسين فهمى

الم تفكر الأم فى رد الفعل على بنتها الا يكفيها ماحدث
كان المفروض ان يتم مراعاتها نفسيا والغريب ان البنت كانت متماسكه بس ممكن يكون رد فعل الصدمه ده فى حاله ان كان اغتصاب
يعنى برناماج واحد لظهور الطفله كان كفايه الم يفكروا فيها وكل اصحابها والناس شايفها
حاجه مؤلمه جدا

الموضوع فيه خلل

امبارح فى العاشره مساء قالوا ان التحليل اثبت ان الولد برئ
صعب اوى طفله تتهم واحد برئ فى شرفه المفروض ان الأم تكون عارفه هل بنتها بتكذب ولا لأ

واهلها بيطالبو بأعدامه الم تشعر بوجع ضمير

كل هذه الأهوال ياربى

الأنحرافات اساسها الاسره

بعض الأمهات كل همها تعمل اكل وشرب لكن مافيش علاقه
بينها وبين اولادها مافيش حوار زى مايكون بنسيون بيجمعهم وبس

ده غير ضعف الوازع الدينى متهيألى ده بيحصل اكتر فى الأسر التى
تعانى من الفقر ويكون عددها كبير وكلهم بيناموا مع الأم والأب فى نفس الحجر

اكيد فى ناس منهم عندهم وعى وبيتصرفو ا عن طريق واردى فى النوم لكنه من العوامل
ظنى ان هذه الطفله لو تعرضت لأغتصاب لكانت فى حاله انهيار وان بعض الظن اثم والله اعلم
الموضوع مش ظريف بس قلت اقول رأيى وربنا يصلح حالنا يارب



36 comments:

loumi said...

العزيزة كلمات
تصدقى
انا الموضوع ده شاغل تفكيرى
ويمكن رأييى يكون صادم قوى مش شويه
انا القصه دى من اولها مش داخله دماغى ما فيهاش اى شىء مقنع
وخصوصا لما اكدت التحاليل ان المتهم لم يثبت انه ابو الطفله منه الله
بس اللى فى ذهنى مرعب جدا
أنا شاكه فى ابو هند نفسها
بس طبعا مستحيل حد حيطالبه انه يعمل تحليل دى ان ايه
لانه اصلا عمل بروباجاندا واتهم شاب زور والناس اللى تعمل كده وتنشر فضيحتها فى وسائل الاعلام ممكن نتوقع منهم اكتر من كده بكتير
عارفه ان راييى قد يحتمل الصواب والخطأ
بس من اول القصه وانا مش متعاطفه معاهم
وإن بعض الظن إثم وربنا يسامحنى
تحياتى

klmat said...

عزيزتى لومى
رأيك مش صادم بالنسبه لى
ده زى ماكتبت بيحصل نتيجه الحجرات الضيقه
والمزدحمه واحيانا
وبين المحارم والعياذ بالله
وان كنت لم اذكر بين المحارم
انا لما شفت البرنامج اختلف رأيى عما قرأت صعب اوى على اب وام يعرضوا بنتهم بالطريقه دى
وانا زيك لم اشعر بالتعاطف
بس مين الأب للطفله المولوده الله اعلم
الحقيقه حاتبان واشكرك جدا على
التعليق وشرفتينى
واتمنى تبادل الزيارات رأيك بيهمنى جدا
سلامى

R.O.U.R.O.U. said...

howa besara7a mawdo3 yez3eg ay 7ad ye2rah we yeshedo,bgd sa3eb awy we dah mawdo3 yeshed ay 7ad 2no yetkalem fih

Bossy said...

السلام عليكم

ازيك يا قمر
عامله ايه

بجد تحليلك للموقف والحدث حلو اوي
حتي النتيجه اللي وصلتي ليها

بصي لسه في مفاجات هتحصل
بس انا اولا واخيرا معترضه علي ظهور البنت في التليفزيون
ودا للاسف مش عيب الاب ولام لانهم جهله
دا عيب الاعلام ازاي يطلع بنت زي دي
سبحان الله
تحياتي

محمد said...

مع احترامى لرايك
لكن ليه البنت تكون منهاره
هى غلطت؟
ولا هو اللى غلط؟
ولو كانت هى الغلطانه و بتلعب بديلها و هى مكملتش 10 او 11 سنه كان الاولى انها تمثل انها ضحيه
البعض لاموا هند الحناوى لإنها اتكلمت عن مشكلتها بجراه و مابانتش منكسره وقالوا دى تلاقيها كانت صايعه اساسا
طب يا ترى هند الطفله كانت صايعه برضه وهى يادوب ماكملتش 11 سنه؟

Ert3ashat said...

الاسره هي الاساس طبعا في كل شيء و اكتر الام كمان

بس معلش انا كمان في طب طبعا الاغتصاب ينتج عنه حمل...عشان هو نفس الطريقه بتاعة الجماع العادي ف اكيد في احتمال عادي جدا زي الجواز انه يجيب حمل
ولله اعلم :)

aliaa said...

بصى يا كلمات
انا برضو اتكلمت عن الموضوع ده فى مدونتى بس مش عارفة ليه مش داخل دماغى الموضوع لان البنت مرة تقول واحد هو اللى اعتدى عليها ومرة تقول ده كان معاه تلاته من زمايله يعنى هى مش فاكرة ولا بتكدب ؟
ثانيا البنت لو كانت اغتصبت اكيد بتبقى فى حالة انهيار او رعب وبتروح البيت ويبان عليها يعنى المفروض ان الام او الاب هياخدوا بالهم ده كله وماخدوش بالهم ؟

بس ربنا وحده هو اللى يعلم كل شئ

klmat said...

r.o.u.r.o.u
f3ln el mawdo3 mesh zarif bas mo2aser
awy , el mohem eno yeakon 3eza we rabna youstoer,
thanks 4 your comment.
salmy we ta7iaty

klmat said...

Bossy,
ازيك يابوسى منورانى اناالحمد لله بخير
شوفى يابوسى البنت صغيره سواء كان اغتصاب
او انحراف هى ضحيه البيئه بتاعتها
اناعتراضى انها تظهر فى الأعلام علشان
مستقبل البنت الموضوع حايكون عقبه فى حياتهافى الدراسه
والجواز
من منطلق خوفى عليها
المفروض ان اهلها كانوا فكروا فيها
وفى رد الفعل اما بالنسبه للأعلام عايزين مواضيع تشد
بس برضوا فى ناس كتير فى بلدنا اميين
والكل عنده السلكه بتاعت الدش
ممكن ده يزيد من الوعى
بشكرك جدا على تعليقك وسعيده اوى انك بتمرى على مدونتى واتمنى نستمر نزور بعض
تحياتى وسلامى

klmat said...

محمد
السلام عليكم
شوف يا محمد هند ضحيه فى كل الأحوال
هى بنت صغيره
اناقصدى ان لو كان اغتصاب مش معقول
يمر عليه 5 شهور واهلها مايحسوش
اى حد بيتعرض لمشكله كبيره
بتأثر عليه
لو انحراف وده ممكن فى السن الصغيره
لو البيئه منحرفه اومشغولين لدرجه عدم الأحساس بأولادهم هى برضوا ضحيه ظروفها
لولا الحمل ماكنش حد حايحس
خوفى من الأعلام على البنت نفسهافهى فضيحه ستؤثر عليها فى مدرستها وفيما بعد مشكله فى زواجها. انا مع ان الواحد ما يسبيش حقه بس يدرس رد فعله
اماهند الحناوى الوضع مختلف تماما
واحده سنها قرب على 30سنه
والدها دكتور ووالدتها استاذه فى الجامعه
وهى جامعيه وميسوره ماديا
ايه الداعى للجواز من ورا اهلهالو كان جواز
وطالما جواز فى السر وهى على هذه الدرجه من الوعى كان ممكن تاخد وسيله لمنع الحمل ظنى انها كانت تخطط للزواج منه
وكان اهلها فخورين جدا وشايفين انها ماعلطتش
وفى حاله هند الحناوى واحده بهذه
القوه والجرأه تفتكر ممكن تتسرق ورقه
جوازها الله اعلم بس كنت اشعر انها
لاتشعر بالخجل بطريقه مستفزه
احتمال كبير اكون غلطانه بس ده مجرد
رأى ممكن توافق عليه اونختلف
بس لايفسد للود قضيه
وانا سعيده بتعليقك
شرفتنى

klmat said...

erta3asht
يارب تكونى بخير
وانا معاكى جدا الأسره هى الأساس
فى اسر على قد حالهاجدا بس فى دفئ فى العلاقات بينهم الام بتسأل بنتها
اخبارك ايه وحصل ايه فى المدرسه
وبتعرف مين اصحابها ونفس الشئ بيعمله الأب
اما موضوع الحمل نتيجه الأغتصاب لا استطيع الفتوى فيه الله اعلم هل الحاله النفسيه
ممكن تمنعه مش عارفه
عموما ربنا يكفينا شر المخبى ويحمى الجميع
وتظهر الحقيقه
واشكرك جدا على تعليقك
تحياتى وسلامى لكى

klmat said...

aliaa
سعدت بتعليقك وسواء كانت البنت بتكذب ولا لأ هى فى موقف لاتحسد عليه
وهى واضح ان فى فجوه فى العلاقات بينها وبين اهلها زى ماكررت بفرض عدم وجود
حمل كانت امها مش هاتعرف حاجه
ربنا يكفينا شر المخبى واذا كان الشاب
برئ ربنا يظهر برأته
شرفتينى بتعليقك وانا حاجرى
وازورك
سلامى وتحياتى

Hadota .. حدوتة said...

انا اتلخبطت مش عارفة اقول ابه بس عندك حق


ادينا متابعين وهنشوف ايه اللى هيحصل

تحياتى

klmat said...

حدودته
ازيك . يارب تكزنى فى احسن حال
هى حاجه تلخبط والموضوع فى كل الأحوال
مؤلم ربنا يستر والحقيقه مسيرها تبان
تحياتى وسلامى

wahed said...

تسجيل حضور وبالليل التعليق

تحياتي لك

wahed said...

علي فكره العاشره مساء هتعرض حلقه عن موضوع الاعتداء الجنسي علي الاطفال يمكن بكره او خلال الاسبوع ده


تحياتي ليكي

klmat said...

واحد " وليد
اشكرك جدا على مرورك
الموضوع مهم ويستاهل برنامج زى ال10 مساء يهتم به
الأطفال ممكن نتيجه الخجل والشعور بالعار لايصارحوا والدهم ووالدتهم
واليومين دول لازم الأهالى تكون عينها يقظه اوى
انا صعبانه عليا البنت اوى
ايا كانت ظروفها هى فى الأخر طفله
ولازم يكون فى عقاب شديد لأى مغتصب
سعدت بمروك بس ماقولتيش رأيك
تحياتى وسلامى

mimi said...

كلمات
اول زيارة ليا
الموضوع ده محير جدا بس احب اقولك ان الطبيب الشرعي يقدر يعرف بالكشف على البنت اذا كانت منحرفة او تعرضت فقط للغتصاب مرة واحدة
على العموم بكرة الحقيقة تبان
تحياتي

الطائر الحزين said...

السلام عليكم
عارفة حضرتك المشكلة الاساسية اننا مقتنعون ان هذا ممكن يحدث فى مجتمعنا واصبح ليس بغرينب عنه فلما حدث وقيل ما قيل قلنا ممكن يحدث ولم يستنكرة أحد اما ان كان مظلوم ام لا ليست هذه هى القضية نحن نبدى رأينا على ان الجريمة تمت هكذا فعلا اما ان كانت لها ابعاد اخرى فهذا لا يقلل من شأن ما حدث واننا توقعدنا حدوثة
تحياتى

دنــــيــــــا مـحـيـرنـي said...

و الله يا كلمات انا كنت من اكتر الناس متاثر بالموضوع ده بس الان مش عارفه افكر او اقول ايه بس الحقيقه ان الحكايه شكلها كبير و فيها اسرار و اكيد هاينكشف كل شيء بس امتي مش عارفه بس لاحظت ان الطبيب الشرعي متحامل علي هند شويه يعني ايه عندها 16 عام و ناضجه كامراه كامله كلام غريب اوي بذمتك ده شكل و لا صوت بنت عندها16 سنه مش عارفه الموضوع بقي غريب شويه ادينا اقعدين نشوف اخرتها ايه
تحياتي يا قمر

The Manager said...

حقيقي مبقاش فى ضمير

انا برضه تأثرت بالقصة فى البداية

وصدقتها طبعا

مش عارف اقول إيه بصراحة

ولا عارف الحق فين

لكن ادين بنتعلم ان بعض الظن إثم وممكن مع وجود دلائل اتهام كبيرة وكتيرة تدين اى حد يكون الحد دة برئ برضه

دا شئ مهم قوي حسن الظن بالناس

وهذا لا يمنع الحرص

والتربية من البداية كمان

موضوعك كان يستحق كلام اكتر من كدة

تحياتى ليكي

klmat said...

عزيزتى ميمى
سعيده جدا بزيارتك ويارب تتكرر
انا اعرف ان الطبيب الشرعى ممكن يكتشف
بعض الحالات مش كلها والله اعلم
وده مجرد رأى ممكن اكون غلطانه
بس كان شاغل بالى ومسيطر على تفكيرى
قلت اكتبه وافضفض
مسير الحقيقه تبان وفى كل الأحوال هند
ضحيه
سلامى وتحياتى

klmat said...

دنيا محيرانى
الموضوع مؤثر ويخوف خصوصا انه على الاطفال .اما ان الطبيب الشرعى متحامل
على هند طب ليه الله اعلم
فى احيانا ناس مش بيبان عليهم ستهم الحقيقى ممكن يبانو اصغر او اكبر من سنهم ان شاء الله الحقيقه تبان
والحمد لله ان العلم بيتقدم تخيلى لو
مافيش تحليل ال دى ان ايه
واخدوا بكلام الطفله كان حايضيع واحد برئ
سعدت جدا بمرورك وتعليقك واتمنى دايما
تحياتى وسلامى

klmat said...

الطائر الحزين
السلام عليكم
الموضوع موجود من زمان بس زاد
نتيجه المناخ الفاسد وزياده العشوائيات وقله الضمير
عدد الحالات التى تم التبليغ عنهااتنين وخمسين الف حاله ده اللى قاله محرر الحوادث فى الأهرام فى العاشره مساء
ده غير اللى مابلغوش
اكيد لازم يكون فى عقوبه رادعه
ورعايه فى الاسره وتحسين المناخ العام
والموضوع فى جميع الأحوال الكل مستنكره
ومشمئز منه وربنا يصلح حالنا يارب
سعدت جدا بتعليقك ومرورك
تحياتى وسلامى

klmat said...

the managwr
تحياتى لك وسعيده بمرورك عندى
ومتفقه معاك فى رأيك
وانا كتبت مجرد رأى ممكن اكون
صح او غلط انا مش عارفه
الحقيقه وطبعا ان بعض الظن اثم
ولحمد لله ان التقدم العلمى عن طريق التحليل والطب الشرعى والتحقيق نوصل للحقيقه
المهم ان يكون فى حل لحمايهالاطفال
شرفتنى

شاب مصرى said...

القضية دى كبرت قوي بسبب ان البنت سنها لا يتعدي 12 سنة وبقين ام في سن مبكر جدا .

واللي كبر الموضوع اننا بقى عندنا كام قناة فضائية وكلها بتقدم برامج نفس المضمون والكل بيسابق على الانفرادات والسبق .. وطبعا ده بيكون علي حساب الموضوعية لان الموضوع عشان يكون سخن ويشد الناس لازم يكون في تحيز ضد طرف والاكيد الكل لازم يكون مع البنت الصغيرة .. طب الولد طلع برئ ازاى نقدر نرجع كرامته وسمعته اللى راحت

klmat said...

عندك حق فى كل كلامك بس برضوالموضوع كبير
واكيد كلنا ضد المغتصب ومنحازين ضده
اما الشاب البرئ ربنا اظهر برأته
وابتلى بامتحان واكيد ربنا له حكمه
بس احنا مش عارفيين كل حاجه
والحمد لله ان فى وسائل علميه حديثه بتكشف الحقيقه
شرفتنى بمرورك وسعيده بتعليقك
ويارب تتكرر

Doba said...

انا بس ليا تعليق بسيط وهو - كل راع وكل مسئول عن رعيته - الام مسئولة مسؤلية تامة عن اولادها وتربيتهم على الصواب من كل جانب ومش كل واحدة تفتكر ان السعاده فى كتر الاطفال - المهم القدرة على تربيتهم التربية الدينية الصحيحة - ازاى الواحد يطلع بنت يدخل بتربيتها الجنة وازاى الواحد يربى ولد صالح يدعو لك بعد مماتك

هو ده الاساس والمنبع اللى واحد يبتدى يرسى عليه مبادئه مش اكتر

على فكرة قصة ساكن قصادى حلوة - عجبتنى قوى - بس حبيت اعلقلك عليها هنا احسن

تحياتى وسلامى --- هبة

و القادم....أجمل said...

السلام عليكم
ازيك يا جميل؟
يا رب تكوني بخير دايما
وحشاني جدا
معلش كنت مسافرة
بالنسبة لموضوع البنت
تحليلك سليم طبعا
الاسرة هيا المسئولة
أولا و اخيرا عن أولادها
و الحمد لله الواحد مكنش مقتنع برضوو
لأني فعلا لو قولنا سنها 11 سنة
صعب تبأه حامل
هنفترض انها حالة فريدة
صعب من اغتصاب مرة وحده يحدث حمل
!!!!!!
ربنا يرحمنا جميعا
و يهدي الجميع
--------
ربنا يحفظك يا قمراية
انتي و اسرتك
:)
تحياتي

klmat said...

doba عزيزتى
سعيده جدا يتعليقك وان ساكن قصادى عجبتك بترفعى من معنوياتى ربنا يخليكى وطبعا اوافقك الرأى فى كل ماكتبتى
واجيانا فى ام واب بيراعوا اولادهم كويس جدا بس للأسف بيتعرضوا للأغتصاب
زى اطفال حضانه المعادى من حوالى سنتين
من احد المدرسين المهم ان نعمل اللى
علينا ويكون فى عقاب رادع للجانى وربنا يحميكى ويبعد عنك وعن الجميع كل سوء
تحياتى وسلامى

klmat said...

القادم اجمل
السلام عليكم ورحمه الله وبركاته
الف حمد الله على السلامه
انتى كمان وحشتينى
ميرسى على تعليقك وربنا يظهر الحقيقه
ويهدى الجميع يارب
جانى تاج من عبير
ان شاء الله اهديه لك
يارب المذاكره تكون تمام
تمنياتى لك بالصحه والنجاح والسعاده
تحياتى وسلامى

Abeer said...

اول ما سمعت الحكاية ديه كان نفسي المجرم اللي عمل كدا في حق الطفلة ديه يتعاقب عقاب بشع جدا علشان يكون عبرة لغيره
بس لما فكرت في الكلام
حتة بلية صغيرة مكملتش 11 سنة .. وجاية في البرنامج متماسكة جدااا
وبتطالب بعمل تحليل ال
DNA
يا يلام .. وده عرفته منين ان شاء الله
وخاصة ان ظروف اسرتها مش منفتحة على العلم يعني

المهم دلوقتي ايه مصير الشاب ده
ازاي هيقدر يواصل حياته .. واهله كمان
وخاصة لو كان عنده اخوات بنات
مش عارفة والله

ربنا يرحمنا يارب ويستر علينا

klmat said...

عزيزتى عبير
المدونه بتنور لمابشوف اسمك
وطبعا سعيده اوى انك اهدتينى تاج وبأذن الله حاجاوب عليه واعذرنى على التأخير
واللهى ياعبير انا مش عارفه اقولك ايه
انا كلامى ده مجرد رأى لسه
نتائج التحقيق لم تظهر هما قالوا ان الولد مش هو الأب هل له علاقه بها ولا لأ
وبرضوا البنت صغيره وموقفها صعب اوى
وممكن تردد كلام مش عارفه ابعاده
انا شايفه ان الأب والأم عندهم قسوه
صعب اوى يعرضوها بالطريقه دى فى التلفزيون هى ضحيه ظروفها
المناخ كله مش تمام اغلب العاطلين
بيتعاطوا مخدرات وبتلعب بدمغاهم
وبيمتج عنها المشاكل دى
بكره الحقيقه تبان واحتمال اكون غلطانه انا كنت مش قادره اكتم رأيى
وفى كتير متوقعين غير كده ده
مجرد رؤيتى للموقف
ربنا يظهر الحق ويهدينا جميعا
سعدت جدا بتعليقك
تحياتى وسلامى

ما علينا said...

كل شيء جايز
وكل الاحتمالات واردة
انا اول مرة سمعت القصة
ما اقتنعتش برضوا
واعتقد اكيد في حلقة مفقودة
طالما في ناس كتير مش مقتنعه
والله اعلم

ربنا يعافينا

klmat said...

ما علينا
انتى قلتى خلاصه الخلاصه
ربنايعافينا ويهدينا جميعا يارب
سعدت بتعليقك
شرفتينى ولكى سلامى وتحياتى

طهقان said...

لا يسعني إلا ان أقول لك
ان تحليليك سليم مأئة في المائة


أحييك على هذه المدونة الجميلة