دوشه يا دنيا دوشه

الواحد مننا يرجع من شغله عايز يستريح شويه بعد الغدا

من الزحمه والحر ويحاول يسرح شويه مع مج شاى ظريف او حاجه ساقعه او يحب ينام لو ساعه ياخد فاصل يعنى

تلاقى شادر عزا وصوت القرآن مسمع الحى اللى جنب اللى جنبنا

علشان تكلم اللى جنبك لازم تزعق علشان يسمعك ده عزا طب لو فرح بردوا تلاقى الأغانى والزغاريد بصوت زى ما يكون المعازيم طرش
فى اشاره المرور 100 عربيه واقفه وكل اللى وراها بيدى كلاكسات

وبعدين مايمنعش تلاقى خناقه فى الشارع وتسمع الفاظ مؤذيه شويه وتنفض الخناقه الحمد لله يعدى بتاع البكيا

شويه والعنب العنب العنب

حاجه تتعب الأعصاب واكيد لها تأثير سلبى على المود .ده بالأضافه ان الكل مش ناقص

نفسى فى شويه هدوء لله

على فكره ده بيحصل مش فى الأحياء الشعبيه

لأ أفى كل الأحياء خلاص ما بقاش فى شعبى وراقى

كله محصل بعضه تلاقى اكوام الزباله فى ارقى الأحياء

ياسلام لماتعدى على مدرسه وتلاقى مكتوب على الجدران

مدرستى نظيفه جميله ومتطوره

وتلاقى امام الكلام ده اكوام القمامه حاجه تكسف

والغريب ان كل مدرسه مكتوب على جدرانها العباره دى تلاقى امام العباره بالظبط الزباله وكأن

ده شعار المدرسه بطريقه عمليه

مش كفايه ان الدنيا زى مابيقول اخونا عدويه زحمه يادنيا زحمه لأكمان

دوشه يادنيا دوشه

دوشه ودماغى وجعانى .نفسى اشوف محافظ يأخد قرار بمنع كل الأصوات العاليه ويطبقه واللهى الناس حاتحس براحه نفسيه وباقى المحافظين حايقلدوا .على فكره حاولت مره اكون عمليه وكنت باعاتى من صداع رهيب وابنى كان عنده تانى يوم امتحان قلت اكلم اصحاب الفرح كان الرد عقبال عندك وعايزين نفرح وانشاء الله ابنك ناجح!!!!مره تانيه كان عزا وصوت الشيخ بيزعق بطريقه مزعجه جدا والميكرفون على اعلاه مع صدى صوت اتصلت بالشرطه فى الحقيقه وصلوا بس والشادر بيتفك ده لما حاولت ابدأ اكون عمليه بس هى لازم تيجى بقرار وعقوبه الى ان نتعود على الهدوء.