Monday, July 2, 2007

سيده الربطه الأولى



اسكن فى عماره البواب فيها عايش دور العمده بجد زى ما يكون اكبر راس فى البلد.

يقوم الصبح بدرى يغسل ويلمع العربيات ومراته تلم الاكياس اللى امام الابواب ويتم وضع الجرائد اليوميه كل حسب طلبه للسكان ويمسح السلم هو واولاده لحد هنا وكل ده عادى
بعد كده يلبس القفطان وطاقيه ويدخن سيجارته واذا شفته وانا رايحه شغلى لازم انا اللى اصبح عليه لاممكن ابدا يبدأ بالتحيه طبعا مش العمده واحنا من العوام
مهما كنت شايله شنطه سفر او اكياس حاجات جايبها للبيت لايعرض المساعده ابدا رغم انى بكرمه فى العطاء لأ واحس ان المفروض الطلب يكون على عرضحال دمغه ومختوم بختم النسر اصل هو له سيستم لازم اطلب ومهما دفعت لن تسمع منه شكر اوكتر خيرك ابدا بس بيؤدى المهمه
اما مراته وهى سيده الرابطه الأولى على رأى الفنان المبدع احمد زكى فهى سيده الربطه الأولى بمعنى الكلمه
تلبس جلابيه ودايما مطرزه والعيون متكحله والحلق مدلدل لو صبحت او مسيت عليها لاتسمع صوتها فهى ترد التحيه بأماه بسيطه طبعا مش مدام الراس الكبيره
المهم من فتره كنت راجعه من شغلى وعايزه الحق اعمل السلطه والرز وكنت محتاجه اشترى شاى والسوبر ماركت تحت البيت على طول لكن زحمه قوى وعلشان مستعجله اديت بنتهم الصغيره ومشروع صغير لسيده رابطه فى المستقبل تجيب لى الشاى واديتها 50 جنيها
مافيش 5 دقائق ولقيتها جت ومعاها الشاى الله ينور

اوم ايه قلت لها فين الباقى قالت لى فى اى وقت يا تنت وانتى نازله فوتى خدى الباقى من السوبر مارجت اصل مافيش فكه


بصراحه اتغاظت خصوصا ان فى اكتر من عامل فى السوبر ماركت ونظام واردى قلت لها شوفى يابنتى هاتى كذا وكذا شويه حاجات علشان اضمن حقى مش عارفه ليه سيدات الربطه الأولى والبراعم الجديده شادين حيلهم قوى





















12 comments:

mraghy said...

السلام عليكم ورحمة الله و بركاته
اولا حقيقي اسم مدونة حضرتك شدني جدااهني حضرتك علي الاسم

ثانيا هاقول لحضرتك بكل بساطه ليه البواب عامل فيها عمده .... لانه بمنتهى البساطه لو حسبتي دخل حضرتك او دخل اي حد ساكن معاكم في نفس العماره هاتلاقي دخله هو اعلي من اي حد فيكم
يبقا بالذمه ما يعملش فيها ليه عمده

انا شخصيا اعرف بواب بطل يغسل العربيات او يلم اكياس الزباله و جاب مساعدين ليه

تقبلي مروري

klmat said...

سعيده جدا بمرورك وتعليقك . ووجهه نظرك معقوله واشكرك على مرورك وممكن قريب نشوف له سكرتاريه

الطائر الحزين said...

السلام عليكم

ثلاثة لايكلمهم الله يوم القيامة ، ولا ينظر إليهم ، ولا يزكيهم ، ولهم عذاب أليم: شيخ زانٍ ، وملك كذّاب ، وعائل مستكبر

اعوذ بالله ان اكون فقير مستكبر

هناك فرق بين طلب الحاجة بعزة وبين ما تصفينة
وفى النهاية كل مبيسر لما خلق له

تحياتى

ما علينا said...

والله كويس انه لسه بيغسل العربيات
والسيدة قرينته بتلم اكياس الزبالة
هاتنهبوا بقى

وبلاش الحقد الطبقى دا


اسلوبك لذيذ جدا
وبصراحة اتغاظت معاك وحسيت
بيكي اوي علشان الخمسن جنيه


شرفتيني جدا بمرورك عندي
واسعدتني بجميل تعليقك

اتمنى تنوريني دايما

تخاريف دكتور said...

انتى ظالمة الناس قوى يا كلمات

يهمنى اعرف ال50 جنيه حصلها ايه؟

klmat said...

السلام عليكم ورحمه الله وبركاته
سعدت جدا بمشاركتكم وتعليقاتكم واتمنى ان تدوم فى نوع من الناس يكون بطبيعته معندوش المجامله ملغى من قاموسه كلمه شكرا وما شابه وممكن فعلا كان يتمنى ان يكون عمده فتقمص الشخصيه وبيدخل فيها عوامل التربيه بدليل ان اولاده نفس النظام وممكن بيعمل كده علشان يحد من كميه الطلبات والله اعلم
بالنسبه للخمسين جنيه قبل ما الاموره الصغيره تنزل طلبت منها تجيب حاجات من السوبرماركت بما يوازى الباقى والحمد لله مره تانيه اشكركم واتمنى لكم التوفيق

klmat said...

تخاريف دكتور
اسعدنى مرورك . انا وصفت الاحداث والشخصيه كما هى . ومش بحب الظلم واللهى طب اعرف انا ظلمته فى ايه!!! ومدونتك لطيفه جدا

و القادم....أجمل said...

السلام عليكم
أنا معاكي و الله
لسبب واحد ان نفس المشكلة معانا
يعني مثلا تكوني بتعامل الاشخاص دي
( الأمن مثلا بتاع العمارة)
بكل احترام و محتسبة نيتك عند الله
تلاقي الرد غير المتوقع
طبعا مش نقول نندم
لأ طبعا مدام النية خير
يباه الحمد لله
بس الواحد بيستغرب برضوو

تحياتي و حبي لك ِ

klmat said...

السلام عليكم ورحمه الله وبركاته
اشكرك جدا على مرورك اتشرفت جدا
وأحييك على اسم مدونتك ومحتواها اسعدنى جدا تعليقك

Anonymous said...

I think klam el m3gbeen w el comments bta3t el nas kfaya ya rb 7'liki lina

Sherif

klmat said...

ابنى شريف
اشكرك جداعلىمتابعتك وعلى التعليق وربنايكتب لك كل الخير يارب

Rodrigo said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Se você quiser linkar meu blog no seu eu ficaria agradecido, até mais e sucesso. (If you speak English can see the version in English of the Camiseta Personalizada. If he will be possible add my blog in your blogroll I thankful, bye friend).