Sunday, July 1, 2007

دوشه يا دنيا دوشه

الواحد مننا يرجع من شغله عايز يستريح شويه بعد الغدا
من الزحمه والحر ويحاول يسرح شويه مع مج شاى ظريف او حاجه ساقعه او يحب ينام لو ساعه ياخد فاصل يعنى

تلاقى شادر عزا وصوت القرآن مسمع الحى اللى جنب اللى جنبنا

علشان تكلم اللى جنبك لازم تزعق علشان يسمعك ده عزا طب لو فرح بردوا تلاقى الأغانى والزغاريد بصوت زى ما يكون المعازيم طرش
فى اشاره المرور 100 عربيه واقفه وكل اللى وراها بيدى كلاكسات

وبعدين مايمنعش تلاقى خناقه فى الشارع وتسمع الفاظ مؤذيه شويه وتنفض الخناقه الحمد لله يعدى بتاع البكيا

شويه والعنب العنب العنب


حاجه تتعب الأعصاب واكيد لها تأثير سلبى على المود .ده بالأضافه ان الكل مش ناقص

نفسى فى شويه هدوء لله

على فكره ده بيحصل مش فى الأحياء الشعبيه

لأ أفى كل الأحياء خلاص ما بقاش فى شعبى وراقى

كله محصل بعضه تلاقى اكوام الزباله فى ارقى الأحياء

ياسلام لماتعدى على مدرسه وتلاقى مكتوب على الجدران

مدرستى نظيفه جميله ومتطوره

وتلاقى امام الكلام ده اكوام القمامه حاجه تكسف

والغريب ان كل مدرسه مكتوب على جدرانها العباره دى تلاقى امام العباره بالظبط الزباله وكأن


ده شعار المدرسه بطريقه عمليه

مش كفايه ان الدنيا زى مابيقول اخونا عدويه زحمه يادنيا زحمه لأكمان

دوشه يادنيا دوشه

دوشه ودماغى وجعانى .نفسى اشوف محافظ يأخد قرار بمنع كل الأصوات العاليه ويطبقه واللهى الناس حاتحس براحه نفسيه وباقى المحافظين حايقلدوا .على فكره حاولت مره اكون عمليه وكنت باعاتى من صداع رهيب وابنى كان عنده تانى يوم امتحان قلت اكلم اصحاب الفرح كان الرد عقبال عندك وعايزين نفرح وانشاء الله ابنك ناجح!!!!مره تانيه كان عزا وصوت الشيخ بيزعق بطريقه مزعجه جدا والميكرفون على اعلاه مع صدى صوت اتصلت بالشرطه فى الحقيقه وصلوا بس والشادر بيتفك ده لما حاولت ابدأ اكون عمليه بس هى لازم تيجى بقرار وعقوبه الى ان نتعود على الهدوء.










3 comments:

Anonymous said...

Klamk mzbot w ana sh7'syn mret bih

Sherif

klmat said...

اعتقد ان اغلبنا بيشعر بها بس بتفرق لما الواحد بيحاول يكون ايجابى وبعدين تكون النتيجه اللى انت عارفها
اشكرك جدا

Hadota .. حدوتة said...

جيتى على الجرح
انا فعلا برجع ابقى عاوزة اتغدى واعيش بمزاج مع كوباية شاى
دى قمة سعادتى بعد يوم طووووويل
وبعدها انام مع انه غلط على الصحة
بس بحب كده
اعمل ايه؟؟؟
ولسه هنام يابنتى وابقى مدشدشة الاقيلك بقى المكرفونات والافراح والحاجات دى
اما ابقى هطق
لا عارفة انام ولا اذاكر ولا اخرج
لان مفيش صحة ولا دماغ
ويا سلام بقى لو جنب البيت سيبر
ومشغل اغانى للصبح
اصلهم شباب بعد الشر علينا يعنى
ويفضلوا فاتحين الصوت قد كده للصبح
واستغرب الناس سيباهم
ولا لو قهوة بقى
وتسمعى كل الافلام والمسلسلات فى عز الليل من مكانمك على السرير
حاجة تفرس
تحيااااتى
فكرة البوست حلوة اوى